1-2. Saida mak anju ida hatete ba feto sira iha Jesus nia rate? Jesus rasik fó matadalan saida ba sira?

IHA dadeer-saan nakukun, loron 16 Nisan 33 EC, Maromak nia atan-feto balu neʼebé triste tebes laʼo ba rate atu kose buat morin oioin no mós mina-morin ba Jesus nia mate-isin. Ema hakoi Naʼi Jesus Kristu iha rate neʼe maizumenus ba loron ida ho balu ona. Bainhira feto sira-neʼe toʼo rate, sira hakfodak tanba rate neʼe mamuk ona! Anju ida hatete ba sira katak Jesus moris hiʼas ona, no hatutan: “Nia bá uluk liu imi toʼo Galileia. Imi sei haree nia iha neʼebá.”—Mt 28:1-7; Lc 23:56; 24:10.

² Depois feto sira-neʼe sai husi rate, Jesus rasik hakbesik ba sira no fó matadalan tuirmai neʼe: “Bá fó-hatene haʼu-nia dixípulu sira atu sira bá Galileia no sira sei haree haʼu iha neʼebá.” (Mt 28:10) Buat primeiru neʼebé Jesus halo depois nia moris hiʼas mak arranja reuniaun ida ho ninia dixípulu sira. Iha reuniaun neʼe nia fó sira mandamentu neʼebé importante tebes.

3-4. Tanbasá ita bele dehan katak mandamentu iha Mateus 28:19, 20 laʼós deʼit ba apóstolu sira? (Haree dezeñu iha livru oin.)

³ Lee Mateus 28:16-20. Iha reuniaun neʼe, Jesus esplika kona-ba serbisu importante neʼebé ninia dixípulu sira sei halo iha tempu neʼebá, no ohin loron ita mós halo serbisu neʼe. Jesus hatete: “Laʼo bá no hanorin ema husi nasaun hotu atu sai haʼu-nia dixípulu . . . Hanorin sira atu halo tuir mandamentu hotu neʼebé haʼu fó ona ba imi.”

⁴ Jesus hakarak ninia dixípulu hotu atu haklaken. Nia  la fó deʼit mandamentu neʼe ba apóstolu naʼin-11 neʼebé laran-metin. Tanbasá ita bele dehan nuneʼe? Bainhira Jesus fó mandamentu neʼe, laʼós apóstolu sira deʼit mak halibur iha foho ida iha Galileia. Oinsá ita hatene ida-neʼe? Hanoin-hetan anju ida nia liafuan ba feto sira: “Imi sei haree nia iha [Galileia].” Entaun klaru katak feto laran-metin sira-neʼe mós tuir reuniaun neʼe. Maibé iha tan razaun seluk. Apóstolu Paulo dehan katak Jesus “mosu ba maun-alin naʼin-500 liu iha tempu ida”. (1 Kor 15:6) Dixípulu sira-neʼe halibur hamutuk iha neʼebé?

5. Saida mak ita aprende husi 1 Korinto 15:6?

⁵ Ita bele fiar katak Paulo nia liafuan iha 1 Korinto 15:6 refere ba reuniaun iha Galileia neʼebé temi iha Mateus kapítulu 28. Tanbasá? Primeiru, Jesus nia dixípulu barak mak ema Galileia. Entaun fasil liu atu halaʼo reuniaun ho ema barak iha foho ida iha Galileia duké iha uma ida iha Jeruzalein. Segundu, Jesus neʼebé moris hiʼas ona, hasoru ona apóstolu naʼin-11 iha uma ida iha Jeruzalein. Se Jesus hakarak atu apóstolu sira deʼit mak haklaken no hanorin ema sai dixípulu, nia bele fó mandamentu neʼe ba sira iha Jeruzalein duké husu sira atu bá Galileia hamutuk ho feto sira-neʼe no dixípulu seluk.—Lc 24:33, 36.

6. Oinsá Mateus 28:20 hatudu katak Jesus haruka ita atu hanorin ema sai dixípulu ohin loron? Oinsá mak ema halo tuir mandamentu neʼe agora?

⁶ Terseiru, Jesus nia mandamentu atu hanorin ema sai ninia dixípulu laʼós deʼit ba sira neʼebé moris iha tempu neʼebá. Tanbasá ita bele dehan nuneʼe? Jesus remata ninia mandamentu ba ninia dixípulu sira ho liafuan: “Haʼu sei hamutuk nafatin ho imi toʼo mundu neʼe nia rohan.” (Mt 28:20) Hanesan Jesus hatete, ohin loron Testemuña barak hanorin ema seluk atu sai dixípulu. Tinan-tinan maizumenus ema naʼin-300.000 hetan batizmu nuʼudar Testemuña ba Jeová no sai Jesus Kristu nia dixípulu.

