1. Aha ma na mambahen juakjuak ni Naibata gabe sunsah?

BAHAT do juakjuak ni Naibata i sab dunia on na marsitaronon. Halani ai, gabe sunsah ma pangahap ni sidea. Ai dong do homa sanina botou na sonai i kuriamu? Piga-piga sidea dong na pusok uhurni halani parah naboritni atap pe matei na hinaholonganni. Dong homa na lungunan pangahapni halani ipecat kaluarga atap pe hasomanni. Dong homa na sunsah halani hona bencana alam. Halani ai, ganupan sidea porlu iapoh. Sonaha hita boi mangurupi sidea?

2. Mase sipata apostel Paulus porlu iapoh?

² Hinan, gati do homa apostel Paulus ibagas situasi na berbahaya. (2 Kor. 11:23-28) Maningon manaron ‘duri ibagas dagingni’ do homa ia. Ra do maksudni on dong naboritni. (2 Kor. 12:7) Ongga do homa etek uhurni ibahen si Demas. Mungkahni, rap do sidea mangidangi. Tapi itadingkon si Demas do ia “halani na dob holong uhurni bani dunia on”. (2 Tim. 4:10) Halak Kristen na iminaki do si Paulus janah gati do ia mangurupi na legan. Hassi pe sonai, ongga do ia maretek ni uhur.​—Rom 9:1, 2.

3. Ise do na mangapoh si Paulus ase boi martahan?

³ Hunja do dapot si Paulus apoh-apoh ase boi ia martahan? Marhitei tonduy na pansing, ipatoguh Jahowa do uhurni. (2 Kor. 4:7; Pil. 4:13) Igunahon Jahowa do homa hasomanni sahaporsayaon laho mangapohsi. Si Paulus mangkatahon gabe “apoh-apoh” do piga-piga hasomanni sahaporsayaon. (Kol. 4:11) Isobut ia do piga-piga goran ni sidea, songon si Aristarkus, si Tikikus, pakon si Markus. Ipatoguh sidea do si Paulus janah iurupi do ia ase martahan. Sifat na ija do na ipatuduh hasomanni ai ase boi mangapoh na legan? Janah sonaha hita boi mangusihi  sidea laho mangapoh ampa patoguhkon na legan?

4. Sonaha si Aristarkus mambuktihon anggo ia hasoman na setia?

⁴ Halak Makedonia hun Tessalonika do si Aristarkus. Parlobei sahali hita mambasa pasalsi, sanggah si Paulus roh hu Epesus bani penugasanni na patoluhalihon. Sanggah mangkasomani si Paulus, roh ma buei halak manangkap si Aristarkus. (Lah. 19:29) Tapi dob ibebaskon, totap do ia mangkasomani si Paulus. Piga-piga bulan dobkonsi ai, sanggah i Junani si Paulus, dihut do homa si Aristarkus hassi pe bahat munsuh na sihol mamunuh si Paulus. (Lah. 20:2-4) Hira-hira tahun 58 M, iboan ma si Paulus hu Rom laho ipenjarahon. Sanggah ai, dihut do homa ia mangkasomani si Paulus. Rap martahan do sidea i laut sanggah tardempar kapalni. (Lah. 27:1, 2, 41) Dob das i Rom, dihut do homa si Aristarkus ipenjarahon pakon si Paulus. (Kol. 4:10) Tontu gabe tarapoh ma uhur ni si Paulus halani dong hasoman na tongtong mangkasomanisi.

5. Domu bani Podah 17:17, sonaha hita boi gabe hasoman na setia?

⁵ Songon si Aristarkus, hita pe boi gabe hasoman na setia age ibagas hasonangan atap pe “ibagas hasosakan”. (Basa Podah 17:17.) Hassi pe domma salpu sitarononni, tong do sanina botou porlu iapoh. Sonai ma na masa bani si Frances. * Matei ma bapani halani hona kanker. Dob tolu bulan, matei ma inangni halani kanker homa. Ia mangkatahon, “Lalab do ahu marpusok ni uhur halani boratni sitarononku. Tapi martarima kasih do ahu halani dong hasoman-hasoman na setia. Totap do roh sidea mangapoh ahu hassi pe domma dokah matei namatorasku.”

6. Sonaha hita patuduhkon anggo hita hasoman na setia?

⁶ Jadi hasoman na setia ra mambere  gogoh ampa panorangni laho mangurupi sanina botou. Umpamani, hasomanta si Peter hona naborit na parah na boi mamboan ia matei. Istrini mangkatahon, “Dong suami istri i kurianami na ra manaruhkon hanami laho martambar. Marjanji do sidea lang ongga tadingkononni hanami. Janah tongtong do sidea mangkasomani hanami sadihari pe ihaporluhon.” Tontu tarapoh tumang uhurta sanggah adong hasoman na setia mangurupi hita ase boi martahan ibagas hasunsahan.

7-8. Domu bani Kolosse 4:7-9, sonaha si Tikikus mambuktihon anggo ia boi ihaporsayai?

