1-2. ?Wanem trabol we plante man blong Jehova oli kasem? ?Mo oli harem olsem wanem?

TRAEM tingbaot defdefren trabol we trifala ya i kasem: Dokta i talem long wan yangfala brata se hem i gat wan rabis sik we bambae i mekem paoa blong hem i godaon sloslo. Wan brata we i medel man finis mo i wok had, i lusum wok blong hem mo i no save faenem wan narafala wok, nating se hem i traehad. Wan gudfala sista i no moa save mekem plante wok blong Jehova, from we hem i kam olfala.

² Sipos yu yu gat wan trabol olsem, maet yu harem se yu no naf blong mekem wan samting, mo tu, yu no moa glad, yu harem se yu nating nomo, mo yu no moa fren gud wetem ol narafala.

3. ?Setan mo ol man blong hem oli gat wanem tingting long laef blong ol man?

³ Long wol ya, yumi luk tingting blong Setan long saed blong laef blong man. Longtaem finis i kam, Setan i ting nating long ol man. Hem i no gat sore long Iv. Hem i talem long Iv se bambae hem i fri, be hem i save finis se sipos Iv i no obei long God, bambae hem i ded. Setan i bos long ol bisnes we oli fulap long kruked fasin, politik, mo ol jos. Taswe yumi no sapraes se plante bisnesman, ol man blong politik, mo ol lida blong skul, oli gat sem fasin olsem Setan. Oli no respektem laef blong ol man, mo oli no kea taem ol man oli harem nogud.

4. ?Bambae yumi tokbaot wanem long stadi ya?

⁴ Be Jehova i defren. Hem i wantem se yumi harem gud, mo  hem i givhan long yumi taem yumi fesem ol trabol we oli mekem tingting i foldaon. (Sam 136:23, NW; Rom 12:3) Stadi ya bambae i tokbaot olsem wanem Jehova i givhan (1) taem yumi kasem wan bigfala sik, (2) taem i had blong kasem mane, mo (3) taem yumi kam olfala mo yumi no moa save mekem plante wok blong Jehova. Be fastaem, bambae yumi tokbaot from wanem yumi sua se Jehova i tinghae long yumi wanwan.

5. ?Wanem i soemaot se Jehova i tinghae long ol man?

⁵ Nating se yumi kamaot long graon, be yumi sas moa i bitim graon. (Jen. 2:7) Traem tingbaot sam samting we oli soemaot se Jehova i tinghae long yumi. Hem i wokem ol man blong oli naf blong tekem fasin blong hem. Samting ya i leftemap man antap long ol narafala samting we God i mekem. (Jen. 1:27) Mo tu, hem i givim wok long man blong lukaot long wol mo ol animol.—Sam 8:4-8.

6. ?Wanem narafala samting i soemaot se Jehova i tinghae long ol man?

⁶ Afta we Adam i mekem sin, Jehova i gohed yet blong tinghae long ol man. Taswe, hem i givim Pikinini we hem i lavem tumas, Jisas, olsem wan ransom blong pemaot yumi. (1 Jon 4:9, 10) Jehova bambae i yusum ransom blong mekem ol man we oli ded from sin blong Adam, oli laef bakegen, “ol man we oli stret wetem ol man we oli no stret.” (Wok 24:15) Baebol i soemaot se Jehova i tinghae long yumi, nating se yumi sik, i had blong yumi kasem mane, o yumi kam olfala.—Wok 10:34, 35.

7. ?Wanem sam narafala samting we oli soemaot se Jehova i tinghae long ol man blong hem?

⁷ I gat sam moa samting tu we oli soemaot se Jehova i tinghae long yumi. Hem i pulum yumi i kam long hem, mo i luk se yumi glad blong harem gud nius. (Jon 6:44) Taem yumi kam klosap long Jehova, hem i kam klosap moa long yumi. (Jem. 4:8) Mo tu, Jehova i yusum taem blong hem mo i wok had blong tijim yumi, hemia i soemaot se hem i tinghae long yumi. Hem i save se yumi wanem kaen man naoia, mo bambae yumi save kam wanem kaen man long fiuja. Mo hem i stretem yumi from we hem i lavem yumi. (Prov. 3:11, 12) !Ol samting ya i soemaot klia se Jehova i tinghae long yumi!

8. ?Olsem wanem Ol Sam 18:27-29 i save halpem yumi blong gat stret tingting long ol trabol we yumi fesem?

