1-2. Andi wan ëngëli bi piki dee mujëë dee bi ko a di geebi ka de buta Jesosi, nöö andi Jesosi seei bi piki dee mujëë aki di a bi weki ko a libi?

A BI dë wan fuuku mamate, a 16 Nisan u di jaa 33 baka Keesitu. Wanlö mujëë di bi lobi Gadu, bi dë ku fuka a hati ta waka nango a di geebi ka de bi bei Masa Jesosi. De bi bei Jesosi tu daka pasa. Dee mujëë bi tja sumëë suti fatu, ku woto soni u de go lobi a di dëdë sinkii u Jesosi. Ma di de dou a di geebi, de ko si taa di geebi dë hooo! Wan ëngëli bi sai dë, hën a piki dee mujëë taa Jesosi weki kumutu a dëdë. Boiti di dë, a taki tu taa: ’A o waka a unu fesi go a Galilea. Ala unu ku ën o miti kumafa a bi taki.’​—Mat. 28:1-7; Luk. 23:56; 24:10.

² Baka di dee mujëë kumutu a di geebi, hën Jesosi seei ko miti de, hën a piki de taa: „Un go taki da dee otowan u mi taa be de go a Galilea, nöö ala mi ku de o miti kumafa mi bi taki da de” (Mat. 28:10). Di fosu soni di Jesosi du baka di a weki ko a libi baka, hën da a hoi wan komakandi ku dee bakama fëën. A di komakandi dë a bi piki de wantu fanöudu soni.

3-4. Faandi mbei u sa taki taa di soni di Jesosi bi taki a Mateosi 28:19, 20, an bi dë da dee apösutu fëën wanwan? (Luku di peentje u di kafiti.)

³ Lesi Mateosi 28:16-20. A di komakandi di Jesosi bi hoi ku dee bakama fëën, a bi piki de andi da di fanöudu wooko di de bi o du a di ten dë. Wë di wooko dë nöö u ta du a di ten aki tu. Jesosi bi taki taa: „Un go a hii nasiön sëmbë, nöö un heepi de u de ko dë bakama u mi. . . . Un musu ta lei de u de piki hii dee soni tuu dee mi manda unu fuun musu ta du kaa.”

 ⁴ Jesosi kë taa hii dee bakama fëën musu ta peleiki. Na dee 11 apösutu dee bi ta hoi deseei a Gadu, nöö a bi da di wooko aki. Unfa u du dë seiki u di soni aki? Wë di Jesosi bi taki u di go di de bi musu go mbei sëmbë ko dë bakama fëën, nöö na dee apösutu fëën wanwan bi sai dë a di kuun u Galilea. Unfa u du sabi di soni aki? Toona mëni baka taa di ëngëli bi piki dee mujëë taa: ’A o waka a unu fesi go a Galilea. Ala unu ku ën o miti.’ Fëën mbei a bi musu u dë sö taa dee mujëë dee bi ta dini Gadu ku hii de hati, bi sai dë tu. Ma na de nöö. Apösutu Paulosu bi taki taa Jesosi bi „ko a möön hia möön feifi höndö u dee biibima. De tuu si ën ka de bi dë makandi a wan kamian” (1 Kol. 15:6). Naasë dee 500 biibima dë bi ko makandi?

5. Faandi mbei u ta biibi taa di soni di sikifi a 1 Kolenti 15:6, nama ku di komakandi di bi hoi a Galilea?

⁵ Wë u ta biibi taa dee soni dee Paulosu bi taki a 1 Kolenti 15:6, bi nama ku di seei komakandi di bi hoi a Galilea, di Mateosi 28 ta taki fëën. Faandi mbei u taki sö? Di fosu soni mbei u taki sö, hën da gaansë u dee bakama u Jesosi bi dë sëmbë u Galilea. Fëën mbei an bi o taanga sö u hoi wan komakandi ku sö hia sëmbë a di kuun u Galilea, ka u de hoi ën a wan sëmbë pisi a Jelusalen. Di u tu soni, hën da Jesosi bi miti ku dee 11 apösutu fëën kaa a wan sëmbë pisi a Jelusalen, baka di a weki ko a libi. Wë ee Jesosi bi kë u dee apösutu fëën wanwan bi musu peleiki u heepi sëmbë ko dë bakama fëën, nöö a bi o piki de di soni dë a Jelusalen. Ma an bi o hakisi dee apösutu, ku dee mujëë, ku dee woto sëmbë u de ko makandi a Galilea.​—Luk. 24:33, 36.