⁷ Halak Kristen hun distrik Asia do si Tikikus, janah porsaya do si Paulus hu bani. (Lah. 20:4) Hira-hira tahun 55 M, ibahen si Paulus ma pangaturan laho patumpuhon sumbangan laho mangurupi sanina botou i Judea. Ra do dihut si Tikikus mangurupi horja ai. (2 Kor. 8:18-20) Dob ai, sanggah parlobei sahali si Paulus ipenjarahon i Rom, si Tikikus do na isuruh si Paulus mamboan suratni hu kuria-kuria i Asia laho mangojur sanina botou ijai.​—Kol. 4:7-9.

⁸ Tongtong do si Tikikus gabe hasoman na boi ihaporsayai. (Tit. 3:12) Ijia, lang ganup sanina botou songon si Tikikus. Hira-hira tahun 65 M sanggah ipenjarahon na paduahalihon, ihatahon si Paulus do bani suratni bahat do sanina botou lang be marsaor pakonsi halani mabiar bani munsuh. (2 Tim. 1:15) Tapi si Tikikus lang sonai. Halani ai, pos do uhur ni si Paulus mambere tugas na legan hu bani. (2 Tim. 4:12) Tontu ihargai si Paulus do hasoman na bujur songon si Tikikus.

9. Sonaha hita boi mangusihi si Tikikus?

⁹ Hita pe boi songon si Tikikus na boi ihaporsayai. Umpamani, anggo marjanji hita laho mangurupi sanina botou na mamorluhon, lang pitah sahap ai. Tapi ibuktihon hita ma ai marhitei pambahenanta. (Mat. 5:37; Luk. 16:10) Anggo ibotoh hasoman sirsir do hita mangurupi  sidea, gabe tarapoh ma uhurni. Hasomanta naboru mangkatahon, “Gabe sonang do uhurta dob mambotoh anggo sanina botou na mangurupi roh domu bani panorang na ijanjihon sidea.”

10. Domu bani Podah 18:24, humbani ise do sanina botou na marsitaronon atap na maretek ni uhur mandapot apoh-apoh?

¹⁰ Gati do sanina botou na marsitaronon atap na maretek ni uhur mandapot apoh-apoh humbani hasoman na boi ihaporsayai. (Basa Podah 18:24.) Si Bijay na maretek ni uhur halani ipecat anakni na sikahanan mangkatahon, “Porlu do huahap patugahkon naha pangahapku bani hasoman na ihaporsayai.” Si Carlos lang be ibere tanggung jawab i kuria halani mambahen hasalahan. Nini do, “Porlu do hupatugah naha pangahapku bani hasoman na ra manangihon ahu, tapi lang manguhumi.” Pangahap ni si Carlos sintua do na sosok mangurupisi janah pos do uhurni anggo sidea lang ra patugah-tugahkon saritani bani na legan.

11. Sonaha hita patuduhkon anggo hita hasoman na boi ihaporsayai?

¹¹ Ase boi gabe hasoman na boi ihaporsayai, porlu do hita patuduhkon hasabaron. Itadingkon suamini do si Sanna. Tapi gabe tarapoh do uhurni dobkonsi ipatugah ia sonaha pangahapni bani hasoman-hasomanni. Nini do, “Sabar do sidea manangihon saritangku hassi pe domma marulak-ulak ai husaritahon.” Hita pe boi gabe hasoman na bujur anggo sabar hita manangihon.

12. Ise do si Markus, janah sonaha ia patuduhkon anggo ia sirsir mangurupi na legan?

¹² Halak Jahudi hun Jerusalem do si Markus. Janah hade-hade ni si Barnabas do ia. (Kol. 4:10) Hassi pe humbani kaluarga na bayak, tapi sedo duit atap arta na gabe sipontingan hu bani. Sadokah goluhni, sirsir janah malas do uhurni mangurupi na legan. Umpamani, gati do ia mangurupi apostel Paulus ampa apostel Petrus laho mandalankon tugasni. Ra, ia do na pasirsirhon sipanganon, ianan tading, ampa na leganni bani sidea. (Lah. 13:2-5; 1 Ptr. 5:13) Si Paulus mangkatahon si Markus do ‘hasoman sahorja ibagas Harajaon ni Naibata na gabe apoh-apoh’ hu bani.​—Kol. 4:10, 11.

13. Sonaha 2 Timoteus 4:11 patuduhkon anggo si Paulus mangkargai pambahenan ni si Markus?

¹³ Marhasoman orot do si Paulus pakon si Markus. Umpamani, sanggah parpudi sahali si Paulus ipenjarahon i Rom hira-hira tahun 65 M, itulis ia ma suratni na paduahon bani si Timoteus. Bani suratni ihatahon ase roh si Timoteus hu Rom janah mamboan si Markus rap pakonsi. (2 Tim. 4:11) Tontu ihargai si Paulus do aha na dob ibahen si Markus sadokah on. Halani ai, ipindo ma ase si Markus mangkasomanisi. Jadi iurupi si Markus ma si Paulus. Ra, ia do na pasirsirhon sipanganon, tinta, ampa gulungan bani si Paulus. Gabe tarojur ma uhur ni si Paulus janah boi ma ia martahan ronsi iuhum matei ia.

