1. ¿Ambe ka ambe jimboksï no sési nitamakuarhisïni uánikua erachicha engaksï Jeobani marhuakujka?

INTERU parhakpini jimbo, uánikua Jeobaeri marhuarichaksï no sési ambe nitamakuarhisïndi ka ini ambe jimboksï niárasïndi kánikua no sési pʼikuarherani. Jamberiksï juchari kúnguarhikuarhu anapuecha indeni ambe nitamakuarhini jati. Máruksï uinhamu pʼamenchasïndi oksï uarhiranchani nemani engaksï kánikua xénchenga. Máteruechaksï kánikua kómu pʼikuarherasïndi jimboka kʼumanchikuarhu anapu ma o amigu ma nóteru uékaskia Jeobani marhuakuni. Ka máruksï ístu kómu nitamakuarhisïndi enga no sési ambe úkuarhijka komu kʼéri jenchekua ma o enga kʼéri janijka. Iámindu imechaksï uétarhinchasïndi eskachi sési pʼikuastantauaka. ¿Nénachi uá jarhuataani?

2. ¿Andisï ménisï Pablu uétarhinchapi eskaksï sési pʼikuastantapiringa?

² Apostuli Pablu, someni sáno uarhispti (2 Kor. 11:23-28). Ístu, jatsispti para tekaantani ambe ma enga ísïpka komueska chekamikua ma, jamberi pʼamenchakua máepti (2 Kor. 12:7). Ístu, kánikua no sési pʼikuarheraspti enga Demasi, achamasï ma enga Pablu jingoni marhuauenga, jurajkupka jimboka xáni tsitispka “ini parhakpinirhu anapu ambe” (2 Tim. 4:10). Nájkiruka Pablu erakukata máepka enga no sáni chéparini jánguarhintenga jarhuataani máteruechani, ménisï niáraspti no sési pʼikuarherani (Rom. 9:1, 2).

3. ¿Jeoba néna sési pʼikuastantaspi Pabluni?

³ Pablu niáraspti sési pʼikuastanhantani jiáni enga uétarhinchani japka. ¿Nénaksï sési pʼikuastantaspi? Jeoba imeri espiritu santuni úraspti para uinhaperantani (2 Kor. 4:7). Peru ístu Jeoba úraaspti erachichani. Apostuli Pablu uandaspti eskaksï máru niáraspka kánikua uinhaperantani (Kol. 4:11). Ima uandaspti eskaksï máru engaksï sési pʼikuastantapka ka ístu jarhuatani para ima úni tekaantani, jindespkaksï Aristarku, Tíkiku ka Markusï. ¿Ambeksï xarhataspi i tanimu kristianuecha paraksï úni sési pʼikuastantani?  ¿Nénachi uá májkueni úni eskaksï i tanimu kristianuecha jiáni engachi uékaaka sési pʼikuastantaani máteruechani?

4. ¿Néna xarhataspi Aristarku eska ambakiti amigu máespka?

⁴ Aristarku ambakiti amigu máespti Pablueri. Ima Tesalonika anapuespti, ireta ma enga Masedonia japka. Primeru xanhari enga Biblia uandajka Aristarkueri ambe, jiánispti enga Pablu jingoni japka jini Éfesu enga apostuli imeri terseru biaji úni jámaenga para aianhpini. Jiniksï máru kʼuiripuecha jupikaspti Aristarkuni (Uku. 19:29). Engaksï jurajkupkia, no eratsespti sïpakuarhini, sánderu sési, no jurajkuspti Pabluni ka jima pakaraspti imani jingoni. Máru kutsï tátsekua jini Gresia, Aristarku útasï Pablu jingoni jámaxapti engaksï máru kʼuiripuecha uékenga uándikuni Pabluni (Uku. 20:2-4). Uéxurhini 58 jimbo ísï, engaksï Pabluni jupikakata pápka paraksï Roma ónhani, Aristarku imani jingoni niraspti nájkiruka xáni iauanipka ka márkuksï no sési nitamakuarhispti marirhu engaksï barkurhu nirani jápka (Uku. 27:1, 2, 41). Ka peeka Pablu jingoni pakarapka ma tiempu jini Roma, nani enga ima ónhakata japka (Kol. 4:10). Jamberi jimbosï Pablu xáni sési pʼikuarherendi imeri amigu jingoni enga no méni jurajkupka.

