1. Ano nga mabudlay nga mga sitwasyon ang naeksperiensiahan sang madamo nga matutom nga mga alagad ni Jehova?

SA BILOG nga kalibutan, madamo nga alagad ni Jehova ang nabalaka ukon nasubuan bangod sang ila mabudlay nga mga sitwasyon. Natalupangdan mo bala ini sa inyo kongregasyon? Ang pila ka kauturan may malala nga balatian ukon napatyan sang pinalangga. Nasubuan gid ang iban bangod nag-untat sa pag-alagad kay Jehova ang miembro sang ila pamilya ukon ang ila suod nga abyan. Ang iban naman nakaeksperiensia sang kalamidad. Tanan sila nagakinahanglan sang bulig kag paumpaw. Paano naton sila mabuligan?

2. Ngaa kinahanglan ni apostol Pablo ang bulig kon kaisa?

² Madamo nga beses nga nabutang sa katalagman ang kabuhi ni apostol Pablo. (2 Cor. 11:23-28) May ginbatas man sia nga “tunok sa unod,” nga posible isa ka balatian. (2 Cor. 12:7) Nasubuan man sia sang ginbayaan sia ni Demas, nga kaupod niya anay sa pag-alagad, “bangod ginhigugma [ni Demas] ini nga sistema sang mga butang.” (2 Tim. 4:10) Si Pablo isa ka maisog nga hinaplas nga Cristiano nga pirme nagabulig sa iban, pero nagaluya man ang iya buot kon kaisa.—Roma 9:1, 2.

3. Paano ginbuligan ni Jehova si Pablo?

³ Nakabaton sang bulig si Pablo. Paano? Sigurado gid nga gingamit ni Jehova ang Iya balaan nga espiritu para pabakuron sia. (2 Cor. 4:7; Fil. 4:13) Gingamit man ni Jehova ang iban nga Cristiano para buligan si Pablo. Nagsiling si Pablo nga ang pila niya ka masigkamanugpangabudlay ‘naghatag sing daku nga lugpay’ sa iya. (Col. 4:11) Nalakip sa iya ginsambit sanday Aristarco,  Tiquico, kag Marcos. Ginpabakod nila si Pablo kag ginbuligan sia nga magbatas. Ano nga mga kinaiya ang ginpakita sining tatlo ka Cristiano amo nga nabuligan nila sia? Paano naton mailog ang ila maayo nga halimbawa para mabuligan kag mapabakod naton ang isa kag isa?

4. Paano ginpakita ni Aristarco nga mainunungon sia nga abyan ni Pablo?

⁴ Nangin mainunungon nga abyan ni Pablo si Aristarco, isa ka Cristiano nga taga-Tesalonica, nga sakop sang Macedonia. Una nga ginsambit si Aristarco sa Biblia sang ginduaw ni Pablo ang Efeso sa iya ikatlo nga paglakbay bilang misyonero. Sang gin-updan ni Aristarco si Pablo, gindakop sia sang nagginamo nga mga tawo. (Binu. 19:29) Sang ginbuy-an sia sang ulihi, wala sia nalagyo para mahilway sa katalagman. Gin-unungan niya si Pablo. Pila ka bulan sang ulihi, gin-updan gihapon ni Aristarco si Pablo sa Gresya, bisan pa gusto patyon si Pablo sang iya mga kaaway. (Binu. 20:2-4) Sang mga 58 C.E. sang gindala sa Roma si Pablo nga isa ka bilanggo, gin-updan sia ni Aristarco sa malawig nga paglakbay, kag magkaupod sila sang naguba ang barko nga ila ginasakyan. (Binu. 27:1, 2, 41) Posible nga sang didto na sila sa Roma, may tion nga nabilanggo man sia kaupod ni Pablo. (Col. 4:10) Sigurado gid nga napabakod kag napalig-on si Pablo sang iya mainunungon nga abyan!

