1. მუ რთულ სიტუაციეფს შეხვადუ იეჰოვაშ ბრელ მსახურ?

მთელ მსოფლიოს, იეჰოვაშ ბრელ მსახურ მანგარ რთულ სიტუაციეფს შეხვადუ, ნამუთ გურს უჭუანს თინეფს. თქვან კრებას ხოლო რენანო თეცალ და დო ჯიმალეფ? ნამთინე ქრისტიანს სერიოზულ ლახალა ოჭირ ვარდა საჸოროფო პიროვნება აფჷ ღურელ დო გურს მანგარო აჭვჷ. შხვეფს თიშ ძირაფა ოწუხნა, ნამდა ოჯახიშ წევრ ვარდა ხოლოშიან მეგობარ იტენს იეჰოვაშ ორგანიზაციას. ნამთინეს სტიქიურ უბედრობეფ მიორინუანს დიდ ზიანს. თეცალ და დო ჯიმალეფს გურიშ ექექაფა ოსაჭირნა. მუჭო შემლებნა მივეხვარათ თინეფს?

2. მუშენ ოსაჭირუდ პავლეს მინშა გურიშ ექექაფა?

² პავლე მოციქულ ბრელშა რდუ თიცალ სიტუაციეფს, მუჟამსით თიშ სიცოცხლე საფრთხეშ თუდო გერდჷ (2 კორ. 11:23—28). თის „სხეულს ძიგირ“ უღუდ, შილებე თენა ჯამრთელობაშ პრობლემა ჸოფედკო (2 კორ. 12:7). თეს გეძინელ, თის გურქ გუტირხჷ, მუჟამსით დემასიქ, მიდგაწკუმა ართო პავლე მსახურენდჷ, ქიდიტუ თინა, „მუშენდა დემასიქ ასეიან ქვეყნიერება ქიჸოროფუ“ (2 ტიმ. 4:10). პავლე გაბედულ ცხებულ ქრისტიან რდუ, ნამუთ მთელ გურით ოხვარუდ შხვეფს; მარა მინშა მუს ხოლო ოსაჭირუდ გურიშ ექექაფა (რომ. 9:1, 2).

3. მუ საშვალებეფით გამანგარ დო მეხვარ იეჰოვაქ პავლე?

³ პავლე ირიათო ღებულენდჷ თი მოხვარას, მუთ ოსაჭირუდ. მუჭო? იეჰოვა მუშ წმინდა შურს გიმირინუანდჷ თიშ გამანგარებელო (2 კორ. 4:7; ფილ. 4:13). თეს გეძინელ, იეჰოვა თანაქრისტიანეფიშ საშვალებათ გურშა ეუქექუანდჷ თის. პავლექ თქუ, ნამდა თინეფ „რდეს დამხმარეეფ დო გუმამანგარებელეფ“ (კოლ. 4:11). თიქ ნამთინე სახელით მიშინუ. მაგალთო, არისტარქე,  ტიქიკე დო მარკოზი. თინეფქ გამანგარეს პავლე დო მეხვარეს ბოლოშა მითვინკო. მუ თვისებეფქ მეხვარ თე სუმ ქრისტიანს, გურშა ეუქექუესკო პავლეს? მუჭო შემლებნა მივაჸუნათ თინეფიშ მაგალითის, მუჟამსით ვოცადუთ გურშა ეუქექუათ დო მივეხვარათ შხვეფს?

4. მუჭო დამტკიც არისტარქექ, ნამდა პავლეშ ართგურ მეგობარ რდუ?

