1. Nama penusah ke ngasuh mayuh nembiak Jehovah irau tauka tusah ati?

DI SERATA dunya, mayuh nembiak Jehovah napi utai ke ngasuh sida irau tauka tusah ati. Kati nuan bisi beratika tu ba eklisia nuan? Sekeda bala menyadi napi penyakit ti balat tauka pemati orang ti dikesayau. Bisi nya balat tusah ati ketegal seiku ari diri sebilik tauka bakih rapat udah ngetu nyembah Jehovah. Bisi sekeda nya merinsa ketegal ditinggang pengerusak alam. Semua bala menyadi nya begunaka pengelantang ba ati. Baka ni kitai ulih nulung sida?

2. Nama kebuah rasul Paul kadang-kadang begunaka pengelantang ba ati?

² Rasul Paul suah napi penusah ke tau ngasuh lenyau nyawa. (2 Kor. 11:23-28) Iya mega patut natka “sebengkah penyakit.” (2 Kor. 12:7) Lalu Paul mega natka ati ti asa lebuh Demas ke kala sama bekereja enggau iya ke Tuan, ninggalka iya laban angkunka dunya. (2 Tim. 4:10) Taja pan Paul nya menyadi Kristian ti berani sereta gerah jari nulung orang bukai, tang kadang-kadang iya berasai lemi sereta asa.—Rom. 9:1, 2.

3. Baka ni Jehovah nyukung sereta ngelantangka ati Paul?

³ Paul bulih sukung enggau pengelantang ba ati ke diguna iya. Baka ni iya bulih nya? Jehovah tentu ngena roh kudus ngeringka iya. (2 Kor. 4:7; Plp. 4:13) Jehovah mega ngena bala menyadi Kristian ke bukai ngelantangka ati iya. Paul ngumbai sida, orang ke “ngelantangka ati” iya. (Kol. 4:11) Sekeda ari  sida nya Aristarkus, Tikikus, enggau Mark. Sida tiga ngeringka Paul sereta nulung iya betan. Nama kualiti ke nulung sida tiga nemu meransang orang? Baka ni kitai ulih neladan sida lebuh ngelantangka ati sereta meransang pangan diri?

4. Baka ni Aristarkus nunjukka diri bakih ti taluk ke Paul?

⁴ Aristarkus nya orang Masedonia ke datai ari Tesalonika. Iya menyadi Kristian ke nyadi bakih ti taluk ke Paul. Kitai keterubah iya macha pasal Aristarkus lebuh Paul nemuai ke Epesus. Maya nya Paul bejalaika pengawa nyadi pengerintis seberai tasik ketiga kali. Lebuh Aristarkus enggau Paul, iya ditangkap seraban orang ke jai. (SKR. 19:29) Pengudah dilepaska, iya enda nyeliahka diri ari utai ti tau nganu nyawa iya. Iya mengkang enggau Paul. Beberapa bulan udah nya, lebuh ba menua Gerika, Aristarkus agi enggau Paul taja pan bala penyakal majak nguji deka munuh Paul. (SKR. 20:2-4) Ba urung 58 M., lebuh Paul dianjung ngagai rumah jil ba Rome, Aristarkus sama enggau Paul mansang kin. Lalu seduai iya sama napi penusah ditabanka kapal karam lebuh mansang kin. (SKR. 27:1, 2, 41) Lebuh ba Rome, Aristarkus dijil enda lama enggau Paul. (Kol. 4:10) Paul tentu berasai lantang sereta diperansang ketegal bisi bakih ti taluk baka Aristarkus!

5. Nitihka Jaku Dalam 17:17, baka ni kitai ulih nyadi bakih ti taluk?

⁵ Kitai ulih nyadi bakih ti taluk baka Aristarkus lebuh kitai mengkang enggau bala menyadi Kristian, enda ngira nya ba maya ti senang tauka tusah. (Bacha Jaku Dalam 17:17 ari nota kaki.) * Indah lebuh penusah nadai agi, sida engka agi begunaka pengelantang ba ati. Ambika chunto, Frances * ke udah lenyau apai indai ketegal penyakit riman dalam kandang tiga bulan, madahka: “Penusah ti balat ulih ngasuh kitai lama merinsa. Lalu aku beterima kasih ngagai bala bakih ti taluk laban sida  nemu aku agi tusah ati taja pan apai indai udah lama nadai.”

