1. ˈAlomanay midokoay to Kawas a tamdaw misiˈayaway to maanan a pakayraan hani?

ANINI, misiˈayaway to kacarirawan ato kasomadan ko ˈalomanay midokoay to Kawas a tamdaw. Itihiay a salikaka iso tahalifaay to mahaenay a pakayraan han? O roma tamdaw mihadidiay to adada, o roma tamdaw mapatayay ko salawina, o roma pakayni ka ecato pidoko to Kawas ko paro no lomaˈ ato widang adadaay ko falocoˈ, o roma tahapadesay a maroray. O hatiniay a salikaka misaaliay to sahinom, wa ngaˈay kita samaan a padama cangraanan hani?

2. Latekay hano misaali ci Pawlo to sahinom hani?

² Tahalifaay ci Pawlo to adihayay katalawan a pakayraan. (2 Korinto 11:23-28) Sowal ningra ‘mapacekay no ceka ko tireng’ no niyah sanay, o adada no tireng ko mitoroˈan alatek. (2 Korinto 12:7) Roma i, ya kalacafayay ci Pawloan matayal a Timas ‘samanen maolahay toniya lekakawa’ mifalahay cingraanan, tada pakatoleday ci Pawloan konini. (2 Timoti 4:10) O mipiliˈan no Kawas ci Pawlo to tatayra i kakarayan a Krisciyang, timoloay ato makahiay a padama to tao cingra, kawra matoledayho ko falocoˈ nolatekay.—Loma 9:1, 2. 

3. Mikicowaay ci Pawlo milifok to sahinom ato sapadama hani?

³ Mikicowaay ci Pawlo milifok to sahinom ato sadama hani? Maedeng pafelian ni Yihofa cingra to fangcalay saocor, padama cingraanan a miremo to pasangaray. (2 Korinto 4:7; Filipi 4:13) Pakaynianho ni Yihofa i roma Krisciyang a mihinom ci  Pawloan, tinakoen ci Aristarkus, Tikikus aci Marko, sowal ni Pawlo toniya cafacafay pafeliay cingraanan to ‘taˈangayay a sahinom.’ (Kolosay 4:11) Patanektekan nangra ci Pawlo, ira ko ˈicel tahatolas a miemem. Ngaˈay cangra a mihinom ci Pawloan, samanen iraay ko maanan a capeling nangra hani? Wa ngaˈay kita samaan a minanam to ngaˈayay taˈarawan nangra a mihinom ato pakalalok to tao hani?

4. Ci Aristarkus hano o madimadiay a widang ni Pawlo hani?

⁴ Ci Aristarkus o Tisalonika Makiton a tamdaw, o madimadiay a widang ni Pawlo cingra. Sakina cecay masowal no Fangcalay Cudad ci Aristarkus i, itiyaay sakina tolo no piliwko ni Pawlo a mitosil tayra i Ifiso. O cafay ni Pawlo ci Aristarkus itiya, malepelay no mariˈangay a tamdaw cangra. (Dmak 19:29) Matedal cingra i, cowa ka pakayni sapidipotaw to niyah a mifalah ci Pawloan. Ikor no pina folad tayra ci Pawlo i Kirisiya, sapipatayaw ko Yutaya tamdaw cingraanan, kamayan ci Aristarkus eca ka matalaw, pacafay itihi ni Pawlo. (Dmak 20:2-4) Maedeng i saka 58 miheca, patayraan ci Pawlo i Loma, kalacafayay ci Aristarkus i lalan, toniya tatokian tahalifaay to pades no tamina. (Dmak 27:1, 2, 41) Tahirato i Loma marofoay i lomaˈ ci Pawlo, cecay liyad kalacafayay ci Aristarkus cingraanan. (Kolosay 4:10) Ira ko madimadiay a cafay, maedeng taˈangayay ko pakalalok ci Pawloan, mahinomay ko falocoˈ!

