LISAUN ESTUDU 2
Ita bele sai “ajuda-naʼin neʼebé fó kmaan boot”
“Sira . . . mak haʼu-nia maluk serbisu-naʼin ba Maromak nia Ukun, no sira sai ona ajuda-naʼin neʼebé fó kmaan boot mai haʼu.”—KOL 4:11.
KNANANUK 90 Fó laran-manas ba malu
IHA LISAUN NEʼE *
1. Situasaun saida deʼit mak lori estrese ba Jeová nia atan barak?
IHA mundu tomak, Jeová nia atan barak hasoru situasaun neʼebé susar no lori estrese. Ita haree ona ida-neʼe iha Ita-nia kongregasaun ka lae? Maluk Kristaun balu tenke tahan susar tanba moras todan ka ema neʼebé sira hadomi mate. Maluk Kristaun seluk tenke tahan laran-kanek tanba família ka belun diʼak husik lia-loos. Maluk Kristaun seluk tan tenke tahan susar tanba dezastre naturais. Irmaun-irmán sira-neʼe hotu presiza hetan kmaan. Oinsá mak ita bele ajuda sira?
2. Tanbasá mak dala ruma apóstolu Paulo presiza hetan kmaan?
2 Apóstolu Paulo hasoru situasaun oioin neʼebé lori perigu ba ninia moris. (2 Kor 11:23-28) Nia tenke tahan ‘ai-tarak iha isin’, karik neʼe refere ba problema saúde. (2 Kor 12:7) No nia mós tenke tahan laran-kanek tanba Demas neʼebé uluk serbisu ho nia, husik nia “tanba [Demas] hadomi mundu neʼe”. (2 Tim 4:10) Paulo mak ema Kristaun neʼebé iha esperansa atu bá lalehan, nia aten-brani no la hanoin an deʼit hodi ajuda ema seluk, maski nuneʼe dala ruma nia mós sente laran-kraik.—Rom 9:1, 2.
3. Oinsá mak Jeová fó kmaan no apoia Paulo?
3 Paulo simu kmaan no apoia neʼebé nia presiza. Oinsá? Jeová uza ninia espíritu santu atu hametin nia. (2 Kor 4:7; Flp 4:13) Jeová mós fó kmaan ba nia liuhusi maluk Kristaun sira. Paulo dehan katak ninia maluk serbisu-naʼin balu “sai ona ajuda-naʼin neʼebé fó kmaan boot” ba nia. (Kol 4:11) Ninia maluk sira-neʼe balu mak Aristarco, Tíkiko, no Marcos. Sira hametin Paulo no ajuda nia atu tahan. Hahalok saida deʼit mak ajuda ema Kristaun sira-neʼe atu fó kmaan ba Paulo? Oinsá mak ita bele banati-tuir sira-nia ezemplu bainhira ita koko atu fó kmaan no anima malu?
LARAN-METIN HANESAN ARISTARCO
Hanesan Aristarco, ita bele sai belun neʼebé laran-metin hodi apoia ita-nia irmaun-irmán sira durante “tempu susar” (Haree parágrafu 4-5) *
4. Oinsá Aristarco hatudu katak nia mak belun neʼebé laran-metin ba Paulo?
4 Aristarco mak ema Kristaun ida husi Tesalónika neʼebé iha Masedónia, no nia mak Paulo nia belun neʼebé laran-metin. Dala primeiru neʼebé ita lee kona-ba Aristarco mak iha istória kona-ba tempu neʼebé Paulo vizita Éfeso durante ninia viajen nuʼudar misionáriu ba dala terseiru. Ema-lubun kaer Aristarco bainhira nia akompaña Paulo. (Após 19:29) Bainhira nia sai livre, nia kontinua tau ninia moris iha perigu laran hodi kontinua akompaña Paulo ho laran-metin. Fulan balu liutiha, Aristarco nafatin akompaña Paulo iha Grésia maski kontradór sira kontinua koko atu oho Paulo. (Após 20:2-4) Maizumenus iha tinan 58 EC, ema haruka Paulo ba Roma nuʼudar dadur, no Aristarco akompaña Paulo durante viajen neʼe, no sira tahan susar hamutuk bainhira ró mout. (Após 27:1, 2, 41) Kuandu toʼo iha Roma, karik nia mós tama komarka ba tempu balu hamutuk ho Paulo. (Kol 4:10) Paulo hetan anima no kmaan tanba iha belun neʼebé laran-metin hanesan neʼe.
