1-2. Nkinyi kibaadi mwikeyilu mulungule bana bakashi ku mashama a Yesu, na mayi kinyi abaadi Yesu nabene mwibalungule?

TWI KU nakashika mwifuku dya 16 Nisan mu 33 bipungo byetu (B.B). Bangi bana bakashi bafubi b’Efile Mukulu, abende benyongole ku mashama kubabadi bashiikye Nfumu Yesu Kidishitu kubapu kukila mafuku abidi. Pababafikile ku mashama, abatwelele bwa kushinga kitanda malashi, abakaanyine pa kumona’shi kitanda takimudi! Mwikeyilu bebalungwile’shi Yesu basanguka ku bafwe, alombasha’shi: “Baapu kwinubadidiila mu Ngalileeya. Kwakwa ngi kwanukamumwena.”​—Mat. 28:1-7; Luk. 23:56; 24:10.

² Kunyima kwa baaba bana bakashi kukatuka ku mashama, Yesu nabene bafikile mu kufumankana nabo, n’aye nkwibalungula’shi: “Ndaayi nukawukishe bakwetu balume’shi bee na kya kwenda mu Ngalileeya: kwakwa nkwabakammwena.” (Mat. 28:10) Abimweka’shi Yesu baadi na angi mayi e na muulo ukata a kulungula balongi baye, mwanda kintu kya kumpala kibaadi mulumbuule kunyima kwa kusanguka kwaye, nyi kino kisangilo!

3-4. Bwakinyi twi kwamba’shi eyi di mu Mateo 28:19, 20 tababadi bedipe penda balongi ba Yesu 11? (Tala kifwatulo kya ku kipusu.)

³ Badika Mateo 28:16-20. Ku kisangilo kibaadi Yesu mulumbuule, baadi muleshe mudimo wi na muulo ukata ubaadi balongi baye na kya kukita mu siekele a kumpala​—mudimo watukwete kukita mpa n’atwe lelo uno. Yesu bambile’shi: “Byaabya ndaayi: mu miilo yooso, . . . nwibalambukishe bya kulama byooso binaadi mwinufundjile.”

 ⁴ Yesu akyebe’shi balongi baye balungule mukandu wibuwa. Dyadya eyi tabaadi mwiditumine penda balongi baye basha lulamato 11 nya. Bwakinyi atushinkamisha byabya? Pabaadi Yesu mutuushe dino eyi dya kwikasha bantu bu balongi, baadi penda na balongi baye 11 ku mwengye wa Ngalileeya su? Tentekyeshayi’shi mwikeyilu balungwile bana bakashi’shi: ‘Anukamumwena [mu Ngalileeya].’ Byabya, baaba bana bakashi basha lulamato abaadi kwanka. Kadi, t’anka penda abo nya. Mpoolo mutumibwa amba’shi Yesu “nkumwenekyela mpaa na bakwetu bakile pa 500.” (1 Kod. 15:6) Kwikunyi?

5. Nkinyi kibatulongyela ku mukanda wa 1 Beena-Kodinda 15:6?

⁵ Twi na tubingilo twa kunangushena’shi mu 1 Beena-Kodinda 15:6, Mpoolo baadi akwila kisangilo kya mu Ngalileeya kyabadi bakwile mu Mateo shapitre 28. Tubingilo kinyi? Ka kumpla, balongi ba Yesu bebungi abaadi bena Ngalileeya. Kukitshina kisangilo ku mwengye wa Ngalileeya​—pamutwe pa ku nshibo ya muntu mu Yeelusaleme—​kubaadi mushindo wibuwa wa kubunga bantu bebungi. Ka kabidi, Yesu baadi mupwe kufumankana na balongi baye 11 mu nshibo ku Yeelusaleme kunyima kw’aye kusanguka. Su Yesu baadi na lukalo lwa kwibapa’nka’abo dino eyi dya kulungula mukandu wibuwa na kwikasha bantu bu balongi, badya kwikala mwibikitshine’nka kwakwa ku Yeelusaleme pamutwe pa kwibalungula dingi’shi bende ku mwengye wa Ngalileeya na baaba bana bakashi na bangi bantu.​—Luk. 24:33, 36.

