1-2. Jehovah miphun hna nih zei thil sining hna dah an ton, mah nih zeitindah a hnorsuan khawh hna?

MAH tahchunhnak pathum kong hi ruathmanh: Mino unaupa pakhat cu a zawtnak aa check tikah siibawi nih thader zawtnak na ngei tiah a ti. Rian aa zuam tukmi kum 50 leng a simi unaupa cu a rian a sung. Rian dang kha a kawl len ko nain a hmu kho ti lo. Zumhfekmi kum upa unaunu pakhat cu Jehovah rianṭuannak ah a duh tluk in aa tel kho ti lo.

² Nangzong cu bantuk buaibainak na ton ve ahcun man ka ngei ti lo timi ruahnak na ngei ve men lai. Mah thil sining nih naa nuamhnak a tlauter khawh, nangmahle nangmah naa upatnak a hrawh khawh i midang he nan i pehtlaihnak zong a hnorsuan khawh.

3. Satan le amah aa zohchunhmi hna nih minung nunnak kha zeitindah an hmuh?

³ Hi vawlei nih minung nunnak he aa tlaiin Satan hmuh ning kha a langhter. Man ka ngei lo timi ruahnak kan ngeih nakhnga Satan cu aa zuam peng. Pathian nawl an ngaih lo ahcun an thi lai ti kha a hngalh ko nain Evi kha zaangfahnak ngei loin Pathian nawl na ngaih lo ahcun zalonnak na hmu lai tiah a ti. Satan nih hi vawlei chawlehnak, cozah le biaknak hna kha a uk zungzal hna. Cucaah chawlettu pawl, cozah pawl le biaknaklei hruaitu tampi nih minung nunnak an sunsak lomi le midang intuarnak zei ah an rel lomi cu khuaruahhar awk a si lo.

4. Hi capar ah zei kong dah kan i ruah hna lai?

⁴ Asinain Satan he i lo loin Jehovah nih cun man kan ngei ti  kha hngal hna seh ti a kan duh i man ka ngei lo timi ruahnak a kan ngeihter khomi thil sining kan ton tikah a kan bawmh. (Salm 136:23; Rom 12:3) Hi capar ah a tanglei thil sining ah Jehovah nih zeitindah a kan bawmh ti kha kan i ruah hna lai: (1) Kan zawt tikah, (2) tangkalei kan chambau tikah (3) kan kum a upat ruangah Jehovah rianṭuan awkah san ka tlai ti lo timi ruahnak kan ngeih tikah. Asinain kan dihlak in Jehovah caah a sunglawimi kan si ti kan zumh khawhnak a ruang kha i ruah hmasa hna u sih.

5. Minung cu Jehovah caah a sunglawimi kan si ti kha zeinihdah a kan zumhter?

⁵ Leidip in sermi kan si ko nain Jehovah nih man a ngei lomi in a kan hmu lo. A sunglawi tukmi in a kan hmuh. (Gen. 2:7) Jehovah caah a sunglawimi kan si ti kan hngalh khawhnak a ruang cheukhat kha ruathmanh. Minung cu amah sining i zohchunh kho dingin a kan ser. (Gen. 1:27) Cutin a kan sernak thawngin minung cu vawleicung i sermi thil vialte lakah a sunglawi bikmi kan si i vawlei le saram cungah nawl kan ngei.—Salm 8:4-8.

6. Jehovah nih a tling lomi minung a kan sunsak ti a langhtermi a dang zei thil dah a um?

⁶ Adam nih sualnak a tuah hnu hmanhah Jehovah nih minung kha a kan sunsak peng rih. Jehovah nih a kan sunsak tuk i kan sualnak caah tlanhnak man pek dingin a dawt tukmi a Fapa, Jesuh kha a kan pek. (1 Johan 4:9, 10) Mah tlanhnak man thawngin Jehovah nih Adam sualnak ruangah a thimi “miṭha he miṭhalo he” an dihlak in a thawhter ṭhan dih hna lai. (Lam. 24:15) Baibal nih kan zawt tik, tangkalei chambaunak kan ngeih tik asiloah kan kum a upat tik hmanhah Jehovah caah a sunglawimi kan si ti kha a langhter.—Lam. 10:34, 35.

