1. Ano nga nakakaistres nga mga kahimtang an naieksperyensyahan han damu nga matinumanon nga surugoon ni Jehova?

HA BUG-OS nga kalibotan, damu nga surugoon ni Jehova an nakakaeksperyensya hin nakakaistres o masakit pa ngani nga mga kahimtang. Napapansin mo ba ini ha iyo kongregasyon? May mga Kristiano nga nag-aantos tungod hin grabe nga sakit o kamatyi hin hinigugma. An iba nasusubo gud tungod kay binaya ha kamatuoran an usa nira nga kapamilya o duok nga sangkay. An iba naman nag-aantos tungod han mga epekto han kalamidad. An sugad nga kabugtoan nagkikinahanglan hin pagliaw. Paonan-o naton hira mabubuligan?

2. Kay ano nga may mga panahon nga kinahanglan ni apostol Pablo hin pagliaw?

² Hi apostol Pablo nakaeksperyensya hin damu nga sitwasyon diin nameligro an iya kinabuhi. (2 Cor. 11:23-28) Kinahanglan liwat niya ilubon an “tunok ha unod,” posible nga usa nga klase hin sakit. (2 Cor. 12:7) Ngan kinahanglan liwat niya atubangon an kasubo han ginbayaan hiya ni Demas, usa nga bugto nga nakaupod niya ha pag-alagad, “tungod kay nahigugma [hi Demas] ha presente nga sistema han mga butang.” (2 Tim. 4:10) Hi Pablo usa nga maisugon nga dinihogan nga Kristiano nga bumulig ha iba, pero may mga panahon nga nanluya liwat hiya.​—Roma 9:1, 2.

3. Tikang kan kanay nakakarawat hi Pablo hin pagliaw ngan suporta?

³ Nakarawat ni Pablo an iya ginkikinahanglan nga pagliaw ngan suporta. Paonan-o? Sigurado nga gin-gamit ni Jehova an Iya baraan nga espiritu basi parig-unon hiya. (2 Cor. 4:7; Fil. 4:13) Ginliaw liwat hiya ni Jehova pinaagi han iba nga mga Kristiano. Ginhulagway ni Pablo an pipira han iya mga igkasi-magburuhat sugad  nga ‘naghahatag hin daku nga pagliaw’ ha iya. (Col. 4:11) Upod han iya mga gin-unabi amo hira Aristarco, Tiquico, ngan Marcos. Ira ginparig-on hi Pablo ngan ginbuligan nga makapailob. Ano nga mga kalidad an nakabulig hinin tulo nga Kristiano salit nakahatag hira hin pagliaw? Paonan-o naton masusubad an ira maopay nga ehemplo samtang naniningkamot kita nga liawon ngan parig-unon an usa kag usa?

4. Paonan-o ginpakita ni Aristarco nga maunungon hiya nga sangkay ni Pablo?

⁴ Hi Aristarco, usa nga Kristiano nga taga-Macedonia nga tikang ha Tesalonica, nagin maunungon gud nga sangkay ni Pablo. Nabasa naton ha siyahan nga higayon an mahitungod kan Aristarco han ginbisita ni Pablo an Efeso ha iya ikatulo nga pagbiyahe sugad nga misyonero. Samtang magkaupod hira ni Pablo, gindakop hi Aristarco hin grupo hin mga tawo. (Buh. 19:29) Han ginbuhian na hiya, waray hiya bumaya basi la makalikay ha peligro, lugod maunungon nga nagpabilin hiya kaupod ni Pablo. Paglabay hin pipira ka bulan, ha Gresya, hi Aristarco padayon nga inupod kan Pablo bisan kon gin-iikaparatay la gihapon hi Pablo han mga kaaway. (Buh. 20:2-4) Han mga 58 C.E. han ginpadara ha Roma hi Pablo sugad nga priso, gin-updan hiya ni Aristarco ha hirayo nga pagbiyahe, ngan magkaupod nga nakaeksperyensya hira hin kalunod han barko. (Buh. 27:1, 2, 41) Han nakadto na hira ha Roma, posible nga magkaupod hira ni Pablo ha prisohan hin pipira ka panahon. (Col. 4:10) Diri urusahon nga naparig-on ngan naliaw hi Pablo han sugad nga maunungon nga sangkay!

