1. ¿Ima sasachakuykunapin tarikushanku Jehová Diosta serviqkuna?

PACHANTINPIN Jehová Diosta serviqkuna imaymana sasachakuykunapi tarikushanku. Wakin hermanonchiskunan sinchi onqosqa tarikushanku, wakinpaqqa munasqa familianmi wañupun, jujkunataq sinchi llakisqa tarikushanku familianku otaq amigonku Jehová Diosmanta karunchakusqanrayku. Chaymantapas wakinqa terremotokuna, lloqllakuna kasqan qhepamanmi sinchi llakipi tarikunku. Chaymi paykunaqa necesitanku kallpachananchista, ¿imaynatan paykunata yanapasunman?

2. ¿Imaraykun apóstol Pablo mayninpi kallpachanata necesitaran?

² Apóstol Pabloqa askha kutipin wañuy patapi tarikuran (2 Cor. 11:23-28). Chaymantapas onqosqapaschá kasharan, chaymi niran: ‘Sinchi nanaymi noqapi kashan kiska jina’, nispa (2 Cor. 12:7). Llakisqataqmi tarikuran yanapaqnin Demas ‘kay tiempo kausayta munakusqanrayku’ saqerpariqtin (2 Tim. 4:10). Pabloqa janaq pachapaq ajllasqa cristianon karan mana manchakuspataq jujkunata yanaparan, chaywanpas mayninpiqa pisikallpayaranmi (Rom. 9:1, 2).

3. ¿Imaynatan Jehová Dios apóstol Pablota kallpacharan?

³ ¿Imaynatan Jehová Dios apóstol Pablota kallpacharan? Santo espiritunwanmi kallpacharan (2 Cor. 4:7; Filip. 4:13). Chaymantapas hermanokunawanmi kallpacharan, chaymi Pabloqa niran: ‘Paykunan noqapaqqa ancha jatun consolawaqniyku kanku’, nispa (Col. 4:11). Chay hermanokunamanta wakinmi karan Aristarco, Tíquico, Marcospiwan,  paykunaq kallpachasqanmi yanaparan sasachakuyninkunata aguantananpaq. ¿Imaraykun chay kinsantin cristianokuna kallpachayta atiranku? ¿Imaynatan paykuna jina kasunman hermanonchiskunawan kallpachanakunanchispaq?

4. ¿Imaynatan rikuchiran Aristarco junt’aq kasqanta?

⁴ Aristarcoqa manan apóstol Pablota saqerpariranchu. Payqa Tesalónica llaqtamantan karan. Apóstol Pablo kinsa kaq viajenpi Éfeso llaqtapi kashaqtinmi Bibliaqa willan Aristarcomanta. Chay kutipin Pablowan kashaqtin ch’aqwata jatarichiq runakuna payta jap’iranku (Hech. 19:29). Kacharichisqa kaspaqa manan juj llaqtamanchu ayqekuran aswanmi Pablowan kashallaran. Askha killakuna qhepamantaq Grecia llaqtapi kashaqtinku Pablota wakin runakuna wañuchiyta munaranku, chay kutipipas Aristarcoqa paywanmi kasharan (Hech. 20:2-4). 58 watapi jina Pablota Roma llaqtaman presota apashaqtinkupas Aristarcoqa paywan kuskan viajaran, barco chinkaykuqtinpas iskayninkun salvakuranku (Hech. 27:1, 2, 41). Chay qhepamantaq Roma llaqtapi juj tiempo Aristarcoqa Pablowan kuska preso karanku (Col. 4:10). Pabloqa kallpachasqachá sientekuran junt’aq sonqo amigonwanqa.