⁴ არისტარქექ, მაკედონელ ქრისტიანქ თესალონიკეშე, დამტკიც, ნამდა პავლეშ ართგურ მეგობარ რდუ. ბიბლიას პირველო არისტარქე მოშინაფილ რე, მუჟამსით პავლეშ მასმა მისიონერულ მოგზაურობაშ გურშენ მეურს ჩიება, ნამუთ ეფესოს უღუდ. მუჟამსით არისტარქე პავლეწკუმა ართო რდუ, ხალხიქ ოჭოფ თინა (საქ. 19:29). გათავისუფლებაშ უკულ, დუდ ვეუჩილითუაფ საფრთხეშა დო პავლე ვემუტებ. მუსხირენ თუთაშ უკულ, საბერძნეთის არისტარქე კინ პავლეწკუმა ართო რდუ, თიშ უმკუჯინუო, ნამდა მოწინააღმდეგეეფ პავლეშ ჸვილუას ოცადდეს (საქ. 20:2—4). სოდგარენ ახ. წ. 58 წანას, მუჟამსით პავლე რომშა გუტეს, მუჭოთ პატიმარ, თე შორ შარას არისტარქე თიწკუმა ართო რდუ დო თინეფქ ართო გეგნუსქიდეს გემიშ ნწყუალას (საქ. 27:1, 2, 41). მუჭოთ იძირენ, რომშა ენულაშ უკულ, არისტარქე მუდგარენ პერიოდის პავლეწკუმა ართო ხედჷ ციხეს (კოლ. 4:10). გასაკვირ ვა რე, ნამდა პავლეს თეცალ ართგურ მეგობარ გურშა ეუქექუანდჷ!

5. მუჭოთ იგავეფიშ 17:17-ის ჭარჷ, მუჭო შემლებნა ვორდათ ართგურ მეგობარ?

⁵ არისტარქეცალო, ჩქი ხოლო შემლებნა ვორდათ ართგურ მეგობრეფ ჩქინ და დო ჯიმალეფშო ხვალე ჯგირ დროს ვარინ, გაჭირებაშ დროს ხოლო (წეკითხით იგავები 17:17). რთულ სიტუაციეფ გინილენსინ თიშ უკულ ხოლო, ჩქინ და დო ჯიმალეფს იშენით ოსაჭირნა ელარნა. ართ დაშ, ფრენსისიშ, * მშობლეფს კიბოქ ქაღოლეს დო სუმ თუთაშ დინახალე თის დიო მუმაქ დუღურ დო უკულ დიდაქ. თე და იჩიებ: „ფიფქრენქ, ნამდა გაჭირებაშ გინოღალაშ უკულ ხოლო, ბრელ ხანს მაჸუნუნა ჭუა. მა მანგარო ვაფასენქ ართგურ მეგობრეფს, მიდგას ვაჭყორდუ, ნამდა დიო ხოლო ბგინაფლენქ ჭუას, თიშ  უმკუჯინუო, ნამდა ჩქიმ მშობლეფიშ ღურაშე გვარიან ხანქ გემკორთჷ“.

6. მუშ კეთებას გინმოჭყვიდრაფუანა ართგურობა?

⁶ ართგურ მეგობრეფ მუნეფიშ დრო დო ენერგიას ვა ზოგენა, ნამდა ქიმეხვარან და დო ჯიმალეფს. მაგალთო, ართ ჯიმას, სახელო პიტერს ვესქილიდენ ფერ ლახალაშ დიაგნოზ ქიგუშქვეს, ნამუთ მალას დოჸვილუნდჷ. თიშ ოსურ, ქეთრინ იშინანს: „ჩქინ კრებაშე ართ-ართ ჯიმა დო თიშ ოსურქ ექიმშა მიდამიჸონეს, სოდეთ პიტერიშ ლახალაშ გურშენ ქიგებგით. თინეფქ თიმწუთის გეგნოჭყვიდეს, ნამდა თეცალ რთულ პერიოდის ხვალე ვა დომტენდეს დო მუდგა დრო ვა ჸოფედკონ, ჩქინწკუმა იჸუაფდეს“. მართალო გურიშემაკინალ რე, ნამდა თეცალ ნამდვილ მეგობრეფ პჸუნა, მით მოხვარნა ქუგურზათ პრობლემეფს!

7, 8. მუჭოთ კოლოსელეფიშ 4:7—9-ს ჭარჷ, მუჭო დამტკიც ტიქიკექ, ნამდა სანდო მეგობარ რდუ?

