1. Planti wokman bilong Jehova i karim wanem ol hevi?

LONG olgeta hap bilong graun, hevi i painim planti wokman bilong Jehova na dispela i putim bikpela presa long ol na mekim ol i tingting planti. Ating yu lukim kain samting olsem long kongrigesen bilong yu. Sampela i kisim bikpela sik o wanpela ol i laikim tumas i dai. Sampela i bel hevi tru taim wanfamili o gutpela pren i lusim tok i tru. Ol narapela i karim hevi bilong bikpela disasta. Yumi mas strongim bel bilong olgeta wanbilip husat i karim ol kain hevi olsem. Hau bai yumi inap helpim ol?

2. Wai na sampela taim aposel Pol i nidim ol narapela long strongim em?

² Planti taim, aposel Pol i bungim ol bikpela hevi we klostu em inap lusim laip. (2 Kor. 11:23-28) Em i stori long “wanpela nil i sutim skin” bilong em; ating wanpela kain sik i painim em. (2 Kor. 12:7) Na tu, Pol i bel hevi tru taim wanwok bilong em, Demas, i lusim em “bikos [Demas] i laikim tumas ol samting bilong dispela taim.” (2 Tim. 4:10) Pol em wanpela bilong ol Kristen God i anointim, na em i save strongim ol narapela, tasol sampela taim em i nidim ol narapela long strongim em.—Rom 9:1, 2.

3. Husat lain i bin strongim Pol?

³ Pol i kisim helpim em i nidim. Long wanem rot? Jehova i yusim holi spirit long strongim em. (2 Kor. 4:7; Fili. 4:13) Jehova i yusim tu ol wanbilip Kristen long strongim Pol. Pol i tok sampela wanwok bilong em “i stap olsem helpim bilong strongim [em].” (Kol. 4:11) Em i kolim nem bilong sampela wanwok, em Aristarkus, Tikikus, na Mak. Ol i helpim Pol long sanap strong na karim hevi. Wanem ol pasin i stiaim ol dispela Kristen na ol inap strongim Pol? Hau bai yumi inap bihainim eksampel bilong  ol taim yumi laik strongim narapela narapela?

4. Wanem ol samting i soim olsem Aristarkus i bin stap gut long Pol?

⁴ Aristarkus em bilong Tesalonaika long Masedonia, na em i wanpela pren i stap gut long Pol. Nem bilong Aristarkus i kamap fes taim long stori bilong namba 3 misineri raun bilong Pol taim em i visitim Efesus. Aristarkus i raun wantaim Pol na bikpela lain manmeri i ran i go na pulim Aristarkus. (Apo. 19:29) Taim ol i lusim Aristarkus i go fri, em i no painim rot bilong lusim Pol na abrusim hevi, nogat, em i stap gut yet long raun wantaim Pol. Sampela mun bihain ol i go long Grik, na Aristarkus i raun yet wantaim Pol maski ol birua i wok yet long painim rot bilong kilim Pol. (Apo. 20:2-4) Long 58 C.E. samting, taim Pol i kalap long sip olsem kalabusman bilong i go long Rom, Aristarkus i go wantaim em na tupela i strongim narapela narapela taim sip i bagarap namel long solwara. (Apo. 27:1, 2, 41) Taim ol i kamap long Rom, Aristarkus i stap wankalabus bilong Pol inap sampela haptaim. (Kol. 4:10) Tru tumas, Aristarkus i stap gut long Pol olsem wanwok na pren na dispela i bin strongim tru Pol!

5. Olsem Provep 17:17 i kamapim, yumi mas mekim wanem na bai yumi inap stap gut long ol pren?

⁵ Olsem Aristarkus, yumi inap stap gut long ol wanbilip taim yumi sambai long ol long gutpela taim na “taim bilong hevi.” (Ritim Provep 17:17.) Maski wanbilip i karim hevi na dispela hevi i pinis, ating em bai nidim yet ol narapela long strongim em. Frances * em wanpela sista bilong yumi husat i bel hevi tru taim papa bilong em i dai long sik kensa na 3-pela mun bihain, mama bilong em tu i dai long sik kensa. Em i tok: “Taim bikpela hevi i kamap, dispela inap bagarapim tru bel bilong yumi na bel hevi inap stap longpela taim. Mi pilim tru pasin bilong ol pren long i stap gut long mi; ol i save olsem mi bel sori yet maski papamama i dai inap sampela yia i go pinis.”

