1-2. Ntsumi yi va byele yini vavasati lava a va ri esirheni ra Yesu naswona Yesu u te yini eka vona?

 A KU RI Nisani 16, 33 C.E. ni mixo. Vavasati lava nga ni gome naswona va chavaka Xikwembu, a va ri endleleni yo ya esirheni leri Hosi Yesu Kreste a lahliwe eka rona kwalomu ka tiawara ta 36 leti hundzeke. Loko va fika emasirheni va lava ku tota miri wa Yesu mafurha yo nuhela, va tsemeke nhlana loko va kuma ku nga ri na munhu esirheni! Ntsumi yi va byele leswaku Yesu u pfuxiwile eku feni, yi tlhele yi ku: “Wa mi rhangela ku ya eGaleliya; mi ta n’wi vona kwale.”—Mat. 28:1-7; Luka 23:56; 24:10.

² Loko vavasati volavo va suka esirheni, Yesu u ye eka vona a va byela leswi: “Fambani, mi ya vikela vamakwerhu, leswaku va ya eGaleliya; va ta ndzi vona kwale.” (Mat. 28:10) Yesu a a lava ku byela vadyondzisiwa vakwe mhaka ya nkoka hikuva nhlengeletano yoleyo a ku ta va nhlengeletano yakwe na vona yo sungula endzhaku ka loko a pfuxiwile!

3-4. Hikwalaho ka yini hi vula leswaku xileriso lexi nga eka Matewu 28:19, 20, a xi nga kongomisiwanga eka vaapostola ntsena? (Vona xifaniso lexi nga eka xifunengeto.)

³ Hlaya Matewu 28:16-20. Enhlengeletanweni yoleyo, Yesu u byele vadyondzisiwa vakwe ntirho wa nkoka lowu a va fanele va wu endla, ku nga ntirho lowu na hina hi nga eku wu endleni namuntlha. U te: “Hikokwalaho fambani mi ya endla vanhu va matiko hinkwawo va va vadyondzisiwa, . . . mi va dyondzisa ku hlayisa swilo hinkwaswo leswi ndzi mi leriseke swona.”

⁴ Yesu u lava leswaku valandzeri vakwe hinkwavo va chumayela. Xileriso lexi, a a nga xi byeli vaapostola vakwe va 11 ntsena. Hikwalaho ka yini hi vula tano? Enhlengeletanweni yoleyo  leyi a yi ri entshaveni ya le Galeliya, a ku nga ri na vaapostola ntsena. Tsundzuka, ntsumi yi byele vavasati yi ku: “Mi ta n’wi vona kwale [eGaleliya].” Swi le rivaleni leswaku a ku ri ni vavasati vo tshembeka. Kambe a ku nga ri na vona ntsena. Muapostola Pawulo u vule leswaku Yesu “u humelele eka vamakwerhu vo tlula 500 hi nkarhi wun’we.” (1 Kor. 15:6) Kwihi?

5. Hi dyondza yini eka 1 Vakorinto 15:6?

⁵ Ku ni swivangelo leswi twalaka swo pfumela leswaku eka 1 Vakorinto 15:6, Pawulo a vulavula hi nhlengeletano ya le Galeliya, leyi ku vulavuriwaka ha yona eka Matewu ndzima 28. Hi swihi swivangelo swa kona? Xo sungula, vadyondzisiwa vo tala va Yesu a va huma eGaleliya. Hikwalaho, ntshava ya Galeliya a yi ri yikulu lerova vanhu vo tala a va ta kota ku hlengeletana eka yona, ku tlula ekaya ra munhu wo karhi eYerusalema. Xa vumbirhi, Yesu loyi a pfuxiweke, se a hlanganile ni vaapostola vakwe va 11 ekaya ra munhu wo karhi eYerusalema. Loko a a lava leswaku ntirho lowu wu endliwa hi vaapostola ntsena, a a ta va a va byele va ri voxe eYerusalema ematshan’weni yo va kombela swin’we ni vavasati ni vanhu van’wana leswaku va ya hlangana na yena eGaleliya.—Luka 24:33, 36.

6. Matewu 28:20, yi swi kombisa njhani leswaku xileriso xo endla vadyondzisiwa xa hi khumba ninamuntlha naswona vanhu va swi kombisa njhani leswaku va xi yingisa?

