1-2. So phendža o anđeo e džuvljendže kola alje ko e Isuseso grobo? So o Isus phendža e džuvljendže te čeren?

SABALJE tano, 16. nisan, 33. berš ki nevi era. Disave verna džuvlja but tane tužna so o Isus mulo hem on džana ko e Isuseso grobo. Pobuter ando 36 satija angleder, o Gospod Isus Hrist hine parumo odothe. Ked reslje ko than kaj ov hine parumo, on manglje te čhiven ko oleso telo mirisno ulje hem avera mirisija, ama on hine iznenadime ked arakhlje o grobo čučo. Jekh anđeo phendža e džuvljendže so o Isus uštindža ando meribe. Ov pana phendža: „Džala anglo tumende ki Galileja. Uduri tumen ka dikhen le“ (Mat. 28:1-7; Luka 23:56; 24:10).

² Palo odova so o džuvlja dželje ando grobo, o Isus reslja len hem phendža lendže: „Džan, javinen me phraljendže te pođinen ki Galileja. Uduri ka dikhen man“ (Mat. 28:10). O Isus sigurno hine le but važna uputstvija te del pe učenikonendže sose akava sastanak hine i prvo buti koja ov organizujindža palo odova so uštindža ando meribe!

3-4. Sose šaj te phena so i zapovest koja tani pisimi ko Matej 28:19, 20 na hine dindi samo e apostolendže? (Dikh i slika ko početko ando akava časopis.)

³ Čitinen Matej 28:16-20. Ko sastanko kova o Isus organizujindža, ov vačerdža pe učenikonendže andi jekh važno buti koja on ka čeren ko odova vreme, a odija buti hem amen avdije čeraja. O Isus phendža: „Odolese, džan hem čeren učenikonen ando manuša kotar sa o narodija... sikaven len te ičeren pe ko sa so vačerdžum tumendže.“

 ⁴ O Isus mangela sa olese učenikija te propovedinen. Ov na phendža samo akale 11 apostolendže te čeren odova. Sar šaj te ova sigurna ko odova? Ked o Isus dindža i zapovest te čeren pe o učenikija uduri ki gora, ki Galileja na hine samo olese 11 apostolija. Sar džanaja odova? Setin tut so o anđeo phendža e džuvljendže: “Tumen ka dikhen le [ki Galileja]“. Verovatno hem odola verna džuvlja hine ko odova sastanko. Isto adžahar, o apostol Pavle pisindža so o Isus „pojavindža pe anglo pobuter ando 500 phralja ko isto vreme“ (1. Kor. 15:6). Kaj hine odova?

5. Sose šaj te ova sigurna so o lafija kola tane pisime ki 1. Korinćanima 15:6 odnosinena pe ko 28. šero ando Matej?

⁵ Isi amen šukar razlogija te verujina so ked o Pavle pisindža o lafija andi 1. Korinćanima 15:6, mislindža ko sastanko ki Galileja, kolestar vačeri pe ko 28. šero ando Matej. Kola tane odola razlogija? Sar prvo, but ando e Isusese učenikija hine andi Galileja. Odolese polokho hine te čeden pe but manuša ki gora, ki Galileja, nego li ko dijekh čher ko Jerusalim. Sar dujto, ked o Isus uskrsnindža, ov već dikhlja pe pekle 11 apostolencar ko jekh čher ko Jerusalim. Ako o Isus manglja samo olendže te del odija zapovest, ov šajindža odova te phenel lendže ked hine ko Jerusalim. Tegani, ne bi rodela ni olendar, ni ando džuvlja, ni ando avera učenikija te resen pe oleja ki Galileja (Luka 24:33, 36).

6. Sar o lafija ando Matej 28:20, mothovena so hem amendže tani dindi odija zapovest? Sar amen avdije mothovaja so šunaja odija zapovest?

⁶ Sar trito, o Isus akija zapovest na dindža samo amare phraljendže hem e phenjendže kola živindže ko odova vreme. Sar džanaja odova? Ked dindža odija zapovest, o Isus ko krajo phendža pe učenikonendže: „Me hijum tumencar ko sa o dive dži o krajo ando akava sveto“ (Mat. 28:20). Sar so o Isus phendža, but amare phralja hem phenja avdije propovedinena hem čerena učenikonen. Sebepi odova, svako berš koro 300 000 manuša krstinena pe hem ovena e Isusese učenikija.

