1-2. Peko ango ma lutic pa Jehovah mapol gitye ka kemme kwede, dok man twero gudogi nining?

TAM kong i kom labol adek magi: Ludaktari guwaco ki omego mo ma pud bulu ni en tye ki two malit ma pe cang. Omego mo me mwaka 50 ki wiye ma latic matek kiryeme woko ki i dog ticce, dok kadi bed oyelle matek me nongo tic mukene, pe onongo. Laminwa mo ma dong oti woko pe tye ki kero me timo jami ma yam timo i tic pa Jehovah.

² Ka itye ka kato ki i peko ma rom ki magi, itwero bedo ki tam ni dong konyi pe. Jami magi twero rwenyo yomcwiny ma itye kwede, rwenyo bene woro ma itye kwede i komi kekeni, kun balo wa watti ki jo mukene.

3. Catan ki jo ma en dorogi gineno kwo nining?

³ Lobo-ni nyuto kit ma Catan neno kwede ki kwo pa dano. Catan kare ducu tero dano calo gin ma konye pe. Ki col cwiny, en otito ki Kawa ni bibedo agonya ka oturo cik pa Lubanga, kun onongo ngeyo maber ni adwogi me turo cik pa Lubanga obedo to. Catan aye doro dul me cato wil, tim me cung i wibye ki dini goba ducu me lobo-ni. Dong pe tye me ur ni pol pa lutim biacara, lucung i wibye, ki lutela dini bene pe ginyuto woro pi kwo dok pe giparo kit ma dano luwotgi giwinyo kwede.

4. Gin ango ma wabinyamo i pwony man?

⁴ Ki tungcel, Jehovah mito ni wange ni piwa tek, dok en konyowa ka watye ka wok ki i pekki ma weko wawinyo  calo konywa pe. (Jab. 136:23; Rom. 12:3) Pwony man binyamo kit ma Jehovah konyowa kwede ki i pekki adek magi: (1) Ka watye ka canne ki two malit, (2) ka watye ka kato ki i peko me can lim, ki (3) ka peko ma bino pi tiyo oweko wawinyo calo pe watye ki gin mo ma watwero timo pi Jehovah. Ento mukwongo, wek wanen pingo watwero bedo ki gen ni Jehovah tero wan ducu ni piwa tek.

5. Ngo ma weko imoko ni dano pigi tek bot Jehovah?

⁵ Kadi bed kicweyowa ki i apwa me ngom, piwa tek loyo apwa mamwa. (Acak. 2:7) Nen kong tyen lok mogo mumiyo wangeyo ni piwa tek bot Jehovah. En ocweyo dano ki kero me poro kite. (Acak. 1:27) I timo meno, en oilowa malo ma loyo cwec mukene ma i lobo-ni, kun ketowa me loyo lobo kacel ki lee.​—Jab. 8:4-8.

6. Gin ango mukene ma weko wamoko ni Jehovah tero dano ma luroc ni pigi tek bote?

⁶ Kadi wa i nge kare ma Adam obalo, Jehovah omedde ki tero dano calo pigi tek. Piwa tek adada bote mumiyo en ominiwa Wode me amara Yecu, macalo ginkok pi balwa. (1 Jon 4:9, 10) Pi teko pa ginkok, Jehovah bicero jo ma guto macalo adwogi me bal pa Adam, “jo ma kitgi atir wa ki jo ma kitgi pe atir.” (Tic 24:15) Lokke nyuto ni piwa tek bote kadi bed komwa lit, watye lucan, nyo wati woko.​—Tic 10:34, 35.

7. Tyen lok mukene ango ma lutic pa Lubanga gitye kwede me ye ni Jehovah paro pigi?

⁷ Watye dok ki tyen lok mukene me ye ni Jehovah terowa ni piwa tek bote. En oywayowa bote dok oneno kit ma wadok kwede i kom lok me kwena maber-ri. (Jon 6:44) I kare ma wacako nyikke cok bot Jehovah, en bene onyikke cok botwa. (Yak. 4:8) Jehovah bene kwanyo kare me pwonyowa, man nyuto ni piwa tek bote. En ngeyo kodi dano ango ma wabedo i kare-ni ki dok ma watwero bedo i anyim. Dok en miniwa pwod pien en marowa. (Car. 3:11, 12) Magi ducu lanyut ma moko ni Jehovah paro piwa!

