1. Unsang makapaguol nga mga situwasyon ang giatubang sa daghang matinumanong alagad ni Jehova?

SA TIBUOK kalibotan, daghang alagad ni Jehova ang nag-atubang ug mga situwasyon nga makapa-stress o makapaguol. Imo ba ning namatikdan sa inyong kongregasyon? Dunay mga igsoon nga grabeg sakit o namatyag minahal. Ang uban nasakitan pag-ayo kay dunay membro sa ilang pamilya o suod nga higala nga mibiya sa kamatuoran. Ug ang uban nag-antos tungod sa mga epekto sa katalagman. Ang maong mga igsoon nagkinahanglag paghupay. Unsaon nato sila pagtabang?

2. Nganong may mga panahon nga kinahanglang hupayon si apostol Pablo?

² Si apostol Pablo kadaghan nakaatubang ug mga situwasyon nga nakapameligro sa iyang kinabuhi. (2 Cor. 11:23-28) Duna pod siyay “tunok sa unod” nga kinahanglang sagubangon, tingali problema sa panglawas. (2 Cor. 12:7) Ug naguol pod siya dihang ang kanhi niyang kauban nga si Demas mibiya kaniya “tungod kay gihigugma [ni Demas] ang presenteng sistema sa mga butang.” (2 Tim. 4:10) Si Pablo maoy maisogong dinihogan nga mahigugmaong nagtabang sa uban, pero may mga panahon nga nadismayar siya.​—Roma 9:1, 2.

3. Kinsay nakahupay ug nakadasig kang Pablo?

³ Nadawat ni Pablo ang paghupay ug tabang nga iyang gikinahanglan. Sa unsang paagi? Way duhaduha, si Jehova naghupay niya pinaagi sa Iyang balaang espiritu. (2 Cor. 4:7; Filip. 4:13) Gigamit sab ni Jehova ang ubang Kristohanon sa paghupay kaniya. Si Pablo miingon nga ang ubang igsoon “nakahupay pag-ayo” kaniya. (Col. 4:11) Apil sa iyang gihisgotan  si Aristarko, Tiquico, ug Marcos. Gipalig-on nila si Pablo ug gitabangan nga makalahutay. Unsay mga hiyas niining tulo ka Kristohanon nga tungod niana nakahupay sila sa uban? Unsaon nato pagsundog ang ilang maayong ehemplo dihang maningkamot ta sa paghupay ug pagdasig sa usag usa?

4. Giunsa pagpakita ni Aristarko nga siya maunongong higala ni Pablo?

⁴ Si Aristarko, Kristohanon nga taga-Tesalonica, sa Macedonia, maoy maunongong higala ni Pablo. Ang unang paghisgot kang Aristarko sa Bibliya mabasa sa asoy sa pagbisita ni Pablo sa Efeso, sa iyang ikatulong pagbiyahe ingong misyonaryo. Samtang nag-uban kang Pablo, si Aristarko gipugos ug dala sa suko kaayo nga panon. (Buh. 19:29) Dihang gibuhian na siya, wala siya mobiya aron luwason ang kaugalingon gikan sa peligro, kondili miunong siya kang Pablo. Pipila ka bulan sa ulahi, sa Gresya, si Aristarko kauban gihapon ni Pablo bisag ang mga kaaway naningkamot gihapon sa pagpatay kang Pablo. (Buh. 20:2-4) Niadtong mga 58 C.E., dihang si Pablo gidala sa Roma ingong piniriso, giubanan siya ni Aristarko sa taas nga biyahe, ug silang duha nakasinatig pagkalunod samtang naglawig. (Buh. 27:1, 2, 41) Sa Roma, dayag nga taudtaod pod niyang giubanan si Pablo sa prisohan. (Col. 4:10) Dili ikatingala nga nadasig ug nahupayan si Pablo sa maong maunongong higala!

