1-2. (1) ˈAlomanay a salikaka tahasiˈayaway to o maanan a pasangaray hani? (2) Samaanay ko pilingat cangraanan hani?

HARATENGEN ko tolo a pakayraan. O cecay kapah salikaka pakidemay ko adada, malingaday ko kalonay no tireng. O cecay 50 ko mihecaan malalokay matayal a salikaka fahal sanay mafalah no tawki, hanaca cowato kahela ko faelohay a katayalan. O cecay madimadiay fafahiyan salikaka matoˈasayto, cowato ka hakowa ko katayal saki Yihofaan.

² Ano tahalifaay kiso to malecaday a demak, awaayto ko kapo no niyah wasa miharateng alatek. O hatiniay a pakayraan wa midokaˈ to falocoˈ no miso, milingat to kalalaˈed iso to tao, wa pakatoled to harateng iso alatek.

3. Ci Satan ato roma mafiyoray ningra a tamdaw, samanay ko pinengneng to epoc no tamdaw hani?

³ Itini pinengneng ni Satan, hato awaay ko epoc no tamdaw. Mafanaˈay cingra ano mitowakang to Kawas o mamapatay, kawra kamayanho a milipalaw ci Ifaan, miorat cingraanan to papaira to pasalat mitowakang to Kawas. Padadotocay ci Satan mionting to misasingdiay, mikowanay ato pihakelongan noniya hekal, mansa mahecaday cangra ci Satanan, misakahmaw to epoc ato kasenengan no tamdaw.

4. Toniya lalakaw mamilengo to maanan hani?

⁴ Tokel ni Yihofa kitaanan matatodong ko pinengneng to niyah, mihapinang to epoc no niyah, ano awaay ko kapo no niyah saan kita miharateng i, wa damaen Ningra kita. (ˈOlic  136:23; Loma 12:3) Oniya lalakaw wa milengo to tolo a pakayraan, sasamaan ci Yihofa a padama kitaanan: (1) Ano adada kita i, (2) ano pasangar ko kaˈorip ita i, (3) ano maliteng malonay ko tireng awaayto ko kapo saan miharateng kita i. Salakat, wa milengo ko lalakaw hano ngaˈay kita pakasoˈlin to misaaretengay ci Yihofa minengneng to kahacecay a tamdaw.

5. Iraay ko maanan a wacay ngaˈay mitadtad to tada misalimlaay ci Yihofa minengneng to tamdaw hani?

⁵ Soˈlin tano seraan kita a sangaˈen, kawra itini pinengneng ni Yihofa o kalimlaan kita. (Satapangan 2:7) Adihayay ko wacay sapitadtad tonini. Misangaˈ ko Kawas to tamdaw i, pafeliay to ˈicel i tamdaw ngaˈay minanam to capeling Ningra. (Satapangan 1:27) Misangaˈ Cingra to tamdaw o sainanengay i cikiw a pinaˈorip, miocor cangraanan mikowan to sera ato ˈaˈadopen.—ˈOlic 8:4-8.

6. O maanan ko ngangaˈay a misawacay to misalimlaay ci Yihofa to cowa kalefot a tamdaw hani?

⁶ Ikor no mararaw ci Atam, padadotocay ci Yihofa maolah to tamdaw. Misaaretengay Cingra minengneng kitaanan, mansa ocoren Ningra ko kaolahan a wawa ci Yis kinafalah to ˈorip, milidong to ciraraway a tamdaw. (1 Yohani 4:9, 10) Samanen iraayto ko sapatefoc, wa patikolen ni Yihofa paˈorip ko pakayniay i raraw mapatay a tamdaw, mahawpay ko ‘moecelay ato cowa ka moecel a tamdaw.’ (Dmak 24:15) Sowal no Fangcalay Cudad soˈlin adada, manikaw ato maliteng kita, kamayan misalimla ko Kawas kitaanan.—Dmak 10:34, 35.

7. Iraayho ko maanan a mamisawacay to misaaretengay ci Yihofa minengneng kitaanan hani?

⁷ Adihayayho ko mamisawacay to misaaretengay ci Yihofa minengneng kitaanan. Mahapinangay Ningra to maolahay kita to ngaˈayay a lihaf, mansa misolot kitaanan tayni i tatihi Ningra. (Yohani 6:44) Ingiden ita Cingra, wa ingiden Ningra kita. (Yakop 4:8) Cipinangay Cingra to waywayan ita, mafanaˈay to hakowaay ko ˈicel ita, mansa adihay ko mihadakan a toki ato ˈicel a pasifanaˈ kitaanan. Maolahay Cingra kitaanan, mansa mirikec kitaanan. (Taneng 3:11, 12) Soˈlinay misaareteng ci Yihofa minengneng kitaanan!

8. ˈOlic 18:27-29 samanay padama kitaanan i pasangaray pakayraan mitafo to tawlikay hani?