7. Agora ita sei aprende kona-ba saida, no tanbasá?

⁷ Estudante Bíblia barak laʼo ba oin no hetan batizmu. Maibé, dala ruma ema balu neʼebé estuda beibeik Bíblia ho ita taʼuk atu sai dixípulu. Sira gosta estuda Bíblia, maibé sira la laʼo ba oin atu hetan batizmu. Se Ita estuda daudaun Bíblia ho ema ida, ami fiar katak Ita hakarak ajuda Ita-nia estudante atu aplika buat neʼebé nia aprende no sai Kristu nia dixípulu. Agora ita sei aprende oinsá ita bele ajuda ita-nia estudante Bíblia atu hadomi Jeová no laʼo ba oin. Tanbasá ita presiza koʼalia kona-ba neʼe? Tanba dala ruma, ita presiza deside atu kontinua estuda Bíblia ho ema ida ka lae.

8. Tanbasá dala ruma susar atu ajuda estudante Bíblia atu hadomi Jeová?

⁸ Jeová hakarak ema atu adora nia tanba domin. Tan neʼe ita hakarak ajuda estudante Bíblia atu komprende katak Jeová hanoin no hadomi tebes sira. Ita hakarak ajuda sira atu haree Jeová nuʼudar “aman ba oan-kiak sira no proteje feto-faluk sira”. (Sal 68:5) Bainhira Ita-nia estudante hatene katak Jeová hadomi sira, karik sira mós komesa hadomi Jeová. Estudante balu karik sente susar atu haree Jeová nuʼudar Aman neʼebé hadomi sira tanba sira-nia aman rasik la hatudu domin ba sira. (2 Tim 3:1, 3) Tan neʼe, bainhira Ita estuda ho sira, tau fokus ba Jeová nia hahalok furak. Ajuda  sira komprende katak ita-nia Maromak domin nian hakarak sira atu hetan moris ba nafatin, no nia prontu atu ajuda sira. Saida tan mak ita bele halo?

9-10. Ita presiza uza livru saida deʼit bainhira estuda Bíblia ho ema, no tanbasá?

⁹ Uza livru “Ita Bele Komprende Bíblia!” no livru “Oinsá atu Hela iha Maromak nia Domin”. Livru sira-neʼe bele ajuda estudante Bíblia sira atu hadomi Jeová. Porezemplu, kapítulu 1 husi livru Komprende Bíblia fó resposta ba pergunta sira hanesan: Maromak hadomi no hanoin ita ka lae?, Maromak sente oinsá kona-ba ema nia susar?, no Ita bele sai Jeová nia belun ka lae? No livru Hela iha Maromak nia Domin sei ajuda estudante sira atu komprende katak aplika Bíblia nia prinsípiu bele hadiʼa sira-nia moris no hakbesik liután ba Jeová. Maski karik Ita estuda ona livru sira-neʼe ho ema balu, maibé Ita presiza prepara didiʼak ba estuda ida-idak no hanoin didiʼak estudante ida-idak nia presiza.

 ¹⁰ Maibé oinsá se Ita-nia estudante interese ba tópiku husi publikasaun neʼebé laʼós parte ba Ekipamentu Hanorin nian? Karik Ita bele anima nia atu lee rasik publikasaun neʼe, atu nuneʼe Ita bele kontinua estuda hodi uza livru Komprende Bíblia ka livru Hela iha Maromak nia Domin.

11. Bainhira mak ita presiza komesa loke no taka estuda ida-idak ho orasaun? Oinsá mak Ita bele koʼalia ho Ita-nia estudante kona-ba neʼe?

¹¹ Hahú estuda ho orasaun. Se ita estuda ona Bíblia ho ema ba semana balu, diʼak atu loke no taka estuda ida-idak ho orasaun. Ita presiza ajuda estudante atu rekoñese katak atu bele komprende Bíblia ita presiza espíritu santu nia ajuda. Mestre Bíblia balu esplika tanbasá orasaun importante bainhira estuda Bíblia hodi lee Tiago 1:5, neʼebé dehan: “Se imi ida presiza matenek, nia tenke husu beibeik ba Maromak.” Tuirmai mestre neʼe husu ba estudante: “Oinsá mak Ita bele husu matenek husi Maromak?” Baibain estudante konkorda katak ita presiza halo orasaun ba Maromak.

