1. Худаниң нурғун садиқ хизмәтчилири қандақ қийинчилиқларға учраватиду?

 ДУНИЯНИҢ җай-җайлирида яшайдиған Йәһваниң нурғун хизмәтчилири наһайити еғир синақларға дуч кәлмәктә. Бәлким, җамаитиңиздики қериндашларму шундақ қийинчилиқларға учраватқанду? Бирлири еғир кесәлгә гириптар болған яки йеқинидин айрилған. Йәнә бирлири туққини яки җан дости Йәһваға хизмәт қилишни тохтатқачқа, қайғуға патқан. Башқа қериндашлар болса, тәбиий апәтләрдә зиян-зәһмәткә учримақта. Бешиға күн чүшкән етиқатдашларниң һәммиси тәсәллигә муһтаҗ. Биз уларға қандақ ярдәм берәләймиз?

2. Әлчи Паул немә үчүн бәзидә тәсәллигә муһтаҗ болған?

² Әлчи Паулниң һаяти көп қетим хәвп-хәтәр астида болған (Кор. 2-х. 11:23—28). Буниңдин башқа, у тенигә санчилған тикәндин, бәлким қандақту бир ағриқ түпәйли, азап чәккән (Кор. 2-х. 12:7). Шундақла, хизмәтдиши болған Димас дунияниң ишлирини сөйүп, Паулни ташлап кәткәндә, униңдин көңли қалған (Тим. 2-х. 4:10). Паул өзини айимай башқиларға ярдәм бәргән җүръәтлик майланған мәсиһий болсиму, бәзидә һәтта уму үмүтсизлинип, ғәм-қайғуға патқан (Рим. 9:1, 2).

3. Паул тәсәллигә қандақ еришкән?

³ Паул тәсәллигә қандақ еришкән? Шәк-шүбһисизки, Йәһва униңға күч-мәдәтни муқәддәс роһи арқилиқ бәргән (Кор. 2-х. 4:7; Флп. 4:13). Шундақла Йәһва Худа Паулға етиқатдашлар арқилиқ тәсәлли бәргән. Паул бәзи қериндашларниң униң үчүн тәсәллиниң мәнбәси болғанлиғини ейтқан (Кол. 4:11). Уларниң арисида Аристарх, Тихик вә Марк болған. Паул қийинчилиқларға дуч кәлгәндә, улар уни қоллап-қувәтлигән. Худаниң бу үч хизмәтчисиниң башқиларға  яр-йөләк болушиға немә ярдәм бәргән? Бизму улардин үлгә елип, башқиларға қандақ тәсәлли вә илһам берәләймиз?

4. Аристарх Паулниң вападар дости екәнлигини қандақ көрсәткән?

⁴ Македонийәдики Салоникидин болған Аристарх Паулниң вападар дости еди. Паул үчинчи миссионерлиқ сәпири давамида Әфәскә кәлгинидә Аристарх тоғрилиқ биринчи қетим аңлаймиз. Топилаңчилар Паулниң сәпәрдиши Аристархни тутувалған еди (Әлч. 19:29). Уларниң қолидин азат болғанда, у өзи тоғрилиқ ойлимай, Паулниң қешида қелип, униңға вападар болуп қалған. Бирнәччә ай өткәндин кейин, Грециядә, дүшмәнләр Паулни өлтүрмәкчи болғандиму, Аристарх достини ташлап кәтмигән (Әлч. 20:2—4). Тәхминән милади 58-жили Паул Римға мәһбус сүпитидә әвәтилгәндә, Аристарх униңға сәпәрдаш болған. Улар сәпәрдә кемә апитигә учрап, аман қалған (Әлч. 27:1, 2, 41). Римға кәлгәндин кейин Аристарх Паул билән биллә зинданда бираз вақит болған болуши мүмкин (Кол. 4:10). Шәк-шүбһисизки, Паул шу вападар достидин көп илһам тапқан!

5. Пәнд-нәсиһәтләр 17:17гә асасән, вападар дост болуш үчүн немә қилишимиз керәк?

⁵ Аристархқа охшаш, бизму етиқатдашлиримиз үчүн пәқәт яхши күнләрдә әмәс, еғир күнләрдиму вападар дост болушимиз муһим (Пәнд-нәсиһәтләр 17:17ни оқуң). Қериндишимиз еғир күнләрни бешидин өткүзгән болсиму, вақит өтүп у техичә тәсәллигә муһтаҗ болуши мүмкин. Рак кесәл сәвәплик, үч айниң ичидә ата-анисидин айрилған Франсис b мундақ дәйду: «Мениңчә, бешимизға чүшкән синақлар бизни бираз вақит гаңгиритип қойиду. Ата-анамдин айрилип қалғинимға көп жиллар өткән болсиму, техиғичә қайғу-һәсрәттә жүргинимни унтумайдиған садиқ достлиримға бәк миннәтдармән».