5. Sumala sa Proverbio 17:17, unsaon nato pagpakita nga maunongon tang higala?

⁵ Sama kang Aristarko, atong mapakita nga maunongon tang higala kon naa ta para sa mga igsoon dili lang sa panahon nga maayo ang ilang kahimtang kondili “panahon [sab] sa kalisdanan.” (Basaha ang Proverbio 17:17.) Bisag molabay na ang kalisdanan, ang igsoon lagmit magkinahanglan gihapon ug paghupay. Si Frances, * nga namatyag amahan ug dayon inahan tulo ka bulan sa ulahi tungod sa kanser, miingon: “Para nako, ang lisod nga mga pagsulay makaapektar nato sa taas nga panahon. Mapasalamaton ko sa maunongon nakong mga higala nga wala malimot  nga naa pa ang kasakit nga akong gibati bisag dugay nang namatay ang akong ginikanan.”

6. Kon maunongon ta, unsay atong buhaton?

⁶ Ang maunongong mga higala andam mosakripisyo para sa mga igsoon. Pananglitan, ang brader nga si Peter nadayagnos nga may grabeng sakit nga makamatay. Ang iyang asawa nga si Kathryn miingon: “Usa ka magtiayon sa among kongregasyon nagdala namo sa doktor, ug didto, nahibaloan namo ang sakit ni Peter. Midesisyon dayon sila nga dili gyod mi nila biyaan niining lisod nga kahimtang, ug naa sila pirme dihang gikinahanglan namo sila.” Makapahupay gyod nga duna tay tinuod nga mga higala nga motabang nato sa paglahutay!

7-8. Sumala sa Colosas 4:7-9, giunsa pagpakita ni Tiquico nga kasaligan siya?

⁷ Si Tiquico, usa ka Kristohanon nga gikan sa Romanhong distrito sa Asia, kasaligan kaayo nga kauban ni Pablo. (Buh. 20:4) Niadtong mga 55 C.E., si Pablo nag-organisar ug pagpangolektag kuwarta aron itabang sa Hudiyong mga Kristohanon, ug lagmit gipatabang niya si Tiquico niining importanteng asaynment. (2 Cor. 8:18-20) Sa ulahi, sa unang pagkapriso ni Pablo sa Roma, si Tiquico ang nahimo niyang mensahero. Siyay tigdala sa mga sulat ug mga pagdasig ni Pablo sa mga kongregasyon sa Asia.​—Col. 4:7-9.

⁸ Si Tiquico wala gyod mausab ingong kasaligang amigo ni Pablo. (Tito 3:12) Ang ubang Kristohanon kaniadto dili parehas kang Tiquico nga pirmeng masaligan. Niadtong mga 65 C.E., dihang napriso si Pablo sa ikaduhang higayon, siya misulat nga daghang Kristohanon sa probinsiya sa Asia ang wala na makig-uban niya, tingali kay nahadlok sila sa mga magsusupak. (2 Tim. 1:15) Apan si Pablo makasalig kang Tiquico ug gihatagan niya siyag dugang asaynment. (2 Tim. 4:12) Seguradong mapasalamaton si Pablo kay naa siyay kasaligang amigo nga sama kang Tiquico.

9. Unsaon nato pagsundog si Tiquico?

⁹ Masundog nato si Tiquico kon maningkamot ta nga mahimong kasaligang higala. Pananglitan, imbes pasaligan lang natog  tabang ang mga igsoon nga nanginahanglan, mohimo pod tag praktikal nga mga butang sa pagtabang kanila. (Mat. 5:37; Luc. 16:10) Kon kadtong nanginahanglag tabang nahibalo nga makasalig sila nato, mahupayan gyod sila. Usa ka sister misulti kon ngano. Siya miingon, “Dili na madugangan ang imong stress kay nahibalo ka nga kadtong misaad ug tabang moabot gyod aron tumanon ang iyang giingon.”

10. Sumala sa Proverbio 18:24, kinsay makahatag ug kahupayan niadtong nag-atubag kalisdanan o naa sa kagul-anan?

¹⁰ Kadtong nag-atubag kalisdanan o naa sa kagul-anan sagad mahupay kon ila ning masulti sa usa ka kasaligang higala. (Basaha ang Proverbio 18:24.) Si Bijay naguol pag-ayo dihang ang iyang anak na-disfellowship. Siya miingon, “Kinahanglan nakong masulti ang akong gibati ngadto sa tawo nga akong masaligan.” Si Carlos nawad-ag pribilehiyo tungod sa nahimo niyang sayop. Siya miingon, “Nagkinahanglan kog ‘luwas nga dapit’ diin masulti nako ang akong gibati ug wala ray mohukom nako.” Nakita ni Carlos kanang luwas nga dapit diha sa mga ansiyano, nga nagtabang kaniya nga masagubang ang iyang problema. Nahupayan pod siya kay nahibalo siya nga dili ipanulti sa mga ansiyano ang iyang gisulti kanila.