5. Sumala ha Proberbios 17:17, paonan-o kita magigin maunungon nga sangkay?

⁵ Pariho kan Aristarco, mahimo kita magin maunungon nga sangkay pinaagi ha pagpabilin nga kaupod han aton kabugtoan diri la ha maopay nga mga kahimtang pero pati liwat ha “mga panahon han kasakitan.” (Basaha an Proberbios 17:17.) Bisan kon tapos na an pagsari, bangin kinahanglan la gihapon naton liawon an aton bugto. Hi Frances, * nga magkasunod nga nawad-an hin mga kag-anak tungod hin kanser ha sulod hin tulo ka bulan, nagsiring: “Para ha akon, an makuri nga mga pagsari nakakaapekto  ha aton hin maiha nga panahon. Ngan gin-aapresyar ko an maunungon nga mga sangkay nga nahinunumdom nga nasasakitan la gihapon ako, bisan kon pipira na ka panahon an naglabay tikang han mamatay an akon mga kag-anak.”

6. An pagin maunungon magpapagios ha aton nga buhaton an ano?

⁶ An maunungon nga mga sangkay naghihimo hin mga sakripisyo basi makasuporta ha ira kabugtoan. Pananglitan, an brother nga hi Peter nadayagnos nga may grabe nga sakit. An iya asawa, hi Kathryn, nagsiring: “Usa nga mag-asawa ha amon kongregasyon an inupod ha amon ha pagpa-check-up ngan didto nahibaroan namon an sakit ni Peter. Nagdesisyon hira hito nga takna nga bubuligan nira kami hinin makuri nga kahimtang, ngan tikang hadto, aada hira pirme kon kinahanglan namon hira.” Nakakaliaw gud an pagkaada tinuod nga mga sangkay nga makakabulig ha aton nga mailob an aton mga kakurian!

7-8. Sumala ha Colosas 4:7-9, paonan-o iginpakita ni Tiquico nga masasarigan hiya?

⁷ Hi Tiquico, usa nga Kristiano tikang ha Romano nga distrito han Asia, nagin masasarigan gud nga kaupod-upod ni Pablo. (Buh. 20:4) Han mga 55 C.E., nag-organisar hi Pablo hin pangulekta hin kwarta basi buligan an mga Kristiano ha Judea, ngan posible nga nagpabulig hiya kan Tiquico hinin importante nga toka. (2 Cor. 8:18-20) Paglabay han panahon han napriso hi Pablo ha Roma ha siyahan nga higayon, nagin personal niya nga mensahero hi Tiquico. Hiya an nagdul-ong han mga surat ngan mensahe han pagparig-on ni Pablo ha mga kongregasyon ha Asia.​—Col. 4:7-9.

⁸ Hi Tiquico nagpabilin nga masasarigan nga sangkay ni Pablo. (Tito 3:12) Diri tanan nga Kristiano hadto masasarigan sugad kan Tiquico. Han mga 65 C.E., han ikaduha nga kapriso ni Pablo, nagsurat hiya nga damu nga Kristiano nga kalalakin-an ha probinsya han Asia an nadiri pakig-upod ha iya, posible tungod kay nahahadlok hira ha mga parakontra. (2 Tim. 1:15) Ha kabaliktaran, masasarigan ni Pablo hi Tiquico ngan gintagan niya hiya hin iba pa nga toka. (2 Tim. 4:12) Sigurado nga naapresyar gud ni Pablo an pagkaada maopay nga sangkay pariho kan Tiquico.

9. Paonan-o naton masusubad hi Tiquico?

 ⁹ Masusubad naton hi Tiquico pinaagi ha pagin masasarigan nga sangkay. Pananglitan, diri la kita nagsasaad nga mabulig ha aton kabugtoan nga nanginginahanglan pero naghihimo liwat kita hin praktikal nga mga butang basi buligan hira. (Mat. 5:37; Luc. 16:10) Kon maaram adton mga nanginginahanglan hin bulig nga masasarigan kita nira, naliliaw gud hira. Usa nga sister an nagsaysay kon kay ano. Nagsiring hiya, “Diri ka naiistres kay maaram ka nga an tawo nga nagtanyag hin bulig aada ha eksakto nga panahon basi tumanon an iya iginsaad.”

10. Sugad han ginsiring ha Proberbios 18:24, kan kanay makakabiling hin pagliaw adton nakakaeksperyensya hin mga pagsari o kasub-anan?

