1-2. Wanem nao wanfala angel talem lo olketa woman lo datfala tomb, and wanem nao Jesus seleva talem lo olketa?

LO EARLY morning blo Nisan 16, 33 C.E., samting olsem 36 hour bihaen olketa berem Lord Jesus Christ, wanfala grup blo olketa faithful woman wea barava sorre, olketa go lo datfala tomb. Olketa go lo there for putim olketa perfume and oil wea smel naes lo body blo Jesus, bat taem olketa arrive olketa sapraes for faendaot datfala cave hem emti nao! Wanfala angel talem olketa woman hia dat Jesus hem laef bak nao, and hem talem olketa: “Hem bae go firstaem long iufala long Galilee and taem iufala go long there iufala bae lukim hem.”—Matt. 28:1-7; Luke 23:56; 24:10.

² Bihaen olketa woman hia lusim datfala ples, Jesus seleva kam lo olketa and talem olketa: “Go talem olketa brata bilong mi for go long Galilee and bae olketa lukim mi long there.” (Matt. 28:10) Luk olsem Jesus garem samfala important instruction for givim lo olketa disaepol blo hem, bikos disfala meeting hem first samting wea hem arrangem bihaen hem resurrect!

3-4. Why nao iumi savve sei datfala komand lo Matthew 28:19, 20 hem no for olketa aposol nomoa? (Lukim piksa lo kava.)

³ Readim Matthew 28:16-20. Lo datfala meeting wea Jesus arrangem, hem talem olketa disaepol blo hem abaotem wanfala important waka for olketa duim lo first century, datfala sem waka tu iumi duim distaem. Jesus sei: “So iufala go and teachim pipol long evri kantri for kamap disaepol bilong mi . . .  Teachim olketa for followim evri samting wea mi laekem iufala for duim.”

⁴ Jesus laekem evri follower blo hem for preach. Hem no givim disfala komand for 11-fala faithful aposol blo hem nomoa. Hao nao iumi sure lo datwan? Tingim diswan, waswe, olketa aposol nomoa stap lo maunten lo Galilee taem Jesus givim datfala komand for teachim pipol for kamap disaepol? Tingim hao datfala angel tok olsem lo olketa woman lo datfala tomb: “Taem iufala go long [Galilee] iufala bae lukim hem.” So masbi olketa faithful woman hia tu stap lo datfala meeting. And nara samting, aposol Paul talem hao “winim 500 brata nao lukim [Jesus].” (1 Cor. 15:6) Lo wea nao olketa lukim hem?

5. Wanem nao iumi lanem from 1 Corinth 15:6?

⁵ Iumi garem olketa gudfala reason for sei toktok wea Paul talem lo 1 Corinth 15:6 hem minim datfala meeting lo Galilee wea Matthew chapter 28 storyim. Wat nao olketa reason hia? First reason, staka lo olketa disaepol blo Jesus olketa from Galilee. So hem mek sense for hem meet witim staka pipol olsem lo wanfala maunten lo Galilee, winim for go lo wanfala haos lo Jerusalem. Mek-tu reason, bihaen Jesus resurrect, hem meet finis witim elevenfala aposol blo hem lo wanfala haos lo Jerusalem. Sapos Jesus laek for talem komand for preach and teachim pipol for kamap disaepol lo olketa aposol nomoa, bae hem duim datwan finis lo Jerusalem winim for hem askem olketa aposol, olketa woman hia, and olketa narawan for meetim hem lo Galilee.—Luke 24:33, 36.

6. Hao nao toktok lo Matthew 28:20 hem fitim taem blo iumi, and hao big nao datfala waka distaem?

⁶ Tingim mek-thri reason. Komand blo Jesus for teachim pipol for kamap disaepol, hem no for olketa Christian wea stap lo datfala taem nomoa. Hao nao iumi savve lo datwan? Taem Jesus givim instruction lo olketa follower blo hem, hem talem disfala toktok: “Bae mi stap witim iufala go kasem taem wea world hem finis.” (Matt. 28:20) Wanem Jesus talem hem kamap tru distaem, bikos disfala waka for teachim pipol for kamap disaepol hem barava gohed gud. Tingim! Klosap 300,000 pipol nao baptaes each year and kamap Jehovah’s Witness and disaepol blo Jesus Christ!