6. Olsem wanem yumi inap stap gut long ol wanbilip?

⁶ Yumi inap stap gut long ol wanbilip taim yumi daunim laik bilong yumi na sambai long  ol. Tingim eksampel bilong Peter, em wanpela brata. Dokta i tokim em olsem em i kisim bikpela sik na em bai lusim laip bilong em. Kathryn em meri bilong Peter, na em i tok: “Tupela marit long kongrigesen i bringim mitupela i go long dokta na dokta i toksave long sik bilong Peter. Long dispela taim, dispela tupela marit i mekim disisen olsem ol bai sambai long mipela na helpim mipela long karim dispela hevi, na oltaim ol i save helpim mipela taim mipela i nidim helpim.” Tru tumas, yumi inap kisim bel isi taim ol gutpela pren i helpim yumi long sanap strong na karim hevi!

7-8. Olsem Kolosi 4:7-9 i kamapim, olsem wanem Tikikus i stap olsem pren em Pol inap trastim?

⁷ Tikikus em wanpela Kristen bilong provins Esia long Rom, na em i stap olsem gutpela pren em Pol inap trastim. (Apo. 20:4) Long 55 C.E. samting, Pol i oganaisim wok bilong bungim mani bilong helpim ol Kristen long Judia, na ating em i makim Tikikus long go pas long sapotim dispela wok. (2 Kor. 8:18-20) Taim Pol i stap kalabus long Rom long namba 1 taim, Tikikus i mekim wok olsem man bilong karim tok i go i kam. Em i bringim ol pas Pol i raitim na ol tok Pol i mekim bilong strongim ol kongrigesen long Esia.—Kol. 4:7-9.

⁸ Tikikus i stap olsem pren em Pol inap trastim. (Tai. 3:12) Long dispela taim bipo, i no olgeta Kristen i redi long sambai long Pol. Long 65 C.E. samting, taim Pol i stap kalabus long namba 2 taim, em i raitim pas na tok planti brata long provins Esia i givim baksait long em; ating ol i mekim olsem bikos ol i pret long ol birua. (2 Tim. 1:15) Tasol Pol i trastim Tikikus na givim narapela asainmen long em. (2 Tim. 4:12) Pol i amamas tru olsem Tikikus i stap gutpela pren bilong em.

9. Olsem wanem yumi inap bihainim eksampel bilong Tikikus?

⁹ Yumi inap bihainim eksampel bilong Tikikus na stap olsem pren em narapela inap trastim. Eksampel: Yumi tok long helpim ol wanbilip husat i nidim helpim, na yumi mekim olgeta kain liklik samting bilong helpim ol. (Mat. 5:37; Luk 16:10) Taim ol i trastim yumi na save olsem yumi bai helpim ol, dispela bai mekim isi bel bilong ol. Wanpela sista i tok: “Yu stap bel isi bikos yu save olsem man i tok  promis long helpim yu bai kam long taim stret na helpim yu olsem em i bin tok long mekim.”

10. Olsem Provep 18:24 i kamapim, ol lain em wanpela samting i putim hevi long ol o mekim ol i bel hevi, ol inap kisim bel isi long wanem rot?

¹⁰ Taim wanpela samting i putim hevi long man o mekim em i bel hevi, em inap stap bel isi sapos em i toktok wantaim wanpela pren em i trastim na autim ol wari bilong em. (Ritim Provep 18:24.) Bijay i bel hevi tru taim pikinini man bilong em i raus long kongrigesen. Em i tok: “Mi mas autim wari bilong mi long wanpela pren mi inap trastim.” Carlos i mekim rong, olsem na em i lusim gutpela wok em i holim insait long kongrigesen. Em i tok: “Mi nidim pren mi inap trastim na bai mi ken autim olgeta tingting na wari bilong mi na mi no holim tupela tingting.” Carlos i autim olgeta wari bilong em long ol elda, na ol i helpim em long karim dispela hevi. Em i stap bel isi bikos em i save olsem ol elda bai bihainim savetingting na ol i no inap tokim ol narapela long dispela samting.

