1-2. Met sókkun weires chómmóng néún Jiowa kewe aramas ra kúna, me met ra kan meefi pokiten ena?

EKIEKI usun ekkeei úlúngát pwóróus. Emén Chón Kraist alúwél mi úri eú samau mi chou nge inisin a chék apwangapwangoló. Emén Chón Kraist mwán, lap seni 50 ierin, mi angang weires nge a péút seni an angangen moni. Inaamwo ika a resin achocho le kúttafetálei pwal eú angang nge ese kúnékún. Pwal emén chinnap fefin Chón Kraist mi tuppwél, a kisikisiló met a tongeni féri lón an angang ngeni Jiowa.

² Ika ka kúna ekkena esin weires lón manawom, neman kopwe meefi pwe ese chúen wor lamotom. Ekkena mettóch ra tongeni efisi óm letipechou, ámmeef ngonuk pwe ka aúcheangaw, me efisi osukosuk lefilemi me ekkewe ekkóch.

3. Met án Satan me chókkewe mi nóm fán nemenian ekiek usun aúchean manaw?

³ Ei fénúfan a pwári án Satan ekiek usun manawen aramas. Me ren Satan pwe aramas ra chék lamotkisikis. Satan a kirikiringaw ngeni Efa lupwen a etipetipa pwe epwe kúna ngaseló ika epwe álleasolapa Kot, inaamwo ika a fókkun silei pwe Efa epwe máló ika a álleasolap. Satan a kan nemeni meinisin ótóten ei fénúfan lón pekin business, politics, me lamalam. Ina minne, sise máirú pwe chómmóng chón féri business, chón fiti politics, me néúwisin lamalam rese súféliti aúchean manawen aramas me rese súféliti meefien aramas.

4. Met sipwe pwóróus wóón lón ei lesen?

⁴ Nge Jiowa a sókkóló pwe a mochen ach sipwe meefi aúcheach, me a álisikich lupwen sia nóm fán ewe esin weires mi efisi  ach sipwe meefi pwe sia lamotongaw. (Kölf. 136:23; Rom 12:3) Ei lesen epwe pwóróus wóón ifa usun Jiowa a álisikich lupwen sia nóm fán ekkeei weires: (1) Lupwen sia riáfféú ren och samau, (2) lupwen a fis ngenikich osukosuken moni, me (3) lupwen sia meefi pwe ese chúen wor met mi aúchea sia tongeni fang lón ach angang ngeni Jiowa pokiten sia fen chinnap. Iwe nge, akkomw sipwe ppii pwata sia tongeni lúkúlúk pwe Jiowa a aúcheani emén me emén kich.

5. Met a ánnetatá ngonuk pwe aramas ra aúchea me ren Jiowa?

⁵ Inaamwo ika sia ffér seni pwúlún fénúfan, nge sia fókkun aúchea lap seni ekumwuch pwúl. (Ken. 2:7) Ekieki usun ekkóch ekkewe popun pwata sia silei pwe sia aúchea me ren Jiowa. A fératá aramas an epwe wor ar tufichin áppirú napanapan kewe. (Ken. 1:27) Ren án Jiowa féri ena, a féri pwe aramas repwe múrinné lap seni meinisin férian kewe wóón fénúfan. A pwal ewisa ngenikich aramas ach sipwe túmúnú fénúfan me nemeni ekkewe man.​—Kölf. 8:4-8.

6. Ifa pwal eú mettóch mi ánneta pwe Jiowa a aúcheani aramas tipis?

⁶ Pwal mwo nge mwirin án Atam tipis, Jiowa a chúen aúcheani aramas. A fókkun aúcheanikich pwe a fangóló Jesus, Néún we mi áchengicheng pwe epwe eú asoren méén kepich fán iten ach kewe tipis. (1 Joh. 4:9, 10) Lupwen Jiowa epwe amanawasefáli ekkewe mi máló pokiten án Atam tipis, iwe feiéchún ewe méén kepich epwe kkúú “chon pwüng me ekewe aramas mi ngau.” (Föf. 24:15) Án Kot we Kapas a áiti ngenikich pwe kich sia aúchea me ren ese lifilifil ika sia samau, wéúngaw are chinnap.—Föf. 10:34, 35.

