1-2. Ndaga itshi muangelo mumoshi gawambelele akhetu gu malumba a Yesu? Itshi Yesu hakhenji gawambelele akhetu ene?

MU LUSUGU lua 16 Nizana ya givo 33 gia Tangua Dietu, akhetu avula akhalele mutumagela Nzambi ayile gu fundo dia fundiwe Fumu Yesu. Akhalele nu gikenene giavula. Hafundjiwe Yesu, matangua akhalele abalega gale 36. Tangua ahetele gu malumba, akhalele nu maji a vumba diabonga ha gumumba mu muila, uvi asangele malumba agithuhu! Muanjelo mumoshi wawambelele akhetu ene egi, Yesu wafuzumuga gale. ‘Tadienu udi muya gutuama dienu gu Galile, mbamumumona guene.’—Mat. 28:1-7; Luka 23:56; 24:10.

² Hakatugile akhetu ene gu malumba, Yesu wasuenele hehi nawo waawambelele egi: ‘Ndenu muwambele an’etu ha guya gu Galile. Guene mbaangumona.’ (Mat. 28:10) Ndaga ya thomo Yesu gatshitshile gungima dia gufuzumuga guenji yakhalele gubungisa alandudi enji. Mu gudibungisa guene, waahanene malongo a ndando yavula!

3-4. Mukunda natshi tudi muzuela egi mukhuala udi mu Matayo 28:19, 20 wahanewego phamba gudi apostolo? (Tala gifuanesa holu dia gizula.)

³ Tanga Matayo 28:16-20. Tangua Yesu gabungishile alandudi enji, waawambelele ndaga yatadila mudimo wabalega ndando akhalele naye gukalagala mu siekle ya thomo. Mudimo wene udi luholo lumoshi nu owu tudi mutshita mangino. Wazuelele egi : ‘Ndenu, mubuise athu a ifutshi yagasue alandudi, . . . mualongese ha gutumaga ndaga jiagasue ngamiwambela.’

⁴ Yesu watumine alandudi enji agasue ha gulongesa. Ndaga  yene yakhalelego mutadila phamba apostolo enji 11. Mukunda natshi tuazuela ngenyi? Tangua Yesu gakhalele muhana mukhuala owu holu dia mulundu gu Galile, gakhalelego phamba nu apostolo. Luholo lutshi tuayijiya? Jiya egi muanjelo wawambelele akhetu egi: ‘Mbamumumona  [ gu Galile].’ Idi mumonega egi, akhetu ene akhalele nji mukatshi dia athu akhalele a gudibungisa guene. Uvi guahuile ndo. Mupostolo Phaula wazuelele egi ‘Yesu wamuenegene nji gudi alandudi enji gubalega 500 mu tangua dimoshi.’ (1 Kol. 15:6) Wadimonele nawo gui?

5. Ndaga jitshi tudi mulonguga mu mukanda wa 1 Kolinto 15:6?

⁵ Tudi nu ndaga jiabonga jidi gututuma ha guzuela egi, mu 1 Kolinto 15:6 Phaula wakhalele muzuelela gudibungisa gua gu Galile gudi mu Matayo mukhapo 28. Ndaga jitshi? Ndaga ya thomo idi egi alandudi avula a Yesu akhalele enya gu Galile. Hene, yakhalelego lamba ha gubungisa athu avula holu dia mulundu wa gu Galile, gubalega guabungisa monzo ya muthu mumoshi gu Yelusalema. Ndaga ya Mbadi idi egi: gungima dia gufuzumuga guenji, Yesu wadimonele nu apostolo enji 11 gu Yelusalema. Gula nga Yesu wakhalele nu funu ya gutuma phamba apostolo enji ha guya mulongesa nu gubuisa athu alandudi, nga waatumile hakhalele ene gu Yelusalema, gakhalelego naye guatamega nu akhetu nu athu ako ha guya gudimona luko nawo gu Galile.—Luka 24:33, 36.

6. Luholo lutshi mukhuala udi mu Matayo 28:20 wa gubuisa athu alandudi udi mukalegewa mangino? Luholo lutshi athu adi mutumagela Mukhuala wene?

