1, 2. Σο βακερέλα εκ άγγελος ι τζουβλίνγκε κο μεζάρι κι Ιησούσκο, ντα σο βακερέλα λένγκε ο ίδιος ο Ιησούς;

ΙΣΙ νωρίς το πρωί κο ντιβές 16 Νισάν κο μπρες 33 Κ.Χ. Μερικά τζουβλιά σο νταρένα κατά Ντεβέλ τθερένα πφαριπέ κο γκι κάνα τζάνα κο μεζάρι σο τσσουντέ ο σώμας ι Κυριόσκο, ι Ιησού Χριστόσκο πριν από 36 ντα πιο μπουτ σαάτια. Κάνα ερεσένα οτθέ για τι μακχέν λέσκο σώμας λαδίντζαρ σο κχάντενα μίσκι, ατσσόνα πουταρντέ μόσαρ σο αρακχένα τσουτσό ο μεζάρι! Εκ άγγελος μουτθαβέλα λένγκε ότι ο Ιησούς ιστίντιλο κατά μουλέ ντα σοράν βακερέλα λένγκε: «Τζάλα πιο τζανγκλέ τουμένταρ κι Γαλιλαία. Οτθέ κα ντικχέν-λες».​—Ματθ. 28:​1-7· Λουκ. 23:​56· 24:10.

² Κάνα ο τζουβλιά νασένα κατά μεζάρι, ο ίδιος ο Ιησούς τζάλα πασέ λέντε ντα βακερέλα λένγκε: «Τζαν, βακερέν-λες μι πφραλένγκε για τι τζαν κι Γαλιλαία· ντα κα ντικχέν-μαν οτθέ». (Ματθ. 28:​10) Ο Ιησούς ντικχίντιβελα ότι τθερέλα μπουτ σημαντικά λάφια τι βακερέλ πι μαθητένγκε, αφού ο πρώτος πράγμας σο κανονίνελα σοράν κατά ανάσταση ισί τι γκιντίντιβελ πι μαθητέντζαρ!

3, 4. Σόσκε βακεράσα ότι η εντολή σο ισί κο εδάφια Ματθαίος 28:​19, 20 να ισινέ σάντε ι αποστολόνγκε; (Ντικχέν ι φωτογραφία κι ανγκλαϊνί σελίδα)

³ Διαβάνεν Ματθαίος 28:​16-20. Κάνα γκιντιντάς πι μαθητέν ο Ιησούς, βακερντάς λένγκε ι σημαντικέ εργόσκε σο κα κερένας αζομάν, ο ίδιος έργος σο κεράσα αμέν-ντα αντιβές. Ο Ιησούς βακερντάς: «Τζαν ντα κερέν μαθητέν σαρέ κατά τθεμά, . . . ντα σικλιαρέν-λεν τι κερέν σαρέ οντουλά σο βακερντόμ τουμένγκε».

⁴ Ο Ιησούς μανγκέλα σαρέ λέσκε μαθητές τι μουτθαβέν ο  λατσσέ αμπέρια. Να ντινάς ανταγιά εντολή σάντε κο 11 πιστοί απόστολοι. Σαρ ισινάμ αζόμ σίγουροι; Ισινέ σάντε ο απόστολοι κο βες κι Γαλιλαία κάνα ντιντιλί η εντολή τι κερέν μαθητέν; Ντεν-τουμέν γκοντί ότι ο άγγελος βακερντάς κο τζουβλιά: «[Κι Γαλιλαία] κα ντικχέν-λες». Άρα, αζομάν πρέπει τι ισινέ πιστά τζουβλιά-ντα ανγκλάλ. Ισινέ όμως γιαβερά-ντα τζενέ. Ο απόστολος Παύλος βακερέλα ότι ο Ιησούς «σικαντάς-πες εκ φαρ σε πιο μπουτ από 500 πφραλά». (1 Κορ. 15:6) Κάι αβιλό-πες ανταβά;