8. Lok ma kicoyo i Jabuli 18:27-29 twero gudo kit ma watamo kwede i kom pekkiwa nining?

⁸ Jo mukene gubedo ka neno Kabaka Daudi calo konye pe, ento en onongo ngeyo ni Jehovah mare dok cwakke. Pien Daudi onongo tye ki ngec man, okonye me ciro can ma en okato ki iye ki cwiny ma atir. (2 Cam. 16:5-7) Ka cwinywa otur nyo watye ka kato ki i ariya, Jehovah twero konyowa me bedo ki neno ma atir dok konyowa me loyo ariya mo keken. (Kwan Jabuli 18:27-29.) Ka watye ki cwak pa Jehovah, ci pe tye gin mo ma twero gengowa tic pire ki yomcwiny. (Rom. 8:31) Kong dong wanenu jami adek ma pol kare wakato ki iye ma mitte ni wiwa opo iye ni Jehovah marowa dok terowa calo piwa tek bote.

9. Two romo gudo kit ma wanene kwede kekenwa nining?

⁹ Two twero turo cwinywa, kun weko wawinyo calo dong konywa pe. Lewic twero makowa ka jo mukene gineno gorowa nyo ka mitte ni wajenge i komgi pi kony. Ento kadi bed jo mukene pe gingeyo ni komwa lit, waromo bedo ka lweny ki lewic pien pe watwero timo jami ma  yam watimo. I kare ma nongo cwinywa otur kit meno, Jehovah cuko cwinywa. Nining?

10. Ma lubbe ki Carolok 12:25, ngo ma romo konyowa ka komwa lit?

¹⁰ Ka komwa lit, “lok maber me kica” twero cuko cwinywa. (Kwan Carolok 12:25.) I Baibul, Jehovah ogwoko lok mabeco mapol ma poyo wiwa ni piwa tek bote kadi bed komwa lit. (Jab. 31:19; 41:3) Ka wakwano Lokke ma kicoyo piny teretere, Jehovah bikonyowa me lweny ki tam maraco ma bino macalo adwogi me two.

11. Omego acel onongo kony pa Jehovah nining?

¹¹ Tam kong gin mutimme i kom Jorge. I kare ma en pud bulu, Jorge onongo two mo malit ma omedde oyotoyot dok oweko en owinyo ni konye pe. Jorge owaco ni: “Onongo pe ayubbe pi kit ma two man oweko awinyo kwede nyo kit ma lewic maka kwede pien two man onongo ywayo tam pa dano i koma. Ma twona-ni obedo ka medde ameda, acako tam i kom kit ma kwona bilokke kwede. Cwinya otur adada, dok abako doga bot Jehovah i lega ni okonya.” Jehovah okonye nining? “Kit macalo onongo pe atwero kwan pi cawa malac, kicuko cwinywa me kwano tyeng mogo manok ki i Jabuli ma nyuto kit ma Jehovah paro kwede pi luticce. Abedo ka kwano tyeng magi nino ducu, dok anongo ni gukweyo cwinya dok omina gen. I nge kare mo, dano gucako neno ni amaro bwunyo. Guwaco bene ni yomcwiny ma atye kwede ocuko cwinygi. Aniang ni Jehovah ogamo legana! En okonya me loko kit ma anene kwede kekena. Acako keto cwinya i kom gin ma Lokke waco madok  i kom kit ma en nena kwede kadi bed koma lit.”

12. Ka itye ka yelle ki two, itwero nongo kony pa Jehovah nining?

¹² Ka itye ka yelle ki two, bed ki gen ni Jehovah ngeyo gin ma itye ka wok ki iye. Lege pi kony wek ibed ki neno matir i kom pekoni. I nge meno, ti ki Baibul me nongo lok me kwe cwiny ma Jehovah ogwoko piri. Ket cwinyi i kom tyeng mogo ma nyuto kit ma Jehovah paro kwede pi luticce. Ka itimo meno, ibineno ni Jehovah ber bot jo ducu ma gitiyo bote ki gen.—Jab. 84:11.

13. Lawi ot twero winyo nining ka orwenyo ticce?

¹³ Lawi ot acel acel mito ni emi jami ma mitte pi jo me ode me bedo ki kwo maber. Ento go kong ni, omego mo orwenyo ticce woko kadi bed pe otimo bal mo. En oyelle matek me nongo tic mukene ento pe otwere. Pi peko man, en romo cako winyo ni konye pe. Keto cwinye i kom cikke pa Jehovah twero konye nining?

14. Tyen lok ango ma weko Jehovah gwoko cikkene?

¹⁴ Jehovah kare ducu gwoko cikkene. (Yoc. 21:45; 23:14) En timo meno pi tyen lok mapol. Tyen lok me acel aye pien man gudo nyinge maleng-ngi. Jehovah ocikke ni ebigwoko luticce ma lugen, dok en winyo ni myero ecob cikkene meno. (Jab. 31:1-3) Medo i kom meno, Jehovah ngeyo ni cwinywa bitur adada ka en pe egwoko jo ma gitye i ode. En ocikke me miniwa jami ma mitte pi kwo ki gin ma wamito wek wamedde ki tic pire, dok pe tye gin mo ma bigenge ki cobo cikkene man!—Mat. 6:30-33; 24:45.