7. Sostar akana ka vačera hem sose?

⁷ But manuša kola proučinena i Biblija napredujinena hem krstinena pe. Ama, disave kola proučinena i Biblija nane spremna te oven e Isusese učenikija. On mangena te proučinen, ama na napredujinena hem na krstinena pe. Ako isi tut biblijako kurs, tu sigurno mangeja te pomožine odole manušese te primenini odova so sikljola hem te ovel e Isuseso učenik. Ko akava članko ka dikha sar šaj te pomožina lese te mangel e Jehova hem te napredujini. Sose valjani te vačera akalestar? Odolese so podijekh puti amen valjani te odlučina da li ka nastavina dijekh kurs ja na.

8. Sose tano podijekh puti pharo te pomožina e manušendže kasa proučinaja te mangen e Jehova?

⁸ O Jehova mangela o manuša te služinen lese odolese so mangena le. Sebepi odova, amaro cilj tano te pomožina e manušendže kasa proučinaja te haljon so o Jehova but mangela len hem so but brinini pe svakonestar olendar. Amen mangaja te pomožina len te dikhen so o Jehova tano Dad „e čhavendže bizo dad hem zaštitini e udovicen“ (Ps. 68:5). Ked on haljona kobor o Jehova mangela len šaj hem on ka počminen te mangen le. Disavendže šaj tano pharo te dikhen e Jehova sar pe Dade odolese so olengo dad na mothovdža  lendže mangipe hem na brinindža pe olendar (2. Tim. 3:1, 3). Ked hijan ko biblijako kurs, tegani vačer ando e Jehovase šukar osobine. Pomožin e manušendže te haljon so amaro manglo Devel mangela te del len večno dživdipe hem so ka pomožini len te dobinen le. So šaj pana te čera?

9-10. Kola knjige valjani te koristina ked proučinaja nekasa hem sose baš odola knjige?

⁹ Koristin o knjige „So sikavi amen i Biblija?“ hem „Sar te ačhove ko e Devleso mangipe“. Akala publikacije tane čerde adžahar te pomožinen e manušendže te mangen e Jehova. Na primer, ko prvo šero andi knjiga So sikavi amen i Biblija? arakhena pe odgovorija ko akala pučiba: Da li o Devel brinini pe amendar? Sar tano e Devlese ked amen patinaja? hem Da li šaj te ova e Devlese amala? I knjiga Sar te ačhova ko e Devleso mangipe pomožini e manušese te haljol sar odova so ka primenini e biblijake načelija ka pomožini le te ovel le pošukar dživdipe hem te ovel popaše e Jehovaja. Čak iako proučindžan  akala knjige averencar, pripremin tut šukar aso svako kurs hem razmislin so valjani svakone manušese.

¹⁰ Ama, so šaj te čere ako o manuš kasa proučineja pučela tut diso, a o odgovor nane ko amare glavna publikacije e službače? Tegani, šaj te podstaknine le kokri te čitini odolestar ki dijekh aver publikacija koja vačeri ando odova pučibe, a tumen šaj te nastavinen te proučinen othe kaj ačhiljen.

11. Ked valjani te počmina te molina amen ko e biblijako kurs? Sar šaj te pomožina e manušese kasa proučinaja te haljol sose tano važno te molina amen?

¹¹ Počmin e biblijako kurs e molitvaja. Ked redovno proučineja nekasa, najšukar tano so posig te počmine te moline tut ko e biblijako kurs. Amen valjani te pomožina e manušese kasa proučinaja te haljol so bizo e Devleso sveti duh našti te haljova e Devleso Lafi. Disave amare phralja hem phenja objasninena e manušese kasa proučinena sose molinaja amen, adžahar so čitinena o Jakov 1:5, kuri pisini: „Ako nekase tumendar valjani mudrost, nek rodel ando Devel.“ Palo odova, pučena e manuše: „Sar šaj te roda mudrost ando Devel?“ Tegani o manuš šaj ka phenel so valjani te molina amen e Devlese.