5. Σο σικλιάσα κατά εδάφιος 1 Κορινθίους 15:6;

⁵ Μπουτ πράγματα κερένα-αμέν τι πακιάς ότι ο Παύλος τθερέλας πι γκοντιάτε οντουβά ντιβές σο γκιντισάλε ο μαθητές κι Γαλιλαία σαρ ντικχάσα κο Ματθαίος 28 κεφάλαιος. Σόσκε βακεράσα-λες ανταβά; Πρώτον, ο πιο μπουτ μαθητές ι Ιησούσκε ισινέ Γαλιλαίοι. Οτθάρ, εκ βες κι Γαλιλαία κα αβέλας πιο λατσσό τθαν για τι γκιντίντιβεν μπουτ τζενέ παρά εκ κχερ κι Ιερουσαλήμ. Δεύτερον, ο αναστημέ Ιησούς γκιντισάλοας πιο τζανγκλέ-ντα ι 11 αποστολόντζαρ εκχέ κχερέστε κι Ιερουσαλήμ. Άμα μανγκέλας τι ντελ σάντε πι αποστολόντε ι εντολή τι βακερέν ο λατσσέ αμπέρια ντα τι κερέν μαθητέν, κα μπορίνελας τι κερέλ-λες ανταβά κι Ιερουσαλήμ αντίς τι μανγκέλ κατά απόστολοι, κατά τζουβλιά, αλλά εμ γιαβερένταρ τι γκιντίντιβεν κι Γαλιλαία.​—Λουκ. 24:​33, 36.

6. Σαρ σικαβέλα ο εδάφιος Ματθαίος 28:​20 ότι η εντολή για τι κεράς μαθητέν ισί αμένγκε-ντα, ντα σαρ ντένα καν ο τζενέ αντιβές ανταλέ λαφίντε;

⁶ Ντικχέν εκ τρίτος-ντα σημαντικός πράγμας. Η εντολή ι Ιησούσκι τι κερέν μαθητέν να ισινέ σάντε ι Χριστιανόνγκε κο πρώτος αιώνας. Σαρ τζανάσα-λες ανταβά; Ο Ιησούς βακερντάς: «Με ισινόμ τουμέντζαρ σαρέ ο ντιβεσά μέχρι κο τέλος ανταλέ ντουνιάσκο». (Ματθ. 28:​20) Αντικάς σαρ βακερντάς ο Ιησούς, μπουτ τζενέ κερένα μαθητέν ακανά. Για σκεφτίνεν! Πιο μπουτ από 300.000 τζενέ κάθε μπρες μπολντιόνα ντα αβένα Μάρτυρες ι Ιεχωβάσκε ντα μαθητές ι Ιησού Χριστόσκε!

7. Σο κα ντικχάς ακανά, ντα σόσκε;

⁷ Μπουτ τζενέ σο κερένα μελέτη ερεσένα κο μπολντιπέ. Όμως, γιαβερά ντικχίντιβελα ότι σακιντίνενα τι αβέν μαθητές. Ενώ μπεϊντίνενα τι κερέν μελέτη, να ερεσένα κο μπολντιπέ. Άμα κερένα μελέτη εκχέ τζενές, σίγουρα μανγκένα τι βοηθίνεν-λες τι κερέλ οντουλά σο σικλιόλα ντα τι αβέλ μαθητής ι Χριστόσκο. Ανταβά μάθημας κα σικαβέλ σαρ τι ερεσάς κι τζενέσκο γκι ντα τι βοηθίνας-λες τι αβέλ μαθητής ι Χριστόσκο. Σόσκε χρειαζίντιβελα τι κεράς λάφι ανταλέσκε; Επειδή μπορεί τι χρειαζίντιβελ τι αποφασίνας άμα κα συνεχίνας τι κεράς-λες μελέτη ή όχι.

