1. San a wantu sani di e miti a foluku fu Yehofa aini a ten ya?

A OMEN sani e miti a foluku fu Yehofa na a hii goontapu di e meke den e fii booko-saka. Sama de aini i kemeente di booko-saka fu di sani e miti den? Son baala anga sisa siki wan gaan siki. Taawan de anga buduufu na ati fu di wan sama di den lobi dede. Son wan fu den e kusumi fu di wan famii efuso wan bun mati fu den gwe fika Yehofa. Taawan de a peesi pe wan gaan ogii pasa. Ala den baala anga sisa ya abi taanga-sikin fanowdu. Fa u sa yeepi den?

2. Saide apostel Pawlesi be abi taanga-sikin fanowdu son leisi?

² A omen leisi apostel Pawlesi misi fu dede (2 Kor. 11:23-28). Beibel e soi tu taki a be e feti anga wan ’maka aini en sikin’. Kande a maka ya a be wan siki di be e fooseli en (2 Kor. 12:7). A be fii booko-saka tu di Deimasi, wan baala di be e wooko makandaa anga en gwe fika en fu di a be „lobi a goontapu” (2 Tim. 4:10). Pawlesi a be wan salufu Kelesten di be lobi yeepi taawan anga en hii ati, ma tokuso a be e fii booko-saka son leisi.​—Rom. 9:1, 2.

3. Fa Yehofa yeepi Pawlesi?

³ Pawlesi fende a taanga-sikin anga a kaakiti di a be abi fanowdu. San yeepi en? Yehofa koboloiki en santa yeye fu gi en kaakiti (2 Kor. 4:7; Filip. 4:13). Yehofa meke taa baala anga sisa gi en taanga-sikin tu. Pawlesi taki den sama di be e wooko makandaa anga en „toosutu” en (Kol. 4:11). Aristarkus, Tikikus, anga Malikisi a wantu fu den sama di be yeepi Pawlesi. Den gi en taanga-sikin tu.  San be yeepi den dii man ya fu gi Pawlesi taanga-sikin? Fa u sa waka a den baka te wi e meke moiti fu gi taawan taanga-sikin?

4. Fa Aristarkus holibaka gi Pawlesi?

⁴ Aristarkus a be wan Kelesten fu Tesalonika, wan foto di be de a Masedoniya. A man ya a be wan bun mati fu Pawlesi, a be e holibaka gi en ala yuu. A fosi peesi pe wi e leisi fu Aristarkus, a di Pawlesi be go a Efeise na a du fu dii peleikiwaka fi en. Di Aristarkus be de anga Pawlesi, wan kulu sama kisi en (Toli 19:29). Baka di den losi en a á gwe fika Pawlesi, winsi fa sani be sa miti en. Baka wantu mun Pawlesi be de a Giikikondee. Aristarkus be de makandaa anga Pawlesi ete, winsi fa sama be e suku fu kii Pawlesi (Toli 20:2-4). A pisiten fu a yali 58, di den be sende Pawlesi go a Rome enke sitaafuman, Aristarkus be de anga Pawlesi ete. Den be sungu di den be de a pasi e go a Rome (Toli 27:1, 2, 41). Di den be de a Rome, a gei enke a be de wan pisiten anga Pawlesi a sitaafu-osu (Kol. 4:10). Pawlesi be musu fende taanga-sikin di Aristarkus be e holibaka gi en!

5. Enke fa Odo 17:17 e soi, da fa u sa de wan tuutuu mati gi taawan?

⁵ Leti enke Aristarkus, u sa de wan tuutuu mati gi taawan te wi e holibaka gi den te den „fuka”. (Leisi Odo 17:17.) Son leisi wan hii pisiten baka te son sani miti u baala anga sisa, den e abi taanga-sikin fanowdu ete. Luku a toli fu wan baala den e kai Frances *. Kanker be kisi en dda anga en mma. En dda fosi dede, baka dii mun neen en mma seefi dede. A taki: „Te wan gaan sani miti i, ai teke ten fi i kisi iseefi baka. Ai bigi gi mi te den mati fu mi e holi a pakisei taki winsi mma anga nda dede wan pisiten kaba, tokuso a dede fu den e du mi ogii ete.”

6. San wi o du efu wi a wan tuutuu mati?

⁶ Tuutuu mati e koboloiki den ten anga  den kaakiti fu holibaka gi den baala anga sisa. Luku a toli fu wan baala den e kai Peter. Dataa be taigi en taki a abi wan siki di sa kii en gawgaw. En uman Kathryn taki: „Wan baala anga en uman tyai u go a dataa a dei di u be go yee sani fu a siki fu Peter. Den taigi u leti ape taki den ná o gwe fika u wawan, den o holibaka gi u. Den be de leti a u se ala yuu te u be abi den fanowdu.” Wi e fii bun te wi abi mati di e holibaka gi u te tesi e miti u.

7-8. Enke fa Kolosesama 4:7-9 e soi, da fa Tikikus be soi taki en a wan tuutuu mati?

