1. Anong nakakapurisaw na mga sitwasyon an naeeksperyensiyahan nin dakul na maimbod na lingkod ni Jehova?

SA BILOG na kinaban, dakul na lingkod ni Jehova an nakakaeksperyensiya nin nakakapurisaw o nakakamundong marhay na mga sitwasyon. Naririsa mo daw iyan sa saindong kongregasyon? May mga Kristiyano na igwang tinatagalan na malalang hilang o nagmumundong marhay sa pagkagadan nin mahal sa buhay. An iba nakakamati nin grabeng kamunduan dahil sa pagbaya sa katotoohan kan saindang kapamilya o dayupot na amigo. May nagkapira man na nag-aagi nin kasakitan na dara nin mga kalamidad. An gabos na brother asin sister na iyan nangangaipo nin karangahan. Paano ta sinda matatabangan?

2. Taano ta may mga pagkakataon na kinaipuhan man ni apostol Pablo an karangahan?

² Dakul na beses kaidtong nameligro an buhay ni apostol Pablo. (2 Cor. 11:23-28) Kinaipuhan man niyang tagalan an sarong “tunok sa laman,” na posibleng sarong klase nin hilang. (2 Cor. 12:7) Asin kinaipuhan niyang makayanan an pagkadisganar kan si Demas, na minsan niyang nagin kapwa trabahador, binayaan siya “huling namumutan [ni Demas] an presenteng sistema nin mga bagay.” (2 Tim. 4:10) Si Pablo sarong makusog an buot na linahidan na Kristiyano na matinabang na marhay, pero may mga pagkakataon na maski siya nakamati man nin pangluluya nin buot.—Roma 9:1, 2.

3. Paano rinanga asin tinabangan ni Jehova si Pablo?

³ Nakamtan ni Pablo an karangahan asin tabang na kaipuhan niya. Paano? Siguradong ginamit ni Jehova an saiyang banal na espiritu tanganing pakusugon si Pablo. (2 Cor. 4:7; Fil. 4:13) Rinanga man siya ni Jehova paagi sa mga kapwa Kristiyano. Ilinadawan ni Pablo an nagkapira sa saiyang mga kapwa trabahador bilang  “dakulang karangahan” sa saiya. (Col. 4:11) Kaiba sa mga ini na sinambit niya an pangaran iyo si Aristarco, Tiquico, asin Marcos. Pinakusog ninda si Pablo, asin tinabangan siya na makatagal. Anong mga kuwalidad an nakatabang sa tulong Kristiyanong ini na magin nakakarangang marhay? Paano niyato maaarog an saindang marahayon na halimbawa mantang hinihinguwa tang rangahon asin pakusugon an lambang saro?

4. Paano pinatunayan ni Aristarco na saro siyang maimbod na amigo ni Pablo?

⁴ Si Aristarco, na sarong Kristiyano na taga Tesalonica sa probinsiya nin Macedonia, nagin sarong maimbod na amigo ni Pablo. Mababasa niyato an inot na pagkasambit manungod ki Aristarco kan magbisita si Pablo sa Efeso sa ikatulo niyang pagbiyahe bilang misyonero. Mantang kaibanan siya ni Pablo, dinakop si Aristarco nin sarong grupo nin anggot na mga tawo. (Gibo 19:29) Kan sa huri pinatalingkas siya, imbes na sadiring kaligtasan an intindihon, dai niya binayaan si Pablo. Pakalihis nin pirang bulan, sa Grecia, nasa kaibanan pa man giraray ni Pablo si Aristarco dawa padagos na nanghuhuma an mga parakontra na gagadanon si Pablo. (Gibo 20:2-4) Kan mga 58 C.E. kaidtong dinara si Pablo sa Roma bilang preso, inibanan siya ni Aristarco sa halawig na pagbiyahe, asin magkaibanan sinda kan maglubog an sinasakyan nindang barko. (Gibo 27:1, 2, 41) Kan sinda nasa Roma na, minalataw na inibanan niya si Pablo sa bilangguan nin mga pirang panahon. (Col. 4:10) Kaya bakong makangangalas na napakusog asin naranga si Pablo kan arog kaiyan kaimbod na amigo!

