1. ¿Kuna jan waltʼäwinakansa Jehová Diosan walja servirinakapajj uñjasipjje?

 WALJA jilat kullakanakaw aka oraqpachan kunayman jan walinakan uñjasipjje, yaqhepajj jukʼamp llakinakanwa uñjasipjjaraki. Inas congregacionasan ukham jan walin uñjasir jilat kullakanakajj utjchi. Yaqhepajj wali usutäpjjewa, yaqhepajj familiapat maynin jiwatapatwa wali llakitäpjjaraki. Yaqhepasti, mä amigoparu jan ukajj familiapat mayniru Diosat jitheqtir uñjasaw wal llakisipjjaraki. Yaqhepajj terremotonaka, jachʼa thayanaka jan ukajj yaqha ukham jan walinak pasasaw tʼaqesipjjaraki. Taqe uka jilat kullakanakasaw chuymachtʼatäñ munapjje. ¿Kunjamsa jupanakar chuymachtʼsna?

2. ¿Awisajj kunatsa Pablojj chʼamañchtʼatäñ munäna?

² Apóstol Pablojj walja kutiw kunayman jan walinakan uñjasïna (2 Cor. 11:23-28). Ukatjja jupajj usutarakïpachänwa, “mä chʼapiw jañchijan utji” sasaw säna (2 Cor. 12:7). Ukhamarakiw Demas sat yanapiripas llakisiyäna, Demasajj “akapachar wal munatap laykuw” jupar jaytanukjjäna (2 Tim. 4:10). Pablojj wali yanaptʼasiri, jan ajjsariri ajllit cristianökchïnsa, awisajj wali llakitaw uñjasïna (Rom. 9:1, 2).

3. ¿Kunjamsa Jehová Diosajj Pablor chʼamañchäna?

³ Pablojj wakiskäna ukarjamaw chʼamañchtʼäwi katoqäna. Jehová Diosajj espíritu santopampiw chʼamañchtʼäna (2 Cor. 4:7; Filip. 4:13). Ukhamarakiw jilat kullakanak taypejj chʼamañchtʼäna. Jupa pachpaw akham säna: “[Yaqhepajj] wal chuymachtʼapjjetu” sasa (Col. 4:11). Pablor chuymachtʼirinakat  yaqhepajj akïrinakänwa: Aristarco, Tíquico, Marcos. Jupanakaw aguantañapatakejj chʼamañchapjjäna. ¿Uka chuymachtʼir kimsa cristianonakajj kunjam chuymanïpjjänsa? ¿Kunjamsa jupanakat yateqasisajj mayninakar chʼamañcharaksna?

4. ¿Kunjamsa Aristarcojj jan jaytjasiri amigötap uñachtʼayäna?

⁴ Aristarcojj Pablon jan jaytjasiri suma amigopänwa. Jupajj Macedonia toqenkiri Tesalónica markatänwa. Pablojj misionerjam kimsïr viajepan Efesonkaskäna uka toqet parlkasaw Bibliajj Aristarcot qhanañchi. Ukanjja, chʼajjwañ munir jaqenakaw Aristarcor katuntapjjäna (Hech. 19:29). Antutjjapjjäna ukhajja janiw jayar qhespkänti, janiw Pablor jaytanukkänti. Mä qhawqha phajjsitjja, Grecia toqeruw sarapjjäna, ukanjja uñisiri jaqenakajj niyaw Pablor jiwayapjjäna, ukampis Aristarcojj janiw jaytanukkänti (Hech. 20:2-4). Kunapachatï Pablorojj Roma markar 58 maran preso apapjjäna ukhajja, Aristarcojj ukhamarakiw Pablomp chika uka jaya viajen saräna, qotar barcojj jalantkäna ukhas jupampïskänwa (Hech. 27:1, 2, 41). Pablojj Roma markan preso katuntatäskäna ukhajja, amuyatajj mä qhawqha tiempow Aristarcojj jupamp chikäskarakïna (Col. 4:10). Ukham jan jaytjasir amigonïñajj Pablor wal chʼamañchpachäna.

5. ¿Kunjamsa Proverbios 17:17 textorjamajj jan jaytjasir suma amigösna?

⁵ Jiwasajj Aristarco cristianjamarakiw jan jaytjasirïtas uñachtʼaysna, kusisiñ tiemponsa llakisiñ tiemponsa jilat kullakanakasarojj janiw jaytjañasäkiti (Proverbios 17:17 liytʼañataki). Jan walinakajj pasjjchi ukhasa, jilat kullakanakasajj chuymachtʼatäñ munasipkakiwa. Uk amuytʼañatakejj Francisca * kullakat parltʼañäni. Jupan awkipas taykapas cáncer usumpiw kimsa phajjsinaki jiwapjjäna. Jupajj akham siwa: “Jan waltʼäwinakan uñjasktan ukhajja, tiempos pasjjchejja llakitäskaktanwa. Awk taykajan jiwatapajj jayäjjchisa, nayan tʼaqesiskatajata amtasir amigonakajar wal yuspärta” sasa.

