1. Malata ya go tlala ya go tshepega ya Jehova ma hlakana le tsa go baba ka matla tsa mošaga mang?

MALATA ya go tlala ya Jehova lefaseng ka mokana ga lona, ma hlakana le tsa go ma kgahleletsa le dilo tsa go ma kwisa go baba ka matla. Ayitsano phutego ya lune yi hlakanne le tsa mošaga wonone? Magageru ya mangwana ma lwala ka matla kela ma hlokafalele ke wa gore ne ma mo nyaka ka matla. Ba bangwana ba tiyisele go kwisiwa go baba ke mo ye mongwana ka ho gaye kela monghane wa bona a lesetsa go rapela Modimo. Dikotsi tsa hlago di kwisiye ba bangwana go baba, mara ba kene baa garagara. Magageru yawa ka mokana ga wona, ma nyaka go kgomoletsiwa. Mara re ka ma gelepa byang?

2. King so ne se maka gore Pawulo wa lepostola le yene a fele a nyaka go kgomoletsiwa?

² Pawulo wa lepostola o yye a gahlana ga tleletlele le mayemo ya go nyaka go fetsa ka lephelo lage. (2 Makor. 11:23-28) Ka ho thoko ke mo a kene a tiyisele “mutlwa nameng,” kela go sa titsosi gabutši. (2 Makor. 12:7) Fote ke mo a kwele go baba mo Demasi wa gore ke mo ba bereka ggoši a lesetsa go bereka naye “ka taba la gore ke mo a kwana ka matla le dilo tsa lefase lowa.” (2 Thim. 4:10) Pawulo wa lepostola ke mo go le Mokreste wa go tlotsiwa wa gore o na le lešiši fote a gelepa ba bangwana, mara le yene, ka dinako tse dingwana ke mo a kgongwela.—Mrm. 9:1, 2.

3. Pawulo ke mo a kgomoletsa bomang?

³ Pawulo o yye a kgomoletsiwa nakwela di sa mo sepelele gabutši. Ka mokgo mang? Nnete ke gore Jehova o berekisiye moya wage wa go hlawolega gore a mo kgomoletse. (2 Makor. 4:7; Mafil. 4:13) Fote Jehova o berekisiye magageru ya Makreste gore ma  mo kgomoletse. Pawulo mo a bolabola ka bo ne a bereka nabo o re, ‘ke bona bo ne ba nkgomoletsa ka matla.’ (Makol. 4:11) Ba bangwana bo a bolabodiyeng mabitso ya bona ke Aristokhasi, Thakikasi le Mareka. Ba yye ba tiyisa Pawulo, ba mo gelepa gore a tiyisele. Ke mekgwa yifeng yo yi gelepiyeng Makreste yawa ka mararo gore ma thogo kgomoletsa Pawulo? Re ka ma yekisela ka mokgo mang ga dilo tsa gabutši tso ma di makiyeng, mo re kene re kgomoletsana le go tiyisana?

4. Aristokhasi o šupetsiye byang gore ke monghana wa go tshepega ga Pawulo?

⁴ Aristokhasi ye ne go le Mokreste wa ku Matsedoniya wa gore ne a dula Thesalonika, o yye a šupetsa gore ke monghani wa go tshepega ga Pawulo. Re thomisa go kwa ka Aristokhasi mo Pawulo a vakašele Efeso ga leyeto la boraro la mmereko wage wa go rumiwa. Nakwela Aristokhasi a sepela le Pawulo, o yye a hlasela ke mogoba wa batho. (Meber. 19:29) Mo ba šele ba mo lokolliye, a sanka a nagana ka taba ya go pasopega gage a ntoši, mara o yye a dula a na le Pawulo. Ka nthago ga dikgwedinyana, mo Pawulo a le ku Gerika, Aristokhasi o yye a fo dula a le naye le mo manaba yage ne ma nyaka go mmolaya. (Meber. 20:2-4) Ka 58 C.E. mo Pawulo a yisiwa Roma go le lebhantiti, Aristokhasi o yye a sepela naye ga leyeto lone la go lefa, fote ba yye ba tiyisela ggoši ga taba ya go robegela ke sekepe mo ba kene ba le tsileng. (Meber. 27:1, 2, 41) Mo ba segela Roma, Aristokhasi o yye a dula nyana le Pawulo ku jele. (Makol. 4:10) Nnete ke gore Pawulo o yye a tikwa a tiyisiwwe fote a kgomoletsiye ke monghane ye wage wa go tshepega!

