1. Maukaro musinke goudigu vana kuligwanekera nago vakareli vaJehova wovanzi?

SINZI sovakareli vaJehova mouzuni mudima kuna kuligwanekera nomaudigu aga gana kuvaguvisa nokuvaninkisa va kare nosinka. Nampo wa diva ko vamwe mombungakriste zeni. Vakriste vamwe kuna kuvera unene ndi vana guwu morwa gumwe ogu va hara ga dogoroka. Vamwe vana guwu unene morwa kaume gwawo ndi gumwe gekoro lyawo ga hageka kukarera Jehova. Vamwe kuna kuhepa morwa kwa ligwanekera noyimpagwa. Vanavazinyetu owo vana hepa ehengagwido. Ngapi omu natu vhura kuvavatera?

2. Morwasinke Paurusa ga heperere ehengagwido?

² Mupositoli Paurusa kwa ligwanekerere nomaukaro aga ga tulire eparu lyendi mosiponga. (2 Kol. 11:23-28) Age ga hepere hena kulididimikira “nsonga morutu,” ndi nampo uvera ou ga kere nawo. (2 Kol. 12:7) Age hena kwa guvire apa Demasa, ogu nga rugana kumwe nage ga mu zumbire ‘morwa [Demasa] kwa dowokerere unene uzuni wantani.’ (2 Tim. 4:10) Paurusa kwa kere mugwavekwa gouradi ogu nga vatere vakwawo, nye nage poyiruwo yimwe nga guwu.—Rom. 9:1, 2.

3. Kwalye ga gwene Paurusa ehengagwido?

³ Paurusa kwa gwene ehengagwido eli ga hepere. Monkedi musinke? Jehova kwa ruganesere mpepo zendi zokupongoka yipo zi mu nkondopeke. (2 Kol. 4:7; Fil. 4:13) Jehova kwa hengagwidire hena Paurusa kupitira moVakriste vakwawo. Paurusa kwa tente asi vapuli vakwawo vamwe kwa mu ‘kwefe unene.’ (Koros. 4:11) Vamwe ava ga tumbwire ava va mu kwefe kuna kara Alisitarekusi, Tikikusi naMarukusa. Awo kwa kwefe Paurusa, ano eyi kwa mu vaterere a lididimikire  maudigu. Yikara musinke ya vaterere Vakriste owo vatatu yipo va kwafe Paurusa? Ngapi omu natu va honena nsene kuna kuhengagwida vakwetu?

4. Ngapi omu Alisitarekusi ga yi likidire asi age kwa kere kaume gwaPaurusa gomulimburukwi?

⁴ Mukriste goMumakedoniya gomoTesaronika gedina Alisitarekusi, kwa kere kaume gwaPaurusa gomulimburukwi. Sikando sokuhova atu resa kumuhamena kuna kara apa Paurusa ga ka dingwire sitata saEfeso morugendo rwendi rwautatu routumwa. Apa ga zire kumwe naPaurusa mositata oso, Alisitarekusi kwa ka mu kwete mbunga zovantu. (Yirug. 19:29) Apa va mu sigire, age kapi ga hendaukire nye kwa twikilire kukara kumwe naPaurusa. Konyima zomakwedi gongandi apa Paurusa ga kere moGereka, Alisitarekusi kwa twikilire simpe kukara naPaurusa nampili ngomu nonkore dendi da here kumudipaga. (Yirug. 20:2-4) Koyiha yomvhura 58, apa Paurusa va mu tumine a ze koRoma ngomunadorongo, Alisitarekusi kwa zire kumwe nage morugendo oro rorure ntani apa sa tekere sikepa, awo kumwe va kere. (Yirug. 27:1, 2, 41) Ayo kumoneka asi apa va ka sikire koRoma, Alisitarekusi kwa ka kere modorongo kumwe naPaurusa ure wongandi. (Koros. 4:10) Mokumona asi Paurusa kwa kere nakaume gomulimburukwi, ayo kwa mu korangedere nokumuhengagwida!

