1. Cosa maga situacion el ta causa lingasa y tristeza na maga siervo de Jehova?

NA ENTERO mundo, manada siervo de Jehova el ta enfrenta maga situacion que ta causa kanila lingasa y tristeza. Ya puede ba tu se nota na de ustedes congregacion? El cuanto maga hermano tiene grabe enfermedad o dolorido cay tiene quien ya muri. El otro bien triste cay el un miembro del diila familia o un amigo ya descanza sirvi con Jehova. Y el otro ta sufri por causa na maga calamidad. Todo este maga hermano y hermana ta necesita comforta. Paquemodo kita puede ayuda kanila?

2. Porque necesita dale comforta con apostol Pablo?

² Si apostol Pablo manada beses ya enfrenta maga situacion que ya pone na peligro con el de suyu vida. (2 Cor. 11:23-28) Tiene tambien le “tunuk na pellejo,” posible un problema na salud. (2 Cor. 12:7, El Nuevo Testamento) Ya queda tambien le triste cuando si Dimas, el de suyu uban de antes, ya deja con ele “por amor de este mundo.” (2 Tim. 4:10) Si Pablo un iscujido Cristiano quien tiene coraje y ta ayuda con otro pero tiene maga tiempo que ya sinti tambien le luya.​—Roma 9:1, 2.

3. Paquemodo si Jehova ya dale comforta y suporta con Pablo?

³ Ya ricibi si Pablo el comforta y suporta que necesita le. Na cosa manera? Ya usa si Jehova con el De Suyu sagrao espiritu para hace fuerte con ele. (2 Cor. 4:7; Fil. 4:13, NWT) Ya dale tambien con ele comforta si Jehova por medio na otro maga Cristiano. Ya habla si Pablo que el cuanto del de suyu maga uban “grande el consuelo” con ele. (Col. 4:11) Incluido del maga ya menciona le amo kanda Aristarco, Tiquico y Marcos.  Ya hace sila fuerte con Pablo y ya ayuda con ele aguanta. Cosa maga calidad tiene este tres Cristiano que ya puede ayuda kanila para dale comforta? Paquemodo kita puede imita kanila mientras ta pricura kita anima y dale comforta con uno y otro?

4. Na cosa manera ya dale mira si Aristarco que un leal amigo le de Pablo?

⁴ Si Aristarco, un Cristiano de Tesalonica que un lugar na Macedonia, amo un leal amigo de Pablo. El primer vez que ya menciona con Aristarco amo cuando ya visita si Pablo na Efeso durante el de suyu ika-tres viaje como misionario. Mientras uban con Pablo, ya cuji con Aristarco el un grupo de maga gente. (Act. 19:29) Cuando ya libra con ele, nuay le sale para evita na peligro sino ya esta le junto con Pablo. Cuanto meses na uliji na Grecia, junto lang siempre si Aristarco con Pablo maskin pa el maga contrario ta busca manera para mata con Pablo. (Act. 20:2-4) Del maga 58 C.E. cuando ya lleva con Pablo na Roma como un preso, ya sigui con ele si Aristarco maskin pa lejos este y junto sila cuando ya sumi el diila barco. (Act. 27:1, 2, 41) Cuando ya llega sila na Roma, posible que yan preso le junto con Pablo por cuanto tiempo. (Col. 4:10) Poreso, gendeh maka-estraña que este leal amigo ya puede gayot anima y dale comforta con Pablo!

5. Asegun na Proverbio 17:17, paquemodo kita queda un leal amigo?

⁵ Igual con Aristarco, queda kita leal amigo si esta kita junto con el diaton maga hermano y hermana gendeh lang na tiempo de alegria sino durante tambien “na tiempo de dificultad.” (Le con el Proverbio 17:17.) Maskin pa ya acaba ya el un probanza, posible ta necesita siempre comforta el un hermano o hermana. Ya muri el maga mayores del un hermana que si Frances * por causa na cancer adentro lang del tres meses. Ele ya habla: “Para conmigo, ta afecta kanaton el maga dificil probanza por largo tiempo. Y ta aprecia yo con el maga leal amigo y amiga quien ta acorda que dolorido siempre yo maskin pa cuanto tiempo ya  el ya pasa desde ya muri el de mio maga mayores.”

6. Cosa kita hace si leal kita?

⁶ El maga leal amigo y amiga ta hace maga sacrificio para ayuda con el diila maga hermano y hermana. Por ejemplo, ya habla con Peter que tiene le enfermedad que pronto lang queda grabe y ta resulta na muerte. El de suyu mujer, si Kathryn, ya habla: “Un man maridable na diamon congregacion el ya lleva kanamon na doctor donde ya puede kame sabe acerca na enfermedad de Peter. Aquel mismo tiempo, ya habla sila kanamon que gendeh sila deja kanamon enfrenta con este solo-solo. Y deverasan, talli sila pirmi si ta necesita kame ayuda.” Ta dale gayot comforta kanaton si tiene kita maga deverasan amigo quien ta ayuda kanaton enfrenta con el diaton maga probanza!