5. Proverbios 17:17 textopi nisqanman jina, ¿imaynatan rikuchisunman cheqaq amigo kasqanchista?

⁵ Aristarco jinan amigonchiskunapaq junt’aq kasunman, chaytaqa rikuchisunman paykunawan ‘llaki phutiy tiempopi’ kashaspan (leey Proverbios 17:17). Hermanonchiskunaqa sasachakuyta atipasqanku qhepamanpas necesitankuraqmi paykunawan kashananchista. Francisca * hermananchispa taytanmi cáncer onqoywan wañupuran, kinsa killa qhepamantaq mamanñataq chay onqoywan wañupuran. Paymi nin: “Unaymi llakisqa tarikunchis ima desgraciapipas kaspaqa. Chaymi anchata agradecekuni amigoykunata sonqo nanaypi tarikusqayta entiedewasqankumanta”, nispa.

6. Amigonchiskunapaq junt’aq sonqo kasun chayqa, ¿imatan ruwasunchis?

 ⁶ Junt’aq sonqo amigokunaqa tiemponkuta kallpankuta iman qonku llakipi tarikuqtinchis yanapawananchispaq. Chaymi pasaran hermano Pedrowan, paytan doctor niran: “Nishu graven onqoyniyki, pisi tiempollañan kausanki”, nispa. Esposan Katytaq niran: “Juj matrimonio compañawaranku doctorman rinaykupaq, noqaykuwan kuskan kasharanku chay noticiata qowaqtinku. Kaq ratotaq niwaranku: ‘Manan sapaykichischu kashankichis’, nispa. Chaymantapachan ima necesitasqaykupi yanapawaranku’”, nispa. Maytan kusikunchis chay jina amigokunayoq kaspaqa.

7, 8. Colosenses 4:7-9 textopi nisqanman jina, ¿imaynatan Tíquico confianapaq jina kasqanta rikuchiran?

⁷ Tiquicoqa Asia provinciamantan karan, confianapaq amigo jinataq Pablopaq karan (Hech. 20:4). 55 watapi jinan apóstol Pablo Judeapi tarikuq iñiqmasikunata yanapanapaq iñiq t’aqakunata niran qolqeta juñunankupaq, yaqachus jina chay ruwaypi Tíquico yanapakuran (2 Cor. 8:18-20). Apóstol Pablo Romapi ñaupaq kaq kutipi preso kashaqtinpas Tiquicowanmi cartakunata apachiran Asiapi kaq iñiq t’aqakunaman (Col. 4:7-9).

⁸ Tiquicoqa confianapaq jinan kashallaran (Tito 3:12). Chay tiempopiqa manan llapa cristianokunachu pay jina karanku. Romapi iskay kaq kutipi preso kashaqtinmi Pabloqa qelqaran Asia provinciamanta wakin cristianokuna enemigonkuta manchakuspa paymanta karunchakusqankuta (2 Tim. 1:15). Tiquicon ichaqa mana saqerpariranchu, chaymi kamachiran Éfeso llaqtaman rinanpaq (2 Tim. 4:12). Pabloqa anchatachá kusikuran chhayna amigoyoq kasqanmanta.

9. ¿Imaynatan rikuchisunman Tíquico jina confianapaq kasqanchista?

⁹ ¿Imaynatan rikuchisunman Tíquico jina confianapaq kasqanchista? Chaytaqa ruwasunman  imachus rimasqanchista junt’aspan (Mat. 5:37; Luc. 16:10). Yanapananchista necesitaqkunaqa anchatan kusikunku noqanchispi confiaqtinku. Juj hermanan nin: “Confianapaq amigokunayoq kaspaqa manan llakikunkichu, yachankin tiempollanpi imachus nisqankuta junt’anankuta”, nispa.