5. Suno sa Hulubaton 17:17, paano kita mangin mainunungon nga abyan?

⁵ Mailog naton si Aristarco kon unungan naton ang aton mga kauturan sa tanan nga tion, bisan sa “tion sang kalisdanan.” (Basaha ang Hulubaton 17:17.) Mahimo nga kinahanglan gihapon sang aton utod ang bulig bisan pa natapos na ang iya problema. Amo ini ang natabo sa isa ka sister nga si Frances. * Napatay ang iya mga ginikanan bangod sa kanser, una ang iya amay, dayon ang iya iloy pagligad sang tatlo ka bulan. Nagsiling sia: “Maapektuhan kita sang mabudlay nga mga pagtilaw sa malawig nga tion. Nagapasalamat gid ako sa akon mainunungon nga mga abyan kay kabalo sila nga nasubuan ako gihapon, bisan pa madugay na nga napatay ang akon mga ginikanan.”

6. Ano ang himuon naton kon mainunungon kita?

 ⁶ Nagasakripisyo ang mainunungon nga mga abyan para mabuligan ang ila mga kauturan. Halimbawa, ginsilingan sang doktor ang brother nga si Peter nga may malala sia nga balatian nga ikamatay niya. Ang iya asawa nga si Kathryn nagsiling: “Kaupod namon nga nagkadto sa doktor ang isa ka mag-asawa nga kakongregasyon namon sang mabal-an namon ang balatian ni Peter. Sadto mismo nga tion, nagdesisyon sila nga buligan kami sa amon mabudlay nga sitwasyon, kag ara gid sila pirme kon kinahanglan namon sila.” Makapabakod gid sa aton ang matuod nga mga abyan nga makabulig sa aton para mabatas naton ang mga pagtilaw!

7-8. Suno sa Colosas 4:7-9, paano ginpakita ni Tiquico nga masaligan sia?

⁷ Nangin masaligan gid nga abyan ni Pablo si Tiquico, isa ka Cristiano nga taga-distrito sang Asia, nga sakop sang Roma. (Binu. 20:4) Sang mga 55 C.E., gin-organisar ni Pablo ang pagpangolekta sang kuarta para buligan ang mga Cristiano sa Judea, kag mahimo nga ginpabulig niya si Tiquico sa sining importante nga asaynment. (2 Cor. 8:18-20) Sang ulihi, sang ginbilanggo si Pablo sa una nga tion, nangin mensahero niya si Tiquico. Gindala niya ang mga sulat ni Pablo kag ang iya mga mensahe nga nagapalig-on sa mga kongregasyon sa Asia.—Col. 4:7-9.

⁸ Sa pagligad sang tion, masaligan gihapon ni Pablo ang iya abyan nga si Tiquico. (Tito 3:12) Indi pareho kay Tiquico ang iban nga Cristiano sadto. Sang mga 65 C.E., sa ikaduha nga pagbilanggo kay Pablo, nagsulat sia nga madamo nga Cristiano sa probinsia sang Asia ang indi gusto makig-upod sa iya, posible bangod nahadlok sila sa mga nagapamatok. (2 Tim. 1:15) Pero masaligan ni Pablo si Tiquico kag ginhatagan niya sia sang isa pa ka asaynment. (2 Tim. 4:12) Sigurado gid nga nalipay si Pablo nga may maayo sia nga abyan pareho kay Tiquico.

9. Paano naton mailog si Tiquico?

⁹ Mailog naton si Tiquico kon mangin abyan kita nga masaligan sang iban. Halimbawa, wala lang kita nagapromisa nga buligan ang aton mga kauturan, kundi may ginahimo gid kita para mabuligan sila. (Mat. 5:37; Luc. 16:10) Mapabakod gid ang mga nagakinahanglan sang bulig kon kabalo  sila nga buligan naton sila. Ang isa ka utod nagsiling, “Kalmado ka kag wala nabalaka kay kabalo ka nga tumanon gid sang tawo nga nagpromisa ang ginsiling niya nga buligan ka.”

10. Suno sa Hulubaton 18:24, sin-o ang makapabakod sa mga may problema ukon sa mga nasubuan?

¹⁰ Masami nga mapabakod ang mga may problema ukon ang mga nasubuan kon isugid nila sa isa ka masaligan nga abyan ang ila ginabatyag. (Basaha ang Hulubaton 18:24.) Nasubuan gid si Bijay sang na-disfellowship ang iya bata nga lalaki. Nagsiling sia, “Gusto ko isugid sa isa nga masaligan ko ang akon ginabatyag.” Bangod sang sala nga nahimo ni Carlos, ginkuha ang iya ginapabaloran nga pribilehiyo sa kongregasyon. Nagsiling sia nga gusto niya isugid ang iya ginabatyag sa masaligan nga mga tawo nga indi magapakalain sa iya. Nagpalapit sia sa mga gulang, kag ginbuligan nila sia sa iya problema. Napaumpawan man sia kay kabalo sia nga indi pag-isugid sang mga gulang sa iban ang ginsiling niya sa ila.

