1. Ndaga jitshi jia lamba akombeledi a Yehowa ana tagana najio?

HA MAVU agasue, Matemue a Yehowa adi mutagana nu ndaga jia lamba jidi guasagesa. Matemue a mu hungu dienu ana tagana nji nu lamba ba? Aklisto avula ana gukata misongo yakola, ana tagana nu gufua gua muthu ana zumba. Ako ana tagana nu lamba gula muenya fami yawo nga futa diawo wazolewa mu hungu. Uvi ako, ana mona lamba mukunda nu ba aksida ana tagana nawo. Aphangi awa a mala nu akhetu akhala nu funu ya uwalaganyi. Luholo lutshi tuajiya guakuatesa?

2. Mukunda natshi matangua ako mupostolo Phaula gakhalele nu funu ya ukuateshi?

² Mupostolo Phaula wataganele nu malamba avula mu lujingu luenji. (2 Kol. 11:23-28) Watagenele nji nu ukhashi wakola wakhalele gifua ‘muiya mu muila’ wenji. (2 Kol. 12:7) Watagenele nji nu lamba diko tangua futa dienji dia mudimo Demas, gamulengele ‘mukunda [Demas] wakhalele muzumba ima ya ha mavu awa.’ (2 Tim. 4:10) Phaula wakhalele muklisto wa gikhesa wambiwe maji mu nyuma, wakhalele mukuatesa athu ako, uvi matangua ako, muila wakhalele gumuleba.—Lomo 9:1, 2.

3. Akuatshi ahanele Phaula ukuateshi?

³ Phaula wahetele ukuateshi gakhalele nawo funu. Luholo lutshi? Yehowa wamuhanele ngolo mu njila ya nyuma yenji. (2 Kol. 4:7; Fili. 4:13) Yehowa wamukuatesele nji mu njila ya aphangi Aklisto. Phaula wamonesele egi mafuta enji a mudimo akhalele ‘gumuwalagana mangololo.’ (Kol. 4:11) Mukatshi dia mafuta ene, watangele Aristarke, Tishike, nu Mako. Ahanele Phaula gikhesa, amukuatesele ha gulua nu malamba. Makalegelo tshi akuatesele Aklisto awa thathu ha guwalagana Phaula?  Luholo lutshi tuajiya gulandula gifezegeselo giawo giabonga tangua tudi muwalagana nu guhana athu gikhesa?

4. Luholo lutshi Aristarke gamonesele egi wakhalele wagujinginyina gudi Phaula?

⁴ Aristarke wakhalele Muklisto wa gu Masedonia gu dimbo dia Tesalonike. Wakhalele futa diakola dia Phaula. Mbala ya thomo tudi mutanga jina dia Aristarke mu Biblia, idi mu tangua Phaula gayile mutala hungu dia gu Efeso mu vuayaje yenji ya thathu ya gimisionere. Tangua Aristarke gayile mutuala Phaula, thundu yakoma ya athu yakhalele guavila khabu, yamukuatele. (Makal. 19:29) Tangua amubembele, gakambele ndo gubemba Phaula ha gulenga gingonza. Gungima dia mbeji jiazonda, Aristarke wakhalele nu Phaula gu Grece, ngatshima mbalagaji jiakhalele mulandula gukamba gushiya Phaula. (Makal. 20:2-4) Mu givo 58 gia Tangua Dietu, hatumiwe Phaula mu bologo mu Roma, Aristarke wayile n’enji mu vuayaje yene nu atagenele nu malamba avula, abundugile nu masuwa mu muta. (Makal. 27:1, 2, 41) Idi mumonega egi hakhalele phaula mu bologo gu Roma, Aristarke wabalegesele n’enji matangua avula mu bologo. (Kol. 4:10) Idi yadiago egi Phaula wahetele ukuateshi nu uwalaganyi gudi futa dienji owu wa gujinginyina!

5. Mu gudivua nu Ishima 17:17, luholo lutshi tuajiya gubua mafuta abonga?

⁵ Esue nji tuajiya gukhala agujinginyina gudi aphangi a mala nu a akhetu ikhale mu tangua dia gusuanguluga nga mu ‘matangua a malamba.’ (Tanga Ishima 17:17.) Aphangi a mala nu akhetu akhala nu funu ya ukuateshi ngatshima malamba awo asugile gale. Mvuaji jia phangi Frances * jia fuile nu misongo ya cancer mu sungi ya mbeji thathu. Udi muzuela egi: “Gikenene tuana guvua gula watagana nu lamba giana zula matangua avula. Ngana suanguluga nu mafuta ami anyi ana jiya egi ngakhala nu gikenene, ngatshima matangua avula abalega gale sendese mvuaji jiami jiafuile.”

