1, 2. ¿Mbaʼeichagua situasiónpa ombohovái heta Jehová siervokuéra, ha mbaʼéichapa ikatu oñeñandu hikuái?

ÑAPENSAMÍNA koʼã mbohapy situasión rehe. Peteĩ ermáno imitãva oho doktórpe ha ojeʼe chupe orekoha peteĩ mbaʼasy omokangypáva chupe. Peteĩ ermáno iguapoitereíva orekóva 50 áño rasa operde itraváho, ha ndotopavéi ótro traváho oñehaʼãvéramo jepe. Peteĩ ermána ifiélva ningo ijedáma ohóvo ha oñandu amáske oho saʼive ikatuha ojapo Jehová servísiope.

² Jareko jave koʼãichagua provléma, ikatu voi ñapensa ndajavaleveimaha mbaʼeverã. Péicha oikóramo ikatu jaju ndajavyʼavéi, ñapensa nañamereseiha avave ñanderayhu, ha ndajajoguerahaporãi ñande rapichakuérandi.

3. ¿Mbaʼéichapa oporotrata Satanás ha umi hénte oĩva ipoguýpe?

³ Umi hénte ko mundopegua nomombaʼéi hapicha rekove, pórke ojogua hikuái Satanáspe. Haʼéngo siémpre ñandeapoʼi ku ndajavaleiramoguáicha mbaʼevete asy. Ohechauka vaʼekue iñañaitereiha oofrese guaʼúrõ guare Évape liverta, haʼe oikuaa porãramo jepe Eva omanotaha odesovedeséramo Ñandejárape. Satanás siémpre oreko ipoguýpe pe komérsio mundiál, pe polítika, ha umi rrelihionkuéra. Upévare nañanesorprendéi jahechávo heta komersiánte, polítiko, ha umi rrelihión omoakãva nomombaʼeiha hapichakuéra rekove ha ndorrespetaiha avavépe.

4. ¿Mbaʼépa jahecháta ko artíkulope?

⁴ ¡Ajépa idiferentete chuguikuéra Jehová! Haʼe siémpre oipota  ñañeñandu porã, ha ñanepytyvõ oĩ jave umi situasión ijetuʼúva ikatúva ñanemopensa ndajavaleiha mbaʼeverã (Sal. 136:23; Rom. 12:3). Ko artíkulope jahecháta mbaʼéichapa Jehová ñanepytyvõ jahasa jave koʼã situasión: Ñanderasy jave, ipoʼi jave la pióla ha ñapensa jave ndaikatuveimaha jajapo mbaʼeve Jehová servísiope ñandeedáma rupi. Péro primero jahechamíta mbaʼérepa ikatu jaguerovia enterovete javaletereiha Ñandejárape g̃uarã.

5. ¿Mbaʼéichapa jaikuaa ñande yvyporakuéra javaletereiha Jehovápe g̃uarã?

⁵ Jehová ñandeapóramo jepe yvýguinte, ñande javaleteve hína un púño yvýgui (Gén. 2:7). Jahechamína mbaʼérepa ñande javaleterei Ñandejárape g̃uarã. Por ehémplo, ñande ikatu jahechauka umi kualida haʼe orekóva, upéicha rupi ñaneimportanteve entéro mbaʼe haʼe ojapo vaʼekuégui ko yvy ape ári (Gén. 1:27). Haʼe oheja avei ñande kárgope ko yvy ha umi animalkuéra (Sal. 8:4-8).

6. ¿Mbaʼéichapa jaikuaa avei Jehová ovaloraitereiha umi héntepe iñimperféktoramo jepe?

⁶ Adán opeka rire jepe, Jehová osegi omombaʼe yvyporakuérape. Javaleterei rupi chupe g̃uarã, haʼe omeʼẽ Itaʼýra Jesúspe sakrifísioramo ñande pekadokuérare (1 Juan 4:9, 10). Ha pe rreskáte rupive, Ñandejára omoingove jeýta umi omano vaʼekuépe Adán pekádo káusare, “umi ihústova ha iñinhústovape” (Hech. 24:15). La Biblia ohechauka ñande javaletereiha henondépe, ha upéva nodependéi ñande salúre, ñandesogue térã ñandeplátaramo, ni ñande edáre (Hech. 10:34, 35).

7. ¿Mbaʼérepa avei ñande Jehová siervokuéra jaguerovia haʼe ñanemombaʼeha?

