1-2. San a wantu sani di e miti a foluku fu Yehofa? San e pasa te den sani ya e miti den?

LUKU den dii toli ya: Dataa taigi wan yonkuu baala taki a abi wan takuu siki di o meke ai swaki e gwe saafisaafi. Wan baala di pasa 50 yali, lasi en wooko, anga ala fa a be e du en wooko bun. Winsi fa ai meke moiti suku taa wooko, a á fende ete. Wan gaandi sisa di e dini Yehofa anga en hii ati, á poi du san a be gwenti du gi Yehofa moo.

² Efu wan fu den sani di kai a tapu ya e miti i, kande yu e fii enke i ná abi fa. Den sowtu polobelema ya sa meke i nai piisii moo. Den sa meke yu e fii enke yu á bun. Boiti dati, den sa meke a taanga gi i fu libi bun anga taawan.

3. Fa Saatan anga den sama di e denki enke en e si libisama?

³ A goontapu ya e si libisama enke fa Saatan e si den. A ná tide Saatan soi taki a nai si libisama fu wan sani. A be taigi Efa taki en libi o moo waka bun di a o taangayesi Gadu, winsi fa a be sabi taki a dede na a paiman fu sondu. A Saatan e tii a bisnis, den politiki palitei anga den keliki fu a goontapu ya. Neen meke a nai foondoo wi taki omen bisnisman, politikiman, anga keliki  fesiman nai booko den ede anga a libi fu taawan. Den nai booko den ede anga a fasi fa libisama e fii tu.

4. San wi o luku aini a artikel ya?

⁴ Yehofa wani u sabi taki u pelensipali gi en. Ai yeepi u te wi abi polobelema di sa meke u fii enke u ná abi fa (Ps. 136:23; Rom. 12:3). A artikel ya o soi u fa Yehofa e yeepi u te wi abi den polobelema ya: (1) Te u siki, (2) te wi abi moni polobelema, anga (3) te wi á poi du san u be gwenti du gi Yehofa moo fu di u kon gaandi. Meke u luku fosi saide u sa biibi taki u pelensipali gi Yehofa.

5. San e soi taki libisama pelensipali gi Yehofa?

⁵ Winsi anga doti Gadu meke u, tokuso u pelensipali gi en (Gen. 2:7). Luku wantu sani di e soi taki u pelensipali gi Yehofa. Yehofa meke u fu u man soi denseefi manii fi en (Gen. 1:27). A di a meke u na a fasi ya, meke u pelensipali moo ala den taa sani di a meke poti a goontapu ya. A poti u fu luku a goontapu anga den meti tu.​—Ps. 8:4-8.

6. Sowtu taa sani e soi taki sondu libisama pelensipali gi Yehofa?

⁶ Baka di Adan sondu, Yehofa soi taki libisama pelensipali gi en ete. A di a lobi u meke a sende en Manpikin Yesesi kon dede gi u fu pai fu den sondu fu u (1 Yoh. 4:9, 10). A di Yesesi kon dede gi u, meke Yehofa o weki den sama di dede baka. A o weki den „sama di be libi a wan letifasi anga den sama di á be libi a wan letifasi” (Toli 24:15). A soi wi aini en Wowtu taki u pelensipali gi en, winsi u siki, winsi u pooti, efuso gaandi.​—Toli 10:34, 35.

7. San a wantu taa sani di e soi taki a foluku fu Yehofa pelensipali gi en?

⁷ Yehofa du moo sani gi u fu soi u taki u pelensipali gi en. Ai hali u kon neen. A si tu san u du di u yee a bun nyunsu (Yoh. 6:44). Te wi e meke moiti fu kon koosube neen, da enseefi e kon koosube a u (Yak. 4:8). Yehofa e teke en ten fu leli u, a sani ya e soi taki u pelensipali gi en. A sabi fa u de nownow, ma a sabi tu fa wi o de te wi o du den sani di u leli. A lobi u, neen meke ai kaasi u son leisi (Odo 3:11, 12). Den sani ya e soi kiin taki u pelensipali gi Yehofa!

8. Fa den sani di sikiifi a Psalm 18:27-29 sa yeepi u te wi abi polobelema?

⁸ Son sama be e soso Kownu David, ma David be sabi taki Yehofa lobi en. A be e si fa Yehofa be e yeepi en tu. Neen meke a be man holidoo anga piisii, winsi san be e miti en (2 Sam. 16:5-7). Te wi e fii booko-saka efuso te wi abi polobelema, Yehofa sa yeepi u fu wi á booko wi ede tumisi. A sa yeepi u tu fu pasa den tesi ya. (Leisi Psalm 18:27-29.) Te Yehofa e holibaka gi u, nawan sani á poi tapu u fu dini en anga piisii (Rom. 8:31). Meke u luku dii okasi pe u mu holi a pakisei taki u pelensipali gi Yehofa.