6. Mukanda wa Mateo 28:20 aulesha naminyi’shi eyi dya kwikasha bantu bu balongi dikwete kulombana, na mbikunyi byabakwete kwiditumikila kwi bantu lelo uno?

⁶ Tala kabingilo ka kasatu ke na muulo. Eyi dya Yesu dya kwikasha bantu bu balongi tadibaadi dimeene’nka kwi bena Kidishitu ba mu siekele a kumpala nya. Bwakinyi atwamba byabya? Mu mayi aaye a nfudilo kwi balongi baye, Yesu bambile’shi: “Nee neenu mafuku ooso, nyaa na ku nfudiilo aa byaa-pano.” (Mat. 28:20) Nka bu bibambile Yesu, lelo uno bantu bebungi bakwete kwikasha bantu bu balongi. Banda kunangushena! Kipwa kyoso, bantu peepi na 300 000 bakwete kubatshishibwa bu ba Temwe ba Yehowa na kufika balongi ba Yesu Kidishitu!

7. Nkinyi kyatwisambila mu uno mwisambo na bwakinyi?

⁷ Bantu bebungi bakwete kulonga Bible bakwete kwenda kumpala mpa na kubatshishibwa. Anka, abimweka’shi bangi namu bakwete kwikaka bwa kufika balongi. Abakumiina penda kulonga kadi tabakumiina kubatshishibwa. Su okwete kulonga Bible na muntu, atuuku’shi okumiina kumukwasha bwa kutumikila byabya byalongo na bwadya kufika mulongi a Kidishitu. Mu uno mwisambo, atukyebe kwisambila byatudya kukuma eshimba dya mulongi na byatudya kumukwasha bwa kutama mu kikudi. Bwakinyi abitungu twisambile pabitale uno mwanda? Mwanda ingi nsaa twi kwata kitshibilo kya kutungunuka na kulonga na muntu sunga kwimika.

8. Bwakinyi bi kwikala bukopo bwa kukuma eshimba dya muntu?

⁸ Yehowa akumiina’shi bantu bamufubile mwanda mbamufule. Byabya, kepatshila ketu nka kukwasha balongi bwabadya kupusha’shi Yehowa kwete kwibapasukila na mmwibafule ngofu. Atukumiina kwibakwasha bwabadya kumona Yehowa bu “Nshe-baana ba nshiye, naa àsàmbiilaa bakashi-kilele.” (Mis. 68:6) Su balongi bobe ba Bible bekala na lutumbu bwa kifulo ki nakyo Efile Mukulu bwabo, byabya abikumu mashimba aabo, na kifulo kyabo bwaye akitama. Bi kwikala bukopo bwa bangi balongi kumona Yehowa bu Nshabo  sha kifulo mwanda ta mbebaleshe kifulo kwi bamashabo. (2 Tim. 3:1, 3) Nsaa yolongo na muntu, shimika kasele pa ngikashi ikata ya Yehowa. Kwasha balongi bobe bwabadya kupusha’shi Efile Mukulu eetu sha kifulo akumiina’shi bakapete muwa wa looso, na’shi akumiina kwibakwasha bwabadya kwiupeta. Nkinyi dingi kyatudya kukita?

9-10. Mmikanda kinyi ayitungu tufubishe bwa kulonga Bible na bantu, na bwakinyi abitungu kufubisha yaya mikanda?