5. Sigun sa Talinhaga 17:17, paano kita magigin maimbod na amigo?

⁵ Arog ni Aristarco, puwede kitang magin maimbod na amigo sa satong mga tugang paagi sa pagdadanay na kaiba ninda bako sana sa marahay na mga panahon kundi sa mga panahon man nin “kahaditan.” (Basahon an Talinhaga 17:17.) Dawa tapos na an problema kan satong tugang, tibaad kaipuhan pa man giraray niyang rangahon. Parehong nagadan sa kanser an magurang ni Frances. * Inot an saiyang ama, dangan pakalihis nin tulong bulan an saiya naman na ina. Sinabi niya: “Sa hiling ko, haloy na panahon kitang naaapektaran nin masakit na mga  problema. Kaya nagpapasalamat talaga ako sa maimbod na mga amigo na isinasaisip na yaon pa an kulog, dawa medyo haloy-haloy na an naglihis pagkagadan kan mga magurang ko.”

6. Papahiruon kita kan satong kaimbudan na gibuhon an ano?

⁶ An maimbod na mga amigo nagsasakripisyo tanganing tabangan an saindang mga tugang. Halimbawa, an brother na si Peter na-diagnose na may hilang na marikas na maglalala asin ikakagadan niya. Sinabi kan saiyang agom na si Kathryn: “Sarong mag-agom na kakongregasyon mi an inibanan kami sa doktor, tapos duman mi naaraman an hilang ni Peter. Kaidto mismo, nagdesisyon sinda na dai ninda kami babayaan sa aatubangon ming masakiton na kamugtakan na ini, asin puon kaidto pirmi sindang yaon para samo nuarin mi man sinda kaipuhan.” Nakakapakusog nanggad na magkaigwa nin tunay na mga amigo na makakatabang sa sato na makayanan an mga pagbalo!

7-8. Sigun sa Colosas 4:7-9, paano pinatunayan ni Tiquico na mapagtitiwalaan siya?

⁷ Si Tiquico, na sarong Kristiyano na taga Asia na sarong distrito kan Roma, midbid na maimbod na kaiba-iba ni Pablo. (Gibo 20:4) Kan mga 55 C.E., nag-areglo si Pablo nin pagkolekta nin pondong pang-ayuda para sa mga Kristiyano sa Judea, asin posibleng pinatabang niya si Tiquico sa mahalagang asignasyon na iyan. (2 Cor. 8:18-20) Dangan kan mabilanggo si Pablo sa Roma sa inot na pagkakataon, naglingkod si Tiquico bilang mensahero ni Pablo. Siya an nagpapaabot kan mga surat asin nakakapakusog na mga mensahe ni Pablo sa mga kongregasyon sa Asia.—Col. 4:7-9.

⁸ Si Tiquico nagdanay na mapagtitiwalaan na amigo ni Pablo. (Tito 3:12) Bakong gabos na Kristiyano kaidto arog ni Tiquico na talagang maaasahan. Kan mga 65 C.E., kan mabilanggo si Pablo sa ikaduwang pagkakataon, sinabi niya sa saiyang surat na dakul na Kristiyano kaidto sa probinsiya nin Asia an dai na nakikiiba-iba sa saiya, posibleng huli sa pagkatakot sa mga nagkokontra. (2 Tim. 1:15) Sa kabaliktaran, maaasahan ni Pablo si Tiquico kaya tinawan niya ini nin saro pang asignasyon. (2 Tim. 4:12) Siguradong ipinagpasalamat na marhay ni Pablo na igwa siyang marahay na amigo arog ni Tiquico.

9. Paano niyato maaarog si Tiquico?

⁹ Maaarog niyato si Tiquico paagi sa pagigin  mapagtitiwalaan na amigo. Halimbawa, dai lang kita nangangako sa nangangaipong mga tugang na tatabangan ta sinda kundi naggigibo man kita nin praktikal na tabang sa sainda. (Mat. 5:37; Luc. 16:10) Pag aram kan nangangaipong mga tugang na maaasahan ninda kita, nararanga sindang marhay kaiyan. Ipinaliwanag nin sarong sister kun taano. Sinabi niya, “Dai na kaya madadagdagan an stress mo sa pagparaisip kun baga maabot sa oras an tawong nag-alok nin tabang para gibuhon an ipinangako niya.”

