1. Sose tano pharo bute amare phraljendže hem e phenjendže?

KO CELO sveto, bute amare phraljendže hem e phenjendže tano pharo sebepi o problemija kola isi len. Da li tano adžahar hem ki tikli skupština? Disavendže tano pharo sebepi soj tane but naborme ja mulo olendar neko kas but manglje. A averendže tano pharo sebepi so neko kotar olengi porodica ja olengo šukar amal više na služini e Jehovase. Disavendže tano pharo sose doživindže disavi prirodno katastrofa. Sarinendže olendže valjani uteha. Sar šaj amen te pomožina len?

2. Sose podijekh puti hem e Pavlese valjandža uteha?

² But putija o apostol Pavle doživindža bare pharipa (2. Kor. 11:23-28). Isto adžahar, ov hine le „karo ano telo“, kova šaj hine disavo nabormipe koleja borindža pe (2. Kor. 12:7). Jekhvar hine but obeshrabrimo sebepi o Dimas. On duj jekh vreme zajedno služindže, ama o Dimas ačhavdža le „sose manglja o buča soj tane ko sveto“ (2. Tim. 4:10). O Pavle hine jekh ando pomazana phralja hem hrabro služindža e Devlese. Ov dindža sa pestar te pomožini averendže, ama podijekh puti hem ov hine obeshrabrimo (Rimlj. 9:1, 2).

3. Sar o Jehova utešindža hem zorjačerdža e Pavle?

³ O Pavle hine utešimo hem zorjačerdo. Sar? O Jehova koristindža poklo sveti duh te zorjačeri le (2. Kor. 4:7; Fil. 4:13). Isto adžahar, o Jehova zorjačerdža le prekalo avera phralja hem phenja. Disave phraljendar o Pavle phendža so on pomožindže le hem zorjačerdže le (Kol. 4:11). Disave olendar hine o Aristarh, o Tihik hem o Marko. On pomožindže  e Pavlese te ačhol verno hem but putija zorjačerdže le. Kola osobine pomožindže akale trine phraljendže te šaj te zorjačeren averen? So šaj amen te sikljova olendar ked amen valjani te pomožina hem te zorjačera jekh jekhe?

4. Sar o Aristarh mothovdža so hine verno amal e Pavlese?

⁴ O Makedonco Aristarh, ando Solun hine verno hem šukar amal e Pavlese. Ked o Pavle posetindža e phraljen ko Efes, ko oleso trito misionarsko putovanje, prvo puti šaj te čitina ando Aristarh. Dži služindža e Pavleja, o nasilna hem holjame manuša astardže le (Dela 19:29). Ama ked mukhlje le, ov na dikhlja sar te našel odothar te šaj te ačhol dživdo, nego ačhilo verno te služini e Pavleja. Nekobor masekija palo odova, dži hine ki Grčka, o protivnikija palem manglje te mudaren e Pavle, ama o Aristarh pana ačhilo te služini e Pavleja (Dela 20:2-4). Koro 58. berš, ki nevi era, o Pavle hine phanlo hem bičhaldo ko Rim. O Aristarh pođindža ko odova baro drumo oleja hem dži hine ko drumo doživindže brodolom (Dela 27:1, 2, 41). Ked reslje ko Rim, izgleda so hem ov hine phanlo e Pavleja disavo vreme (Kol. 4:10). Ov čače hine e Pavleso verno amal kova pomožindža le hem zorjačerdža le.

