1. Кыӵе шуг-секытъёсын Иеговалэн тросэз ужась-тыршисьёсыз пумиськыло?

 БЫДЭС дунне вылын Иеговалэн тросэз ужась-тыршисьёсыз пумиськыло шуг-секытъёсын, кудъёсыз соосты сюлмаськыто но вӧсь каро. Сыӵе вын-агайёс но сузэр-апайёс тӥляд кенешады но вань, дыр. Кин ке но секыт висёнэн нюръяське. Кинлэн ке но матысь адямиез кулӥз. Кинлы ке но чидантэм вӧсь луэ, малы ке шуоно солэн матысь ӵыжы-выжыез яке эшез Иеговалы ужам-тыршемысь дугдӥз. Нош кин ке но инкуазь шимучыръёслэн бервылъёсыз сэрен курадӟе. Вань та вын-агайёслы но сузэр-апайёслы юрттэт но буйгатон кулэ. Кызьы ми соослы юрттыны быгатӥськомы?

2. Малы апостол Павеллы куддыръя юрттэт кулэ вал?

² Апостол Павел трос пол пумиськылӥз шуг-секытъёсын, кудъёсыз сэрен со кулыны но быгатысал (2 Кор. 11:23—28). Озьы ик сое курадӟытӥз «ши» — со тазалыкеныз герӟаськем шуг-секытъёс вал, вылды (2 Кор. 12:7). Со сяна, Павел туж куректӥз, куке Димас, кудӥз одӥг дыре соин ӵош ужаз-тыршиз, «туала улон даурлы синмаськыса», сое кельтӥз (2 Тим. 4:10). Павел кышкасьтэм зырӟем христиан мурт вал, кудӥз, ассэ жалятэк, мукетъёсызлы юрттылӥз. Озьы ке но солэн но мылкыдыз куддыръя куашкалляз (Рим. 9:1, 2).

3. Кызьы Иегова Павелэз буйгатылӥз но юнматылӥз?

³ Шедьтӥз-а Павел буйгатон но юрттэт, кудӥз солы туж кулэ вал? Бен, шедьтӥз. Иегова святой духез пыр сое юнматылӥз (2 Кор. 4:7). Озьы ик Инмар буйгатылӥз сое мукет христианъёс пыр. Куд-ог ӵош ужась-тыршисьёсыз сярысь Павел  гожтӥз: «Соос мынам шумпотон вайисьёсы» (Кол. 4:11). Соос пӧлын, кинъёсты со нимзыя вераз,— Аристарх, Тихик но Марк. Соос Павелэз юнматӥзы но юрттӥзы солы секыт дыръёсты чиданы. Кыӵе сямъёссылы луыса та куинь христиан муртъёс Павеллы юрттыны быгатӥзы? Кызьы ми соослэсь адӟем карыны быгатӥськомы, куке ог-огмес буйгатыны но юнматыны тыршиськомы?

4. Малы вераны луэ, Аристрах Павеллы зэмос оскымон эш вал шуыса?

⁴ Аристарх, Македонияын интыяськем Фессалоника карысь христиан мурт, Павеллы оскымон эш вал. Аристарх сярысь Библиысь ми нырысетӥзэ лыдӟиськомы, куке Павел Ефес каре мынӥз миссионер луыса куинетӥзэ мынон-ветлон дыръяз. Отын Аристархез бугыръяськись адямиос кырмизы (Ап. уж. 19:29). Куке сое мозмытӥзы, со кышкыттэм интые ӧз пегӟы, нош Павелэн ӵош кылиз. Кӧня ке толэзьёс ортчыса но, Грециын, Аристарх Павелэн вал, тушмонъёсыз азьло сямен ик Павелэз виыны тыршизы ке но (Ап. уж. 20:2—4). Асьме вакытысь 58-тӥ ар котырын жильыетын пукись Павелэз Риме ыстӥзы. Та кузь сюрес вылын Аристиарх Павелэн ӵош вал. Риме мыныкузы, соос корабль куашкан-выёнэ сюризы (Ап. уж. 27:1, 2, 41). Та каре вуэмзы бере, Аристарх Павелэн ӵош кӧня ке дыр ӵоже жильыетын пукиз, вылды (Кол. 4:10). Паймонэз ӧвӧл: оскымон эшез пыр Павел туж кулэ луись буйгатон но юнматон шедьтӥз.

5. Мар каре оскымон эш, Мадёнъёсты 17:17 лыдэ басьтыса?