⁹ Fubisha mukanda wa “A nkinyi akitulongyesha Bible?” na “Bya kushaala mu kifulo ky’Efile Mukulu.” Ino mikanda mbeyitushe penda bwa’shi itukwashe tukume mashimba a balongi betu ba Bible. Bu kileshesho, shapitre 1 a mukanda wa Akitulongyesha Bible aluula ku ino nkoonko: Efile Mukulu ekalakashaa bwetu su?, Efile Mukulu apushaa naminyi patukyengye, na We kwikala kuuku a Yehowa? Twi kwamba kinyi bwa mukanda wa Kushala mu kifulo ky’Efile Mukulu? Uno mukanda aukwasha mulongi bwadya kupusha’shi kutumikila mayi a mu Bible kwi kulongamisha nshalelo aaye na  kumukaka peepi na Yehowa. Sunga’shi tobolongyele na bantu bebungi ino mikanda, elumbuule kalolo nsaa ywende mu kulonga na muntu, otuule nkalo ya mulongi ooso mu binangu.

¹⁰ Ingi nsaa mulongi oobe a Bible e kusankila mwisambo kampanda wi mu mikanda yatushatulongaa nayo na bantu. Yaya nsaa, pangi we kumunyingisha bwadya kwibadikila wanka, kadi otungunukye na kulonga naye umune wa ku mikanda yabadi betutekye bwa kulonga nayo bantu yatubakatuka mu kutemuna.

11. Nsaa kinyi ayitungu’shi tubangye sunga kupudisha kulonga na luteko, na mbikunyi byatudya kubanga kwakwila pabitale luteko?

¹¹ Ela luteko kumpala kwa kubanga kulonga. Kebungi, bibuwa kubanga na kufudisha kulonga kwa Bible na luteko, mbingo ipeela n’anwe kubanga kulonga. Abitungu tukwashe mulongi bwadya kuuka’shi twi kupusha Eyi dy’Efile Mukulu nka na bukwashi bwa kikudi kyaye kii selele. Bangi bakwetu ababangaa kwakwila pabitale luteko pa kubadika mukanda wa Shake 1:5, awamba’shi: “Su umune aa kwanudi mmukutwe binangu, eebitekye kwi Efile Mukulu.” Akupu mulongyeshi epusha mulongi’shi: “Mbikunyi byatudya kuteka Efile Mukulu bwashi etupe kinangu?” Kushi mpaka mulongi aluula’shi abitungu twele luteko kwi Efile Mukulu.

12. Mbikunyi byodya kufubisha Misambo 139:2-4 bwa kukwasha mulongi bwadya kulongamisha nteko yaye?

¹² Longyesha mulongi oobe bya kusambila. Mushinkamiishe’shi Yehowa akumiina kuteemesha nteko yaye. Mupatulwile’shi patwele nteko pa bupenka, twi kufungwila Yehowa eshimba dyetu​—twi kumulungula myanda yatusha kulungula ungi muntu. Dingi, Yehowa auku binangu byetu kalolo. (Badika Misambo 139:2-4.) Tunyingishe dingi mulongi eetu a Bible bwadya kuteka Yehowa bwashi amukwashe ashintuule binangu bibubi na byubishi bibubi. Bu kileshesho, banda kunangushena’shi muntu obopu kulonga naye Bible munda mwa mafuku, kwete kusankila musangelo kampanda wa ba mpangano. Auku’shi wi bubi, kadi amono’shi mu ingi myanda wi buwa. Munyingishe bwadya kulungula Yehowa byabya byapusha na kumwisendeela bwadya kumukwasha afule byabya byabadi bafule kwi Efile Mukulu.​—Mis. 97:10.

13. (a) Bwakinyi abitungu twitamine balongi betu ba Bible ku bisangilo kushi kunyengakana? (b) Nkinyi kyatudya kukita bwashi mulongi ekale epusha bu e kwabo ku nshibo nsaa yafiki ku bisangilo?