6. Садақәтмәнлик бизни немә қилишқа дәвәт қилиду?

⁶ Садиқ дост қериндишини қоллап-қувәтләш үчүн вақти вә күчини айимайду.  Мәсилән, Питер исимлиқ бурадәр сақаймайдиған вә тез еғирлишип кетидиған бир кесәлгә гириптар болған. Униң аяли Кэтрин мундақ дәйду: «Җамаитимиздики бир әр-аял бизни машиниси билән дохтурханиға елип барди. Шу чағда Питерниң кесили тоғрилиқ билдуқ. Улар дәл шу күни, бизниң бу қийин әһвалға бәрдашлиқ беришимизгә ярдәм беришни қарар қилған вә бизгә ярдәм керәк болғанда һәрқачан йенимизда болған». Қийин күнләрдә бәл қоювәтмәй, чидамчан болушқа ярдәм беридиған һәқиқий достларниң қешимизда болуши немә дегән чоң тәсәлли!

7, 8. Колосилиқларға 4:7—9ға асасән, Тихик өзиниң садиқ дост екәнлигини қандақ дәлиллигән?

⁷ Римниң Асия өлкисидин болған Тихик Паулниң вападар хизмәтдиши еди (Әлч. 20:4). Тәхминән милади 55-жили Паул йәһудий етиқатчиларға ярдәм бериш үчүн ианә жиғишни уюштурған (Кор. 2-х. 8:18—20). Кейинирәк Паул биринчи қетим Римда қамақта олтарғанда, Тихик униңға хәвәрләрни елип кәлгән вә у Паулниң тәсәлли беридиған хәтлирини Асиядики җамаәтләргә йәткүзүп бәргән еди (Кол. 4:7—9).

⁸ Тихик Паулниң садиқ дости болуп қалған (Тит. 3:12). Шу вақиттики қериндашларниң һәммиси бирдәк Тихикқа охшаш ишәнчлик дост болмиған. Тәхминән милади 65-жили Паул иккинчи қетим қамақта олтарғанда, Асия өлкисидики етиқатчиларниң һәммиси дегидәк қаршилиқлардин қорққачқа, Паулдин үз өргән (Тим. 2-х. 1:15). Тихикқа болса Паул ишәнч қилған вә униңға қошумчә вәзипиләрни тапшурған (Тим. 2-х. 4:12). Паул җәзмән Тихикқа охшаш достиниң болғини үчүн миннәтдар болған.

9. Тихиктин қандақ үлгә алалаймиз?

⁹ Бизму Тихикқа охшаш садиқ дост болалаймиз. Мәсилән, қериндашларға ярдәм беримиз дәпла қоймай, уларға әмәлий ярдәм қолумизни созумиз (Мәт. 5:37; Луқа 16:10). Ярдәмгә муһтаҗ қериндашлар бизниң уларға яр-йөләк болалайдиғанлиғимизни билгәндә, көңли чоң тәсәлли тапиду. Буни бир  қериндишимиз мундақ дәп чүшәндүрди: «Сизгә ярдәм қолини созушқа вәдә қилған кишиниң ейтқан сөзини чоқум орунлайдиғанлиғини билсиңиз, у ярдәм берәмду, бәрмәмду дәп ғәм-әндишә қилмайсиз».

10. Пәнд-нәсиһәтләр 18:24кә асасән, қийинчилиқ вә үмүтсизликкә қарши күрәш қиливатқанлар кимдин тәсәлли тапалайду?

¹⁰ Қийинчилиқ вә үмүтсизликкә қарши күрәш қиливатқан қериндашлар көп вәзийәтләрдә ишәнчлик достлиридин тәсәлли тапиду (Пәнд-нәсиһәтләр 18:24ни оқуң). Чоң оғли җамаәттин чиқирилғандин кейин қаттиқ үмүтсизликкә толған Биҗай мундақ дәйду: «Мениң һис-туйғулиримни чүшинидиған бирси билән сөзлишишкә муһтаҗ едим». Карлос исимлиқ бурадәр өткүзгән хаталиқлири үчүн җамаәттики шәрәплик вәзипилиридин айрилип қалған еди. У мундақ дәйду: «Мениң хаталиқлиримни үзүмгә басмайдиған бирси билән сөзлишишкә интайин муһтаҗ едим». Ақсақаллар Карлосқа тәсәлли берип, униңға қийинчилиқлирини йеңишкә ярдәм бәргән. Шундақла Карлосниң сөзлирини ақсақаллар мәхпий сақлайдиғанлиғини билиш униңға тәсәлли бәргән.

