1. Sortu tesi e miti furu anbegiman fu Yehovah?

NA HERI grontapu furu anbegiman fu Yehovah e kisi tesi di e meki den firi brokosaka. Yu abi sma na ini yu gemeente di de na ini a situwâsi disi? Son brada noso sisa abi wan seryusu siki noso wan lobiwan fu den dede. Trawan e sari fu di wan famiriman noso wan mati fu den no e dini Yehovah moro. Boiti dati, trawan e kisi fu du nanga rampu. Ala den brada nanga sisa disi abi trowstu fanowdu. Fa wi kan yepi den?

2. Fu san ede Paulus ben abi trowstu fanowdu son leisi?

² Furu leisi na apostel Paulus ben de na ini situwâsi pe a ben kan lasi en libi (2 Kor. 11:23-28). Bijbel e taki tu dati a ben abi ’wan maka na ini en skin’ (2 Kor. 12:7). Kande a maka disi ben de wan siki di a ben abi. Boiti dati, Paulus ben sari di Deimas, wan brada di ben wroko makandra nanga en, gowe libi en ’fu di a ben lobi a grontapu disi’ (2 Tim. 4:10). Paulus ben de wan salfu Kresten di ben abi deki-ati èn di ben lobi yepi trawan. Ma son leisi ensrefi ben lasi-ati.​—Rom. 9:1, 2.

3. Fa Yehovah sorgu taki Paulus kisi a trowstu nanga a yepi di a ben abi fanowdu?

³ Paulus kisi a trowstu nanga a yepi di a ben abi fanowdu. Fa? Yehovah gebroiki en santa yeye fu gi en krakti (2 Kor. 4:7; Fil. 4:13). Yehovah ben gebroiki brada nanga sisa tu fu trowstu en. Paulus ben taki dati sonwan fu den di ben wroko makandra nanga en ’ben trowstu en trutru’ (Kol. 4:11). A ben taki dati Aristarkus, Tikikus, nanga  Markus ben yepi en. Den gi Paulus deki-ati èn den yepi en fu horidoro. Sortu fasi den dri Kresten brada disi ben abi di yepi den fu trowstu Paulus? Fa na eksempre fu den kan yepi wi fu trowstu trawan èn fu gi den deki-ati?

4. Fa Aristarkus horibaka gi Paulus?

⁴ Aristarkus ben de wan Kresten fu a foto Tesalonika, di ben de na ini Masedonia. A man disi ben de wan bun mati fu Paulus èn a ben horibaka gi en. A fosi leisi di Aristarkus kari na ini Bijbel na di Paulus go na Efeise, a di fu dri leisi di a go preiki leki zendeling. Di Aristarkus ben de drape nanga Paulus wan grupu sma grabu en (Tori 19:29). Di den lusu en, a no gowe libi a foto, ma a tan horibaka gi Paulus. Di Paulus ben de na Grikikondre wan tu mun baka dati, Aristarkus ben de nanga en ete, aladi feanti ben tan suku fu kiri Paulus (Tori 20:2-4). Di den seni Paulus go na Rome leki strafuman na ini a yari 58, Aristarkus ben de nanga en aladi a pasi ben langa. Di den ben na pasi a sipi pe den ben de na ini sungu (Tori 27:1, 2, 41). Di den doro Rome, Aristarkus ben de nanga Paulus na strafu-oso wan pisi ten (Kol. 4:10). A no de fu taki dati a bun mati disi fu Paulus ben trowstu en èn a ben de wan deki-ati gi en.

5. Fa Odo 17:17 e sori fa wi kan de wan trutru mati?

⁵ Neleki Aristarkus wi kan de trutru mati gi wi brada nanga sisa te wi e horibaka gi den te den de na „nowtu”. (Leisi Odo 17:17.) Son brada nanga sisa abi trowstu fanowdu, srefi baka te a problema fu den lusu. Luku na eksempre fu wan sisa di nen Frances *. En papa ben abi kanker èn a dede. Baka dri mun en mama di ben abi kanker tu, dede. A sisa disi e taki: „Efu yu kisi wan hebi tesi, dan  a kan teki langa fosi yu kisi yusrefi. Mi e warderi den mati fu mi di no e frigiti taki mi e sari ete aladi mi papa nanga mama dede wan pisi ten kaba.”

6. Te wi na bun mati, dan san wi o du?

⁶ Bun mati e meki ten fu horibaka gi den brada nanga sisa. Fu eksempre, wan brada di nen Peter ben abi wan siki di ben o meki taki a no ben o libi langa moro. En frow Kathryn e taki: „Wan trowpaar na ini wi gemeente ben de nanga wi di a datra taigi wi taki Peter siki. Na a momenti dati den bosroiti taki den ben o horibaka gi wi na ini a muilek situwâsi disi. Den ben de na wi sei ibri leisi te wi ben abi den fanowdu.” A de wan trowstu fu abi bun mati di e yepi wi fu horidoro te wi e kisi tesi.

