1-2. Jutic pa Yehova ma dupa gibenwang’iri ku lembang’o, man lembene tie kud adwogi ma kani i wigi?

KENEN lembe adek ma e: Mi kwong’o, docter unwang’u nia umego moko m’aradu utie ku twoyo moko ma bikwiye magwei. Mir ario, tic uweko umego moko ma tie ku oro ma kadhu 50; umegone besayu tic mange kpe, ebenwang’u de ngo. Mir adek, nyamego moko utimo ni Yehova cuu mandha pi oro ma dupa, re tio uketho dong’ kawoni ecopo timo ngo ire ve m’i wang’e.

² Ka in de ibenweng’iri ku peko ma kumeno, saa moko icopo nwang’u nia kony peri mbe. Pekone romo daru anyong’a kud i ii, romo ketho inwang’u nia tiji mbe, man eromo nyotho kindwu ku jumange.

3. Sitani ku ju m’ebetelo wigi gineno kwo mi dhanu nenedi?

³ I ng’om maeni, dhanu neno kwo mi jumange ni gin ma tije mbe tap calu ma Sitani de nene ko. Sitani cwinye rac akeca uketho ewondo Eva nia ebibedo agonya tek ecamu nying yen ma Mungu kwero, ma ke eng’eyo cuu nia Eva bitho tekene eworo ngo Mungu. Niai con, Sitani ubetelo wi lembe mi kuloka, lemgamba, man dini ceke mi ndra mi ng’om maeni. Pieno ka jukuloka ma pol, weg gamba, man judong dini gibeworo ngo kwo mi dhanu man gibedieng’ ungo pigi, lembene zungo iwa ngo.

4. Wabineno lembang’o i thiwiwec maeni?

⁴ Tung’ ku Sitani, Yehova ubemito wang’ei nia tijwa tie, man ekonyowa kinde ma wabekadhu kud i lembe moko ma copo ketho wanwang’u nia kony mwa mbe. (Zab. 136:23; Rum. 12:3) I thiwiwec maeni, wabineno kite ma Yehova konyo kowa: (1) Saa ma wabetwoyo, (2) saa ma wani can sente, man (3) saa ma tio uketho wabenwang’u nia gin moko mbe ma wacopo timo i tic pa Yehova. Re pi  nicaku, wakenen nia pirang’o ukwayu wang’ei m’umbe jiji nia piwa tie tek i Yehova.

5. Ang’o m’ubecweli niyio nia pi dhanu tie tek i Yehova?

⁵ Kadok nwang’u jucwiowa kud utur de, re piwa tie tek ma sagu utur. (Tha. 2:7) Wakenen thelembe moko kende m’uketho wayero nia piwa tie tek i Yehova. Yehova ucwio dhanu ku copo mi lubo kite pare ma tung’ tung’, eno uketho wasagu giracwia mange ceke mi ng’om. (Tha. 1:27) Emio iwa bende dito iwi lei ceke man ng’om bende.​—Zab. 8:4-8.

6. Lembang’o mange m’ubenyutho nia pi dhanu tie tek i Yehova kadok waleng’ ungo de?

⁶ Yehova umedere asu ninyutho nia pi dhanu tie tek lee i ie kadok i ng’ei m’Adamu dubo. Pi ninyutho nia piwa tie tek akeca i ie, emio Yesu ma tie Wode m’emaru akeca ubin utho pi dubo mwa. (1 Yoh. 4:9, 10) Iwi ukungu mi jamgony, Yehova bicero dhanu ceke ma githo nikum dubo p’Adamu, dok ebed ‘weg bedopwe ku weg bedopwe ngo de.’ (Tic. 24:15) Biblia ma tie Lembe pa Yehova ubenyutho nia piwa tie tek i ie kadok saa ma waberemo, wani can sente, man saa ma tio udaru kero mwa.​—Tic. 10:34, 35.