5. Eska na uandajka Proverbios 17:17, ¿nénachi uá ambakiti amigu máeni?

⁵ Uákachi ambakiti amigu máeni ísï eska Aristarku engachi juchari erachicha jingoni jauaka jiáni engaksï sési nitamakuarhini jauaka ka ístu jiáni engaksï uandanhiata ambe jatsiaka (arhinta je Proverbios 17:17). Jamberiksï erachicha útasï uétarhinchani jauati eskachi jarhuatauaka, nájkiruka nitamakia uandanhiata. Por ejemplu Francisca, * orheta táti jembani uarhiranchaspti ka ísï tanimu kutsï jimbojku amambani. Ima uandasïndi: “Ióndasïngachi sési pʼikuarherantani engachi no sési nitamakuarhijka tsʼéjkukuecha jimbo. Kánikua jukaparharasïnga ambakiti amiguechani jatsiani engaksï miájka eskani útasï no sési pʼikuarheraxaka nájkiruka ióni nitamakia engaksï juchiti táticha uarhika”.

6. ¿Ambechi uá engachi ambakiti amigu máeska?

⁶ Ambakiti amiguechaksï úrasïndi imecheri tiempu ka uinhapikua para jarhuataani  imecheri erachichani. Ju je exeni ambe enga nitamakuarhipka erachi ma enga arhinhajka Pablo, ima kʼéri pʼamenchakua ma exeminhantaspti enga jimbo úpiringa uarhini. Imeri témba Catalina, uandasïndi: “Kúnguarhikuarhu anapu temungurhiri ma, pásptijtsïni doktori jingoni jiáni engajtsïni aiángupka ambe enga Pablo pʼamenchani japka. Jiáni mismuksï uandaspti eskajtsïni no jandiajku jurajkupiringa ka eskajtsïni jarhuatapiringa tekaantani engachi xáni no sési nitamakuarhini japka ka méntkisïksï juchantsïni jingoni jarhasïndi jiáni engachi uétarhinchajka”. ¿No ísïski eskajtsïni kánikua uinhaperantasïnga ambakiti amiguechani jatsiani engajtsïni jarhuatajka jiáni engachi tsʼéjkukuechani jatsiajka?

7, 8. Eska na arhijka Kolosasi 4:7-9, ¿néna xarhataspi Tíkiku eska mintsinharhikuespka?

⁷ Tíkiku, kristianu ma enga Asia anapuepka, jindespti para Pablu amigu ma enga kánikua mintsinharhikuepka (Uku. 20:4). Uéxurhinisï 55 jimbo, apostuli Pablu úspti eska tumina tánanhapiringa para Judea anapuechani jarhuataani ka jamberi Tíkikuni arhipti eska jarhuatapiringa indeni ánchikuarhita jingoni (2 Kor. 8:18-20). Tátsekua, primeru uelta enga Pablu ónhakata japka jini Roma, Tíkiku paasïrendi apostuli Pablueri karakatechani imani kúnguarhikuecharhu engaksï Asia japka, ka enga uinhaperpintenga imani ambe jingoni enga Pablu uandenga (Kol. 4:7-9).

⁸ Tíkiku, seguirixapti ambakiti amigu máeni Pablueri (Titu 3:12). Imani jurhiatikuecha jimbo, nóksï iámindu kristianuecha xáni mintsinharhikuespti eska Tíkiku. Por ejemplu, enga apostuli Pablu ménderu Roma ónhakata japka, uéxurhini 65 ísï, karaspti eska uánikua Asia anapu kristianuechaksï no uékasïrenga imani jingoni kúnguarhini, jamberi jimbokaksï chérhiasïrenga imechani engaksï no jiókuarhienga jurhimbikueri ambe (2 Tim. 1:15). Peru mintsinharhisïrendi Tíkikuni ka jimbosï íntskupti máteru ánchikuarhita (2 Tim. 4:12). Xarharasïndi eska apostuli jukaparharasïrenga ambakiti amiguni ma jatsini komueska Tíkiku.