7. Ikkefa pwal ekkóch popun néún Kot kewe aramas ra tongeni lúkú pwe a aúcheaniir?

⁷ A pwal wor ekkóch popun sia tongeni lúkú pwe Jiowa a aúcheanikich. A fen panikicheto ngeni pwisin i, me a áfánni met sia féri lupwen sia etiwa ewe pwóróus allim. (Joh. 6:44) Lupwen sia poputá le arap ngeni Jiowa, iwe i a pwal arap ngenikich. (Jas. 4:8) Án Jiowa awora fansoun me angang weires le asukulakich, a pwal pwári pwe kich sia aúchea me ren. A silei ika kich met sókkun aramas iei, me a pwal silei pwe sia tongeni émúrinnéló napanapach kewe. Me a emiritikich pokiten a tongekich. (SalF. 3:11, 12) A ifa me pwálóón pwe Jiowa a aúcheanikich!

8. Ifa usun minne a mak lón Kölfel 18:27-29 a tongeni kkúú ach ekiek usun ach kewe osukosuk?

⁸ Ekkóch ra meefi pwe King Tafit emén mi lamotongaw, nge Tafit a silei pwe Jiowa a tongei me álisi i. Án Tafit silei ena, a álisi le likiitú me eáni ekiek mi pwúng fán an kewe weires. (2 Sam. 16:5-7) Lupwen sia letipechou me kúna osukosuk, Jiowa a tongeni álisikich le eáni ekiek mi pwúng me atufichikich le pworacho ngeni ese lifilifil minen eppet. (Álleani Kölfel 18:27-29.) Ren án Jiowa álillis, ese wor met epwe tongeni eppetikich le angang ngeni fán pwapwa. (Rom 8:31) Iei sipwele káé ekkena úlúngát atun epwe ákkáeúin lamot ach sipwe chechchemeni pwe Jiowa a tongekich me aúcheanikich.

9. Ifa usun samau a tongeni kkúú ach ekiek usun pwisinkich?

⁹ Atun sia samau sia tongeni apwangapwangoló lón pekin memmeef, iwe sia tongeni meefi pwe sia lamotongaw. Neman sia meefi sáw ren án aramas repwe kúna pwe sia tter, are ren ach alongakich wóón ekkewe ekkóch. Inaamwo ika ekkóch rese silei pwe sia samau,  nge neman sipwe chúen pwisin fiu ngeni ach memmeefin sáw pokiten sise chúen tufichin féri met sia kan féri me lóóm. Fán ekkena esin fansoun eletipechou, Jiowa a aúfichikichetá. Ifa usun?

10. Me ren Än Salomon Fos 12:25, met a tongeni álisikich lupwen sia samau?

¹⁰ Lupwen sia samau, “eu kapas pwetete” a tongeni apéchékkúla letipach. (Álleani Än Salomon Fos 12:25.) Lón ewe Paipel, Jiowa a iseis chómmóng kapas mi múrinné mi áchema ngenikich pwe a aúcheanikich inaamwo ika sia samau. (Kölf. 31:19; 41:3) Ika sia álleani are pwal mwo nge álleasefáli alon Jiowa kewe, i epwe álisikich le pworacho ngeni ach kewe aúrekin samau.