12. Sar šaj te koristina o Psalam 139:2-4 te pomožina e manušese kasa proučinaja iskreno te molini pe e Jehovase?

¹² Sikav e manuše kasa proučineja sar te molini pe. Pomožin le te haljol so o Jehova mangela te šunel olese iskrena molitve. Objasnin lese so ked amen kokri molinaja amen, tegani šaj te phrava amaro vilo e Jehovase hem te phena lese odova so nikase našti te phena. Na valjani te bistra, so o Jehova najšukar džanela so isi amen ko vilo. (Čitinen Psalam 139:2-4.) Isto adžahar, amen šaj te podstaknina e manuše kasa proučinaja te molini e Devle te pomožini le te cidel pestar o lošna mislija hem te čhinavi o lošna navike. Na primer, zamislin so jekh manuš iako već disavo vreme proučini hem ponodri mangela te slavini o praznikija. Ov džanela so i Biblija vačeri ando praznikija, ama uživini te slavini len. Podstaknin le iskreno te phenel e Jehovase sar osetini pe hem te rodel lestar te pomožini le te mangel samo odova so o Devel mangela (Ps. 97:10).

13. (a) Sose valjani so posig te vičina e manušen kasa proučinaja te aven ko sastankija? (b) Sar šaj te pomožina e manušese kasa proučinaja te osetini pe pošukar ki dvorana?

¹³ So posig vičin e manuše kasa proučineja te avel ko sastankija. Odova so ov šunela hem dikhela ko sastankija šaj te podstaknini le te služini e Jehovase hem šaj te pomožini le te napredujini. Mothov lese o kratko film So čerelape ko sastankija ki amari dvorana? hem vičin le te avel tuvaja. Ako šaj, dža palo leste. Šukar tano te vičine razno objaviteljen te aven tuvaja dži proučineja oleja. Adžahar, ov ka pendžari averen ki skupština hem tegani šaj ka osetini pe pošukar ko amare sastankija.

14. So šaj te podstaknini e manuše te pomožini averendže?

¹⁴ Amaro cilj tano te pomožina e manušese kasa proučinaja te napredujini (Ef. 4:13). Ked neko proučini i Biblija, šaj ko početko razmislini sar olese lično ka pomožini odova so sikljola. Ama, sar oleso mangipe premalo Jehova barjola, ov ka počmini te razmislini sar šaj ov te pomožini avere manušendže, čak hem e phraljendže hem e  phenjendže ki skupština (Mat. 22:37-39). Ked ka ovel tut prilika, ma bezdin tut te vačere lese so sare amen šaj te da prilog.

15. Sar šaj te pomožina e manušese kasa proučinaja te čerel odova soj tano šukar ked isi le problemija?

¹⁵ Sikav e manuše kasa proučineja so te čerel ked ka ovel le problemija. Na primer, zamislin so o manuš kasa proučineja, kova tano nekršten objavitelj, phenela tuče so uvredindža le neko andi skupština. Ma ov ki nikasi strana, nego objasnin lese so i Biblija phenela so ov šaj te čerel. Ov šaj te oprostini e phraljese hem te bistrel sa so hine. Ama, ako našti te čerel odova, objasnin lese so ov valjani ljubazno hem šukaripnjaja te vačeri okoleja so povredindža le hem so tegani oleso cilj valjani te ovel te rešini o problemi kova isi le pe phraljeja (Uporedin e stihoja ando Matej 18:15). Pomožin lese te razmislini so ka phenel hem sar ka vačeri. Mothov lese sar te koristini i aplikacija JW Library^®, o Vodič kroz publikacije hem o jw.org^® te sikljol sar te rešini o problemi. Ako angleder so krstini pe sikljola sar te rešini o problemija averencar, ov hem palo krštenje šukar ka slažini pe averencar ki skupština.