6. Khadilo dia gujinginyina diana gututuma ha gutshita itshi?

⁶ Mafuta awaha ana guhana tangua nu ngolo jiawo ha gukuatesa aphangi ako. Ha gufezegesa, phangi Peter wakhalele nu ukhashi wakola.  Mukaji’enji udi muzuela egi: “Phangi mumoshi wa mu hungu dietu nu mukaji’enji azudile desizio dia guya gututuala fundo tuayile mukunda nu ukhashi wa Peter. Azuelele egi ajiyilego gutubemba muya hakhetu, hene atukuatesele mu malamba tangua tuakhalele nu funu ya ukuateshi.” Lulu luholo luabonga lua guwalagana mafuta. Gukhala nu mafuta awaha guajiya gutukuatesa ha gukolesela mu malamba!

7-8. Mu gudivua nu Kolosai 4:7-9, luholo lutshi Tishike gamonesele egi udi futa dia gushila mutshima?

⁷ Tishike wakhalele Muklisto wa gu Roma mu distrike dia Asie. Wakhalele futa dia gujinginyina dia Phaula. (Makal. 20:4) Mugivo 55 gia Tangua Dietu, Phaula walondele ndaga hagula Aklisto akungule mbongo mukunda nu gukuatesa Aklisto a enya Yuda. Watumine Tishike ha gutagenesa mudimo owu wa ndando. (2 Kol. 8:18-20) Tangua Phaula gambiwe mu bologo gu Roma mbala ya thomo, Tishike wakhalele gumukuatesa ha gutumina aphangi jimbimbi. Muene wakhalele mubatela mahungu a gu Asie mikanda yakhalele musonega Phaula nu jimbimbi ha guahana gikhesa.—Kol. 4:7-9.

⁸ Tishike wakhalele futa dia Phaula dia gushila mutshima. (Tito 3:12) Guakhalelego nu Aklisto ako a gushila mutshima gifua Tishike. Mu givo 65 gia Tangua Dietu, hambiwe Phaula mu bologo hugo dia mbadi, wasonegele egi, Aklisto avula a mala a mu provense ya Asie amulengele handaga akhalele nu woma wa mbalagaji. (2 Tim. 1:15) Uvi Phaula wahagele mutshima wenji gudi Tishike, nu wamuhanele mudimo uko. (2 Tim. 4:12) Phaula wasuangulugile diago luholo gakhalele nu futa diabonga Tishike.

9. Luholo lutshi tuajiya gulandula gifezegeselo gia Tishike?

⁹ Ha gukhala mafuta a gushila mutshima, tudi naye gulandula gifezegeselo gia Tishike. Ha gufezegesa, tushigo naye phamba guzuela gu kano egi mbatukuatesa aphangi etu a mala nu a akhetu, uvi tudi naye gutagenesa ndaga tuazuedi ha guakuatesa. (Mat. 5:37; Luka 16:10) Gula aphangi adi nu funu ya ukuateshi ajiya egi mbatuakuatesa, ana heta diago gikhesa. Phangi mumoshi wa mukhetu udi muzuela egi, “Ushigo naye gudisagesa ha gudihula, gula muthu  wazuedi egi uza gugukuatesa, umuza mu tangua diabonga ha gutshita ndaga ya zuedi muene.”

10. Luholo Ishima 18:24 yayimonesa, athu adi mutagana nu malamba ajiya guheta uwalaganyi gudi nanyi?

¹⁰ Athu anyi ana tagana nu malamba, ana heta uwalaganyi gudi mafuta abonga. (Tanga Ishima 18:24.) Phangi Bijay watagenele nu lamba tangua mun’enji wa yala gazolewe mu hungu, hene udi muzuela egi: “Ngakhalele nu funu ya guwambela muthu ya gushila mutshima luholo ngakhalele gudivua.” Phangi Carlos watotesele inemo yenji mu hungu mukunda nu ndaga yabola gatshitshile. Udi muzuela egi: “Ngakhalele nu funu ya ‘muthu mungoshi wa gushila mutshima’ ngudi naye guwambela ndaga jiami jiagasue guvua ndo woma egi, wajiya gungumonela gubola.” Carlos wawambelele akulu milonga yenji, nu amukuatesele ha gubinga ndaga jiakhalele gumusagesa. Wahetele luko gikhesa hakhalele mujiya muene egi akulu mbaadi mubamba lumene luenji, mbaashigo gulutela athu ako.