8. Σόσκε μπορεί τι αβέλ δύσκολος τι ερεσάς κο γκι εκχέ τζενέσκο σο κερέλα μελέτη;

⁸ Οντουβά σο μανγκέλα ο Ιεχωβά κατά τζενέ ισί τι υπηρετίνεν-λες επειδή μανγκένα-λες. Αμέν μανγκάσα τι βοηθίνας οντουλέν σο κεράσα-λεν μελέτη τι αγαβέν ότι ο Ιεχωβά πφαμπόλα μπουτ ι κάθε εκχέσκε ξεχωριστά ντα ότι μανγκέλα-λεν μπουτ. Μανγκάσα τι βοηθίνας-λεν τι ντικχέν ι Ιεχωβάς σαρ “ντατ οντουλένγκο σο να τθερένα νταντές ντα σαρ οντουβά σο αρακχαβέλα ι χηρέν”. (Ψαλμ. 68:5) Κάνα ο τζενέ σο κερένα-λεν μελέτη κα αγαβέν καζόμ μπουτ μανγκέλα-λεν ο Ντεβέλ, μάλλον ανταβά κα κερέλ-λεν τι μανγκέν-λες βον-ντα. Μερικοί λένταρ μπορεί τι δυσκολίντιβενα τι ντικχέν ι Ιεχωβάς σαρ λατσσό Ντατ επειδή ο ντατ λένγκο να σικαβέλας λένγκε αγάπη ντα λατσσιπέ. (2 Τιμ. 3:1, 3) Οτθάρ, κάνα κερένα ι μελέτη, τι σικαβέν ο σουκάρ  ιδιότητες ι Ιεχωβάσκε. Τι βοηθίνεν ι τζενέν σο κερένα-λεν μελέτη τι αγαβέν ότι αμαρό λατσσό Ντεβέλ μανγκέλα τι λεν ζωή για πάντα, ντα μανγκέλα αντράλ πι γκίσταρ τι βοηθίνελ-λεν τι κερέν-λες ανταβά. Σο γιαβέρ μπορίνασα τι κεράς;

9, 10. Καλά βιβλία πρέπει τι χρησιμοποιήνας για τι κεράς μελέτες, ντα σόσκε ανταλά;

⁹ Τι χρησιμοποιήνεν ο βιβλία «Σο Μπορίνελα τι Σικλιαρέλ-αμέν η Αγία Γραφή;» ντα «Σαρ τι Ατσσόν κι Ντεβλέσκι Αγάπη». Ανταλά βιβλία ισί ειδικά κερντέ για τι βοηθίνεν-αμέν τι ερεσάς κο γκι κι τζενένγκο σο κεράσα-λεν μελέτη. Για παράδειγμας, ο κεφάλαιος 1 κατά βιβλίος Σικλιαρέλα-αμέν απαντίνελα ακαλέ ερωτησιέντε: «Πφαμπόλα αμένγκε ο Ντεβέλ ή ισί σκληρός;», «Σαρ νιωθίνελα ο Ντεβέλ όταν ο τζενέ τθερένα προβλήματα;» ντα «Μπορίνεσα τι αβές αμάλ ι Ιεχωβάσκο;» Σο κα βακεράς για το βιβλίος Ατσσόν κι Ντεβλέσκι Αγάπη; Ανταβά βιβλίος κα βοηθίνελ ι τζενές σο κερέλα μελέτη τι αγαβέλ σαρ ο αρχές ι Γραφιάκε κα κερέν πιο λατσσί λέσκι ζωή ντα κα ανέν-λες πιο πασέ κο Ιεχωβά. Ατζέ-ντα άμα κερντέν μελέτη ανταλέ βιβλιόνταρ γιαβερέ-ντα τζενέντζαρ,  τι ετοιμάνεν-τουμέν λατσσές για κάθε μελέτη ντα τι τθερέν τουμαρέ γκοντιάτε ο ανάγκες ι τζενέσκε.

