1. Onlo sèwvitè a Jéova ka travèsé diféran sitiyasyon ki ka istrésé-yo. Kilès ?

TOUPATOU asi latè, onlo sèwvitè a Jéova ka jwenn sitiyasyon ki ka istrésé-yo é ki pé jous fè-yo soufè toubònman. Ès sé on biten ou ja konstaté adan lasanblé a-w ? Ni sèwten ki ka soufè pas yo ka goumé èvè on maladi grav oben pas yo pèd on moun yo té enmé. Ni dòt ki tris pas on moun an fanmi a yo, oben on zanmi a yo lésé lavérité. Ni dòt ankò ki ka soufè akòz dè on katastwòf natirèl. Tout sé frè é sè lasa bizwen yo pòté on rékonfò ba yo. Kijan nou pé édé-yo ?

2. Poukwa lapòt Pòl té bizwen yo konsolé-y délè ?

² Lapòt Pòl andiré onlo sitiyasyon ki mèt vi a-y an danjé (2 Kor. 11:23-28). Fò i té andiré « on pikan andidan chè [a-y] » osi. Pétèt sé on maladi i té ni (2 Kor. 12:7). É sa dwèt désèvwa-y toubònman lè Démas, on frè ki té ka travay èvè-y onlè, abandoné-y « pas [Démas] té enmé mond-la ki té la la » (2 Tim. 4:10). Pòl té on krétyen wen ki té ni kouraj é ki té ka édé lézòt san atann ayen anrètou, menmsi délè, i té ka santi-y dékourajé (Wom. 9:1, 2).

3. Kijan Jéova ba Pòl fòs é kouraj ?

³ Lapòt Pòl rèsèvwa konsolasyon-la é èd-la i té bizwen la. Ankijan ? Sèten Jéova sèvi èvè lèspri sen a-y pou ba-y fòs (2 Kor. 4:7 ; Filip. 4:13). Anplisdisa, Jéova sèvi èvè dòt krétyen fidèl pou konsolé-y. Pòl di kè pawmi sé krétyen-lasa ni déotwa ki té on « gran sous a konsolasyon » pou-y (Kol. 4:11). Pa ègzanp, i palé dè Aristawk,  Tichik, é Mawk. Yo ba Pòl fòs é kouraj, é sa édé-y andiré. Ki kalité sé twa krétyen-lasa té ni é ki édé-yo konsolé lézòt ? Kijan nou pé imité ègzanp a yo lè nou ka fè éfò pou konsolé é ankourajé lézòt ?

4. Kijan Aristawk montré kè i té on zanmi fidèl ?

⁴ Aristawk, on krétyen ki té ka vin dè Tésalonik, montré kè i té on zanmi fidèl pou Pòl. Prèmyé fwa nou ka tann palé dè Aristawk adan Labib, sé lè Pòl vizité Éfèz pannan twazyèm vwayaj a-y antankè misyonè. Pannan i té ka akonpagné Pòl, on foulmoun pati èvè Aristawk pa fòs é yo fèmé-y (Akt 19:29). Lè i fin pa sòti, olyé i té chapé kò a-y pou i té mété-y ansékirité, i aji èvè fidélité é i rété èvè Pòl. An Grès, plizyè mwa apré, magré lènmi a Pòl té ka chèché a tchouyé-y, Aristawk rété la èvè-y (Akt 20:2-4). Koté 58 a épòk an nou, lè yo voyé Pòl a Wòm antankè prizonyé, Aristawk baké èvè-y pou fè on gran vwayaj. Kifè, i té ansanm èvè Pòl lè bato-la fè nofraj (Akt 27:1, 2, 41). Lè i rivé a Wòm, i ka sanm sa i pasé déotwa tan èvè Pòl adan lajòl-la (Kol. 4:10). Davwa i té ni on zanmi fidèl konsa owa a-y, sèten sa ankourajé Pòl é sa konsolé-y !

5. Dapré Pwovèb 17:17, kijan nou pé montré kè nou sé dé zanmi fidèl ?

⁵ Kon Aristawk, nou pé vin on zanmi fidèl si nou toujou ka soutyenn frè é sè an nou, ki lè tout biten k’ay byen, ki « lè yo an détrès » (li Pwovèb 17:17). É menm i ka sanm sa éprèv-la fin, pétèt kè frè é sè an nou ké bizwen konsolasyon toujou. Frances * pèd manman-y é pap’a-y an twa mwa sèlman akòz dè on kansè. Mi sa i ka di : « An ni lidé kè ni sèwten éprèv ki ka aji asi nou pannan on bon enpé tan. É sa ka fè-mwen plézi lè zanmi an mwen ka sonjé kè jousalè an ka soufè toujou, menmsi sa ja ka fè bon tibwen tan fanmi an mwen mò ».