7. Wanem nao bae iumi storyim, and why nao olsem?

⁷ Staka wea studyim Bible, olketa gohed gud lo study gogo olketa baptaes. Bat samfala wea gohed studyim Bible, olketa hol bak for kamap disaepol. Olketa enjoyim wei for study, bat olketa no gohed gud mekem olketa fit for baptaes. Sapos iu garem wanfala Bible study, mifala sure iu laekem student blo iu for followim wanem hem lanem, and for kamap disaepol blo Christ. Disfala study bae storyim hao for kasem heart blo student and hao for helpem hem for grow lo spiritual wei. Why nao iumi need for storyim disfala topic? Bikos samfala taem, maet bae iumi need for disaed sapos iumi bae gohed for study or iumi bae stop for study witim hem.

8. Why nao hem no isi for kasem heart blo student?

⁸ Jehovah laekem pipol for worshipim hem bikos olketa lovem hem. So goal blo iumi hem for helpem olketa Bible student blo iumi for luksavve Jehovah barava tingim olketa wanwan and hem lovem olketa tumas. Iumi laek for helpem olketa for ting lo Jehovah olsem hem dadi blo olketa wea no garem dadi and man for lukaftarem olketa widow. (Sams 68:5) Taem student blo iumi start for tinghae lo wei wea God lovem hem, datwan bae kasem heart blo hem and mekem grow love blo hem for God. Samfala student maet faendem hem hard for ting lo Jehovah olsem Dadi wea lovem olketa, bikos maet real dadi blo olketa no  showimaot love and kaen lo olketa. (2 Tim. 3:1, 3) So, taem iu studyim Bible witim olketa, storyim olketa naesfala wei blo Jehovah. Helpem student for luksavve God blo iumi wea lovem iumi hem laekem olketa for kasem laef olowe, and Hem redi for helpem olketa kasem datfala goal. Wanem moa iumi savve duim?

9-10. Olketa wanem buk nao iumi shud iusim taem iumi conductim Bible Study, and why nao olsem?

⁹ Iusim tufala buk hia, “Wanem Nao Iumi Savve Lanem Long Bible?” and “Gohed Kasem Gud Samting From Love Bilong God.” Olketa raetem tufala buk hia for helpem iumi for kasem heart blo olketa Bible student blo iumi. Olsem example, chapter 1 lo datfala buk Lanem Bible, hem ansarem olketa kwestin hia: Waswe, God tingim iumi, or hem no kea nomoa?, Hao nao feeling blo God taem hem lukim pipol safa?, and Waswe, iumi savve fren witim Jehovah? And datfala buk Gohed Kasem Gud Samting From Love Bilong God bae helpem olketa Bible student for luksavve hao wei for followim olketa Bible principle savve helpem olketa kasem gud samting and for fren klos witim Jehovah. Nomata  sapos iu studyim finis tufala buk hia witim samwan, iu need for prepare gud for each Bible study, and ting raonem hao datfala information bae fitim need blo each Bible student.

¹⁰ Wanem nao iu shud duim sapos student blo iu hem interest lo wanfala topic lo wanfala pablikeson wea no stap insaed Teaching Toolbox blo iumi? Maet iu savve talem hem for readim seleva datfala pablikeson mekem iutufala savve gohed lo study blo iutufala lo buk wea olketa markem for study wea iumi just storyim.

11. Wanem taem nao iumi shud start for prea witim Bible student, and hao nao iumi savve helpem hem for luksavve diswan hem important?

¹¹ Startim study witim prea. Maet insaed lo first tu-thri week bihaen iu startim wanfala Bible study, hem gud for startim and finisim study witim prea. Iumi mas helpem student for luksavve only wei for minim toktok blo God hem thru lo help blo holy spirit blo hem. Samfala study conductor savve iusim James 1:5 for helpem student luksavve why iumi need for prea, datfala scripture sei: “Sapos eniwan long iufala hem needim wisdom, hem mas gohed askem God.” Then hem savve askem student, “Hao nao iumi savve askem God for wisdom?” Staka taem student savve sei, “Iumi shud prea lo God.”