5. Kuliza noYisewe 17:17, ngapi omu natu yi likida asi ose vakaume wovalimburukwi?

⁵ Ngwendi Alisitarekusi, nose kuvhura kuyilikida asi ose vakaume wovalimburukwi pokutwikira kukara kumwe novanavazinyetu moyiruwo yoyiwa ntani nomoyiruwo ‘youdigu.’ (Resa Yisewe 17:17.) Vanavazinyetu simpe va hepa ehengagwido nampili udigu wawo nare wa haga. Munazinyetu Frances * ogu ga zumbanesere vakurona vendi navenye momakwedi gatatu kwa tanta asi: “Maudigu gomanene kutukundama siruwo sosire. Ame kuyihafera apa vakaume vange wovalimburukwi ava diworoka asi ame simpe kuna kuzuvha kukora  nampili ngomu pwa pita siruwo sosire kutunda apa va dogorokere vakondi vange.”

6. Yisinke ngatu rugana nsene ose vakaume wovalimburukwi?

⁶ Vakaume wovalimburukwi kulizambera yipo va vatere vapuli vakwawo. Pasihonena, munazinyetu gedina Peter kwa mu tanterere ndokotora asi ga kara nouvera ou nga u mu twaredesa konomfa. Mukadendi Kathryn kwa tanta asi: “Valikwali womombungakriste zetu kwa tu twere kwa ndokotora ogu ga ka tu tanterere kuhamena uvera waPeter. Kutunda opo, awo kwa tokwere asi ngava twikira kutuvatera tu lididimikire udigu ou. Awo kwa twikira kutuvatera poyiruwo nayinye eyi twa va hepere.” Yosili, ayo kuhengagwida nsene tu kara novakaume wovawa ava ava tu vatere tu lididimikire maudigu getu!

7-8. Kuliza noVakorosi 4:7-9, ngapi omu Tikikusi ga yi likidire asi age kwa kere kaume gokuhuguvara?

⁷ Mukriste gomoAsia gedina Tikikusi kwa kere kaume gwaPaurusa ogu ga huguvarere. (Yirug. 20:4) Koyiha yomvhura 55, apa Paurusa ga tulire po ewapaiko lyokupongaika yigava yipo va vatere Vakriste womoJudeya, age nampo kwa ruganesere Tikikusi a mu vatere nosirugana esi somulyo. (2 Kol. 8:18-20) Konyima, apa Paurusa ga kere modorongo moRoma sikando sendi sokuhova, age nga ruganesa Tikikusi yipo a tume nombudi. Tikikusi nga twara nombilive daPaurusa ntani nonombudi dokukorangeda konombungakriste domoAsia.—Koros. 4:7-9.

⁸ Tikikusi kwa twikilire kukara kaume gwaPaurusa ogu ga huguvarere. (Tit. 3:12) Posiruwo simwe, vakriste navenye kapi va kere vantu wokuhuguvara ngwendi Tikikusi. Koyiha yomvhura 65, apa Paurusa ga kere modorongo moRoma sikando sauvali, age kwa tjenge asi Vakriste wovagara womoAsia kwa ligusire ko kwendi, nampo morwa kwa tjilire varwanesi usili. (2 Tim. 1:15) Mokulisiga, Paurusa kwa huguvarere Tikikusi ntani age kwa mu pere hena situmbukira simwe. (2 Tim. 4:12) Yosili, Paurusa kwa hefe kweyi ga kere nakaume gomuwa ngwendi Tikikusi.

9. Ngapi omu natu honena Tikikusi?

 ⁹ Kuvhura tu honene Tikikusi pokukara vakaume wokuhuguvara. Pasihonena, ose kapi tupu atu tumbwidire vanavazinyetu asi ngatu va vatera, nye ose kurugana ko yuma yipo tu va vatere. (Mat. 5:37; Ruk. 16:10) Nsene vanavazinyetu ava vana hepa evatero va diva asi ngatu va vatera, ayo kuvhura kuvahengagwida. Munazinyetu gumwe gomukadi kwa tanta asi: “Ayo kuhengagwida nsene o diva asi muntu ogu ga ku tumbwidira asi nga ku vatera, nga sikisa mo eyi ga tumbwidira.”

10. Kuliza noYisewe 18:24, kwalye nava gwana ehengagwido vantu ava vana guwu ndi vana kuligwanekera nomaudigu?

¹⁰ Vantu ava vana guwu ndi vana kuligwanekera nomaudigu kuvhura kugwana ehengagwido kovakaume vawo ava va huguvara. (Resa Yisewe 18:24.) Pasihonena, munazinyetu Bijay kwa guvire sili unene apa munendi va mu gusire mombunga. Age kwa tanta asi: “Ame na hepere kutantera gumwe ogu na huguvara kuhamena omu nina kulizuvha.” Carlos kwa zumbanesa situmbukira mombungakriste morwa kwa tulire epuko. Age kwa tanta asi: “Ame kwa here muntu ogu nani tantera omu nina kulizuvha na hana kukara nosinka asi na pangura nge.” Carlos kwa gwene ehengagwido kovakuronambunga ava va mu vaterere a lididimikire udigu wendi. Ntani age kwa gwene hena ehengagwido morwa ga yi divire asi vakuronambunga kapi ngava tantera wopeke eyi ga va tanterere.