10. Proverbios 18:24 textopi nisqanman jina, ¿pikunan consolayta atinku sinchi llakipi tarikuqkunata?

¹⁰ Sinchi llakipi tarikuspa amigoykiman imayna sientekusqaykita willaspaykiqa allinmi sientekunki (leey Proverbios 18:24). Chhaynan Benito hermanonchis sientekuran. Wawan iñiq t’aqamanta qarqosqa kaqtinmi pay niran: “Confianapaq amigomanmi imayna sientekusqayta willayta munarani”, nispa. Carlos hermanonchismi juchallikusqanrayku iñiq t’aqapi ruwananta saqepuran. Paymi nin: “Necesitaranin imayna sientekusqayta uyariwaqniy entiendewananta”, nispa. Umalliqkunan yanaparanku allin sientekunanpaq. Manataqmi pimanpas willarankuchu paypa rimasqanta, chaywanmi payqa thaj sientekullarantaq.

11. ¿Imaynatan rikuchisunman confianapaq amigo kasqanchista?

¹¹ Confianapaq amigo kananchispaqqa pacienciakuqmi kananchis. Sandra hermananchistan qosan saqepuran. ¿Iman payta yanaparan chhaynapi tarikuqtin? Amigonkunamanmi imayna sientekusqanta willakuran. Paymi nin: “Sapa kutillanmi amigoykunaman kaqllamanta willakuq kani, paykunan ichaqa pacienciawan uyariwaqku”, nispa. Noqanchispas uyariyta yachaspaqa allin amigo kasqanchistan rikuchisun.

12. ¿Pin Marcos karan? ¿Imaynatan rikuchiran yanapakuq kasqanta?

¹² Marcosqa Jerusalén llaqtamanta cristianon karan, primon Bernabetaq allin reqsisqa misionero karan (Col. 4:10). Yaqachus jina Marcospa familianqa qhapaq karan, paymi ichaqa mana qolqe maskhaypichu afanakuran. Tukuy kausasqan tiempopin rikuchiran yanapakuq kasqanta. Chaymi askha kutipi compañaran apóstol Pablota apóstol Pedrotawan, paykunaqa imaymana ruwanayoqmi karanku. Yaqachus jina Marcosqa mijunata rantiran, maypi alojakunanku wasita maskharan juj ruwaykunatawan ruwaran (Hech. 13:2-5; 1 Ped. 5:13). Chaychá Pabloqa Marcosmanta niran: ‘Diospa gobiernonpaq llank’aqmasiymi, consolawaqniymi’, nispa (Col. 4:10, 11).

13. ¿Imaynatan 2 Timoteo 4:11 textopi nisqan rikuchin Marcosta Pablo munakusqanta?

¹³ Marcoswan Pablowanqa allin amigontinmi kapuranku. ¿Imaynapin chayta yachanchis? 65 watapi jina apóstol Pablo Romapi preso kashaqtinmi Timoteoman iskay kaq cartata qelqaran. Chaypin Timoteota kamachiran Roma llaqtaman Marcoswan jamunankupaq (2 Tim. 4:11). Pabloqa anchatan Marcosta munakuran junt’aq sonqowan Diosta servisqanrayku, chaychá munaran chay sasa tiempopi Marcos paypa ladonpi kashananta. Marcosqa imaymanapin yanaparan, yaqapaschá mijuykunata aparan, qelqananpaq imakuna necesitasqantapas. Chaychá Pabloqa amigonkunaq yanapayninwan junt’aq sonqowan aguantaran wañuchisqa kanankama.

14, 15. ¿Imaynatan Mateo 7:12 texto yanapawanchis jujkunata yanapanapaq?

¹⁴ (Leey Mateo 7:12). Sasachakuykunapi  tarikuspaqa maytan agradecekunchis jujkuna yanapawasqanchismanta. Roger hermanonchispa papanmi accidentepi wañupuran, paymi nin: “Llakipi tarikuspaqa sasatan imatapas ruwanki. Chaymi gracias ninki pipas yanapasuqtiyki”, nispa.

