1-2. Unsang mga situwasyon ang giatubang sa daghang alagad ni Jehova, ug unsay mahimong epekto niana kanila?

KONSIDERAHA kining tulo ka situwasyon: Usa ka batan-ong brader ang giingnan sa doktor nga duna siyay grabeng sakit ug tungod niana, mag-anam siyag ka luya. Usa ka kugihang brader nga kapin nag 50 anyos ang nawad-ag trabaho ug, bisan pa sa iyang paningkamot, wala gyod siya makakitag laing trabaho. Usa ka matinumanong tigulang nga sister ang anam-anam nga nalimitahan sa iyang mahimo sa pag-alagad kang Jehova.

² Kon nakasinati kag susamang mga problema, bation tingali nimo nga wala na kay pulos. Ang maong mga situwasyon makawala sa imong kalipay, makapanegatibo sa imong panglantaw sa kaugalingon, ug makaapektar sa imong relasyon sa uban.

3. Unsay panglantaw ni Satanas ug niadtong nagsundog niya maylabot sa tawhanong kinabuhi?

³ Gisundog niining kalibotana ang panglantaw ni Satanas sa kinabuhi sa tawo. Kanunayng gitratar ni Satanas ang mga tawo nga daw wala silay pulos. Wala siyay kasingkasing kay giingnan niya si Eva nga mahimo ning gawasnon kon supakon niini ang Diyos, bisan pag nahibalo siya nga kamatayon ang silot niana. Kanunayng gikontrolar ni Satanas ang komersiyal, politikal, ug relihiyosong mga sistema niining kalibotana. Busa dili ikatingala nga daghang negosyante, politiko, ug lider sa relihiyon ang nagsundog sa iyang kawalay-pagtahod sa kinabuhi ug dignidad sa tawo.

4. Unsay atong hisgotan niining artikuloha?

 ⁴ Sa laing bahin, gusto ni Jehova nga positibo tag panglantaw sa kaugalingon, ug tabangan ta niya dihang mag-atubang tag mga situwasyon nga makapabati natong walay pulos. (Sal. 136:23; Roma 12:3) Hisgotan niining artikuloha kon unsaon ta pagtabang ni Jehova sa mosunod nga mga situwasyon: (1) Dihang masakit ta, (2) dihang magkalisodlisod ta, ug (3) dihang ang katigulangon makapabati nato nga daw wala na tay mahimo sa pag-alagad kang Jehova. Pero, ato unang hisgotan kon nganong makasalig ta nga ang matag usa kanato bililhon kang Jehova.

5. Unsay nagpamatuod nga ang mga tawo bililhon kang Jehova?

⁵ Bisag hinimo ta gikan sa abog sa yuta, bililhon kaayo ta. (Gen. 2:7) Hunahunaa ang pipila ka rason kon nganong nahibalo ta nga bililhon ta kang Jehova. Iyang gilalang ang tawo nga may katakos sa pagsundog sa iyang mga hiyas. (Gen. 1:27) Sa pagbuhat niana, gihimo ta niyang kinalabwan sa tanan niyang linalang sa yuta, ug gihatagan ta niyag responsibilidad sa pag-atiman sa yuta ug sa mga hayop.​—Sal. 8:4-8.

6. Unsay laing pamatuod nga gipabilhan ni Jehova ang dili hingpit nga mga tawo?

⁶ Bisan human makasala si Adan, gipabilhan gihapon ni Jehova ang mga tawo. Dako kaayo ang iyang pagpabili kanato nga gihatag niya ang iyang pinalanggang Anak, si Jesus, ingong lukat sa atong mga sala. (1 Juan 4:9, 10) Sa pagpadapat sa mga kaayohan sa lukat, banhawon ni Jehova kadtong nangamatay tungod sa sala ni Adan​—‘mga matarong ug dili matarong.’ (Buh. 24:15) Gipakita sa iyang Pulong nga bililhon ta kaniya bisag kita masakiton, pobre, o tigulang na.​—Buh. 10:34, 35.

7. Unsa pay dugang mga rason kon nganong makatuo ang mga alagad ni Jehova nga gipabilhan niya sila?

⁷ Duna pay dugang mga rason kon nganong makatuo ta nga gipabilhan ta ni Jehova. Gikabig ta niya ug nakita niya ang atong pagdawat sa maayong balita. (Juan 6:44) Samtang nakigsuod ta kang Jehova, mas nakigsuod siya kanato. (Sant. 4:8) Si Jehova naggahin usab ug panahon ug kusog sa pag-edukar kanato, nga nagpakitang bililhon ta kaniya. Nahibalo siya kon unsa tang matanga sa mga indibiduwal karon ug kon unsay atong potensiyal. Ug siya nagdisiplina kanato kay gimahal ta niya. (Prov. 3:11, 12) Pagkadakong pamatuod nga gipabilhan ta ni Jehova!