¹³ Itanyina mulongi oobe a Bible bwadya kutwela mu bisangilo kushi kunyengakana. Myanda ayimono mulongi oobe na yapusha ku bisangilo ngilombene kukuma eshimba dyaye na kumukwasha bwa kwenda kumpala mu kikudi. Muleshe video amba’shi: Nkinyi akikitshikaa ku Nshibo ya Bufumu? Omwitamine na muloo oso bwashi nwende naye. Su kwi mushindo we kumupa ekuta dya kufuta eshinda. Bi buwa kwitamina bangi bakwetu bwabadya nkushindikila mu kulonga kwenu. Su okita byabya, mulongi oobe eukena na bangi bakwetu ba mu kakongye, na ekala epusha bu e kwabo ku nshibo nsaa yafiki ku bisangilo.

14. Nkinyi kilombene kutakula mulongi bwa kwenda kumpala mu kikudi?

¹⁴ Kepatshila ketu nka kukwasha mulongi eetu a Bible bwadya kutama mu kikudi. (Ef. 4:13) Nsaa ayikumiina muntu bwa kulonga Bible, ekwikala eyipusha bukwashi bwapetela mu kwakwa kulonga. Apende na kutama kifulo kyaye bwa Yehowa, e kubanga kunangushena pabitale byadi mulombene kukwasha bangi, mpa na baaba be mu kakongye. (Mat. 22:37-39) Su kwi mushindo, twealashenanga pa  kumulungula mwabi wa kukwatshishena mudimo wa Bufumu na makuta.

15. Mbikunyi byatudya kukwasha mulongi a Bible bwadya kuuka kya kukita nsaa ayituuku myanda?

¹⁵ Longyesha mulongi oobe a Bible kyadya kukita nsaa ayituuku myanda. Bu kileshesho, banda kunangushena’shi mulongi oobe, mmulungudi shii mubande kubatshishibwa, bakulungula’shi kwi muntu bamukokosha mu kakongye. Pamutwe pa kulamata ku lupese lwaye, we kumulungula akyamba Bifundwe. E kufwila yawa mukwetu lusa, sunga’shi su amono’shi t’obesha kutadiila wawa mwanda, e kwisamba na yawa mukwetu na kalolo koso na kifulo na kepatshila ka ‘kulombana naye’ (Tala Mateo 18:15.) Kwasha mulongi oobe bwadya kulumbuula myanda yakakula. Muleshe byadya kufubisha JW Library^® app, Mukanda aukwasha ba Temwe ba Yehowa bwa kukimbuula myanda, na jw.org^® bwadya kulonga mishindo ya kukila na myanda i byabya. Su alongyeshibwa byabya kumpala kwa kubatshishibwa, ekala epushena kalolo na bangi mu kakongye kunyima kwa kubatshishibwa.

16. Bwakinyi bi na muulo kwenda na bangi balungudi mu kulonga na balongi bobe ba Bible?

¹⁶ Enda na bangi bena kakongye nobe​—na mukunkushi a kifunda su mmufikye mu kutala kakongye kenu—​bwabadya kupetekyelwa panulongo. Bwakinyi? Kukatusha tubingilo tubatuteemuna kunundu, bangi balungudi mbalombene kukwasha mulongi obe mu mushindo pangi oshii bya kumukwasha. Bu kileshesho, mulongi oobe kwete kutompa kuleka kutoma nfwanka, anka misusa imbungi kwete nka kubanguula dingi. Enda na mulungudi shibaadi mobeshe kukambila kyakya kyubishi musango umune. Aye mulombene kutusha malango ebuwa alombene kukwasha mulongi oobe. Su abikwelela bukopo bwa kukunkusha kulonga kwa Bible pee mukwetu e na kiukilo kibungi, mutekye bwa’shi aye akunkushe. Nsaa ywende na bangi balungudi kwi mulongi oobe a Bible, myanda yabo yabadi bamone ngilombene kumukwasha. Uuka’shi kepatshila ketu nka’shi mulongi a Bible anyingye mu kikudi.

17-18. Kinyi akitungu’shi otaluule kumpala kwa’shi wate kitshibilo kya kutshiba kulonga na muntu Bible?