⁵ Аристарх сямен ик, ми но вын-агайёсмылы но сузэр-апайёсмылы оскымон эшъёс луыны быгатӥськомы, умой дыръёсы гинэ ӧвӧл, нош озьы ик «шуге-леке сюрыку» но. (Лыдӟе Мадёнъёсты 17:17.) Шуг-секыт ортчем бере но, соослы азьло сямен ик буйгатон кулэ луыны быгатэ. Франсес b нимо сузэр, кудӥзлэн ракен висьыса атаез кулӥз, нош куинь толэзь ортчыса — анаез но, вера: «Шуг-секытъёс, кудъёсыз пыр ми потоно луиськомы, кема дыр ӵоже сюлэмез вӧсь  карыны быгато. Но мон дунъясько оскымон эшъёсме, кудъёсыз тодо, мыным азьло сямен ик секыт на шуыса, атаелэн но анаелэн кулэмзы бере трос дыр ортчиз ке но ини».

6. Мар карыны мылкыдмес ӝутэ эшъёсмылы оскымон луон?

⁶ Эшъёсмылы оскымон луон мылкыдмес ӝутэ соослы дырмес но кужыммес висъяны. Тани одӥг учыр. Питер нимо агайлэсь секыт но эмъяны луонтэм висёнзэ шедьтӥзы. Кэтрин нимо кышноез вера: «Кенешысьтымы одӥг кузпалъёс милемыз эмъясь доры нуизы, кытын ми Питерлэн висёнэз сярысь тодӥмы. Та агай но сузэр милемлы веразы, котьку милемын луозы шуыса, висёнэн ныръяськыны юрттон понна. Соос оскытӥзы милемыз, котькыӵе дыре юрттыны быгатозы шуыса». Макем бадӟым шумпотон ваё зэмос эшъёс, кудъёсыз юртто милемлы шуг-секытъёс пыр потыны!

7, 8. Малы Тихикез оскиськымон эшен ниманы луэ, Колоссыослы 4:7—9 лыдэ басьтыса?

⁷ Тихик но, Рим ки улын возиськись Асияысь христиан мурт, Павеллэн оскымон эшез вал (Ап. уж. 20:4). Асьме вакытысь 55-тӥ ар котырын Павел коньдон люкан ужез радъяз, Иудеяын улӥсь христианъёслы юрттон понна, но Тихик та кулэ луись ужын солы юрттӥз, вылды (2 Кор. 8:18—20). Берлогес, куке Павел нырысетӥзэ Римын жильыетын пукиз, со Тихикез куриз Асияысь кенешъёсы гожтэтъёссэ нуыны но отысь вын-агайёсты буйгатыны (Кол. 4:7—9).

⁸ Тихик Павеллы котьку оскиськымон эш вал (Тит. 3:12). Со дыре вань христианъёслы, Тихиклы кадь, оскиськыны уг луы вал. Асьме вакытысь 65-тӥ ар котырын, кыкетӥзэ жильыетын пукыкуз, Павел гожтӥз, Асияысь тросэз вын-агайёс солэсь палэнскылӥзы шуыса. Соос тушмонъёслэсь кышказы, вылды (2 Тим. 1:15). Нош Тихиклы оскиськыны луэ вал, соин ик Павел солы эшшо одӥг кулэ луись уж сётӥз (2 Тим. 4:12). Оскыны луэ, Павеллы сыӵе эшез дуно потэ вал шуыса.

9. Кызьы ми Тихиклэсь адӟем карыны быгатӥськомы?

⁹ Ми но, Тихик кадь, оскиськымон эшъёс  луыны быгатӥськомы. Кылсярысь, ми вын-агайёсмылы но сузэр-апайёсмылы юрттомы шуыса кылмес гинэ ум сётӥське, озьы ик сётэм кылмес быдэстӥськомы но (Матф. 5:37; Лука 16:10). Куке соос, кинъёслы юрттэт кулэ, тодо, милемлы оскиськыны луэ шуыса, со соосты зэмзэ но буйгатэ. Одӥг сузэр валэктэ, малы со озьы: «Сюлмын каньыл луэ, куке тодӥськод, кылзэ сётӥсь адями верамзэ одно ик быдэстоз шуыса».

10. Мадёнъёсты 18:25 лыдэ басьтыса, кин юнматыны быгатэ соосты, кинъёс шуг-секытэн пумиськизы яке кинъёслэн возьманъёссы ӧз быдэсме?

¹⁰ Соослы, кинъёс шуг-секытэн пумиськизы яке кинъёслэн возьманъёссы ӧз быдэсме, тодыны кулэ, соос оскиськымон эшсылэсь юрттэт басьтыны быгато шуыса. (Лыдӟе Мадёнъёсты 18:25.) Тани мар вера Биджей нимо агай, куке солэсь пизэ кенешысь поттӥзы: «Мыным шӧдонъёсы сярысь вераны кулэ вал солы, кинлы мон оскисько». Нош тани Карлос нимо агайлэн кылъёсыз, кудӥз янгыш лэсьтэмез сэрен кенешын дано ужъёсты быдэсъяны ӧз быгаты ини: «Мынам потэ вал, котырам оскиськымон адямиос мед луозы шуыса, кудъёсызлы мон сюлэмме усьтыны быгатысал, судъямзылэсь кышкатэк». Карлос сыӵе адямиосты шедьтӥз — со вал тӧроос, кудъёсыз юрттӥзы солы шуг-секытсэ сэрттыны-пертчыны. Озьы ик солэн сюлмыз буйгаз, малы ке шуоно тӧроос лякытэсь вал, но со тодӥз, соос солэсь кылъёссэ нокинлы но уз вералэ шуыса.