11. Paano naton mapakita nga masaligan kita nga abyan?

¹¹ Dapat mangin mapinasensiahon ang isa ka masaligan nga abyan. Sang ginbayaan si Zhanna sang iya bana, napaumpawan sia sang ginsugid niya sa iya suod nga mga abyan ang iya ginabatyag. Nagsiling sia, “Mapinasensiahon sila nga nagapamati sa akon, bisan pa daw sulitsulit ang akon mga ginahambal.” Mangin maayo ka man nga abyan kon pamatian mo sing maayo ang imo abyan.

12. Sin-o si Marcos, kag paano niya ginpakita nga handa sia sa pag-alagad sa iban?

¹² Si Marcos isa ka Judiyo nga Cristiano nga taga-Jerusalem. Ang iya pakaisa nga si Bernabe isa ka kilala nga misyonero. (Col. 4:10) Mahimo gid nga manggaranon ang pamilya ni Marcos, pero ang kuarta kag mga pagkabutang indi ang pinakaimportante sa iya kabuhi. Sa bilog niya nga kabuhi, ginpakita niya nga handa sia sa pag-alagad sa iban. Nalipay gid sia sa paghimo sini. Halimbawa, madamo nga beses nga nag-alagad sia kaupod ni apostol Pablo kag ni apostol Pedro samtang ginahimo nila ang ila mga responsibilidad. Posible nga si Marcos ang nag-atipan sang ila mga kinahanglanon pareho sang pagkaon kag dalayunan. (Binu. 13:2-5; 1 Ped. 5:13) Nagsiling si Pablo nga si Marcos isa sa iya “mga masigkamanugpangabudlay para sa Ginharian sang Dios” kag “nagapabakod nga bulig” sa iya.—Col. 4:10, 11, footnote.

13. Ano ang ginasiling sang 2 Timoteo 4:11 nga nagapakita nga ginpabaloran ni Pablo ang matutom nga pag-alagad ni Marcos?

¹³ Nangin suod nga abyan ni Pablo si Marcos. Halimbawa, sang mga 65 C.E., sa katapusan nga pagbilanggo kay Pablo sa Roma, ginsulat niya ang iya ikaduha nga sulat kay Timoteo. Sa iya sulat, ginpangabay niya si Timoteo nga magkadto sa Roma kag updon si Marcos. (2 Tim. 4:11) Ginpabaloran ni Pablo ang matutom nga pag-alagad ni Marcos sang una amo nga ginpangabay niya nga updan sia ni Marcos sa sining mabudlay nga sitwasyon. Ginbuligan ni Marcos si Pablo, ayhan paagi sa pagdala sa iya sang pagkaon ukon mga gamit para sa iya pagsulat. Bangod sang bulig kag pagpalig-on nga nabaton ni Pablo, nakabatas sia asta sa iya kamatayon.

14-15. Ano ang ginatudlo sa aton sang Mateo 7:12 parte sa pagbulig sa iban?

¹⁴ Basaha ang Mateo 7:12. Kon ara kita sa mabudlay nga sitwasyon, nagapasalamat gid kita sa mga nagabulig sa aton. “Madamo sa mga ginahimo naton adlaw-adlaw ang daw indi na naton mahimo kon may problema kita,” siling ni Ryan, nga hinali lang nga napatyan sang amay bangod sang aksidente. “Makapabakod gid kon may maghatag sang bulig, bisan pa daw gamay lang ini.”

¹⁵ Kon nagaulikid kita sa aton mga kauturan  kag talupangdon naton ang ila kahimtangan, posible gid nga makakita kita sang mga paagi para mabuligan sila. Halimbawa, pareho sang ginsambit kaina, nagdesisyon ang mag-asawa nga buligan sanday Peter kag Kathryn, kag gin-asikaso sang asawa ang tanan nga iskedyul sa pagpabulong. Bangod indi na nila masarangan magmaneho, naghimo sang iskedyul ang asawa para makabulosbulos ang nagboluntaryo nga mga kauturan sa ila kongregasyon sa pagdul-ong kag pagsugat sa ila. Nakabulig bala ini? Si Kathryn nagsiling, “Daw nagmag-an ang amon ginapas-an.” Dumduma pirme nga mapabakod mo gid ang iban bisan sa simple lang nga paagi sang pagbulig sa ila.