9. Fa wi e fii son leisi te u siki?

⁹ Te u siki, a sani ya sa meke wi e fii enke u ná abi fa. Kande sen e kisi u te sama kon sabi taki u siki, efuso te wi á poi du son sani moo. Winsi sama á sabi taki u siki, tokuso kande wi e fii booko-saka fu di wi á poi du san u be gwenti du moo. A den ten ya  Yehofa e gi u taanga-sikin. Fa ai du a sani ya?

10. Enke fa Odo 12:25 e soi, da san sa yeepi u te u siki?

¹⁰ Te u siki, wi e fii bun „te wan sama taki switi” anga u. (Leisi Odo 12:25.) Yehofa sikiifi omen sani aini Beibel di e membee u taki u pelensipali gi en, winsi u siki (Ps. 31:19; 41:3). Efu wi e leisi den tekisi ya, Yehofa o yeepi u fu wi á booko wi ede tumisi anga a siki fu u. Son leisi a de fanowdu fu leisi den sani ya moo enke wan leisi.

11. Fa Yehofa yeepi wan baala di siki?

¹¹ Meke u luku a toli fu wan yonkuman den e kai George *. Di a be yonkuu, a kisi wan siki di be kon moo ogii gawgaw. A sani ya meke ai fii enke a á bun. George taki: „Mi á be sabi taki a so a siki ya be o meke mi e fii. Sen be e kisi mi te sama be e luku mi wan fasi. Moo a siki be e kon moo ogii, moo mi be e pakisei fa mi libi be o kengi. Mi be e booko mi ede te. Neen meke mi begi Yehofa fu a yeepi mi.” Fa Yehofa yeepi en? A taki: „Mi á poi poti pakisei langa a wan sani, neen meke mi fende a taanga-sikin fu leisi wantu satu pisi aini a Beibel buku Psalm, pe Yehofa e soi taki ai booko en ede anga den sama di e dini en. Mi e leisi den pisi ya go kon ala dei. Den e gi mi taanga-sikin tuutuu. Bakaten sama bigin si taki mi be e moo lafu. Den taigi mi wantu leisi taki te den si fa mi e piisii, den e fende taanga-sikin. Mi si taki Yehofa piki den begi fu mi. A yeepi mi fu kengi a fasi fa mi e si miseefi. Mi bigin poti pakisei a san sikiifi  aini a Wowtu fi en, anga a fasi fa ai si mi winsi fa mi siki.”

12. San i mu du efi i wani Yehofa yeepi i te i siki?

¹² Efi i siki, i sa biibi taki Yehofa sabi san e miti i. Begi en fu a yeepi i fi yu á booko yu ede tumisi. Leisi den sani di Yehofa sikiifi aini a Wowtu fi en. Poti pakisei a den tekisi di e soi taki Yehofa e booko en ede anga a foluku fi en. Efi yu e du den sani ya, yu o si taki Yehofa e soi ala den sama di e dini en bun-ati, winsi san e miti den.​—Ps. 84:11.

13. Fa wan osufamii edeman sa fii te a lasi en wooko?

¹³ Ala osufamii edeman wani gi den osufamii san den abi fanowdu. Ma wan baala sa lasi en wooko, winsi a á du nawan sani. Kande a suku wan taa wooko te a weli. A sani ya sa meke a baala fii enke a ná abi fa. Fa a poti di a o poti pakisei a den sani di Yehofa paamisi u sa yeepi en?

14. Saide Yehofa e du san a paamisi?

¹⁴ Ala yuu Yehofa e du san a paamisi (Yow. 21:45; 23:14). A omen sani meke Yehofa e du san a paamisi. Ai du a sani ya fu di a á wani nawan sani poli a bun nen fi en. Yehofa paamisi taki a o holibaka gi den sama di e dini en anga den hii ati. A taki a musu du san a paamisi (Ps. 31:1-3). Boiti dati, Yehofa sabi taki efu a nai yeepi den sama di e dini en, u be o go e kusumi. A paamisi taki a o yeepi u fu fende san wi abi fanowdu fu tan a libi. A o yeepi u tu fu u man tan dini en. Nawan sani poi tapu en fu du san a paamisi!​—Mat. 6:30-33; 24:45.