¹⁰ Βακερέν όμως ότι εκ τζενό μανγκέλα τι σικλιόλ για εκ θέμας εκχέ εντυπόσταρ σο νανέ αντρέ κο Εργαλεία για τι Σικλιαράς. Κα μπορίνενας τι βακερέν λέσκε τι διαβάνελ κορκορό οντουβά έντυπος ντα τι συνεχίνεν τι κερέν ι μελέτη οντουλέ βιβλιόνταρ σο βακερντάμ πιο οπρέ.

11. Κάνα πρέπει τι αρχίνας τι κεράς προσευχή κι μελέτη, ντα σαρ κα βοηθίνας ι τζενές σο κεράσα-λες μελέτη τι αγαβέλ σόσκε ισί σημαντικός;

¹¹ Πριν τι αρχίνεν ι μελέτη κερέν προσευχή. Κα αβέλας λατσσό τι κερέν προσευχή πριν ντα σοράν κατά μελέτη. Ντα ο πιο λατσσό ισί τι κερέν-λες ανταβά καζόμ πιο νωρίς αβέλα-πες. Πρέπει τι βοηθίνας ι τζενές σο κεράσα-λες μελέτη τι αγαβέλ ότι, σάντε άμα τθεράσα ο άγιος πνεύμας, κα αγαβάς ο Λάφι ι Ντεβλέσκο. Μερικά πφραλά σο κερένα μελέτες, για τι κερέν λάφι ι προσευχιάκε, διαβάνενα ο εδάφιος Ιακώβου 1:5 σο βακερέλα: «Άμα εκ τζενό τουμένταρ να τθερέλα μπουτ σοφία, τι μανγκέλ κατά Ντεβέλ». Σοράν πουτσένα ι τζενές σο κερένα-λες μελέτη: «Σαρ μπορίνασα τι μανγκάς σοφία κατά Ντεβέλ;» Ο τζενό μάλλον κα αγαβέλ ότι πρέπει τι προσευχίντιβας κο Ντεβέλ.

12. Σαρ κα χρησιμοποιήνενας ο εδάφια Ψαλμός 139:​2-4 για τι σικλιαρέν οντουλές σο κερένα-λες μελέτη τι πουτρέλ πο γκι κο Ιεχωβά κάνα προσευχίντιβελα;

¹² Σικλιαρέν ι τζενές σαρ τι προσευχίντιβελ. Βακερέν λέσκε ότι ο Ιεχωβά μανγκέλα τι ασουνέλ λέσκε προσευχές. Ντεν-λες τι αγαβέλ ότι κάνα κεράσα προσευχές κορκορέ μπορίνασα μπαγιά τι πουτράς αμαρό γκι κο Ιεχωβά ντα τι βακεράς λέσκε πράγματα σο μπορεί μα τι βακεράας-λεν καεκχέ τζενέσκε. Μα μπιστρέν ότι ο Ιεχωβά τζανέλα ήδη σο ισί γκεραντό αμαρέ γκοντιάτε. (Διαβάνεν Ψαλμός 139:​2-4) Μπορίνασα επίσης τι βακεράς ι τζενέσκε σο κεράσα-λες μελέτη τι μανγκέλ βοήθεια κατά Ντεβέλ για τι αλλάνελ εκ λάθος χούι ντα τι τσσιναβέλ ο μπέτι συνήθειες. Βακερέν για παράδειγμας ότι εκ τζενό σο κερέλα μελέτη για κάποιος καιρός μπεϊντίνελα μπουτ εκ γιορτή σο τθερέλα σχέση ι ψεύτικε θρησκειάσαρ. Τζανέλα ότι ανταγιά γιορτή ισί λάθος, αλλά μπεϊντίνελα κάποια πράγματα λάταρ. Βακερέν λέσκε τι πουτρέλ πο γκι κο Ιεχωβά ντα τι μολίνελ-λες τι βοηθίνελ-λες τι μανγκέλ σάντε σο μανγκέλα Βοβ.​—Ψαλμ. 97:10.