11. Ngapi omu natu vhura kukara kaume gokuhuguvara?

¹¹ Mokukara kaume gokuhuguvara, twa hepa kukara nelididimiko. Apa Zhanna ga mu sigire mugara gwendi, age kwa gwene ehengagwido pokutantera vakaume vendi ava ga huguvarere omu ana kulizuvha. Age kwa tanta asi: “Awo kwa purakenene nge nelididimiko nampili ngomu na rugurukire kuvatantera yokulifana yikando yoyinzi.” Nove kuvhura kukara kaume gomuwa pokupurakena nawa.

12. Yilye Marukusa ntani ngapi omu ga yi likidire asi age kwa here kuvatera wopeke?

¹² Marukusa kwa kere Mukriste goMujuda gomoJerusarema. Age kwa kere ekoro lyaBaranabasa, ogu ga kere mutumwa. (Koros. 4:10) Ayo kumoneka asi epata lyoMarukusa kwa kere nongawo, nye yimaliwa nemona kapi ya kere nomulyo unene kwaMarukusa. Meparu lyendi nalinye, age kwa vaterere wopeke ntani ayo kwa mu hafesere. Pasihonena, apa mupositoli Paurusa ntani mupositoli Peturusa va kere mosirugana sawo, Marukusa nampo nga va randere nondya ntani nokuvapaparera oku nava rara nayimwe hena. (Yirug. 13:2-5; 1 Pet. 5:13) Paurusa kwa tente asi Marukusa kwa kere gumwe ‘govarugani woVajuda woUntungi waKarunga’ ntani ngava mu ‘kwafa unene.’—Koros. 4:10, 11.

13. Ngapi omu 2 Timoteusa 4:11, azi likida asi Paurusa kwa haferere eyi nga rugana Marukusa?

¹³ Marukusa kwa ya kere kaume gomunene gwaPaurusa. Pasihonena, apa Paurusa ga kere modorongo sikando sendi sokuhulilira koyiha yomvhura 65, age kwa tjagerere Timoteusa mbilive zendi zauvali. Mombilive ozo, age kwa hundilire Timoteusa a ze koRoma, ntani a piture Marukusa. (2 Tim. 4:11) Paurusa kwa haferere eyi nga rugana Marukusa, eyi yiyo ga mu zigidilire a ya kare nage posiruwo soudigu. Marukusa nga vatere Paurusa mononkedi dokulisiga-siga, nampo pokumurandera nondya ntani noyininke eyi nga tjangesa nombilive. Ekorangedo nevatero eli ga gwene Paurusa nampo kwa mu vaterere yipo a lididimikire mazuva aga ga hupire ko komeho va ka mu dipage.

14-15. Yisinke a li tu rongo etjangwa lyaMateusa 7:12, kuhamena kuvatere wopeke?

 ¹⁴ Resa Mateusa 7:12. Apa atu kara nomaudigu, ayo kutuhafesa apa vakwetu ava tu vatere. Ryan ogu ga fisire oguhwe kehudi lyetuwa kwa tanta asi: “Yininke yinzi no dira kuvhura kurugana nsene kuna kuhepa.” Age kwa tanta hena asi: “Ayo kuhengagwida nsene gumwe a ku ruganena nampili yoyinunu.”

¹⁵ Nsene tu purakena nawa nokunomena, ose ngatu diva omu natu vhura kuvatera wopeke. Pasihonena, munazinyetu gumwe gomukadi kwa rugene ko yuma yipo a vatere Peter naKathryn ava tuna tumbura pomuhowo, yipo va vhure kuza nkenye apa kwandokotora. Peter naKathryn kapi ngava vhuru kusinga hena, yipo nye munazinyetu gomukadi ogo kwa rugene elikwamo yipo vanavazinyetu wokulisiga-siga womombungakriste zawo vava vatere nougendero. Ewapaiko eli lya va vaterere ndi? Kathryn kwa tanta asi: “Ose kwa lizuvhire ngwendi kuna tu gusa mudigo gwetu.” Diworoka asi kuvhura o hengagwide wopeke nampili kuna va ruganene yininke yoyinunu.