6. Si nou fidèl, ka nou ké anvi fè ?

 ⁶ On zanmi ki fidèl ka fè sakrifis pou soutyenn frè é sè a-y. Pa ègzanp, on frè non a-y sé Peter touvé-y té ni on maladi grav ki pa’a géri é ki ka fin èvè-w vitman. Madanm a-y, Kathryn, ka di : « On frè é madanm a-y ki an lasanblé an nou té èvè nou lè nou vin sav kè Peter té malad. Sé yo ki té menné-nou aka dòktè-la. Kifè, tousuit, yo désidé kè yo pa té’é lésé-nou travèsé éprèv-lasa tousèl é yo toujou rété èvè nou chakfwa nou té bizwen yo. » Lè ou ni dé véritab zanmi ki pé édé-w andiré lè ou ka jwenn penn é péripési, a pa ti fòs sa ka ba-w !

7-8. Dapré Kolosyen 4:7-9, kijan Tichik montré i té on moun yo té pé fè konfyans ?

⁷ Tichik, on krétyen ki té ka rété adan téritwa a Lazi, montré kè i té on zanmi vréman fidèl pou Pòl (Akt 20:4). Koté 55 a épòk an nou, Pòl mèt on òwganizasyon anplas pou sanblé lajan pou édé sé krétyen Jidé la, é pétèt Tichik pawtisipé adan travay enpòwtan lasa (2 Kor. 8:18-20). Plita, lè yo mèt Pòl lajòl a Wòm pou prèmyé fwa a-y, Tichik sé té mésajé pèwsonèl a-y. Pòl té maké déotwa lèt é déotwa mésaj pou ankourajé sé lasanblé-la an Azi, é sé Tichik ki menné tousa ba yo (Kol. 4:7-9).

⁸ Toulongalé, Tichik rété on zanmi Pòl té pé fè konfyans (Tit 3:12). A pa tout krétyen ou té pé fè konfyans, kon ou té pé fè Tichik konfyans. Koté 65 a épòk an nou, dézyèm fwa yo mèt Pòl lajòl, i maké kè onlo frè krétyen ki té ka rété adan téritwa a Lazi pa té vlé frékanté-y ankò, pétèt paskè yo té pè sé lènmi-la (2 Tim. 1:15). Pawkont, Pòl té pé konté asi Tichik é dayè pou yonn i jous ba-y ondòt misyon (2 Tim. 4:12). A pa ti kontan Pòl dwèt té kontan ni on bon zanmi kon Tichik.

9. Kijan nou pé imité Tichik ?

⁹ Nou pé imité Tichik : fò-nou sé dé zanmi yo pé fè konfyans. Pa ègzanp, lè  frè é sè an nou adan on sitiyasyon difisil, fò pa nou kontanté-nou dè pwomèt-yo kè nou ké édé-yo, men fò-nou fè on biten itil ba yo (Mat. 5:37 ; Lik 16:10). Lè zafè a on moun mélé é i sav i pé konté asi nou pou nou édé-y, sa ka ankourajé-y onlo. On sè ka èspliké poukwa. Mi sa i ka di : « Ou pa’a enkyèt pas ou sav kè moun-la ki di-w i ké édé-w la ké tchenn a mo a-y. »

10. Dapré Pwovèb 18:24, lè on moun ka travèsé on éprèv oben lè on biten désèvwa-y, owa kimoun i pé touvé rékonfò ?

¹⁰ Byensouvan, lè on moun ka travèsé on éprèv oben lè on biten désèvwa-y i ka touvé rékonfò lè i ka wouvè tchè a-y ba on zanmi i pé fè konfyans (li Pwovèb 18:24). Lè yo èskominyé gason a-y, sa fann tchè a Bijay. I di konsa : « An té bizwen pawtajé sa an té ka rèsanti èvè on moun an té pé fè konfyans. » Li Carlos, i pèd on privilèj adan lasanblé-la pas i té fè on érè. I té enmé privilèj-lasa toubònman. I di konsa : « An té bizwen palé èvè on moun dè sa an té ka rèsanti. Men fò pa moun-lasa té ay répété sa an di-y la é fò pa i té jijé-mwen nonplis. » Carlos touvé sa i té ka chèché owa sé ansyen-la. Yo édé-y fè douvan magré sitiyasyon-lasa. Konm i té sav sé ansyen-la pa té’é jen ay répété sa, sa rékonfòwté-y osi.