13. (α) Σόσκε πρέπει τι καλίνας ι τζενέν κο συναθροίσεις καζόμ πιο σουγκό αβέλα-πες; (β) Σαρ κα βοηθίνας ι τζενές σο κεράσα-λες μελέτη τι νιωθίνελ πιο λατσσές κι Αίθουσα Βασιλείας;

¹³ Καλίνεν ι τζενές κο συναθροίσεις καζόμ πιο σουγκό αβέλα-πες. Οντουλά σο κα ασουνέλ ντα κα ντικχέλ κο συναθροίσεις κα ερεσέν λέσκε γκίστε ντα κα βοηθίνεν-λες τι αβέλ μαθητής ι Χριστόσκο. Σικαβέν λέσκε ο βίντεος Σο Αβέλα-πες κο Αίθουσες Βασιλείας; ντα καλίνεν-λες αντράλ τουμαρέ γκίσταρ τι αβέλ τουμέντζαρ. Βακερέν λέσκε ότι κα γκερέν-λες τουμέν άμα αβέλα-πες ανταβά. Ισί λατσσό τι λεν διάφορε πφραλέν κι μελέτη. Αντικάς, ο τζενό κα γνωρίνελ γιαβερέν-ντα κατά κχανγκιρί ντα μάλλον κα νιωθίνελ πιο λατσσές αμαρέ συναθροισιέντε.

14. Σο κα κερέλ εκχέ τζενές τι βοηθίνελ ι γιαβερέν;

¹⁴ Οντουβά σο μανγκάσα ισί τι βοηθίνας ι τζενές σο κεράσα-λες μελέτη τι αβέλ μαθητής ι Χριστόσκο. (Εφεσ. 4:​13) Κάνα εκ τζενό δεχτίνελα τι κερέλ μελέτη, οντουβά σο μπορεί τι ντικχέλα πιο μπουτ ισί σο λατσσιπέ κα κερέλ λέσκε η μελέτη. Αλλά καζόμ κα μανγκέλ πιο μπουτ ι Ιεχωβάς, μάλλον κα αρχίνελ τι σκεφτίνελ σαρ  τι βοηθίνελ ι γιαβερέν, εμ ι πφραλέν κι κχανγκιρί. (Ματθ. 22:​37-39) Κάνα κα αβέλ ο σαάτι, μα σακιντίνεν τι βακερέν ότι τθεράσα ι ευκαιρία τι βοηθίνας αμαρέ λοβέντζαρ τι αβέλ-πες ο έργος.

15. Σαρ μπορίνασα τι βοηθίνας εκχέ τζενές τι σικλιόλ σο τι κερέλ κάνα αβένα προβλήματα;

¹⁵ Σικλιαρέν ι τζενές σο τι κερέλ κάνα αβένα προβλήματα. Βακερέν χάι ότι εκ μπίμπολντο ευαγγελιζόμενος σο κερένα-λες μελέτη, βακερέλα τουμένγκε ότι εκ πφραλ κι κχανγκιρί προσβαλιντάς-λες. Αντίς τι τσσίντεν λέσταρ ή κατά πφραλ, βακερέν λέσκε σο βακερέλα η Γραφή. Μπορίνελα είτε τι συγχωρίνελ ι πφραλές είτε, άμα ναστί μουκχέλα-λες τι νακχέλ αντικάς, τι κερέλ λέσαρ λάφι λατσσιμάσαρ ντα μανγκιμάσαρ για τι “κερδίνελ-λες”. (Ντικχέν Ματθαίος 18:​15) Βοηθίνεν ι τζενές σο κερένα-λες μελέτη τι ετοιμάνελ οντουλά σο κα βακερέλ. Σικαβέν λέσκε σαρ τι ρόντελ κι εφαρμογή JW Library^®, κο Οδηγός Έρευνας για τους Μάρτυρες του Ιεχωβά ντα κο ιστότοπος jw.org^® για τι σικλιόλ σαρ τι ντελ-λεν πέρα ασακέ προβληματέντζαρ. Καζόμ πιο μπουτ κα σικλιαρέν-λες πριν τι μπολντιόλ, αζόμ πιο λατσσές κα τζαλ-λεν ι γιαβερέντζαρ κι κχανγκιρί σοράν.