6. ¿Kunjamsa jan jaytjasiri amigonakajj yanaptʼasipjje?

 ⁶ Jan jaytjasiri amigonakajja jilat kullakanakaparojj yanaptʼapjjapuniwa. Uk amuytʼañatakejj Piter sat mä jilatat parltʼañäni. Jan qollañjam jiwayir usunïtaw sasaw doctoranakajj jupar sapjjäna. Katy sat esposapajj akham siwa: “Kunat usutas uk Piterar yatiyapkäna ukhajja, mä chacha warmi jilat kullakaw doctoran ukar compañapjjetäna. Piteran usupjjat yatipjjäna ukhajja, ‘janiw sapak jaytapkämati’ sasaw sapjjetäna, cheqapuniw munapkayäta ukhajj wal yanaptʼapjjetäna” sasa. Ukham jan waltʼañanak aguantañatak yanaptʼasiri amigonakajja ¡walpun chʼamañchistu!

7, 8. Colosenses 4:7-9 textorjamajja, ¿kunjamsa Tiquicojj confiykañ cristianötap uñachtʼayäna?

⁷ Tiquicojj Asia provinciatänwa, jupajj Pablon wali confiykañ amigopänwa (Hech. 20:4). 55 maranjja, Judeankiri cristianonakar yanaptʼañatakiw Pablojj qollqe apthapisiñapatak wakichäna, ukan yanaptʼañapatakejj Tiquicoruw maypachäna (2 Cor. 8:18-20). Mä qhawqha maranakatjja, kunapachatï Pablojj Roma markan preso katuntatäkäna ukhajja, Tiquicow mensajeropjam yanaptʼäna. Jupajj Pablon cartanakapa ukhamarak chʼamañchkir arunakapwa Asia cheqankir congregacionanakar apäna (Col. 4:7-9).

⁸ Tiquicojj Pablotak wali confiykañ amigönwa (Tito 3:12). Janiw taqe cristianonakajj jupjam confiykayäpkänti. Sañäni, niya 65 maranjja, Pablojj Roma markan payïr kutin presot katuntatänwa. Kunjamtï Pablojj qellqkänjja, ukapachajj Asia provinciankiri walja cristianonakaw jupat jitheqtapjjäna, inas uñisirinakar ajjsarasin ukham lurapjjchïna (2 Tim. 1:15). Ukampis Tiquicojj confiykañänwa, ukatwa jukʼamp lurañanak jupar churäna (2 Tim. 4:12). Ukham suma amigonïsajja Pablojj wal kusispachäna.

9. ¿Kunsa Tiquicot yateqassna?

⁹ ¿Kunjamatsa Tíquico cristianjam wali confiykañ amigösna? Jiwasatï jilat kullakanakar ‘yanaptʼämaw’ sisstanjja, arunakas phoqañasawa (Mat. 5:37; Luc. 16:10). Yanaptʼa munapki uka jilat kullakanakajja, jiwasajj confiykañ  amigötan ukhajj wal chuym qhanartayasipjje. Mä kullakajj akham siwa: “Maynejj arunakap phoqerïki ukhajja tiempoparuw phoqani sasaw confiytanjja” sasa.

10. Kunjamtï Proverbios 18:24 texton siskejja, ¿khitinakas jan waltʼäwin uñjasipki ukanakarusa mä llaki pasapki ukanakarusa chuymachtʼapjjaspa?

¹⁰ Mä jan waltʼäwin uñjasipki, jan ukajj mä llaki pasapki ukanakajja, confiykañ mä amigor taqe chuym awistʼasipjje ukhajj wal chuym qhanartayasipjje (Proverbios 18:24 liytʼañataki). Ukaw Bijay sat jilatampejj pasäna. Yoqapajj congregacionat jaqsutäkäna ukhajja, jilatajj akham sänwa: “Khitirutï wal confiykta ukar awistʼasiñwa munayäta” sasa. Carlos sat yaqha jilatajja, mä juchar purtʼasitap laykuw congregacionan mä privilegiop aptʼasïna. Jupajj akham siwa: “Kuntï lurkayäta ukat jan juchañchasiri mä jilatampi parltʼañwa munayäta” sasa. Uka toqet jan llakisjjañapatakejj jilïr irpirinakaw yanaptʼapjjäna. Carlos jilatajja, jilïr irpirinakan amuytʼirïpjjatapsa jan yaqhanakar parlasirïpjjatapsa yatïnwa ukaw jupar chuymachtʼarakïna.