5. Premalo Poslovice 17:17, sar šaj amen te ova verna amala?

⁵ Sar o Aristarh hem amen šaj te ova verna amala. Odova ka čera adžahar so ka ova amare phraljencar hem e phenjencar na samo ked tano olendže šukar, nego hem ked avena lendže „phare dive“. (Čitinen Poslovice 17:17.) Čak hem palo odova so o problemija nakhlje, amare phraljese ja e phenjače šaj pana ka valjani uteha. Amari phen i Fransis *, aso trin masek našaldža hem pe dade hem pe daja sebepi so hine len rak. Oj phenela: „Me mislinava so sebepi o pharipa kola doživinaja šaj dugo te patina. Iako nakhlja but vreme sar me roditeljija mulje, maje tano pharo hem akana. But hijum zahvalno sarinendže kola mothovdže soj tane verna amala,  sose on na bisterdže kobor tano maje pharo.“

6. So ka čerel jekh verno amal?

⁶ Okova kova tano verno amal koristini po vreme hem pi snaga te pomožini pe phraljendže hem pe phenjendže. Na primer, amare phraljese, e Petarese, o doktorija phendže soj tano but nabormo hem so sig ka merel. Olesi romni, i Ketrin, phenela: „Odova dive ked o doktorija phendže amendže sa ando e Petareso nabormipe, jekh bračni par kotar amari skupština hine amencar. Ked šundže sa odova, on mothovdže so na ka mukhen amen kokri ko akava pharo vreme. On but pomožindže amen hem ked god valjandže amendže on hine amencar.“ But tano utešno ked džanaja so isi amen verna amala kola pomožinena amen te istrajina ko amare pharipa.

7-8. Premalo Kološanima 4:7-9, sar o Tihik mothovdža soj tano pouzdano amal?

⁷ O Tihik živindža ki rimsko pokrajina Azija. Ov hine manuš upro kaste o Pavle šajindža te oslonini pe (Dela 20:4). Koro 55. berš, ki nevi era, o Pavle organizujindža te čedel pe o prilog e phraljendže ki Judeja. Ov predložindža hem o Tihik te pomožini ki akija važno buti (2. Kor. 8:18-20). Ked o Pavle prvo puti hine phanlo ko Rim, o Tihik služindža sar oleso glasnik. Prekalo oleste o Pavle bičhaldža lila e skupštinendže ki Azija hem ohrabrindža e phraljen ko odola skupštine (Kol. 4:7-9).

⁸ O Tihik ačhilo e Pavleso pouzdano amal (Titu 3:12). Ko odova vreme, na hine sa o phralja hem o phenja odobor pouzdana sar o Tihik. Koro 65. berš, ki nevi era, ked dujto puti hine phanlo, o Pavle pisindža so but phralja andi rimsko pokrajina Azija, na manglje te družinen pe oleja sose šaj darandilje ando protivnikija (2. Tim. 1:15). Ki aver strana, o Pavle šajindža te oslonini pe upro Tihik hem dindža le aver zadatko (2. Tim. 4:12). O Pavle but cenindža asavke šukar amale sar so hine o Tihik.

9. Sar šaj amen te ova sar o Tihik?

⁹ Sar o Tihik hem amen šaj te ova amala upro kaste avera šaj te osloninen pe. Na  primer, amen na samo so phenaja so ka pomožina amare phraljendže hem e phenjendže ked valjani, već hem čeraja sa so šaj te pomožina ljen (Mat. 5:37; Luka 16:10). Ked amare phralja hem phenja džanena so šaj te osloninen pe upro amende, odova tano olendže bari pomoć hem uteha. Jekh phen phenela: „Ked džaneja so o phral ja i phen sigurno ka ovel odothe ked valjani, odova dela tut baro mir ko vilo.“

10. Premalo Poslovice 18:24, kastar šaj te dobinen uteha okola soj tane obeshrabrime?

¹⁰ Okola soj tane ko pharipa ja soj tane obeshrabrime, but putija osetinena pe pošukar ked odolestar vačerena jekhe pouzdano amaleja. (Čitinen Poslovice 18:24.) Amaro phral, o Badži, hine but razočarimo ked oleso phureder čhavo hine isključimo. Ov phenela: „Valjandža maje jekh amal kase šaj te verujinav, te šaj te phenav lese sar osetinava man.“ Amaro phral, o Karlos, sebepi diso so čerdža, našaldža o zaduženje kova hine le ki skupština. Ov phenela: „Hine maje potrebno te phenav nekase sar osetinava man hem te džanav so palo odova na ka osudini man.“ O Karlos dikhlja so e starešinencar šaj te vačeri odolestar. On pomožindže le te borini pe pekle problemeja. Pana pobari snaga dindža le odova so o starešine nikase na vačerdže ando oleso problemi.