11. Luholo lutshi tuajiya gukhala futa diabonga dia guhagela mutshima?

¹¹ Ha gukhala futa diabonga dia gushila mutshima, tudi naye gukhala nu khadilo dia guhuiminyina. Tufezegese: Tangua mulumi’a Zhanna gamubembele, Zhanna wahetele gikhesa tangua gawambelele mafuta enji luholo gakhalele gudivua. Udi muzuela egi: “Akhalele gungutegelela nu guhuiminyina guagasue, ngatshima matangua ako ngakhalele muzuela ndaga yene tangua diagasue.” Aye nji wajiya gumonesa egi udi futa diabonga gula udi mutegelela athu ako muabonga.

12. Mako wakhalele nanyi, nu luholo lutshi gamonesele egi wakhalele hehi ha gukuatesa athu ako?

¹² Mako wakhalele Muklisto wa muenya Yuda gu dimbo dia Yelusalema. Gisonyi gienji Barnabase wakhalele misionere mumoshi wajiyiwa muabonga. (Kol. 4:10) Idi mumonega egi fami ya Mako yakhalele nu umonyi wavula, uvi Mako gahagele ndo umonyi wene ha fundo dia thomo mu lujingu luenji. Mako wakhalele hehi ha gukuatesa athu ako, nu wakhalele musuanguluga ha guakuatesa. Tufezegese: Matangua avula, wakhalele mutshita hamoshi nu mupostolo Phaula nu Phetelo tangua akhalele mutagenesa inemo yawo. Mako wakhalele guakuatesa ha guheta ima ya gudia, fundo dia gukhala, nu ndaga jiko. (Makal. 13:2-5; 1 Phet. 5:13) Phaula wamonesele egi Mako wakhalele mukatshi dia ‘mafuta enji a mudimo wa Ufumu wa Nzambi,’ nu wabuile ‘muwalaganyi’ wenji.—Kol. 4:10, 11.

13. Luholo lutshi 2 Timote 4:11 idi mumonesa egi Phaula wasuangulugile nu mudimo wakalegele Mako?

¹³ Mako wabuile futa diakola dia Phaula. Tangua Phaula gakhalele mu bologo mu mbala ya suga gu Roma, mu givo 65 gia Tangua Dietu, wasonegele Timote mukanda wa mbadi. Mu mukanda wene, Phaula watogele Timote ha guza nu Mako gu Roma. (2 Tim. 4:11) Idi yadiago egi, Phaula wasuangulugile nu mudimo wakalegele Mako mu masugu abalega, hene gamutamegele ha guza gumusanga mu tangua diene. Yajiya gukhala egi, Mako wakuatesele Phaula muavula nu ima ya gudia nga nu ba rulo nu gilabi gia gusonegela. Ukuateshi nu gikhesa giahetele Phaula, giamukuatesele ha gukolesela mu masugu enji a gisugishilo gutuama egi ashiyiwe.

14-15. Itshi Matayo 7:12 adi gutulonga gu ndaga yatadila gukuatesa athu ako?

¹⁴ Tanga Matayo 7:12. Tangua tudi mutagana nu lamba, tudi naye gusuanguluga nu aphangi adi gutukuatesa! Tata wa Ryan wafile mu aksida, hene Ryan udi muzuela egi: “Gula lamba diatubuila, tuana khala ndo nu  luholo lua gutshita ndaga jiavula tuana tshita lusugu nu lusugu. Tuana suanguluga muavula gula muthu watukuatesa, ngatshima ukuateshi wene udi wazonda.”

¹⁵ Gula tudi mutegelela nu gutala akuetu, tuajiya guheta maluholo avula a gukuatesa athu ako. Ha gufezegesa, phangi mumoshi wa mukhetu wazudile desizio dia gukuatesa Peter nu Kathryn, yago tuazuelela gu thunda, wakhalele muya guatuala tangua diagasue gu Hôpital. Ngatshima Peter nu Kathryn akhalelego nu luholo lua gutshita vuayaje, phangi owu wa mukhetu walondele ndaga hagula aphangi a mala nu a akhetu mu hungu diawo ajiya gudilonda ha guahana makuta a transport. Ndaga yene yaakuatesele ba? Kathryn udi muzuela egi: “Tuavile gifua atukatula ginemo ha phanga.” Ujimbilago egi, ndaga udi mutshita ha guwalagana akuenu, nga idi yazonda, yajiya guakuatesa muavula diago.

