1-2. Со вакерѓа о ангели е џувленге кола со геле ко гробо е Исусескоро, хем со вакерѓа ленге о Исус?

РАНО сабајле ко 16 нисан 33 берш а.е., некобор верна џувља кола со сине бут тажна, геле ко гробо коте со англедер јекх диве текваш сине чхивдо о тело ленгере Господарескоро, о Исус Христос. Ама, кеда ресле адари, те шај те макхен лескоро тело мирислива маслонцар, ола бут чудинѓе пе соске дикхле кај о гробо тано чучо! Тегани појавинѓа пе ленге јекх ангели хем пхенѓа ленге кај о Исус воскреснинѓа. Исто аѓаар вакерѓа: „Ов џала англи туменде ки Галилеја. Адари ка дикхен ле“ (Мат. 28:1-7; Лука 23:56; 24:10).

² Кеда геле песке таро гробо, појавинѓа пе ленге о Исус хем вакерѓа ленге: „Џан, вакерен мле пхраленге те џан ки Галилеја. Адари ка дикхен ман“ (Мат. 28:10). Сигурно е Исусе сине ле те дел важна упатствија пле учениконге соске о прво нешто со мангља те керел откеда воскреснинѓа, сине те аракхел пе ленцар.

3-4. Соске шај те пхена кај е Исусескири заповед сој пишими ко Матеј 28:19, 20, на важинела сине само е апостоленге? (Дикх и слика тари насловно страна.)

³ Читин Матеј 28:16-20. Ко адава состанок, о Исус вакерѓа пле учениконге која важно бути ваљани сине те керен ко адава време. Адаја тани и исто бути со кераја ла амен да авдиве. О Исус вакерѓа: „Џан хем керен ученикија таро мануша таро са о народија... сикавен лен те икерен са со заповединѓум туменге“ (Мат. 28:16-20).

 ⁴ О Исус мангела са лескере следбеникија те проповединен. Адаја заповед на денѓа ла само пле 11 верна апостоленге. Кеда о Исус денѓа акаја заповед ки планина ки Галилеја, адари на сине само лескере апостолија. Котар џанаја акава? Сетин тут кај о ангели вакерѓа е џувленге: „Адари ка дикхен ле“. Акава значинела кај адала да џувља ваљани сине те џан ки Галилеја. Спрема адава, освен о апостолија, сигурно акала џувља да сине ко адава состанок. Ама, на сине о единствена.

5. Со дознајнаја таро 1. Коринќаните 15:6? Објаснин.

⁵ О апостол Павле вакерела аменге кај о Исус уствари, појавинѓа пе повише таро 500 пхраленге (1. Кор. 15:6). Ки која прилика? Иси амен шукар причине те верујна кај о Павле мислинѓа баш ко адава состанок ки Галилеја кова сој спомнимо ко 28 поглавје таро Матеј. Прво, повише таро е Исусескере ученикија сине тари Галилеја. Адалеске сине бут полокхе те аракхел пе повише манушенцар ки несави планина ки Галилеја него ко некаскоро кхер ко Ерусалим. Дујто, откеда воскреснинѓа, о Исус више појавинѓа пе пле 11 верна апостоленге ко јекх кхер ко Ерусалим. Ако мангела сине само ленге те дел заповед те проповединен хем те сикавен е манушен, шај сине те керел адава ко Ерусалим наместо те родел ола, о џувља хем о јавера те аракхен пе леа ки Галилеја (Лука 24:33, 36).

6. а) Сар о Матеј 28:20 сикавела кај е Исусескири заповед те сикава е манушен важинела авдиве да? б) Котар дикхела пе кај е Христосескере следбеникија шунена акаја заповед?

⁶ Хем трито, и заповед со денѓа ла о Исус на важинела сине само е христијаненге со живинена сине ко прво веко. Котар џанаја акава? Откеда заповединѓа пле учениконге те сикавен е манушен, о Исус вакерѓа: „Ме сиум туменцар ко са о диве џи ко крајо акале светоскоро“ (Мат. 28:20). Сар со пхенѓа о Исус, авдиве бут мануша керена ученикија. Секова берш скоро 300.000 мануша овена е Исусескере ученикија, крстинена пе хем овена е Јеховаскере сведокија!