11. Kijan nou pé vin on zanmi yo pé fè konfyans ?

¹¹ Pou nou sé on zanmi yo pé fè konfyans, fò-nou aprann aji èvè pasyans. Lè mari a Zhanna lagé-y, i palé zanmi a-y dè sa i té ka rèsanti é sa rékonfòwté-y. I ka di konsa : « Yo pran tan kouté-mwen èvè onlo pasyans, menmsi an dwèt té ka répété sé menm biten-la chakfwa. » Vou osi, ou pé montré ou sé on vré zanmi si ou ka pran tan kouté lézòt byen.

12. Kimoun ki té Mawk, é kijan i montré i té paré pou sèvi lézòt ?

¹² Mawk sé té on krétyen juif ki té ka vin dè Jérizalèm. Toutmoun té konnèt kouzen a-y Bawnabé, ki té misyonè (Kol. 4:10). I ka sanm sa fanmi a Mawk té rich, men apapousa Mawk té ka mèt lajan é byen matéryèl prèmyé douvan an vi a-y. Tout vi a-y, Mawk montré i té kontan sèvi lézòt. Pa ègzanp, i édé lapòt Pòl é lapòt Pyè asimé sé rèsponsabilité-la yo té ni la plizyè fwa. Pétèt, i fè dé biten itil pou édé-yo kon touvé on koté pou yo rété é prévwa a manjé a yo (Akt 13:2-5 ; 1 Pyè 5:13). Pòl palé dè Mawk é i di kè sé on moun ki « travay ansanm-ansanm èvè[-y] pou wayòm a Bondyé » é ki sé « on èd ki ka ba-y plis fòs » (Kol. 4:11, nòt).

13. Kijan 2 Timoté 4:11 ka montré kè Pòl té kontan travay séryé la Mawk té ka fè la ?

¹³ Mawk vin bon bon zanmi a Pòl. Pa ègzanp, lè Pòl té lajòl pou dènyé fwa-la a Wòm, koté 65 a épòk an nou, i ékri on dézyèm lèt ba Timoté. Adan lèt-lasa, Pòl mandé Timoté vin a Wòm é menné Mawk èvè-y (2 Tim. 4:11). Si Pòl di Mawk vin pannan moman enpòwtan-lasa, sé pétèt pas i té kontan travay-la Mawk té fè la, on travay séryé. Mawk fè dé biten ki té itil ba Pòl. Pétèt i menné manjé ba-y é i menné sa i té bizwen pou ékri sé lèt-la i té ka ékri la. Asirésèten, èd-la é ankourajman-la Pòl rèsèvwa la édé-y andiré sé dènyé jou-la ki té ka rété-y la avan i té pran mò a-y.

14-15. Kijan Matyé 7:12 ka montré kè sa enpòwtan kè nou édé lézòt on mannyè ki itil ?

 ¹⁴ (Li Matyé 7:12.) Lè nou ka pasé penn é péripési, a pa ti kontan nou ka kontan lè moun ka fè dé biten itil pou nou ! Ryan, ki pèd pap’a-y adan on aksidan, ka di : « Lè ou ka soufè ou ni lenprésyon kè ni onpakèt biten ou abityé fè touléjou kè ou pé’é rivé fè ankò. Alò lè yo ka fè on biten itil ba-w, menmsi yo ka pansé a pa granzafè, ou ka kontan toubònman ! »

¹⁵ Si nou ka pran tan jété on koudzyé asi sitiyasyon a frè é sè an nou, sèten nou ké touvé dé biten itil a fè pou édé-yo. Talè-la nou palé dè Peter é Kathryn. An-nou wouvin asi ègzanp a yo. On sè propozé-yo édé-yo pou yo ay adan sé randévou-la yo té ni la aka dòktè-la. Konm Peter é Kathryn pa té pé menné vwati ankò, sè-la fè on pwogram. Konsa, sé frè é sè a lasanblé-la té’é pé menné-yo. Chak sé frè é sè-la té ni jou a yo. Ès sa té vréman itil ? Kathryn ka di : « Sé konsi yo té woté on gwo pwa asi zépòl an nou. » Pa jen oubliyé kè ou pé ankourajé lézòt lè ou ka édé-yo on mannyè ki itil, menmsi sé dé ti biten tousenp ou ka fè.

