1. Bahlanka ba bantši ba Jehofa ba lebeletšane le mathata afe?

LEFASENG ka moka, bahlanka ba Jehofa ba bantši ba lebeletšane le mathata a magolo. Na o lemogile se ka phuthegong ya geno? Bakriste ba bangwe ba babja o šoro gomme ba bangwe ba hlokofaletšwe ke batho ba gabo bona goba bagwera. Ba bangwe ba kwele bohloko ka ge yo mongwe ka lapeng goba mogwera wa bona a tlogetše go hlankela Jehofa. Le gona ba bangwe ba a tlaišega ka ge ba wetšwe ke dikotsi tša tlhago. Bana babo rena ba ka moka le dikgaetšedi ba nyaka go kgothatšwa. Re ka ba kgothatša bjang?

2. Ke ka baka la’ng ka dinako tše dingwe moapostola Paulo a be a hloka go kgothatšwa?

² Moapostola Paulo o ile a welwa ke mathata a magolo ka go latelana. (2 Bakor. 11:23-28) Le gona o ile a swanelwa ke go kgotlelela “mootlwa nameng.” Mohlomongwe mootlwa woo e be e le bolwetši bjo itšego. (2 Bakor. 12:7) E bile o ile a kwa bohloko kudu ge Dema yo a bego a šoma le yena a be a mo tlogela, ‘ka ge a be a rata tshepedišo ya gona bjale ya dilo.’ (2 Tim. 4:10) Le ge Paulo e be e le Mokriste yo a bego a na le sebete e bile a tloditšwe ka moya o mokgethwa gomme a rata go thuša ba bangwe, ka dinako tše dingwe le yena o be a ikwa a nyamile.—Baroma 9:1, 2.

3. Ke bomang bao ba ilego ba kgothatša Paulo le go mo thuša?

³ Paulo o ile a hwetša kgothatšo le thušo yeo a bego a e hloka. O di hweditše bjang? Jehofa o ile a diriša moya wa gagwe o mokgethwa go mo matlafatša. (2 Bakor. 4:7; Bafil. 4:13) Le gona Jehofa o ile a diriša Bakriste ba bangwe gore ba mo kgothatše. Paulo o ile a bolela gore ba bangwe ba Bakristegotee le yena ba ile ba mo ‘matlafatša’ kudu goba go mo kgothatša. (Bakol. 4:11) Ba bangwe ba Bakriste bao ba ilego ba mo kgothatša bao a ilego a ba bolela  ka maina, e be le Aristareko, Tigiko le Mareka. Ba ile ba mo matlafatša gomme ba mo thuša gore a kgotlelele. Ke dilo dife tšeo di thušitšego Bakriste ba ba bararo gore ba kgone go mo kgothatša? Gona re ka ba ekiša bjang ge re leka go kgothatša ba bangwe le go ba matlafatša?

4. Aristareko o ile a bontšha bjang gore e be e le mogwera wa nnete wa Paulo?

⁴ Aristareko yo e lego Mokriste yoo a bego a etšwa motseng wa Thesalonika kua Matsedonia, o ile a ba mogwera wa nnete wa Paulo. La mathomo ge re ekwa ka Aristareko ka Beibeleng, ke ge Paulo a be a etetše motseng wa Efeso leetong la gagwe la boraro la boromiwa. Aristareko o ile a swarwa ke batho ba kua Efeso ge a be a sepela le Paulo. (Dit. 19:29) Ka morago ga gore ba mo lokolle, ga se a ka a tšhaba gore a phološe bophelo bja gagwe, eupša o ile a bontšha gore ke mogwera wa nnete gomme a dula le Paulo. Ka morago ga dikgwedi tše mmalwa ge ba be ba le kua Gerika, Aristareko o ile a tšwela pele a thekga Paulo gaešita le ge batho bao ba bego ba hloile Bakriste ba be ba nyaka go bolaya Paulo. (Dit. 20:2-4) Le gona mo e ka bago ka 58 C.E. ge Paulo a be a išwa kua Roma e le mogolegwa, Aristareko o ile a sepela le yena leeto leo le letelele gomme ba robegelwa ke sekepe ba le tseleng. (Dit. 27:1, 2, 41) Mohlomongwe ge ba fihla kua Roma, Aristareko o ile a dula le Paulo kgolegong ka nakwana. (Bakol. 4:10) Ruri ga go makatše gore Paulo o ile a ikwa a kgothatšegile le go matlafatšwa ke go ba le mogwera yoo wa kgonthe.