9. ¿Nénachi uá májkueni úni eska Tíkiku?

⁹ ¿Nénachi uá mintsinharhikueni ísï eska Tíkiku? Ma ambe engachi uáka úni, jindesti jarhuajpini  ísï eskachi na aiatspikia (Mat. 5:37; Luk. 16:10). Imecha engaksï uétarhinchajka jarhuajperata, kánikuaksï sési pʼikuarherasïndi engaksï mítejka eskajtsïni uáka mintsikani. Pirenchi ma uandasïndi andi: “Sésiri pʼikuarherasïnga jimbokari míteska eskakini ima kʼuiripu meru jiáni jarhuataaka engari uétarhinchani jauaka, ísï eskakini na aiachika”.

10. Ísï eska na arhijka Proverbios 18:24, ¿néchaksï uá sési pʼikuastantani imani enga tsʼéjkukua ma nitamakuarhini jarhajka o imani enga no sési pʼikuarherani jarhajka?

¹⁰ Imecha engaksï tsʼéjkukua ma nitamakuarhini jarhajka, kánikuaksï sési pʼikuarherasïndi engaksï uandontskuarhejka nemani jingoni enga mintsinharhikueka (arhinta je Proverbios 18:24). Ísï pʼikuarheraspti erachi ma enga Victor arhinhajka. Enga uájpa petanhantapka kúnguarhikuarhu, uandaspti: “Uétarhinchasïrenga aiangukuarhini nemani engani mintsikenga na engani pʼikuarherani japka”. Máteru erachi enga Carlos arhinhajka, úspti ambe ma enga jimbo nóteru úpiringuia ísï marhuani kúnguarhikuarhu eska na úni japka. Uandantasïndi: “Uétarhinchasïrenga nemani jingoni uandontskuarheni engarini no arhinchapiringa”. Orhejtsïkutichaksï jarhuataspti paraka úpiringa orhepani uérakuni imani ambe enga nitamakuarhini japka. Ístu, no uandanhiasïrendi jimboka mítespka eskaksï orhejtsïkuticha no nemani aiangusïrenga ambe enga ima uandontskuarhikuauenga.

11. ¿Ambechi uá úni parajtsïni máteruecha mintsinharhini?

¹¹ Parachi úni mintsinharhikueni, jatsiskachi para tekaantstiini. Por ejemplu, ¿ambe jarhuataspi Sarani enga kómu pʼikuarherani japka jimboka imeri uámba jurajkuspka? Uandontskuarheni imeri amigu jembecha jingoni na enga pʼikuarherani japka. Ima uandasïndi: “Nájkirukani jamberi someni aiangukuarheapkia ambe ma, imechajtsïni tekaantskua jingoni kurhajchasïrendi”. Juchajtuchi ambakiti amiguecheuaka engachi jingontku kurhajchaaska máteruechani.

12. ¿Néspi Markusï, ka néna xarhataspi eska jingontku jarhasïrenga para jarhuajpini?

¹² Markusï, kristianu judiu máespti enga Jerusaleni anapuepka. Imeri primu Bernabe aianhpiri máespti enga kánikua mítekatepka (Kol. 4:10, TNM). Markusïri familia jatsikuarhirispti, peru inde ambe no sánderu jukaparhakuespti para ima. Méntkisï xarhataspti eska jingontku jarhasïrenga para jarhuajpini ka eska kánikua sési pʼikuarherasïrenga máteruechani jarhuataani. Por ejemplu, uánikua xanhari niraspti Pabluni ka Pedruni jingoni engaksï jamberi imecha úpiringa imecheri ánchikuarhitani. Enga nirenga pámbitaani, Markusï piásïrendi tʼirekua ambe, exeni nani engaksï pakarapiringa mintsikuarhini o máteru ambe jingoni jarhuataani (Uku. 13:2-5; 1 Ped. 5:13). Pablu uandaspti eska Markusï jindespka ma enga “jarhuatani japka para aianhpini Diosïri Juramukueri ambe” ka enga kánikua uinhaperantapka (Kol. 4:10, 11).