16. Sose tano šukar te vičine avere objaviteljen te aven tuvaja ko kurs?

¹⁶ Vičin averen andi skupština hem e pokrajinsko nadgledniko ked ka ovel ki poseta te aven tuvaja ko kurs. Sose? Odolese so avera objaviteljija šaj te pomožinen e manušese kasa proučineja odothe kuri tu našti. Zamislin so ov mangela te ačhavi o cigare, ama nekobor putija na uspindža te ačhavi len. Tegani, arakh jekhe phralje ja phenja kola uspindže te ačhaven o cigare, iako šaj but putija pelje hem vičin len te aven tuvaja ko kurs. Odova objavitelj šaj te del le šukar savetija. Ako tano tuče neprijatno te vodine o kurs anglo jekh iskusno phral, tu šaj te puče le ov te vodini o kurs. Ked vičineja averen te aven tuvaja ko kurs, o manuš kasa proučineja šaj but te sikljol ando avera. Ma bistri, toklo cilj tano te pomožine lese te napredujini.

17-18. Sostar valjani te razmisline ked valjani te odlučine da li nekasa ka čhinave te proučine?

¹⁷ Ako o manuš kasa proučineja na čerela promene ko poklo dživdipe, ko jekh trenutko ka valjani te puče tut: „Da li valjani te čhinavav o kurs?“ Angleder so ka ane i odluka, razmislin ando olese sposobnostija. Nekase valjani pobuter vreme te napredujini, a nekase pohari. Puč tut: „Ked razmislinava andi olesi situacija, da li šaj te phenav so dela sa pestar te napredujini? Da li počmindža te primenini o buča kola sikljilo?“ (Mat. 28:20). Šaj valjani lese više vreme te napredujini. Ama, hari pohari ov valjani te čerel promene ko po dživdipe.

 ¹⁸ So valjani te čera ako disavo vreme proučinaja nekasa hem ov na mothovi soj tano olese važno o kurs? Zamislin akija situacija: O manuš kasa proučineja završindža i knjiga So sikavi amen i Biblija, a šaj hem počmindža te proučini i knjiga Sar te ačhove ko e Devleso mangipe, ama niked na alo ko sastanko, čak na alo ni ki Spomen-svečanost. Uzo odova, ov but putija otkažini o kurs sebepi o nevažna buča. Ako tano o manuš kasa proučineja asavko, tu valjani phravde te vačere oleja. *

19. So šaj te vačere nekase kova na cenini poklo kurs hem sostar tegani valjani te razmisline?

¹⁹ Šaj te počmine te vačere oleja adžahar so ka puče le: „So mislineja, so čhinavi tut te ove e Jehovaso svedoko?“ Ov šaj ka phenel: „Me mangava te proučinav i Biblija, ama me niked na ka ovav e Jehovaso svedoko.“ Ako ov mislini adžahar palo odova so disavo vreme proučindža, da li valjani pana te proučine oleja? Ki aver strana, ov šaj prvo puti ka phenel tuče so čhinavi le te ovel e Jehovaso svedoko. Na primer, šaj mislini so ov niked našti te džal kotar čher ko čher. Ked haljoveja sar osetini pe, tegani pošukar ka džane sar te pomožine lese.

20. Sar šaj o Dela apostolska 13:48 te pomožinen amen te odlučina kasa valjani te proučina, a kasa na?

²⁰ Nažalost, disave kolencar proučinaja tane sar o Izraelcija ando e Jezekiljeso vreme. Dikh so o Jehova phendža e Jezekiljese olendar: „Tu hijan olendže sar manuš kova isi le šužo glaso hem kova bašali šukar, sar manuš kova džilabi i džili ando mangipe. On šunena tekle lafija, ama niko olendar na ičeri len“ (Jezek. 33:32). Šaj ka ovel amendže pharo te phena e manušese so više na ka proučina oleja. Ama, „hari vreme ačhilo“ (1. Kor. 7:29). Odolese tano pošukar te čhinave te proučine e manušeja kova na čerela promene ko poklo dživdipe. Amen valjani te trudina amen te arakha nekas kova mothovi so „ispravno [dikhela] ko večno dživdipe“. (Čitinen Dela apostolska 13:48.)

21. Kova tano amaro beršeso stiho aso 2020. berš hem so ov ka pomožini amen te čera?

²¹ Amaro beršeso stih aso 2020. berš, ka pomožini amen te razmislina sar šaj pošukar te čera učenikonen. Odola tane e Isusese lafija kola phendža ko odova but važno sastanko ki gora, ki Galileja: „Džan hem čeren učenikonen... hem krstinen len“ (Mat. 28:19).