5. Go ya ka Diema 17:17, re ka dira’ng go bontšha gore re bagwera ba nnete?

⁵ Re ka ekiša Aristareko ka go ba bagwera ba nnete ba bana babo rena le dikgaetšedi ka phuthegong e sego feela ge dilo di ba sepelela gabotse, eupša le ge ba na le mathata goba ‘ba le tlalelong.’ (Bala Diema 17:17.) Ngwanabo rena goba kgaetšedi a ka hloka gore re tšwele pele re mo kgothatša gaešita le ka morago ga nako e telele bothata bjo a bego a na le bjona bo fetile. Ka mohlala, Frances * yo tatagwe a ilego a bolawa ke kankere gomme pele dikgwedi tše tharo di ka fela mmagwe le yena a bolawa ke kankere, o re: “Ke nagana gore mathata a magolo a dira gore motho a tlaišege ka nako e telele. Ka gona ke leboga gore ke na le bagwera ba nnete bao ba  dulago ba nkgothatša gaešita le ge go fetile nako e telele batswadi ba ka ba hlokofetše.”

6. Ge e ba re le bagwera ba nnete re tla dira’ng ge bana babo rena ba na le mathata?

⁶ Bagwera ba nnete ba diriša matla a bona le nako ya bona gore ba thuše bana babo rena le dikgaetšedi. Ka mohlala, ngaka e ile ya botša ngwanabo rena Peter gore o na le bolwetši bjo šoro bjoo bo bego bo tlo mmolaya ka pejana. Mosadi wa gagwe e lego Kathryn o re: “Banyalani ba bangwe ka phuthegong ba ile ba re iša ngakeng gomme ya re hlalosetša ka bolwetši bja Peter. Ka yona nako yeo, ba ile ba re botša gore ba tla re thekga le gore ba tla rwadišana le rena bothata bjo.” Ruri go a kgothatša go ba le bagwera ba bjalo, bao ba re thušago go kgotlelela mathata!

7-8. Go ya ka Bakolose 4:7-9, Tigiko o ile a bontšha bjang gore o be a tshepega?

⁷ Tigiko e lego Mokriste yo a tšwago kua Roma seleteng sa Asia, e be e le mogwera yo a tshepegago wa Paulo. (Dit. 20:4) Mo e bago ka 55 C.E., Paulo o ile a rulaganya gore diphuthego di thuše Bakriste ba kua Judea ka meneelo, gomme go ka direga gore o ile a kgopela Tigiko gore a mo thuše ka go kgoboketša tšhelete yeo. (2 Bakor. 8:18-20) Le gona ka morago ga moo, ge Paulo a be a golegilwe kua Roma ka lekga la pele, Tigiko o be a mo išetša melaetša diphuthegong. O ile a išetša diphuthego tša kua Asia mangwalo a Paulo ao a kgothatšago.—Bakol. 4:7-9.