7-8. Asegun na Colosa 4:7-9, na cosa manera ya dale mira si Tiquico que puede con ele confia?

⁷ Si Tiquico, un Cristiano na Romano provincia de Asia, amo un uban de Pablo con quien puede confia. (Act. 20:4) Maga 55 C.E., ya hace manera si Pablo para puede colecta sen para ayuda con el maga Cristiano na Judea. Y posible, ya manda le ayuda con Tiquico na este importante assignment. (2 Cor. 8:18-20) Na uliji, cuando preso si Pablo na Roma por primer vez, si Tiquico el ya queda de suyu mensajero. Ele el quien ya lleva con el maga carta y mensaje de Pablo para anima con el maga congregacion na Asia.​—Col. 4:7-9.

⁸ Si Tiquico ya esta como un buen amigo de Pablo. (Tito 3:12) Gendeh todo Cristiano de aquel tiempo el igual con Tiquico que puede confia. Maga 65 C.E., cuando na preso si Pablo por segundo vez, ya escribi le que manada Cristiano hombre na provincia de Asia el ya evita man junto con ele, posible por causa na miedo na maga contrario. (2 Tim. 1:15) Pero, si Pablo ya confia con Tiquico y ya dale pa con ele otro assignment. (2 Tim. 4:12) Asigurao que ya aprecia gayot si Pablo cay tiene le buen amigo igual con Tiquico.

9. Paquemodo kita puede imita con Tiquico?

⁹ Puede kita imita con Tiquico si queda kita  un amigo con quien puede confia. Por ejemplo, gendeh lang kita ta promete que ayuda con el diaton maga hermano y hermana sino ta hace tambien kita maga practical cosas para ayuda kanila. (Mat. 5:37; Luc. 16:10) Si aquellos quien ta necesita ayuda sabe que puede sila confia kanaton, sinti gayot sila alivio. Un hermana el ya explica si porque. Ele ya habla: “Gendeh ya tu man lingasa cay sabe tu que el persona quien ya habla que ayuda contigo hay llega gayot na hora para hace el cosa le ya promete.”

10. Base na Proverbio 18:24, quien puede dale alivio con aquellos quien ta experiencia probanza o tristeza?

¹⁰ Aquellos quien ta experiencia probanza o tristeza ta sinti alivio si ta habla se sila con el diila amigo o amiga. (Le con el Proverbio 18:24.) Cuando yan disfellow el anak hombre de Bijay, ele ya habla: “Necesita yo habla na un persona con quien yo ta confia si cosa yo ta sinti.” Ya perde el privilegio de Carlos cay ya puede le hace kamali. Ele ya habla: “Tiene yo con quien necesita habla si cosa yo ta sinti y gendeh yo man lingasa que juzga conmigo.” Ya realiza si Carlos que puede le se habla na maga anciano y ya puede sila ayuda con ele enfrenta con el de suyu problema. Ya sinti tambien le alivio cay sabe le que el maga anciano gendeh habla con otro si cosa le ya habla kanila.

11. Paquemodo kita puede queda un amigo o amiga con quien puede confia?

¹¹ Para queda un amigo o amiga con quien puede confia, necesita kita tiene paciencia. Cuando ya deja con Zhanna el de suyu marido, ya puede le sinti alivio cuando ya habla le si cosa le ta sinti na de suyu maga amigo y amiga. “Con paciencia sila ya oi conmigo,” ele ya habla, “maskin pa bira-bira ya lang el cosa yo ta habla.” Puede tambien tu queda un buen amigo o amiga si oi tu con paciencia.

12. Quien si Marcos y paquemodo le ya dale mira que alegre le sirvi con otro?

¹² Si Marcos amo un Judio Cristiano estaba na Jerusalem. El de suyu primo si Bernabe un conocido misionario. (Col. 4:10) Rico el familia de Marcos pero gendeh el material cosas el de con todo importante para con ele. Na de suyu entero vida, ya dale le mira que alegre le sirvi con otro. Por ejemplo, manada beses le ya sirvi junto con apostol Pablo y con apostol Pedro mientras ta hace sila el diila maga responsibilidad. Posible, si Marcos el ya dale con el diila fisical necesidad. (Act. 13:2-5; 1 Ped. 5:13) Ya menciona si Pablo con Marcos como uno del quien “ta trabaja junto [con ele] para na Reino del Dios” y el quien ta hace fuerte con ele.​—Col. 4:10, 11.

13. Paquemodo el 2 Timoteo 4:11 ta dale mira que ya aprecia si Pablo con el ayuda de Marcos?

¹³ Si Marcos ya queda uno del maga cerca amigo de Pablo. Por ejemplo maga 65 C.E., cuando na preso si Pablo na Roma por ultima vez, ya escribi le con el de suyu segundo carta con Timoteo. Na de suyu carta, ya manda le con Timoteo que anda na Roma y manda sigui con Marcos. (2 Tim. 4:11) Asigurao que ya aprecia gayot si Pablo con el ayuda de Marcos de antes, poreso ya pidi le que era presente si Marcos na ese bien importante tiempo. Ya ayuda si Marcos con Pablo na practical manera. Posible, ya dale le con ele comida o maga cosas necesita para puede le escribi carta. El maga cosas que ya hace si Marcos para suporta y anima con Pablo posible ya ayuda con Pablo para aguanta hasta na ultimo parte del de suyu vida.

