1-2. Keadan kai saja si iadapi umat Jahwe? Janah kai pengaruhna man kalak e?

UKURI telu situasi enda: Lit sekalak turang seninanta si nguda denga si mekelek kel pinakitna nina dokter janah dagingna reh dekahna reh lemahna. Lit ka sekalak turang seninanta si umurna nggo lebih 50 tahun janah ipecat ia arah pendahinna nari. Enggo pe iusahakenna ndarami dahin, lalap la datna. Selain si e, lit ka sekalak turang seninanta si nggo metua janah lanai banci bagi si mbarenda iberekenna waktuna guna ngelayani Jahwe.

² Adi bage keadanndu, banci saja lanai erguna iakapndu bandu. Keadan si bage banci erban kam lanai ermeriah ukur, erban kitik ukurndu, janah banci mpengaruhi hubungenndu ras kalak si deban.

3. Uga nge cara rukur Setan bage pe cara rukur kalak si ipengaruhina nandangi kegeluhen manusia?

³ Cara rukur doni enda kerna kegeluhen bali bagi cara rukur Setan. Iban Setan lalap cara gelah la iakap manusia meherga bana. Setan e kejam, ikatakenna man Hawa maka banci ia nggeluh bebas adi la ipatuhina Dibata, padahal iteh Setan maka akibatna eme kematen. Bas doni enda gundari, Setan si ngkuasai perdagangen, politik, ras agama. Emaka lanai ateta mamang adi nterem pengusaha, tokoh politik, ras peminpin agama lanai iakapna meherga kegeluhen manusia janah la diatena perasan kalak.

4. Kai kari sibahas bas artikel enda?

⁴ Tapi Jahwe beda kel ras Setan. Ate Jahwe gelah meherga siakap banta. Janah sanga la siakap meherga banta perban lit masalahta, nggit Ia nampati kita. (Msm. 136:23; Rom. 12:3) I bas artikel enda sibahas kari uga cara Jahwe nampati kita bas telu keadan enda: (1) Sanga  kita sakit, (2) sanga siadapi masalah ekonomi, janah (3) sanga lanai siakap kita erguna man Jahwe perban kita nggo metua. Tapi, sibahas lebe ngkai banci kita tek maka meherga kel kita iakap Jahwe selaku umatNa.

5. Kai si erban kam tek maka meherga iakap Jahwe kam?

⁵ Aminna pe kita iban arah abu taneh nari, situhuna ndauh kita ergan asangken abu taneh. (Kej. 2:7) Cuba siukuri piga-piga alasen si erban kita tek maka meherga kita iakap Jahwe. Iciptaken Jahwe manusia janah ibanNa kita ngasup ngusih sifat-sifatNa. Alu bage, ganjangen kita asangken ciptan si debanna si lit i doni. (Kej. 1:27) IsuruhNa ka kita gelah sikuasai doni ras binatang.​—Msm. 8:5-9.

6. Kai nari si erban kita tek maka meherga iakap Jahwe manusia si la sempurna?

⁶ Kenca erdosa pe Adam, tetap iakap Jahwe manusia meherga. Perban meherga kel iakap Jahwe kita, nggit ia mereken Jesus, Anak si seh kel ateNa kelengna guna nebus dosanta. (1 Joh. 4:9, 10) Perban korban tebusen Jesus e, banci ipekeke Jahwe pagi kalak si nggo mate erkiteken dosa Adam, la soal ia ‘kalak si benar bage pe kalak si la benar.’ (Perb. 24:15) Arah Pustaka siteh maka meherga kita iakap Jahwe amin gia kita sakit, mesera pergeluhta, ntah pe kita nggo metua.​—Perb. 10:34, 35.

7. Kai ka alasen si erban umat Jahwe tek maka meherga kalak e iakap Jahwe?

⁷ Lit ka piga-piga alasen si erbanca kita tek maka meherga iakap Jahwe kita. Enggo itarikNa kita gelah banci rembak ras Ia janah iperdiatekenNa uga tanggapenta sanga sidat berita si meriah. (Joh. 6:44) Adi nggit kita rembak ras Jahwe, Ia pe rembak ras kita. (Jak. 4:8) Igunaken Jahwe ka waktuNa janah ibanNa melala cara guna ngajari kita. Enda buktiNa maka meherga kita iakapNa. ItehNa kalak si uga kin kita situhuna janah itehNa ka maka banci kita jadi kalak si reh ulina. IdisiplinNa kita perban keleng ateNa kita. (Kua. 3:11, 12) Kerina enda erban kita tek maka meherga iakap Jahwe kita!