⁷ Tikikus a be wan Kelesten fu Asiya, wan peesi a Rome. A baala ya a be wan tuutuu mati fu Pawlesi (Toli 20:4). A pisiten fu a yali 55, Pawlesi be sete sani fu piki moni fu yeepi den baala anga sisa a Yudeya. Kande a be meke Tikikus yeepi anga a pelensipali wooko ya (2 Kor. 8:18-20). Bakaten di Pawlesi be de a sitaafu-osu a Rome fu a fosi leisi, a Tikikus be e tyai bosikopu gi en. Neen be e tyai den biifi fu Pawlesi go a den Kemeente di be de a Asiya.​—Kol. 4:7-9.

⁸ Tikikus á gwe fika Pawlesi (Tit. 3:12). Pawlesi á be man fitoow son Kelesten a ten de. A pisiten fu a yali 65, di Pawlesi sooto du fu tu leisi, a sikiifi taki a omen Kelesten fu Asiya á be wani paa anga en, fu di den be e feele sama (2 Tim. 1:15). Ma Pawlesi be sa fitoow Tikikus, neen meke a gi en moo faantiwowtu (2 Tim. 4:12). Pawlesi be musu e teke en fu bigi taki a be abi wan bun mati enke Tikikus.

9. Fa u sa waka a Tikikus baka?

⁹ Efu u wani waka a Tikikus baka, u mu meke moiti fu de wan tuutuu mati gi taawan. Wi á mu taki a mofu namo taki wi o holibaka gi u baala anga sisa, ma u mu yeepi den tuutuu anga san den abi fanowdu (Mat. 5:37; Luk 16:10). Te den sama di abi yeepi fanowdu sabi taki den sa fitoow i, a sani de e toosutu den. Luku san wan sisa taki fu a sani ya.  A taki: „I nai booko yu ede tumisi te i sabi taki a sama di taigi i taki a o yeepi i, o du san a paamisi.”

10. Enke fa Odo 18:24 e soi, da pe den sama di abi polobelema efuso booko-ede sa fende toosutu?

¹⁰ Wan sama di abi booko-ede, e fii moo bun te ai taigi wan mati fi en sani di a nai taigi ala sama. (Leisi Odo 18:24.) Wan baala den e kai Bijay taki fa a be e fii di a fosi boi fi en komoto a waaleiti. A taki: „Mi be abi fu taigi wan sama di mi e fitoow fa mi be e fii.” Wan taa baala den e kai Carlos be lasi den gaandi di a be abi aini a kemeente fu di a be meke wan fowtu. A baala ya taki: „Mi be abi wan sama fanowdu di mi be sa taigi fa mi e fii, wan sama di á be o kuutu mi.” Carlos be man taigi den owluman di be e yeepi en anga a polobelema fi en fa a be e fii. A fii bun di a du a sani ya, bika a be sabi taki den owluman á be o taigi taawan san a taigi den.

11. Fa u sa de wan tuutuu mati di taawan sa taigi kibiitoli?

¹¹ Efu u wani de wan tuutuu mati di taawan sa taigi kibiitoli, u mu abi pasensi. Baka di a man fu Zhanna gwe fika en, a be fende taanga-sikin di a taigi wantu mati fi en fa a be e fii. A taki: „Den aliki mi anga pasensi, winsi fa kande na aseefi sani mi taigi den omen leisi.” Efi i wani de wan bun mati, i mu e aliki bun te taawan e taki puu koko a den ati.

12. Sama a be Malikisi? Fa a soi taki a be lobi yeepi taawan?

¹² Malikisi a be wan Dyu fu Yelusalem di be toon wan Kelesten. Barnabas di omen sama be sabi enke zendeling, a be wan famii fu Malikisi (Kol. 4:10). A gei enke a famii fu Malikisi be gudu, ma tokuso a á be e poti goontapu gudu a fesi. Malikisi soi anga en hii libi taki a be de kabakaba fu yeepi taawan. Anga ala piisii a be e yeepi taawan. A omen leisi a wooko makandaa anga Pawlesi anga Peitilisi. Kande a be e yeepi den anga tanpeesi, bai nyanyan sani gi den, efuso taa sani di den be abi fanowdu (Toli 13:2-5; 1 Peit. 5:13). Pawlesi be taki Malikisi a wan fu den sama di be e ’wooko anga en gi a Kownukondee fu Gadu’. A taki a „toosutu” en tu.​—Kol. 4:10, 11.

13. Fa 2 Timotiyesi 4:11 e soi taki Pawlesi be e teke den sani di Malikisi be du gi en fu bigi?

¹³ Malikisi toon wan bun mati fu Pawlesi. Di Pawlesi be de a sitaafu-osu fu a lasiti leisi na a pisiten fu a yali 65, a sikiifi du fu tu biifi gi Timotiyesi. Pawlesi taigi Timotiyesi aini a biifi taki a mu go miti en a Rome. Te a be e go a be mu tyai Malikisi (2 Tim. 4:11). A gei enke Pawlesi be sabi taki den be o kii en, neen meke a be wani Malikisi de makandaa anga en a pisiten de. Malikisi be e yeepi Pawlesi anga san a be abi fanowdu. Kande a be tyai nyanyan, bukulolo, anga taa sani gi Pawlesi. A yeepi di Malikisi be e yeepi Pawlesi gi en taanga-sikin fu holidoo te enke den kii en.