5. Tuir Provérbios 17:17, oinsá mak ita bele sai belun neʼebé laran-metin?
5 Hanesan Aristarco, ita bele sai belun neʼebé laran-metin hodi kontinua apoia ita-nia irmaun-irmán sira iha tempu diʼak no mós “tempu susar”. (Lee Provérbios 17:17.) Depois hasoru susar ruma, karik ita-nia irmaun-irmán sira presiza nafatin hetan kmaan ba tempu kleur. Irmán Frances * nia aman mate no liutiha fulan tolu, ninia inan mós mate tanba kankru, nia hatete: “Haʼu sente katak problema neʼebé difisil kona ita ba tempu kleur. No haʼu agradese tebes ba belun diʼak sira neʼebé hanoin-hetan katak haʼu nafatin sente laran-kanek maski tempu barak liu tiha ona husi tempu neʼebé haʼu-nia inan-aman mate.”
6. Ita-nia laran-metin ba belun sira book ita atu halo saida?
6 Belun neʼebé laran-metin fó sira-nia tempu no enerjia atu apoia sira-nia irmaun-irmán. Porezemplu, doutór hatete ba irmaun Peter katak nia iha moras ida neʼebé lalais atu sai grave no nia sei mate. Peter nia feen Kathryn hatete: “Kaben-naʼin ida iha ami-nia kongregasaun mak tula ami bá hasoru doutór no iha tempu neʼe mak doutór hetan Peter nia moras. Kaben-naʼin neʼe deside kedas katak sira sei ajuda ami atu tahan situasaun susar neʼe no sira nafatin akompaña ami iha tempu hotu neʼebé ami presiza sira.” Ita sente kmaan duni hodi iha belun neʼebé loos neʼebé bele ajuda ita atu tahan ita-nia susar sira!
SAI BELUN DIʼAK HANESAN TÍKIKO
Hanesan Tíkiko, ita bele sai belun diʼak bainhira ema seluk hasoru susar (Haree parágrafu 7-9) *
7-8. Tuir Koloso 4:7-9, oinsá Tíkiko sai belun neʼebé diʼak?
7 Tíkiko mak ema Kristaun ida husi Ázia, Roma nia provínsia ida, no nia mak belun neʼebé Paulo bele tau fiar. (Após 20:4) Maizumenus iha tinan 55 EC, Paulo arranja atu halibur kontribuisaun hodi ajuda ema Kristaun sira iha Judeia, no karik nia husu Tíkiko atu ajuda halibur kontribuisaun. (2 Kor 8:18-20) Ikusmai bainhira Paulo tama komarka iha Roma ba dala primeiru, Tíkiko mak lori Paulo nia lia-menon. Nia lori Paulo nia karta no lia-menon ba kongregasaun sira iha Ázia atu anima sira.—Kol 4:7-9.
8 Tíkiko kontinua sai Paulo nia belun diʼak neʼebé Paulo bele tau fiar. (Tito 3:12) Iha tempu neʼebá, laʼós ema Kristaun hotu mak Paulo bele tau fiar hanesan Tíkiko. Maizumenus iha tinan 65 EC durante Paulo tama komarka ba dala segundu, Paulo hakerek katak mane Kristaun barak iha provínsia Ázia lakohi ransu ho Paulo, karik tanba sira taʼuk kontradór sira. (2 Tim 1:15) Maibé, Paulo bele tau fiar ba Tíkiko no fó nia knaar ida tan. (2 Tim 4:12) Klaru katak Paulo agradese tebes hodi iha belun diʼak hanesan Tíkiko.
9. Oinsá mak ita bele banati-tuir Tíkiko?
9 Ita bele banati-tuir Tíkiko hodi sai belun diʼak. Porezemplu, ita la promete deʼit atu fó ajuda ba irmaun-irmán sira, maibé ita mós halo tuir ita-nia promesa hodi ajuda sira. (Mt 5:37; Lc 16:10) Bainhira ema sira neʼebé presiza ajuda hatene katak sira bele tau fiar ba ita, sira sei sente kmaan duni. Tanbasá? Irmán ida esplika: “Ita bele sente kalma tanba hatene katak ema neʼebé oferese ajuda sei halo buat neʼebé nia promete ona.”
10. Tuir Provérbios 18:24, ema neʼebé hasoru susar ka laran-kanek bele hetan kmaan husi sé?
10 Ema sira neʼebé hasoru susar ka laran-kanek, dala barak sente kmaan kuandu fó sai sira-nia sentimentu ba belun diʼak. (Lee Provérbios 18:24.) Irmaun Bijay sente laran-kanek bainhira kongregasaun hasai ninia oan-mane. Bijay dehan: “Haʼu presiza fó sai haʼu-nia sentimentu ba belun neʼebé haʼu bele tau fiar.” Irmaun Carlos lakon ninia priviléjiu iha kongregasaun tanba halo sala. Carlos dehan: “Haʼu presiza belun neʼebé haʼu bele tau fiar atu haʼu la taʼuk fó sai haʼu-nia sentimentu.” Carlos sente katak katuas sira mak hanesan belun neʼe, no katuas sira ajuda nia atu hadiʼa ninia problema. Carlos mós sente kmaan tanba hatene katak katuas sira sei hatudu matenek no rai didiʼak ninia liafuan sira nuʼudar segredu.