6. Enti kitai taluk ngagai bakih, nama deka digaga kitai ngagai sida?

⁶ Bakih ti taluk ngena jam enggau pengering sida nulung bala menyadi. Ambika chunto, Menyadi Peter ditemu kena penyakit ti raya ke tau nabanka nyawa. Bini iya, Kathryn, madahka: “Sepasang laki bini ba eklisia mai kami duai betemu enggau lutur. Maya nya meh kami nemu Peter kena penyakit ti raya. Berengkah ari sehari nya, seduai iya enda ngelakka kami napi penusah nya kediri, lalu seduai iya seruran enggau kami lebuh kami begunaka tulung.” Kitai tentu gaga ati enti bisi bakih ti taluk ke ulih nulung kitai betan lebuh kitai napi penusah!

7-8. Nitihka Kolosi 4:7-9, baka ni Tikikus nunjukka diri bakih ti tau dikearapka?

⁷ Tikikus nya seiku menyadi Kristian ari menua Asia ke dipegai Rome. Iya bakih ti tau dikearapka Paul. (SKR. 20:4) Kira-kira ba taun 55 M., Paul ngatur pengawa ngumpul duit kena nulung bala menyadi ba Judea, lalu iya engka ngemendarka Tikikus nulung ba pengawa tu. (2 Kor. 8:18-20) Lebuh Paul baru dijil ba Rome, Tikikus ngarika Paul. Iya mai surat enggau pesan ari Paul kena meransang bala menyadi Kristian ba Asia.—Kol. 4:7-9.

⁸ Tikikus mengkang nyadi bakih ti tau dikearapka Paul. (Tit. 3:12) Maya nya ukai semua orang Kristian tau dikearapka baka Tikikus. Kira-kira ba taun 65 M., lebuh Paul kedua kali dijil, Paul nulis pasal mayuh menyadi Kristian ba menua Asia ke nyeliahka diri ari iya. Nya engka ketegal sida takutka bala penyakal. (2 Tim. 1:15) Tang, Paul ulih arapka Tikikus lalu meri iya siti agi pengawa. (2 Tim. 4:12) Paul tentu gaga ati bisi bakih ti manah baka iya.

9. Baka ni kitai ulih neladan Tikikus?

⁹ Kitai neladan Tikikus lebuh nyadi bakih ti tau dikearapka. Ambika chunto, kitai ukai semina besemaya deka nulung bala menyadi ke begunaka bantu. Tang kitai mega deka ngereja  utai ke patut kena nulung sida. (Mat. 5:37; Luk. 16:10) Lebuh sida ke begunaka bantu nemu diri ulih arapka kitai, sida berasai lantang. Ku seiku menyadi Kristian indu madahka kebuah iya: “Nuan enda ibuh irau maya orang nya udah besemaya deka nulung, laban iya tentu ngamatka semaya nya.”

10. Baka ke dipadah ba Jaku Dalam 18:24, ari sapa sida ke napi penusah tauka ati ti asa tau bulih pengelantang?

¹⁰ Sida ke napi penusah tauka asa ati bulih pengelantang lebuh berandau enggau bakih ti tau dikearap. (Bacha Jaku Dalam 18:24.) Ku Menyadi Bijay madah pengudah anak lelaki iya dibuai ari eklisia: “Aku deka madah ngagai orang ke tau dikearap pasal utai ke diasaika aku.” Seiku agi menyadi, iya nya Menyadi Carlos, udah ngereja siti penyalah. Ketegal nya iya enda ulih megai tanggung pengawa ba eklisia. Ku iya madah: “Aku deka madahka asai ati diri ngagai orang ke tau dikearapka, laban orang ke baka nya enda ngakim enggau runding ti salah.” Iya tetemuka orang ke tau dikearapka, iya nya bala tuai gempuru ke ulih enggau iya berandau. Sida nulung iya mutarka penanggul iya. Iya mega berasai lantang laban nemu sida enda madahka utai ke disebut iya ngagai orang bukai.

