1. Masalah kai saja si iadapi umat Jahwe si erbanca latih kel iakap kalak e rukur?

I BELANG-BELANG doni, nterem umat Jahwe ngadapi masalah si erbanca latih kel iakapna rukur janah sedih kel iakapna. Lit nge idahndu si bage bas runggunndu? Lit turang seninanta si mekelek kel pinakitna, janah lit ka si mate kalak si ikelengina. Si debanna gulut kel ukurna perban lit keluargana ntah pe temanna lanai ngelayani Jahwe. Selain si e, lit ka si susah kel akapna perban jadi korban bencana alam. Kerina turang seninanta e perlu iapuli. Uga carana?

2. Engkai maka mon-mon perlu iakap Rasul Paulus ia ipegegehi?

² Rasul Paulus eme kalak Kristen si ipilih ku surga, perpang kel ia janah meriah ukurna nampati kalak si deban. Tapi mon-mon perlu ka iakapna ia ipegegehi. (Rom. 9:1, 2) Engkai? Rusur ia menam mate. (2 Kor. 11:23-28) Arus ka iadapina ‘duri i bas dagingna,’ banci saja e maksudna masalah kesehaten. (2 Kor. 12:7) Selain si e, pernah ka Paulus kecewa perban Demas. Demas e pernah ikut ngelayani ras ia, tapi dungna lawes ia nadingken Paulus “erkiteken ngena atena doni enda.”​—2 Tim. 4:10.

3. Uga cara Jahwe ngapuli ras mpegegehi Paulus?

³ Uga carana Paulus isampati ras iapuli? Pasti igunaken Jahwe kesah si badia guna mpegegehi Paulus. (2 Kor. 4:7; Pil. 4:13) Iapuli Jahwe ka Paulus arah turang seninana. Ikataken Paulus maka lit piga-piga turang senina “si mpegegehi” ia. (Kol. 4:11) Ituliskenna piga-piga gelar kalak e, eme Aristarkus, Tikikus, ras Markus. Ipegegehi kalak e Paulus janah sampatina ia gelah terus megenggeng. Sifat-sifat kai saja nge si erban kalak e banci mpegegehi kalak si deban? Uga carata ngusih kalak e sanga siusahaken  ateta ngapuli ras mpegegehi kalak si deban?

4. Kai si ilakoken Aristarkus bukti ia teman si setia?

⁴ Aristarkus e teman Paulus sada kiniteken si asalna arah kota Tesalonika i Makedoni. Setia ia man Paulus. Tangtangna sibaca kerna Aristarkus bas Pustaka eme bas cataten perdalanen utusen injil Paulus si peteluken. Paksa si e, Aristarkus ikut ras Paulus ku Epesus. I je, Aristarkus itangkap kalak. (Perb. 19:29) Kenca ibebasken, labo ia lawes ku japa pe. Tetap itemanina Paulus aminna pe e banci mbahayaken dirina. Piga-piga bulan kenca si e, sanga bas Junani, la ia nggit nadingken Paulus aminna pe lit kalak si nentang si terus atena munuh Paulus. (Perb. 20:2-4) Kira-kira tahun 58 Masehi, Paulus ibaba ku Roma janah jadi tahanen ia paksa si e. Ikut Aristarkus nemani ia aminna pe ndauh kel perdalanen e. Bas tengah perdalanen, karam kapal kalak e. (Perb. 27:1, 2, 41) Seh kenca i Roma, Aristarkus pe banci saja sempat itahan ras Paulus. (Kol. 4:10) Pasti terpegegehi kel Paulus perban temanna si setia e!

5. Menurut Kuan-kuanen 17:17, uga carana jadi teman si setia?

⁵ Banci kita jadi teman si setia bagi Aristarkus. Lalap ateta ras turang seninanta bas masa senang bage pe bas masa susah. (Baca Kuan-kuanen 17:17.) Janah aminna pe nggo dung masalah kalak e, banci saja perlu denga kalak e iapuli. Perdiateken pengalamen enda. Bas waktu telu bulan, duana orang tua Fransiska * mate perban kanker. Nina Fransiska, “Menurutku, adi mberat kel masalahta, ndekah kel pengaruhna banta. Ngata bujur kel aku perban lit teman-temanku si setia. Amin gia nggo ndekah orang tuaku mate, iangkai teman-temanku maka sedih denga kel kuakap.”

6. Kai nge silakoken adi kita teman si setia?

⁶ Teman si setia nggit erkorban guna  nampati turang seninana. Contohna, lit sekalak turang seninanta si gelarna Philip. Ikataken dokter maka mekelek kel pinakitna janah lanai ndekah ia mate. Nina ndeharana, Katarina, “Sange, reh sekalak perbulangen ras ndeharana arah runggun kami guna naruhken kami ku dokter. Kenca iteh kalak e kerna pinakit Philip, mis katakenna man kami maka labo pagi ipediatna kami sisada ngadapisa. Katawari pe kalak e nggit nampati kami.” Pasti terpegegehi kel kita adi lit teman si setia nemani kita bas ngadapi masalahta!

7-8. Menurut Kolose 4:7-9, kai si ilakoken Tikikus si mbuktiken maka ia teman si terteki?