11. Sar šaj te ove amal upro kaste avera šaj te osloninen pe?

¹¹ Te šaj te ova amala upro kaste avera šaj te osloninen pe hem kase šaj te verujinen, amendže valjani strpljenje. Ked amare phenja, e Žana, ačhavdža olako rom, olače hine polokho ked ando pe osećanja vačerdža pekle amalencar. Oj phenela: „On strpljivo šundže man iako but putija vačerdžum ando ista buča.“ Hem tu šaj te ove šukar amal adžahar so strpljivo ka šune averen.

12. Ko hine o Marko hem sar ov mothovdža soj tano spremno te služini averendže?

¹² O Marko hine Jevrejin ando Jerusalim. Oleso rođak, o Varnava, hine misionari (Kol. 4:10). Izgleda so e Markosi porodica hine barvali, ama e Markose o materijalna buča na hine ko prvo than. Celo poklo dživdipe, o Marko mothovdža soj tano spremno te služini averendže hem sebepi odova hine bahtalo. But putija ov služindža e Pavleja hem e Petareja. O Marko šaj brinindža pe odolestar so ka han hem kaj ka soven, dži akala duj apostolija hine len avera zaduženja (Dela 13:2-5; 1. Petr. 5:13). O Pavle phendža so o Marko tano jekh ando olese „saradnikija aso e Devleso Kraljevstvo“ kola „pomožindže le hem zorjačerdže le“ (Kol. 4:10, 11).

13. Sar o lafija ando 2. Timoteju 4:11 mothovena so o Pavle cenindža sa so o Marko čerdža aso Jehova?

¹³ O Marko ulo jekh ando e Pavlese najšukar amala. Na primer, ked o Pavle poslednjo puti hine phanlo ko Rim, koro 65. berš, ki nevi era, ov pisindža po dujto lil e Timotejese. Ko odova lil, o Pavle pisindža e Timotejese te avel ko Rim hem te lel peja e Marko (2. Tim. 4:11). O Pavle but cenindža sa so o Marko angleder čerdža aso Jehova. Odolese, ked hine lese najpharo, ov manglja o Marko te ovel oleja. O Marko pomožindža e Pavlese adžahar so brinindža pe te ovel le diso hajbase hem te ovel le pribor aso pisibe, sar soj tane o mastilo hem o pergamentija. O ohrabrenje hem i pomoć koja o Pavle dobindža pomožindža lese te istrajini ko poslednja dive angleder te ovel mudardo.

14-15. So o lafija ando Matej 7:12 sikavena amen odolestar sar šaj te pomožina amare phraljendže hem e phenjendže?

 ¹⁴ Čitinen Matej 7:12. Ked doživinaja o pharipa, but ceninaja ked avera pomožinena amen. O primer kotar amaro phral, o Rajan, mothovi odova. Ked oleso dad tragično našaldža po dživdipe, ov phendža: „But buča kola valjani te čere svako dive tegani našti te čere, sose tano tuče but pharo. Ama, ked neko pomožini tut, čak hem ko tikne buča, odova but zorjačeri tut.“

¹⁵ Ako hijam pažljiva manuša, amen ka dikha sar šaj te pomožina averendže. Na primer, jekh phen manglja te pomožini e Petarese hem e Ketrinače, te džan ko terapije. Sebepi so o Petar hem i Ketrin naštindže više te vozinen, akija phen čerdža jekh raspored te šaj hem avera phralja hem phenja te vozinen len. Sar akava pomožindža lendže? I Ketrin phenela: „Amen osetisaljam samči neko cidindža o pharipe kotar amaro dumo.“ Niked ma te bistre so čak ked čereja tikne buča averendže tu šaj but te zorjačere len.

