1-2. Situasi aha do na gati iahapkon juakjuak ni Naibata sonari, janah aha do pangaruhni bani sidea?

BAYANGKON ma tolu situasi on. Adong sada sanina na maposo hona naborit na parah. Dong homa sada kopala keluarga na dob marumur ipecat hun parhorjaanni. Anjaha domma ipindahi ia horja na legan, tapi lalap lang dapotsi. Dong use hasomanta naboru na dob matua lambin hurang ma gogohni. Halani ai, lang bahat be na boi ihorjahonsi ibagas pangidangion.

² Porini sonai situasimu, ra do ham gabe maretek ni uhur. Halani situasi ai, gabe lang be malas uhurmu, pangahapmu lang marguna be ham bani na legan, anjaha lang ra be ham marsaor pakon sidea.

3. Sonaha pangahap ni Sibolis pakon halak i dunia on mangidah halak na legan?

³ Sibolis lang parduli bani halak na legan, anjaha bahat do halak i dunia on na mangusihi ia. Ibahen Sibolis do si Hawa ase lang manangihon Naibata, janah ihatahon ai do na boi mambahen bebas sidea. Hapeni ibotoh Sibolis parohkon hamatean do ai. Sonari on pe, Sibolis do na manrajai sistem perdagangan, politik, ampa ugama i dunia on. Halani ai, lang tarsonggot hita anggo bahat parbisnis, parpolitik, ampa pambobai ugama mapas mangidah na legan janah lang parduli.

4. Aha do na laho iulas hita bani artikel on?

⁴ Tapi Jahowa sihol ase ibotoh hita maharga do hita Bani. Anjaha tongtong do Ia mangurupi hita ibagas hasunsahan. (Ps. 136:23; Rom 12:3) Bani artikel on iulas hita ma sonaha Jahowa mangurupi hita bani tolu situasi  on: (1) Sanggah hona naborit na parah, (2) sunsah mansari duit, (3) sanggah iahap hita lang be marguna hita ibagas pangidangion halani domma matua. Tapi paima ai, ulas hita ma lobei mase pos uhurta na maharga do hita bani Jahowa.

5. Hunja do ibotoh hita na maharga do hita bani Jahowa?

⁵ Hassi pe humbani orbuk hita itompa, tapi sedo artini lang maharga hita. (1 Mus. 2:7) Pardiateihon ma piga-piga alasan mase hita maharga bani Jahowa. Itompa do hita ase boi mangusihi sifat-sifat ni Jahowa. (1 Mus. 1:27) Halani ai dearan do hita marimbangkon tompaon na legan. Anjaha hita do homa na ibahen Ia laho manrajai tanoh on ampa binatang.​—Ps. 8:5-9.

6. Aha ope alasan na legan anggo hita maharga bani Jahowa?

⁶ Dobkonsi mardousa si Adam, totap do holong uhur ni Jahowa bani manisia. Ibere Ia ma anak na hinaholongan-Ni, ai ma Jesus, laho paluahkon hita humbani dousa. (1 Joh. 4:9, 10) Halani tobusan ni Jesus, laho ipapuho Jahowa ma ganup na matei halani dousa ni si Adam age “parpintor ampa pargeduk”. (Lah. 24:15) Humbani Bibel ibotoh hita ma maharga tumang do hita i lobei ni Jahowa age pe hita boritan, miskin, atap matua.​—Lah. 10:34, 35.

7. Mase lambin pos uhurta na maharga do hita bani Jahowa?

⁷ Dong homa alasan na legan mase pos uhurta na maharga do hita bani Jahowa. Itogu-togu do hita hu Bani. Anjaha sanggah hita manangar hasintongan, ipardiateihon Jahowa do sonaha paruhuranta. (Joh. 6:44) Halani dohor hita hu Bani, lambin dohor ma Ia hubanta. (Jak. 4:8) Sabar do Jahowa mangajari hita halani maharga hita i lobei-Ni. Ibotoh Jahowa do homa sonaha paruhuranta sasintongni janah sonaha carani mangurupi hita ase lambin dear. Halani holong uhur-Ni ipinsang do homa hita. (Pod. 3:11, 12) Tangkas ma harga tumang do hita bani Jahowa!

8. Sonaha Psalmen 18:28-30 boi mangurupi hita sanggah ibagas hasunsahan?

⁸ Raja Daud pe ongga do etek uhurni. Hassi pe sonai, idingat ia do anggo Jahowa holong hu bani janah tongtong mangurupisi. Ai do na mambahen ia totap toguh sanggah ibagas hasunsahan. (2 Sam. 16:5-7) Sanggah hita maretek ni uhur atap bahat tantangan, Jahowa boi mangurupi hita ase tongtong marpangarapan janah boi mangatasi situasi ai. (Basa Psalmen 18:28-30.) Marhitei pangurupion ni Jahowa, boi do hita totap mangidangi-Si ibagas malas ni uhur. (Rom 8:31) Sonari, ulas hita ma tolu situasi na porlu idingat hita na maharga do hita bani Jahowa.