⁷ ტიქიკე, რომაელ ქრისტიან აზიაშე, პავლეშ ართგურ მეგობარ რდუ (საქ. 20:4). სოდგარენ ახ. წ. 55 წანას, პავლექ დაგეგმჷ ფარაშ შაყარუა, ნამდა ქიმეხვარკო იუდეველ ქრისტიანეფს; შილებე ზუსტას ტიქიკეს დავალ თე მნიშვნელოვან საქმეს ქელუდირთკო (2 კორ. 8:18—20). უმოს გვიანო, მუჟამსით პავლე რომს პირველ პატიმრობას რდუ, თინა ტიქიკეშ ხეთ ოჯღონანდჷ წერილეფს. თის აზიაშ კრებეფშა მეუღუდ პავლეშ გურიშ ემაკინალ წერილეფ (კოლ. 4:7—9).

⁸ ტიქიკე პავლეშო სანდო მეგობარ რდუ (ტიტ. 3:12). თიმ დროს ტიქიკეცალ სანდო ბრელ ვა რდუ. სოდგარენ ახ. წ. 65 წანას, მაჟია პატიმრობაშ დროს პავლექ ჭარჷ, ნამდა აზიას ბრელ ქრისტიან ქომოლკოჩ დუდის ურიდანდჷ თიწკუმა ურთიერთობას, საეგებიოთ თიშენ, ნამდა მოწინააღმდეგეეფშა ოშქურდეს (2 ტიმ. 1:15). ტიქიკე ვა გუდჷ თინეფს, პავლე ონდუდ თის დო შხვა დავალება ხოლო ქიმეჩ (2 ტიმ. 4:12). მუშო ოკო რაგად, პავლე აფასენდჷ, ნამდა ტიქიკეცალ ჯგირ მეგობარ ჸუნდჷ.

9. მუჭო შემლებნა მივაჸუნათ ტიქიკეშ მაგალითის?

⁹ ჩქი შემლებნა მივაჸუნათ ტიქიკეშ მაგალითის დო ვორდათ სანდო მეგობარ. მაგალთო, ჩქი ხვალე სიტყვათ ვა ვოპირუთ და დო ჯიმალეფს მოხვარას; პრაქტიკულო ვოხვარუთ თინეფს (მათ. 5:37; ლუკ. 16:10). მუჟამსით მოხვარა ოსაჭირნან თინეფს უჩქნა, ნამდა  შეულებნა ჩქინ იმენდ უღდან, თე დროს ჯგირო გინაფლენა დუდის. ართ და ენწყუნს მუშენ რე თენა თაშ. თინა იჩიებ: „ზედმეტ ოწუხებელ ვეგგაძინუ თიშე ფიქრით, ქიმგეხვარებ დო ვარ საჭირო დროს თი პიროვნება, მიდგაქ მოხვარა დეგეპირ“.

10. მუჭოთ იგავეფიშ 18:24-ის რე ინოჭარილ, მიქ შილებე გურშა ეუქექუას თინეფს, მით სირთულეეფს ვარდა გურგოტახილობას ობრძოლ?

¹⁰ თინეფს, მით სირთულეეფს ვარდა გურგოტახილობას ობრძოლ, ხშირას გურშა ეუქექუანა სანდო მეგობარწკუმა ჩიება (წეკითხით იგავები 18:24). მუჟამსით ბიჯეიშ ქომოლსქუაქ გერიცხჷ, თინა მანგარ გურგოტახილ რდუ. თიქ თქუ: „მოსაჭირუდ სანდო პიროვნებას გავუზიარკო ჩქიმ გრძნობეფ“. კარლოს, ნამდგაქ კრებას პასუხიშმგებლობა პირად შეცდომაშ გურშენ ოდინუ, იჩიებ: „თიცალ პიროვნებაწკუმა მოსაჭირუდ რაგად, ნამდგაწკუმა თავისუფალო გეგმოფხანტუნდჷ ჩქიმ გრძნობეფს დო ვა მაშქურნედ თიშა, ნამდა გუმაკრიტიკენდჷ“. კარლოსშო თეცალ პიროვნებეფქ უხუცესეფქ იჸუეს, მიდგაქ მეხვარეს თის, გეგნიღკო თე რთულ პერიოდ. თეს გეძინელ, კარლოსის გურშა ეუქექუ თიშ რჩქინაქ, ნამდა უხუცესეფ სანდოეფ რდეს დო მუშ ამბე გალე ვეგმიშ.