7. Jehovah nih a sunsak hna ti zumh khawh awkah Pathian salle nih a dang zei a ruang dah an ngeih?

⁷ Jehovah nih a kan sunsak ti kan zumh khawhnak a dang a ruang a um rih. Biatak kan lehrulh ning kha a hngalh i a sinah a kan hnuh. (Johan 6:44) Jehovah kha kan hun naih tikah amah zong nih a kan naih ve. (Jeim 4:8) Jehovah nih kanmah cawnpiak awkah a caan le a thazaang zong a hman, mah nih a caah a sunglawimi kan si ti kha a langhter. Atu ah zei bantuk minung dah kan si ti le zeitindah kan ṭhancho khawh ti kha a hngalh. Cun a kan dawt tuk caah a kan chimhhrin. (Ptb. 3:11, 12) Mah cu Jehovah nih a kan sunsak ti a langhtertu thil a si.

8. Salm 18:27-29 bia cu buaibainak kan tonmi kong kan ruah ning cungah zeitindah huham a ngeih?

⁸ Mi cheukhat nih Siangpahrang David cu man a ngei lomi a si tiah an ruah, asinain Jehovah nih a ka dawt i a ka bawmh ti kha David nih a hngalh. Mah a hngalhmi nih a hmaanmi lungput he a sining kha inkhawh awkah a bawmh. (2 Sam. 16:5-7) Kan lung a dongh tik asiloah buaibainak kan ngeih tikah Jehovah nih mah thil sining kha phundang in hmuh awk le dawnkhantu a simi thil hna kha tei awkah a kan bawmh khawh. (Salm 18:27-29 rel.) Jehovah nih a kan ṭanpi ahcun lunglawm tein amah kan biaknak in zei thil hmanh nih a kan dawn kho lai lo. (Rom 8:31) Jehovah nih a kan dawt i a kan sunsak ti i cinken a herhnak thil sining pathum kha i ruah hna hmanh u sih.

9. Zawtnak nih kanmahle kanmah kan i hmuh ning cungah zeitindah a kan hnorsuan khawh?

⁹ Zawtnak nih kan ruahnak kha a hnorsuan khawh i aho ca hmanhah san ka tlai ti lo timi ruahnak a kan ngeihter khawh. Ri kan ngeihmi asiloah midang bawmhnak kan i bochanmi kha mi nih an hngalh tikah kan ning a zak men  lai. Midang nih kan zawtnak kha an hngalh lo hmanhah thil tampi kan tuah khawh ti lo caah kan ning a zak men lai. Cu bantuk caan ah Jehovah nih thazaang a kan pek. Zeitindah?

10. Phungthlukbia 12:25 ningin kan zawt tikah zeinihdah a kan bawmh khawh?

¹⁰ Kan zawt tikah “dawtnak bia” nih thazaang a kan ngeihter khawh. (Phungthlukbia 12:25 rel.) Baibal ah Jehovah nih dawtnak bia tampi a chim, mah nih kan zawt tik hmanhah a caah kan sunglawi ti kha a kan hngalhter ṭhan. (Salm 31:19; 41:3) Baibal kha atu le atu kan rel ahcun Jehovah nih kan zawt tikah a ṭha lomi ruahnak kan ngeihmi kha tei awkah a kan bawmh lai.