⁸ Na misakahmawan no tao a minengneng ci Tafiti, kawra mafanaˈay cingra to maolahay, midamaay ci Yihofa cingraanan, hato matatodongay ko pinengneng ningra to malifaay no niyah. (2 Samuil 16:5-7) Ano matoled ko falocoˈ anca tahapades kita i, wa ngaˈay ci Yihofa padama kitaanan malo tawlikay, ira ko ˈicel a miremo to masakenaay a pasangaray. (ˈOsien ko ˈOlic 18:27-29.) Ira ko sadama ni Yihofa, oha ngangaˈay lipahak kita a midoko Cingraanan. (Loma 8:31) Itini roma pakayraan, ka kiriwiˈen ita a miharateng to maolahay misaaretengay minengneng ci Yihofa kitaanan. Dotoc songilaˈen ita a milengo.

9. Ano adada kita i, alatek iraay ko maanan a harateng hani?

⁹ O adada patoleday kitaanan alatek, miharateng to awaay ko kapo no niyah. Ano mafanaˈ ko tao to adadaay kita i, anca sapadamaaw ko tao i, mangodoay kita. Alatek cowa kafanaˈ ko tao to adadaay kita, awaay ko ˈicel ita midemak to isaˈayaway a demak a matoled ko falocoˈ. Kawra papaˈicelen ni Yihofa kita miliyaw a tanoktok, sasamaan Cingra paˈicel kitaanan hani?

10. Mikitini Taneng 12:25, ano adada i o maanan ko ngangaˈay palipahak kitaanan hani?

 ¹⁰ Ano adada kita i, o ‘ngaˈayay a sowal’ wa palipahak kitaanan. (ˈOsien ko Taneng 12:25.) Pakayni i Fangcalay Cudad adihayay ko mitemeray to falocoˈ a sowal, mahapinangay ita soˈlin aretengay ko adada i, o masakalimlaan a tamdaw kita sanay ko pinengneng ni Yihofa. (ˈOlic 31:19; 41:3) Ano songilaˈen ita miˈosi ko Fangcalay Cudad, satikotikolen a miˈosi ko Kimad no Kawas, papadamaen ni Yihofa kita pakaremo to matoleday a harateng.

11. O cecay a salikaka samanay a mafanaˈ to sadama ni Yihofa hani?

¹¹ Nengnengen ita ko nalifetan ni Hawer. O kapah ci Hawer pakidemay ko adada, kalikiay midapdap ko adada, malonayay ko tireng, hato awaay ko kapo a tamdaw sanay miharateng. Sanay cingra: “Coka harateng ako oniya adada pakatoleday to falocoˈ ako, o kaciharateng no tamdaw tada pakangodoay takowanan. Pakidem ko adada ako i, maharatengay ako o nokaˈorip ako wa malingad ko tatiih, tada masomaday kako. Cangacangen ako ko sapadama ni Yihofa.” Samanay padama ci Yihofa cingraanan hani? Sanay cingra: “Pasangaray kako a misamacay, mansa mipiliˈay kako to sinael i ˈOlic, oya paihkalay to olah ni Yihofa a sinael, to romiˈamiˈad miˈosi pakarihaday to falocoˈ ako. Ikorto mahapinangay no roma tamdaw halitawaayto kako, o tawlikay a waywayan ako pakalalokay cangraanan. Mahapinangayto ako pacaˈofay ci Yihofa to satolon ako, cowato katoled ko falocoˈ ako. Ano pakidem ko adada ako i, kamayan misalimla ci Yihofa takowanan sanay ko Fangcalay Cudad, paifalocoˈan ako koniya sowal.”

12. Ano misemsemay kiso to adada i, wa samaan milifok to sapadama ni Yihofa hani?

¹² Ano misemsemay kiso to adada i, ngaˈay rihadayen ko falocoˈ, cipinangay ci Yihofa to  roray iso. Cangacangen Cingra padama tisowanan matatodong ko pinengneng to pakayraan no niyah, itini Fangcalay Cudad mikilim to sahinom ni Yihofa a sowal. O roma sinael paihkalay to misaaretengay ci Yihofa minengneng to finawlan Ningra, kiriwiˈen a misinanot koniya sinael. Mihaenay, wa mahapinang iso ngaˈayay ko picada ni Yihofa to polong madimadiay midoko Cingraanan a tamdaw.—ˈOlic 84:11.

13. Ano fahal saan awa ko katayalan no tawki no lomaˈ, wa ira ko masamaanay a harateng hani?

¹³ Tawki no lomaˈ sapidipotaw to paro no lomaˈ. Mankora, ano fahal saan pasawaden ko tayal no salikaka i, hanaca cowato kahela ko roma tayal, awaayto ko kapo wa saan cingra miharateng. Ano mahaen i, misinanot to sakiˈok ni Yihofa sasamaan padama cingraanan hani?

14. Hano mitoor ci Yihofa to sakiˈok hani?

¹⁴ Mitooray ci Yihofa to sakiˈok. (Yosuwa 21:45; 23:14) Hano mihaen ko demak Ningra hani? Salakat, milingatay to ngangan Ningra konini. Mikiˈokay Cingra to mamidipot to madimadiay a sikawdan Ningra, mansa iraay ko ˈinorong no Niyah a mitoor to sakiˈok. (ˈOlic 31:1-3) Roma i, o paro no lomaˈ ni Yihofa kita, mafanaˈay Cingra ano eca ka pidipot Cingra kitaanan, wa matoled kita. Ano mikiˈokay Cingra to papafeli to sakaˈorip ita, padama kitaanan tahatolas ko madimadi, o mamatoor Ningra a midemak.—Matay 6:30-33; 24:45.