¹⁰ Adton nakakaeksperyensya hin mga pagsari o kasub-anan kaurogan nga naliliaw pinaagi ha pagsumat han iya inaabat ha usa nga matataporan nga sangkay. (Basaha an Proberbios 18:24.) Hi Bijay nasubo gud han ginpaiwas ha kongregasyon an iya anak, ngan hiya nagsiring, “Kinahanglan ko isumat an akon inaabat ha usa nga matataporan ko.” Hi Carlos nawad-an han iya hinigugma nga pribilehiyo ha kongregasyon kay nakahimo hiya hin sayop. Hiya nagsiring, “Kinahanglan ko hin ‘talwas nga lugar’ diin maisusumat ko an akon inaabat nga diri nahahadlok nga huhukman ako.” Nabilngan ni Carlos ito nga talwas nga lugar ha mga tigurang, nga amo an nagbulig ha iya nga malamposan an iya problema. Naliaw liwat hiya kay maaram hiya nga titipigan nga kompidensyal han mga tigurang an iya mga ginsumat.

11. Paonan-o kita magigin matataporan ngan masasarigan nga sangkay?

¹¹ Basi magin matataporan ngan masasarigan nga sangkay, kinahanglan naton magin mapailubon. Han ginbayaan hi Zhanna han iya bana, naliaw hiya pinaagi ha pagsumat han iya inaabat ha iya duok nga mga sangkay. “Mapailubon nga namati hira ha akon,” siring niya, “bisan kon pauroutro na la an akon mga ginyayakan.” Mahimo ka liwat magin maopay nga sangkay pinaagi ha pagin maopay nga parapamati.

12. Hin-o hi Marcos, ngan paonan-o hiya nagpakita hin pagin andam ha pagserbi ha iba?

¹² Hi Marcos usa nga Judio nga Kristiano nga taga-Jerusalem. An iya patod nga hi Bernabe kilala nga misyonero. (Col. 4:10) Baga hin may kaya an pamilya ni Marcos, pero waray niya unaha an materyal nga mga butang ha iya kinabuhi. Ha bug-os niya nga kinabuhi, nagpakita hi Marcos hin pagin andam ha pagserbi ha iba ngan nalilipay hiya hito. Pananglitan, nag-alagad hiya ha iba-iba nga kahimtang kaupod hira apostol Pablo ngan apostol Pedro samtang ira gintutuman an ira mga responsabilidad, ngan hi Marcos an posible nga nag-aasikaso han ira mga panginahanglan. (Buh. 13:2-5; 1 Ped. 5:13) Ginhulagway ni Pablo hi Marcos sugad nga iya “igkasi-magburuhat para ha Ginhadian han Dios,” ngan sugad nga “makaparig-on nga bulig” ha iya.​—Col. 4:10, 11, ftn.

13. Paonan-o iginpapakita han 2 Timoteo 4:11 nga gin-apresyar ni Pablo an matinumanon nga pag-alagad ni Marcos?

¹³ Hi Marcos nagin usa han mga duok nga sangkay ni Pablo. Pananglitan, han napriso hi Pablo ha ultimo nga higayon ha Roma, han mga 65 C.E., nagsurat hiya han iya ikaduha nga surat kan Timoteo. Ha iya surat, ginhangyo ni Pablo hi Timoteo nga kumadto ha Roma ngan ig-upod hi Marcos. (2 Tim. 4:11) Sigurado nga gin-apresyar ni Pablo an matinumanon nga pag-alagad ni Marcos hadto, salit ginhangyo niya nga makaupod niya hi Marcos hiton importante gud nga takna. Ginbuligan ni Marcos hi Pablo ha praktikal nga mga paagi, posible nga pinaagi ha pagsuplay ha iya hin pagkaon o mga gamit para ha iya pagsurat. An suporta ngan pagparig-on nga nakarawat ni Pablo posible nga nakabulig ha  iya nga mailob an ultimo nga mga adlaw antes hiya patayon.

14-15. Ano an igintututdo ha aton han Mateo 7:12 mahitungod ha pagbulig ha iba ha praktikal nga mga paagi?

¹⁴ Basaha an Mateo 7:12. Kon nakakaeksperyensya kita hin makuri nga kahimtang, nagpapasalamat gud kita ha mga nagtatanyag hin bulig ha praktikal nga mga paagi! “Damu nga butang nga ginbubuhat mo kada adlaw an baga hin imposible mahimo kon nag-aantos ka,” siring ni Ryan, nga namatay an tatay tungod hin aksidente. “Nakakaliaw gud kon may naghahatag hin praktikal nga bulig bisan kon baga hin gutiay gud la ito.”

¹⁵ Kon atentibo kita ngan nag-oobserbar, posible nga makabiling kita hin praktikal nga mga paagi basi buligan an iba. Pananglitan, usa nga sister an nagdesisyon nga buligan hira Peter ngan Kathryn nga gin-unabi kanina, nga makakadto ha tanan nira nga check-up. Diri na nakakadrayb hi Peter o hi Kathryn, salit an sister naghimo hin eskedyol basi an kabugtoan ha kongregasyon magkaada turno ha pagdrayb para ha ira. Nakabulig ba ini nga kahikayan? Hi Kathryn nagsiring, “Inabat namon nga baga hin nawarayan kami hin pinas-an.” Ayaw gud minosa an pagliaw nga maihahatag han imo simple pero praktikal nga mga bulig.