16. Ki biten enpòwtan ègzanp a Mawk ka aprann-nou asi mannyè nou pé konsolé lézòt ?

¹⁶ Mawk, ki ni lokazyon travay èvè Pòl, dwèt té byen okipé. I té ka travay onlo pou Jéova. Pa ègzanp, fò i té maké Lévanjil-la ki ka pòté non a-y la. Men magrésa, sa pa anpéché-y pran on tan pou i té rékonfòwté Pòl, é Pòl té sav i té pé konté asi Mawk. An-nou palé dè Angela konnyéla. Yo tchouyé mami a-y é i ni onlo rèkonésans pou moun ki konsolé-y pas yo soutyenn-li tou natirèlman. I di konsa : « Lè ou ni dé zanmi ki vlé vréman édé-w, ou ka santi yo ka mété-yo a dispozisyon a-w. Yo pa’a fè on pa douvan é dé pa dèyè konsi sé fòsé yo ka fòsé-yo. » Nou pé mandé-nou : « Ès yo pé di kè an sé on moun ki toujou paré a fè dé biten itil pou konsolé frè é sè an mwen ? »

17. Si nou ka pran tan réfléchi asi 2 Korentyen 1:3, 4, kijan sa pé ban-nou balan pou nou konsolé lézòt ?

¹⁷ Nou pa bizwen ay chèché lwen pou touvé frè é sè ki bizwen rékonfò. É pou édé-yo, nou pé sèvi èvè sa dòt moun di-nou pou rékonfòwté-nou. Mi sa Nino, on sè ki pèd gran-manman-y, ka di : « Jéova pé sèvi èvè nou pou konsolé lézòt si nou ka lésé-y itilizé-nou. » (li 2 Korentyen 1:3, 4). Nou palé dè Frances talè-la, mi sa i ka di : « Sa nou ka touvé adan 2 Korentyen 1:4 sé vérité ! Nou pé konsolé lézòt grasa ‘konsolasyon-la noumenm rèsèvwa la.’ »

18. a) Poukwa sèwten moun pè konsolé lézòt ? b) Ka nou pé fè pou rivé a konsolé lézòt ? Bay on ègzanp.

¹⁸ Menmsi nou pè, fò-nou chèché on mwayen pou édé lézòt. Pa ègzanp, pétèt nou pè pa touvé ka pou nou di oben ka pou nou fè pou édé on moun ki ka travèsé on bout-rèd. On ansyen, non a-y sé Paul, ka sonjé sa yo fè ba-y lè pap’a-y mò. I ka di konsa : « An té ka vwè sa pa té fasil pou yo dè vin palé ban mwen. Yo pa té sav ka pou yo té di-mwen. Men sa té ka touché-mwen lè an té ka vwè éfò yo té ka fè pou konsolé-mwen é pou édé-mwen. » Menmjan-la, Tajon, on frè ki viv on gwo tranmanntè ka di : « Franchman, an pa’a sonjé tout sé mésaj-la yo voyé ban mwen la jis apré tranmanntè-la. Men sa an ka sonjé, sé kè tèlman sé frè é sè-la té enkyèt pou mwen, yo té ka chèché a ni nouvèl an mwen. » Nou osi, nou ké réyisi konsolé lézòt, si nou ka montré kè nou ka sousyé-nou dè yo vréman.

19. Poukwa nou byen désidé a vin on « gran sous a konsolasyon » ?

¹⁹ Pannan dènyé jou a sistèm-lasa, pli nou k’ay, pli lavi ké vin rèd (2 Tim. 3:13). É nou ké toujou bizwen konsolasyon pas nou pa pawfè é pas nou ka fè érè. Yonn adan sé rézon-la ki fè kè lapòt Pòl réyisi rété fidèl tout vi a-y, sé pas i rèsèvwa konsolasyon a frè é sè a-y. An-nou vin fidèl kon Aristawk, on zanmi yo pé fè konfyans kon Tichik, é on moun ki paré a sèvi lézòt kon Mawk. Si nou fè sa, nou ké pé édé frè é sè an nou konsolidé fwa a yo (1 Tés. 3:2, 3).