11. Unaupa pakhat nih Jehovah bawmhnak kha zeitindah a hmuh?

¹¹ Jorge hmuhtonnak hi ruathmanh. Minopa Jorge cu thader zawtnak a ngei. A zawtnak cu a zual chin i man ka ngei ti lo timi ruahnak a hun ngei. Jorge nih hitin a ti: “Ka zawtnak ruangah mah bantuk intuarnak ka ngei lai asiloah mi nih lungthin an ka pek caah ka ning a zak lai tiah ka ruat bal lo. Ka zawtnak cu a hung zual chin, mah tikah ka nunnak cu zeitindah aa thlen lai ti kha ka ruat. Ka ngaih a chia tuk i Jehovah sinah bawmhnak ka hal.” Jorge kha Jehovah nih zeitindah a bawmh? “Ka lungre a theih caah Jehovah nih a salle pawl a zohkhenh hnanak kong a langhtermi Salm chung i Baibal caang cheukhat kha ka rel. Mah cacaang cheukhat kha nifatin ka rel ṭhan i mah in hnemhnak ka hmu. Caan tlawmpal hnuah mi nih ka hmai a panh deuhmi kha an hun hmuh. Kaa nuamhmi nih thazaang a kan ngeihter ti hmanhin an ti. Jehovah nih ka thlacamnak a ka leh ti kha ka hun hngalh. Keimahle keimah kaa hmuh ning kha thlen awkah a ka bawmh. Ka zaw ko nain Jehovah nih a ka hmuhning he aa tlaiin Baibal chimmi kha lungthin ka hun pek.”

12. Na zawt tikah Jehovah bawmhnak kha zeitindah na hmuh khawh?

 ¹² A zawmi na si ahcun Jehovah nih na tonmi cu a hngalh dih ti kha na zumh khawh. Na tonmi thil sining kha a ṭhatnak leiin na hmuh khawh nakhnga bawmhnak hmuh awkah Jehovah kha nawl. Cun Jehovah nih na caah a chiahmi hnemhnak bia kha Baibal ah kawl. Jehovah nih a salle zeitluk in dah a sunsak hna ti a langhtermi Baibal caang ah lungthin pe. Cutin na tuah ahcun Jehovah cu zumhfek tein amah a biami dihlak cungah a ṭha ti kha na hngalh lai.—Salm 84:11.

13. Chungkhar lu cu a rian a sungh ahcun zei bantuk ruahnak dah a ngeih khawh?

¹³ Chungkhar lu kip nih an chungkhar nih an herhmi thil kha bawmh an duh hna. Unaupa pakhat cu palhnak a tuah lo nain a rian a sung. Rian dang kha a kawl len ko nain a hmu lo. Cu bantuk thil sining a ton caah man ka ngei lo timi ruahnak a ngei men lai. Jehovah biakam cung i lungthin peknak nih zeitindah a bawmh khawh?

14. Jehovah nih zeicah a biakam kha a tlinter zungzal?

¹⁴ Jehovah nih a biakam kha a tlinter zungzal. (Josh. 21:45; 23:14) A ruang tampi ruangah cutin a tuahmi a si. Pakhatnak ah, mah nih a min thang a ṭhatter lai. Jehovah nih zumhfekmi a salle kha kaan zohkhenh hna lai tiah bia a kamh hna i mah a biakam kha ka tlinter hrimhrim awk a si tiah a ruah. (Salm 31:1-3) Mah lengah a chungkhar ah aa telmi hna kha ka zohkhenh hna lo ahcun an ngaih a chia lai ti kha Jehovah nih a hngalh. Pumsalei he, thlaraulei he kaan zohkhenh hna lai tiah bia a kan kamh i mah a biakam kha tlinter lo awkah zeihmanh nih a kham kho lai lo.—Matt. 6:30-33; 24:45.

15. (a) Kumzabu pakhatnak i Khrihfa hna nih zei zuamcawhnak dah an rak ton? (b) Salm 37:18, 19 ningin zeidah kan zumh khawh?

 ¹⁵ Jehovah nih a biakam a tlinter zungzalnak a ruang kha kan i cinken ahcun tangkalei kan chambau tikah a kan bawmh lai ti kha kan zumh khawh lai. Kumzabu pakhatnak i khrihfa hna kong kha ruathmanh. Jerusalem i Khrihfabu nih hremnak nganpi an ton tikah “lamkaltu pawl kha dah ti lo cu, a zummi vialte kha . . . an i ṭhek dih.” (Lam. 8:1) Zeicah cutin an i ṭhek dih ti kha ruathmanh. Tangkalei chambaunak an ngeih caah a si. Mah cu Khrihfa hna nih an inn le an rian an sungh caah a si men lai. Asinain Jehovah nih a kaltak hna lo i an i nuamhnak zong a tlau lo. (Lam. 8:4; Heb. 13:5, 6; Jeim 1:2, 3) Jehovah nih mah zumhfekmi Khrihfa hna kha a rak bawmh hna i kanmah zong a kan bawmh ve lai.— Salm 37:18, 19 rel.