⁸ Tigiko o ile a dula e le mogwera wa Paulo yo a tshepegago. (Tito 3:12) Ga se Bakriste ka moka ba mehleng yeo bao motho a bego a ka ba tshepa go swana le Tigiko. Mo e ka bago ka 65 C.E., ge Paulo a be a golegilwe ka lekga la bobedi, o ile a ngwala gore Bakriste ba bantši ba kua Asia ba be ba sa nyake go dirišana le yena. Mohlomongwe lebaka ke gore ba be ba boifa batho bao ba bego ba tlaiša Bakriste. (2 Tim. 1:15) Eupša Tigiko o be a sa swane le bona, ke ka baka leo Paulo a ilego a mo roma le kua Efeso. (2 Tim. 4:12) Ruri Paulo o ile a thaba kudu gore o be a na le mogwera yo a tshepegago go swana le Tigiko.

9. Re ka ekiša Tigiko bjang?

⁹ Re ka ekiša Tigiko ka go ba bagwera bao ba tshepegago. Ka mohlala, ga se ra swanela go no tshepiša bana babo rena gore re tla ba thuša, eupša re swanetše go ba direla dilo tše itšego go ba thuša. (Mat. 5:37; Luka 16:10) Ge batho bao ba lego mathateng ba tseba gore ba ka tla go  rena neng le neng ge ba hloka thušo, ba kgothatšega kudu. Kgaetšedi yo mongwe o re: “Ge o tseba gore motho yo a go tshepišitšego go go thuša a ka se go tlogele, o ikwa o imologa.”

10. Go ya ka Diema 18:24, batho bao ba nago le mathata goba bao ba nyamilego ba ka hwetša thušo kae?

¹⁰ Batho bao ba nago le bothata bjo itšego goba bao ba nyamilego, gantši ba a kgothatšega ka morago ga go bolela le motho yoo ba mo tshepago. (Bala Diema 18:24.) Ka mohlala, Bijay o ile a kwa bohloko kudu ka morago ga gore morwa gagwe a kgaolwe. O re: “Ke be ke nyaka motho yo ke mo tshepago yoo nka mmotšago kamoo ke ikwago ka gona.” Le gona, ka morago ga gore ngwanabo rena Carlos a dire phošo e itšego a se a ikemišetša, o ile a tšeelwa ditokelo ka phuthegong. O re: “Ke be ke nyaka go bolela le motho yo ke mo tshepago yo a ka se kego a ntshwaya diphošo.” Carlos o ile a boledišana le bagolo gomme ba mo thuša ka bothata bjoo a bego a na le bjona. Le gona o ile a kgothatšwa ke go tseba gore bagolo ba ka se botše batho ba bangwe dilo tšeo a ba boditšego tšona.

11. O ka dira’ng gore batho ba bangwe ba go tshepe le go go ntšhetša sa mafahleng?

¹¹ E le gore batho ba bangwe ba tle ba kgone go re tshepa le go re ntšhetša sa mafahleng, re swanetše go ithuta go se fele pelo. Ka morago ga gore monna wa Zhanna a mo tlogele, o be a ikwa a kgothatšega ge a botša batho bao a ba tshepago kamoo a ikwago ka gona. O re: “Ba be ba ntheetša ba sa fele pelo le ge ka dinako tše dingwe ke be ke no bolela selo setee gantšintši.” Le wena o ka ba mogwera wa nnete ka go theetša batho ba bangwe ge ba bolela.

12. Mareka e be e le mang, gona o ile a bontšha bjang gore o rata go thuša ba bangwe?

¹² Mareka e be e le Mokriste wa Mojuda yoo a bego a etšwa Jerusalema. Baranaba yoo a bego a tswalana le Mareka e be e le moromiwa yoo batho ba bantši ba bego ba mo tseba. (Bakol. 4:10) Go bonagala ka gabo Mareka e be e le bahumi, eupša Mareka o be a sa etiše pele tšhelete le mahumo. Mareka e be e le motho wa go rata go thuša ba bangwe gomme seo se be se mo thabiša. Ka mohlala, Mareka o ile a šoma le moapostola Paulo le moapostola Petro. Go bonagala a be a ba thuša ka go reka dijo, go hwetša marobalo le ka dilo tše dingwe. (Dit. 13:2-5; 1 Pet. 5:13) Paulo o ile a re Mareka e be e le yo mongwe wa ‘badirišani ba gagwe bakeng sa mmušo wa Modimo,’ gomme o be a mo ‘matlafatša kudu.’—Bakol. 4:10, 11.