11. Ишәнчлик дост болуш үчүн немә қилиш керәк?

¹¹ Садиқ вә ишәнчлик дост болуш үчүн чидамлиқ болушимиз керәк. Жанна исимлиқ қериндишимизни йолдиши ташлап кәткәндә, у йеқин достлириға ич-сирини ейтип, тәсәлли алған. У: «Бир нәрсини қайта-қайта ейтсамму, улар мени сәвирчанлиқ билән тиңшиған»,— дәйду. Сизму яхши тиңшиғучи болсиңиз, яхши дост екәнлигиңизни көрситәләйсиз.

12. Марк ким болған вә у тәйярлиқ роһини қандақ көрсәткән?

¹² Йерусалимда туғулуп чоң болған Марк йәһудий хәлқидин чиққан Худаниң хизмәтчиси еди. Униң туққини Барнаба һәммигә тонуш миссионер болған (Кол. 4:10). Маркниң аилиси баяшатчилиқта яшиған болсиму, у бай болушни биринчи орунға қоймиған. Марк дайим тәйярлиқ роһини көрситип, башқиларға хошаллиқ билән хизмәт қилған. Мәсилән, у Паул вә Петрус билән хизмәтдаш болуп, уларниң өз вәзипилирини орунлишиға ярдәм бәргән. Бәлким, Марк уларниң тамақ сетивелиш һәм қонидиған җай тепишқа охшаш мәсилиләрни һәл қилишиға ярдәм бәргән (Әлч. 13:2—5; Пет. 1-х. 5:13). Худа Падишалиғи һәққидә хуш хәвәр ейтишта Паул өзигә Маркниң хизмәтдаш вә чоң тәсәлли бәргүчи болғанлиғини ейтқан (Кол. 4:10, 11).

13. Тимотийға 2-хәт 4:11дики сөзләр Паул Маркниң хизмитини қәдирлигәнлигини қандақ көрситиду?

¹³ Паул Маркниң садиқ хизмитини бәк қәдирлигән. Шуңа Марк Паулниң әң йеқин достлириниң бири болған. Мәсилән, милади 65-жили Паул ахирқи қетим Римда қамақта олтарғанда, у Тимотийға язған иккинчи хетидә Маркни өзүң билән елип кәлгин дәп ейтқан (Тим. 2-х. 4:11). Бәлким, Паул пат арида өлүм җазасиға һөкүм қилинидиғанлиғини билип, Маркниң келишини сориған. Марк Паулни озуқ-түлүк яки хәт йезиш үчүн керәк нәрсиләр билән тәминлигән болуши мүмкин. Маркниң қоллап-қувәтлиши вә илһами һаятиниң ахирқи күнлиридә Паулға күч-мәдәт бәргән.

14, 15. Мәтта 7:12дики сөзләрдин башқиларға әмәлий ярдәм бериш тоғрилиқ немини үгинимиз?

¹⁴ Мәтта 7:12ни оқуң. Бешимизға күн чүшкәндә, бизни қоллап-қувәтләп, әмәлий ярдәм бәргәнләргә чәксиз миннәтдар болимиз! Дадиси туюқсиз қатнаш вақиәсидә қаза болған Райана мундақ дәйду: «Қийин күнләрдә адәттики ишларни қилалмай қалисиз. Бирси сиз үчүн һәтта кичиккинә  бир нәрсини қилсиму, бу сизгә чоң тәсәлли бериду».

¹⁵ Диққәтчан болсақ башқиларға әмәлий ярдәм беришниң йоллирини издәймиз. Мәсилән, жуқурида тилға елинған Питер билән Кэтринға бир қериндаш дохтурға берип келишкә ярдәм бәргән. Йә Питер, йә Кэтрин әнди машина һайдалмиған. Шуңа һелиқи қериндаш, җамаәттикиләрдин ярдәм берәләйдиғанларниң новәтлишип, машина билән тошуши үчүн бир җәдвәл түзүп бәргән. Бу уларға ярдәм бәрдиму? Кэтрин мундақ дәйду: «Йәлкимиздин чоң бир тағни ташлавәткәндәк һис қилдуқ». Башқиларға кичиккинә ишлар арқилиқ тәсәлли берәләйдиғанлиғимизни унтумайли.