11. Sa unsang paagi mahimo tang kasaligang higala nga kasultihan sa uban?

¹¹ Aron mahimo tang kasaligang higala nga kasultihan sa uban, kinahanglan natong ugmaron ang pailob. Si Zhanna, nga gibiyaan sa iyang bana, nahupayan dihang gisulti niya sa iyang suod nga mga higala ang iyang gibati. Siya miingon, “Mapailobon silang naminaw nako bisag balikbalik na lang tingali ang akong gipanulti.” Mapakita sab nimo nga maayo kang higala kon mapailobon kang maminaw.

12. Kinsa si Marcos, ug giunsa niya pagpakita nga andam siyang motabang sa uban?

¹² Si Marcos usa ka Hudiyong Kristohanon nga taga-Jerusalem. Ang iyang ig-agaw nga si Bernabe iladong misyonaryo. (Col. 4:10) Dayag nga dato ang pamilya ni Marcos, pero dili kuwarta ug kabtangan ang pinakaimportante kaniya. Sa tibuok niyang kinabuhi, gipakita niya nga siya andam ug malipayng motabang sa uban. Pananglitan, kadaghan niya alagari si Pablo ug Pedro samtang gihimo nila ang ilang responsibilidad. Posible nga giatiman ni Marcos ang ilang pisikal nga mga panginahanglan. (Buh. 13:2-5; 1 Ped. 5:13) Si Pablo miingon nga si Marcos usa sa iyang mga “isigkamagbubuhat para sa Gingharian sa Diyos” ug “nakapalig-on” kaniya.​—Col. 4:10, 11, footnote.

13. Giunsa pagpakita sa 2 Timoteo 4:11 nga giapresyar ni Pablo ang tabang ni Marcos?

¹³ Si Marcos nahimong usa sa suod nga mga higala ni Pablo. Pananglitan, sa kataposang pagkapriso ni Pablo sa Roma sa mga 65 C.E., gisulatan niya si Timoteo sa ikaduhang higayon. Sa iyang sulat, gihangyo niya si Timoteo nga moadto sa Roma ug iuban si Marcos. (2 Tim. 4:11) Seguradong naapresyar ni Pablo ang tabang ni Marcos kaniadto, mao nga iyang gihangyo nga makauban niya si Marcos nianang importanteng panahon. Si Marcos mitabang kang Pablo sa praktikal nga mga paagi, tingali pinaagi sa pagtaganag pagkaon o mga butang nga gikinahanglan sa pagsulat. Ang tabang ug pagdasig nga nadawat ni Pablo lagmit nakatabang niya nga malahutay ang kataposang bahin sa iyang kinabuhi hangtod sa iyang kamatayon.

14-15. Unsay atong makat-onan sa Mateo 7:12 bahin sa paghatag ug praktikal nga tabang sa uban?

¹⁴ Basaha ang Mateo 7:12. Dihang naa ta  sa kalisdanan, mapasalamaton gyod ta niadtong mohatag natog praktikal nga tabang! “Daghang adlaw-adlaw nga buluhaton ang lisod kaayong himoon kon naa ka sa kasakit,” miingon si Ryan, nga namatyag amahan tungod sa aksidente. “Makapahupay gyod kon naay motabang bisan sa ginagmayng butang.”

¹⁵ Kon maniid ta, tingali makakita tag praktikal nga mga paagi sa pagtabang sa uban. Pananglitan, gitabangan sa usa ka sister si Peter ug Kathryn, nga gihisgotan ganiha, aron makaadto sila sa tanan nilang check-up. Kay di na man makadrayb si Peter ug Kathryn, ang sister mihimog eskedyul aron dunay mga igsoon sa kongregasyon nga magpulipuli sa pagtaganag transportasyon. Nakatabang ba ni? Si Kathryn miingon, “Gibati namo nga morag nakuhaan ang among gipas-an.” Hinumdomi nga bisan sa ginagmayng butang, makahupay ka pag-ayo sa uban.