11. მუჭო შემლებნა ვორდათ სანდო მეგობარ?

¹¹ სანდო მეგობარ ქუვორდათინ, მოთვინება ოკო გუვავითარათ. მუჟამსით ჟანა ქომონჯიქ მიოტუ, თის გურშა ეუქექუ ხოლოშიან მეგობრეფწკუმა მუშ გრძნობეფიშ გურშენ ჩიებაქ. თინა იჩიებ: „მართალ რე, ართ დო იგივეს ბრელშა ვურაგადუდ, მარა თინეფ იშენით მოთვინებათ მირჩქილედეს“. თქვა ხოლო შეილებნა რდათ ჯგირ მეგობარ, მუჟამსით ჯგირ მარჩქილეეფ იჸუაფუთ.

12. მი რდუ მარკოზი დო მუჭო გიმირჩქინ თიქ მზადყოფნაშ შურ?

¹² მარკოზი ებრაელ ქრისტიან რდუ იერუსალიმშე. თიშ ბიძისქუა ბარნაბა მისიონერ რდუ, ნამდგას არძა იჩინენდჷ (კოლ. 4:10). მუჭოთ იძირე, მარკოზიშ ოჯახ მდიდარ რდუ. მარა მარკოზის ფარა დო ქონება პირველ ადგილშა ვეგურდჷ. თიქ მუშ ცხოვრებათ ქაძირუ, ნამდა მზადყოფნაშ შურ უღუდ; თიშა ბედნერობა მოუღუდ შხვეფიშ მომსახურებას. მაგალთო, თინა ბრელშა მსახურენდჷ მოციქულ პავლე დო მოციქულ პეტრეწკუმა, მუჟამსით მუნეფიშ პასუხიშმგებლობეფს ასრულენდეს. შილებე მარკოზი თინეფშო ოჭკუმალს ჸიდულენდჷ, თინეფიშ დაბინავებაშო ზრუნენდჷ დო თეცალ საქმეეფს ოხვარუდ (საქ. 13:2—5; 1 პეტ. 5:13). პავლექ მარკოზშე თქუ, ნამდა თინა რდუ ართ-ართ თანამსახურ „ღორონთიშ სამეფოშო“, ნამუთ ამანგარენდჷ თის (კოლ. 4:10, 11).

13. მუჭო იძირე 2 ტიმოთეშ 4:11-შე, ნამდა პავლე აფასენდჷ მარკოზიშ ართგურ მსახურებას?

¹³ მარკოზიქ პავლეშ ხოლოშიან მეგობარო გინირთჷ. მაგალთო, სოდგარენ ახ. წ. 65 წანას, მუჟამსით პავლე რომს ბოლო პატიმრობას რდუ, თიქ მაჟია წერილ მეჭარ ტიმოთეს. თე წერილს, პავლე თხინდჷ ტიმოთეს, ნამდა რომშა ქუმორთკო დო მარკოზი ხოლო მალეჸუნკო (2 ტიმ. 4:11). მუშო ოკო რაგად, პავლე აფასენდჷ მარკოზიშ ართგურ მსახურებას, ათეშენ ითხუ მარკოზი თიწკუმა ჸოფედკო თეცალ მნიშვნელოვან პერიოდის. მარკოზიქ პრაქტიკულო მეხვარ პავლეს, შილებე ოჭკუმალ ვარდა წერილეფიშ ოჭარალ მასალეფ მეუღუდ თიშა. მუჭოთ იძირენ, თეცალ მოხვარა დო ელარნაქ მეხვარ პავლეს, გეგნიღკო განაჩენიშ აღსრულებაშახ დოსქილადირ ბოლო დღალეფ.