13. ¿Néna xarhatasïni 2 Timoteo 4:11 eska Pablu jukaparharasïrenga ambe enga xáni úpka Markusï?

¹³ Markusï ka Pablu, niárasptiksï kánikua sési pájperani. ¿Andichisï ísï uandajki? Jimboka enga apostuli últimu xanhari ónhakata japka jini Roma, uéxurhini 65 jimbo, karaspti segundu Karakata para Timoteo. Indeni karakata jimbo, arhispti Timoteuni eska nipiringa Roma ka eska Markusïni pájtapiringa (2 Tim. 4:11). Pablu kánikua jukaparharasïrendi ambe enga xáni úpka Markusï, ka jimbosï uandapti eska imani jingoni pakarapiringa imani tiempu jimbo enga kánikua úkua jukapka para Pablu. Markusï mámaru ambe ústi para Pabluni jarhuatani, jamberi ima pákuendi tʼirekua o imani ambe enga Pablu úrapiringa para kartechani uáni. Na engaksï jarhuatapka ka uinhaperantani Pabluni, kánikua jarhuatapti para úni tekaantani imani jurhiatikuecha jimbo ante deksï uándikuni.

14, 15. ¿Nénajtsïni jarhuatasïni Mateu 7:12 parachi míteni nénachi uá jarhuataani máteruchani?

 ¹⁴ (Arhinta je Mateu 7:12). Engachi no sési ambe nitamakuarhini jarhajka, mintsita jingonchi jaiapanhikuantasïnga imechani engajtsïni jarhuatajka. Juan, enga ma repentku uarhiranchapka táti jembani aksidenti ma jimbo, uandasïndi: “Jiáni engari kómu nitamakuarhini jarhajka, ísïri pʼikuarherasïnga enajkiri no uá úni imani ambe engari pauani pauani újka. Kánikuari jukaparharasïnga engaksïni máteruecha jarhuatajka, nájkiruka ísï xarharajka enajki no ma ambee”.

¹⁵ Engachi pendienti jarhaska erachichani jimbo, exeakachi nénachi uá jarhuataani. Ju je ménderu exeni ambe engaksï Pablo ka Catalina nitamakuarhipka, engachi párrafu 6 uandaaka. Pirenchi ma eratsispti jarhuataani parakaksï imecha úpiringa doktori jingoni nirani jarhani. Jimbokaksï tsimarhani nóteru uénguia karruni xanhatatani, pirenchi, lista ma úspti kúnguarhikuarhu anapu erachicheri engaksï aiakukuarhipka doktori jingoni paani jarhani. ¿Néna jarhuataaspi i ambe? Catalina uandasïndi eskaksï kánikua sési pʼikuarheraspka erachicheri jarhuajperata jimbo. Ju je méntkisï exeni na enga xáni jarhuataaka nemani enga no sési nitamakuarhini jauaka ambe engachi uáka imani jimbo, nájkiruka sapichitu ambeuaka.

16. ¿Ambechi jorhenguarhisïni Markusïri ejemplueri?

¹⁶ Ju je ménderu exeni Makusïri ejempluni, enga primeru siglurhu irekapka, seguru eska ima uánikua ambe uénga. Jeoba kʼérati ánchikuarhitechani íntsaaspti, komu para Ebanjeliuni ma karani. Nájkiruka xáni uánikua ambe jatsipka para úni, arhutaspti tiempu para Pabluni uinhaperantani ka Pablu mintsinharhisïrendi para jarhuajperata kúrhakuni. Engaksï Ángelaeri mama kʼérini uandikupka, ima kánikua jukaparharaspti engaksï imecha engaksï uinhaperantapka májkueni úpka eska Markusï. Ángela uandantasïndi: “Engaksïni erachicha meru uéjka jarhuatani, no úkua jukasïndi andarhieraani. Méntkisïksïni jarhuatasïndi ka tsípikua jingoni”. Ísï jimbo, ju je kurhamarhikuarhini: “¿Ísïjtsïni exesïni máteruecha eskani jingontkuni jarhasïnga parani sési pʼikuastantaani erachichani?”.