⁷ Ñande Jehová siervokuéra jareko hetave rrasón jaguerovia hag̃ua haʼe ñanemombaʼeha. Jehová voi ñanepytyvõ ñañemoag̃ui hag̃ua hese, haʼe ohecha kuri mbaʼéichapa ñarreaksiona ojepredika ypýrõ guare ñandéve umi notísia porã (Juan 6:44). Ñañepyrũrõ guare ñañemoag̃ui hese, haʼe avei oñemoag̃ui ñanderehe (Sant. 4:8). Avei oipuru heta tiémpo ha oñehaʼãmbaite ikatu hag̃uáicha ñanemboʼe. Oikuaa mbaʼeichagua persónapa ñande koʼág̃a ha mbaʼépa ikatu oiko ñandehegui amo gotyove. Avei ohechauka ñanderayhuha ñandekorrehi jave (Prov. 3:11, 12). ¿Ndohechaukáipa koʼã mbaʼe ñaneimportantetereiha chupe g̃uarã?

8. ¿Mbaʼéichapa ñanepytyvõta Salmo 18:27-29 heʼíva jahecha hag̃ua hendápe porã umi provléma jarekóva?

⁸ Rréi David oikuaa porã vaʼekue Jehová ohayhu ha oipytyvõha chupe. Oĩ rupi segúro upévare, haʼe ikatu kuri oaguanta trankílo porãnte ojeʼérõ guare hese ndovaleiha mbaʼeverã (2 Sam. 16:5-7). Japyta jave yvýre térã ñambohovái heta mbaʼe ijetuʼúva, Jehová ikatu ñanepytyvõ jahecha hag̃ua hendápe porã umi mbaʼe, ha péicha ikatúta jasupera oimehaichagua provléma (elee Salmo 18:27-29). Ñandejára oĩramo ñanendive, ndaipóri ñandejoko vaʼerã jaservi hag̃ua chupe vyʼápe (Rom. 8:31). Jahechamína koʼág̃a mbohapy situasión ikatúva jahasa, ha tekotevẽtahápe ñanemanduʼa Jehová ñanemombaʼe ha ñanderayhuetereiha.

9. ¿Mbaʼéichapa ikatu ñañeñandu ñanderasy jave?

⁹ Ñanderasy jave ikatu jaju ñañedesanimaite, ha ñapensa ndajavaleveimaha avavépe g̃uarã. Ikatu voi ñatĩeterei oĩramo oikuaáva ndaikatuiha jajapo heta mbaʼe térã ñaikotevẽha ajúda. Ha umi hénte ndoikuaáirõ jepe ñanderasyha, ikatúnte avei ñatĩ, pórke ndaikatuvéima jajapo heta mbaʼe yma guaréicha.  Péicha ñañeñandu vai jave, Jehová ñanemokyreʼỹ. ¿Mbaʼéichapa ojapo upéva?

10. Heʼiháicha Proverbios 12:25, ¿mbaʼépa ikatu ñanepytyvõ ñanderasy jave?

¹⁰ Ñanderasy jave, tuicha ñanepytyvõ oĩramo ‘ñanemokyreʼỹva’ (elee Proverbios 12:25). Jehová omoĩka la Bíbliape heta ñeʼẽ iporã porãva ñanemomanduʼáva javaletereiha chupe g̃uarã, ñanderasýramo jepe (Sal. 31:19; 41:3). Jalee jey jeýramo koʼã mbaʼe oúva Ñandejáragui, haʼe ñanepytyvõta ñambohovái hag̃ua umi sentimiénto negatívo jarekóva ñanderasy rupi.

11. ¿Mbaʼéichapa ohechakuaa peteĩ ermáno Jehová oipytyvõha chupe?

¹¹ Jahechamína la oiko vaʼekue Jorge rehe. Imitãrõ guare ojagarra chupe peteĩ mbaʼasy omokangypáva chupe, ha pe mbaʼasy pyaʼeterei oavansa, upéva káusa haʼe ou oñeñandu ndovaleiha mbaʼeverã. Jorge heʼi: “Upérõ che naiméi kuri preparádo ambohovái hag̃ua pe sentimiénto vai arekóva pe mbaʼasy káusa, ha atĩeterei voi pórke enterove ohecha mbaʼéichapa aime. Ivaivévo ohóvo la che situasión, apensa mbaʼeichaitépa okambiáta che rekove. Apyta yvýre, ha ajerure asy Jehovápe chepytyvõmi hag̃ua”. ¿Mbaʼéichapa oipytyvõ chupe Jehová? Haʼe heʼi: “Ijetuʼu chéve añekonsentra hag̃ua, upévare orrekomenda chéve hikuái alee hag̃ua mbyky mimi umi Salmo ohechaukáva mbaʼéichapa Jehová oñeinteresa isiervokuérare. Alee jey jey umi téxto káda día, ha upéva chemokyreʼỹ ha chetrankilisa. Upéi umi oĩva chendive ohecha pyʼỹive apukavyha. Ha heʼi voi hikuái che aanimaha chupekuéra, pórke ohecha chekyreʼỹha. Péicha ahecha Jehová ombohovái hague chéve che ñemboʼe, ha chepytyvõ akambia hag̃ua pe añandúva chejehe. Añepyrũ añekonsentra umi téxto oĩvare la Bíbliape ha ohechaukáva mbaʼéichapa Jehová cherecha cherasýramo jepe”.