16. Longo tshi dia ndando diatadila gukuatesa athu tuajiya guzula mu gifezegeselo gia Mako?

¹⁶ Mulandudi Mako yago wajingile mu siekle ya thomo, wakhalele nu ndaga jiavula jia gutshita. Wakhalele nu inemo yavula ya gutagenesa mukunda nu Yehowa, gifua gusonega mukanda wa Evanjile udi nu jina dienji. Mako wazudile tangua diavula ha guhana Phaula gikhesa, Phaula wamonele egi wajiya gutoga ukuateshi gudi Mako. Khakha wa mukhetu wa phangi Angela washiyiwe gu khuta. Angela wasuangulugile luholo aphangi akhalele hehi ha gumuwalagana. Udi muzuela egi: “Yakhalago lamba ha guta maga nu aphangi adi mutshigina gungukuatesa. Ana khala hehi ha gungukuatesa nu ana khala ndo nu woma wa guyitshita.” Tuajiya gudihula egi: ‘Ngana jiyiwa gifua muthu wakhala hehi ha gukuatesa aphangi Aklisto ba?’

17. Luholo lutshi 2 Kolinto 1:3, 4 yajiya gutukuatesa ha guwalagana athu ako?

¹⁷ Ishigo lamba ha gukuatesa aphangi a mala nu a akhetu. Tudi naye guwalagana aphangi etu gifua luholo athu ako atuwalaganele. Phangi wa mukhetu Nino afuishile khakha enji  wa mukhetu, hene gadi muzuela egi: “Yehowa wajiya guwalagana athu ako mu njila yetu gula tuabemba egi muene atutume.” (Tanga 2 Kolinto 1:3, 4.) Phangi Frances yonu tuazuelela gu thunda udi muzuela egi: “Mbimbi jidi mu 2 Kolinto 1:4 jiakhala jia giamatshidia. Tuajiya guwalagana athu ako nu uwalaganyi tuahanewe.”

18. (a) Mukunda natshi athu ako ana guvua woma ha guwalagana athu? (b) Luholo lutshi tuajiya gubinga ha guwalagana athu muabonga? Hana gifezegeselo.

¹⁸ Tudi naye gukamba maluholo a gukuatesa athu ako ngatshima tudi muvua woma. Matangua ako, tuajiya guvua woma handaga tushigo mujiya ndaga tudi naye guzuela gudi muthu udi mu lamba. Mukulu mumoshi mu jina dia Paul udi muwunguluga gikhesa athu akalegele ha gumuwalagana, tangua diafile sh’enji. Udi muzuela egi: “Yakhalelego ndaga yaleba gudi aphangi ha gunguwalagana. Akhalelego mumona ndaga ajiya guzuela. Uvi ngana suanguluga luholo amonesele nzala ya gunguwalagana.” Ndaga ya luholo lumoshi nji yakalegewe gudi phangi Tajon tangua mavu adigitshile muavula gumbo diawo. Udi muzuela egi: “Ngana jiya luko ndo ndaga aphangi akhalele gungusonegela mu message mu lusugu lua landuile gudigita gua mavu, uvi ngana jiya phamba egi, akhalele diago gudisagesa ha gujiya gula ngudi gikuatshi.” Tuajiya guwalagana athu ako muabonga gula tudi mumonesa egi tuana gudisagesa mukunda nu ene.

19. Mukunda natshi wazula desizio dia gukhala ‘muwalaganyi wabonga wa athu’

¹⁹ Luholo gisugishilo gia mavu awa giasuena hehi, ndaga jiavula jidi muya nu gubola muavula, lujingu nji ludi mukola muavula. (2 Tim. 3:13) Mbatukhala nu funu ya uwalaganyi tangua diagasue handaga tushigo athu atagana nu tuana tshita gubola. Ndaga yakuatesele mupostolo Phaula ha gukolesela mu malamba uu nu gu gufua guenji, yakhalele uwalaganyi wamuhanewe gudi Aklisto ako. Tuajiya gukhala agujinginyina gifua Aristarke, athu a gushila mutshima gifua Tishike, nu akuateshi a guzumba gifua Mako. Gula tudi mutshita ngenyi, tuajiya gukuatesa aphangi etu a mala nu a akhetu ha gusala agujinginyina mu nyuma.—1 Tes. 3:2, 3.