5. Pakayni Taneng 17:17, o masamaanay ko madimadiay a widang hani?

⁵ Wa ngaˈay kita malecad ci Aristarkusan, ano kangaˈayanto katatiihanto no salikaka, aka a piliyas cangraanan. (ˈOsien ko Taneng 17:17.) Latekay, soˈlin mataˈlifayto ko pasangaray, kamayan misaali cangra to sahinom. Itini lalomaˈ no tolo folad mapatayay ko wama wina ni Folangsis * sanay cingra: “Ikor no madokaˈ pasangaray patatikol a ngaˈay. Soˈlin halafinayto a mapatay ko wama wina, kamayanho a masomad kako, tada miakoˈiday kako pacafay ko widang takowanan, cowa ka pawan to malifaay ako a semsem.”

6. Ano madimadiay kita to widang wa samaan ko hademak hani?

 ⁶ Ano madimadiay kita to widang, o mamakahi mihadak to toki ato ˈicel padama cangraanan. Iraay ko cecay faˈinayan salikaka ci Pitiro, makinsaay to ciekangay ko adada, hanaca kalikiay ko tatiih. O fafahi ningra ci Kayselin sanay: “O cecay mararamoday i kasakopang miˈorongay tamiyanan a paising, mafanaˈ cangra to adada ni Pitiro i, cowa ka pakihater saan tamiyanan misiˈayaw toniya karorayan. Itini pisaalian niyam a toki, padadotocay cangra i tatihi niyam.” Ano tahalifa to pades i, ira ko soˈlinay a widang i tatihi tada mihinomay to falocoˈ!

7-8. Pakayni Kolosay 4:7-9, hano o ngaˈayay pakasoˈlinen ci Tikikus hani?

⁷ Mikitiniay i Aciya ci Tikikus malacafay ci Pawloan, o ngaˈayay pakasoˈlinen a tamdaw. (Dmak 20:4) Maedeng saka 55 miheca i, sapadamaaw to Yutaya a Krisciyang, milimasmasay ci Pawlo to misopeday to kiyaho a demak, alatek miocoran ningra ci Tikikus milosimet toniya kalimlaan a demak. (2 Korinto 8:18-20) Ikorto, sakina cecay marofo ci Pawlo i Loma i, papipacafayan ningra ci Tikikus palakat to tikami, miˈorong to sapakalalok a sowal tayra i kasakopang no Aciya.—Kolosay 4:7-9.

⁸ Padadotocay o ngaˈayay pakasoˈlinen a widang ni Pawlo ci Tikikus. (Titus 3:12) Itiya, cowa ka sahto saan ko Krisciyang mahecad ci Tikikusan a ngaˈay pakasoˈlinen. Maedeng saka 65 miheca, sakina tosa marofo ci Pawlo i Loma sanay ko tikami, ˈalomanay itiniay Aciya a salikaka cowa kakahi a micawmaˈ cingraanan. Matalaway cangra tahacada to sapalak alatek. (2 Timoti 1:15) Kawra, ngaˈayay pakasoˈlinen ci Tikikus, mansa patoroden ni Pawlo cingra to roma a ˈinorong. (2 Timoti 4:12) Ira ko mahaenay ci Tikikusan a ngaˈayay widang, maedeng mahinomay ci Pawlo.

9. Sasamaan kita mitodong ci Tikikusan hani?

⁹ Todongen ita ci Tikikus malo ngaˈayay pakasoˈlinen a tamdaw, ano mihaiay padama to salikaka, tooren a mihaen ko demak. (Matay  5:37; Luka 16:10) Milaheci kita to mikiˈokan a demak i, wa marihaday ko falocoˈ no misaaliay to sadama a tamdaw, o cecay fafahiyan salikaka sanay: “Cowa ko cacalemcem kiso, samanen o mihaiay padama a tamdaw oha mamitoor to sowal a midemak.”

10. Mikitini Taneng 18:24, o tahalifaay to pasangaray ato matoleday ko falocoˈ a tamdaw, mikicowa a milifok to sahinom hani?