7-8. Fa Kolosesma 4:7-9 e sori taki Tikikus ben de fu frutrow?

⁷ Tikikus ben de wan brada di Paulus ben kan frutrow. A ben de fu Asia, wan distrikt fu Rome (Tori 20:4). Na ini a yari 55, Paulus ben orga sani fu yepi den Kresten fu Yudea di ben de na nowtu. A kan taki a meki Tikikus yepi nanga a prenspari wroko disi (2 Kor. 8:18-20). Bakaten di Paulus ben de na strafu-oso na ini Rome fu a fosi leisi, Tikikus ben du boskopu gi en. A ben tyari den brifi fu Paulus gi den gemeente na ini Asia.​—Kol. 4:7-9.

⁸ Tikikus ben tan yepi Paulus (Tit. 3:12). Paulus no ben man frutrow ala Kresten leki fa a ben frutrow Tikikus. Na ini a yari 65, di Paulus ben de na strafu-oso a di fu tu leisi, a skrifi taki furu fu den brada na ini a distrikt Asia no ben wani bumui nanga en fu di den ben frede den gensman (2 Tim. 1:15). Ma Paulus ben man frutrow Tikikus èn a gi en ete wan wroko fu du (2 Tim. 4:12). Paulus ben musu fu breiti taki a ben abi wan bun mati leki Tikikus.

9. Fa wi kan teki na eksempre fu Tikikus?

⁹ Neleki Tikikus wi musu de sma di  den brada nanga sisa kan frutrow. Wi no musu pramisi nomo fu yepi den te den de na nowtu, ma wi musu du dati tu (Mat. 5:37; Luk. 16:10). Te den wan di de na nowtu sabi taki den kan frutrow wi, dan dati na wan trowstu gi den. Wan sisa e taki: „Te yu sabi taki a sma di pramisi fu yepi yu o kon biten, dan yu no e broko yu ede tumusi.”

10. Soleki fa Odo 18:24 e sori, dan suma kan trowstu den wan di abi problema noso di e sari?

¹⁰ Den wan di abi problema noso di e sari, e kisi trowstu te den e taki nanga wan mati di den kan frutrow. (Leisi Odo 18:24.) Wan brada di nen Bijay, abi wan boi di puru fu a gemeente. A e taki: „Mi ben wani taki nanga wan sma di mi kan frutrow.” Wan tra brada di nen Carlos ben lasi wan grani na ini a gemeente fu di a meki wan fowtu. A e taki: „Mi ben wani taki nanga wan sma di no ben o krutu mi.” Carlos taki nanga den owruman di yepi en nanga a problema fu en. A ben de wan trowstu gi en fu sabi taki den owruman no ben o prati a tori fu en.

11. Fa wi kan de wan mati di sma kan frutrow?

¹¹ Efu wi wani de wan mati di sma kan frutrow, dan wi musu abi pasensi. Di Zhanna en masra gowe libi en, a kisi trowstu di a taigi den bun mati fu en fa a ben e firi. A e taki: „Den ben e arki mi nanga pasensi aladi mi ben taki den srefi sani ibri tron baka.” Yu o de wan bun mati tu te yu e arki sma nanga pasensi.

12. Suma ben de Markus èn fa a ben sori taki a ben de klariklari fu yepi trawan?

¹² Markus ben de wan Dyu fu Yerusalem di tron wan Kresten. A ben de wan neef fu Barnabas, wan zendeling di furu sma ben sabi (Kol. 4:10). A sori leki a famiri fu Markus ben gudu, ma toku Markus no ben si moni leki a moro prenspari sani. En heri libi langa, a sori taki a ben de klariklari fu yepi trawan. Fu eksempre, difrenti leisi a wroko makandra nanga na apostel Paulus èn sosrefi nanga na apostel Petrus. A kan taki Markus ben bai nyanyan gi den, a ben suku tanpresi gi den èn a ben du tra sani gi den (Tori 13:2-5; 1 Petr. 5:13). Paulus ben taki dati Markus ben de wan fu den sma di ’wroko makandra nanga en gi a Kownukondre fu Gado èn di trowstu en trutru’.​—Kol. 4:10, 11.

13. Fa 2 Timoteyus 4:11 e sori taki Paulus ben warderi den sani di Markus ben du gi en?

¹³ Paulus ben warderi a fasi fa Markus ben yepi en. Dati meki en nanga Markus ben tron bun mati. Na a ten fu a yari 65, di Paulus ben de na strafu-oso na ini Rome a lasti leisi, a skrifi a di fu tu brifi gi Timoteyus. Na ini a brifi dati Paulus e aksi Timoteyus fu kon na Rome èn fu tyari Markus nanga en (2 Tim. 4:11). A sori leki Paulus ben sabi taki den ben o kiri en èn dati meki a ben wani taki Markus ben musu kon na en. Markus ben yepi Paulus nanga den sani di a ben abi fanowdu. Kande a ben tyari nyanyan noso bukulolo nanga inki gi en. A yepi nanga a deki-ati di Paulus ben kisi ben yepi en fu horidoro na ini den lasti dei fosi den kiri en.