11. Baka ni kitai ulih nyadi bakih ti tau dikearapka?

¹¹ Ngambika ulih nyadi bakih ti tau dikearap, kitai patut ngemansangka ulah ti sabar. Lebuh Zhanna ditinggalka laki iya, iya bulih pengelantang lebuh bekunsika asai ati diri ngagai bala bakih ke rapat enggau iya. Ku iya madah: “Sida sabar mendingka aku taja pan aku suah nyebut penanggul ti sama.” Nuan mega ulih nunjukka diri bakih ti tau dikearap enti nyadi peninga ti manah.

12. Sapa Mark? Baka ni iya nunjukka diri deka nulung?

¹² Mark nya orang Kristian bansa Judah ari Jerusalem. Iya petunggal Barnabas. Barnabas nya pengerintis seberai tasik ke dikelala orang. (Kol. 4:10) Sida Mark sebilik nya orang ke pemisi, tang Mark enda ngenuluka duit enggau reta ba pengidup. Ari pengidup diri, Mark nunjukka ulah ti deka nulung. Iya gaga ati enti ulih nulung orang bukai. Ambika chunto, lebuh rasul Paul seduai Peter bejalaika tanggung pengawa, kadang-kadang Mark bisi enggau seduai iya. Mark engka nulung meli pemakai sereta ngiga endur alai diau ke sida. (SKR. 13:2-5; 1 Pet. 5:13) Paul ngumbai Mark nya menyadi Kristian ‘ke bekereja enggau [iya] ke Perintah Petara.’ Mark mega udah “ngelantangka ati” iya.—Kol. 4:10, 11.

13. Baka ni 2 Timoti 4:11 nunjukka Paul beterima kasihka pengawa ke digaga Mark?

¹³ Mark nyadi bakih rapat ke Paul. Ambika chunto, ba urung taun 65 M., lebuh ke penudi iya Paul dijil ba Rome, iya nulis surat ti kedua ngagai Timoti. Dalam surat nya, Paul minta Timoti ngagai Rome lalu mai Mark. (2 Tim. 4:11) Paul tentu beterima kasihka pengawa ti udah digaga Mark. Nya alai iya minta Mark enggau iya ba maya ti tusah nya. Mark engka nulung nyediaka pemakai tauka gulung surat enggau dawat ke Paul. Sukung enggau peransang ke diulih Paul tentu nulung iya betan nyentuk ngagai maya iya diukum bunuh.

14-15. Nama diajar Matthew 7:12 pasal chara kitai ulih nulung orang bukai?

¹⁴ Bacha Matthew 7:12. Lebuh napi penusah kitai tentu beterima kasih ngagai orang ke nulung kitai! Ku Ryan madah pasal asai ati iya lebuh apai iya ngenyit mati: “Lebuh kitai tusah ati, kitai enda ulih ngereja mayuh utai. Tang lebuh orang bisi nulung kitai taja pan utai ke digaga sida nya mit aja, nya ulih ngasuh ati kitai berasai lantang.”

¹⁵ Enti kitai beratika utai ke diguna orang,  kitai tentu ulih tetemuka chara kena nulung sida. Ambika chunto, seiku menyadi Kristian indu mutuska deka nulung Peter seduai Kathryn ke bisi disebut tadi, ngambika seduai iya ulih betemu enggau lutur. Peter seduai Kathryn enda ulih deriba agi. Nya alai menyadi Kristian indu nya ngaga jadual ke bala menyadi ngambika ulih nulung nyediaka perengka pengangkut ke Peter seduai Kathryn. Kati pengawa tu ulih mujur? Ku Kathryn madah: “Penusah ke diasaika kami baka ke nadai agi.” Kingatka meh, taja pan tulung ke diberi nuan nya baka ke mit, tang nya ulih ngelantangka ati orang bukai.