¹⁰ O tahalifaay to pasangaray ato matoleday ko falocoˈ a tamdaw, ano mahela ko ngaˈayay pakasoˈlinen a tamdaw mihadak to nafalocoˈan i, wa milifok to sahinom. (ˈOsien ko Taneng 18:24.) Mafalahay no kasakopang ko wawa ni Piciya, tada matoleday cingra, sanay: “Misaaliay kako to ngaˈayay pakasoˈlinen a tamdaw mihadak to nafalocoˈan ako a harateng.” O roma salikaka ci Karos pakayni kararaw malahedaway ko ˈinorong i kasakopang, sanay cingra: “Misaaliay kako ‘topikiˈadingan a kitiraan’, ho ngaˈay rihaday ko falocoˈ ako a mihadak to nafalocoˈan no niyah, eca ka calemcem a makapoˈi no tao.” Sowal ni Karos o malohemay malitengay o ‘pikiˈadingan a kitiraan’ ningra, itini sapadama no malohemay malitengay maremoay ningra ko pasangaray. Masinanotay ko demak no malohemay malitengay, cowa ka patelas palosiyang, parihadayay to falocoˈ ni Karos konini.

11. Mamalo ngaˈayay pakasoˈlinen a widang no tao i, sasamaan ko hademak ita hani?

¹¹ Mamalo ngaˈayay pakasoˈlinen a widang no tao i, misaaliay palahad to mihadidiay a falocoˈ. Mafalahay no faˈinay ci Cana, kawra masasowal to ngaˈayay widang tada taˈangayay ko sapadama cingraanan, sanay: “Mahecaday a sowal misaliyaliyawan ako alatek, kawra mihadidiay cangra mitengil to roray no falocoˈ ako.” Ano misamacay a mitengil kita, wa ngaˈay malo soˈlinay a widang no tao.

12. O cima ci Marko hani? Hano mafanaˈ kita to iraay ko makahiay dademak a harateng ningra hani?

¹² Ci Marko na itiniay i Yirusalim a Yutaya tamdaw, o pasadakan a kaka ningra ci Parnapas o milakowitay to riyar a mitosilay, o kafanaˈan no tamdaw. (Kolosay 4:10) Cihafayay ci Marko alatek, kawra o patosokan ningra cowa ko micangacangay to hafay. Mikitini hakelong nokaˈorip ni Marko mahapinangay ita to iraay ko makahiay dademak a harateng ningra. Tinakoen, marariday cingra kalacafay ci Pawloan aci Pitiroan a dademak, patado cangraanan a milimasmas to kakaenen ato kitiraan. (Dmak 13:2-5; 1 Pitiro 5:13) Sowal ni Pawlo, ci Marko, o ‘mikapotay takowanan a matayal, pakayni i Hongti Kitakit no Kawas a misaˈicel,’ hanaca ‘patanektekay’ cingraanan.—Kolosay 4:10, 11 ato roma pihongyak.

13. Mikitini 2 Timoti 4:11, samaan mahapinang ita, tada masemeray ci Pawlo to kamadimadi ni Marko a dademak hani?

¹³ Maedeng itini saka 65 miheca, sakina tosa ni Pawlo a marofo i Loma i, patikamiay ci Timotian to saka tosa a tikami, palimoˈot cingraanan mitaaw ci Markoan tayra i Loma. (2 Timoti 4:11) Tada masemeray ci Pawlo to kamadimadi ni Marko a dademak, mansa toya karorayan a tatokian, mitokelay ci Pawlo pacafay ci Marko i tihi ningra. Pacafayay ci Marko ci Pawloan, misaday to kakaenen anca sapitilid to tikami a lalosidan. Tada o ngaˈayay a widang ni Pawlo ci Marko, itini sadama ato pakalalok ningra, ngaˈayay ci Pawlo tahatolas a miemem, tahira i kapatayan ningra.

14-15. Pakayni mihadak to sapadama, mikitini Matay 7:12 mananam ita ko maanan hani?

¹⁴ ˈOsien ko Matay 7:12. Ano misiˈayaw kita to pasangaray i, o mamiakoˈid to sapadama no tao. O wama ni Ruyan mapatayay i latiih, sanay  cingra: “Ano taˈangayay ko semsem iso i, awaayto ko pakayraan a midemak to kalo a demak. Kawra ano ira ko padamaay a tamdaw, soˈlin o mimingay a demak, taˈangayay ko sahinom.”

¹⁵ Sasamaan ko hademak ita a padama to tao hani? Misinanot kita to saali no tao. Fafekangay lalakaw masasowalay ci Pitiro aci Kayselin cowa ka ngaˈay palakat to paliding, mansa talaˈayaw ko cecay fafahiyan salikaka miˈorongay cangraanan a paising, milimasmasho to roma salikaka i kasakopang macaceror paising cangraanan. Iraay ko sadama ci Pitiroan aci Kayselinan han? Sowal ni Kayselin: “Oniya limasmas mahepolay ko karetengay ˈinorong niyam.” Soˈlin caka samaan ko mihadakan ita a sapadama, wa ngaˈay paira to taˈangayay a sahinom to tao.