7. Kenyuth thelembe mange m’uketho wayio nia piwa tek i Yehova.

⁷ Thelembe mange de nuti m’uketho wayio nia piwa tie tek i Yehova. Yehova upeyowa i bang’e man eneno kite ma wajolo ko lembanyong’a mi Ker pare. (Yoh. 6:44) Saa ma wacaku coro i vut Yehova, en de ecoro i vutwa. (Yak. 4:8) Yehova ubetio bende ku saa man kero ma lee pi niponjowa, eno de ubenyutho nia piwa tie tek lee i ie. Eng’eyo nia tin eni watie dhanu ma nenedi man nia wacopo doko dhanu ma nenedi. Bende etwinyowa pilembe emaruwa. (Rie. 3:11, 12) Lembe maeno ubenyutho kamaleng’ nia piwa tie tek lee i Mungu!

8. Wec ma nwang’ere i Zaburi 18:27-29, konyowa nineno peko mwa nenedi?

⁸ Jumoko gibed giparu nia Ubimo Daudi tie dhanu ma ka kite mbe, re en eng’eyo nia Yehova umare man etie kude. Calu ma Daudi ung’eyo lembe maeno, emedere nibedo ku nen ma ber saa m’ebino kadhu kud i peko. (2 Sam. 16:5-7) Kinde ma wanwang’u nia cwinywa tur, kunoke wakadhu kud i peko moko, Yehova copo konyowa kara wanen lembe i ayi ma segi, man ecopo mio iwa tego kara wacir peko mwa. (Som Zaburi 18:27-29.) Ku kony pa Yehova, gin moko acel de mbe ma romo cerowa nitimo ire ku mutoro. (Rum. 8:31) Kawoni wakenen lembe moko adek ma wacopo nwang’ara ko, man wanen nia pirang’o saa maeno ubekwayu ngo wiwa uwil nia Yehova umaruwa lee man piwa tie tek i ie.

9. Twoyo copo ketho wabedo ku nen ma nenedi i wiwa?

⁹ Twoyo copo royo paru mange i wiwa man ecopo ketho wanwang’u nia kony mwa mbe i wang’ ng’atu moko ci. Lewic copo negowa ka waparu nia dhanu mange ubeneno nia lembe ubevoyowa, kunoke kan ubekwayu nia jutim iwa lembe zoo atima. Kadok nwang’u jumange unyang’ ungo nia waberemo de, re asu lewic copo negowa pilembe wanwang’u nia wambe ku copo mi timo gin ma wabed watimo. I saa maeno Yehova copo tielo cwinywa. Nenedi?

10. Nimakere ku Lembrieko 12:25, ang’o ma copo konyowa kinde ma wabetwoyo?

 ¹⁰ Saa ma wabetwoyo, “lembe ma ber” niwacu wec ma mit copo nyayu mutoro i iwa. (Som Lembrieko 12:25.) I Biblia, Yehova ugwoko wec dupa ma beco ma poyo wiwa nia piwa tie tek i ie kadok saa ma wabetwoyo. (Zab. 31:19; 41:3) Kinde ma wabesomo kendo kendo wec maeno ma Mungu uyuyo i wie, Yehova bikonyowa nikabu paru ma rac ma twoyo copo kelo i wiwa.

11. Yehova ukonyo umego moko nenedi?

¹¹ Wakewec iwi lembe m’umego moko ma nyinge Jorge unwang’ere ko i kwo pare. Saa m’ebino aradu, twoyo moko ma pek umake, man twoyone udoko rac magwei i ng’ei nindo ma nok kende, eno uketho enwang’u nia tije mbe. Jorge ukoro kumae: “Alar ang’eyo ngo kite ma twoyo maeno biketho abiwinjara ko man lewic m’ebinyayu i wia; twoyone ubed uketho dhanu neno bang’a tel. Kinde ma twoyone ubemedere, aparu nia kwo para bidoko rac magwei. E can umondo lee i adundena, man akwayu Yehova nia ekonya.” Yehova ukonyo Jorge nenedi? Ekoro kumae: “Calu i saa maeno wia ubed ucungo ngo i kum lembe acel, ang’io giragora moko ma thindho thindho i buku mi Zaburi, m’unyutho nia Yehova ubedieng’ pi jutic pare. Abed asomo giragorane wang’ dupa kubang’ ceng’; e anwang’u nia wec mi giragorane ujuko cwinya mi tuko ngo. Nok nok, dhanu mange ucaku neno nia wang’a maku begony. Giwacu bende nia mutoro m’atie ko ubemio amora i kumgi bende. E anyang’ nia Yehova udwoko wang’ rwo para! Ekonya niloko paru m’abino ko i  wia. Pieno, acaku ketho wia zoo i kum wec mi Biblia m’unyutho kite ma Yehova nena ko kadok nwang’u aberemo.”