¹⁷ Su mulongi oobe a Bible ta shintuluka mu nshalelo aye, we mulombene kwiyipusha’shi: ‘Abitungu ntshibe kulonga naye su?’ Kumpala kwa’shi wate kino kitshibilo, abitungu otale ngobesha yaye. Bwa bangi bantu, mbilombene kwata mafuku ebungi bwabadya kushintuluka, bangi namu mafuku apeela. Eyipushe’shi: ‘Mulongi ande a Bible kwete kwenda kumpala mupunda nshalelo aye su? Kwete “kulama” sunga kutumikila bya kwete kulonga su?’ (Mat. 28:20) Mbilombene kwata mafuku ebungi bwa’shi muntu afikye mulongi a Kidishitu. Anka abitungu ende na kushintuula nshalelo aye.

 ¹⁸ Kinyi kyatudi balombene kukita su tubalongo na muntu munda mwa mafuku, kadi takwi bitundwilo abilesha’shi aata kulonga na muulo? Pwandjikisha’shi bopudisha kulonga na muntu mukanda wa Akitulongyesha Bible na pangi nu babanga na mukanda wa Kushaala mu kifulo ky’Efile Mukulu, anka kasha tafikile mu bisangilo​—sunga mu kitentekyesho. Sunga’shi emika kulonga mpa na bwa myanda ishii na muulo. Su mulongi oobe ebino, abitungu wesambe naye patoka. *

19. Nkinyi kyodi mulombene kukita su muntu tamono kulonga Bible bu kwi na muulo, na bwakinyi abitugu webinangushene?

¹⁹ We kumwipusha’shi: ‘Nkiyi kyomono’shi ndukalakashi kodi bwa kufika Temwe a Yehowa? Mulongi a Bible ekwaluula’shi: ‘Nemukumiine kulonga Bible, kadi ntshii kufika Temwe a Yehowa nya!’ Su e na mweneno e byabya kunyima kwa kulonga naye munda mwa mafuku ebungi, bi nka na muulo kutungunuka na kulonga naye Bible su? Ku lungi lupese, mulongi obe mmulombene nkulungula akimwalusha kumongo. Bu kileshesho, ekumona bu shii mulombenekobesha kulungula ku nshibo na nshibo. Nsaa yweuku byabya, wekala na mushindo wibuwa wa kumukwasha.

20. Mukanda wa Bikitshino 13:48 wi kwitukwasha naminyi bwa kutundula su twi kutungunuka na kulonga na muntu Bible sunga kutshiba kulonga naye?

²⁰ Mwanda wa kinyongwa, bangi balongi ba Bible be nka bu bena Isaleele ba mu mafuku a Ezekiele. Tala bibaadi Yehowa mulungule Ezekiele pabibatale: “Kwabadi, t’we mwilekêne na kaimba aimbi n’eyi di buwa, byombwanga abyombibwa kalolo, mwanda abapusha by’okula anka t’abebikitshi, ooo.” (Es. 33:32, EEM) Mbilombene kwitwikeela bukopo bwa kulungula muntu’shi tubatshibi kulonga naye Bible. Anka “nguba baashaala peela.” (1 Kod. 7:29) Kukatusha kukisha nsaa na muntu shende kumpala, twi na lukalo lwa ku kimba ungi muntu e na ‘eshimba dilombane bwa muwa wa looso.’​—Badika Bikitshino 13:48.

21. Kifundwe kyetu kya kino kipwa kya 2020 akyamba naminyi, na akitukwasha naminyi?

²¹ Muno mu 2020, kifundwe kyetu kya kino kipwa akitukwasha bwa kunangushena mushindo watudya kwikasha bantu bu balongi kalolo. Mwi mayi abaadi Yesu mwakulu mu kisangilo ku mwengye wa Ngalileeya’shi: “Ndaayi, nwibekashe bu balondji . . . , nwibabatshishe.”​—Mat. 28:19.