6. Unfa di soni di sikifi a Mateosi 28:20 ta lei taa di wooko di Jesosi bi da dee bakama fëën, nama ku u dee sëmbë a di ten aki tu, nöö unfa sëmbë ta du di wooko dë tjika?

⁶ Luku di u dii soni. Na dee fesiten Keesitu sëmbë wanwan bi musu go heepi sëmbë ko dë bakama u Jesosi. Unfa u du sabi di soni aki? Jesosi bi taki wan soni a kaba pisi u di tëkisi ka a bi manda dee bakama fëën u de go peleiki da sëmbë. A bi taki taa: „Mi o dë ku unu hiniwanten e, u tee a kaba u di goonliba aki” (Mat. 28:20). Wë di soni di Jesosi bi taki aki ko pasa sö tuu, biga sömëni sëmbë ta heepi wotowan u de ko dë bakama u Jesosi a di ten aki. Pakisei di soni aki! Hiniwan jaa, bëina 300.000 sëmbë ta ko dë bakama u Jesosi. De ta tei dopu, nöö de ta ko dë Kotoigi u Jehovah!

7. Fuun soni woo taki nöunöu, nöö faandi mbei woo taki u di soni dë?

⁷ Sömëni sëmbë di ta lei soni u Bëibel, nango a fesi seei, nöö de ta tei dopu. Ma so u dee sëmbë dee u ta lei soni u Bëibel, ta fëëë u de ko dë bakama u Jesosi. De lobi di lei di u ta lei de soni, ma de an nango a fesi u de sa tei dopu. Hii u tuu ta kë heepi di sëmbë di u ta lei soni u Bëibel faa du dee soni dee a ta lei, sö taa a sa ko dë wan bakama u Keesitu. Di woto aki ta taki andi u sa du fuu sa mbei di Wöutu u Gadu dou dee lö sëmbë dë hati, söseei a ta taki unfa u sa heepi dee sëmbë aki u de ko lobi Jehovah, söseei u de go a fesi. Faandi mbei u musu taki u di soni aki? Wë u di so juu u musu luku ee woo ta lei di sëmbë dë soni u Bëibel go dou, nasö ee wa o ta lei ën soni möön.

8. Faandi mbei so juu a sa ta taanga u heepi dee sëmbë dee i ta lei soni u Bëibel, u de ko lobi Jehovah?

⁸ Jehovah kë u sëmbë ta dini ën u di de lobi ën. Fëën mbei di maaka di u musu kë dou, hën da u heepi dee sëmbë dee u ta lei soni u Bëibel, u de ko fusutan taa Jehovah ta booko hën hedi ku de, nöö a lobi de gaanfa seei. U kë heepi de u de ko ta si Jehovah kuma wan „tata da dee mii dee na a’ tata möön”, söseei kuma „wan kuutuma di ta hopo taki da dee mujëë dee  manu u de dëdë kaa” (Ps. 68:5). Te dee sëmbë dee i ta lei soni u Bëibel ko fusutan unfa Gadu lobi de tjika, nöö de o sa ko ta lobi ën tu. A sa ta taanga da so u dee sëmbë dee u ta lei soni u Bëibel, u de ko ta si Jehovah kuma wan lobihati Tata, u di de tata seei an bi lei de taa de lobi de (2 Tim. 3:1, 3). Te i ta lei dee lö sëmbë aki soni u Bëibel, nöö i sa taki u dee bunu fasi dee Jehovah abi. Heepi de u de ko fusutan taa Gadu kë u de feni teego libi, nöö a dë kabakaba u heepi de u de sa feni ën. Andi ku andi u sa du möön u heepi dee lö sëmbë aki?

9-10. Ku un buku u musu ta lei sëmbë soni u Bëibel, nöö faandi mbei ku dee buku dë u musu ta lei de soni?

⁹ Wooko ku di buku „Andi di Bëibel ta lei u tuutuu?”, söseei wooko ku di buku „Meki Gado tan lobi yu”. De sikifi dee buku aki u heepi sëmbë u de ko lobi Gadu. Kapitë 1 u di buku Andi di Bëibel ta lei u tuutuu? ta piki dee hakisi aki: Gadu ta booko hën hedi ku u ö, naa a abi hogi hati? Unfa Gadu ta fii te sëmbë ta tja sitaafu? I sa ko dë wan mati u Jehovah u? Unfa a dë ku di buku Meki Gado tan lobi yu? Di buku aki o heepi di sëmbë di i ta lei soni u Bëibel, faa ko fusutan unfa di libi di a o ta libi ku dee mama  wëti u Bëibel, sa tja wini ko dëën, söseei unfa a sa mbei hën ku Jehovah ko dë möön gaan mati. Aluwasi ee i bi lei sëmbë soni ku dee buku aki kaa, tökuseei a bunu fii ta seeka iseei bunu hiniwan juu te joo go lei di sëmbë soni, nöö i musu buta pakisei a dee soni di di sëmbë abi fanöudu.