11. Oinsá mak ita bele sai belun diʼak?
11 Atu bele sai belun diʼak, ita presiza haburas hahalok pasiénsia. Bainhira Zhanna nia laʼen husik nia, nia hetan kmaan hodi fó sai ninia sentimentu ba ninia belun diʼak. Nia hatete: “Sira rona ho pasiénsia maski karik haʼu repete beibeik haʼu-nia liafuan.” Ita mós bele sai belun neʼebé diʼak hodi rona didiʼak.
PRONTU ATU SERBÍ HANESAN MARCOS
Marcos nia laran-diʼak ajuda Paulo atu tahan susar, no ita mós bele ajuda ita-nia irmaun-irmán sira durante tempu susar (Haree parágrafu 12-14) *
12. Sé mak Marcos? Oinsá mak nia hatudu katak nia hakarak serbí ema seluk?
12 Marcos mak ema Kristaun Judeu ida husi Jeruzalein. Ninia primu Barnabé mak misionáriu neʼebé naran-boot. (Kol 4:10) Marcos nia família riku, maibé Marcos la tau uluk osan no sasán iha ninia moris. Iha Marcos nia moris tomak, nia hatudu katak nia prontu no kontente atu serbí ema seluk. Porezemplu, ba tempu balu nia serbí hamutuk ho apóstolu Paulo no Pedro, no karik Marcos ajuda tau matan ba sira-nia presiza. (Após 13:2-5; 1 Ped 5:13) Paulo dehan katak Marcos mak ninia “maluk serbisu-naʼin ba Maromak nia Ukun” no “ajuda-naʼin neʼebé hametin” nia.—Kol 4:10, 11, nota.
13. Oinsá mak 2 Timóteo 4:11 hatudu katak Paulo hafolin Marcos nia serbisu?
13 Marcos sai Paulo nia belun diʼak. Porezemplu, maizumenus iha tinan 65 EC bainhira Paulo tama komarka ba dala ikus iha Roma, nia hakerek karta segundu ba Timóteo. Iha karta neʼe Paulo husu Timóteo atu mai Roma hamutuk ho Marcos. (2 Tim 4:11) Klaru katak Paulo hafolin tebes Marcos nia serbisu neʼebé nia halo ona ho laran-metin, tan neʼe Paulo husu Marcos atu akompaña nia durante tempu importante neʼe. Marcos ajuda Paulo iha dalan oioin, karik lori ai-han ka buat neʼebé nia presiza atu hakerek ninia karta. Ita bele fiar katak apoia no anima neʼebé Paulo simu, ajuda nia atu tahan ninia loron ikus sira toʼo hetan kastigu-mate.
14-15. Mateus 7:12 hanorin saida mai ita kona-ba ajuda ema seluk?
14 Lee Mateus 7:12. Bainhira ita hasoru susar, ita agradese tebes ba maluk sira neʼebé ajuda ita. Ryan neʼebé ninia aman mate derrepente tanba asidente hatete: “Bainhira ita hasoru problema, susar atu halo atividade sira neʼebé baibain ita halo. Ita sente kmaan duni bainhira ema ruma ajuda ita, maski neʼe mak buat kiʼik deʼit.”
15 Se ita matan-moris no tau atensaun ba ema seluk, karik ita bele hatene dalan atu ajuda sira. Porezemplu, irmán ida deside atu ajuda Peter no Kathryn neʼebé temi ohin, hodi tula sira beibeik bá konsulta. Peter no Kathryn labele ona lori karreta, entaun irmán neʼe arranja irmaun-irmán sira iha kongregasaun atu troka malu tula Peter no Kathryn. Arranju neʼe ajuda ka lae? Kathryn hatete: “Ami sente hanesan naha todan ida hasai tiha husi ami-nia kabaas.” Keta haluha katak maski Ita halo buat kiʼik deʼit atu ajuda ema seluk, maibé ida-neʼe bele fó kmaan ba sira.