11. Yumi mas mekim wanem na bai ol narapela inap trastim yumi na autim olgeta wari bilong ol?

¹¹ Yumi mas kisim pasin bilong i no les kwik na bai ol narapela inap trastim yumi na autim olgeta wari bilong ol. Taim man bilong Zhanna i lusim em, Zhanna i toktok wantaim ol gutpela pren na autim bel hevi bilong em na dispela i helpim em long kisim bel isi. Em i tok: “Ol i stap isi na putim yau na ol i no les kwik maski mi stori long wankain samting inap planti taim.” Yu tu inap stap olsem gutpela pren sapos yu kisim pasin bilong putim gut yau.

12. (a) Mak em i husat? (b) Olsem wanem Mak i soim olsem em i redi long helpim ol narapela?

¹² Mak, narapela nem bilong em Jon, em wanpela Kristen husat i stap long Jerusalem na em i bilong lain Juda. Kasen brata bilong em, Barnabas, i mekim wok misineri na raun long planti hap, olsem na planti man i save long em. (Kol. 4:10) Ating famili bilong Mak i gat planti mani kago na gutpela sindaun, tasol Mak i no tingim mani kago olsem namba 1 samting. Long laip olgeta bilong Mak, em i redi na amamas long helpim ol narapela. Eksampel: Sampela taim em i raun wantaim aposel Pol na aposel Pita na helpim ol long inapim wok misineri bilong ol; ating em i helpim ol long mekim ol kain liklik wok olsem baim kaikai na painim ples slip. (Apo. 13:2-5; 1 Pita 5:13) Pol i tok Mak i stap olsem “wanwok bilong [em] long mekim wok bilong Kingdom Bilong God,” na “helpim bilong strongim [em].”—Kol. 4:10, 11.

13. Olsem wanem 2 Timoti 4:11 i soim olsem Pol i pilim tru ol wok em Mak i bin mekim?

¹³ Mak i kamap gutpela pren bilong Pol. Long 65 C.E. samting, taim Pol i kalabus long Rom long laspela taim, em i raitim namba 2 pas i go long Timoti. Long dispela pas, Pol i askim Timoti long go long Rom na bringim Mak i go wantaim em. (2 Tim. 4:11) Pol i pilim tru ol wok em Mak i bin mekim bilong helpim em, olsem na em i laik tru long lukim Mak paslain long em i dai. Ating Mak i helpim Pol long sait bilong kaikai o bringim ol skrol na ing em Pol i yusim long raitim ol pas. Mak i sambai long Pol na strongim em, na ating dispela i helpim Pol long sanap strong na karim hevi long ol laspela de paslain long em i dai long han bilong ol birua.

14-15. Olsem wanem tok bilong Matyu 7:12 i skulim yumi long rot bilong helpim ol narapela?

¹⁴ Ritim Matyu 7:12. Taim yumi karim hevi, yumi save pilim tru ol samting ol narapela i mekim bilong helpim yumi! Ryan i karim hevi taim papa bilong em i dai long wanpela eksiden, na em i tok: “I gat planti nomol samting  em yumi save mekim long olgeta de, tasol i hatwok long mekim ol dispela samting taim yumi bel hevi. Taim narapela i helpim yu long mekim wanpela wok—maski em liklik wok tru—dispela inap givim bel isi long yu.”

¹⁵ Sapos yumi gat pasin bilong putim gut yau na skelim gut ol samting, yumi inap luksave long ol samting yumi ken mekim bilong helpim ol narapela. Eksampel: Wanpela sista i helpim Peter na Kathryn, em yumi stori pinis long ol, long go long olgeta apoinmen bilong ol long haus sik. Peter na Kathryn i no inap draiv moa, olsem na dispela sista i stretim wanpela sediul na bai ol bratasista long kongrigesen i ken helpim long draivim Peter na Kathryn i go long haus sik. Peter na Kathryn i pilim olsem wanem? Kathryn i tok: “Mipela i pilim olsem ol i rausim wanpela samting i putim bikpela hevi long mipela.” Tingim: Olgeta kain liklik wok i gat strong long mekim isi bel bilong ol narapela.