5. Diyema 17:17 yi re o ka maka byang gore o thogo ba monghane wa mannete?

⁵ Go fo tshwana le Aristokhasi, le wene o ka ba monghane wa go tshepega mo o dula o mamarelanne le magageru, ka ‘dinako tsa gabutši le mo go thathafa.’ (Bala Diyema 17:17.) Le mo dilo tsa go re ghula di fitiye, magageru ma ka nyaka go ya mahlong ma kgomoletsiwa. Frances, * wa gore o hlokafalele ke babelegi bage ka taba la bolwele bya khensa ka dikgwedi ka ditharo tsa go lategetsana, o re: “Dilo tsa go thathafa tso di re ghulang di šiya mabadi ya gore ma tseya nako gore ma tloge. Ke leboga ka matla banghane ba mannete ba gore a ba lebale gore ke sa na ke kwa  go baba, le mo yi le gore babelegi baka ke botala ba hlokafele.”

6. Go tshepega go nyoko re tšhofa gore re make ying?

⁶ Banghane ba go tshepega ba lesetsa dilo tsa go tlala gore ba thogo gelepa magageru. Mo re beyisa, dogotela yi yye ya botsa mogageru ye ba reng ke Peter gore bolwele byage bo nyoko fo ya mahlong ka go yakgoswa fote bo nyoko mmolaya. Mosadi wage ye ba reng ke Kathryn, o re: “Mogageru ye mongwana le mosadi wage mo phutegong ya rune ke bona ba yyeng ba re yisa ga dogotela yone ya gore yi re butsiye ka bolwele bya Peter. Ba yye ba fetsa le dipelo tsa bona ka nako yonone gore ba ka sa fo re lesetsa re lwa le bothatha byone bya go kwisa go baba stereka re le ntoši, ke mo ba dula ba le gona nakwenngwana le ye nngwana mo re ba hloka.” Di kgomoletsa ka matla wa tšiba, go ba le banghane ba mannete, ba gore ba thogo re gelepa gore re tiyisele mo re na le tsa go re ghula!

7-8. Makolosi 4:7-9 yi re Thakikasi o šupetsiye ka ying gore wa tshepega?

⁷ Thakikasi ye ne go le Mokreste wa ku Roma yo yi leng ku Asia, o yye a tišupa ka matla gore ke monghane wa go tshepega ga Pawulo. (Meber. 20:4) Ka 55 C.E., Pawulo o yye a lukisela gore go gahlanisiwe tšheleta yo ne yi nyoko gelepa Makreste ya ku Judiya, fote di ka makega gore o yye a kgopela Thakikasi gore a make mmereko wone wa gore ke mo a wo tseyela hlogong. (2 Makor. 8:18-20) Ka nthagonyana mo Pawulo a le jele la mathomo ku Roma, Thakikasi ke mo go le yene ye ne a felegetsa melayetsa ya Pawulo. Ke mo a yisa marifi le melayetsa ya Pawulo ya go tiyisa diphutego tsa ku Asia.—Makol. 4:7-9.