17. ¿Ambechi uá engachi eratsintaska ambe enga 2 Korintu 1:3, 4 arhijka?

¹⁷ No úkua jukasti míteni náki erachi o pirenchi  uétarhinchaxaki parachi sési pʼikuastantani. Jamberi parachi úni uinhaperantaani, uákachi imani ambe arhiani engajtsïni máteruecha arhipka parajtsïni uinhaperantani. Nina, pirenchi ma enga mama kʼérini uarhiranchaka, uandasïndi: “Engachi jurajkuska eskajtsïni Jeoba úraaka, uákachi sési pʼikuastantaani máteruechani” (arhinta je 2 Korintu 1:3, 4). Ka Francisca, engachi párrafu 5 uandaka, uandasïndi: “Meru ísïsti ambe enga 2 Korintu 1:4 uandajka. Uákachi májkueni uinhaperantaani máteruechani ísï eskachi jucha na uinhaperanhantaka”.

18. a) ¿Andiksïsï máru chéjki sési pʼikuastantaani máteruechani? b) ¿Nénachi uá uinhaperantaani máteruechani? Jatsiku je ejemplu ma.

¹⁸ Jatsiskachi para exeni néna jarhuataani máteruechani engaksï no sési nitamakuarhini jauaka, nájkirukachi no seguru pʼikuarheraaka. Por ejemplu, jamberichi chéjka no jánhaskani ambe uandani o ambe úni nemani jimbo enga no sési nitamakuarhini jaka. Orhejtsïkuti ma enga José arhinhajka miásïndi ambe engaksï úpka erachicha jiáni enga imeri táti jemba uarhipka. Ima uandasïndi: “Exesïrenga eskaksï úkua jukanchasïrenga jíndeni jingoni uandontskuarheni. Nóksï jánhaskasïrendi ambejtsïni arhini. Peruni kánikua jukaparharasïnga engajtsïni uékenga jarhuatani”. Ka erachi ma enga Tomás arhinhajka arini ambe uandaspti enga na kʼéri jenchekua ma nitamapkia: “No miásïnga ambe engaksï xáni arhienga mensajicha engajtsïni axachiapka ísï tátsekua enga na nitamapkia kʼéri jenchekua. Ambe engani kʼóruni miájka, jindesti eska imecha engajtsïni karachipka, uandanhiasïrenga jíndeni jimbo ka uékasïrendiksï míteni sini sési jarhaspi”. Meru ísïsti eska kánikua jarhuajpisïnga uandanhiani máteruechani jimbo.

19. ¿Andichisï uéjki sési pʼikuastantaani máteruechani?

¹⁹ Jimboka nóteru ióni kueratasïnguia para kʼamajkunhani i parhakpini, sánderu no sési jánhaskuarhini jauati ka sánderu úkua jukaati orhepani uérani (2 Tim. 3:13). Ístuchi no perfektueska ka ménisïchi no sési ambe uáka. Ini ambe jimbo, uétarhinchanchi jauaka eskachi sési pʼikuastanhantaaka. Apostuli Pablu úspti tekaantani asta jiáni jamberi enga uarhipka jimbokaksï erachicha uinhaperantaspka. Ísï jimbo, ju je ambakiti amigu máeni ísï eska Aristarku, mintsinharhikueni ísï eska Tíkiku ka jarhuajpini ísï eska Markusï. Engachi ísï úska, jarhuatauakachi juchari erachichani paraksï no méni jurajkuni Jeobani (1 Tes. 3:2, 3).