10. Sigun sa Talinhaga 18:24, sain makakakua nin karangahan an mga nakakaeksperyensiya nin pagbalo o pagkadisganar?

¹⁰ Sa parati, nararanga an saro na nakakaeksperyensiya nin pagbalo o pagkadisganar pag sinasabi niya sa sarong mapagtitiwalaan na amigo an mga sabuot niya. (Basahon an Talinhaga 18:24.) Kan matiwalag an aking lalaki ni Bijay, grabeng pagkadisganar an namatian niya. Sinabi niya: “Kaipuhan kong sabihon sa sarong mapagtitiwalaan ko an manungod sa mga namamatian ko.” Nawara ki Carlos an pinapahalagahan niyang marhay na pribilehiyo huli sa salang nagibo niya. Sinabi niya: “Kaipuhan ko nin mga tawong ‘mapapailihan’ ko, na sa sainda masasabi ko na mayong pag-alangan an mga namamatian ko asin dai ako huhusgaran.” An nagin pailihan ni Carlos iyo an mga elder, na nagtabang sa saiya na mapangganahan an saiyang mga problema. Naranga man siya huling aram niyang maingat an mga elder asin dai ninda ipapangistorya an mga sinabi niya.

11. Paano kita magigin mapagtitiwalaan na amigo?

¹¹ Tanganing magi kitang mapagtitiwalaan na amigo, kaipuhan tang hinguwahon na magin mapasensiya. Kan bayaan si Zhanna kan agom niya, nakaranga saiya an pagsabi sa dayupot niyang mga amigo kan mga namamatian niya. “Mapasensiya sindang nagdangog sako,” an sabi niya, “dawa pauruutro na sana gayod su mga sinasabi ko.” Puwede ka man na magin marahay na amigo paagi sa pagigin marahay na paradangog.

12. Siisay si Marcos, asin paano niya ipinahiling na andam siyang maglingkod sa iba?

¹² Si Marcos sarong Judiong Kristiyano na taga Jerusalem. Paryente niya si Bernabe na sarong midbid na misyonero. (Col. 4:10) Minalataw na may kaya an pamilya ni Marcos, pero bako an materyal na mga bagay an nagin priyoridad niya sa buhay. Sa bilog na buhay ni Marcos, nagpahiling siya nin pagigin andam na maglingkod. Maugma siyang paglingkudan an iba. Halimbawa, nagkapirang beses siyang naglingkod kaiba ni apostol Pablo asin apostol Pedro mantang ginigibo kan mga ini an saindang mga responsabilidad, asin si Marcos an posibleng nag-aasikaso kan panginot na mga pangangaipo ninda. (Gibo 13:2-5; 1 Ped. 5:13) Sinabi ni Pablo na si Marcos sarong “kapwa . . . trabahador para sa Kahadian nin Diyos” asin “tabang na nagpapakusog” sa saiya.—Col. 4:10, 11, nota sa ibaba.

13. Paano ipinapahiling kan 2 Timoteo 4:11 na pinahalagahan ni Pablo an maimbod na paglilingkod ni Marcos?

¹³ Si Marcos saro sa nagin dayupot na amigo ni Pablo. Halimbawa, kan ibinilanggo si Pablo sa huring pagkakataon sa Roma kan mga 65 C.E., ginibo niya an saiyang ikaduwang surat ki Timoteo. Sa surat na iyan, sinabi ni Pablo ki Timoteo na magduman ini sa saiya sa Roma asin iiba si Marcos. (2 Tim. 4:11) Siguradong pinahalagahan ni Pablo an maimbod na paglilingkod kaidto ni Marcos kaya pinaduman niya ini sa kritikal na panahon na iyan. Tinabangan ni Marcos si Pablo sa praktikal na mga paagi, na tibaad nagdadara nin kakanon ki Pablo o mga kagamitan na kaipuhan sa paggibo nin surat. An suporta asin pampakusog na inako ni Pablo posibleng marhay na nakatabang sa saiya na makatagal sa huring mga aldaw bago siya gadanon.

14-15. Ano an itinutukdo sa sato kan Mateo 7:12 mapadapit sa pagtabang sa iba sa praktikal na mga paagi?

 ¹⁴ Basahon an Mateo 7:12. Pag nasa kasakitan kita, nagpapasalamat nanggad kita sa mga nag-aalok nin praktikal na tabang! “Dakulon na bagay na ginigibo mo sa aroaldaw an garo dai mo na kayang gibuhon pag may inaagihan kang kasakitan,” an sabi ni Ryan, na nagadan sa aksidente an ama. “An praktikal na tabang—dawa garo sadit lang na bagay—nakakarangang marhay.”