7. Баши со ка кера лафи ки акаја статија хем соске?

⁷ Бут џене коленцар со проучинаја и Библија крстинена пе. Ама, несаве коленцар со проучинаја и Библија дарана те анен асавки одлука. Иако ленге шукар те проучинен, ола на керена промене. Ако проучинеа некасаја, сигурно мангеа те поможине леске те применинел адава со сикљовела хем те овел е Христосескоро ученико. Ки акаја статија ка дикха сар шај те поможина е интересентеске те замангел е Јехова хем те напредујнел. Соске ваљани те кера лафи баши акаја тема? Адалеске со понекогаш ка авел моменти кеда шај ка ваљани те одлучина дали те чхинава те проучина леа или на.

8. Соске понекогаш е интересентенге шај те овел пхаро те заманген е Јехова?

⁸ О Јехова мангела о мануша те служинен леске таро мангипе. Адалеске, ваљани те поможина е интересентенге те хаљовен кај о Јехова бут грижинела пе ленге хем кај бут мангела лен. Амен мангаја те дикхен ки лесте сар Дад хем сар некој со заштитинела околен каске со ваљани помош (Пс. 68:5). Кеда ка хаљовен кобор мангела лен о Девел, веројатно ки ленде да ка бајрол мангипе спрема лесте. Несавенге шај тано пхаро те дикхен е Јехова сар Дад кова сој пхердо мангипаја соске ленгере дада на сикавѓе ленге мангипе хем наклоност (2. Тим. 3:1, 3). Адалеске, џикоте проучинеа ленцар, истакнин е Јеховаскере бут шуже особине. Поможин е интересентенге те хаљовен кај  амаро Девел, кова со грижинела пе аменге, мангела ола те добинен вечно живото хем кај тано спремно те поможинел ленге ко адава. Со јавер шај те кера?

9-10. Кола публикацие ваљани те користина проучибаске е интересентенцар, хем соске?

⁹ Користин о лила „Со сикавела и Библија“ хем „Ачхов ко е Девлескоро мангипе“. И цел акале публикациенгири тани те поможинел е интересентенге те заманген е Јехова. На пример, ко прво поглавје таро лил Со сикавела и Библија иси одговорија башо акала пучиба: Дали о Девел грижинела пе аменге?, Сар осетинела пе кеда о мануша цидена муке? хем Шај ли те ове паше е Јеховаја? О лил Ачхов ко е Девлескоро мангипе ка поможинел е интересентеске те хаљовел сар адава со ка применинел о библиска начелија шај те керел лескоро живото пошукар хем те овел попаше е Јеховаја. Чак ако проучинѓан више акала лила некасаја, спремин тут шукар хем размислин башо е интересентескере конкретна потребе.

 ¹⁰ Ама, со ако интересинела ле несави тема колаке со керела пе лафи ки јавер публикација која со нане дело таро амаре главна публикацие службаке? Шај те поттикнине ле те читинел ла коркори. Аѓаар ка шај те продолжинен те проучинен о публикацие кола со више спомнинѓем лен.

11. Кеда ваљани те почмина те молина амен ако проучинаја некасаја, хем сар шај те кера адава?

¹¹ Почмин о библиско курси молитваја. Ко бут случаија, ако почминаја редовно те проучина некасаја, најшукар тано те почмина те молина амен со шај порано, обично ко прва некобор курке. Шукар тано те почмина хем те завршина молитваја. Мора те поможина е интересентеске те хаљовел кај шај те хаљова и Библија само ако поможинела амен е Девлескоро свети дух. Несаве објавителија објаснинена соске тано шукар те молина амен аѓаар со читинена Јаков 1:5, коте со пишинела: „Ако некаске тумендар фалинела мудрост, нека родел таро Девел“. Пало адава пучена е интересенте: „Сар шај те рода мудрост таро Девел?“ Ов веројатно ка вакерел кај ваљани те молина амен леске.

12. Сар шај те користине о Псалм 139:2-4 те шај те поттикнине е интересенте искрено те молинел пе е Јеховаске башо са?