12. Oinsá Ita bele uza Salmo 139:2-4 atu ajuda estudante koʼalia nakloke ba Jeová liuhusi orasaun?

¹² Hanorin Ita-nia estudante atu halo orasaun. Esplika ba nia katak Jeová hakarak rona ninia orasaun husi laran. Esplika katak bainhira ita halo orasaun, ita bele fakar sai ba Jeová ita-nia sentimentu neʼebé karik ita taʼuk atu konta ba ema seluk. Hanoin-hetan katak Jeová hatene saida mak iha ita-nia laran. (Lee Salmo 139:2-4.) Ita mós bele anima ita-nia estudante atu husu Jeová nia ajuda atu troka hanoin neʼebé sala no manán toman neʼebé aat. Porezemplu, karik ema ida neʼebé estuda Bíblia ba tempu balu nafatin gosta selebrasaun ruma neʼebé ema Kristaun labele partisipa. Nia hatene katak ida-neʼe sala, maibé nia gosta buat balu husi selebrasaun neʼe. Anima nia atu fó sai ninia sentimentu ba Jeová kona-ba neʼe no husu Jeová atu ajuda nia hadomi deʼit buat neʼebé Jeová hadomi.—Sal 97:10.

13. (a) Tanbasá ita presiza konvida kedas ita-nia estudante atu tuir reuniaun? (b) Ita bele halo saida atu estudante sente kmaan bainhira tuir reuniaun?

¹³ Konvida kedas Ita-nia estudante Bíblia atu tuir reuniaun. Buat neʼebé Ita-nia estudante rona no haree iha reuniaun sira bele book ninia laran no ajuda nia atu laʼo ba oin. Hatudu vídeo Oinsá mak ami halaʼo reuniaun sira? no konvida nia atu tuir reuniaun hamutuk ho Ita. Se bele, oferese atu tula nia ba Reuniaun-Fatin. Diʼak atu konvida irmaun-irmán oioin atu akompaña Ita atu estuda ho nia. Hodi halo nuneʼe, Ita-nia estudante bele koñese ema oioin iha kongregasaun, no karik nia bele sente kmaan bainhira nia tuir reuniaun.

14. Saida mak bele book estudante atu laʼo ba oin?

¹⁴ Ita-nia objetivu mak atu ajuda estudante Bíblia laʼo ba oin. (Éf 4:13) Bainhira ema ida hakarak estuda Bíblia, karik foufoun nia hanoin deʼit kona-ba oinsá nia bele hetan benefísiu husi estuda neʼe. Maibé bainhira ninia domin ba Jeová sai boot, karik nia sei komesa hanoin kona-ba oinsá nia bele ajuda ema seluk, inklui ema iha kongregasaun laran. (Mt 22:37-39) Bainhira tempu diʼak, keta taʼuk atu fó-hatene ba estudante katak ita hotu iha oportunidade atu apoia Maromak nia Ukun hodi fó kontribuisaun.

15. Oinsá ita bele ajuda estudante Bíblia atu hatene saida mak nia presiza halo bainhira problema mosu?

¹⁵ Hanorin Ita-nia estudante Bíblia  kona-ba saida mak nia bele halo bainhira problema mosu. Porezemplu, karik Ita-nia estudante mak haklaken-naʼin neʼebé seidauk hetan batizmu, no nia hatete katak ema ida iha kongregasaun halo nia laran-kanek. Duké dehan nia mak loos, diʼak atu esplika saida mak nia presiza halo atu tuir Bíblia nia prinsípiu. Nia bele perdua deʼit irmaun ka irmán neʼe no haluha kona-ba problema neʼe. Ka se nia labele halo nuneʼe, nia presiza koʼalia ho irmaun ka irmán neʼe ho laran-diʼak no domin ho objetivu atu halo dame ho nia. (Kompara ho Mateus 18:15.) Ajuda Ita-nia estudante Bíblia atu prepara ninia liafuan. Hatudu ba nia oinsá atu buka-hatene dalan diʼak atu hadiʼa problema neʼe hodi uza Livru atu ajuda Testemuña ba Jeová buka informasaun, JW Library^® no jw.org^®. Se nia simu treinu beibeik antes hetan batizmu, karik neʼe sei ajuda nia atu iha relasaun diʼak ho ema seluk iha kongregasaun depois batizmu.

16. Tanbasá diʼak atu konvida maluk Kristaun oioin atu akompaña Ita halaʼo estuda Bíblia?

¹⁶ Konvida maluk Kristaun oioin no mós katuas área atu akompaña Ita halaʼo estuda Bíblia. Tanbasá? Ita haree ona razaun oioin, maibé razaun ida tan mak maluk Kristaun sira karik bele ajuda Ita-nia estudante iha dalan neʼebé karik Ita rasik labele. Porezemplu, karik Ita-nia estudante koko atu para fuma ba dala balu maibé la konsege. Karik Ita-nia maluk Kristaun ruma manán ona toman neʼe maski uluk la konsege halo nuneʼe ba dala balu. Se nuneʼe, konvida nia atu akompaña Ita halaʼo estuda Bíblia. Ita-nia maluk Kristaun neʼe karik bele fó matadalan diʼak neʼebé estudante Bíblia presiza hatene. Se Ita sente taʼuk atu dirije estuda bainhira hamutuk ho irmaun ka irmán neʼebé iha esperiénsia, Ita bele husu nia atu dirije estuda neʼe. Bainhira ita konvida ema seluk atu akompaña ita, ita-nia estudante bele hetan benefísiu husi sira-nia esperiénsia. Hanoin-hetan, ita-nia objetivu mak atu ajuda estudante atu laʼo ba oin.