⁸ Sam man long taem blong King Deved oli ting nating long hem, be Deved i save se Jehova i lavem hem mo i stap givhan long hem. From samting ya, Deved i gat stret tingting long trabol we hem i kasem. (2 Saml. 16:5-7) Taem tingting blong yumi i foldaon o yumi kasem trabol, Jehova i save givhan long yumi blong yumi jenisim nogud tingting we yumi gat, mo blong yumi winim eni samting we i stap blokem rod blong yumi. (Ridim Ol Sam 18:27-29.) Taem Jehova i givhan long yumi, i no gat wan samting we i save blokem yumi blong mekem wok blong hem wetem glad. (Rom 8:31) Naoia bambae yumi tokbaot tri trabol long laef blong yumi, we yumi mas tingbaot se Jehova i lavem yumi mo i tinghae long yumi.

9. ?Sik i save mekem wanem long yumi?

⁹ Sik i save mekem tingting i foldaon mo yumi harem se yumi gud blong nating nomo. Maet yumi sem taem ol man oli luksave se yumi gat wan sik mo yumi mas dipen long narafala blong givhan long yumi. Nating sipos oli no luksave se yumi sik, be maet yumi sem yet from we yumi no naf blong mekem plante samting we yumi mekem bifo.  Long taem olsem, Jehova i leftemap tingting blong yumi. ?Olsem wanem hem i mekem samting ya?

10. Folem Ol Proveb 12:25, ?wanem i save halpem yumi taem yumi sik?

¹⁰ Taem yumi sik, ol “gudfala tok” oli save leftemap tingting. (Ridim Ol Proveb 12:25.) Jehova i putum plante gudfala toktok long Baebol, blong soemaot se hem i tinghae long yumi nating se yumi sik. (Sam 31:19; 41:3) Sipos yumi ridim ol tok ya bakegen mo bakegen, Jehova bambae i halpem yumi blong winim ol nogud tingting ya we yumi gat.

11. ?Olsem wanem Jehova i givhan long wan brata?

¹¹ Traem tingbaot wan brata we nem blong Joj. Taem Joj i yangfala, hem i kasem wan sik we i kam antap kwiktaem, mo i mekem hem i harem se hem i gud blong nating nomo. Hem i talem se: “Mi mi sek long ol nogud tingting we sik ya i givim long mi, mo mi sem taem ol narafala oli lukluk mi. Taem sik i kam strong moa, mi tingbaot olsem wanem laef blong mi bambae i jenis. Tingting blong mi i foldaon, mo mi plis long Jehova blong i givhan long mi.” ?Olsem wanem Jehova i givhan long Joj? Hem i talem se: “From we mi no save putum tingting i stap strong long wan samting, mi ridim sam sot vas nomo blong Ol Sam we oli soemaot se Jehova i kea long ol man blong hem. Evri dei, mi ridim bakegen ol vas ya, mo oli leftemap tingting blong mi mo mekem mi mi strong. Sloslo ol narafala oli luksave se mi stap smael. Samfala oli talem se glad blong mi i leftemap tingting blong olgeta. !Mi kasem save se Jehova i ansarem prea blong mi! Hem i givhan long mi blong mi jenisim tingting blong mi. Mi putum tingting blong mi long ol tok blong Baebol we i soemaot se Jehova i tinghae long mi, nating se mi sik.”

12. Taem yu kasem wan strong sik, ?olsem wanem blong kasem help long Jehova?

 ¹² Sipos yu gat wan strong sik, yu save sua se Jehova i kasem save long trabol blong yu. Prea long hem blong i halpem yu blong yu gat stret tingting long samting we i hapen. Nao lukaotem ol gudfala tok we Jehova i putum long Baebol blong givhan long yu. Ridim ol vas we oli soemaot se Jehova i tinghae long ol man blong hem. Sipos yu mekem olsem, bambae yu luksave se Jehova i gud, mo i kaen long olgeta we oli holemstrong long hem.—Sam 84:11.

13. ?Hed blong famle i save harem olsem wanem, sipos hem i lusum wok blong hem?

¹³ Hed blong famle i wantem givim evri samting we famle i nidim. Be maet hem i lusum wok blong hem, nating se i no mekem wan rong. Hem i traehad blong faenem wan narafala wok, be i nogat. Hem i save harem se hem i gud blong nating nomo. Sipos hem i tingbaot ol promes blong Jehova, ?olsem wanem oli save halpem hem?

14. ?From wanem Jehova i holem ol promes blong hem?

¹⁴ Oltaem Jehova i holem promes blong hem. (Jos. 21:45; 23:14) ?From wanem hem i mekem olsem? I gat plante risen. Faswan, hemia from nem blong hem. Jehova i promes se bambae hem i lukaot long ol man blong hem, mo hem i gat strong tingting blong mekem promes ya i kamtru. (Sam 31:1-3) Mo tu, Jehova i save se yumi, we yumi famle blong hem, bambae yumi harem nogud tumas sipos hem i no lukaot gud long yumi. !Hem i promes blong givim evri samting we yumi nidim long laef, blong gohed blong mekem wok blong hem, mo i no gat wan samting i save blokem hem blong mekem promes ya i kamtru!—Mat. 6:30-33; 24:45.