15. (a) Peko ango ma Lukricitayo me cencwari me acel guwok ki iye? (b) Gen ango ma Jabuli 37:18, 19 miniwa?

 ¹⁵ Ka wiwa po i kom tyen lok ma weko Jehovah gwoko cikkene, ci watwero kanyo peko me can lim ki gen. Nen kong labol pa Lukricitayo me cencwari me acel. I kare ma aunauna magwar ocakke i kom kacokke ma i Jerucalem, jo “ducu guket woko ata . . . lukwena keken aye gudong.” (Tic 8:1) Go kong kit ma ngwec meno ogudogi kwede. Okelo peko me can lim! Nen calo Lukricitayo magi gurwenyo gangigi ki biacaragi. Kadi bed kit meno, Jehovah pe owekogi; dok gin bene pe gurwenyo yomcwinygi. (Tic 8:4; Ibru 13:5, 6; Yak. 1:2, 3) Jehovah okonyo Lukricitayo ma lugen magi, dok en bikonyowa bene.​—Kwan Jabuli 37:18, 19.

16. Peko ango ma romo weko wacako winyo ni worowa pire pe tek bot Jehovah?

¹⁶ Ka wawoto ki ti, watwero cako winyo ni pe watye ka tiyo tic muromo pi Jehovah. Kabaka Daudi bene nen calo owinyo kit meno i kare ma oti. (Jab. 71:9) Jehovah twero konyowa nining?

17. Gin ango ma waromo pwonyo ki i gin mutimme i kom laminwa ma nyinge Jheri?

¹⁷ Tam kong gin mutimme i kom laminwa mo ma nyinge Jheri. Kilwonge me bedo tye pi pwonnye ma kwako kit me gwoko Ot me Ker, ento en onongo pe mito wot iye. En owaco ni: “An dong ati woko, atye dato, dok pe atye ki diro mo keken ma Jehovah twero tic kwede. Konya dong pe.” I dyewor ma peya gubedo ki pwonnye man, en otito lok ma i cwinye bot Jehovah i lega. I kare ma en oo i Ot  me Ker orwone, en pud obedo ka pennye kekene ka omyero ebed kunnu. Ento i kare ma yub man tye ka wot anyim, lalok acel otito ni diro ma pire tek loyo ma watye kwede aye bedo aterawa me nongo pwony ki bot Jehovah. Jheri wiye po ni: “Atamo ni, ‘An atye ki diro meno!’ Acako koko ki pig wanga i kare ma aniang ni Jehovah kara tye ka gamo legana. En ocuko cwinya ni atye ki gin mo ma pire tek ma atwero miyone bote dok en onongo tye atera me pwonya!” Ka Jheri otamo i kom gin mutimme meno en waco ni: “Acito i pwonnye meno ma atye ki lworo dok cwinya otur. Ento aa ki iye ma atye ki gen, kicuko cwinya, dok awinyo calo konya tye!”

18. Baibul nyuto nining ni Jehovah pud tero worowa calo gin ma pire tek kadi bed dong wati woko?

¹⁸ Ka wawoto ki ti, watwero bedo ki gen ni Jehovah pud tye ki tic piwa. (Jab. 92:12-15) Yecu opwonyowa ni kadi bed jami ma watwero timo nen calo pire pe tek botwa, ento Jehovah pwoyo gin mo keken ma watwero timo pire. (Luka 21:2-4) Pi meno ket cwinyi i kom gin ma itwero timone. Me labolle, itwero lok i kom Jehovah, lega pi utmege, ki cuko cwiny jo mukene me bedo lugen. Jehovah teri macalo latic lawote, pe pi tic ma itwero cobone, ento pien itye atera me bedo lawiny bote.​—1 Kor. 3:5-9.

19. Jo Roma 8:38, 39 miniwa gen ango?

¹⁹ Pud dong watye ki yomcwiny madit ya me woro Jehovah, Lubanga ma tero jo ma wore calo pigi tek! En ocweyowa me timo mitine, dok woro me ada aye weko kwowa bedo ki tyen lok. (Yabo 4:11) Kadi bed lobo-ni terowa calo konywa pe, Jehovah pe nenowa kit meno. (Ibru 11:16, 38) Ka par odiyowa pi peko me two, can lim, nyo tiyo, myero wiwa opo ni pe tye gin mo ma romo pokowa ki i mar pa Wonwa me polo.​—Kwan Jo Roma 8:38, 39.