⁶ Xiya xivangelo xa vunharhu xa nkoka. Xileriso xa Yesu xo endla vadyondzisiwa, a xi nga kongomisiwanga eka Vakreste va le nkarhini wakwe ntsena. Hi swi tiva njhani? Yesu u gimete xileriso lexi a xi byeleke valandzeri vakwe hi marito lama nge: “Ndzi na n’wina masiku hinkwawo ku fikela emakumu ka mafambiselo ya swilo.” (Mat. 28:20) Hilaha Yesu a vuleke hakona, namuntlha vanhu vo tala va khomekile hi ntirho wo endla vadyondzisiwa. Hi byihi vuyelo bya kona? Vanhu va kwalomu ka 300 000, va khuvuriwa lembe ni lembe leswaku va va Timbhoni ta Yehovha ni ku va valandzeri va Yesu Kreste!

7. Hi ta bula hi yini eka nhlokomhaka leyi naswona hikwalaho ka yini?

⁷ Vanhu vo tala lava hi dyondzaka na vona Bibele va hetelela va khuvuriwile. Hambiswiritano, van’wana va kanakana ku va vadyondzisiwa va Kreste. Va swi tsakela ku dyondza kambe a va lavi ku khuvuriwa. Loko u dyondza ni munhu wo karhi Bibele, ha tiyiseka leswaku u lava ku n’wi pfuna a tirhisa leswi a swi dyondzaka kutani a va mudyondzisiwa wa Kreste. Eka nhlokomhaka leyi, hi ta vulavula hi ndlela leyi hi nga va pfunaka ha yona vanhu lava hi dyondzaka na vona Bibele leswaku va rhandza Yehovha. Hikwalaho ka yini hi fanele hi vulavula hi mhaka leyi? Hikuva mikarhi yin’wana, hi ta boheka ku endla xiboho xo tshika ku dyondza Bibele ni munhu wo karhi kumbe xo ya emahlweni hi dyondza na yena.

8. Hikwalaho ka yini mikarhi yin’wana swi tika ku pfuna vanhu lava hi dyondzaka na vona Bibele leswaku va rhandza Yehovha?

⁸ Yehovha u lava leswaku vanhu va n’wi tirhela hileswi va n’wi rhandzaka. Hi fanele hi pfuna vanhu lava hi dyondzaka na vona Bibele, va xiya leswaku Yehovha wa khathala hi vona naswona wa va rhandza swinene. Hi lava va teka Yehovha tanihi “tata wa vana lava nga riki na tatana ni [musirheleri] wa tinoni.” (Ps. 68:5) Loko va vona ndlela leyi Xikwembu xi va rhandzaka ha yona, na vona va ta xi rhandza. Vanhu vo tala lava hi dyondzaka na vona Bibele, swi nga va tikela ku teka Yehovha tanihi Tatana loyi a nga ni rirhandzu hikwalaho ka leswi vatata wa vona va nga va kombisiki rirhandzu. (2 Tim. 3:1, 3) Loko u ri karhi u va dyondzisa, yi hlamusele kahle ndlela leyi Yehovha a nga  xiswona. Va tiyisekise leswaku Xikwembu xi lava va kuma vutomi lebyi nga heriki naswona xi lava ku va pfuna va byi kuma. I yini swin’wana leswi hi nga swi endlaka?

9-10. Hi tihi tibuku leti hi faneleke hi ti tirhisa ku dyondzisa vanhu Bibele naswona hikwalaho ka yini?

⁹ Tirhisa buku leyi nge, “I Yini Leswi Hi Nga Swi Dyondzaka eBibeleni?” ni leyi nge “Tihlayiseni eRirhandzwini Ra Xikwembu.” Tibuku leti, ti endleriwe ku pfuna vanhu lava hi dyondzaka na vona Bibele leswaku va rhandza Yehovha. Hi xikombiso, ndzima 1 ya buku leyi nge, Leswi Hi Nga Swi Dyondzaka, yi hlamula swivutiso leswi: Xana Xikwembu xi ni mhaka na hina kumbe xi ni tihanyi? Xana Xikwembu xi titwa njhani loko vanhu va xaniseka? Xana u nga va munghana wa Yehovha? Ku vuriwa yini hi buku leyi nge, Tihlayiseni eRirhandzwini ra Xikwembu? Buku leyi, yi ta pfuna munhu loyi hi dyondzaka na yena a vona ndlela leyi ku tirhisa misinya ya milawu ya Bibele, swi nga n’wi pfunaka ha yona ni ku endla leswaku a va ni vuxaka na Yehovha. Hambiloko u tshame u dyondza ni van’wana hi tibuku leti, mikarhi hinkwayo,  tilunghiselele kahle hi ku ya hi swilaveko swa munhu loyi u dyondzaka na yena.