¹⁰ Ma andi i musu du ee di sëmbë di i ta lei soni u Bëibel, kë sabi soni u wan woto di an dë a di buku dë, nasö di an dë a dee woto buku dee u ta tei u lei sëmbë soni u Bëibel? Wë i sa dëën taanga fu hënseei lesi di buku di ta taki u di woto di a bi o kë sabi, sö taa un sa go dou ku dee buku dee u ta tei u lei sëmbë soni u Bëibel.2

11. Na un ten u musu bigi ta begi te woo lei sëmbë soni u Bëibel, nöö unfa u sa heepi di sëmbë di u ta lei soni u Bëibel faa ko fusutan taa a dë fanöudu?

¹¹ Begi ufö i bigi lei di sëmbë soni u Bëibel. A ta bunu te i ta begi ufö i bigi lei wan sëmbë soni u Bëibel, söseei te i kaba lei di sëmbë soni u Bëibel. A ta möön bunu te ja wakiti longi ufö i bigi du di soni aki. U musu heepi di sëmbë faa ko fusutan taa di santa jeje u Gadu wanwan sa heepi u fuu fusutan di Wöutu u Gadu. So peleikima lo’ u lesi Jakobosi 1:5 u lei di sëmbë unfa begi dë fanöudu te de o bigi lei soni u Bëibel. Di tëkisi dë ta taki taa: „Ee wan sëmbë i si taa ja a’ fusutan tjika a soni, nöö i musu begi Gadu faa da i fusutan e, nöö a o da i ën.” Bakaten de ta hakisi di sëmbë taa: „Unfa u sa hakisi Gadu faa da u köni?” Möön gaanfa di sëmbë ta piki taa begi u musu begi Gadu.

12. Unfa i bi o heepi wan sëmbë di ta lei soni u Bëibel, ku di soni di sikifi a Psalöm 139:2-4 faa ko ta begi möön bunu?

¹² Lei di sëmbë di i ta lei soni u Bëibel unfa hënseei musu ta begi. Konda da di sëmbë di i ta lei soni u Bëibel taa Jehovah kë jei fa a ta begi ën ku hii hën hati. Konda dëën taa te useei ta begi, nöö u sa konda da Jehovah unfa u ta fii, söseei u sa piki ën soni di kandë wa bi o kë piki na wan woto sëmbë. Jehovah sabi andi dë a u hati ku u pakisei. (Lesi Psalöm 139:2-4.) U sa da di sëmbë taanga tu faa hakisi Jehovah faa heepi ën tooka dee pakisei fëën dee an bunu, söseei faa heepi ën faa disa dee guwenti dee a bi abi dee an bunu. Boo taa wan sëmbë di ta lei soni u Bëibel lobi wan piizii di Keesitu sëmbë an musu hoi. Hii fa a sabi taa an bunu, tökuseei a ta lobi so soni fëën jeti. Wë i sa da sö wan sëmbë taanga faa piki Jehovah unfa a ta fii u di soni dë, söseei dëën taanga faa hakisi Jehovah faa heepi ën faa ko ta lobi dee soni dee Jehovah lobi.​—Ps. 97:10.

13. (a) Faandi mbei wa musu biabia u kai dee sëmbë dee u ta lei soni u Bëibel u de ko a dee komakandi? (b) Unfa u sa heepi wan sëmbë di ta lei soni u Bëibel faa sa fii bunu te a ko a di Könuköndë zali?

¹³ Na biabia u kai di sëmbë di i ta lei soni u Bëibel faa ko a dee komakandi. Dee soni di wan sëmbë di ta lei soni u Bëibel ta jei, ku dee a ta si a dee komakandi, sa dou hën hati, söseei de sa heepi ën faa bigi dini Jehovah. Lei ën di fëlön Andi de ta du a wan Könuköndë zali?, nöö kai ën faa ko ku i a dee komakandi. Piki ën taa joo ko tei ën ku wagi ee i sa. A bunu tu te i ta kai peipei baaa nasö sisa u di kemeente u de ko ku i makandi fuun go lei di sëmbë soni u Bëibel. A sö wan fasi di sëmbë di i ta lei soni u Bëibel dë, o ko guwenti ku dee wotowan u di kemeente, nöö a o ta möön fii bunu te a ko a dee komakandi.