14-15. Cosa kanaton puede enseña el Mateo 7:12 acerca si paquemodo kita ayuda con otro na practical manera?

¹⁴ Le con el Mateo 7:12. Si ta experiencia kita dificultad, ta aprecia gayot kita con  aquellos quien ta ayuda kanaton na practical manera! “Manada cosas que normal lang kita ta hace todo el dia pero malisud se hace si talli kita na probanza,” ya habla si Ryan, quien el tata ya muri por causa na accidente. “El practical ayuda​—maskin paquemodo man se de diutay—​ta dale gayot alivio.”

¹⁵ Si alisto kita y atentivo, posible puede kita busca manera para ayuda con otro. Por ejemplo, un hermana ya busca manera para lleva na doctor con Peter y Kathryn, que ya menciona enante. Cay gendeh ya puede maneja si Peter y si Kathryn, el hermana ya hace schedule para puede man relevajan maneja el maga hermano y hermana na congregacion. Ya puede ba se ayuda? Si Kathryn ya habla: “Ya sinti kame que grande pesades el ya quita kanamon.” Pirmi acorda que puede tu dale comforta o alivio con otro maskin pa simple cosas lang tu ta hace para ayuda.

16. Cosa importante leccion kita puede aprende na ejemplo de Marcos acerca na dalida comforta?

¹⁶ Como un Cristiano, asigurao que manada cosa ya hace si dicipulo Marcos. Manada le importante assignment, incluido ya el escribida de Evangelio de Marcos. Pero maskin pa ansina, ya dale le tiempo para dale comforta con Pablo y sabe si Pablo que puede le pidi ayuda con Marcos. Si Angela, quien bien dolorido cay ya mata con el un miembro del de suyu familia, ya aprecia con aquellos quien ya dale comforta con ele. “Si el maga amigo y amiga quierre gayot ayuda, facil lang kanila atraca,” ele ya habla. “Gendeh sila man alang-alang ayuda conmigo.” Puede kita pregunta con el diaton mismo cuerpo, ‘Conocido ba conmigo que ta dale comforta con el maga hermano y hermana na practical manera?’

17. Na cosa manera manda move kanaton que dale comforta con otro si medita kita con el 2 Corinto 1:3, 4?

¹⁷ Manada na diaton congregacion el quien ta necesita comforta. Si dale kita kanila comforta, puede kita usa el maga palabra que ya usa el otro para dale comforta kanaton. Si Nino, un hermana quien ya muri el aguela, ya habla: “Puede dale comforta si Jehova con  otro por medio kanaton si permiti kita que usa le kanaton.” (Le con el 2 Corinto 1:3, 4.) Si Frances, que ya menciona enante, ya habla: “Deverasan gayot el cosa ya habla na 2 Corinto 1:4. Puede kita dale con otro el comforta que ya ricibi kita.”

18. (a) Porque el otro ta tiene miedo dale comforta? (b) Paquemodo kita queda efectivo na dalida comforta? Dale ejemplo.

¹⁸ Necesita kita hace maga manera para dale comforta con otro maskin pa ta tiene kita miedo. Por ejemplo, posible ta tiene kita miedo cay no sabe kita si cosa habla o hace para con aquellos quien ta enfrenta dificultad. Un anciano, si Paul, ya acorda con el esfuerzo que ya hace el cuanto despues muri el de suyu tata. “Sabe yo que gendeh facil para kanila que atraca y converza conmigo,” ya habla le. “No sabe sila si cosa habla. Pero, ya aprecia gayot yo con el diila querrer que dale comforta y ayuda conmigo.” Igual tambien el cosa ya sinti el un hermano que si Tajon despues experiencia un fuerte temblor. Ele ya habla: “El deverasan, nuay ya yo acorda el maga mensaje que ya imbia conmigo el maga hermano despues del temblor pero ta acorda yo que bien interesao sila conmigo poreso ya chequia sila si quetal yo.” Puede kita queda efectivo na dalida comforta si dale kita mira que deverasan kita interesao kanila.

19. Porque determinao tu dale comforta con otro?

¹⁹ Mientras ta queda kita cerca na fin de este sistema de las cosas, mas ta queda grabe el situacion de este mundo y el diaton vida mas ta queda dificil. (2 Tim. 3:13) Y ta necesita kita comforta por causa na diaton imperfeccion y maga kamali. Si apostol Pablo ya puede aguanta hasta na fin del de suyu vida cay ya puede le ricibi comforta estaba na maga hermano y hermana. Ojala queda kita leal igual con Aristarco, puede kanaton confia igual con Tiquico y sirvi kita con otro igual con Marcos. Si hace kita se, puede kita ayuda con el diaton maga hermano y hermana que continua fiel sirvi con Jehova.​—1 Tes. 3:2, 3.