16. Mikitini ci Markoan mananam ita ko maanan hani?

¹⁶ Ngaˈayay haratengen ita, adihayay ko dademaken ni Marko kalimlaan a demak, mahawpay ko pitilid to Ratoh a cudad, maedeng ˈifowaay cingra. Kawra kamayan mihadak cingra to toki a mihinom ci Pawloan, hanaca rihadayay ko falocoˈ ni Pawlo misaali to sapadama ningra. O cecay fafahiyan salikaka ci Ancila, mipatayan no tao ko fofo ningra. Mihinomay ko roma salikaka cingraanan, tada miakoˈiday cingra. Sanay: “Ano talaˈayaw ko widang a mihadak to sapadama, eca ka masawi, wa ngaˈayto kako a misaali to sapadama nangra.” Mihaenay lalicayen ita ko niyah: “Itini pinengneng no tao, o makahiay a mihadak to sapadama ato sahinom a tamdaw kako han?”

17. Pakayni pihinom to tao, mikitini 2 Korinto 1:3, 4 mananam ita ko maanan hani?

¹⁷ Itini tatihi ita adihayay ko misaaliay to sahinom a salikaka, wa ngaˈay kita tano sahinom no tao kitaanan a sowal mihinom cangraanan. Tahalifaay ci Nino a salikaka to kakesem i nokapatay no fofo, sanay cingra: “Ano makahi kita talaˈayaw, wa ngaˈayto ci Yihofa pakayni kitaanan a mihinom to tao.” (ˈOsien ko 2 Korinto 1:3, 4.) O masowalay i fafekang ci Folangsis sanay ko sowal: “Matatodongay ko sowal i 2 Korinto 1:4, malifok ita ko sahinom  no tao i, ngaˈayay tano malecaday a pakayraan a mihinom to tao.”

18. (1) O roma tamdaw maˈaraw ko tao misaali to sahinom i, hano cisasa ko harateng hani? (2) Sasamaan kita mihinom to tao hani? Patinakoen.

¹⁸ Latekay cowa ka fanaˈ kita to o maanan ko hasowal ato midemak to maanan, mansa maˈaraw ko tao misaali to sahinom i, cisasaay ko harateng. Kawra wa ngaˈay kita talaˈayaw a mihinom to masomaday a tamdaw. O cecay malohemay malitengay ci Pawlo, maharatengayho ningra ikor no mapatay ko wama, samanay misarocod ko salikaka a mihinom cingraanan. Sanay cingra: “Mahapinangay ako makalimay ko salikaka sapihinomaw takowanan, edeng cowa ka fanaˈ to sasamaan a pasowal, hato miakoˈiday kako to ngaˈayay harateng nangra.” Roma salikaka ci Tayong, tahalifa to taˈangayay ˈatoray i, sanay cingra: “Ikor no ˈatoray, adihayay ko macadaay a lihaf no salikaka i soci, cowato ka harateng ako kora lalakaw, kawra cowa ka pawan kako to kaciharateng nangra to ˈorip ako.” Mihaenay, ano soˈliˈlin kita a ciharateng to tao o ngangaˈay a mihinom cangraanan.

19. Hano papadadotoc a mihinom to tao hani?

¹⁹ Wa mahererekto koniya lekakawa, mihaenay o pakayraan noniya hekal wa tatiitatiih, wa malingad ko pasangar nokaˈorip ita. (2 Timoti 3:13) Roma i, cowa ko malefotay kita, marariday mararaw, mansa miceriday misaali to sahinom. O saka ngaˈay no tarokos ci Pawlo a madimadi, mihadidi tahatolas, mikitiniay sahinom no salikaka. Mihaenay i, malecad kita ci Aristarkusan madimadi, malecad ci Tikikusan ngaˈay pakasoˈlinen, malecad ci Markoan makahi a dademak, mihaen ko demak ita wa ngaˈay padama to salikaka a tanektek.—1 Tisalonika 3:2, 3.