14. Andi sa heepi wan sëmbë di u ta lei soni u Bëibel faa go a fesi a di biibi?

¹⁴ Di maaka di u kë dou, hën da u kë heepi dee sëmbë dee u ta lei soni u Bëibel, u de go a fesi a di biibi (Ef. 4:13). Te wan sëmbë piki taa a kë bigi lei soni u Bëibel ku u, nöö bigibigi kandë a o ta möön buta pakisei a dee wini dee a o feni. Ma baka wan pisiten te a ko möön lobi Jehovah, nöö a o ta möön pakisei unfa a sa heepi wotowan, te kisi dee woto sëmbë dee dë a di  kemeente tu (Mat. 22:37-39). A wan ten di fiti, i sa piki ën tu taa u sa da möni u heepi be di Könuköndë wooko go a fesi.

15. Unfa u sa heepi wan sëmbë di ta lei soni u Bëibel, faa sabi andi a musu du te a dë ku wan bookohedi?

¹⁵ Lei ën andi a musu du te a dë ku wan bookohedi. Boo taa di sëmbë di i ta lei soni u Bëibel, toon wan peleikima di an dopu jeti, nöö a ko piki i taa wan baaa nasö wan sisa u di kemeente du wan soni di toobi ën. Na piki ën ambë abi leti, nasö ambë föutu, ma piki ën andi di Bëibel ta taki taa a musu du. A sa taki taa a o da di baaa nasö di sisa paadon. Ma ee an sa disa di taki, nöö a musu go fan ku di baaa nasö di sisa dë a wan suti fasi, sö taa de sa seeka di taki u de ko dë bunu baka. (Luku Mateosi 18:15.) Heepi ën faa seeka a fesi u sabi andi a o taki. Lei ën unfa a sa wooko ku di JW Library^® app, ku jw.org, nasö unfa a sa öndösuku soni a dee woto buku fuu di ta taki u peipei soni di i sa du te i dë ku wan bookohedi. Ee ufö a tei dopu kaa a sabi unfa a musu seeka wan toobi di hën ku wotowan abi, nöö an dë u taki taa a o möön sa’ u libi bunu ku dee baaa ku dee sisa a di kemeente baka te a tei dopu.

16. Faandi mbei a dë wan bunu soni te woto peleikima ta ko makandi ku i te joo go lei wan sëmbë soni u Bëibel?

¹⁶ Kai woto baaa, nasö woto sisa u di kemeente u de ko ku i te joo go lei wan sëmbë soni u Bëibel, söseei kai di keling-gaanwomi ko ku i te a ko luku di kemeente. Faandi mbei i musu du di soni aki? Wë u di woto peleikima sa dë a fa u heepi di sëmbë a wan fasi di kandë ja bi o sa heepi ën. Boo taa di sëmbë di i ta lei soni u Bëibel, mbei möiti sömëni pasi faa tapa ku di sumuku di a ta sumuku. Te a dë sö, nöö i sa kai wan baaa nasö wan sisa di bi abi di guwenti aki fosu, söseei di a bi ta taanga da u tapa ku di sumuku di a bi ta sumuku, u de ko ku i a di sëmbë di i ta lei soni u Bëibel. Di woto baaa nasö sisa aki, sa taki fanöudu soni di di sëmbë di i ta lei soni u Bëibel, musu jei. Ee i ta fii wan fasi te i musu lei wan sëmbë soni u Bëibel te i dë makandi ku wan baaa nasö wan sisa di sa’ u lei sëmbë soni, nöö hakisi di baaa nasö di sisa dë faa lei di sëmbë soni di pasi dë. Ee i ta kai woto sëmbë u de ko makandi ku i a di sëmbë di i ta lei soni u Bëibel, nöö di sëmbë di i ta lei soni u Bëibel sa feni wini fëën seei. Na fëëkëtë di maaka di u kë dou. U kë heepi di sëmbë faa go a fesi a di biibi.

17-18. Andi i musu hoi a pakisei te joo luku ee an dë fii nango ta lei wan sëmbë soni u Bëibel möön?