¹⁰ A hi nge munhu loyi u dyondzaka na yena, u lava ku tiva hi mhaka yo karhi leyi nga eka buku yin’wana leyi nga riki kona eka Switirhisiwa Swo Pfuneta Ku Dyondzisa Bibele. N’wi khutaze leswaku a tihlayela buku yoleyo hi nkarhi wakwe kutani mi ya emahlweni ni dyondzo ya n’wina, mi tirhisa tibuku leti endleriweke ku dyondza ni vanhu ensin’wini.

11. Hi nga sungula rini ku pfula dyondzo ni ku yi gimeta hi xikhongelo naswona hi nga swi sungurisa ku yini?

¹¹ Khongelani mi nga si sungula ku dyondza. Swi kahle ku pfula ni ku gimeta hi xikhongelo loko mi dyondza, kumbexana mi nga endla tano endzhaku ka mavhiki ma nga ri mangani. Hi fanele hi pfuna munhu loyi hi dyondzaka na yena, a vona leswaku hi ta kota ku twisisa Rito ra Xikwembu ntsena loko hi pfuniwa hi moya wa xona lowo kwetsima. Vamakwerhu van’wana loko va nga si sungula hi xikhongelo, va rhanga hi ku hlaya Yakobo 1:5, leyi nge: “Loko mani na mani eka n’wina a kayivela vutlhari, a a hambete a kombela eka Xikwembu.” Kutani va vutisa munhu loyi va dyondzaka na yena va ku, “Hi nga byi kombela njhani vutlhari eka Xikwembu?” Hi ntolovelo u hlamula a ku, hi ku khongela eka Xikwembu.

12. U nga yi tirhisa njhani Pisalema 139:2-4 leswaku u pfuna munhu loyi u dyondzaka na yena Bibele a antswisa swikhongelo swakwe?

¹² N’wi dyondzise ndlela yo khongela. N’wi byele leswaku Yehovha u lava ku twa xikhongelo xakwe lexi humaka embilwini. N’wi hlamusele leswaku loko a khongela a ri yexe, a nga tiphofula eka Yehovha hilaha a nga kotaka hakona. Tsundzuka leswaku Yehovha wa swi tiva leswi hi swi ehleketaka. (Hlaya Pisalema 139:2-4.) Hi nga tlhela hi va khutaza leswaku va kombela Xikwembu xi va pfuna va cinca mahanyelo ya vona ni ku tshika mikhuva yo biha. Hi xikombiso, a hi nge munhu loyi ku nga khale u dyondza na yena Bibele, u rhandza holideyi yo karhi leyi Vakreste va nga fanelangiki va yi tlangela. Wa swi tiva leswaku swi bihile ku endla tano kambe wa yi rhandza swinene. N’wi khutaze a byela Yehovha ndlela leyi a titwaka ha yona ni ku n’wi kombela a n’wi pfuna a rhandza swilo leswi a swi rhandzaka.—Ps. 97:10.

13. (a) Hikwalaho ka yini hi fanele hi rhamba vanhu lava hi dyondzaka na vona Bibele leswaku va ta etinhlengeletanweni ta vandlha to ho suka? (b) I yini leswi hi nga swi endlaka leswaku munhu yoloye a titwa a ntshunxekile eHolweni ya Mfumo?

¹³ N’wi rhambe etinhlengeletanweni ta vandlha to ho suka. Leswi a nga ta swi dyondza etinhlengeletanweni ta vandlha, swi ta n’wi susumetela ku lava ku tirhela Yehovha. N’wi kombe vhidiyo leyi nge, Ku Endliwa Yini eHolweni Ya Mfumo? kutani u n’wi rhamba. Loko swi koteka, n’wi pfune hi xo famba. Swi nga va kahle ngopfu ku famba ni vahuweleri vo hambanahambana loko u ya fambisa dyondzo. Sweswo swi ta endla leswaku a tolovela vanhu va le vandlheni ra ka n’wina naswona u ta titwa a ntshunxekile ku ta etinhlengeletanweni ta vandlha.