12. Kan ibecur ku twoyo moko, icopo timo ang’o kara inwang’ kony i bang’ Yehova?

¹² Kan ibecur ku twoyo moko i kwo peri, ng’ei nia Yehova ung’eyo peko m’ibekadhu kud i ie. Kwaye kara ekonyi ibed ku nen ma ber iwi twoyo m’ubesendi. Yeny i Bibia wec ma copo tielo cwinyi ma Yehova ukanu iri. Keth wii akecane i kum verse m’unyutho nia Yehova neno jutic pare ni dhanu ma pigi tek lee. Kan itimo kumeno, ibinyang’ nia Yehova nyutho bero ni dhanu ceke ma gibetimo ire ku bedopwe.​—Zab. 84:11.

13. Won ot copo winjere nenedi ka tic uweke?

¹³ Weg udi ceke gibed gimito gipong’ yeny mi juruot migi. Re kepar nia tic uweko umego moko mbwang’ ma ke lem ma rac m’etimo de mbe. Esayu tic mange kpe, re ebenwang’u de ngo. Lembe maeno copo ketho eparu nia kony pare mbe. Dong’ kan eketho paru pare iwi lembang’ola pa Yehova eromo nwang’u kony ma kani?

14. Pirang’o Yehova bepong’o lembang’ola pare?

¹⁴ Yehova bepong’o lembang’ola pare ceke. (Yoc. 21:45; 23:14) Thelembe tie dupa ma cwale nitimo kumeno. Thelembene ma pire tek utie kara nyinge kud ucidere. Yehova ung’olo nia ebigwoko jutic pare ma giweg bedopwe, pieno enwang’u nia ukwayu epong’ lembang’ola maeno. (Zab. 31:1-3) M’umedo maeno, Yehova ung’eyo nia can copo mondo i iwa man cwinywa copo tur kan epong’o ngo yeny mwa, pilembe watie juruot pare. Eng’olo nia ebimio iwa piny  ma watie ku yenyne i kwo mwa, man ebipong’o yeny mwa mi tipo. Dong’ wang’ei nia gin moko acel de mbe ma bicere nitimo lembe maeno m’eng’olo!​—Mat. 6:30-33; 24:45.

15. (a) Jukristu mi rundi ma kwong’a ginwang’iri ku peko ma nenedi? (b) Zaburi 37:18, 19 ubetielo cwinywa nenedi?

¹⁵ Ka wang’eyo thelembe m’uketho Yehova bepong’o lembang’ola pare, wacopo bedo mbe ku jiji nia ebikonyowa saa ma wani can sente. Wakewec iwi lapor mi Jukristu mi rundi ma kwong’a. Kinde ma jucaku nyayu ragedo ma kwiny i kum cokiri mi Yerusalem, Jukristu ‘gilal nge nge . . . jukwenda re m’udong’.’ (Tic. 8:1) Kepar pi peko ma lembuno unyayu i kumgi. Copere giweko udi migi, tic ma gibino timo man kuloka migi; lembe maeno uketho can sente upodho i wigi. Re Yehova uwekogi ngo, man gin gigi de mutoro migi uthum ungo. (Tic. 8:4; Ebr. 13:5, 6; Yak. 1:2, 3) Calu ma Yehova ukonyo Jukristu ma con eca, wang’ei nia ebikonyowa bende.​—Som Zaburi 37:18, 19.