8. Engkai maka Masmur 18:28-30 banci nampati kita gelah benar caranta rukur sanga lit masalahta?

⁸ Iakap piga-piga kalak Raja Daud e la erguna, tapi iteh Daud maka keleng kel ate Jahwe ia janah isampatiNa ia. E me si erbanca benar cara rukur Daud sanga lit masalahna. (2 Sam. 16:5-7) Sanga kitik kel ukurta ntah pe sanga lit masalahta, banci isampati Jahwe kita gelah berubah caranta rukur. Banci ka isampati Jahwe kita ndungi masalahta e. (Baca Masmur 18:28-30.) Perban isampati Jahwe kita, la lit ise pe si banci erban kita lanai ngelayani Ia alu ermeriah ukur. (Rom. 8:31) Gundari, mari sibahas telu keadan si banci saja siadapi. Bas teluna keadan e, arus siinget maka keleng kel ate Jahwe kita janah meherga kita iakapNa.

9. Uga nge perasanta adi sangana kita sakit?

⁹ Adi kita sakit, lanai siakap erguna banta. Banci saja mela siakap adi iteh kalak kita sakit ntah pe adi arus sipindo penampat kalak. Aminna pe la iteh kalak kita sakit, banci saja mela siakap perban lanai banci silakoken kai si biasana silakoken mbarenda. Bas masa-masa si bage, uga carana Jahwe mpegegehi kita?

10. Menurut Kuan-kuanen 12:25, kai si banci mpegegehi kita sanga kita sakit?

 ¹⁰ Sanga kita sakit, “ranan mehuli” banci mpegegehi kita. (Baca Kuan-kuanen 12:25.) Bas Pustaka, melala kata-kata si mehuli bas Jahwe nari, si ngingetken kita maka meherga kita iakapNa amin gia kita sakit. (Msm. 31:20; 41:4) Adi sibaca kata-kata Dibata e janah mulih-ulih sibaca, pasti isampati Jahwe kita gelah lanai negatif perasanta perban pinakitta.

11. Uga Jahwe nampati sekalak turang seninanta?

¹¹ Perdiateken pengalamen sekalak turang seninanta si gelarna Julio. * Aminna pe ia nguda denga, mekelek kel pinakitna janah e erbanca lemah kel ia. Perban pinakitna e, lanai iakapna ia erguna. Nina Julio, “La kuarap bagenda pengaruh pinakit e man bangku. Mela kel kuakap perban rusur iperdiateken kalak penampilenku.” Nina ka, “Sanga reh kelekna pinakitku, uga nge kari dungna geluhku e ateku. Getem kel pusuhku, janah mindo kel aku man Jahwe gelah isampatiNa aku.” Uga cara Jahwe nampati ia? Nina Julio, “Perban mesera kuakap konsentrasi, lit si ngiahken aku gelah kubaca piga-piga ayat bas buku Masmur, si isina kerna uga Jahwe mperdiateken umatNa. Mulih-ulih kubaca ayat-ayat e tiap wari, emaka terpegegehi ras terapuli kel aku. Bas pudi wari, mulai igejapken kalak maka nggo reh rusurna aku cirem. Janah ikataken kalak e ka maka terpegegehi kel ia ngidah aku tetap positif. Kugejapken ijawap Jahwe totoku! IsampatiNa aku ngubah caraku rukur kerna diriku. Mulai kuukuri kata-kata Pustaka  si mbuktiken maka tetap aku meherga iakap Jahwe aminna pe aku sakit.”

12. Sanga kam sakit, kai si perlu ilakokenndu gelah isampati Jahwe kam?

¹² Sanga kam sakit, teklah kam maka iteh Jahwe kai si sangana iadapindu. Pindolah penampatNa gelah benar carandu rukur kerna keadanndu. Kenca si e, daramilah bas Pustaka kata-kata si banci mpegegehi kam si nggo isikapken Jahwe man bandu. Ukurilah ayat-ayat si mbuktiken maka meherga kel iakap Jahwe umatNa. Adi bage banndu, banci igejapkenndu maka Jahwe e mehuli man kalak si setia ngelayani Ia.​—Msm. 84:12.

13. Kai nge si banci saja igejapken kepala keluarga adi lanai lit pendahinna?

¹³ Tiap kepala keluarga pasti atena ncukupi keperlun keluargana. Tapi banci saja lit turang seninanta si ipengadi arah dahinna amin gia la lit salahna. Enggo iusahakenna ndarami dahin si deban tapi lalap la datna. Banci saja e erbanca lanai erguna kapna bana. Uga janji-janji Jahwe banci mpegegehi ia?