¹² Објаснин е интересентеске сар те молинел пе. Вакер леске кај о Јехова мангела те шунел лескере искрена молитве. Објаснин леске кај ко амаре лична молитве шај искрено те кера лафи е Девлеа башо са — чак те вакера леске амаре најхор чувствија, кола со нашти те вакера лен никаске јавереске. Уствари, о Јехова аѓаар да џанела амаре најгаравде мисле. (Читин Псалм 139:2-4.) Исто аѓаар, шај те поттикнине е интересенте те молинел е Јехова те поможинел леске те менинел пло погрешно размислибе хем те побединел о лошна навике. На пример, некаске со проучинела више несаво време шај бут значинела несаво празнико кова со иси ле паганска коренија. Иако џанела кај о христијања на ваљани те славинен адава празнико, сепак свиџинена пе леске несаве обичаија сој поврзиме леа. Со шај те кере? Поттикнин ле те вакерел е Јеховаске саве чувствонцар боринела пе хем те родел лестар помош те шај те мангел адава со мангела о Јехова (Пс. 97:10).

13. а) Соске ваљани те канина е интересентен те почминен те авен ко амаре состанокија со шај посигате? б) Сар шај те поможина ленге те осетинен пе пошукар кеда авена ко состанок?

¹³ Канин е интересенте те почминел те авел ко состанокија со шај по сигате. Адава со ка дикхел хем ка шунел ко состанокија шај те влијајнел позитивно упри лесте хем те поттикнинел ле те напредујнел. Сикав леске о видеоклипи Со керела пе ки е Јеховаскере сведоконгири дворана? хем љубезно канин ле те авел туја. Ако шај, нудин леске превоз. Шукар тано те џа различна објавителенцар кеда проучинеа леа. Аѓаар ка шај те запознајнел пе е јаверенцар да таро собрание, хем веројатно ка осетинел пе пошукар кеда ка авел ко состанок.

14. Со ка поттикнинел е интересенте те поможинел е јаверенге?

¹⁴ Амари цел тани те поможина е интересентеске духовно те напредујнел (Еф. 4:13). Кеда некој ка одлучинел те проучинел и Библија, шај повише ка интересинел ле сави корист ка овел ле таро адава. Ама, кеда ка замангел е Јехова, веројатно ка почминел те размислинел сар шај ов да те поможинел е јаверенге, коте сој вклучиме хем окола со више тане дело таро собрание (Мат. 22:37-39). Ки несави соодветно прилика шукар тано те  спомнина кај саринен иси амен чест те поддржина доброволна прилогонцар и бути со керела пе башо Царство.

15. Сар шај те поможина е интересентеске те постапинел исправно кеда ка овен проблемија?

¹⁵ Сикав е интересенте сар те постапинел кеда ка овел ле проблеми. Те претпоставина кај о интересенти, кова сој некрстен објавители, вакерела туке кај вреџинѓа ле некој таро собрание. Наместо те ле страна, шукар тано те сикаве леске кола библиска начелија важинена баши лескири ситуација. Ов шај или те простинел адалеске со грешинѓа леске или, ако леске пхаро те накхел таро адава, шај љубезно хем смирено те керел леа лафи те шај те овен палем ко шукар односија. (Споредин Матеј 18:15.) Поможин леске те спреминел пе аѓаар со англедер ка размислинел со ка вакерел. Сикав леске сар те користинел о Прирачникот за истражување, и апликација JW Library^® или jw.org^® те шај те истражинел сар те решинел о проблеми. Ако сикљовела те решинел о недоразбирања панда англедер те крстинел пе, ка овел леске полокхо те овел ко шукар односија е јаверенцар ко собрание пало адава да.

16. Соске тано шукар те ле различна објавителен туја кеда џаја те проучине несаве интересентеа?