⁷ Tikikus e teman Paulus sada kiniteken si asalna arah Asia, sada provinsi i Roma. Ia teman si terteki. (Perb. 20:4) Kira-kira tahun 55 Masehi, iaturken Paulus gelah ipepulung sumbangen guna nampati kalak Kristen i Judea. Banci saja Tikikus salah sada si isuruh Paulus ngelakoken tugas si penting e. (2 Kor. 8:18-20) I bas pudi wari, sanga tangtangna Paulus itahan i Roma, Tikikus isuruh maba surat ras pesan Paulus ku runggun-runggun i Asia si isina mpegegehi kalak e.​—Kol. 4:7-9.

⁸ Terus Tikikus jadi teman Paulus si terteki. (Tit. 3:12) La kerina kalak Kristen paksa si e banci terteki bagi Tikikus. Kira-kira tahun 65 Masehi, sanga peduakaliken Paulus itahan, itulisna maka nterem turang senina i provinsi Asia la nggit erteman ras ia, banci saja perban mbiar kalak e man kalak si nentang. (2 Tim. 1:15) Tapi tek Paulus man Tikikus janah berena ka tugas si deban man bana. (2 Tim. 4:12) Pasti meherga kel iakap Paulus teman si mehuli bagi Tikikus e.

9. Uga carata ngusih Tikikus?

⁹ Banci siusih Tikikus adi kita jadi teman si terteki. Contohna, adi nggo erjanji kita nampati sekalak turang seninanta, sitepatilah janjita e janah sisampatilah ia. (Mat. 5:37; Luk. 16:10) Adi itehna maka pasti sisampati ia, tenang kel iakapna.  Nina sekalak turang seninanta, “Pasti tenang kel siakap perban la kita sangsi man kalak si nggo erjanji nampati kita.”

10. Menurut Kuan-kuanen 18:24, ise nge si banci mpegegehi kalak si sangana ngadapi masalah?

¹⁰ Biasana, kalak si sangana sedih ntah pe kecewa banci dungna terpegegehi kenca iceritakenna isi pusuhna man teman si terteki. (Baca Kuan-kuanen 18:24.) Lit sekalak turang seninanta si gelarna Bobby. Kecewa kel ia perban anakna ipecat bas runggun nari. Nina, “Perlu kuakap kuceritaken perasanku man kalak si terteki.” Turang senina si deban si gelarna Carlos, lanai lit tanggung jawapna bas runggun perban lit kesalahenna. Nina, “Perlu kel aku ‘ingan si aman’ gelah banci kuturiken perasanku janah la perlu aku mbiar ihakimi.” Igejapken Carlos maka pertua-pertua me “ingan si aman” e. Isampati kalak e ia ngadapi masalahna. Banci ka Carlos tenang perban tek ia maka labo kari ikata-kataken pertua kai si nggo iceritakenna e man ise pe.

11. Uga carana gelah banci kita jadi teman si terteki?

¹¹ Gelah kita jadi teman si terteki, perlu kita sabar. Lit sekalak turang seninanta si gelarna Zhanna si itadingken perbulangenna. Banci ia terpegegehi perban iceritakenna isi pusuhna man teman-teman kompakna. Nina, “Sabar kel kalak e megiken aku aminna pe banci saja kuulih-ulihi lalap ceritaku.” Jelas me, adi sabar kita megiken temanta, sibuktiken maka kita teman si mehuli.

12. Ise Markus e? Janah kai buktina ia nggit nampati kalak si deban?

¹² Markus e kalak Kristen arah Jerusalem. Ia kalak Jahudi. Seninana gelarna Barnabas, sekalak utusen injil si nterem kalak nandaisa. (Kol. 4:10) Banci saja keluarga Markus e kalak bayak, tapi labo iakap Markus sen ras erta si pentingna bas geluhna. Segedang geluhna, ibuktikenna maka meriah akapna nampati kalak si deban. Misalna, lit piga-piga kali isampatina Rasul Paulus ras Rasul Petrus sanga kalak e ndalanken tugasna. Banci jadi itukur Markus pangan kalak e, idaramina ingan tading man kalak e, ras si debanna. (Perb. 13:2-5; 1 Pet. 5:13) Ikataken Paulus maka Markus e ‘erdahin ras ia guna Kerajan Dibata’ janah ikut ka Markus ‘mpegegehi ia.’​—Kol. 4:10, 11.

13. Menurut 2 Timotius 4:11, kai buktina maka iergai Paulus penampat Markus?

¹³ Pasti iergai Paulus kel penampat Markus sedekah enda. Markus pe jadi salah sada teman kompak Paulus. Sanga terakhir Paulus itahan i Roma, kira-kira tahun 65 Masehi, itulisna suratna si peduaken man Timotius. I bas surat e, isuruh Paulus gelah Timotius maba Markus ku Roma. (2 Tim. 4:11) Paksa si e, banci saja iakap Paulus maka ia nandangi iukum mate, emaka i je min atena Markus. Melala penampat Markus man Paulus, banci saja ibabana pangan ntah pe alat-alat si iperluken Paulus guna nulis surat. Perban isampati Markus ia janah ipegegehina ka, mbelin kemungkinenna terpegegehi kel ia sope ia iukum mate.