15. (1) Saka 1 hahekalan a Krisciyang misiˈayaway to maanan pasangaray hani? (2) Mikitini ˈOlic 37:18, 19 wa ngaˈay pakasoˈlinen ita ko maanan hani?

¹⁵ Ano haratengen ita to hano mitoor ci Yihofa to sakiˈok, wa pakasoˈlin to papadama Cingra kitaanan miremo to pasangar no kaˈorip.  Haratengen ko saka 1 hahekalan a Krisciyang, pakidemay ko macadaay a sapalak no Yirusalimay a kasakopang, dengan o tarokos, maliwasakay ko polong a tamdaw tayra i roma pala. (Dmak 8:1) Awaay ko sakaˈorip nangra, ato lomaˈ, pasangaray ko kaˈorip. Kawra cowa ka liyasen ni Yihofa cangra, cowa pakidem ko katoled nangra. (Dmak 8:4; Hipray 13:5, 6; Yakop 1:2, 3) Na midipotan ni Yihofa koniya madimadiay Krisciyang, oha mamidipot kitaanan.—ˈOsien ko ˈOlic 37:18, 19.

16. Samanay a tamdaw miharatengay to awaay ko kapo ako sanay hani?

¹⁶ O malitengay a salikaka cowato ka ngaˈay ko niyah midemak to maanan ci Yihofaan saan a miharateng, iraay ko mahecaday a harateng ni Tafiti. (ˈOlic 71:9) Wa samanen ni Yihofa padama ko malitengay a salikaka hani?

17. Mikitini nalifetan ni Curi mananamay ita ko maanan hani?

¹⁷ Nengnengen ko nalifetan no salikaka ci Curi. Matahidangay cingra mirienang to pahatatanamay misangaˈ to Hongti Kitakit kasaˈopoan, cisasaay ko harateng ningra, sanay: “Malitengayto kako, o maponengayho, awaay ko maanan a inaneng, awaay ko mamademak ako ci Yihofaan sanay.” Itini ˈayaw no pihatatanaman a dadaya, pasowalan ningra ci Yihofa to cariraw no niyah. Saka tosa romiˈad, tayraay cingra i Hongti Kitakit kasaˈopoan, miharatengayho to cowa ko tatayni ko niyah. Itini pihatatanaman a toki i, somowalay ko cecay salikaka, o makahiay micada to sapahatatanam i, o kalimlaan a inaneng. Sanay ci Curi: “Miharateng kako itiya ‘o mamadangar ako konini!’ Cowato pakaˈemet a tomangic. Mahapinangay ako pacaˈofan ni Yihofa ko satolon ako, mihaen  a pasowal takowanan, ngaˈay mihadak kako to ˈicel, makahiay Cingra pahatatanam takowanan.” Milomal toniya nalifetan, sanay ci Curi: “ˈAyaw no mihatatanam, marawraway matoleday kako, awaay ko kapo sanay miharateng, ikor no mapahatatanam, pakasoˈlinayto, tawlikayto, iraay ko epoc no niyah sanay ko harateng ako.”

18. O Fangcalay Cudad samanay paihkal, soˈlin malitengto kita misalimlaay ci Yihofa to nano demak ita Cingraanan hani?

¹⁸ Soˈlin malitengto kita, wa ngaˈayho misarocod to ˈicel saki Yihofaan. (ˈOlic 92:12-15) Pasowalay ci Yis kitaanan, miharateng kita cowa ka hakowa ko ˈicel, cowa ka samaan ko midemakan, misalimlaay ci Yihofa to nano demak ita Cingraanan. (Luka 21:2-4) O kapot a matayal sanay ko pinengneng no Kawas kitaanan, cowa ko pakayniay i inaneng ita, ao pakayniay i noka makahi ita a midofdof Cingraanan.—1 Korinto 3:5-9.

19. Itini i Loma 8:38, 39 pafeliay kitaanan to maanan a sakiˈok hani?

¹⁹ Misaaretengay ci Yihofa minengneng to midokoay Cingraanan a tamdaw, midoko to hatiniay a Kawas, tada matemeray ko falocoˈ no mita! Misangaˈ Cingra kitaanan, oha mamidofdof kita to araaw Ningra a maˈorip. Dengan midoko Cingraanan, wa ciepoc ko nokaˈorip no tamdaw. (Paˈarawan 4:11) Alatek misakahmaway ko kalo a tamdaw kitaanan, kawra ci Yihofa misaaretengay minengneng kitaanan. (Hipray 11:16, 38) Ano tahalifaay kita to adada, pasangar ko kaˈorip anca malitengto kita a matoled ko falocoˈ i, haharatengen, awaay ko maanan mamiconged to Kawas a maolah kitaanan.—ˈOsien ko Loma 8:38, 39.