⁶ Ndaga ya thathu idi egi, Mukhuala wene wakhalelego mutadila phamba Aklisto a mu siekle ya thomo. Luholo lutshi? Ha gusugisa, Yesu wawambelele alandudi enji egi: ‘Ngudi n’enu masugu agasue uu nu gu gisugishilo gia mavu awa.’ (Mat. 28:20) Gifua muazuelele Yesu, mangino mudimo wa gubuisa athu ako alandudi udi mukalegewa muavula sha. Tangiza gale! Givo nu givo, athu hehi nu 300 000 ana gubua alandudi a Yesu Klisto, ana gubatijiwa nu ana gubua Matemue a Yehowa.

7. Itshi tuza mu zuelela mu longo edi? Mukunda natshi?

⁷ Athu avula adi mulonguga Biblia adi mukula mu nyuma nu adi mubatijiwa. Uvi athu ako, ana khala nu woma wa gubua alandudi. Ana suanguluga ha gulonguga Biblia, uvi ana kula ndo mu nyuma ha gubatijiwa. Gula udi mulonguga Biblia nu muthu, mukuatese ha gukalegela ndaga gadi mulonguga, nu ha gubua mulandudi wa Klisto. Longo edi diza gutumumonesa luholo tuajiya gukuata mitshima ya athu tuana gulonguga nawo Biblia nu luholo tuajiya guakuatesa ha gukula mu nyuma. Mukunda natshi idi nu ndando ha guzuelela ndaga eyi? Handaga matangua ako, tuajiya guzula desizio dia gulandula gulonguga Biblia nu muthu nga gumubemba.

8. Mukunda natshi yana gukhala lamba matangua ako ha gukuata mitshima ya athu tuana gulongesa Biblia?

⁸ Yehowa wana suanguluga egi athu amukombelele handaga ana gumuzumba. Felela dietu didi dia gukuatesa alongogi a Biblia ha gujiya egi Yehowa wana gudisagesa mukunda nu muthu wagasue mukatshi diawo, nu wana guazumba muavula. Tudi naye guakuatesa ha gumona Yehowa gifua ‘tata wa an’a shiye nu mubambi wa akhetu a gafunda.’ (Ngi. 68:5) Gula alongogi a Biblia akotelesa diago egi Nzambi wana guazumba, ene nji mbasendesa gumuzumba. Uvi, yajiya gukhala lamba gudi alongogi ako a Biblia ha gumona Yehowa gifua tata wa guzumba, handaga a tata awo, ana guamonesela ndo guzumba guakola. (2 Tim. 3:1, 3) Tangua udi mulonguga Biblia nu muthu, zuelela makalegelo abonga a Yehowa ana gutusuanguluisa. Kuatesa alongogi a Biblia ha gujiya egi Nzambi wetu wa guzumba wana tshigina egi ahete monyo wa ivo nu ivo, nu udi hehi ha guakuatesa ha guheta monyo wene. Ndaga itshi iko tuajiya gukalagala?

9-10. Mikanda itshi tudi naye gukalegela ha gulonguga nu muthu Biblia? Mukunda natshi tudi naye gukalegela Mikanda yene?

 ⁹ Kalegela mikanda eyi “Itshi Biblia Yajiya Gutulongesa?” nu “Restez dans l’amour de Dieu.” Mikanda eyi yasonegewe ha gutukuatesa ha gukuata mitshima ya athu tuana gulongesa Biblia. Hagufezegesa, mukhapho wa thomo wa mukanda Itshi Biblia Yajiya Gutulongesa, udi muhana mvutu gu mihu eyi: Nzambi wana gututangiza nga wakhala nu shidi? Luholo lutshi Nzambi ana gudivua tangua athu ana gumona malamba? Wajiya gubua futa dia Yehowa ba? Henyaha tuzuelele mukanda Restez dans l’amour de Dieu. Mukanda owu, mbawukuatesa alongogi a Biblia ha gujiya egi gukalegela mikhuala ya Biblia gudi mukunda nu gubonga guawo, nu luholo ajiya gusuena hehi nu Yehowa. Ngatshima, walongesele gale athu avula Biblia mu njila ya mikanda eyi, udi naye gudilondega muabonga gutuama dia gulonguga nu muthu wagasue, nu gujiya muabonga ndaga gadi najio funu ha gukula mu nyuma.