8. Sa unsang paagi ang giingon sa Salmo 18:27-29 makaapektar sa atong panglantaw sa mga problema?

⁸ Si Haring David giisip sa uban nga walay pulos, pero nahibalo siya nga gimahal ug gipaluyohan siya ni Jehova. Tungod niana, siya nakapabiling positibo samtang nag-atubang sa maong situwasyon. (2 Sam. 16:5-7) Dihang kita maguol o makasinatig mga problema, si Jehova makatabang nato sa pagpabiling positibo ug sa paglahutay sa bisan unsang kalisdanan. (Basaha ang Salmo 18:27-29.) Dihang paluyohan ta ni Jehova, walay makapugong kanato sa pag-alagad kaniya nga malipayon. (Roma 8:31) Hisgotan nato karon kadtong tulo ka situwasyon diin angay gyod natong hinumdoman nga si Jehova nahigugma ug nagpabili kanato.

9. Sa unsang paagi ang sakit makaapektar sa atong panglantaw sa kaugalingon?

⁹ Ang sakit mahimong makaapektar sa atong emosyon ug makapabati nato nga wala na tay pulos. Maulaw tingali ta dihang mamatikdan  sa mga tawo ang atong mga limitasyon o dihang magdepende ta sa tabang sa uban. Bisag wala mahibalo ang uban nga nasakit ta, basin mobati tag kaulaw kay limitado na kaayo ang atong mahimo. Nianang makapaguol nga kahimtang, dasigon ta ni Jehova. Sa unsang paagi?

10. Sumala sa Proverbio 12:25, unsay makatabang nato dihang masakit ta?

¹⁰ Sa dihang kita masakit, “ang maayong pulong” makapadasig nato. (Basaha ang Proverbio 12:25.) Sa Bibliya, si Jehova nagtipig ug daghang maayong mga pulong nga magpahinumdom kanato nga bililhon ta kaniya bisag masakiton ta. (Sal. 31:19; 41:3) Kon atong basahon ug balikbalikon pa ganig basa ang maong mga teksto, tabangan ta ni Jehova sa pag-atubang sa negatibong mga emosyon nga atong bation tungod sa atong sakit.

11. Giunsa pagtabang ni Jehova ang usa ka brader?

¹¹ Konsideraha ang eksperyensiya ni Jorge. Sa batan-on pa siya, gitakboyan siyag sakit nga dali rang migrabe ug tungod niana mibati siyang walay pulos. “Wala nako damha ang epekto sa akong sakit diha sa akong emosyon o ang kaulaw nga akong bation kay tan-awon ko sa mga tawo,” miingon si Jorge. “Samtang nagkagrabe ang akong sakit, naghunahuna ko nga mausab na gyod ang akong kinabuhi. Naguol kaayo ko, ug nangayo kog tabang kang Jehova.” Giunsa siya pagtabang ni Jehova? “Kay maglisod kog pokus, gidasig ko nga mobasag pipila ka teksto sa Salmo nga naghisgot sa pagmahal ni Jehova sa iyang mga alagad. Balikbalikon nakog basa ang maong mga teksto kada adlaw, ug kana nakahupay nako. Sa ngadtongadto, namatikdan sa uban nga mas mapahiyomon na ko. Miingon pa gani sila nga ang akong pagkapositibo nakadasig nila. Naamgohan nako nga gitubag ni  Jehova ang akong mga pag-ampo! Gitabangan ko niya nga mausab ang akong panglantaw sa kaugalingon. Nagpokus na ko sa kon unsay giingon sa iyang Pulong bahin sa iyang panglantaw kanako bisag masakiton ko.”

12. Dihang masakit, sa unsang paagi madawat nimo ang tabang ni Jehova?

¹² Kon nasakit ka, makasalig ka nga si Jehova nahibalo sa imong gibati. Hangyoa siya nga tabangan ka nga makabatog saktong panglantaw sa imong kahimtang. Unya pangitaa sa Bibliya ang makapahupayng mga pulong ni Jehova para nimo. Pagpokus sa mga teksto nga nagpakita kon unsa ka dako ang pagpabili ni Jehova sa iyang mga alagad. Kon imo nang himoon, makita nimo nga si Jehova maayo sa tanan niyang matinumanong alagad.​—Sal. 84:11.

13. Unsa tingaliy bation sa usa ka ulo sa pamilya kon mawad-an siyag trabaho?

¹³ Gusto sa matag ulo sa pamilya nga matagan-an ang panginahanglan sa iyang pamilya. Pero ibutang ta nga ang usa ka brader nawad-ag trabaho bisag wala siyay nahimong sayop. Naningkamot siya nga makakitag laing trabaho pero wala gyod siyay nakita. Sa maong kahimtang, tingali mobati siyang walay pulos. Sa unsang paagi makatabang kaniya ang pagpokus sa mga saad ni Jehova?

14. Unsay mga rason kon nganong tumanon ni Jehova ang iyang mga saad?

¹⁴ Si Jehova kanunayng nagtuman sa iyang mga saad. (Jos. 21:45; 23:14) Daghag rason kon nganong iya nang ginahimo. Una, maapektohan ang iyang ngalan o reputasyon. Si Jehova misaad nga iyang atimanon ang iyang maunongong mga alagad, ug gibati niya nga obligado siyang tumanon kana. (Sal. 31:1-3) Dugang pa, nahibalo si Jehova nga  maguol kaayo ta kon dili niya atimanon kadtong membro sa iyang pamilya. Nagsaad siya nga iya tang tagan-an sa materyal ug espirituwal, ug walay makapugong kaniya sa pagtuman niana!​—Mat. 6:30-33; 24:45.