12. Hao nao iu savve iusim Sams 139:2-4 for helpem wanfala Bible student for kamap gud lo wei for prea?

¹² Teachim student blo iu for prea. Talem hem hao Jehovah laek for herem olketa prea wea hem talem from heart. Explainim hao taem iumiseleva prea lo Jehovah, iumi savve talemaot evri samting wea stap lo heart blo iumi, nomata olketa samting wea iumi maet hol bak for talem lo eniwan. Tingim hao Jehovah savve finis lo tingting blo iumi. (Readim Sams 139:2-4.) And tu, iumi savve encouragem olketa student blo iumi for askem God for helpem olketa for changem eni tingting wea no stret and eni nogud wei wea olketa garem. Olsem example, tingim sapos samwan wea study for longtaem finis gohed for celebratem olketa holiday wea no fitim wanfala Christian. Nomata hem savve datwan hem rong, hem laekem yet samfala samting. Encouragem hem for story lo Jehovah abaotem hao hem feel and for barava askem Jehovah for helpem hem for lovem olketa samting wea God lovem.—Sams 97:10.

13. (a) Why nao iumi shud invaetem Bible student blo iumi for kam lo olketa meeting no longtaem bihaen iumi startim study? (b) Hao nao iumi savve helpem Bible student for feel free taem hem kam lo Kingdom Hall?

¹³ Invaetem Bible student blo iu for kam lo olketa meeting stretawe bihaen iu startim study. Wanem Bible student blo iu herem and lukim lo olketa meeting savve kasem heart blo hem and helpem hem for gohed gud lo study. Showim lo hem datfala video Wanem Nao Mifala Duim Long Kingdom Hall? and lo kaenfala wei invaetem hem for kam witim iu. Sapos hem fitim, helpem hem saed lo transport for kam lo meeting. Wanfala gud idea hem for invaetem didifren pablisa for go witim iu lo datfala study. Taem iu duim olsem, Bible student blo iu bae savve lo olketa narawan insaed lo kongregeson, and hem bae feel free taem hem kam lo olketa meeting.

14. Wanem nao savve muvim wanfala Bible student for grow lo spiritual wei?

¹⁴ Goal blo iumi hem for helpem Bible student blo iumi for grow lo spiritual wei. (Eph. 4:13) Taem samwan acceptim wanfala Bible study, maet main samting wea hem bae interest for savve lo hem nao, hem olketa gud samting wea hemseleva savve kasem from wei for studyim Bible. Bat, taem love blo hem for Jehovah grow, maet hem start for tingim hao hem savve helpem olketa narawan, insaed diswan hem olketa lo kongregeson tu.  (Matt. 22:37-39) Lo taem wea hem fitim, no hol bak for storyim privilege for givim selen for sapotim Kingdom waka.

15. Hao nao iumi savve helpem wanfala Bible student for duim stret samting taem olketa problem kamap?

¹⁵ Teachim Bible student lo wanem for duim taem problem kamap. Olsem example, hao sapos student blo iu wea anbaptaes pablisa, storyim dat narawan lo kongregeson mekem hem feel nogud. Winim for teksaed, hem gud for explainim lo hem wanem Bible sei hem savve duim. Hem savve chus sapos bae hem forgivim man wea mekem hem feel nogud, or sapos hem no savve forgetim datwan, hem savve go and story kaen witim datfala man witim goal for fren bak witim hem. (Comparem Matthew 18:15.) Helpem student for prepare gud mekem hem savve wanem for talem. For helpem hem savve hao for deal witim kaen situation olsem, showim hem hao for iusim datfala app JW Library^®, Research Index for Olketa Jehovah’s Witness, and jw.org^®. Taem iumi trainim hem gud bifor hem baptaes, datwan bae helpem hem for fren gud witim olketa narawan lo kongregeson bihaen hem baptaes.