16. Ano nga importante nga leksyon mahitungod ha paghatag hin pagliaw an aton mahibabaroan ha ehemplo ni Marcos?

¹⁶ An siyahan-siglo nga disipulo nga hi Marcos sigurado nga sagipo nga Kristiano. May-ada hiya mabug-at nga teokratiko nga mga toka, upod na an pagsurat han Ebanghelyo nga nakangaran ha iya. Pero, naghatag hi Marcos hin panahon basi liawon hi Pablo, ngan maaram hi Pablo nga makakaaro hiya hin bulig kan Marcos. Han ginpatay an kapamilya ni Angela, nagin mapasalamaton hiya han pagin andam hadton mga nagliaw ha iya. “Kon an mga sangkay naruruyag gud ha pagbulig, masayon hira kaistoryahon,” siring niya. “Baga hin diri hira nag-aalang o napipiritan.” Puydi naton pakianhan an aton kalugaringon, ‘Kilala ba ako nga andam ha pagliaw ha mga igkasi-tumuroo ha praktikal nga mga paagi?’

17. Paonan-o an pagpamalandong han 2 Corinto 1:3, 4 mag-aaghat ha aton nga maghatag hin pagliaw?

¹⁷ Masayon la makabiling hin kabugtoan nga  nanginginahanglan hin pagliaw. Mahimo pa ngani naton gamiton an pariho nga pagparig-on nga gin-gamit han iba basi liawon kita. Hi Nino, usa nga sister nga namatyan hin lola, nagsiring: “Mahimo liawon ni Jehova an iba pinaagi ha aton kon magpapagamit kita ha iya.” (Basaha an 2 Corinto 1:3, 4.) Hi Frances nga gin-unabi kanina nagsiring: “Tinuod gud an mga pulong han 2 Corinto 1:4. Puydi naton liawon an iba pinaagi han aton nakarawat nga nakakaliaw nga mga pulong ngan buhat.”

18. (a) Kay ano nga nahahadlok an iba ha paghatag hin pagliaw? (b) Paonan-o naton epektibo nga maliliaw an iba? Paghatag hin ehemplo.

¹⁸ Kinahanglan naton mamiling hin paagi nga buligan an iba bisan kon nahahadlok kita. Pananglitan, bangin nababaraka kita kay diri kita maaram kon ano an aton iyayakan o bubuhaton para ha usa nga nagkikinahanglan hin pagliaw. An tigurang nga hi Paul nahinunumdom pa kon paonan-o an iba naningkamot nga liawon hiya han namatay an iya tatay. “Nakikita ko nga diri masayon para ha ira nga dumaop ngan kaistoryahon ako,” siring niya. “Diri hira maaram han ira iyayakan. Pero naapresyar ko la gihapon an ira hingyap nga liawon ngan buligan ako.” Ha pariho nga paagi, katapos makaeksperyensya hin makusog nga linog, an bugto nga hi Tajon nagsiring: “Ha tinuod la, diri ko na nahinunumdoman an tagsa nga mensahe nga ginpadara ha akon han mga tawo ha sumunod nga mga adlaw katapos han linog, pero nahinunumdoman ko pa gud an ira gugma kay ginsiguro nira nga talwas ako.” Puydi kita magin epektibo ha pagliaw ha iba kon ipapakita naton nga hinigugma naton hira.

19. Kay ano nga determinado ka nga ‘maghatag hin daku nga pagliaw’?

¹⁹ Samtang mas nagtitikahirani kita ha kataposan hinin sistema han mga butang, magtitikaraot pa an mga kahimtang ha kalibotan ngan magigin mas makuri an kinabuhi. (2 Tim. 3:13) Ngan padayon nga magkikinahanglan kita hin pagliaw tungod kay diri kita perpekto ngan pirme kita nagsasayop. Usa han mga rason nga nakapailob hin matinumanon hi Pablo tubtob ha iya kamatayon amo an pagliaw nga nakarawat niya ha mga igkasi-tumuroo. Hinaot magin maunungon kita pariho kan Aristarco, masasarigan pariho kan Tiquico, ngan andam magserbi ha iba pariho kan Marcos. Kon bubuhaton naton ito, mabubuligan naton an aton kabugtoan nga makapabilin nga marig-on ha pagtoo.​—1 Tes. 3:2, 3.