16. Sar šaj te oponašina e Markoso primer ked valjani te pomožina hem te zorjačera averen?

¹⁶ O Marko hine le but zaduženja ki pi služba e Jehovase. Jekh ando odola zaduženja hine te pisini o jevanđelje kova akhari oleso nav. Ama, o Marko odvojindža vreme te ohrabrini e Pavle. Ki aver strana, o Pavle džandža so ko svako trenutko šaj te pučel e Marko te pomožini lese. Ked i baba kotar amari phen i Anđela hine mudardi, i Anđela hine zahvalno sarinendže kola hine spremna te pomožinen la hem te zorjačeren la. Oj phenela: „Ked te amala mangena te pomožinen tut, odova dičhola, hem tegani nane pharo te puče len asi pomoć. On čače manglje te pomožinen man hem na hine lendže pharo te čeren odova.“ Amen šaj te puča amen: „Da li hijum pendžardo sar neko ko dela sa pestar te pomožini hem te zorjačeri averen?“

17. Sar šaj o lafija andi 2. Korinćanima 1:3, 4 te podstakninen amen te utešina averen?

¹⁷ Na valjani te dža dur te šaj te arakha e phraljen hem e phenjen kolendže valjani  uteha. Olencar šaj te vačera ando mislija kola avera koristindže te ohrabrinen amen. I Nina, kasi baba muli, phenela: „O Jehova prekalo amende šaj te zorjačeri averen samo ako amen dozvolinaja lese te koristini amen.“ (Čitinen 2. Korinćanima 1:3, 4.) I Fransis, kolatar vačerdžam angleder, phenela: „Čače tano odova so pisini ki 2. Korinćanima 1:4. Šaj neko tut zorjačerdža pekle lafencar ja čerdža tuče diso šukar. Ama, palo odova, isto odole lafencar hem tu šaj te zorjačere averen. Isto adžahar, odova so avera čerdže tuče hem tu šaj te čere averendže.“

18. (a) Sose disave darana te tešinen averen? (b) Sar šaj te utešina averen. Vačer jekh primer.

¹⁸ Amen valjani te dikha sar šaj te pomožina averendže, čak iako daraja. Na primer, šaj daraja sose na džanaja so te phena ja so te čera te šaj te utešina nekas. Jekh starešina kova vičini pe Pavle, niked na bisterdža sar avera dindže sa pestar te utešinen le ked oleso dad mulo. Ov phenela: „Džandžum so na hine lendže lokho te aven hem te vačeren mancar. On na džandže so te phenen maje. Ama hem avdije ceninava odova so manglje te utešinen man.“ Jekh amaro phral kova vičini pe Tadžon, vačeri sar osetindža pe palo jekh baro zemljotres. Ov phenela: „Palo zemljotres, našti te setinav man so sa o manuša pisindže maje. Ama, na bistrava so mothovdže so brininena pe mandar adžahar so but putija alje te dikhen man.“ Ked mothovaja so čače brininaja amen averendar, tegani šaj te utešina averen.

19. Sose tu hijan odlučno te pomožine hem te zorjačere averen?

¹⁹ Sar o krajo avela sa popaše, ka ovel amen sa pobare problemija hem ka ovel amendže sa popharo (2. Tim. 3:13). Isto adžahar, sebepi so hijam nesavršena hem grešna manuša, but putija ka ovel potrebno neko te pomožini amen hem te zorjačeri amen. O apostol Pavle ačhilo verno dži o krajo ando poklo dživdipe, odolese so avera phralja pomožindže le hem zorjačerdže le. Odolese, ov verno sar o Aristarh, pouzdano sar o Tihik hem spremno te služine averendže sar o Marko. Ked čereja adžahar hem tu ka pomožine te phraljendže hem te phenjendže te služinen verno e Jehovase (1. Sol. 3:2, 3).