16. Σόσκε ισί λατσσό τι λεν γιαβερέ-ντα πφραλέν τουμέντζαρ κι μελέτη;

¹⁶ Τι λεν γιαβερέ πφραλέν κατά κχανγκιρί τουμέντζαρ κι μελέτη, εμ ι επισκοπός κάνα αβέλα τουμαρέ κχανγκιριάτε. Σόσκε; Εκτός κατά πράγματα σο βακερντάμ πιο οπρέ, ο γιαβερά πφραλά μπορεί τι ντεν κο τζενό σο κερένα-λες μελέτη βοήθεια σο τουμέν ναστί ντένα. Βακερέν χάι, ότι ο τζενό προσπαθιντάς μπερεκέτι φαρ τι τσσιναβέλ ι τσιγάρα αλλά ναστί τσσιναντάς-λα. Λεν κι μελέτη εκχέ πφραλές σο τσσιναντάς ανταγιά μπέτι συνήθεια, ίσως σοράν από μπερεκέτι προσπάθειες. Βοβ μπορεί τι ντελ κο τζενό λατσσέ συμβουλές σο χρειαζίντιβελα τι ασουνέλ. Άμα να νιωθίνενα λατσσές τι κερέν ι μελέτη ανγκλάλ εκχέ πφραλέστε σο κερέλα μπρεσά ο έργος, βακερέν λέσκε τι κερέλ βοβ οντιά φαρ ι μελέτη. Κάνα λένα γιαβερέν-ντα τουμέντζαρ, ο τζενό σο κερέλα μελέτη μπορεί τι σικλιόλ λένταρ. Τι ντεν-τουμέν γκοντί ότι οντουβά σο μανγκάσα ισί τι βοηθίνας ι τζενές τι αβέλ μαθητής ι Χριστόσκο.

17, 18. Σο χρειαζίντιβελα τι σκεφτίνεν για τι αποφασίνεν άμα πρέπει τι τσσιναβέν εκ μελέτη;

¹⁷ Άμα ο τζενό σο κερένα-λες μελέτη να κερέλα αλλαγές πι ζωγιάτε, κα χρειαζίντιβελ τι πουτσέν-τουμέν: “Μήπως πρέπει τι τσσιναβάβ ι μελέτη;” Πριν τι λεν ανταγιά απόφαση, σκεφτίνεν ι τζενές. Να ερεσένα σαρέ κο μπολντιπέ αζόμ σουγκό. Πουτσέν-τουμέν: “Κερέλα ο αλλαγές σο μπορίνελα τι κερέλ;” “Αρχίνελα «τι κερέλ» οντουλά σο σικλιόλα;” (Ματθ. 28:​20) Μπορεί τι χρειαζίντιβελ μπουτ χρόνος για τι αβέλ μαθητής ι Χριστόσκο. Αλλά σιγά σιγά πρέπει τι κερέλ αλλαγές πι ζωγιάτε.

 ¹⁸ Σο αβέλα-πες όμως άμα κάποιος σο κερέλα μελέτη μπερεκέτι καιρός σικαβέλα μπουτ χάνικ ή ατζέ-ντα ιτς εκτίμηση για τη μελέτη; Ανέν τουμαρέ γκοντιάτε ακαβά: Ο τζενό κερντάς ο βιβλίος Σικλιαρέλα-αμέν ντα μπορεί τι γκιλό κο βιβλίος Ατσσόν κι Ντεβλέσκι Αγάπη, αλλά να αβιλό ούτε εκ φαρ κι συνάθροιση​—ούτε κι Ανάμνηση! Επίσης, μπουτ φαρ χασαρέλα πι μελέτη σινανέ. Ανταλέ περιπτωσιάτε, κα αβέλας λατσσό τι κερέν λέσαρ λάφι ξεκάθαρα. *