16. Ano ang importante naton nga matun-an sa halimbawa ni Marcos parte sa pagbulig sa iban?

¹⁶ Sigurado gid nga masako nga Cristiano ang disipulo nga si Marcos nga nagkabuhi sang panahon ni Jesus. May mabug-at sia nga mga asaynment sa pag-alagad, kag lakip sa sini ang pagsulat sang Ebanghelyo ni Marcos. Pero may tion man si Marcos sa pagbulig kay Pablo, kag kabalo si Pablo nga mapangabay niya si Marcos nga buligan sia. Amo man sini ang nabatyagan ni Angela. Sang ginpatay ang isa ka miembro sang iya pamilya, nagpasalamat gid sia sa mga handa magbulig sa iya. “Mahapos magpalapit sa mga abyan nga gusto gid magbulig,” siling niya. “Wala sila nagaduhaduha sa pagbulig.” Mahimo kita mamangkot, ‘Kilala bala ako nga handa magbulig sa akon mga kauturan?’

17. Kon pamalandungan naton ang 2 Corinto 1:3, 4, paano kita sini mapalig-on nga magbulig sa iban?

¹⁷ Madamo sang kauturan nga nagakinahanglan sang bulig. Para mabuligan sila, puede naton sundon ang ginhimo sang iban sa pagbulig sa aton. Si Nino, isa ka sister nga napatyan sang lola, nagsiling: “Puede kita gamiton ni Jehova para mapabakod ang iban kon hatagan naton sia sang kahigayunan.” (Basaha ang 2 Corinto 1:3, 4.) Si Frances, nga ginsambit kaina, nagsiling: “Matuod ang ginasiling sang 2 Corinto 1:4. Puede naton gamiton sa pagpalig-on sa iban ang ginpalig-on sa aton.”

18. (a) Ngaa daw nagaduhaduha ang iban sa pagbulig? (b) Paano kita makabulig gid sa iban? Maghatag sing halimbawa.

¹⁸ Dapat kita mangita sang mga paagi sa pagbulig  sa iban bisan pa daw nagaduhaduha kita. Halimbawa, basi indi kita kabalo kon ano ang isiling ukon himuon sa isa nga ara sa mabudlay nga sitwasyon. Nadumduman pa sang gulang nga si Paul ang pagtinguha sang iban para mapaumpawan sia sang napatay ang iya amay. “Nakita ko nga nagapalibog man sila kon paano ako istoryahon,” siling niya. “Indi sila kabalo kon ano ang isiling sa akon. Pero ginpasalamatan ko sila gihapon kay gusto nila ako paumpawan kag buligan.” Sang naeksperiensiahan sang brother nga si Tajon ang mabaskog nga linog, nagsiling sia: “Sa tuod lang, indi ko na madumduman ang tanan nga mensahe nga ginpadala sa akon sang mga tawo pagkatapos sang linog, pero madumduman ko nga nagaulikid gid sila kag ginsigurado nila nga wala ako maano.” Makabulig gid kita sa iban kon ipakita naton nga nagaulikid kita sa ila.

19. Ngaa dapat kita mangin “nagapabakod nga bulig” sa iban?

¹⁹ Bangod malapit na ang katapusan sini nga sistema, magalain pa gid ang kahimtangan sa kalibutan kag magabudlay pa gid ang kabuhi. (2 Tim. 3:13) Padayon man kita nga magakinahanglan sang bulig bangod indi kita perpekto kag pirme kita makasala. Ang isa sa mga rason nga nakabatas si apostol Pablo kag nakapabilin nga matutom asta sa iya kamatayon amo nga ginbuligan sia sang iya mga kauturan. Gani kabay pa nga mangin mainunungon kita pareho kay Aristarco, masaligan pareho kay Tiquico, kag handa sa pag-alagad sa iban pareho kay Marcos. Kon ipakita naton ini nga mga kinaiya, mabuligan naton ang aton mga kauturan nga padayon nga mag-alagad sing matutom kay Jehova.—1 Tes. 3:2, 3.