16. Why nao hem gud for invaetem olketa nara pablisa for joinim study blo iu?

¹⁶ Invaetem olketa narawan lo kongregeson, and circuit overseer for joinim study blo iu. Why nao olsem? Iumi storyim finis samfala reason, bat nara reason hem bikos olketa nara pablisa maet savve helpem student blo iu lo wei wea maet iu no fit for duim. Olsem example, student blo iu maet traem best for stop smoke, bat staka taem hem fail. So iu savve invaetem samwan lo kongregeson wea hem bin smoke bifor, bat gogo hem winim datwan nomata maet hem fail staka taem. Datfala brata or sista maet savve givim advaes wea student blo iu needim. Sapos iu hol bak lelebet for conductim study taem brata wea garem experience hem stap, iu savve askem hem for conductim study. Bat nomata wanem iu disaedem, hem gud for iusim datfala chance for student blo iu lane from experience blo olketa narawan. Tingim, goal blo iumi hem for helpem student for grow lo spiritual wei.

17-18. Wanem nao iu shud tingim taem iu ting raonem sapos bae iu stop for study witim samwan?

¹⁷ Sapos Bible student blo iu no gohed gud lo study, bae gogo iu need for askem iuseleva olsem, ‘Waswe, mi shud stop for study witim hem?’ Taem iu ting raonem diswan, iu shud ting raonem tu savve wea hem garem. Samfala pipol savve change kwiktaem winim olketa narawan. Askem iuseleva: ‘Taem mi tingim student blo mi, waswe, hem gohed gud fitim situation blo hem?’ ‘Waswe hem start for “followim,” or obeyim olketa samting wea hem lanem?’ (Matt. 28:20) Nomata maet hem tek taem for wanfala Bible student kamap wanfala disaepol, bat hem shud isisi kamap gud lo study blo hem.

¹⁸ Bat, hao sapos iumi study witim samwan for lelebet longtaem finis and hem no duim eni  samting for showimaot hem tinghae lo study? Tingim disfala example: Bible student blo iu finisim datfala buk Lanem Bible, and maet hem startim datfala Love Bilong God buk, bat hem nating attendim eni meeting, nomata Memorial tu! And staka taem hem savve cancelim study for olketa samting wea no important nomoa. Lo kaen sitiuation olsem, hem gud for tok stret lo datfala Bible student blo iu. *

19. Wanem nao maet iu savve talem lo samwan wea luk olsem hem no tinghae lo Bible study, and wanem nao iu need for tingim?

¹⁹ Maet iu savve askem hem, ‘Lo tingting blo iu, wat nao samfala samting wea maet bae mekem hem hard for iu kamap wanfala Jehovah’s Witness?’ Datfala student maet ansa olsem, ‘Mi hapi for studyim Bible, bat mi no laek for kamap wanfala Jehovah’s Witness!’ Sapos datwan nao tingting blo hem nomata hem bin study for lelebet longtaem, maet iumi shud stop for study. Or maet lo datfala taem nao student blo iu hem just talemaot wanem nao mekem hem hol bak. Olsem example, hem maet feel hem hard for preach from haos tu haos. Taem iu savve lo tingting blo hem, bae iu savve hao for helpem hem.

20. Hao nao Acts 13:48 helpem iumi for luksavve sapos iumi bae gohed for study or nomoa?

²⁰ Sorre samting nao, samfala Bible student olsem olketa Israelite lo taem blo Ezekiel. Jehovah sei olsem lo Ezekiel: “Yu olsem nomoa wanfala man hu hemi gohed fo plei long gita, an hemi gohed fo singim olketa lav singsing, an voes blong hem hemi barava here naes tumas. Olketa gohed fo lisin long olketa toktok blong yu, bat olketa nating obeim.” (Esikiel 33:32) Iumi maet faendem hem hard for talem student bae iumi stop for study witim hem. Bat, “lelebet taem nomoa hem stap.” (1 Cor. 7:29) So winim wei for spendem taem for study witim student wea no muv ahed, iumi need for lukaotem olketa wea “showimaot olketa laekem laef olowe.”—Readim Acts 13:48.

21. Wanem nao yeartext blo iumi for 2020, and why nao datwan hem fitim?

²¹ Lo 2020, yeartext blo iumi bae helpem iumi for lukluk lo wei for kamap gud lo disfala waka for teachim pipol for kamap disaepol. Hem garem samfala toktok wea Jesus talem lo datfala important meeting wea kamap lo maunten lo Galilee, hem sei: “So iufala go and teachim pipol . . . for kamap disaepol bilong mi. Baptaesim olketa.”—Matt. 28:19.