¹⁶ Кеда ка проучине е интересентеа, џа ки лесте различна објавителенцар хем е покраинско надгледникоја кеда ка авел ки посета ко тумаро собрание. Соске? Освен о причине со сине вакерде, о јавера објавителија ка шај те ден ле и помош која со шај нашти ту те де ле. Те вакера кај ов пробинѓа те мукхел о цигаре некобор пути, ама на успејнѓа ко адава. Соске на џаја ки лесте несаве објавителеа кова со порано сине ле о исто проблеми, ама пало некобор пути чхинавѓа адале навикаја? Шај ов ка дел е интересентеске баш адава совет кова со ваљани леске. Ако на осетинеа тут слободно те водине о библиско курси англо несаво искусно пхрал, замолин ле ов те водинел. Ко секова случај, поможин е интересенте те овел ле корист таро искуство е јаверенгоро. Ма бистре кај аменге тано најважно духовно те напредујнел.

17-18. Со ваљани те ле ко предвид кеда размислинеа дали те чхинаве те проучине и Библија некасаја?

¹⁷ Ако о интересенти на керела промене ко живото, јекх диве мора те одлучине те чхинаве те проучине леа. Кеда ка размислине башо адава, ваљани те ле ко предвид лескере способностија хем околностија. Несавенге ваљани повише време те шај те напредујнен. Пуч тут: „Дали о интересенти керела промене спрема пле околностија? Дали почминела те применинел адава со сикљовела?“ (Мат. 28:20). Иако некаске шај ка ваљани повише време те шај те овел е Христосескоро ученико, сепак мора те керел промене.

¹⁸ Ама, со ако дикхеа кај некој касаја со проучинеа више несаво време на сикавела  скоро нисаво ценење башо адава со сикљола? Размислин баши акаја ситуација: Шај о интересенти завршинѓа о лил Со сикавела амен и Библија хем шај чак почминѓа о јавер лил Ачхов ко е Девлескоро мангипе, ама панда на ало ко нијекх состанок — чак ни ки Спомен-свеченост! Освен адава, бут пути откажинела и студија таро причине кола со нане добором важна. Ко асавко случај, шукар тано искрено те кере леа лафи. *

19. Со шај те пуче е интересенте ако мислинеа кај на сикавела ценење башо адава со сикљовела, хем сар лескоро одговор ка поможинел туке?

¹⁹ Шај те пуче ле: „Сој тано адава со највише чхинавела тут те ове е Јеховаскоро сведоко?“ О интересенти шај ка одговоринел: „Мангава те проучинав и Библија, ама никогаш нане те овав е Јеховаскоро сведоко!“ Ако иси ле асавко стави откеда проучинѓа више несаво време, дали иси смисла понадари да те проучине леа? Тари јавер страна, шај ки адаја прилика о интересенти прво пути ка пхенел туке сој чаче лескоро проблеми. На пример, шај мислинела песке кај никогаш нашти те проповединел таро кхер ко кхер. Откеда ка дознајне сој о проблеми, ка шај пошукар те хаљове сар те поможине леске.

20. Сар адава со пишинела ко Дела 13:48 поможинела аменге те одлучина дали некасаја понадари да ка проучина?

²⁰ Жално тано адава со несаве интересентија тане сар о Израелција таро време е Езекиелескоро. Баши ленде о Јехова вакерѓа е Езекиелеске: „Дикх, ту сиан ленге сар мангипаскири гили, сар пеачи шуже гласоја, кова со шукар башалела ко инструменти жиценцар. Шунена тле лафија, ама никој на постапинела спрема ленде“ (Езек. 33:32). Шај аменге пхаро те вакера несаве интересентеске кај ка чхинава те проучина леа. Сепак, на смејнаја те бистра кај „ачхило хари време“ (1. Кор. 7:29). Наместо те трошина панда време некасаја со на керела промене, ваљани те рода околен со сикавена кај „исправно дикхена ко вечно живото“. (Читин Дела 13:48.)

21. Кова тано е бершескоро стихо башо 2020 берш, хем ко со ка поттикнинел амен?

²¹ Ко 2020 берш, е бершескоро стихо ка поттикнинел амен те размислина сар шај панда пошукар те сикава е манушен. О Исус вакерѓа о лафија таро акава стихо ко адава важно состанок ки планина ки Галилеја: „Џан хем керен ученикија, хем крстинен лен“ (Мат. 28:19).