14-15. Enke fa Mateyesi 7:12 e soi, da san u mu du efu u wani yeepi taawan?

¹⁴ Leisi Mateyesi 7:12. Te wi abi polobelema, ai bigi gi u te sama e yeepi wi anga den sani di wi abi fanowdu. Luku a toli fu wan baala den e kai Ryan. En dda dede a wan ongooku fasi. Ryan taki: „A omen sani di i be gwenti du, i nai poi du moo te wan gaan sani miti i. Ai gi i  taanga-sikin tuutuu te wan sama yeepi i du son sani, winsi a wan pikin sani.”

¹⁵ Efu wi e poti pakisei a taawan, wi o si san u sa du fu yeepi den. Luku a toli fu Peter anga Kathryn baka. Wan sisa be taigi den taki a o go e seeka sani gi den fu e go a dataa, bika Peter anga Kathryn á be poi lei wagi moo. A so a sisa ya seeka sani taki ala leisi te den be mu go a dataa, baala anga sisa aini a kemeente be de fu tyai den go. Fa Kathryn anga Peter be fii di den baala anga sisa yeepi den? Kathryn taki: „U be fii enke wan gaan hebi be komoto a u tapu.” A sani ya e soi taki den sani di wi e du fu yeepi taawan e gi den taanga-sikin, winsi a wan pikin sani.

16. San wi e leli fu Malikisi te u luku a fasi fa a be e yeepi taawan?

¹⁶ Malikisi, be e libi aini a ten fu den apostel. A man ya be abi gaan faantiwowtu aini a Kelesten kemeente. Neen sikiifi a Beibel buku Malikisi. Winsi fa Malikisi be abi omen sani fu du, toku a be e meke ten fu yeepi Pawlesi. Pawlesi á be e feele fu akisi Malikisi fu yeepi en. Di ogiiman kii a gaanmma fu wan sisa fu u den e kai Angela, a be bigi gi en taki baala anga sisa be de kabakaba fu yeepi en. A taki: „Te den mati fi i wani yeepi i tuutuu, ai makiliki fu akisi den sani, bika yu e si taki den de kabakaba fu yeepi i.” Akisi iseefi taki: ’Sama sabi mi enke wan sama di lobi yeepi taawan te den de a nowtu?’

17. Sowtu taanga-sikin wi o fende te wi e sidon pakisei san sikiifi a 2 Korentesama 1:3, 4?

¹⁷ A makiliki fu fende baala anga sisa di abi toosutu fanowdu. Kande u sa toosutu den aseefi fasi fa taawan be toosutu u. Wan sisa den e kai Nino gaanmma dede. A sisa ya taki: „Yehofa sa koboloiki u fu toosutu taawan, efu u gi en a okasi.” (Leisi 2 Korentesama 1:3, 4.) Frances, taki: „A sani di sikiifi a 2 Korentesama 1:4 a tuu. U sa toosutu taawan aseefi fasi  fa sama be toosutu u. Kande u sa sende aseefi bosikopu gi den, efuso du aseefi sani gi den di taawan be du gi u fu toosutu u.”

18. (a) Saide ai taanga gi son sama fu gi taawan taanga-sikin? (b) Fa u sa toosutu taawan? Gi wan ondoofenitoli.

¹⁸ Ala u mu du wan sani fu toosutu taawan, winsi ai taanga gi u. Kande wi e booko wi ede taki wi á sabi san u mu taki efuso du fu gi wan sama di de a nowtu taanga-sikin. Wan gaandi baala den e kai Paul e membee ete fa son sama meke moiti fu toosutu en. A taki: „Mi be e si taki a taanga-sikin den meke fu kon taki anga mi. Den á be sabi san den mu taki. Ma a be bigi gi mi taki den be meke moiti fu toosutu mi.” Baka wan gaan seke-doti, wan baala den e kai Tajon taki: „Mi á mu lei, mi á man membee den sani di sama taigi mi moo a dei baka a seke-doti, ma mi be sabi ete taki a di den be e booko den ede anga mi, meke den be wani sabi efu sani á be du mi.” Efu u wani toosutu taawan, u mu soi den taki wi e booko wi ede anga den.

19. Saide i wani du ala san i poi fu e „toosutu” taawan?

¹⁹ Moo a kaba e koosube, moo a goontapu e ogii (2 Tim. 3:13). Ala wi abi toosutu fanowdu, bika na ala yuu wi e meke fowtu. Wan fu den sani di be yeepi apostel Pawlesi fu holidoo te na a kaba, na a taanga-sikin di a be e fende a baala anga sisa. Ala u mu meke moiti fu holibaka gi taawan, leti enke Aristarkus. Sama mu man fitoow wi, leti enke Tikikus. U mu de kabakaba fu yeepi taawan, leti enke Malikisi. Te wi e du den sani ya, wi o yeepi den baala anga sisa fu u fu tan dini Yehofa anga den hii ati.​—1 Tes. 3:2, 3.