14-15. Aha ma na boi iparlajari hita humbani Mateus 7:12 pasal mangurupi halak na legan?

¹⁴ Basa Mateus 7:12. Tontu ihargai hita do hasoman-hasoman na sirsir mangurupi sanggah hita ibagas sitaronon. Si Ryan na matei bapani halani kecelakaan mangkatahon, “Sanggah borat sitaronon, ra do lang urah mangkorjahon aha na somal ihorjahon hita. Halani ai,  gabe tarapoh ma hita sanggah adong na mangurupi age otik.”

¹⁵ Anggo ra hita mamparuhurhon aha na ihaporluhon sanina botou, gabe boi ma hita mangurupi sidea. Ai ma na iahapkon si Peter pakon si Katrin nongkan ai. Dong hasomanni i kuria na marjanji mangurupi sidea laho martambar. Halani si Peter pakon si Katrin lang boi mamboan motor, ibahen hasomanta ai ma jadwal ase boi sanina botou i kuria margantih manaruhkon sidea laho martambar. Si Katrin mangkatahon, “Songon na hampung do iahapnami porsanonnami.” Jadi dingat ma gabe tarapoh tumang do uhur ni sanina botou anggo ra hita mangurupi sidea hassi pe lang bahat na boi ibahen hita.

16. Sonaha hita boi maniru si Markus?

¹⁶ Sibuk tumang do si Markus, susian ni Jesus ai. Dong do tugas na maningon ihorjahon ia ibagas pangidangion, tarmasuk manurat injil Markus. Tapi ibere ia do panorangni laho mangapoh si Paulus. Janah marosuh do si Paulus mangindo pangurupionni. Sonai ma pangalaman ni si Angela. Dong kaluargani na matei ibunuh. Tapi martarima kasih tumang do ia halani dong sanina botou na sirsir mangurupisi. Nini do, “Anggo sirsir hasoman mangurupi, gabe lang malang uhur diri mangindo pangurupion ni sidea. Huidah marosuh tumang do sanina botou mangurupi ahu.” Jadi sungkun ma dirimu, ‘Ai itanda do ahu sahalak na sirsir mangurupi hasoman sahaporsayaon?’

17. Sonaha ayat bani 2 Korint 1:3, 4 mangojur hita laho mangapoh halak na legan?

¹⁷ Urah do sasintongni mambotoh ise do sanina botou na porlu iapoh. Ra, boi igunahon hita hata apoh-apoh na ongga ihatahon halak hubanta. Si Nino na matei ompung boruni mangkatahon, “Igunahon Jahowa do hita laho mangapoh na legan anggo ra hita mangkorjahon ai.” (Basa 2 Korint 1:3, 4.) Si Frances  na ipatugah nongkan ai mangkatahon, “Sintong do na ihatahon bani 2 Korint 1:4 ai. Boi do iapoh hita halak na legan songon na ibahen halak hubanta.”

18. (a) Mase adong na mabiar mangapoh na legan? (b) Sonaha ase marhasil hita mangapoh na legan? Bere ma contoh.

¹⁸ Marusaha ma hita mangindahi sonaha hita boi mangurupi na legan hassi pe mabiar hita mangkorjahon ai. Umpamani, ra do mabiar hita halani lang ibotoh hita aha na laho sihatahonon bani na marsitaronon. Sahalak sintua na margoran si Paul mardingat sonaha sanina botou marusaha mangapohsi dob matei bapani. Nini do, “Hubotoh do lang urah bani sidea roh janah marsahap bangku. Lang ibotoh sidea aha na laho ihatahon. Tapi huargai do aha na dob ibahen sidea laho mangapoh ahu.” Sonai ma homa na iahapkon hasomanta si Tajon dob masa gempa. Ia mangkatahon, “Sasintongni lang hudingat aha na ihatahon sidea sanggah roh mangidah ahu dob gempa ai. Tapi hudingat do sonaha sidea mansarihon ahu.” Jadi anggo parduli hita bani halak, gabe boi ma hita mangapoh sidea.

19. Mase hita sihol mangapoh na legan?

¹⁹ Halani lambin dohor mando ujung ni dunia on, tontu sai na lambin sunsah ma hagoluhanta. (2 Tim. 3:13) Leganni ai, halani lang sempurna gati do hita mangkorjahon na lepak. Jadi porlu do hita marsiapohan. Songon na dob iulas nongkan, apostel Paulus boi martahan halani dong apoh-apoh humbani hasoman sahaporsayaonni. Jadi, andohar ma hita boi setia songon si Aristarkus, boi ihaporsayai songon si Tikikus, janah sirsir mangurupi songon si Markus. Anggo ibahen hita sonai, gabe boi ma hita mangurupi sanina botou ase totap setia mangidangi Jahowa.​—1 Tes. 3:2, 3.