⁸ Thakikasi o yye a dula a le monghane wa Pawulo wa go tshepega. (Tito 3:12) A yi Makreste ka mokana ga wona ya ku botala ya gore ke mo ma gelepa go tshwana le Thakikasi. Ka 65 C.E., mo Pawulo a tshwariwwe la bobedi, o ngwadiye gore magageru ya go tlala ku ga phrovinsi ya Asia ba yye ba lesetsa go tihlakanisa naye ka taba la gore ke mo ba tšhaba batho ba ke mo ba ba rakela. (2 Thim. 1:15) Mara, Pawulo ke mo a tshepiye Thakikasi fote o yye a mo neya mmereko wo mongwana. (2 Thim. 4:12) Nnete Pawulo ke mo a di jabolela ka matla tsa go ba le monghane wa go tshwana le Thakikasi.

9. Re ka yekisela Thakikasi ka mokgo mang?

⁹ Re ka yekisela Thakikasi ka go ba banghane  ba gore ba bangwana ba ka ba tshepa. Mo re beyisa, a re fo tshepisa gore re ko gelepa magageru ya gore maa tihlupegela, mara re maka tsotsone re di tshepisiyeng gore re thogo ma gelepa. (Mat. 5:37; Luk. 16:10) Mo bo ba gore ba nyaka go gelepiwa ba di tšiba tsa gore ba ka tshepela ga rune, ba kgomoletsega tsa mannete. Mogageru ye mongwana wa mosadi o hlatolla gore ke ntaba go le sone, o re, “A di nyake o šekela, o tiputsisa gore nje motho ye a bolabodiyeng gore o ko n’gelepeng, ayitsano o ko segela ka nako gore a make so a ntshepisiyeng sona.”

10. Diyema 18:24 yi re ke kaye mo bo ba gahlanneng le tsa go ba ghula kela tsa go ba kgongwetsa ba ka kgomoletsegang gona?

¹⁰ Bo ba gahlanneng le tsa go ba ghula kela tsa go ba kgongwetsa, ga go tlala baa kgomoletsega mo ba ka bolabola le monghana wa go tshepega. (Bala Diyema 18:24.) Bijay ke mo di mo kwisiye go baba mo morwayi wage a tlusiwwe ka phutegong, ke mokane a re, “Ke mo ke nyaka go bolabola le ye mongwana wa gore ke ya mo tshepa, ke mmotse ka mokgo ke tikwang.” Go na le mo Carlos a yyeng a sa make dilo gabutši ke mokane a sa sa berekisiwa ka ho phutegong. O re, “Ke mo ke nyaka motho wa gore nka mmotsa so se nhlupang fote ke sa tšhabe gore kela a ka ntseya ka mokgo mongwana.” Carlos o di bonne gabutši gore a ka tšhabela ga bagolo ba gore ba mo gelepiye gore a teye a feta ga tso di mo ghulang. Go tšiba gore bagolo baa kwisisa fote ba kgona go tshwara sephiri, sosone se yye sa mo kgomoletsa.

11. Re ka ba monghane wa go tshepega ka mokgo mang?

¹¹ Gore o be monghane wa go tshepega, di nyaka o be motho wa go lefisa pelo. Mo Zhanna a lesetsa ke monnage, o yye a kgomoletsa ke go botsa banghane bage ka mokgo a tikwang. Zhanna o re, “Ba yye ba ntheetsela ba lefisiye pelo le mo nkene ke bolabola ke boyelela selo ka ssoši.” Le wene o ka di kgona go ba monghane wa gabutši mo o ka ba motho wa go theetsela.

12. Mareka ke mo go le mang fote o šupetsiye ka ying gore o kwana le go gelepa ba bangwana?

¹² Mareka ke mo go le Mokreste wa Lejuda la go tšwa Jerusalema. Motswalage ye ba reng ke Bharenabhase ke mo go le morumiwa wa go tšibega ka matla. (Makol. 4:10) Di šupa nkare ga bo Mareka ke mo ba na le sa bona, mara yene a sanka a yetisa dilo tsa majabajaba mahlong. Byalo mo a kene a phela, o tišupetsiye go le motho wa go maka dilo ka go di nyaka. Mareka ke mo a kwana le go gelepa ba bangwana. Mo re beyisa, ga go tlala Mareka ke mo a bereka le Pawulo wa lepostola ka nakwenngwana a bereka le Petro wa lepostola mo ba kene ba maka mmereko wa bona, di ka makega gore ke mo a ba gelepa ka tso ba di hlokang. (Meber. 13:2-5; 1 Pet. 5:13) Pawulo mo a bolabola ka Mareka o re, ke ye mongwana wa ‘ba go bereka ggoši ga Mmušo wa Modimo,’ fote a tshwana le ‘selo sa go mo tiyisa ka matla.’—Makol. 4:10, 11.