16. Kan biaknak cu Jehovah caah a sunglawi men lai lo tiah zeinihdah a kan ruahter khawh?

¹⁶ Kan kum a hung upat tikah Jehovah caah tlawmpal lawng kan pek khawh tiah kan hun ruah men lai. Siangpahrang David zong a kum a hung upat tikah cu bantuk intuarnak ruangah a lungre a rak thei ve men lai. (Salm 71:9) Jehovah nih zeitindah a kan bawmh khawh?

17. Unaunu Jheri hmuhtonnak in zeidah kan cawn khawh?

¹⁷ Unaunu Jheri kong hi ruathmanh. Jehovah rianṭuannak caah hmanmi inn pawl zohkhenhnak he aa tlaiin Biakinn ah tinṭan kai dingin sawm a si nain a kal duh lo. Hitin a ti: “Ka kum a upa cang, nuhmei ka si i Jehovah hmanmi si awkah zei thiamnak hmanh ka ngei lo. Kei cu hman awkah ka tlak ti lo.” Tinṭan aa thawk lai zanah Jehovah sinah lungtak tein  thla a cam. A thaizing i Biakinn a phanh hnu hmanhah ka kai awk a si taktak maw tiah a ruah peng rih. Mah tinṭan chungah Phungchimtu pakhat nih a biapi bikmi sining pakhat cu Jehovah cawnpiaknak lungtho tein cohlan duhnak ngeih kha a si tiah a hleiin a chim. Jheri nih hitin a ti: “‘Mah sining cu ka ngei ko’ tiah ka ruah. Jehovah nih ka thlacamnak a ka leh ti kha ka hngalh tikah ka ṭap. A sunglawimi thil pek awk ka ngei ti le lungtho tein cawnpiak a ka duh ti kha a ka hngalhter.” Jheri nih hitin a ti chap: “Tinṭan kai kaa thawh lioah ṭihnak, lungdonghnak le san ka tlai lo timi ruahnak ka ngei. Asinain ka kir tik ahcun mahle mah zumhnak, thazaang le hman awk ka tlak timi ruahnak ka ngei cang.”

18. Kan kum a upat hmanhah Jehovah nih kan biaknak a sunsak peng ti kha Baibal nih zeitindah a langhter?

¹⁸ Kan kum a upat hmanhah Jehovah nih rian a kan pek peng rih lai ti kha kan zumh khawh. (Salm 92:12-15) Kan thilti khawhnak cu ri a ngeih hmanhah asiloah kan i zuamnak cu thil hmete in kan hmuh hmanhah Jehovah nih a caah kan tuah khawhmi paoh kha a sunsak tiah Jesuh nih a kan cawnpiak. (Luka 21:2-4) Cucaah na tuah khawhmi thil cungah lungthin pe. Tahchunhnak ah, Jehovah kong na chim khawh, unau pawl caah thla na cam khawh i zumhfek tein um awkah midang kha tha na pek khawh hna. Jehovah nih a rianṭuanti hawi in aan hmuhmi cu na tuah khawhmi ruang ah si loin lungtho tein a nawl na ngaih ruangah a si.—1 Kor. 3:5-9.

19. Rom 8:38, 39 ningin zeidah kan zumh khawh?

¹⁹ Amah a biami hna a sunsak tukmi Jehovah Pathian kan biakmi cu zeitluk lunglawmh awk dah a si. Jehovah nih amah duhnak tuah awkah a kan ser i mah cu a hmaanmi biaknak a si. Mah nih sullam a ngeimi nunnak a kan ngeihter. (Biat. 4:1) Vawlei nih cun man a ngei lomi in a kan hmuh nain Jehovah nih cun cutin a kan hmu lo. (Heb. 11:16, 38) Zawtnak, tangkalei chambaunak asiloah kumkhua upat ruangah kan lung a dongh tikah vancung kan Pa dawtnak in zeihmanh nih a kan ṭhen kho lo ti kha i cinken hna u sih.—Rom 8:38, 39 rel.