11. Ifa usun emén Chón Kraist alúwél a kúna án Jiowa álillis?

¹¹ Nengeni pwóróusen Jorge. A úri ena alúwél Jorge eú samau mi mwittir chéúló lón inisin me a ámmeef ngeni pwe a lamotongaw. Iei alon: “Use mmólnetá ngeni ei memmeef ei samau a eselipato, are ewe memmeefin sáw ren án aramas chék attolaei. Lupwen a ngangngawoló ai na samau, ua ekieki ika ifa usun nónnómun manawei epwe siwil. Ua fókkun letipechou me tingormaú án Jiowa álillis.” Ifa usun Jiowa a álisi? Iei met a apasa, “Pokiten a weires ai upwe nefótófót, ua péchékkúletá ren ai álleani fitu wokisin seni ewe puken Kölfel mi pwári án Jiowa tongei néún kewe chón angang. Ua álleanisefáli ekkena fitu wokisin iteiten rán, me ra oururu letipei me alúkúlúkú ei. Ló, ló, ló, ekkewe ekkóch ra poputá le kúna pwe ua wópwapwa me ekkemelimel. Ra pwal mwo nge apasa pwe ai eáni ekiek mi múrinné a apéchékkúler. Ua mirititi pwe Jiowa a fen pélúweni ai kewe iótek! A fen álisiei le siwili ai ekiek usui. Ua poputá le nefótófót wóón met án Kot we Kapas a apasa usun án Kot ekiek usui lón ai we samau.”

12. Ika ka weires ren eú samau, ifa usun ka tongeni kúna án Jiowa álillis?

 ¹² Ika ka fen weires ren eú samau, kopwe lúkúlúk pwe Jiowa a silei óm weires. Tingormaú an álillis pwe kopwe tongeni eáni ekiek mi pwúng usun nónnómum. Mwirin kútta ekkewe kapas mi apéchékkúl lón ewe Paipel Jiowa a awora ngonuk. Nefótófót wóón ekkewe wokisin mi pwári úkúkún án Jiowa aúcheani néún kewe aramas. Ika ka féri ena, kopwe kúna pwe Jiowa a múrinné ngeni chókkewe mi angang ngeni fán tuppwél.​—Kölf. 84:11.

13. Epwe tongeni ifa meefien emén mékúren famili ika a péút seni an angangen moni?

¹³ Emén me emén mékúren famili a mochen atufichi manawen chón an famili. Nge a tongeni péút seni emén Chón Kraist mwán an angang inaamwo ika esap tipisin. A resin achocho le kútta pwal eú angang nge ese sópwéch. Neman epwe meefi pwe a lamotongaw ren fisin ekkena mettóch. Ifa usun an nefótófót wóón án Jiowa kewe pwon epwe álisi?

14. Ikkefa ekkewe popun Jiowa epwe apwénúetá an kewe pwon?

¹⁴ Jiowa a apwénúetá an kewe pwon fansoun meinisin. (Jos. 21:45; 23:14) A féri ena ren chómmóng popun. Eú popun pwe epwe tongeni kkúú itéchún itan we. Jiowa a fen pwonei pwe epwe túmúnú néún kewe chón angang mi tuppwél, me a meefi pwe wisan an epwe apwénúetá ena pwon. (Kölf. 31:1-3) Pwal och, Jiowa a silei pwe sipwe fókkun letipechou me lichippúng ika ese túmúnú pwisin chón an famili. A pwonei pwe epwe túmúnúkich lón pekin aion me pekin lúkú, me ese wor met a tongeni eppeti an apwénúetá ena pwon!​—Mat. 6:30-33; 24:45.

15. (a) Ifa ewe weires ekkewe popun Chón Kraist ra kúna? (b) Met Kölfel 37:18, 19 a alúkúlúkú ngenikich?

 ¹⁵ Lupwen sia chemeni popun án Jiowa apwénúetá an kewe pwon, sia tongeni lúkúlúk pwe epwe álisikich lupwen a fis ngenikich osukosuken moni. Nengeni pwóróusen ekkewe popun Chón Kraist. Lupwen chón ewe mwichefel lón Jerusalem ra kúna watteen riáfféúmwáál, “meinisin ra toropasfeil . . . chilon chök ekewe soukünö.” (Föf. 8:1) Ekieki met ena mettóch a eselipato. A efisi watteen osupwang! Ese mwáál a péút seni ekkena Chón Kraist imwer kewe me ar kewe business. Nge, Jiowa ese péútiireló, me ese pwal péút seniir ar pwapwa. (Föf. 8:4; Ipru 13:5, 6; Jas. 1:2, 3) Jiowa a álisi ekkena Chón Kraist mi tuppwél, me epwe pwal álisikich.​—Álleani Kölfel 37:18, 19.