13. Thimothi wa Bobedi 4:11 yi šupetsa byang gore Pawulo ke mo a tseyela gedimo tso Mareka a di makang ka go tshepega?

¹³ Mareka go yye gwa feleletsa go le monghane ye mogolo wa Pawulo. Mo re beyisa, ka 65 C.E. mo Pawulo a le jele la mafelelo ku Roma, o yye a ngwalela Thimothi lengwalo la bobedi. Mone ga lengwalo lone, Pawulo o yye a kgopela Thimothi gore mo a tla Roma, a tle le Mareka. (2 Thim. 4:11) Di šupetsa gabutši gore Pawulo ke mo a jabodisiye ke ka mokgo Mareka ne a maka mmereko wage ka go tshepega, byalo o yye a kgopela Thimothi gore a tle naye. Mareka ke mo a gelepa Pawulo ka dilo tso a di hlokang, go ka ba go le tsa go ja kela dilo tso a di berekisang mo a ngwala. Taba ya gore Pawulo ba yye ba mo thega ba boya ba mo tiyisa yi mo gelepiye gore a thogo tiyisela ga matšatši ya mafelelo ya mo ba soko bane ba mmolaya.

14-15. Matewu 7:12 yi re tšhutisa ying ga taba ya go gelepa ba bangwana ka dilo tso ba di hlokang?

¹⁴ Bala Matewu 7:12. Mo go na le tso di re  kgahleletsang, di re tikisa pelo wa tšiba, mo re bona ba bangwana ba re gelepa! Ryan wa gore papage o hlokafele a sa nagana ka kotsi ya koloyi o re, “Go na le tsa go tlala tsa go šupa nkare o ka sa kgone go di maka mo dilo di sa go sepelele gabutši. Le mo motho a ka fo go makela selo sa go šupetsa go le se senyana ka matla, mara se ka thuletsa kgole.”

¹⁵ Re ka kgona go tšiba ka mokgo re ka gelepang ba bangwana, mo re ka sa ba takisi mahlo. Mo re beyisa, mogageru wa mosadi o yye a gelepa Peter le Kathryn, bo go bolabodiwweng ka bona, gore ba ye bona dogotela. Peter le Kathryn ka babedi ga bona ke mo ba sa sa kgona go dhrayiva, byalo mogageru yene wa mosadi o yye a maka letheto phutegong ya bona la gore bo ba nyakang go gelepa ba tšhentšhisane ka go ba felegetsa ga dogotela. Ayitsano sosone se yye sa gelepa? Kathryn o re, “Re kwile nkare re rudiwwe morwalo.” O sa tseyele fase selo se senyana so o ka kgonang go se makela motho ye mongwana ka taba la gore se ka mo kgomoletsa.

16. King so re ka se tšhutang ga mošupetso wa Mareka ga taba ya go kgomoletsana?

¹⁶ Mareka ke mo go le lelata la gore le phidiye ga dinako tsa mo Jeso a le ho lefaseng, ke mo go le Mokreste wa go garagara. Ke mo a na le mmereko wa go tlala ga tso tsa Modimo, a boya a ngwala le puku ya go bitsiwa ka lebitso lage. Mareka o yye a berekisa nako yage go kgomoletsa Pawulo, sosone se makiye gore Pawulo a tikwe a lokolugiye go kgopela Mareka gore a tle a mo gelepe. Angela, wa gore o yye a kwa go baba mo ye mongwana wa lešaga lage a bolayiwwe lešidi, o lebogiye ka matla mo a bona ba bangwana ba kwa di ba tšhofa gore ba tle go mo kgomoletseng. O re, “Mo banghana ba mannete ba nyaka go gelepa, sosone se maka gore ba kenege. Mo ba gelepa, ba gelepa ka go di nyaka, fote a ba kamake.” Re ka tiputsisa gore, ‘Ayitsano ke tšibega ke le motho wa go kwana le go kgomoletsana kela go gelepa magageru ka tso ma di hlokang?’