16. Ang’o ma copo ketho waparu nia gin moko mandha ma waromo timo ni Yehova umbe?

¹⁶ Ka wamaku betii, wacopo caku paru nia dong’ gin moko mandha ma waromo timo ni Yehova umbe. Copere Ubimo Daudi bende ubino kud adieng’a ma kumeno i tio pare. (Zab. 71:9) Dong’ Yehova copo konyowa nenedi i saa mi tio?

17. Lembe ma nyamego Jheri ukadhu kud i ie ubemio iwa ponji ma kani?

¹⁷ Wakenen lembe ma nyamego Jheri unwang’ere ko. Julwong’e i somo moko ma juponjo i ie umego ku nyimego ku kite mi gwoko Ot Ker, ento ebino mito  ngo ecidhi. Ekoro kumae: “Adaru tii man atie dhatho; bende ambe ku bodho acel de m’acopo timo ko tic mi gwoko Ot Ker.” Ento uthieno m’i wang’ somone, ekoro lembe mir adundene ceke ni Yehova. Urwonde kinde m’etundo i Ot Ker, asu ebino penjere yor i ie nia nyo andha ecopo konyo lembe moko. I saa mi program, umego moko m’umio ponji ukoro ngbeng’ nia bodho mwa ma pire tek akeca utie nibedo ayika man niweko Yehova uponjwa. Nyamego Jheri ubepoi kumae: “Ayero yor i ia nia, ‘Atie ku bodho maeno!’ Kinde m’anyang’ nia Yehova ubedwoko wang’ rwo para, e acaku wak. Yehova bino konya ang’ei nia an de acopo timo ire gin moko ma pire tek, man ebino ayika niponja!” Jheri ubepoi i kum lembe m’ekadhu kud i ie kumae: “Saa m’amondo i somo maeno, cwinya ubino pido, amora bino mbe i kuma man abino nwang’u nia tija mbe, ento kinde ma somone uthum, cwinya doko tek, kero dwogo i kuma man anyang’ nia karaman pira tie tek!”

18. Biblia unyutho nenedi nia Yehova neno tic ma wabetimo ire kadok watii ni gin ma pire tek?

¹⁸ Kadok watii, kwayu wang’ei nia asu Yehova utie ku tic ma wacopo timo. (Zab. 92:12-15) Yesu uponjo nia kadok watie ku copo ma nok kunoke wabeparu nia gin ma wabetimo ni Yehova kabang’e mbe de, re Yehova neno gin moko ci ma wabetimo ire ni gin ma pire tek. (Lk. 21:2-4) Pieno, keth paru peri iwi gin m’icopo timo. Ku lapor, icopo koro pi Yehova ni dhanu, icopo rwo pir umego ku nyimego man icopo tielo cwiny jumange kara gimediri nigwoko bedoleng’ migi. Yehova neni nia itie jatic wadi pilembe itie ayika niwore, ento ungo pi gin m’itie ku copo mi timo.​—1 Kor. 3:5-9.

19. Jurumi 8:38, 39 ubetielo yioyic mwa nenedi?

¹⁹ Watie ku mutoro lee nitimo ni Yehova Mungu, pilembe dhanu ceke ma gibetimo ire pigi tie tek lee i ie! Ecwiowa kara watim yeny pare; bende thier mandha ma wabetimo ire re ma ketho wabedo ku mutoro i kwo mwa. (Nyu. 4:11) Kadok ng’om copo nenowa nia tijwa mbe de, Yehova re nenowa kumeno ngo nyanok de. (Ebr. 11:16, 38) Dong’ kadok twoyo ubenurowa, wabeciro can sente, kunoke tio udaru tego mwa, wapoi nia gin moko acel de mbe ma copo koyowa ku mer ma Wegwa mi polo umaru kowa.​—Som Jurumi 8:38, 39.