11. ¿Kunas confiykañ suma amigöñatak yanaptʼistaspa?

¹¹ Confiykañ amigöñatakejj paciencianïñwa yateqañasa. Zanna sat kullakarojj esposopaw jaytanuküna. ¿Kunas juparojj jan sinti llakisiñatak yanaptʼäna? Munat amigonakapar awistʼasiñaw yanaptʼäna. Kullakajj akham siwa: “Inas walja kuti uka toqet parlchiyäta, ukampis amigonakajajj wali pacienciampiw istʼapjjetäna” sasa. Jiwasatï ukham suma istʼirïñäni ukhajja, suma amigorakiñäniwa.

12. ¿Khitïnas Marcosajja, kunjamsa jupjam wali yanaptʼasirïsna?

¹² Marcosajj Jerusalenankir judío cristianönwa. Bernabé primopajj wali uñtʼat mä misionerönwa (Col. 4:10). Amuyatajja Marcosan familiapajj wali qollqenïnwa, ukampis jupatakejj janiw qollqejj jukʼamp wakiskirïkänti. Marcosajj wali yanaptʼasirïnwa, yaqhanakar yanaptʼasajj kusisitarakïnwa. Sañäni, apóstol Pablosa apóstol Pedrosa lurañanakap phoqañatak viajipjjäna ukhajja, Marcosajj walja kutiw jupanakamp chik saräna. Ukham sarasajj jupaw manqʼa alirïna, alojamientsa thaqerïna, yaqha ukhamanaksa lurarakirïna (Hech. 13:2-5; 1 Ped. 5:13). Apóstol Pablojj Marcosat akham sänwa: ‘Diosan Reinop laykojj nayamp chika wali trabajtʼiriwa’, ‘wali chuymachtʼasirirakiwa’ sasa (Col. 4:10, 11).

13. Kuntï 2 Timoteo 4:11 texton siski ukarjamajja, ¿kunjamsa Pablojj Marcosan yanaptʼap wali valoranit uñjäna?

¹³ Marcosampi Pablompejj wali suma amigöpjjänwa. ¿Kunatsa ukham sistanjja? 65 maranjja apóstol Pablojj Roma markanwa qhepa kuti preso katuntat uñjasïna, ukhaw Timoteorojj payïr cartap qellqäna. Uka cartanjja, “jutasajj Marcosaruw [Roma markar] irpanïta” sasaw Timoteor säna (2 Tim. 4:11). Ukhamasti Marcosan wali yanaptʼasirïtapjja Pablojj wali valoranitwa uñjäna, ukatwa uka jan wali urunakan jupampi chikäñapatakejj jawsayäna. Marcosajj kunaymanitwa Pablor yanaptʼäna, inas manqʼa aparapchïna, jan ukajj kunanakatï qellqañapatak munaskäna ukanak aparapchïna. Marcosan luratanakapajja, jiwayapkäna uka nayrajj aguantañatakiw Pablor wal yanaptʼpachäna.

14, 15. ¿Kunsa Mateo 7:12 textojj mayninakar yanaptʼañ toqet yatichistu?

¹⁴ (Mateo 7:12 liytʼañataki). Jan walinakan uñjasktan ukhajja, yanaptʼatäsajj taqe chuymaw yuspärtanjja. Ryan sat jilatan tatapajj akatjamatwa mä accidenten jiwäna. Jilatajj akham siwa: “Wali llakitäktan ukhajja, janiw kun lurañatakis chʼamajj utjasjjeti.  Mayninakajj jiwasar yanaptʼañatak mä kuns lurapjje ukhajj wal chuym qhanartayistu” sasa.

¹⁵ Jilat kullakanakajj kunan yanaptʼatäñsa munapjje uk amuyañäni ukhajja, kunjam yanaptʼañsa yatiñäniwa. Párrafo 6 ukan parlaniwayktan uka Piter jilatampit Katy kullakampit parltʼaskakiñäni, jupanakarojj mä kullakaw doctoran ukar sarapjjañapatak yanaptʼäna. Niyakejjay uka chacha warmejj wali llakitäsin jan auto apnaqañ puedepkchïnjja, congregacionan khitinakatï yanaptʼañ munapkäna ukanak irpapjjañapatakiw uka kullakajj mä programa wakichtʼäna. ¿Kunjamsa ukajj uka chacha warmir yanaptʼäna? Katy kullakajj akham siwa: “Ukham yanaptʼasajj mä jachʼa qʼepsa apaqapkitaspa ukhamänwa” sasa. Ukhamasti mä jukʼaksa jilat kullakanakar yanaptʼañänejja, ukajj wal jupanakar chʼamañchtʼani.