17. Go ghayela ka tso di leng ga Makorente wa Bobedi 1:3, 4 go ka re tšhofa ka mokgo mang gore re nyake go kgomoletsa ba bangwana?

¹⁷ Di lula ka matla go kraya magageru ya gore ma nyaka go kgomoletsiwa. Re ka kgomoletsa ba bangwana ka tso ba yyeng ba re kgomoletsa ka  tsona. Mogageru wa mosadi ye ba reng ke Nino, wa gore o yye a hlokofalela ke kokwane wage wa mosadi o re: “Jehova a ka kgomoletsa ba bangwana a berekisa rune mo re ka mo lesetsa a re berekisa.” (Bala 2 Makorente 1:3, 4.) Frances ye go bolabodiwweng ka yene o re: “Wa tšiba Makorente wa Bobedi 1:4 ya resa. Re ka kgona go kgomoletsa ba bangwana ka mokgo re yyeng ra kgomoletsiwa ka gona.”

18. (a) Ke ntaba ba bangwana ba kwa ba tšhaba go kgomoletsa batho ba bangwana? (b) Re ka di kgona byang go kgomoletsa ba bangwana? Beyisa.

¹⁸ Di nyaka re garagare gore re make se sengwana le mo re tikwa re tšhaba. Mo re beyisa, re ka kwa re tshosa ke go sa tšibi gore re ka re king kela ke go sa tšibi gore re ka gelepa byang motho wa gore o gahlanne le seyemo sa go baba. Mogolo ye mongwana ye ba reng ke Paul aa lebale ka mokgo ba bangwana ba mo gelepiyeng ka gona ka nthago ga gore papage a hlokofale. O re, “Ne ke di bona gore a di lula gore ba tle mo gaka. Ke mo ba sa tšibi gore ba ka re king. Mara ke jabodisiye ke gore ke mo ba nabela go nkgomoletsa le go nthega.” Mogageru ye ba reng ke Tajon le yene o yye a bolabola se sengwana ka nthago ga go tekateka ka matla ga lefase, o yitseri: “Nnete ke gore a ke gopole melayetsa ka mokana ga yona yo batho ba yyeng ba nromela yona ka nthago ga go tekateka ga lefase, mara so ke se gopolang ke gore ke mo ba hlupega ka matla ka nna tsa gore ba boya ba nhlola.” Mo nkare re hlupega ka ba bangwana, re ka sa šitege go ba gelepa.

19. Ke ntaba o tikemisele go “kgomoletsa ba bangwana ka matla”?

¹⁹ Mo re kene re bakiye mafelelong ya lefase lowa, tso di makegang mo lefaseng di nyoko fetelela ka go befa fote lephelo le nyoko thathafa ka matla. (2 Thim. 3:13) Mathatha ya re tileyelang wona ka taba la go sa felegelela ga rune, ma maka gore re dule re nyaka go kgomoletsiwa. Pawulo wa lepostola o yye a kgona go tiyisela ka go tshepega go segela a kgwa, ka taba la gore Makreste ya mangwana ma yye ma mo kgomoletsa. Nkare re ka dula re tshepega go tshwana le Aristokhasi, Thakikasi fote re gelepe ba bangwana go tshwana le Mareka. Mo re maka ka mokgonone, re ko gelepa magageru gore tumelo ya wona yi sa thogathoge le ka go nyana.—1 Mathes. 3:2, 3.