9. Sanggah boritan, ra do sonaha ma pangahapta?

⁹ Halani boritan, boi do ai mambahen hita maretek ni uhur janah iahap hita lang marguna be hita bani na legan. Ra do hita maila ipardiateihon halak janah maningon tongtong iurupi na legan. Hassi pe lang ibotoh halak na boritan do hita, tapi tong do maila hita halani lang be bahat na boi ihorjahon hita. Bani situasi sisonai, ipatoguh Jahowa do hita. Sonaha carani?

10. Domu bani Podah 12:25, aha do na boi mangurupi hita sanggah boritan?

 ¹⁰ Sanggah boritan, “parsahap na basar” atap hata apoh-apoh boi patoguhkon uhurta. (Basa Podah 12:25.) Bani Bibel bahat do pangapohon na ibere Jahowa bani juakjuak-Ni, anjaha on patuduhkon maharga do hita Bani. (Ps. 31:20; 41:4) Jadi anggo marulak-ulak ibasa hita Bibel, gabe lang pala haru uhurta hassi pe boritan.

11. Sonaha do Jahowa mangurupi si Jorge?

¹¹ Pardiateihon ma pangalaman ni si Jorge. Poso ope ia tapi domma parah naboritni. Halani ai gabe maretek ni uhur ma ia. Ia mangkatahon, “Halani boritan, maila do ahu anggo ipardiateihon halak. Anjaha lambin dokah lambin parah do naboritku. Gabe haru do uhurhu sonaha do ahu holi janah pusok tumang uhurhu. Halani ai martonggo ma ahu ase iurupi Jahowa.” Sonaha Jahowa mangurupi si Jorge? Nini do, “Halani urah do ahu lupa, hubasa ma pitah piga-piga ayat bani Psalmen na patugahkon sonaha Jahowa mansarihon juakjuak-Ni. Jadi huulaki ma mambasa ayat ai tiap ari. Gabe tarapoh ma uhurhu halani ai. Ujungni, ididah halak ma anggo ahu lambin gati tarsirom. Ihatahon sidea, tarojur do sidea halani mangidah ahu. Jadi, domma ibalosi Jahowa tonggongku. Iurupi Ia do ahu ase ulang marpangahap anggo ahu lang be marguna. Rahanan ma hudingat Hata ni Naibata marimbangkon sitarononku.”

12. Anggo ham boritan, aha do na porlu ibahen ham ase ulang be maretek ni uhur?

¹² Anggo sonari ham pe boritan, pos ma uhurmu ibotoh Jahowa do sitarononmu  ai. Pindo ma bani Jahowa ase iurupi ham ase lang be maretek ni uhur. Dob ai, basa ma hata apoh-apoh na ipasirsir Jahowa ibagas Bibel. Tongtong ma pingkirhon ayat-ayat ni Bibel na patuduhkon maharga do juakjuak ni Naibata Bani. Anggo ibahen ham sonai, iahapkon ham ma holi bujur tumang do Jahowa ai bani halak na setia mangidangi-Si.​—Ps. 84:12.

13. Porini sada kopala kaluarga ipecat hun parhorjaan, ra do sonaha pangahapni?

¹³ Sihol do ganup kopala kaluarga marhorja laho mansarihon kaluargani. Tapi sipata dong do na ipecat hun parhorjaanni, age pe lang dong salahni. Domma marusaha ia mangindahi horja na legan tapi lalab do lang dapot. Bani situasi sonai, ra do gabe maretek ni uhur ia. Ponting tumang do ase idingat ia janji ni Jahowa laho mangurupisi. Mase sonai?

14. Mase boi pos uhurta tongtong do ipasaud Jahowa ganup janji-Ni?

¹⁴ Tongtong do ipasaud Jahowa ganup janji-Ni. (Jos. 21:45; 23:14) Mase boi pos uhurta? Na parlobei, halani adong do kaitanni ai pakon artini goran-Ni. Domma marjanji Jahowa laho mansarihon juakjuak-Ni. Anggo lang ibahen Ia sonai gabe sambor ma holi goran-Ni. (Ps. 31:2-4) Leganni ai, halani hita dihut gabe bagian kaluarga ni Jahowa, ibotoh Ia ma pusok do uhurta anggo lang isarihon Ia haporluanta. Jadi domma marjanji Jahowa laho mambere haporluanta anjaha mangurupi hita ase totap setia mangidangi-Si. Anjaha lang adong na boi manlanglangi Ia laho pasaudkon janji-Ni ai.​—Mat. 6:30-33; 24:45.