¹⁵ Sichus allin reparaq kasun chayqa, atisunmi yanapakuyta. Jujmanta rimallasuntaq Pedromanta Katymantawan, paykunaqa llakipi tarikusqankuraykun mana carronkuta manejayta atirankuchu. Chaymi juj hermananchis juj listata ruwaran iñiq t’aqamanta hermanokuna sapa kuti doctorman rinanku kaqtin apanankupaq. Jinan Katyqa niran: “Maytan yanapawaranku chay ruwasqankuqa”, nispa. Chay jinaqa manan kayta qonqananchischu: Llakipi tarikuqta imallapipas yanapayqa may allinpunin.

16. ¿Imatan yachanchis Marcosmanta?

¹⁶ Marcospa ruwasqanmanta rimallasuntaq. Payqa imaymana ruwanayoqmi karan, qelqallarantaqmi Marcos librotapas. Chaywanpas tiempotan orqoran Pablota kallpachananpaq, Pablopas yacharanmi yanapananta. Ángela hermananchispa jujnin familiantan wañuchiranku, jinan payqa agradecekuran payta consolaq iñiqmasikuna jamusqankumanta. Paymi nin: “Hermanokuna yanapaytapuni munasqankuta reparaspan mana manchakuspa imatapas valekurani. Manataqmi iskayaranichu yanapawanankumanta”, nispa. Chaymi tapukunanchis: “¿Jujkuna reparankuchu iñiqmasikunata consolanaypaq listo kashasqayta?”, nispa.

17. 2 Corintios 1:3, 4 textopi nisqan, ¿imata ruwananchispaqmi yanapawanchis?

¹⁷ Iñiq t’aqanchispiqa kashanmi consolanata necesitaq hermanonchiskuna. Yaqapaschá jujkunata kallpachasunman imayna kallpachasqa karanchis chaywan. Dina hermananchispa abuelanmi wañupuran, paymi nin: “Sichus kallpachakusun chayqa Jehová  Diosqa yanapawasunmi jujkunata kallpachananchispaq”, nispa (leey 2 Corintios 1:3, 4). Francisca hermananchispas ninmi: “2 Corintios 1:4 textopi nisqan jina, imayna kallpachasqa kasqanchiswanmi jujkunata kallpachayta atisunman”, nispa.

18. a) ¿Imanaqtinmi jujkuna manchakunku consolayta? b) ¿Imatan ruwasunman jujkunata kallpachananchispaq?

¹⁸ Sasa kaqtinpas reparananchismi imaynatas jujkunaq llakikuyninta pisiyachisunman chayta. Yaqapaschá mana ima ruwayta otaq ima niytapas atinchischu llakipi tarikuq hermanonchista. Paul sutiyoq umalliqmi yuyarin imatas wakin hermanokuna ruwaranku papan wañupuqtin. Paymi nin: “Repararanin hermanokuna mana ima niyta atiwasqankuta, chaywanpas anchatan agradecekuni yanapayta munawasqankumanta”, nispa. Tomás sutiyoq hermanonchismi nin: “Terremoto pasasqan qhepamanmi askha mensajeta qelqamuwaranku, manan qelqamuwasqankuta yuyarinichu, ichaqa noqamanta preocupakusqankutan yuyarini”, nispa. Rikusqanchis jina jujkunamanta preocupakuspaqa atisunmanmi consolayta.

19. ¿Imanaqtinmi kallpachakunanchis jujkunata kallpachananchispaq?

¹⁹ Millay runakunaq wañupunan p’unchay chayamunankaman kay pachapi kausayqa aswan sasaraq kanqa (2 Tim. 3:13). Jinaspapas juchayoq kasqanchisraykun imapipas pantasun, chaymi necesitashallasun kallpachasqa kayta. Hermanokunaq yanapayninwanmi apóstol Pabloqa wañupunankama Diosta junt’aq sonqowan serviran. Chay jinaqa Aristarco jina junt’aq kasun, Tíquico jina confianapaq kasun, Marcos jinataq yanapakuq kasun. Chayta ruwaspaqa hermanonchiskunatan yanapasun Diospaq junt’aq kanankupaq (1 Tes. 3:2, 3).