16. Ari teladan Mark, nama ulih dipelajar kitai pasal ngelantangka ati orang ke tusah?

¹⁶ Mark nya tentu menyadi Kristian ke kisuk. Iya bisi sekeda pengawa ti besai ari Jehovah. Nya nyengkaum nulis bup Injil Mark. Taja pia, Mark ngena sekeda awak iya ngelantangka ati Paul lalu Paul nemu diri ulih minta tulung ari iya. Ambika chunto, seiku ari sida Angela sebilik mati dibunuh orang. Angela beterima kasih ngagai sida ke ngelantangka ati iya. Ku iya madah: “Enti bala bakih amat deka nulung, sida nyamai dibai berandau. Sida enda nangi tauka kakang ati deka nulung.” Kitai ulih nanya diri empu: ‘Ba mata orang bukai, kati aku nya orang ke deka nulung bala menyadi ke kena penusah?’

17. Baka ni belematika 2 Korint 1:3, 4 ulih meransang kitai ngelantangka ati orang?

¹⁷ Enda tusah kitai deka nemu bala menyadi ke begunaka jaku ti ngelantangka ati. Indah kitai ulih bekunsika jaku peransang ti dikena orang meransang kitai. Peratika utai ke nyadi ba seiku menyadi Kristian indu ke benama Nino. Ini iya udah nadai. Ku Nino madahka: “Jehovah ulih ngena kitai ngelantangka ati orang enti kitai ngawakka diri dikena Iya.” (Bacha 2 Korint 1:3, 4.) Ku Frances, ke bisi disebut tadi, madahka: “Jaku ba 2 Korint 1:4 endang amat. Lebuh kitai bulih jaku peransang ari orang bukai, kitai ulih bekunsika jaku sida nya enggau orang bukai.”

18. (a) Nama kebuah sekeda orang irau deka ngelantangka ati orang? (b) Baka ni kitai ulih mujur ngelantangka ati orang? Padahka siti chunto.

 ¹⁸ Kitai patut ngiga chara kena nulung orang ke tusah ati taja pan kitai engka enda tentu nemu utai ke deka disebut tauka digaga. Seiku tuai gempuru ke benama Paul agi ingatka baka ni sekeda bala menyadi nguji ngelantangka ati iya pengudah apai iya nadai. Ku iya madah: “Lebuh bala menyadi datai lalu deka ngelantangka ati aku, aku nemu nya enda senang ba sida. Tang aku beterima kasihka pengeran sida ke deka nulung sereta ngelantangka ati aku.” Pia mega enggau menyadi lelaki ke benama Tajon. Pengudah napi tanah berenyang ti balat, ku iya madah: “Aku enda tentu ingat ke tiap iti jaku peransang ke diterima aku ari bala menyadi. Tang aku ingatka pengibuh ke diayanka sida.” Kitai ulih mujur ngelantangka ati orang enti kitai ngayanka diri ibuh.

19. Nama kebuah nuan keran deka ngelantangka ati orang?

¹⁹ Ketegal kitai majak semak enggau pengujung dunya, gaya utai ba dunya deka majak jai-sejai lalu pengidup kitai deka majak tusah. (2 Tim. 3:13) Lalu kitai deka terus begunaka jaku peransang laban kitai semua enda sempurna sereta seruran ngereja penyalah. Siti kebuah rasul Paul ulih betan nyentukka mati iya nya, laban bisi bala menyadi Kristian ke ngelantangka ati iya. Aram meh kitai nyadi orang ti taluk baka Aristarkus, tau dikearap baka Tikikus, sereta deka nulung baka Mark. Enti kitai neladan sida tiga, kitai ulih nulung bala menyadi Kristian kitai mengkang nyembah Jehovah enggau tetap ati.—1 Tes. 3:2, 3.