11. Мар кароно, оскиськымон эш луон понна?

¹¹ Оскиськымон эш луон понна, чиданэз будэтоно. Куке Жанналэн картэз кошкиз, со буйгатске вал, шӧдонъёсыз сярысь матысь эшъёсызлы веракуз. Со тодаз вае: «Соос чидаса монэ кылзӥзы, мон одӥгзэ трос пол вералляй ке но, вылды». Тӥ кылзыны быгатӥськоды ке, соку тӥ но умой эш луоды.

12. Кин вал Марк но кызьы со юрттыны дась луэмзэ возьматӥз?

¹² Марк, кудзэ озьы ик Иоанн шуыса нимазы, еврейёс пӧлысь христиан мурт вал. Со Иерусалимын улӥз. Солэн матысь ӵыжы-выжыез Варнава тодмо миссионер вал (Кол. 4:10). Марк узыр семьяысь потӥз, вылды, нош коньдон но ваньбур со понна валтӥсез ӧз луэ. Быдэс улонэз ӵоже Марк мукетъёсызлы шумпотыса юрттылӥз. Кылсярысь, со апостол Павелэн но апостол Пётрен ӵош ужаз-тыршиз. Марк соослы сиён-юон басьтылӥз, кӧлон инты шедьтылӥз но мукет юанъёсын выриз, вылды (Ап. уж. 13:2—5; 1 Пётр 5:13). Павел Маркез пыртӥз соос пӧлы, кинъёс Инмар Эксэйлык понна соин ӵош ужазы-тыршизы (Кол. 4:10, 11).

13. Кызьы 2 Тимофейлы 4:11 гожтэм кылъёс возьмато, Павел дунъяз шуыса ваньзэ, мар со понна Марк лэсьтӥз?

¹³ Марк Павеллэн одӥгез тужгес но матысь эшез луиз. Асьме вакытысь 65-тӥ ар котырын, Римын берпуметӥзэ жильыетын пукыкуз, Павел Тимофейлы кыкетӥ гожтэтсэ гожтӥз. Со гожтэтын Павел Тимофеез куриз Риме лыктыны но Маркез сьӧраз вайыны (2 Тим. 4:11). Зэм но, Павел дунъяз ваньзэ, мар со понна лэсьтӥз Марк, соин ик со сое куриз улонэзлэн секыт вакытаз соин ӵош луыны. Марк Павеллы уж вылын юрттыны быгатӥз: со солы сиён-юон но гожъяськон арбериос вайылӥз, дыр. Юнматон но буйгатон, кудзэ басьтӥз Павел, солы юрттӥзы, вылды, сое виён азязы улонэзлэн берпум нуналъёсаз Инмарлы оскымон кыльыны.

14, 15. Малы дышетэ милемыз Матфейлэсь 7:12 со пумысен, кызьы мукетъёслы уж вылын юрттоно?

¹⁴ Лыдӟе Матфейлэсь 7:12. Куке ми шуге-леке сюриськомы, ми тау кариськомы вын-агайёсты но сузэр-апайёсты, кудъёсыз милемлы уж вылын юрттыны дась. «Вань трос  ужъёс, кудъёссэ котькуд нунал лэсьтоно. Но куректонэн пумиськыку, соосты но быдэсъяны секыт луэ,— вера Райан, кудӥзлэн атаез малпамтэ шорысь кулӥз.— Таӵе учырын пичи юрттэт гинэ но туж буйгатэ».

¹⁵ Ми сак луимы ке, адӟыны быгатомы, кыӵе юрттэт кулэ мукетъёсызлы. Кылсярысь, тани кызьы одӥг сузэр юрттыны малпаз Питерлы но Кэтринлы, кудъёсыз сярысь вераськиз ини. Питер но, Кэтрин но машинаен ветлыны ӧз быгатэ ини, соин ик сузэр вераськиз кенешысь вын-агайёсын но сузэр-апайёсын, кудъёсыз дась вал та кузпалъёсты эмъяськон юртэ нуллыны. Кытчы со вуттӥз? Кэтрин вера: «Милям пельпумъёсысьтымы секыт из усиз кадь». Тодады возе: огшоры ужъёсты лэсьтыса гинэ но, тӥ мукетъёссэ туж буйгатыны быгатӥськоды.