¹⁷ Ee di sëmbë di i ta lei soni u Bëibel an ta tooka soni a di libi fëën, nöö i musu hakisi iseei ee ’i musu nango a di sëmbë dë jeti’. Ufö i disa di sëmbë, i musu pakisei luku ee unfa di sëmbë dë. So sëmbë abi möön ten fanöudu u go a fesi möön wotowan. Hakisi iseei dee soni aki: ’Di sëmbë di mi ta lei soni u Bëibel aki nango a fesi a di fa a sa mbei möiti dou ö?’ ’A bigi ta du dee soni dee a ta lei ö?’ (Mat. 28:20). Wan sëmbë di ta lei soni u Bëibel sa ta tei ten u go a fesi, ma tökuseei a musu dë u si taa pikipiki a ta tooka soni nëën libi.

 ¹⁸ Ma andi u musu du ee u ta lei wan sëmbë soni u Bëibel wan pisiten kaa, ma an ta lei taa a ta si dee soni dee a ta lei kuma fanöudu soni? Wë pakisei di soni aki: Boo taki taa wan sëmbë di i ta lei soni u Bëibel kaba lei soni a di Bëibel lei-buku, nöö kandë a bigi lei soni a di Gado lobi-buku, ma an ko na wan pasi a komakandi jeti, nasö an pena ko a di mëni di u ta mëni di dëdë u Jesosi wan daka! Söseei a lo’ u djombo di daka di woo lei ën soni u Bëibel, faa go du soni di an dë fanöudu. Te a dë sö, nöö a bunu fii fan ku ën gbelingbelin u di soni dë. *

19. Andi i sa du te i ta si kuma wan sëmbë di i ta lei soni u Bëibel an ta si dee soni dee i ta lei ën kuma fanöudu soni, nöö un soni u musu hoi a pakisei?

¹⁹ Kandë i sa hakisi di sëmbë di i ta lei soni u Bëibel dee soni aki: ’Andi i ta si kuma da di möön gaan soni di ta tapa i fii ko dë wan Jehovah Kotoigi?’ Kandë a o taki da i taa: ’An ta toobi mi u mi ta lei soni u Bëibel, ma nöiti mi o ko dë wan Jehovah Kotoigi!’ Wë ee sö di sëmbë piki, nöö an bi o dë wan föutu soni fu ja nango a sö wan sëmbë u go lei ën soni möön. Ma so juu wan sëmbë sa taki wan soni da i di ta lei i unfa a ta pakisei, nasö andi ta hoi ën fu an go a fesi. Kandë a ta fii kuma an o sa go peleiki a sëmbë pisi wan daka. Wë te i ko sabi sö, nöö joo sa sabi unfa i musu heepi ën möön bunu.

20. Unfa Tjabukama 13:48 ta heepi u fuu sabi ee an dë fuu nango ta lei wan sëmbë soni u Bëibel möön, nasö ee u musu nango jeti?

²⁰ A tjali taa so sëmbë di ta lei soni u Bëibel, dë kuma dee Isaëli sëmbë u di ten u Ezekiëli. Jehovah bi piki Ezekiëli taa: „De ta si i kuma wan sëmbë di ta kanda lobi kanda, kuma wan sëmbë di töngö fëën suti, nöö a sa’ u pëë poku lai di dë kuma gitali. De o jei dee soni i taki da de, ma na wan u de o du andi i taki” (Eze. 33:32). A sa taanga da u fuu piki wan sëmbë taa wa o ko ta lei ën soni u Bëibel möön. Ma hii fa a dë sö, u musu hoi a pakisei taa „di ten u dë aki a ko zuntu poi fu di goonliba kaba” (1 Kol. 7:29). Ka fuu dë ta lei wan sëmbë soni u Bëibel di an nango a fesi, nöö a bi o möön bunu fuu mbei möiti u feni sëmbë di ta lei taa de dë sëmbë di „a kai da u de feni di libi u teego”.​—Lesi Tjabukama 13:48.

21. Andi da di tëkisi u di jaa 2020, nöö faandi mbei di tëkisi aki fiti?

²¹ Di tëkisi u di jaa 2020, o heepi u fuu buta pakisei a di fasi fa u sa ko möön sa’ u lei sëmbë soni u Bëibel, sö taa de sa ko dë bakama u Keesitu. Di tëkisi aki ta taki u di soni di Jesosi bi taki di a bi ko makandi ku dee sëmbë a di kuun u Galilea. A bi taki taa: „Un go a hii nasiön sëmbë, nöö un heepi de u de ko dë bakama u mi. Un dopu de.”​—Mat. 28:19.