14, 15. მუს ბგურაფლენთ მათეშ 7:12-ის ინოჭარილ სიტყვეფშე თიშ გურშენ, მუჭო ელუდირთათ შხვეფს?

¹⁴ წეკითხით მათე 7:12. მუჟამსით რთულ პერიოდ მიღნა, მანგარო ვაფასენთ თინეფს, მით პრაქტიკულო მოხვარნა! ართ ჯიმა რაიან, ნამდგას მუმაქ უბედურ შემთხვევას  უღურ, იჩიებ: „მუჟამსით იტანჯებუქ, თეშ იძირე, ნამდა ვეშქალებე ირდღაშიან საქმეეფიშ კეთება. პრაქტიკულ მოხვარა, თენა ჭიჭე მუდგარენით ხოლო რდასინ, დიდ საქმეს ორთჷ“.

¹⁵ ყურადღებიანეფ დო დაკვირვებულეფ ქიპჸით-და, შემალებენა პრაქტიკულ შარა დობგორათ შხვეფიშ მახვარებელო. მაგალთო, ართ დაქ ინიციატივა გეგმირჩქინ, ქიმეხვარკო ჟიშე მოშინაფილ პიტერ დო ქეთრინს არძა სამედიცინო პროცედურაშ მიკულას. პიტერ დო ქეთრინს უკვე ვეშულებდეს მანქანაშა გეხუნა, ათეშენ თე დაქ შეადგინ გეგმა, ნამდა კრებაშე მოხალისეეფქ ქიგლეჸუნესკო თინეფ. ქიმეხვარუო პიტერ დო ქეთრინს თექ? ქეთრინ იჩიებ: „თიცალ გრძნობა მიღდეს, ითამ ხუჯშე დიდ ოღალქ მუმანწყეს“. ირიათო რშუდან, ნამდა თიმწკუმა ხოლო, მუჟამსით ჭიჭე, უბრალო მუდგარენით ოხვარუთ და დო ჯიმალეფს, თენა ქიანაშის ნიშნენს თინეფშო.

16. მუ მნიშვნელოვან მუდგარენ დიბგურეთ გურიშექექაფაშ გურშენ მარკოზიშ მაგალითშე?

¹⁶ პავლეშ თანამსახურ მარკოზი ბრელ ჯგირ საქმეს ორთუდ. თის მნიშვნელოვან თეოკრატიულ დავალებეფ უღუდ, თინეფ შქას ართ-ართ რდუ სახარებაშ ჭარუა, ნამდგას თიშ სახელ ჯოხო. მარა, მარკოზი იშენით გიმურთუნდჷ დროს პავლეშა გურიშექექაფას დო პავლეს ხოლო მარკოზიშ მოხვარაშ იმენდ უღუდ. ანჯელა, ნამდგას ოჯახიშ წევრ უჸვილეს, აფასენდჷ თინეფიშ მზადყოფნას, მიდგაქ თის გურშა ეუქექუ. თინა იჩიებ: „მუჟამსით მეგობრეფს შურდოგურით ოკონა მოხვარა, ადვილ რე თინეფწკუმა რაგად დო იძირე, ნამდა ოკონა მიმეხვარან დო დუდის ვა ურიდანა ჩქიმწკუმა რაგადის“. შემლებნა ჩქინ დუდის ქობკითხათ: „ქომჩინენანო თიცალ პიროვნებათ, მით ირიათო მზათ რე თანაქრისტიანეფს პრაქტიკულო მეხვარას?“.

17. მუჭო აღბძრენა 2 კორინთელეფიშ 1:3 დო 4-შე დაფიქრება, შხვეფს გურშა ეუქექუათ?