14. I yini leswi nga pfunaka munhu loyi hi dyondzaka na yena Bibele leswaku a va ni vuxaka lebyinene ni Xikwembu?

¹⁴ Xikongomelo xa hina, i ku pfuna munhu loyi hi dyondzaka na yena Bibele leswaku a va ni vuxaka lebyinene ni Xikwembu. (Efe. 4:13) Un’wana u pfumela ku dyondza Bibele hileswi a lavaka ku cinca mahanyelo yakwe. Loko ndlela leyi a rhandzaka Yehovha ha yona yi ya yi kula, u ta lava ku pfuna van’wana, ku katsa ni lava nga evandlheni. (Mat. 22:37-39) N’wi hlamusele leswaku ntirho wo chumayela wu seketeriwa hi minyikelo ya ku tirhandzela, na yena a nga nyikela loko a swi tsakela.

15. Hi nga n’wi pfuna njhani munhu loyi hi dyondzaka na yena Bibele leswaku a kota ku tlhantlha swiphiqo?

 ¹⁵ N’wi dyondzise leswi a faneleke a swi endla loko a langutana ni swiphiqo. Hi xikombiso, loko munhu loyi u dyondzaka na yena a ri muhuweleri loyi a nga khuvuriwangiki kutani a ku byela leswaku u khunguvanyisiwe hi munhu wo karhi evandlheni, u fanele u endla yini? U nga yimi na munhu, n’wi hlamusele ndlela yo tlhantlha swiphiqo hi ku tirhisa Matsalwa. A nga hlawula ku rivalela makwerhu kumbe ku ya vulavurisana na yena hi mhaka yoleyo hi xikongomelo xo ‘kuma makwerhu.’ (Ringanisa na Matewu 18:15.) N’wi dyondzise ndlela leyinene yo veka timhaka. N’wi kombe ndlela yo tirhisa JW Library^® app, Nkongomiso Wo Endla Ndzavisiso Wa Timbhoni Ta Yehovha ni jw.org^® leswaku a dyondza ndlela yo lulamisa swiphiqo. Loko u n’wi letela kahle a nga si khuvuriwa, u ta hanyisana kahle ni vamakwerhu loko se a khuvuriwile.

16. Hikwalaho ka yini swi pfuna ku famba ni vamakwerhu vo hambanahambana loko u ya fambisa dyondzo?

¹⁶ Famba ni van’wana kumbe mulanguteri wa muganga loko u ya eka yena. Hikwalaho ka yini? Ku engetela eka leswi hi vulavuleke hi swona, vamakwerhu van’wana va nga kota ku pfuna munhu loyi u dyondzaka na yena hi ndlela leyi a wu nga ta swi kota ku n’wi pfuna ha yona. Hi xikombiso, a hi nge munhu loyi u dyondzaka na yena, u lava ku tshika ku dzaha kambe wa tsandzeka. Loko u ya eka yena, famba ni makwerhu loyi a weke a pfuka leswaku a tshika ku dzaha. Makwerhu yoloye, a nga n’wi hlamusela ndlela leyinene leyi nga n’wi pfunaka tanihi leswi na yena a tshameke a langutana ni xiyimo lexi fanaka. Loko u chava ku fambisa dyondzo emahlweni ka makwerhu loyi ku nga khale a ri Mbhoni, n’wi kombele a yi fambisa. Munhu loyi u dyondzaka na yena, u ta vuyeriwa swinene loko u famba ni vamakwerhu vo hambanahambana. Tsundzuka leswaku xikongomelo xa hina, i ku n’wi pfuna leswaku a va ni vuxaka lebyinene na Yehovha.

17-18. U fanele u ehleketa hi yini loko u nga si teka xiboho xo tshika ku dyondza ni munhu?