15. (a) San be miti den Kelesten fu a ten fu den apostel? (b) Sowtu taanga-sikin Psalm 37:18, 19 e gi u?

 ¹⁵ Efu wi e holi a pakisei saide Yehofa e du san a paamisi, a sani ya o yeepi u fu biibi taki a o holibaka gi u te wi abi moni polobelema. Pakisei a toli fu den Kelesten fu a ten fu den apostel. Di gaan tesi be e miti a kemeente a Yelusalem, „ala den disipel lowe go na ala se”. A den apostel wawan á be lowe (Toli 8:1). Pakisei san a sani ya be wani taki. Den Kelesten be kon abi moni polobelema. Kande den be lasi den osu anga den bisnis fu den. Tokuso Yehofa á be gwe fika den. Den á be lasi den piisii tu (Toli 8:4; Heb. 13:5, 6; Yak. 1:2, 3). Leti enke fa Yehofa be holibaka gi den Kelesten ya di be e dini en anga den hii ati, a so a o holibaka gi u tu.​—Leisi Psalm 37:18, 19.

16. San sa meke u fii enke wi á pelensipali gi Yehofa?

¹⁶ Te wi e kon moo gaandi, wi e fii enke den sani di wi e du gi Yehofa á sai, fu di wi á poi du omen sani moo enke fosi. Kande Kownu David be e fii aseefi fasi di a be e kon gaandi (Ps. 71:9). Fa Yehofa sa yeepi u?

17. San a toli fu sisa Joan e leli u?

¹⁷ Luku a toli fu wan sisa den e kai Joan. Den baala be o leli wantu peleikiman fa den mu solugu a Kownukondee zaal, ma di den kai a sisa ya, a á be wani go. A taki: „Mi gaandi, mi man dede kaba. Mi á sabi du nawan sani. San mi o man du gi Yehofa?” Fosi a dei doo fu go na a Kownukondee zaal, a taigi Yehofa san be de neen ati a neti de. Di a doo na  a Kownukondee zaal a taa dei, a be e akisi enseefi ete san a go du ape. Wan fu den baala di be e holi a takimakandaa soi den peleikiman kiin taki a sani di Yehofa e luku, na a de di u de kabakaba fu wooko gi en. Joan taki: „Mi be e pakisei taki: ’Mi wani wooko gi Yehofa!’ Mi kee di mi fusutan taki Yehofa piki a begi fu mi. A be soi mi kiin taki mi poi wooko gi en ete. A be de kabakaba fu leli mi.” Bakaten, Joan taki: „Di mi be de fu go na a Kownukondee zaal mi be e senuwe, mi be booko-saka. Ma di mi komoto mi be e fii bun, mi be fende taanga-sikin. Mi be e fii taki mi pelensipali gi Yehofa ete.”

18. Fa Beibel e soi taki Yehofa e teke san wi e du gi en fu bigi winsi u kon gaandi?

¹⁸ Te wi e kon moo gaandi, u sa biibi taki Yehofa abi wooko gi u fu du ete (Ps. 92:12-15). Yesesi leli u taki winsi wi e si enke den sani di wi e du gi Yehofa á pelensipali, tokuso Yehofa e teke ala san wi e du gi en fu bigi (Luk. 21:2-4). Neen meke i mu du san i man gi Yehofa. I sa yeepi taawan fu kon sabi Yehofa, i sa begi gi i baala anga sisa, i sa gi taawan deki-ati fu den holidoo. Yehofa e si yu enke sama di e wooko makandaa anga en, a ná fu di i poi du tyaipi sani gi en, ma fu di i de kabakaba fu aliki en.​—1 Kor. 3:5-9.

19. Sowtu taanga-sikin wi e fende a Romesama 8:38, 39?

¹⁹ Ai bigi gi u taki wi e dini Yehofa, wan Gadu di lobi den sama di e dini en. A meke u fu di a wani u dini en. Te wi e dini en wi e piisii tuutuu (Opb. 4:11). Winsi fa a goontapu nai si u fu wan sani, toku u sabi taki u pelensipali gi Yehofa (Heb. 11:16, 38). Te wi e fii booko-saka fu di u siki, fu di u pooti efuso gaandi, u mu holi a pakisei taki sani á de di sa tapu u Dda di de a hemel fu a á lobi u.​—Leisi Romesama 8:38, 39.