16. Unsang importanteng leksiyon ang atong makat-onan kang Marcos bahin sa paghupay sa uban?

¹⁶ Ingong Kristohanon, segurado nga daghag responsibilidad si Marcos. Daghan siyag importanteng asaynment, apil na ang pagsulat sa Ebanghelyo nga gingalan kaniya. Pero si Marcos migahig panahon sa paghupay kang Pablo, ug nahibalo si Pablo nga makapangayo siyag tabang kang Marcos. Si Angela, kinsa naguol pag-ayo dihang gipatay ang iyang lola, mapasalamaton niadtong mga mihupay kaniya. Siya miingon, “Kon ang mga igsoon gusto gyong motabang, dali ra silang duolon. Dili sila mag-ukon-ukon o magduhaduha sa pagtabang nimo.” Puwede natong pangutan-on ang kaugalingon, ‘Nailhan ba ko nga andam mohimog praktikal nga mga paagi sa paghupay sa mga igsoon?’

17. Sa unsang paagi ang pagpamalandong sa 2 Corinto 1:3, 4 makadasig nato sa paghupay sa uban?

¹⁷ Daghan sa atong mga igsoon ang nagkinahanglag paghupay. Puwede natong gamiton kanila ang makapadasig nga mga pulong nga gigamit sa uban sa paghupay kanato. Ang sister nga si Nino, kinsa namatyag lola, miingon: “Puwede tang gamiton ni Jehova sa paghupay sa uban kon tugotan nato siya nga gamiton  ta.” (Basaha ang 2 Corinto 1:3, 4.) Si Frances, nga gihisgotan ganiha, miingon: “Tinuod gyod ang giingon sa 2 Corinto 1:4. Puwede natong gamiton ang paghupay nga atong nadawat sa paghupay sa uban.”

18. (a) Nganong ang pipila mahadlok tingaling mohupay sa uban? (b) Sa unsang paagi molampos ta sa paghupay sa uban? Paghatag ug pananglitan.

¹⁸ Kinahanglan tang mohimog paagi sa paghupay sa uban bisag mobati tag kahadlok. Tingali mahadlok ta kay wala ta kabalo kon unsay atong isulti o buhaton niadtong naa sa lisod nga situwasyon. Ang ansiyano nga si Paul nahinumdom kon giunsa siya paghupay sa uban human mamatay ang iyang amahan. Siya miingon, “Nahibalo ko nga dili sayon para nila nga estoryahon ko. Naglisod sila kon unsay isulti. Pero naapresyar gyod nako nga gusto ko nilang hupayon ug tabangan.” Mao pod nay gibati ni Tajon, brader nga nakaeksperyensiyag kusog kaayong linog. Siya miingon: “Sa tinuod lang, nalimot na ko sa mga mensahe nga akong nadawat human sa linog, pero wala gyod ko malimot nga gimahal ko nila pag-ayo kay ilang giseguro nga luwas ko.” Makahupay ta sa uban kon ipakita nato nga gimahal nato sila.

19. Nganong determinado ka nga ‘mohupay pag-ayo’ sa uban?

¹⁹ Samtang nagkaduol ta sa kataposan niining sistemaha sa mga butang, mas mograbe pa ang kahimtang niining kalibotana ug mosamot ka lisod ang kinabuhi. (2 Tim. 3:13) Ug kay masayop man ta tungod sa pagkadili-hingpit, padayon tang magkinahanglan ug paghupay. Si apostol Pablo nakapabiling matinumanon hangtod sa kataposan sa iyang kinabuhi, ug usa sa mga rason niana mao ang paghupay nga iyang nadawat gikan sa iyang mga isigka-Kristohanon. Hinaot nga kita magmaunongon sama kang Aristarko, mahimong kasaligan sama kang Tiquico, ug andam moalagad sama kang Marcos. Kon ato nang himoon, matabangan nato ang mga igsoon nga makapabiling matinumanon sa pag-alagad kang Jehova.​—1 Tes. 3:2, 3.