15. (1) ?Wanem hadtaem we ol Kristin bifo oli fesem? (2) ?Ol Sam 37:18, 19 i mekem yumi sua long wanem?

 ¹⁵ Taem yumi tingbaot from wanem Jehova i holem ol promes blong hem, yumi sua se bambae hem i halpem yumi taem i had blong kasem mane. Tingbaot eksampol blong ol Kristin bifo. Taem ol man oli agensem kongregesen long Jerusalem, “olgeta disaepol oli go stap olbaot long Judia mo Sameria.” (Wok 8:1) ?Hemia i mekem wanem long olgeta? !I had blong oli kasem mane! Ating oli lusum haos mo wok blong olgeta. Be Jehova i no lego olgeta, mo tu, oli no lusum glad blong olgeta. (Wok 8:4; Hib. 13:5, 6; Jem. 1:2, 3) Jehova i givhan long ol gudfala Kristin ya, mo bambae hem i givhan tu long yumi.—Ridim Ol Sam 37:18, 19.

16. ?Wanem i save mekem yumi wari se maet Jehova i no moa tinghae long wosip blong yumi?

¹⁶ Taem yumi kam olfala, maet yumi wari from we yumi no moa save mekem plante samting long wok blong Jehova. Ating King Deved tu i wari long samting ya, taem hem i kam olfala. (Sam 71:9) ?Jehova i save halpem yumi olsem wanem?

17. ?Yumi lanem wanem long stori blong Jeri?

¹⁷ Traem tingbaot wan sista we nem blong hem Jeri. Oli singaot hem blong i go long wan miting long Haos Kingdom, blong kasem trening blong fiksimap mo klinim gud ol haos wosip. Be hem i no wantem go, i se: “Mi mi olfala finis, mi wan wido, mo mi no gat save long wan samting. ?Olsem wanem Jehova i save yusum mi? Mi gud blong nating nomo.” Long naet bifo long miting ya, hem i prea long Jehova mo i talemaot evri samting long hem. Long nekis dei, taem hem i go long Haos Kingdom, hem i stap tingting yet se hem i no sud kam. Be wan brata we i givim tok long  miting ya i talem se, impoten samting, hemia we yumi rere blong letem Jehova i tijim yumi. Jeri i talem se: “!Mi mi naf blong mekem samting ya! Mi stat blong krae from mi luksave se Jehova i ansarem prea blong mi. !Hem i stap soemaot long mi se mi mi naf blong givim samting long hem, mo hem i rere blong tijim mi!” Jeri i tingting bak i se: “Taem mi go long miting ya, mi fraet, mo tingting blong mi i foldaon. !Be taem mi kamaot, tingting i strong, mi harem gud, mi harem se mi naf blong mekem wan gudfala samting!”

18. ?Olsem wanem Baebol i soemaot se Jehova i tinghae long wosip blong yumi taem yumi kam olfala?

¹⁸ Taem yumi kam olfala, tingting blong yumi i save strong yet se Jehova i gat wok blong yumi mekem. (Sam 92:12-15) Jisas i tijim yumi se nating we yumi no gat plante save, o yumi naf blong mekem smol samting nomo, be Jehova i tinghae long eni samting we yumi mekem blong hem. (Luk 21:2-4) Taswe, yu mas tingbaot samting we yu naf blong mekem. Yu yu naf blong tokbaot Jehova long ol narafala, prea from ol brata mo sista, mo leftemap tingting blong olgeta blong oli holemstrong long Jehova. Traem tingbaot: Jehova i letem yu yu joen wetem hem blong mekem wok. Hemia i no from samting we yu naf blong mekem, be from we yu glad blong obei long hem.—1 Kor. 3:5-9.

19. ?Rom 8:38, 39 i mekem yumi sua long wanem?

¹⁹ !Yumi glad tumas blong wosipim Jehova, God ya we i tinghae long olgeta we oli mekem wok blong hem! Hem i wokem yumi blong yumi mekem samting we hem i wantem, mo taem yumi wosipim hem, yumi harem gud long laef blong yumi. (Rev. 4:11) Maet ol man blong wol oli ting nating long yumi, be Jehova i no gat tingting olsem. (Hib. 11:16, 38) Taem tingting blong yumi i foldaon from we yumi sik, i had blong kasem mane, o yumi kam olfala, yumi mas tingbaot se i no gat wan samting we i save tekemaot yumi long Papa blong yumi long heven, we i lavem yumi tumas.—Ridim Rom 8:38, 39.