12. ¿Mbaʼépa jajapo vaʼerã ikatu hag̃uáicha ñañandu Jehová ñanepytyvõha ñanderasy jave?

 ¹² Oimérõ ñanderasy hína, ikatu ñaime segúro Jehová oikuaaha upe jahasáva. Jajerure asy vaʼerã chupe tañanepytyvõ jahecha hag̃ua hendápe porã ñane situasión. Jalee vaʼerã la Biblia jahecha hag̃ua umi ñeʼẽ iporãva Ñandejára omoĩ vaʼekue pype ñandéve g̃uarã. Jaheka vaʼerã umi téxto ohechaukáva mbaʼeichaitépa Jehová ovalora isiervokuéra ifiélvape. Jaleévo umíva, jahecháta mbaʼeichaitépa haʼe “imbaʼeporãiterei ñanendive ha ñanemombaʼe” (Sal. 84:11).

13. ¿Mbaʼéichapa ikatu oñeñandu peteĩ omoakãva hogapy oñemosẽramo itraváhogui?

¹³ Umi omoakãva hogapy oñehaʼãmbaite omantene hag̃ua ifamíliape. Péro eñeimahinamína peteĩ ermáno oñemosẽ reieteha itraváhogui. Haʼe oñehaʼãmbaite okonsegi hag̃ua ótro traváho péro ndotopái. Péicha jave haʼe ikatu oñeñandu ndovaleiha mbaʼeverã. ¿Mbaʼéichapa oipytyvõta chupe ojesareko memérõ Jehová promesakuérare?

14. ¿Mbaʼérepa Jehová siémpre okumpli umi mbaʼe oprometéva?

¹⁴ Jehová siémpre okumpli pe oprometéva (Jos. 21:45; 23:14). Oreko heta motívo ojapo hag̃ua upéva. Primero, haʼe oreko enkuénta héra ha mbaʼépa ojeʼéta hese. Haʼe opromete kuri oñangarekotaha isiervokuéra ifiélva rehe, upévare haʼe oñeñandu oĩha ovligádo okumplívo upe opromete vaʼekue (Sal. 31:1-3). Avei oikuaa mbaʼeichaitépa ñande ñañeñandu vaíta haʼe ndojepreokupáiramo ifamília rehe. Jehová opromete omeʼẽtaha ñandéve umi ñane remikotevẽ káda diagua, ha umi mbaʼe ñaikotevẽva ñande jerovia imbarete hag̃ua. Haʼe okumplíta upéva, ha ndaipóri ojoko vaʼerã chupe (Mat. 6:30-33; 24:45).

15. a) ¿Mbaʼe ijetuʼúvapa ohasa vaʼekue umi kristiáno primer síglope? b) ¿Mbaʼe garantíapa omeʼẽ ñandéve Salmo 37:18, 19?

 ¹⁵ Ñanemanduʼáramo mbaʼérepa Jehová siémpre okumpli umi mbaʼe oprometéva, ñañeñandu segúro ha ndajakyhyjéi ipoʼíramo jepe la pióla. Ñapensamína umi mbaʼe ohasa vaʼekuére umi kristiáno primer síglope guare. Ojepersegi mbaretérõ guare pe kongregasión oĩva Jerusalénpe, “oĩ haguéicha oñemosarambipa umi disípulope”, “ha umi apóstol añoite opyta” (Hech. 8:1). Upevakuére, oiméne ohasa asy rakaʼe hikuái, pórke katuete ipoʼíne raʼe la pióla. Ikatu oime operdepa hikuái hóga, itraváho ha inegósio. Péro Jehová ndohejái chupekuéra, upévare haʼekuéra osegi ovyʼa (Hech. 8:4; Heb. 13:5, 6; Sant. 1:2, 3). Ñandejára oipytyvõ kuri umi kristiáno ifiélvape, ha ñandéve ñanepytyvõtante avei (elee Salmo 37:18, 19).