¹⁷ რთულ ვა რე თიცალ და დო ჯიმალეფიშ ძირაფა, მიდგას მოხვარა ოსაჭირ. შემლებნა თინეფს თი აზრეფ გავუზიარათ, ნამდგათ შხვაქ ემქექუეს გურშა. ართ და ნინო, ნამდგას ბებიქ უღურ იჩიებ: „იეჰოვას შეულებ  შხვეფშა გურიშ ელაკინალო გიმომრინუან, მუჟამსით თეშ საშვალებას ქიმეფჩანთ“ (წეკითხით 2 კორინთელები 1:3, 4). ჟიშე მოშინაფილ ფრენსის იჩიებ: „2 კორინთელეფიშ 1:4-ის ინოჭარილ სიტყვეფ სიმართლე რე. ჩქი შემლებნა ზუსტას თეშ ეუქექუათ გურშა შხვეფს, მუჭოთ თენა ჩქინწკუმა აკეთეს“.

18. ა) მუშენ შილებე ნამთინეს ოშქურუდას გურშა ეუქექუას შხვეფს? ბ) მუჟამ გიშმალენა ჯგირო შხვეფიშ გურშა ექექაფა? ქიმიჸონით მაგალით.

¹⁸ ჩქი ინიციატივა ოკო გეგმიფრჩქინათ, ნამდა ქიმვეხვარათ შხვეფს, თიშ უმკუჯინუო, ნამდა შილებე მოშქურდან თეშ კეთებაშა, მუშენდა ვა მიჩქნა მუ ფთქუათ ვარდა მუ ვაკეთათ თინეფშო, მით რთულ სიტუაციას რე. ართ უხუცეს, სახელო პოლი, იშინანს მუჭო მექცუ თის ნამთინე და დო ჯიმაქ, მუჟამსით მუმაქ უღურ. თინა იჩიებ: „შემლებ ფთქუე, ნამდა თინეფშო ადვილ ვარდჷ ჩქიმდა მოულა დო დორაგადაფა, თინეფს ვა უჩქუდეს მუ ოკო თქუესკო. მარა მა იშენით ვაფასენდჷ თინეფიშ სურვილს, მიმეხვარესკო დო ქელამდირთესკო“. ხოლო ართ ჯიმა, სახელო ტეიჯონ, ნამდგაქ დიდ მიწისძვრას გინუსქიდ, იჩიებ: „მართალ ქოფთქუე, ვაფშჷ მუ ჭარუდ არძა წერილს, ნამდგას მიწისძვრაშ უკულ ხალხ მიჯღონანდჷ, მარა ჯგირო ფშუ, ნამდა თინეფ ზრუნენდეს ჩქიმდე დო ოინტერესდეს მუჭო ვორდჷ“. გურიშექექაფა ჯგირო თიწკუმა გიშმალენა, მუჟამსით ვოძირანთ, ნამდა დაინტერესებულ ვორეთ შხვეფით.

19. მუშენ გაფნა გინოჭყვიდილ შხვეფს გურშა ეუქექუათ?

¹⁹ მუთ უმოს ხოლოს ვორეთ თე ქიანაშ მოსპუალაწკუმა, მსოფლიო მდგომარეობა იუფრაშებ დო ცხოვრება ხოლო ირთულებ (2 ტიმ. 3:13). მემკვიდრეობათ მეღებულ ცოდვა დო არასრულყოფილებაშ გურშენ პრობლემეფს შეფხვადუთ დო ათეშენ გურიშ ექექაფა მოსაჭირნა. მოციქულ პავლექ ცხოვრებაშ ბოლოშახ ართგურქ დოსქიდ. თეშ ართ-ართ მიზეზ თინა რდუ, ნამდა თანაქრისტიანეფ გურშა ეუქექუანდეს. მორთ ვორდათ არისტარქეცალ ართგურ, ტიქიკეცალ სანდო დო მარკოზცალო მზათ ვორდათ შხვეფიშ მახვარებელო. თეშნერო, შემალებენა მივეხვარათ ჩქინ და დო ჯიმალეფს ირიათო ემსახურან იეჰოვას (1 თეს. 3:2, 3).