16. Met a tongeni efisi ach sipwe ekieki pwe neman ach fel ngeni Jiowa ese aúchea me ren?

¹⁶ Lupwen sia chichchinnapeló, neman sipwe poputá le meefi pwe a chék kisikis met sia tongeni fang ngeni Jiowa. King Tafit neman a pwal aúrek me eáni ekkena esin memmeef lupwen a chinnapeló. (Kölf. 71:9) Ifa usun Jiowa a tongeni álisikich?

17. Met sia tongeni káé seni pwóróusen emén fefin Chón Kraist itan Jheri?

¹⁷ Ekieki usun pwóróusen emén fefin Chón Kraist itan Jheri. A ketiw le fiti eú maintenance training lón ewe Leenien Mwich, nge ese mochen fiti. A erá: “Ua fen chinnap, a má seniei pwúlúwei, me ese wor ai tufich pwe Jiowa epwe tongeni néúnéú ngang ren. Ua lamotongaw.” Lón ewe pwinin me mwen ewe training, a pwáraawu alóllóólun letipan ngeni Jiowa lón iótek. Sorotá, lupwen a wareiti ewe Leenien Mwich, a chúen tipemwaramwar ika epwe fen lamot an fiti ena training. Atun ewe  mwich, emén me lein ekkewe chón afalafal a menlapei pwe ewe tufich mi lamot lap seni meinisin, ina án emén tipemecheres le mochen káit me ren Jiowa. Iei met Jheri a chechchemeni: “Ua ekieki, ‘A wor rei ena tufich!’ Ua poputá le kechiw lupwen ua mirititi pwe Jiowa a pélúweni ai iótek. Jiowa a alúkúlúkúei pwe a wor met mi aúchea ua tongeni fang ngeni me a mochen asukulaei!” Jheri a chemeni met a fis lón ena atun me a apasa: “Ua meefi lólilen me letipechou lupwen ua tolong lón ena mwich. Nge sárin ewe mwich, ua fókkun péchékkúletá, meefi lúkúlúk, me ua meefi aúcheai!”

18. Ifa usun ewe Paipel a áiti ngenikich pwe Jiowa a chúen aúcheani ach fel ngeni lupwen sia chinnap?

¹⁸ Atun sia chichchinnapeló, sia tongeni lúkúlúk pwe mi chúen wor angang sia tongeni féri fán iten Jiowa. (Kölf. 92:12-15) Jesus a áiti ngenikich pwe Jiowa a aúcheani meinisin ach angang ngeni inaamwo ika me rech usun itá a chék lamotkisikis met sia tufichin féri fán itan. (Luk. 21:2-4) Ina minne, kopwe nefótófót wóón met ka tongeni féri. Áwewe chék, ka tongeni apwóróusa ngeni aramas usun Jiowa, iótek fán iten pwiich kewe Chón Kraist, me apéchékkúla ekkewe ekkóch ar repwe akkamwéchú ar tuppwél. Me ren Jiowa, en chienan chón angang, esap pokiten met ka tufichin féri nge pokiten ka álleasochisi I fán tipemecheres.​—1 Kor. 3:5-9.

19. Met Rom 8:38, 39 a alúkúlúkú ngenikich?

¹⁹ Sia kilisou pwe sia fel ngeni Jiowa, ewe Kot mi enletin aúcheani néún kewe chón angang! A férikich pwe sipwe féri letipan, me ewe fel mi enlet a atoto ngenikich pwapwaan manawach. (Pwär. 4:11) Inaamwo ika me ren chón ei fénúfan pwe kich mi lamotongaw, nge Jiowa ese sáwásinikich. (Ipru 11:16, 38) Lupwen sia letipechou pokiten samau, osukosuken moni, are apwangapwangen chinnap, sipwe chechchemeni pwe ese wor met a tongeni áimukicheló seni án Semach we tong.​—Álleani Rom 8:38, 39.