¹⁵ Kun mapagrisa kita, posibleng marhay na makahanap kita nin praktikal na mga paagi na makatabang sa iba. Halimbawa, sarong sister an nagboluntaryong magtabang ki Peter asin Kathryn, na binanggit kasubago, para madumanan an gabos nindang appointment sa pagpabulong. Parehong dai na kayang magmaneho ni Peter saka Kathryn, kaya naggibo an sister nin iskedyul tanganing an ibang mga tugang sa kongregasyon makapagsurusaralida sa pagmaneho para sa mag-agom. Nakatabang daw ini? Sinabi ni Kathryn, “Nakagian na marhay iyan sa samo.” Kaya pirming isaisip na puwedeng makarangang marhay an saimong simple pero praktikal na tabang.

16. Anong mahalagang leksiyon mapadapit sa pagtao nin karangahan an manunudan ta ki Marcos?

¹⁶ Siguradong sibot na Kristiyano an inot na siglong disipulo na si Marcos. Dakul siyang magabat na teokratikong asignasyon, kaiba na an pagsurat kan Ebanghelyo na ipinangaran saiya. Pero, nagtagama siya nin panahon para rangahon si Pablo, asin bakong alangan si Pablo na maghagad nin tabang saiya. Napahalagahan ni Angela an arog kaiyan na pagigin andam na magtabang kan mga nagranga saiya kaidtong gadanon an saro niyang kapamilya. “Pag an mga amigo gusto talagang tumabang, madali mo sindang maranihan,” an sabi niya. “Dai sinda napipiritan asin dai nagduduwa-duwa.” Puwede niyatong ihapot sa satong sadiri, ‘Midbid daw ako sa pagigin andam na magranga paagi sa pagtao nin praktikal na tabang sa mga kapagtubod ko?’

17. Paano an paghurop-hurop sa 2 Corinto 1:3, 4 makakapahiro sa sato na rangahon an iba?

¹⁷ Madaling marisa kun may mga tugang na nangangaipo nin karangahan. Tibaad ngani rangahon niyato sinda kan parehong mga tataramon o tabang na ipinangranga sato kan iba. Si Nino, sarong sister na nagadanan nin lola, nagsabi:  “Puwedeng rangahon ni Jehova an iba paagi sa sato kun tutugutan niyatong gamiton niya kita.” (Basahon an 2 Corinto 1:3, 4.) Si Frances na sinambit kasubago nagsabi: “Totoo talaga an sinasabi kan 2 Corinto 1:4. Puwede niyatong ipasa sa iba an karangahan na itinatao sato.”

18. (a) Taano ta nahahadit an iba na magtao nin karangahan? (b) Paano kita magigin tunay na nakakaranga sa iba? Magtao nin halimbawa.

¹⁸ Kaipuhan niyatong maghanap nin mga paagi para tumabang dawa kun nahahadit kitang gibuhon iyan. Halimbawa, tibaad mahadit kita dahil dai ta aram an sasabihon o gigibuhon para sa saro na nasa masakit na sitwasyon. Nagigirumduman nin sarong elder na si Paul an mapadapit sa mga paghihinguwang ginibo kan iba para rangahon siya. Sinabi niya: “Narisa ko na bakong madali sa sainda na dulukon ako. Dai ninda aram an sasabihon. Pero napahalagahan ko an pagmawot nindang magtao nin karangahan asin suporta.” Kaagid kaiyan, pagkatapos nin makusugon na linog, sinabi nin sarong brother na si Tajon: “An totoo, dai ko natatandaan an lambang mensaheng ipinaabot sako kan mga tawo kan sunod na mga aldaw pagkatapos kan linog, pero an natatandaan ko nagmamalasakit sinda sako kaya kinumusta ninda ako.” Puwede kitang magin mahusay na pararanga kun ipapahiling niyatong nagmamalasakit kita.

19. Taano ta determinado kang magin “dakulang karangahan”?

¹⁹ Mantang mas nagrarani kita sa katapusan kan sistemang ini nin mga bagay, lalo pang magigin maraot an mga kamugtakan sa kinaban asin an buhay lalong magigin masakit. (2 Tim. 3:13) Asin dahil sa minana tang kasalan asin pagkabakong perpekto, magkakaigwa talaga kita nin mga problema kaya padagos kitang mangangaipo nin karangahan. Nakaya ni apostol Pablo na magdanay na maimbod sagkod sa kagadanan, asin an saro sa dahilan kaiyan iyo an karangahan na itinao sa saiya kan saiyang mga kapwa Kristiyano. Lugod na magin maimbod kita arog ni Aristarco, mapagtitiwalaan arog ni Tiquico, asin andam na maglingkod arog ni Marcos. Paagi kaiyan, matatabangan ta an satong mga tugang na magdanay na marigon sa pagtubod.—1 Tes. 3:2, 3.