16. Малы ми дышетскиськомы Марклэсь со пумысен, кызьы мукетъёслы юрттоно?

¹⁶ Зэм но, Марк ужан-тыршонын трос лэсьтэ вал. Со быдэсъяз Иеговалы ужан-тыршонэн герӟаськем туж кулэ луись ужъёсты, кылсярысь, со гожтӥз Ӟеч иворез, кудӥз солэн нимыныз нимаське. Озьы ке но Марк дыр шедьтӥз, Павелэз юнматон понна, но Павел тодӥз, юрттэт курыса, солы вазиськыны быгатэ шуыса. Анджела, кудӥзлэсь песянайзэ виизы, тау кариз вын-агайёсты но сузэр-апайёсты юрттыны дась луэмзы понна. Со вера: «Эшъёслэн сюлмысь юрттэмзы потэ ке, соослы вазиськыны капчи. Соосты ноку но курыны кулэ ӧвӧл — соос котьку юрттыны дась». Аслэсьтыд юаны луоз: «Тодо-а монэ сыӵе адямиен, кудӥз буйгатыны но уж вылын юрттыны дась?»

17. Кызьы 2 Коринфъёслы 1:3, 4 вылын малпаськон мылкыдмес ӝутэ мукетъёссэ буйгатыны?

¹⁷ Милемлы секыт ӧвӧл адӟыны соосты, кинъёслы буйгатон но юнматон кулэ. Соослы юрттон понна, ми кутомы, вылды, со ик малпанъёсты, кудъёсыныз мукет вын-агайёс милемыз буйгатӥзы. Тани мар вера Нино, кудӥзлэн песянаез кулӥз: «Иегова мукетъёссэ буйгатыны быгатэ ми пыр, куке Инмарлы асьмеды уже кутыны лэзиськомы». (Лыдӟе 2 Коринфъёслы 1:3, 4.) Нош тани мар вера  Франсес сузэр, кудӥз сярысь вераськиз ини: «Мон быдэсак соглаш соин, мар гожтэмын 2 Коринфъёслы 1:4. Ми быгатӥськомы вын-агайёсты но сузэр-апайёсты буйгатыны со буйгатонэн, кудӥныз мукетъёс милемыз буйгатӥзы».

18. а) Малы куд-огъёсыз мукетъёссэ буйгатыны кышкало? б) Мар кароно, адямиез буйгатон понна? Вералэ пример.

¹⁸ Ми кышкаськомы ке но, милемлы мукетъёссэ буйгатыны кулэ. Кылсярысь, ми кышканы быгатӥськомы, шуге-леке сюрем адямиез юнматон понна, тупась кылъёс ум шедьтэ шуыса, яке ми ум тодэ, кызьы асьмеды возьыны. Пол нимо тӧро тодаз вае, макем тыршизы вын-агайёс но сузэр-апайёс атаез кулэм бере сое юнматыны. Со вера: «Соослы капчи ӧй вал, дыр, мон доры лыктыны, монэ буйгатыны но тупась кылъёс шедьтыны. Озьы ке но секыт дыре монэ юнматыны мылкыд каремзэс мон дунъяй». Нош тани мар вера Таджон нимо агай, кудӥз кужмо музъемзурканэн пумиськоно луиз: «Зэм но, вын-агайёслэсь но сузэр-апайёслэсь музъем зуркан бере вань верам но гожтэм кылъёссэс мон тодам уг вайиськы ни. Нош мон умой тодӥсько на соослэсь мон сярысь сюлмаськемзэс, мынам ваньмыз умой-а шуыса». Адямиез буйгатон понна, сое оскытоно, со милемлы дуно луэ шуыса.

19. Малы тӥляд мылкыдды вань вын-агайёсмылы но сузэр-апайёсмылы юрттыны?

¹⁹ Та дуннелэн пумыз матэктэмъя, дуннеын югдур уродгес луоз, нош улонмы — секытгес (2 Тим. 3:13). Но милемлы азьло кадь ик вын-агайёслэн но сузэр-апайёслэн юрттэмзы кулэ луоз, малы ке шуоно ми тырбыдэстэмесь но ӵем янгышаськомы. Одӥгез муг, малы апостол Павел Инмарлы кулытозяз оскымон кыльыны быгатӥз,— со христиан эшъёсызлэн сое буйгатэмзы. Ойдолэ ми но Аристарх кадь оскымонэсь, Тихик кадь оскиськымонэсь но Марк кадь юрттыны дась луомы. Озьы ми вын-агайёсмылы но сузэр-апайёсмылы азьланяз но Иеговалы оскымон ужаны-тыршыны юрттомы (1 Фес. 3:2, 3).