13. Lengwalo la Timotheo wa Bobedi 4:11 le bontšha bjang gore Paulo o be a tšeela godimo dilo ka moka tšeo Mareka a ilego a mo direla tšona?

¹³ Mareka o ile a ba yo mongwe wa bagwera ba bagolo ba Paulo. Ka Mohlala, mo e ka bago ka 65 C.E. ge Paulo a be a golegilwe kua Roma la mafelelo, o ile a ngwalela Timotheo lengwalo le lengwe gape. Lengwalong leo Paulo o ile a kgopela Timotheo gore a tle le Mareka kua Roma. (2 Tim. 4:11) Ga go pelaelo gore Paulo o be a tšeela godimo dilo ka moka tšeo Mareka a bego a mo diretše tšona. Ke ka baka leo Paulo a ilego a kgopela gore Mareka le yena a tle. Mareka o ile a thuša Paulo ka dilo tše mmalwa, go swana le go mo nea dijo le go mo nyakela dilo tša go ngwala. Ga go pelaelo gore tsela yeo ba ilego ba mo thuša ka yona le go mo kgothatša, e ile ya mo thuša gore a kgotlelele matšatšing ao a mafelelo pele a tlo bolawa.

14-15. Mateo 7:12 e ka re thuša bjang go bona kamoo re ka thušago ba bangwe?

¹⁴ Bala Mateo 7:12. Ge re na le mathata re leboga kudu ge batho ba bangwe ba re thuša. Ryan yo tatagwe a ilego a hlokofala go se gwa letelwa kotsing ya koloi o re: “Ge o wetšwe ke mathata o palelwa le ke go dira dilo tše dinyenyane tšeo o bego o tlwaetše go di dira letšatši le letšatši. Ka gona go a kgothatša ge motho a go thuša, le ge e ka ba ka selo se senyenyane.”

 ¹⁵ Ge e ba re dula re ntšhitše mahlo dinameng, re ka kgona go bona kamoo re ka thušago ba bangwe. Ka mohlala, kgaetšedi yo mongwe o ile a thuša Peter le Kathryn gore nako e nngwe le e nngwe ge ba eya ngakeng go be le motho yo a ba išago. Ka ge Peter le Kathryn ba be ba se sa kgona go reila, kgaetšedi yoo o ile a rulaganya gore ka phuthegong bana babo rena le dikgaetšedi bao ba ka ratago go thuša ba šiedišane ka go ba iša ngakeng. Peter le Kathryn ba ile ba ikwa bjang? Kathryn o re: “Re ile ra ikwa re imologile kudu.” Ka gona, le ka mohla o se ke wa nyatša dilo tše dinyenyane tšeo o di direlago batho bao ba nago le mathata.

16. Re ithuta’ng go Mareka tabeng ya go kgothatša ba bangwe?

¹⁶ Ga go pelaelo gore Mareka yo e bego e le mošomigotee le moapostola Paulo e be e le motho yo a dulago a swaregile. O be a na le mešomo e bohlokwa ya ka phuthegong yeo a bego a swanetše go e dira, go akaretša le go ngwala puku ya Ebangedi yeo e ilego ya reelwa ka leina la gagwe. Eupša le ge Mareka a be a dula a swaregile, o ile a ipha nako ya go kgothatša Paulo. Ke ka baka leo Paulo a bego a sa nagane gabedi ge a be a nyaka go mo kgopela thušo. Angela, yoo makgolo wa gagwe a ilego a bolawa ga sehlogo, o re o leboga kudu gore go ile gwa ba le bana babo rena bao ba ilego ba tla go mo kgothatša. O re: “Ge o bona gore bana beno ba tloga ba nyaka go go thuša, go bonolo gore o boledišane le bona. Ga ba hlwe ba senya nako ge ba swanetše go go thuša.” Ka gona, yo mongwe le yo mongwe wa rena o swanetše go ipotšiša gore: ‘Na ke tsebja ke le motho yoo a ratago go thuša bana babo rena ka phuthegong?’