15. (a) Unsang kalisdanan ang giatubang sa unang siglong mga Kristohanon? (b) Sumala sa Salmo 37:18, 19, sa unsa ta makasalig?

¹⁵ Dihang atong hinumdoman kon nganong tumanon ni Jehova ang iyang mga saad, makasalig ta nga iya tang tabangan dihang magkalisodlisod ta. Konsideraha ang pananglitan sa unang siglong mga Kristohanon. Dihang nahitabo ang grabeng paglutos sa kongregasyon sa Jerusalem, “ang tanan gawas sa mga apostoles nagkatibulaag.” (Buh. 8:1) Hunahunaa kon unsay epekto niana. Kalisod sa pinansiyal! Tingali ang mga Kristohanon nawad-ag mga balay ug negosyo. Pero wala sila biyai ni Jehova; wala sab sila mawad-ig kalipay. (Buh. 8:4; Heb. 13:5, 6; Sant. 1:2, 3) Gitabangan ni Jehova ang maong matinumanong mga Kristohanon, ug tabangan sab ta niya.​—Basaha ang Salmo 37:18, 19.

16. Unsang kahimtang ang makapahunahuna nato kon gipabilhan ba ni Jehova ang atong pagsimba?

¹⁶ Samtang magkatigulang ta, tingali mobati ta nga gamay na lang tag mahimo para kang Jehova. Tingali mibati sab niana si Haring David samtang nagkatigulang siya. (Sal. 71:9) Sa unsang paagi si Jehova makatabang kanato?

17. Unsay atong makat-onan sa kasinatian sa sister nga si Jheri?

¹⁷ Konsideraha ang kasinatian sa sister nga si Jheri. Giimbitar siya sa pagtambong sa maintenance training diha sa Kingdom Hall, pero dili siya gustong moadto. Siya miingon: “Ako tigulang na, biyuda, ug walay katakos nga magamit ni Jehova. Wala koy pulos.” Sa gabii una  ang training, kinasingkasing siyang miampo kang Jehova. Pagkaugma, dihang miabot siya sa Kingdom Hall, naghunahuna gihapon siya kon angay ba gyod siyang motambong. Panahon sa training, gipasiugda sa usa sa mga mamumulong nga ang atong pinakaimportanteng katakos mao ang atong pagkaandam nga magpatudlo kang Jehova. Si Jheri nahinumdom: “Naghunahuna ko, ‘Naa ko ana nga katakos!’ Nakahilak ko dihang nakaamgo ko nga gitubag ni Jehova ang akong pag-ampo. Gipasaligan ko niya nga duna koy ikahatag niya ug andam siya sa pagtudlo kanako!” Sa paghinumdom, si Jheri miingon: “Miadto ko sa training nga gikulbaan, luya ang buot, ug mibating walay pulos. Pero human sa training, ako may pagsalig na sa kaugalingon, nadasig, ug mibating mapuslanon!”

18. Giunsa pagpakita sa Bibliya nga gipabilhan gihapon ni Jehova ang atong pagsimba samtang magkatigulang ta?

¹⁸ Samtang magkatigulang ta, makaseguro ta nga si Jehova duna gihapoy buluhaton nga ipahimo kanato. (Sal. 92:12-15) Gitudloan ta ni Jesus nga bisag para nato limitado ra ang atong katakos o gamay ra tag mahimo, pabilhan ni Jehova ang bisan unsa nga atong mahimo sa pag-alagad kaniya. (Luc. 21:2-4) Busa pagpokus sa imong mahimo. Pananglitan, makahimo ka sa pagsangyaw bahin kang Jehova, pag-ampo para sa mga igsoon, ug pagdasig sa uban nga magpabiling matinumanon. Giisip ka ni Jehova nga iyang isigkamagbubuhat, dili tungod sa imong mahimo, kondili sa imong pagkaandam motuman kaniya.​—1 Cor. 3:5-9.

19. Unsang pasalig ang gihatag sa Roma 8:38, 39?

¹⁹ Mapasalamaton kaayo ta nga nagsimba ta kang Jehova nga Diyos, kinsa nagpabili gayod niadtong nag-alagad kaniya! Gilalang ta niya aron buhaton ang iyang kabubut-on, ug ang matuod nga pagsimba mao ang nakahatag natog tinuod nga katagbawan. (Pin. 4:11) Bisan tingalig isipon ta sa kalibotan nga walay pulos, dili ta ikaulaw ni Jehova. (Heb. 11:16, 38) Dihang mabug-atan ta tungod sa sakit, kalisod sa pinansiyal, o pagkatigulang, atong hinumdoman nga walay makabulag kanato sa gugma sa atong langitnong Amahan.​—Basaha ang Roma 8:38, 39.