16. Башқиларға тәсәлли бериш тоғрилиқ Марктин немини үгинәләймиз?

¹⁶ Марк дайим роһий ишлар билән алдираш болған. Униңға Худаниң хизмитидә муһим вәзипиләр тапшурулған еди, шу җүмлидин у өз исми билән аталған китапни язған. Шундақла у Паулға ярдәм бериш үчүн вақит чиқарған. Паулму Марктин ярдәм сораштин тартинмиған. Анжела исимлиқ қериндишимизниң туққини зораванлиқ билән өлтүрүлгән еди. Анжела униңға тәсәлли бәргән қериндашларға бәк миннәтдар болған. У мундақ дәйду: «Достлириңиз чин көңлидин ярдәм беришкә халиса, улар билән сөзлишиш оңай болиду. Сәвәви улар ярдәм беришни халайду вә ярдәм қолини сунуштин баш тартмайду». Бизму өзүмиздин: «Башқилар мени етиқатдашларға әмәлий ярдәм беришкә тәйяр туридиған адәм дәп тонамду?»— дәп сорисақ болиду.

17. Коринтлиқларға 2-хәт 1:3, 4тики сөзләр бизни башқиларға тәсәлли беришкә қандақ үндәйду?

¹⁷ Тәсәллигә муһтаҗ қериндашлар аз әмәс. Биз уларға башқилар бизгә тәсәлли бериш үчүн ейтқан сөзләрни ейталаймиз. Момисидин айрилған өлүп кәткән Нино: «Йәһваниң бизни қоллинишиға йол бәрсәк, У биз арқилиқ башқиларға тәсәлли берәләйду»,— дәп ейтқан (Коринтлиқларға 2-хәт 1:3, 4ни оқуң). Жуқурида тилға елинған Франсис мундақ дәйду: «Коринтлиқларға  2-хәт 1:4тики сөзләр һәқиқәт. Биз өзүмиз аңлиған тәсәлли сөзләр билән башқиларға тәсәлли берәләймиз».

18. а) Бәзилири немә үчүн тәсәлли бериштин қорқиду? ә) Башқиларға қандақ тәсәлли берәләймиз? Мисал кәлтүрүң.

¹⁸ Қайғуруватқан адәмгә немә дейиш яки қандақ тәсәлли беришни билмәймән дәп қорқсақму, ярдәм беришниң йоллирини издишимиз керәк. Дадисидин айрилип қалған Поль исимлиқ бир ақсақал тәсәлли беришкә тиришқан бәзи қериндашлар тоғрилиқ мундақ дәйду: «Уларниң тәсәлли бериш үчүн маңа келип, сөз башлиши асан болмиған. Улар немә дейишини билмисиму, маңа тәсәлли берип, қоллап-қувәтлигәнлиги үчүн мошу күнгичә бәк миннәтдармән». Шуниңға охшаш, Таҗон исимлиқ бурадәр дәһшәтлик йәр тәврәштин кейин етиқатдашларниң уни қандақ қоллиғанлиғини әсләп: «Растини десәм, шу күни қериндашларниң маңа әвәткән һәрбир учури есимдә йоқ, лекин уларниң маңа йетәрлик вақит вә көңүл бөлгәнлиги есимдә»,— дәп ейтқан. Қериндашларға көйүнидиғанлиғимизни көрсәтсәк, уларға яхши тәсәлли берәләймиз.

19. Қериндашларға яр-йөләк болушқа немә үчүн бәл бағлидиңиз?

¹⁹ Мошу заманниң ахири йеқинлашқансири, дунияниң вәзийити начарлишип, һаятимиз техиму қийин болиду (Тим. 2-х. 3:13). Намукәммәл болғачқа вә хаталиқларни өткүзгәчкә, тәсәллигә давамлиқ муһтаҗ болумиз. Достлири дайим яр-йөләк болғачқа, әлчи Паул һаятиниң ахириғичә садақәтмән болуп қалалиған. Ундақта Аристархтәк вападар, Тихиктәк ишәнчлик болайли вә Марктәк башқиларға хизмәт қилайли. Шундақ қилсақ, қериндашлиримизниң етиқатта чиң турушиға ярдәм берәләймиз (Сал. 1-х. 3:2, 3).