14-15. Pedah kai si lit bas Matius 7:12 si nampati kita meteh carana mereken penampat si cocok man kalak si deban?

¹⁴ Baca Matius 7:12. Sanga mberat masalahta, pasti ngata bujur kel kita adi lit kalak si nampati kita. Perdiateken pengalamen sekalak turang seninanta si gelarna Ryan. Rempet mate bapakna  perban kecelakan. Nina Ryan, “Sanga kita erceda ate, mesera kel siakap ngelakoken kai si biasana silakoken tiap wari. Emaka adi lit si nampati kita, aminna pe biasa saja penampatna e, mbelin kel gunana.”

¹⁵ Adi siusahaken mperdiateken keperlun kalak si deban, reh nukahna siakap mereken penampat si cocok man bana. Misalna, lit sekalak turang seninanta si atena nampati Philip ras Katarina, si ituriken ndai, gelah banci kalak e lawes ku dokter. Lanai ngasup Philip ras Katarina maba motor, emaka iban turang seninanta ndai jadwal gelah gantin turang senina bas runggun naruhkenca ku dokter. Erguna nge penampat e? Nina Katarina, “Bagi ibuat akap kami baban si mberat bas bara kami nari.” Emaka, amin gia biasa saja penampat si iberekenndu, mbelin kel gunana e man kalak si deban.

16. Arah contoh Markus, kai si banci sipelajari kerna nampati kalak si deban?

¹⁶ Markus, teman Paulus si ituriken ndai, pasti seh kel sibukna. Melala tugas penting si ibereken Jahwe man bana, termasuk nulis Injil Markus. Tapi, iban Markus waktuna guna mpegegehi Paulus, janah la Paulus segan-segan mindo penampat Markus. Lit sekalak turang seninanta si gelarna Amelia. Sedih kel iakapna perban ninina ibunuh. Enterem turang senina si ngapuli ia janah ngata bujur kel ia perban si e. Nina, “Adi tuhu-tuhu kin temanta e nggit nampati, la kita mbiar ndeherisa janah ia pe mis teridah nggit nampati.” Banci sisungkuni banta, ‘Menurut kalak, nggit nge aku nampati turang senina?’

17. Adi siukuri 2 Korinti 1:3, 4, ngkai maka tersuruh ukurta mpegegehi kalak si deban?

¹⁷ Enterem turang seninanta si perlu ipegegehi. Banci saja sipegegehi kalak e alu cara si pernah igunaken kalak si deban sanga mpegegehi kita. Nina Tina, sekalak turang seninanta si erceda ate perban mate ninina, “Banci igunaken Jahwe  kita mpegegehi kalak si deban adi nggit kita igunakenNa.” (Baca 2 Korinti 1:3, 4.) Nina Fransiska si ituriken ndai, “Tuhu kel si ikataken 2 Korinti 1:4. Cara si pernah igunaken kalak bas nampati kita banci ka sigunaken sanga nampati kalak si deban.”

18. (a) Engkai maka piga-piga kalak kuatir sanga atena mpegegehi kalak si deban? (b) Kai si banci silakoken gelah banci sipegegehi kalak si deban? Ban contohna.

¹⁸ Sanga sisampati ateta kalak si sangana gulut ukurna, banci saja kuatir kita perban la siteh kai si man katanken ntah pe kai si arus silakoken. Amin gia bage, perlu sidarami cara guna mpegegehi kalak si deban. Lit sekalak pertua si gelarna Paul. Ingetna denga uga turang senina erusaha kel ngapuli ia kenca bapakna mate. Nina, “Kuteh nge maka labo menukah iakap kalak e ndeheri aku. La itehna kai si man katanken. Tapi, kuteh nge mehuli ukur kalak e perban nggit nampati ras ngapuli aku. Kuergai kel e.” Lit ka turang seninanta si deban si gelarna Tajon si jadi korban gempa si mbelin. Nina, “Terus terang, labo kuinget kerina isi pesan si ikirim kalak man bangku kenca terjadi gempa. Tapi si kuinget, ermediate kel kalak e bangku. Ipastiken kalak e gelah la aku kaden pe.” Adi ermediate kita man kalak si deban, pasti terpegegehi kel kalak e.

19. Engkai maka iusahakenndu atendu mpegegehi kalak si deban?

¹⁹ Perban kedungen doni enda nggo reh deherna, keadan doni pe reh jahatna janah kegeluhenta pe reh serana. (2 Tim. 3:13) Selain si e, kita la sempurna janah rusur siban kesalahen si banci erban kita rugi. Emaka, perlu kita terus ipegegehi. Rasul Paulus pe ipegegehi turang seninana. E me salah sada alasenna maka banci ia setia seh ngasa mate. Mbera-mbera kerina kita banci jadi teman si setia bagi Aristarkus, terteki bagi Tikikus, janah nggit nampati bagi Markus. Alu bage, banci sipegegehi turang seninanta gelah terus setia ngelayani Jahwe.​—1 Tes. 3:2, 3.