14. Engkai maka lalap itepati Jahwe janjiNa?

¹⁴ Lalap itepati Jahwe janjiNa. (Jos. 21:45; 23:14) Engkai? Lit piga-piga alasenna. Salah sadana eme adi la itepati Jahwe janjiNa, banci ceda gelarNa. Jahwe nggo erjanji ncukupi keperlun umatNa si setia, janah ertanggung jawap kapNa Ia guna nepatisa. (Msm. 31:2-4) Selain si e, perban kita anggota keluarga Jahwe, itehNa maka pasti sedih ras kecewa kita adi la icukupiNa keperlunta. Erjanji Jahwe mereken kerina keperlunta gelah banci kita tetap nggeluh bage pe terus setia ngelayani Ia. La lit kai pe si  banci erban Jahwe la nepati janjiNa e!​—Mat. 6:30-33; 24:45.

15. (a) Masalah kai si iadapi kalak Kristen bas abad pertama? (b) Kata-kata bas Masmur 37:18, 19 erban kita tek kerna kai?

¹⁵ Adi siinget alasen-alasen ndai, tek kita maka terus isampati Jahwe kita sanga siadapi masalah ekonomi. Ukurilah pengalamen kalak Kristen bas abad pertama. Sanga kalak Kristen ianiaya alu kejam i Jerusalem, ‘merap kerina murid-murid selain rasul-rasul.’ (Perb. 8:1) Bayangken kai akibatna man kalak e. Banci jadi, lanai lit rumah ras pendahin kalak e janah e erbanca mesera pergeluhna. Tapi, la itadingken Jahwe kalak e janah tetap kalak e ermeriah ukur. (Perb. 8:4; Heb. 13:5, 6; Jak. 1:2, 3) Terus isampati Jahwe kalak Kristen si setia e, janah kita pe terus ka nge isampatiNa.​—Baca Masmur 37:18, 19.

16. Kai si banci erban kita erpengakap maka lanai meherga iakap Jahwe pelayanenta?

¹⁶ Sanga kita nggo metua, banci saja siakap lanai melala si banci sibereken man Jahwe. Banci saja, bage ka nge si igejapken Raja Daud sanga ia nggo metua. (Msm. 71:9) Uga cara Jahwe nampati kita?

17. Kai si banci sipelajari arah pengalamen Joanna?

¹⁷ Perdiateken pengalamen sekalak turang seninanta si gelarna Joanna. Iundang ia reh ku pelatihen guna ngerawat Bale Kerajan, tapi mberat ukurna reh. Nina, “Aku nggo metua, janda ka, janah la lit keterampilenku si banci igunaken Jahwe. Lanai aku erguna.” Bas berngi ope wari pelatihen e, ertoto ia man Jahwe nuriken isi pusuhna. Paginna, seh  kenca ia bas Bale Kerajan, sangsi denga ia perlu nge ia reh ntah lang. Tapi bas pelatihen e, salah sada si mereken pelatihen ngataken maka keterampilen si pentingna eme nggit iajari Jahwe. Nina Joanna, “Paksa si e rukur aku, ‘Lit kap bas aku keterampilen e!’ Tangis aku perban kugejapken nggo ijawap Jahwe totoku. IpetetapNa ukurku maka lit nge si meherga bas aku si banci kubereken man baNa janah nggit Ia ngajari aku.” Nina ka, “Sanga reh aku ku pelatihen e, gugup kel aku janah kitik ukurku. Tapi sanga mulih aku je nari, terpegegehi kel aku, reh tetapna ukurku, janah erguna kuakap bangku!”

18. Kai bukti bas Pustaka maka tetap iergai Jahwe pelayanenta aminna pe kita reh tuana?

¹⁸ Amin gia kita nggo reh tuana, tetap denga kita banci igunaken Jahwe. (Msm. 92:13-16) Banci saja kurang siakap ergana kai si nggo silakoken ntah pe sibereken. Tapi iajarken Jesus maka meherga iakap Jahwe kai pe si nggo sibereken man baNa. (Luk. 21:2-4) Emaka, si perlu iukurindu eme kai si banci ilakokenndu. Misalna, banci iceritakenndu kerna Jahwe man kalak si deban, itotokenndu turang senina, janah ipegegehindu kalak e gelah tetap setia. Ianggap Jahwe kam temanNa erdahin, labo perban kai si ngasup ilakokenndu, tapi perban nggit kam patuh man baNa.​—1 Kor. 3:5-9.

19. Kata-kata bas Roma 8:38, 39 erban kita tek kerna kai?

¹⁹ Jelas me, meherga kel iakap Dibata Jahwe kalak si ngelayani Ia. Pasti ngata bujur kel kita perban Ia jadi Dibatanta! Iciptaken Jahwe kita guna ngelakoken peratenNa, janah meriah kel ukurta adi sisembah Ia. (Ket. 4:11) Banci saja la meherga iakap doni enda kita, tapi Dibata la bage. (Heb. 11:16, 38) Adi kitik ukurta perban kita sakit, lit masalah ekonomi, ntah pe perban nggo metua, teruslah siinget maka la lit si banci nirangken kita arah kekelengen Bapakta si i surga.​—Baca Roma 8:38, 39.