17-18. Bainhira Ita presiza deside atu para estuda ho ema ruma, saida mak Ita presiza hanoin?

¹⁷ Se Ita-nia estudante Bíblia la halo mudansa iha ninia moris, karik Ita presiza husu ba Ita-nia an: ‘Haʼu presiza para estuda ho nia ka lae?’ Antes halo desizaun, Ita presiza hanoin kona-ba ninia situasaun. Dala ruma ema balu presiza tempu kleur atu laʼo ba oin kompara ho ema seluk. Husu ba Ita-nia an: ‘Haʼu-nia estudante Bíblia laʼo ba oin tuir ninia situasaun ka lae?’ ‘Nia komesa “halo tuir” buat neʼebé nia aprende ka lae?’ (Mt 28:20) Karik presiza tempu kleur ba estudante ida atu laʼo ba oin. Maibé nia presiza halo mudansa iha ninia moris maski neineik-neineik deʼit.

 ¹⁸ Oinsá se ema ida estuda ona ba tempu balu maibé ita hanoin nia ladún hafolin ida-neʼe? Hanoin toʼok situasaun tuirmai: Ita-nia estudante remata ona estuda livru Komprende Bíblia, no karik nia mós komesa ona estuda livru Hela iha Maromak nia Domin, maibé nia seidauk tuir reuniaun, no mós seidauk tuir Memoriál. Dala barak nia buka razaun oioin atu la estuda. Iha situasaun neʼe, diʼak atu koʼalia nakloke ho Ita-nia estudante. *

19. Saida mak Ita bele hatete se Ita hanoin katak Ita-nia estudante ladún hafolin estuda Bíblia? Oinsá sira-nia resposta ajuda ita halo desizaun?

¹⁹ Karik Ita bele komesa koʼalia hodi husu nia: ‘Tuir Ita-nia hanoin, saida mak hanetik Ita atu sai Testemuña?’ Karik estudante sei hatán: ‘Haʼu gosta estuda Bíblia, maibé haʼu sei nunka sai Testemuña!’ Se nia hanoin hanesan neʼe maski estuda Bíblia ba tempu balu ona, karik Ita lalika kontinua estuda ho nia. Ka karik Ita-nia estudante fó sai ba Ita ba dala primeiru kona-ba tanbasá nia seidauk laʼo ba oin. Porezemplu, karik nia sente katak nia sei nunka bele haklaken uma ba uma. Bainhira Ita komprende ona ninia sentimentu, Ita bele hatene oinsá atu ajuda nia.

20. Oinsá Apóstolu 13:48 bele ajuda ita deside atu para estuda Bíblia ho ema ka lae?

²⁰ Triste tanba estudante balu mak hanesan ema Izraél iha Ezequiel nia tempu. Jeová hatete ba Ezequiel: “Ba sira, ó mak hanesan ema neʼebé kanta knananuk domin nian ho lian furak, no toka instrumentu neʼebé iha talin ho matenek. Sira sei rona ó-nia liafuan, maibé la iha ema ida mak halo tuir.” (Eze 33:32) Karik susar atu fó-hatene ita-nia estudante katak ita sei para estuda ho nia. Maibé, “tempu hela uitoan deʼit ona”. (1 Kor 7:29) Duké gasta tempu barak atu estuda ho ema neʼebé la laʼo ba oin, ita presiza buka ema neʼebé hatudu katak nia “prontu atu simu lia-loos neʼebé lori ba moris rohan-laek”.—Lee Apóstolu 13:48.

21. Saida mak eskritura tinan nian ba tinan 2020? Eskritura neʼe ajuda ita atu halo saida?

²¹ Durante tinan 2020, eskritura tinan nian sei ajuda ita atu tau fokus ba oinsá ita bele sai matenek liután atu hanorin ema sai dixípulu. Mai ita hanoin-hetan Jesus nia liafuan neʼebé nia fó sai durante reuniaun importante iha foho ida iha Galileia: “Laʼo bá no hanorin ema . . . atu sai haʼu-nia dixípulu, fó batizmu ba sira.”—Mt 28:19.