16. Yisinke natu lirongera ko kosihonena saMarukusa kuhamena kugava ehengagwido?

¹⁶ Murongwa gwaJesus gedina Marukusa kwa kere noyirugana yoyinzi. Age kwa kere noyitumbukira yoyinzi, kukwatera mo kutjanga Evangeli lyaMarukusa. Nampili ngoso, age kwa litulilire po siruwo yipo a kwafe Paurusa ntani Paurusa ga yi divire asi kuvhura a pure Marukusa a mu vatere. Munazinyetu Angela kupandura ava va mu hengagwidire apa gumwe gekoro lyendi va mu dipagere. Age kwa tanta asi: “Nsene vakaume woge vana hara sili kukuvatera, ayo ureru kuvahedera. Awo kuyilikida asi vana hara kukuvatera ntani kapi ava kara nowoma wokuyirugana.” Lipura nyamoge asi: ‘Vantu kwa diva nge asi ame kwa hara kuhengagwida vapuli vakwetu mononkedi dokulisiga-siga ndi?’

17. Ngapi omu 2 Vakolinte 1:3, 4, azi tu tumageda tu hengagwide wopeke?

¹⁷ Ayo ureru kugwana vanavazinyetu ava  vana hepa ehengagwido. Kuvhura tu ruganese nonkango edi va tu korangedesere yipo nose tu hengagwidise ko wopeke. Munazinyetu Nino, ogu ga dogorokesa ozinakuru kwa tanta asi: “Jehova kuvhura kuturuganesa tu hengagwide vakwetu nsene tu mu pulisira a tu ruganese.” (Resa 2 Vakolinte 1:3, 4.) Frances ogu tuna tumbura pomuhowo kwa tanta asi: “Nonkango domo-2 Vakolinte 1:4, usili. Nose kuvhura tu hengagwide wopeke pokuruganesa nonkango ndi monkedi omu va tu vaterere wopeke.”

18. (a) Morwasinke vamwe ayi va digoperere kugava ehengagwido? (b) Ngapi omu natu hengagwida wopeke? Gava sihonena.

¹⁸ Twa hepa kurugana ko yuma yipo tu hengagwide wopeke nampili yi tu karere udigu. Pasihonena, kuvhura tu kare nowoma kuhamena eyi natu ka uyunga ndi eyi natu ka ruganena ogu ana kara noudigu. Munazinyetu gomukuronambunga gedina Paul kudiworoka eyi va rugene vamwe ava va hetekerere ko kumuhengagwida apa ga fisire oguhwe. Age kwa tanta asi: “Ame na yi dimbwilire asi ayo kapi ya kere ureru kwawo mokuhengagwida nge. Awo kapi va divire eyi nava uyunga. Nye ame kwa yihaferere pokuvamona asi vana hara kuhengagwida nge.” Konyima zokuligwanekera nekankamo lyevhu, munazinyetu Tajon kwa tente asi: “Ame kapi nina kudiworoka nombudi edi va tuminine nge vantu konyima zekankamo lyevhu, nye ame kuna kudiworoka asi awo va kere nosinka kuhamena omu nina karere.” Nose kuvhura yi tu tompoke kuhengagwida wopeke nsene tu yi likida asi twa va hara.

19. Morwasinke ono tokomenene kuhengagwida wopeke?

¹⁹ Ngomu tuna kuhedera pepi nehagero lyouzuni ou, maukaro gomouzuni ngaga donapa unene ntani eparu ngali digopa. (2 Tim. 3:13) Mokumona asi kapi twa sikilira mo ntani ose kutura mapuko, ose ngatu twikira kuhepa ehengagwido. Mupositoli Paurusa kwa mu tompokere kulididimikira maudigu dogoro konomfa morwa kwa gwene ehengagwido ndi ekwafo koVakriste vakwawo. Tu tokomeneni kukara noulimburukwi ngwendi waAlisitarekusi, ntani wokuhuguvara ngwendi Tikikusi ntani wokuvatera ngwendi Marukusa. Nsene tu yi rugana, ose ngatu vatera vapuli vakwetu yipo va twikire kukarera Jehova noulimburukwi.—1 Tes. 3:2, 3.