16. Lisaun importante saida mak ita bele aprende husi Marcos nia ezemplu kona-ba fó kmaan?
16 Dixípulu Marcos mak ema Kristaun ida neʼebé okupadu tebes. Marcos iha serbisu importante atu halo hodi serbí Jeová, inklui hakerek evanjellu Marcos. Maski nuneʼe, nia mós uza tempu atu fó kmaan ba Paulo, no Paulo hatene katak nia bele husu Marcos nia ajuda. Ohin loron mós iha ema neʼebé hatudu hahalok hanesan Marcos hodi fó kmaan ba ema seluk ho hakarak rasik. Irmán Angela agradese tebes kuandu ema hatudu hahalok hanesan neʼe ba nia kuandu ema oho ninia família ida. Angela dehan: “Bainhira belun sira hatudu katak sira hakarak duni atu ajuda, neʼe halo fasil ba ita atu hakbesik ba sira. Ita bele nota katak sira la dada an ka taʼuk atu ajuda.” Entaun diʼak atu husu ba Ita-nia an: ‘Ema koñese haʼu nuʼudar ema neʼebé hakarak atu fó kmaan ba maluk fiar-naʼin sira ka lae?’
HAKAʼAS AN FÓ KMAAN BA EMA SELUK
17. Hodi medita kona-ba 2 Korinto 1:3, 4, oinsá ida-neʼe book ita atu fó kmaan ba ema seluk?
17 Iha irmaun-irmán barak neʼebé presiza hetan kmaan. Karik ita bele fahe informasaun diʼak ruma neʼebé ema seluk uza atu fó kmaan ba ita. Irmán Nino neʼebé ninia avó-feto mate, dehan: “Jeová bele fó kmaan ba ema seluk liuhusi ita se ita husik Jeová uza ita.” (Lee 2 Korinto 1:3, 4.) Frances neʼebé temi ohin hatete: “Liafuan iha 2 Korinto 1:4 mak loos. Ita bele fahe ba ema seluk kmaan neʼebé ita simu.”
18. (a) Tanbasá ema balu karik taʼuk atu fó kmaan? (b) Oinsá ita bele fó kmaan ba ema seluk? Fó toʼok ezemplu.
18 Ita presiza buka dalan atu ajuda ema seluk maski ita sente taʼuk. Porezemplu, karik ita taʼuk tanba la hatene atu hatete saida ka halo saida ba ema neʼebé presiza hetan kmaan. Katuas ida naran Paulo hanoin-hetan oinsá ema balu hakaʼas an atu fó kmaan ba nia bainhira ninia aman mate. Nia hatete: “Haʼu bele nota katak la fasil ba sira atu hakbesik haʼu. Sira la hatene atu hatete saida. Maibé haʼu hafolin sira-nia hakaʼas an atu fó kmaan no apoia.” No irmaun Tajon neʼebé hasoru susar tanba rai-nakdoko makaʼas, dehan: “Tuir loloos, haʼu la hanoin-hetan mensajen hotu neʼebé ema haruka mai haʼu depois rai-nakdoko, maibé haʼu hanoin-hetan katak sira hanoin haʼu hodi buka-hatene haʼu-nia situasaun.” Ita bele fó kmaan ba ema seluk se ita hatudu katak ita hanoin sira.
19. Tanbasá Ita hakarak sai “ajuda-naʼin neʼebé fó kmaan boot” ba ema seluk?
19 Tanba mundu nia rohan besik ona, mundu neʼe sei kontinua sai aat liu no moris sei sai susar liután. (2 Tim 3:13) No ita sei presiza nafatin atu hetan kmaan tanba ita la perfeitu no halo sala beibeik. Razaun ida Paulo bele tahan ho laran-metin toʼo rohan mak tanba nia hetan kmaan husi maluk Kristaun sira. Mai ita hatudu laran-metin hanesan Aristarco, sai belun diʼak hanesan Tíkiko, no serbí ema seluk hanesan Marcos. Hodi halo nuneʼe, ita bele ajuda ita-nia irmaun-irmán sira atu kontinua serbí Jeová ho laran-metin.—1 Tes 3:2, 3.
^ par. 5 Apóstolu Paulo hasoru susar barak durante ninia moris. Durante tempu susar sira-neʼe, ninia maluk serbisu-naʼin balu fó kmaan ba nia. Ita sei estuda kona-ba hahalok tolu neʼebé ajuda maluk serbisu-naʼin sira-neʼe atu fó kmaan ba ema seluk. Ita mós sei aprende oinsá ita bele banati-tuir sira-nia ezemplu hodi fó ajuda ba ema seluk.
^ par. 5 Naran balu iha lisaun neʼe laʼós naran neʼebé loos.
KNANANUK 111 Iha razaun barak atu haksolok