16. ¿Mbaʼépa ikatu ñapensa ñandeeda vove jahávo?

¹⁶ Ñandeeda vove jahávo, ikatu ñapensa saʼíma jarekoha jajapo vaʼerã Jehová servísiope. Ikatu péicha opensa rakaʼe rréi David ituja rire, ha upéva omoñeñandu vaíne raʼe chupe (Sal. 71:9). ¿Mbaʼéichapa ñanepytyvõ Jehová?

17. ¿Mbaʼépa ñanemboʼe ermána Joana ohasa vaʼekue?

¹⁷ Jahechamína mbaʼéichapa oñeñandu peteĩ ermána hérava Joana. * Oñeinvita chupe oho hag̃ua peteĩ kúrso de mantenimiéntope, ojejapótava Salón del Réinope, péro Joana ndohoséi kuri. Haʼe heʼi: “Chéngo peteĩ viudami, ha cheg̃uaig̃uíma, ndajapokuaái mbaʼevete ikatúva ideprovécho Jehovápe. Che ndavalevéima mbaʼeverã”. Péro upe pyhare, pe kúrso mboyve oñemboʼe Jehovápe ipyʼaite guive. Upéi pe  ótro día og̃uahẽ pe Salónpe, ha oduda gueteri ikatutaha ideprovécho Jehovápe. Pe prográma aja peteĩ diskursánte omyesakã porã la añetehápe ovaléva hína ndahaʼeiha mboy kósapa jajapokuaa, síno jareko pe deséo Jehová ñanemboʼévo. Joana imanduʼa: “Upérõ che apensa: ‘Chéngo areko upéva, che aipota Jehová chemboʼe’. Upépe añepyrũ cherasẽ ahechakuaávo Jehová ombohovaiha chéve che ñemboʼe. Haʼe chekonvense hína arekoha gueteri álgo ovaléva ameʼẽ vaʼerã chupe, ha haʼe chemboʼese ajapo hag̃ua upéva”. Joana imanduʼa upe oiko vaʼekuére upérõ ha heʼi: “Aikérõ guare pe rreuniónpe, aĩ kuri desanimáda, añeñandu yvýre, ha akyhyje. Péro asẽvo upégui, ajerovia chejehe, chekyreʼỹ ha añandu avaletereiha”.

18. ¿Mbaʼéichapa la Biblia ohechauka Jehová osegiha ovalora ñande servísio ñandeedáramo jepe?

¹⁸ Ñandeedáramo jepe jahávo, ikatu ñaime segúro Jehová orekoha gueteri traváho ñandéve g̃uarã (Sal. 92:12-15). Jesús ñanemboʼe vaʼekue Jehová omombaʼetereiha jajapóva iservísiope, jepe ñandéve g̃uarã saʼieterei la ikatúva jajapo, térã ñapensáramo jepe nañandekatupyryiha jajapo hag̃ua heta mbaʼe (Luc. 21:2-4). Upévare, ñañekonsentrákena umi mbaʼe ikatúvare jajapo. Por ehémplo, ikatu ñañeʼẽ Jehováre, ñañemboʼe ermanokuérare ha ñamokyreʼỹ ótrope osegi hag̃ua ifiél. Jehová heʼi ñande ñambaʼapoha hendive, ndahaʼéi jajapokuaágui heta mbaʼe, síno ñaneñeʼẽrenduse rupi chupe (1 Cor. 3:5-9).

19. ¿Mbaʼe garantíapa omeʼẽ ñandéve Romanos 8:38, 39?

¹⁹ ¡Ajépa jaagradesete ikatu haguére jaadora Jehovápe! Haʼéngo peteĩ Dios añetehápe ovaloráva isiervokuérape. Haʼe ñandeapo voi jajapo hag̃ua ivolunta, ha pe ñanembovyʼa añetéva ñande rekovépe haʼe hína jaadora chupe añoiténte (Apoc. 4:11). Ikatu ko múndo heʼi ndajavaleiha mbaʼeverã. Péro Jehová notĩri ñandereheve (Heb. 11:16, 38). Sapyʼánte ñañeñandúramo yvýre ñanderasykatu rupi, ipoʼígui ñanendive la pióla, térã ñandeedáma rupi, ñanemanduʼákena ndaiporiha mbaʼeve ikatúva ñandepeʼa Ñandejára mborayhúgui (elee Romanos 8:38, 39).