16. ¿Kunsa Marcos cristianot yateqassna?

¹⁶ Nayrïr patak maranakan jakiri Marcos chachat parltʼaskakiñäni. Jupajj jan tiemponiw sarnaqpachäna. Jehová Diosajj wali wakiskiri lurañanakwa jupar churäna, ukanakat mayajj Marcos libro qellqañänwa. Walja lurañanakanïkchïnsa, Pablor chʼamañchtʼañatakejj tiempo apstʼasipunïnwa, Pablosti jan ajjsarasaw jupar yanaptʼa mayirakïna. Ángela sat mä kullakat parltʼañäni, awichapajj mä akatjamat jiwäna ukhajja, kunjamtï Marcosajj lurkänjja ukhamarakiw jilat kullakanakajj jupar chuymachtʼapjjäna, ukatwa jupajj wal yuspäräna. Kullakajj akham siwa: “Jilat kullakanakajj taqe chuyma yanaptʼistu ukhajja, jan ajjsarasaw jupanakar yanaptʼa maytanjja. Jupanakajj taqe chuymaw yanaptʼasipjje” sasa. Ukatwa taqenis akham sas jisktʼasiñasa: “¿Jilat kullakanakar jankʼak chuymachtʼirit uñtʼatätti?” sasa.

17. Kuntï 2 Corintios 1:3, 4 texton siski uka arunakat lupʼiñajj ¿kunatakis yanaptʼistaspa?

¹⁷ Walja jilat kullakanakaw chuymachtʼatäñ munapjje. Kunjamtï yaqhanakajj chuymachtʼapkistäna ukat yateqasisaw jiwasajj chuymachtʼaraksna. Dina sat mä kullakat parltʼañäni,  awichapaw jiwäna. Kullakajj akham siwa: “Jiwasatï munstanjja, Jehová Diosajj jiwas toqew yaqhanakar chuymachtʼaspa” sasa (2 Corintios 1:3, 4 liytʼañataki). Párrafo 5 ukan parlaniwayktan uka Francisca kullakajj akham siwa: “Kuntï 2 Corintios 1:4 texton siski uka arunakajj cheqäskapuniwa. Kunjamtï yaqhanakajj chuymachtʼapkistojja, ukhamwa jiwasajj yaqhanakar chuymachtʼaraksna” sasa.

18. 1) ¿Kunatsa yaqhepajj chuymachtʼañ ajjsarapjje? 2) ¿Kunjamsa mayninakar chʼamachtʼsna? Uk mä experienciampi qhanañchtʼam.

¹⁸ Ajjsarir jaqëkstansa, jan walinakan uñjasipki ukanakar chuymachtʼañatak chʼamachasiñasawa. Sañäni, awisajja llakin uñjaski ukanakarojj kamsarakïsti, jan ukajj kunjamsa yanaptʼäjja sasaw llakissna. Paul sat mä jilïr irpirejja, tatap jiwkäna ukhajj kunjamsa jilat kullakanakajj yanaptʼapjjäna ukwa amti. Jupajj akham siwa: “Amuyatajja jilat kullakanakatakejja nayamp parltʼañajj chʼamakïnwa, janiw kun sañsa puedepkänti. Ukhamäkchïnsa nayar yanaptʼañ munapjjatapat jichhakamaw yuspärta” sasa. Tajon sat jilatajj terremotonwa uñjasirakïna, jupajj akham siwa: “Cheqas terremoto pasatat kamsasas qellqanipjjetäna uk janiw amtkti. Antisas akakwa amtta: qellqanisajj kunjamäsktsa uka toqetwa llakisipjjäna” sasa. Ukhamasti jiwasajj mayninakat llakisiñäni ukhajja wal jupanakar chuymachtʼañäni.

19. ¿Kunatsa ‘wali chuymachtʼasiri’ amigöñatak chʼamachasiñasa?

¹⁹ Akapachan tukusiñapajj jukʼamp jakʼankjjani ukhajja, jukʼamp jan walinakaw pasani, jakañajj jukʼamp chʼamäjjarakiniwa (2 Tim. 3:13). Pantjasir jaqëtas laykojja, kunans pantjasikipuniñäniwa. Ukatwa chuymachtʼatäñ munaskakiñäni. Apóstol Pablojj jiwañkamaw aguantäna, ukatakejj jilatanakas yanaptʼapjjarakïnwa. Ukhamasti Aristarco cristianjam jan jaytjasiri amigöñasawa, Tíquico cristianjam confiykañ amigöñasawa, Marcos cristianjam yanaptʼasirïñasarakiwa. Jiwasatï ukham suma amigöñänejja, Jehová Diosat jan jitheqtapjjañapatakiw jilat kullakanakar yanaptʼañäni (1 Tes. 3:2, 3).