15. (a) Tantangan aha do na iahapkon halak Kristen bani abad na parlobei? (b) Mase Psalmen 37:18, 19 boi patoguhkon uhurta?

 ¹⁵ Anggo idingat hita ganupan alasan ai, gabe boi ma hita totap toguh hassi pe ibagas hasunsahan. Dingat hita ma contoh halak Kristen bani abad na parlobei. Halani sidea iparburu i Jerusalem, gabe ‘merap ma haganup sidea sobali apostel-apostel ai’. (Lah. 8:1) Aha do pangaruhni ai? Halani domma itadingkon sidea rumah ampa horjani, tontu gabe sunsah ma sidea mansari duit. Hassi pe sonai, lang ongga itadingkon Jahowa sidea, anjaha totap do sidea marmalas ni uhur. (Lah. 8:4; Heb. 13:5, 6; Jak. 1:2, 3) Jadi anggo sidea pe iurupi Jahowa, tontu iurupi Ia do homa hita sonari on.​—Basa Psalmen 37:18, 19.

16. Situasi aha ope na boi mambahen hita maretek ni uhur?

¹⁶ Halani lambin matua, ra do iahap hita lang bahat be na boi ihorjahon hita bani Jahowa. Ra do sonai do homa pangahap ni si Daud dobkonsi matua ia. (Ps. 71:9) Sonaha Jahowa mangurupi hita?

17. Aha do na boi iparlajari hita humbani pangalaman ni hasomanta si Jheri?

¹⁷ Dong pangalaman ni hasomanta naboru na dob matua na margoran si Jheri. Iontang do ia ase dihut palatihan laho mangurus Balei Harajaon. Tapi mungkahni lang ra ia roh. Nini uhurni, “Lang adong gunani ahu roh. Domma matua ahu, mabalu homa, lang adong holi na boi hubahen laho mangurupi ijai.” Tapi bani borngin paima acara ai, ipatugah ia ganup na ibagas uhurni bani  Jahowa. Patarni roh ma ia hu Balei Harajaon, tapi totap do pangahapni lang adong gunani ia roh. Bani acara ai, ihatahon sada parambilan ma anggo na sipontingan bani Jahowa ai ma anggo ra hita iajari Ia. Jadi nini uhur ni si Jheri ma, “Untung ma hapeni ahu roh! Mintor tariluh ma ahu halani ibalosi Jahowa tonggongku. Ipatoguh do ahu, dong ope na boi hubere bani Jahowa anjaha ra do Ia manlatih ahu.” Nini use, “Mungkahni sanggah roh ahu hu Balei, haru do uhurhu janah maretek ni uhur. Tapi gabe malas tumang uhurhu dobkonsi mulak hunjai!”

18. Hunja ibotoh hita totap do ihargai Jahowa hita hassi pe domma matua?

¹⁸ Hassi pe domma matua ham, totap do adong horja na ibere Jahowa hubamu. (Ps. 92:13-16) Jesus mangajarhon hassi pe domma hurang gogohmu atap otik dassa na boi tarbahen ham, ihargai Jahowa do ganup na ibahen ham laho mangidangisi-Si. (Luk. 21:2-4) Pingkirhon ma aha na boi ihorjahon ham. Umpamani, boi do ham dihut marbarita, manonggohon sanina botou, ampa mangojur na legan ase totap setia bani Jahowa. Dingat ma, ihatahon Jahowa do hita hasomanni sahorja, sedo halani aha na dob ibahen hita, tapi halani ra hita unduk hu Bani.​—1 Kor. 3:5-9

19. Janji aha do na ihatahon bani Rom 8:38, 39?

¹⁹ Tontu malas tumang do uhurta manombah Jahowa, halani ihargai Ia do ganup pambahenan ni juakjuak-Ni. Itompa Ia do hita ase boi mangkorjahon harosuh-Ni, anjaha ai do na mambahen hita martuah. (Pangk. 4:11) Hassi pe bahat halak i dunia on na mapas mangidah na legan, tapi lang sonai Jahowa hubanta. (Heb. 11:16, 38) Jadi sanggah maretek ni uhur hita halani boritan, sunsah mansari duit, atap pe domma matua, dingat ma lang adong na boi mambahen hita sirang humbani holong ni uhur ni Naibata.​—Basa Rom 8:38, 39.