¹⁰ Itshi wajiya gutshita gula muthu udi mulongesa Biblia wasuaguluga gulonguga ndaga idi mu mukanda uko, uvi mukanda wene ushigo  mukatshi dia Ikadigilo ya Gulongesela Biblia? Wajiya gumudijiga ha gutanga mukanda wene hakhenji. Uvi, mudi naye gulandula gulonguga nenji mukanda tuana gulongesela athu Biblia.

11. Tangua ditshi tudi naye gusendesa nu gisambu nga gusugisa nu gisambu hatudi mulonguga Biblia nu muthu? Luholo lutshi tudi naye gukuatesa muthu ha gujiya funu ya gisambu?

¹¹ Kalagalenu gisambu gutuama dia gusendese gulonguga. Mudi naye gusamba gutuama dia gusendesa gulonguga nu tangua muasugisa. Mudi naye gutshita ngenyi, gula muana longuga gale n’enji phoso jiazonda gungima. Tudi naye gukuatesa muthu udi mulonguga Biblia ha gujiya egi, tuajiya gukotelesa muabonga Mbimbi ya Nzambi phamba gula tudi mutoga ukuateshi wa nyuma ya Nzambi. Alongeshi a Biblia ana kotelesa gishina ana samba gutuama egi alonguge Biblia nu muthu. Ana tanga Yakoba 1:5, idi muzuela egi: ‘Gula muthu mumoshi mukatshi dienu gashigo nu ndunge, muene ajitoge gudi Nzambi.’ Mulongeshi wajiya guhula muthu adi mulongesa Biblia egi: “Luholo lutshi tuajiya gutoga ndunge gudi Nzambi?” Ngenyi muthu udi mulonguga Biblia mbawuhana mvutu egi tudi naye gusamba Nzambi.

12. Luholo lutshi wajiya gukalegela Ngimbo 139:2-4 ha gukuatesa muthu wana longugesa Biblia ha gujiya luholo gadi naye gusamba Yehowa muabonga?

¹² Longesa muthu udi mulonguga nenji Biblia luholo lua gusamba. Muwambele egi Yehowa wana suanguluga guvua isambu yenji. Wambela luko muthu muene egi, wajiya guwambela Yehowa ndaga jiaye jiagasue mu gisambu, ikhale jinyi wajiyilego guwambela muthu muko. Gungima muwambele egi Yehowa wana gujiya ndaga jia moshi’a mutshima wetu. (Tanga Ngimbo 139:2-4.) Tuajiya gumukuatesa ha gutoga ukuateshi gudi Nzambi ha gusombegesa utangijilo wenji wabola, nu ha gusombegesa makalegelo abola. Tangiza gale ndaga eyi, gula muthu yonu wana longuga gale Biblia wasendesa gutshita fete jia aphagano, muene mujiya egi ndaga yene idi yabola, uvi matangua ako udi musuanguluga nu ndaga jia fete yene. Itshi wajiya gutshita? Mutoge ha guwambela Yehowa giamatshidia luholo gadi gudivua nu atoge ukuateshi ha guzumba phamba ndaga jiana zumba Nzambi.—Ngi. 97:10.

13. (a) Mukunda natshi tudi naye gutamega muthu tuana longesa Biblia ha guza mu gudibungisa gua mu hungu gula luholo ludi guene? (b) Itshi tuajiya gutshita hagula muthu tuana longesa Biblia gavuigo musonyi tangua gaza mu gudibungisa gua mu hungu?

¹³ Tamega muthu wana longuga nenji Biblia ha guza mu gudibungisa gua mu hungu gula luholo ludi guene. Ndaga muthu muene mbagavua nu mbagamona mu gudibungisa gua mu hungu, jiajiya gukuata mutshima wenji nu gumukuatesa ha gukula mu nyuma. Mutalese video Ndaga Jitshi Jiana Gukalegewa mu Inzo ya Ufumu? nu mutamege ha guza mu gudibungisa. Gula luholo ludi guene, wajiya gumuhana mbongo jia transport. Idi ndaga yabonga ha guya nu alongeshi a gudisha tangua mudi mulonguga nenji Biblia. Gutshita ngenyi mbagumukuatesa ha gujiya aphangi ako a mu hungu. Tangua mbadiza muene mu gudibungisa, mbagashigo mukhala nu musonyi wavula.