17. Go naganišiša ka Bakorinthe ba Bobedi 1:3, 4 go ka re thuša bjang go homotša goba go kgothatša ba bangwe?

¹⁷ Go bonolo gore re bone bana babo rena le dikgaetšedi bao ba hlokago go kgothatšwa. E bile re ka ba kgothatša ka tsela yeo le rena re kilego ra kgothatšwa ka yona. Kgaetšedi Nino yo a hlokofaletšwego ke makgolo wa gagwe o re: “Jehofa a ka re diriša go kgothatša ba bangwe ge e ba re mo dumelela go dira bjalo.” (Bala 2 Bakorinthe 1:3, 4.) Frances yo re boletšego ka yena pejana o re: “Lengwalo la Bakorinthe ba Bobedi  1:4 le bolela nnete ge le re re ka kgona go homotša ba bangwe ka khomotšo yeo re e hwetšago go Modimo.”

18. (a) Ke ka baka la’ng ba bangwe ba ka tšhaba go kgothatša batho bao ba nago le mathata? (b) Re ka kgona bjang go kgothatša ba bangwe? Nea mohlala.

¹⁸ Re swanetše go nyaka ditsela tša kamoo re ka thušago ba bangwe le ge re ikwa re tšhoganyana. Ka mohlala, re ka tšhošwa ke go se tsebe gore re tlo reng go motho yoo a hlokago kgothatšo goba re tlo mo direla eng. Paul yoo e lego mogolo ka phuthegong, o gopola kamoo ba bangwe ba ilego ba mo kgothatša ka gona ka morago ga gore tatagwe a hlokofale. O re: “Ke be ke bona gore ga go bonolo gore bana babo rena le dikgaetšedi ba tle ba bolele le nna. Ba be ba sa tsebe gore ba reng. Eupša ke be ke leboga gore ba be ba nyaka go nkgothatša le go nthekga.” Mohlala o mongwe ke wa ngwanabo rena Tajon yoo lefelong leo a bego a dula go lona go ilego gwa ba le tšhišinyego e šoro ya lefase. O re: “Go bolela nnete ga ke sa gopola melaetša ka moka yeo bana babo rena le dikgaetšedi ba ilego ba nthomela yona ka morago ga tšhišinyego yeo ya lefase. Eupša seo ke se gopolago ke gore ba be ba tshwenyegile ka nna gomme ba nyaka go tseba gore ke šireletšegile.” Re ka kgona go kgothatša ba bangwe ge e ba re ba bontšha gore re na le taba le bona.

19. Ke ka baka la’ng o nyaka go dula o kgothatša ba bangwe?

¹⁹ Ka ge bofelo bo le kgauswi kudu, maemo a lefase a tlo mpefala le go feta gomme bophelo bja tšwela pele bo thatafa le go feta. (2 Tim. 3:13) Le gona re tlo tšwela pele re nyaka go kgothatšwa ka baka la diphošo tšeo re di dirago ka ge re belegwe re na le sebe. Se sengwe sa dilo tšeo di ilego tša dira gore moapostola Paulo a botege go fihla bofelong, ke gore Bakristegotee le yena ba be ba mo kgothatša ge a be a hloka kgothatšo. Eka le rena re ka ba bagwera ba nnete go swana le Aristareko, ra tshepega go swana le Tigiko gomme ra rata go thuša ba bangwe go swana le Mareka. Ge re ka dira bjalo, re tla kgona go thuša bana babo rena le dikgaetšedi gore ba dule ba botegela Jehofa.—1 Bathes. 3:2, 3.