¹⁷ Loko munhu loyi u dyondzaka na yena a nga cinci, u nga tivutisa leswi, ‘Xana ndzi tshika ku dyondza na yena?’ Loko u nga si teka xiboho, anakanyisisa hi vuswikoti byakwe. Van’wana va hlwela ku endla nhluvuko kasi van’wana va hatlisa. Tivutise: ‘Xana munhu loyi ndzi dyondzaka na yena, u endla nhluvuko hi ku ya hi vuswikoti byakwe?’ ‘Xana se u sungurile ku “hlayisa” kumbe ku tirhisa swilo leswi a swi dyondzaka?’ (Mat. 28:20) Hambi loko a nga endli nhluvuko hi ku hatlisa kambe swi fanele swi tikomba leswaku se ku ni ku cinca.

¹⁸ Xana u fanele u endla yini loko munhu loyi se ku nga khale u dyondza na yena a nga endli nhluvuko? Ehleketa hi xiyimo lexi: Mi hetile ku dyondza buku leyi nge, Leswi Hi Nga Swi Dyondzaka kumbexana se mi sungule ni leyi nge, Tihlayiseni eRirhandzwini ra Xikwembu kambe  munhu yoloye a nga si tshama a ta etinhlengeletanweni ta vandlha kumbe eXitsundzuxweni! Mikarhi yo tala u vula leswaku a mi nge dyondzi hikwalaho ka swivangelo leswi nga twaliki. Eka xiyimo xo fana ni lexi, u nga jikajiki veka mhaka erivaleni. *

19. Hi xihi xivutiso lexi u nga xi vutisaka munhu loyi a nga endliki nhluvuko naswona u fanele u ehleketa hi yini?

¹⁹ U nga sungula bulo hi ku n’wi vutisa xivutiso lexi nge, ‘U vona onge i yini lexi nga ku sivelaka ku va Mbhoni ya Yehovha?’ A nga ha hlamula a ku, ‘Ndza swi tsakela ku dyondza Bibele kambe a ndzi nge pfuki ndzi ve Mbhoni ya Yehovha!’ Loko a vula sweswo ku ri hi ku se i khale mi dyondza swin’we, namba u tshika ku dyondza na yena. Mikarhi yin’wana, a nga ku byela to ho suka lexi nga n’wi sivelaka. Hi xikombiso, a nga vula leswaku a nge swi koti ku chumayela hi yindlu ni yindlu. Loko u tiva ndlela leyi a titwaka ha yona, swi ta ku olovela ku n’wi pfuna kahle.

20. Mintirho 13:48, yi nga hi pfuna njhani ku vona loko hi fanele hi ya emahlweni ni dyondzo kumbe hi yi tshika?

²⁰ Vanhu van’wana lava hi dyondzaka na vona Bibele, va fana ni Vaisrayele va le nkarhini wa Ezekiyele. Xiya leswi Yehovha a swi byeleke Ezekiyele mayelana na vona, u te: “Kutani waswivo, eka vona u kotisa risimu leri khutazaka rirhandzu, ku fana ni loyi a nga ni rito ro saseka, loyi a xi chayaka kahle xitende. Kunene va ta twa marito ya wena, kambe a va kona lava va ma endlaka.” (Ezek. 33:32) A swi olovi ku byela munhu hi ku kongoma leswaku wa tshika ku dyondza na yena. Kambe “nkarhi lowu seleke wu komile.” (1 Kor. 7:29) A hi lavi ku tlanga hi nkarhi hi dyondza ni munhu loyi a nga endliki nhluvuko, hi lava ku dyondza ni munhu loyi a kombisaka leswaku u “ni mboyamelo lowunene eka vutomi lebyi nga heriki.”—Hlaya Mintirho 13:48.

21. Yi ri yini ndzimana ya hina ya lembe ya 2020 naswona yi ta hi pfuna ku endla yini?

²¹ Ndzimana ya hina ya lembe ya 2020, yi ta hi pfuna leswaku hi antswisa ndlela leyi hi wu endlaka ha yona ntirho wa hina wo endla vadyondzisiwa. Yi ni marito lawa Yesu a ma vuleke enhlengeletanweni leyi nga rivalekiki, leyi a yi ri entshaveni ya Galeliya lama nge: “Hikokwalaho fambani mi ya endla vadyondzisiwa . . . , mi va khuvula.”—Mat. 28:19.