14. Luholo lutshi tuajiya gukuatesa muthu tuana longesa Biblia ha gukula mu nyuma?

¹⁴ Felela dietu didi dia gukuatesa alongogi a Biblia ha gukula mu nyuma. (Ef. 4:13) Gula muthu watshigina gulonguga Biblia, wana kamba gujiya gubonga mbagaheta mu gulonguga guene. Gula guzumba guenji mukunda nu Yehowa guavula, mbawukamba luholo lua gukuatesa athu ako, nu aphangi a mu hungu. (Mat. 22:37-39) Gula luholo ludi guene, wajiya guwambela muthu wana longesa Biblia egi, tuana hana musomonyi ha gukuatesa mudimo wa gulongesa.

15. Luholo lutshi tuajiya gukuatesa muthu tuana gulongesa Biblia ndaga gadi naye gutshita gula mulonga wamubuila?

 ¹⁵ Wambela muthu wana longesa Bilbia ndaga gajiya gutshita gula ndaga yamubuila. Tangiza egi muthu wana longuga nenji Biblia udi mulongeshi, uvi khenji gabatijiwa ndo. Waguwambela egi, phangi mumoshi mu hungu wamukalegela ndaga imoshi yabola. Hafundo dia gubelesa nga gu bingisa muthu mumoshi, muwambele ndaga Biblia idi gumutoga ha gutshita. Wajiya gutotesela phangi muene, nga ndo wajiya gumuwambela gubola guenji nu gisemo giagasue, nu guzumba hagula ‘avutule phangi’enji mu njila yabonga.’ (Fuanesa nu Matayo 18:15.) Mukuatese ha gulonda ndaga mbagazuela nu phangi enji. Mudijige luholo lua gukalegela JW Library^®, nga Guide de recherche des Témoins de Jéhovah, nu jw.org^® ha gulonguga maluholo avula agukalagala ndaga gula mulonga wamubuila. Gula walongula luholo lua gulonda ndaga nu aphangi ako gutuama dia gubatijiwa, mbawukhala nu ufuta wabonga nu aphangi mu hungu tangua mbagabatijiwa.

16. Mukunda natshi idi nu ndando egi tutamege alongeshi ako tangua tudi mulonguga Biblia nu muthu?

¹⁶ Tangua udi muya mulongesa muthu wana gulonguga nenji Biblia, wajiya guya nu aphangi a mu hungu nga nu mutadi muwendji tangua gaza mutala hungu dienu. Mukunda natshi? Gula tuakatula ndaga tuazuelela gutuama, idi nu ndando handaga, alongeshi ako ajiya gumukuatesa mu maluholo ako adi, aye wamukuatesele ndo. Tufezegese, muthu wana longesa Biblia wazula desizio dia gubemba gunua makaya, uvi matangua ako wasendesa genji gunua luko. Ha ndaga eyi, tamega mulongeshi muko wabingile khadilo diene, ngatshima matangua ako wakhalele muvutugila gunua makaya. Ndenu nenji ha gulongesa muthu owu. Phangi muene, wajiya gumuhana malongo abonga ajiya gukuatesa muthu udi mulonguga Biblia. Gula wamona egi ushigo watagana ha gulonguga nu muthu muene gu meso a phangi udi nu eksperianse, toga phangi muene alonguge nenji mu tangua diene. Ngenyi, muthu muene mbawuheta malongo avula gudi alongeshi adi nu eksperianse ya gudisha. Jiya egi felela dietu didi dia gukuatesa muthu udi mulonguga Biblia ha gukula mu nyuma.

17-18. Ndaga tshi udi naye gutadila gula udi mutshigina gubemba gulonguga nu muthu?