14-15. Te wi e luku san skrifi na Mateyus 7:12, dan san wi musu du fu man yepi trawan?

¹⁴ Leisi Mateyus 7:12. Te wi abi en muilek wi e warderi en te trawan e yepi wi. Ryan, di papa dede na wan ongoloku  fasi, e taki: „Te wi kisi wan hebi tesi, dan srefi den sani di wi gwenti du ibri dei e muilek fu du. A de wan trowstu te wan sma e du wan sani fu yepi yu, awinsi a e du wan pikin sani.”

¹⁵ Te wi e poti prakseri na a situwâsi fu den brada nanga sisa, dan wi o si fa wi kan yepi den. Fu eksempre, wan sisa bosroiti fu yepi Peter nanga Kathryn, di wi ben taki fu den kaba. Peter nanga Kathryn no ben man rèi wagi moro. Dati meki a sisa disi meki wan schema, so taki brada nanga sisa fu a gemeente ben kan tyari den go na datra. A sani disi ben yepi den? Kathryn e taki: „A ben de neleki wan hebi ben komoto na wi skowru.” Hori na prakseri taki yu kan trowstu trawan, srefi te yu e du wan pikin sani fu yepi den.

16. Sortu prenspari sani wi e leri fu na eksempre fu Markus?

¹⁶ A disipel Markus ben abi furu fu du na ini a gemeente. A ben abi bigi frantwortu. Fu eksempre, a ben musu skrifi na Evangelietori di e tyari en nen. Toku Markus ben meki ten fu trowstu Paulus èn Paulus ben sabi taki a ben kan aksi Markus fu yepi en. Di sma kiri wan famiriman fu Angela, a ben de nanga tangi gi den sma di ben meki ten fu trowstu en. A e taki: „Te yu e si taki den mati fu yu wani yepi yu èn taki den no e draidrai fu du dati, dan a e makelek fu aksi den wan sani.” Wi musu aksi wisrefi: ’Mi na wan sma di de klariklari fu trowstu den brada nanga sisa èn fu yepi den?’

17. Fa den wortu na ini 2 Korentesma 1:3, 4, e gi wi deki-ati fu trowstu trawan?

¹⁷ Wi no abi fu go fara fu feni brada nanga sisa di abi trowstu fanowdu. Kande wi kan trowstu den nanga den srefi wortu di sma gebroiki fu trowstu wi. Nino, wan sisa di lasi en granmama na ini dede, e taki: „Wi kan meki Yehovah gebroiki wi fu trowstu trawan.” (Leisi 2 Korentesma 1:3, 4.) Frances, di kari  kaba, e taki: „A sani di skrifi na 2 Korentesma 1:4 tru. Wi kan du den srefi sani di sma du gi wi, fu trowstu trawan.”

18. (a) Fu san ede son sma e frede fu trowstu trawan? (b) Fa wi kan trowstu trawan? Gi wan eksempre.

¹⁸ Wi musu suku fasi fu yepi trawan, awinsi wi e frede fu du dati. Fu eksempre, kande wi no sabi san wi musu taki noso san wi musu du gi wan sma di abi trowstu fanowdu. Wan owruman di nen Paul e memre fa trawan ben pruberi fu trowstu en di en papa dede. A e taki: „Mi ben kan si taki a no ben makelek gi den fu kon taki nanga mi. Den no ben sabi san den ben musu taki. Ma toku mi ben warderi en taki den ben kon trowstu mi èn taki den ben horibaka gi mi.” Baka wan gronseki, wan brada di nen Tajon taki: „Mi no man memre ibri boskopu di sma seni gi mi baka a gronseki, ma mi no frigiti taki den ben meki muiti fu kon sabi fa a ben go nanga mi.” Wi o man trowstu trawan te wi e sori den taki wi e broko wi ede nanga den.

19. Fu san ede wi wani tan trowstu trawan?

¹⁹ Fu di wi de krosibei fu a kaba, meki sani o kon moro ogri èn a libi o kon moro muilek (2 Tim. 3:13). Boiti dati, wi o tan abi trowstu fanowdu fu di wi na sondusma èn wi e tan meki fowtu. Wan sani di yepi na apostel Paulus fu horidoro te na a kaba fu en libi, na a trowstu di a kisi fu trawan. Meki wi horibaka gi den mati fu wi neleki Aristarkus, meki wi de fu frutrow neleki Tikikus èn meki wi de klariklari fu yepi sma neleki Markus. Te wi e du dati, dan wi o yepi den brada nanga sisa fu wi fu tan dini Yehovah.​—1 Tes. 3:2, 3.