19. Σο μπορίνενα τι βακερέν εκχέ τζενέσκε σο ντικχίντιβελα ότι να σικαβέλα εκτίμηση για τη μελέτη, ντα σο κα χρειαζίντιβελ τι σκεφτίνεν;

¹⁹ Κι αρχή κα μπορίνενας τι πουτσέν-λες: “Σο πακιάσα ότι τσσιναβέλα-τουτ τι αβές Μάρτυρας ι Ιεχωβάσκο;” Ο τζενό μπορεί τι βακερέλ: “Να τθεράβα πρόβλημας τι διαβάναβ ι Γραφή, αλλά να κα αβάβ ποτές Μάρτυρας ι Ιεχωβάσκο!” Άμα κα βακερέλ κάτι ασακό παρόλο σο κερντάς μελέτη κάποιος καιρός, σόσκε τι συνεχίνας τι κεράς-λες μελέτη; Οκιά μπάνταρ, ο τζενό μπορεί για πρώτη φαρ τι βακερέλ σο τσσιναβέλα-λες. Για παράδειγμας, μπορεί τι πακιάλα ότι ποτές ναστί κα βακερέλας ο λατσσέ αμπέρια κχερ κχερέστε. Ακανά σο τζανένα σαρ νιωθίνελα, κα τζανέν πιο λατσσές σαρ τι βοηθίνεν-λες.

20. Σαρ βοηθίνελα-αμέν ο εδάφιος Πράξεις 13:​48 τι αγαβάς άμα πρέπει τι συνεχίνας εκ μελέτη ή όχι;

²⁰ Δυστυχώς, μερικά τζενέ σο κερένα μελέτη ισί σαρ ο Ισραηλίτες κο ντιβεσά σο τζουβντιόλας ο Ιεζεκιήλ. Ο Ιεχωβά βακερντάς κο Ιεζεκιήλ: «Ντικχ! Τούι ισινάν λένγκε σαρ μερακίνγκι γκιλί, σο γκιλιάντιβελα σουκάρ φωνιάσαρ εκχέσταρ σο κχελέλα λατσσές εκ όργανος σο τθερέλα χορδές. Κα ασουνέν το λάφια, αλλά καέκ να κα κερέλ-λεν». (Ιεζ. 33:​32) Μπορεί τι αβέλ αμένγκε δύσκολος τι βακεράς εκχέ τζενέσκε ότι κα τσσιναβάς ι μελέτη λέσαρ. Όμως, «ο βακίτι σο ατσσιλό ισί χάνικ». (1 Κορ. 7:​29) Αντίς τι χαλαβάς γιαβέρ-ντα σαάτι εκχέ τζενέστε σο να κερέλα αλλαγές, ισί πιο λατσσό τι αρακχάς εκχέ γιαβερές σο σικαβέλα ότι “λέσκο γκι μανγκέλα τι σικλιόλ ι αλήθεια σο ντέλα ζωή για πάντα”.​—Διαβάνεν Πράξεις 13:48.

21. Καβά ισί ο εδάφιος ι μπρεσέσκο για το 2020, ντα σο κα βοηθίνελ-αμέν τι κεράς;

²¹ Κο 2020, ο εδάφιος ι μπρεσέσκο κα βοηθίνελ-αμέν τι αβάς ατζέ πιο λατσσέ κο έργος για τι κεράς μαθητέν. Ανταβά εδάφιος τθερέλα μερικά κατά λάφια σο βακερντάς ο Ιησούς κάνα γκιντισάλοας πι μαθητέντζαρ κο βες κι Γαλιλαία: «Τζαν ντα κερέν μαθητέν . . . , [ντα] μπολέν-λεν».​—Ματθ. 28:19.