16. Yumi inap kisim wanem skul long eksampel bilong Mak?

¹⁶ Mak em wanwok bilong aposel Pol, na em i bin mekim planti bikpela wok. Wanpela wok em olsem, em i bin raitim Gutnius Bilong Mak. Maski i olsem, Mak i bin strongim Pol na Pol i no surik long askim Mak long helpim em. Angela i bel hevi tru taim wanfamili bilong em i dai long han bilong ol birua, na em i pilim tru gutpela pasin bilong ol wanbilip long mekim isi bel bilong em. Em i tok: “Taim ol pren i redi long helpim mi, em isi long mi inap toktok wantaim ol. Mi luksave olsem ol i no holim tupela tingting long helpim mi.” Yumi ken askim yumi yet olsem, ‘Mi gat nem olsem man o meri husat i save redi long strongim ol wanbilip?’

17. Taim yumi tingim tingim tok i stap long 2 Korin 1:3, 4, olsem wanem dispela inap kirapim yumi long mekim isi bel bilong ol narapela?

¹⁷ I gat ol bratasista em ol i nidim ol narapela long mekim isi bel bilong ol. Yumi inap yusim ol wankain tok em ol narapela i bin yusim bilong mekim isi bel bilong yumi. Nino em wanpela sista, na bubu meri bilong em i dai. Em i tok: “Jehova inap yusim yumi long mekim isi bel bilong ol narapela sapos yumi yet i larim Em i yusim yumi.” (Ritim 2 Korin 1:3, 4.) Frances em yumi stori pinis long em i tok: “Tok bilong 2 Korin 1:4 i stret tru. Taim yumi  laik mekim isi bel bilong ol narapela, yumi ken yusim ol tok em ol narapela i bin yusim bilong mekim isi bel bilong yumi.”

18. (a) Wai na sampela inap surik long mekim isi bel bilong ol narapela? (b) Hau bai yumi inap mekim isi bel bilong ol narapela? Stori long wanpela eksampel.

¹⁸ Yumi no ken larim ol tingting kranki i pasim yumi long mekim isi bel bilong ol narapela. Ating yumi tingting planti long tok yumi bai mekim o samting yumi inap mekim bilong helpim wanpela husat i stap bel hevi tru. Paul em wanpela elda, na em i tingim bek hau ol narapela i mekim isi bel bilong em taim papa bilong em i dai. Em i tok: “Mi luksave olsem ol i pilim hatwok long toktok wantaim mi. Ol i no save long tok ol bai mekim. Tasol ol i laik tru long helpim na mekim isi bel bilong mi, na mi pilim tru gutpela pasin bilong ol.” Tajon em wanpela brata, na em i stori long samting i kamap bihain long bikpela guria i kamap long ples em i stap long en. Em i tok: “Planti lain i salim mesis long mi, tasol tru tru mi no inap tingim olgeta tok i stap long ol dispela mesis. Samting mi tingim em olsem, ol i wari long mi, olsem na ol i salim mesis.” Yumi inap mekim isi bel bilong ol narapela taim yumi soim olsem yumi tingim tru ol.

19. Wai na yu laik “stap olsem helpim bilong strongim” ol narapela?

¹⁹ Klostu tru nau, haptaim nogut bilong nau bai pinis, olsem na pasin na tingting bilong ol man bai kamap nogut olgeta na dispela bai putim bikpela hevi moa long olgeta manmeri. (2 Tim. 3:13) Yumi gat sin na yumi bai mekim yet ol popaia, olsem na yumi bai nidim yet ol narapela long mekim isi bel bilong yumi. Wanpela risen na aposel Pol inap sanap strong na karim hevi i go inap long taim em i dai em olsem: Ol wanbilip i mekim isi bel bilong em na strongim em. Olsem Aristarkus, yumi mas stap gut long ol narapela; olsem Tikikus, yumi mas soim olsem ol narapela inap trastim yumi; na olsem Mak, yumi mas redi long helpim ol narapela. Long dispela rot, yumi inap helpim ol wanbilip long sanap strong na holimpas bilip.—1 Tes. 3:2, 3.