¹⁷ Gula muthu wana longesa Biblia gashigo mukula mu nyuma, wajiya gudihula egi, ‘Ngudi naye gubemba gulonguga nu muthu muene ba?’ Gutuama egi uzule desizio dia gubemba gulonguga n’enji, udi naye gutadila makalegelo enji. Athu ako ana zula tangua diavula ha gukula mu nyuma uvi ako ndo. Dihule egi, ‘Muthu ngana longesa Biblia wana tshita ngolo ha gukula mu nyuma ha gutadila ndaga jia lujingu luenji ba?’ ‘Wasendesa gale ‘gutumagela,’ nga gukalegela ndaga gadi mulonguga ba?’ (Mat. 28:20) Muthu udi mulonguga Biblia wajiya gukula mu nyuma mage-mage, uvi udi naye gusombegesa mu lujingu luenji.

 ¹⁸ Itshi udi naye gutshita gula matangua ako, muthu wana longesa Biblia udi mumonesa egi gashigo musuanguluga nu gulonguga? Tangiza gale egi muthu wana longuga nenji Biblia, wamanesele gale mukanda gutulongesa, nu wasendesele gale gulonguga mukanda Restez dans l’amour de Dieu. Uvi khenji gayile nga mu gudibungisa gumoshi ndo, nga guza mu gudibungisa gua guwunguluga gua gufua gua Yesu! Matangua ako, wana tuna gulonguga mukunda nu ima ishigo nu funu. Gula idi ngenyi, udi naye gumuwambela ndaga haphelo. *

19. Itshi wajiya guhula muthu yonu gashigo luko musuanguluga gulonguga Biblia, nu ndaga jitshi udi naye gutadila?

¹⁹ Wajiya gumuhula egi: Ndaga tshi ya lamba yana gugukanga njila ha gubua Temue wa Yehowa?’ Wajiya guguhana mvutu egi, ‘Ngana tshigina gulonguga Biblia, uvi mbangushigo mubua Temue wa Yehowa nga hazonda!’ Gula wana longuga gale uvi gungima wamonesa khadilo edi, wajiya gubemba gulonguga n’enji. Nga ndo, muthu muene wajiya gugudijiga mukunda natshi gashigo mukula mu nyuma. Yajiya gukhala egi, muthu muene wana tangiza egi gajiyilego gulongesa inzo nu inzo. Gula wajiya ndaga idi gumusagesa, mbawudi mumona luholo wajiya gumukuatesa.

20. Luholo lutshi Makalegelo 13:48 ajiya gutukuatesa ha gujiya gula tudi naye gulandula gulonguga Biblia nu muthu nga ndo?

²⁰ Ndaga ya gikenene idi egi, alongogi ako a Bilbia adi gifua enya Isalele a mu tangu dia Ezekiele. Yehowa wawambelele Ezekiele mukunda nu athu ene egi: ‘Tala! Gudi ene, aye udi gifua lungimbo lua guzumba, ludi muyimbiwa nu dijui diawaha, nu ludi muyimbiwa muabonga nu gishigilo gia miziki. Ene mbaategelela mbimbi jiaye jiagasue, uvi mbaashigo gujitumagela ndo.’ (Ezek. 33:32) Yajiya gukhala lamba ha guwambela muthu tuana longuga nenji Biblia egi mbatushigo luko mulonguga. Uvi, ‘tangua diasala diazonda.’ (1 Kol. 7:29) Ha fundo dia gubagelesa tangua ha gulonguga nu muthu gashigo mukula mu nyuma, tudi naye gukamba muthu udi nu “matangi abonga ha guheta monyo wa ivo nu ivo.”—Tanga Makalegelo 13:48, NWT.

21. Mukhapho wetu wa givo 2020 udi muto wa lunene egi tshi, nu mbawutukuatesa ha gutshita itshi?

²¹ Mukhapho wetu wa givo 2020, mbawutukuatesa ha gutangiza luholo tuajiya gudilonda ha gubuisa athu alandudi. Mukhapho wene udi mbimbi jiazuelele Yesu mu gudibungisa guabalega ndando holu dia mulundu wa gu Galile egi: ‘Ndenu, mubuise athu . . . , alandudi ami. Muabatize.’—Mat. 28:19.