1, 2. Ninọmẹ tẹlẹ wẹ omẹ Jehovah tọn susu nọ pehẹ, podọ nawẹ enẹ sọgan yinuwado yé ji gbọn?

LẸNNUPỌNDO ninọmẹ atọ̀n ehelẹ ji: Doto lẹ mọ azọ̀n sinsinyẹn de na mẹmẹsunnu jọja de. Azọ́n gbledo mẹmẹsunnu azọ́n sinsinyẹnwatọ de he ko tindo nudi owhe 50, bọ e dín devo kaka bo ma mọ. Na nugopipe mẹmẹyọnnu mẹhomẹ nugbonọ de tọn to didepo vudevude wutu, e ma sọgan sọ wà susu to sinsẹ̀nzọn Jehovah tọn mẹ ba.

² Eyin a to pipehẹ ninọmẹ de he taidi dehe ṣẹṣẹ yin nùdego wayi lẹ, a sọgan nọ mọdọ emi masọ yọ́n-na-yizan ba. Ninọmẹ enẹlẹ sọgan zọ́n bọ a na hẹn ayajẹ towe bu bo na nọ mọ ovọ́ mẹ na dewe, podọ e sọgan yinuwado haṣinṣan towe hẹ mẹdevo lẹ ji.

3. Nukun tẹwẹ Satani po mẹhe ji e ko yinuwado lẹ po nọ yí do pọ́n ogbẹ̀ gbẹtọvi lẹ tọn?

³ Aihọn ehe nọ do pọndohlan he Satani tindo gando ogbẹ̀ gbẹtọvi tọn go nkọ hia. Satani nọ yinuwa hẹ gbẹtọvi lẹ taidi dọ yé ma vó nude. E gbọn kanyinylan dali do ali mẹdekannujẹ tọn de hia Evi, bo ka yọnẹn ganji dọ tolivivẹ na Jiwheyẹwhe na dekọtọn do okú mẹ. Sọn hohowhenu gbọ́n wẹ Satani ko nọ deanana tito ajọwiwa, tonudidọ po sinsẹ̀n po tọn to aihọn ehe mẹ. Enẹwutu, e ma yin nupaṣamẹ de dọ taidi Satani, ajọwatọ, tonudọtọ po nukọntọ sinsẹ̀n tọn susu po ma yọ́n pinpẹn ogbẹ̀ gbẹtọvi lẹ tọn bo masọ nọ doyẹyigona yé.

4. Etẹ ji wẹ mí na dọhodo to hosọ ehe mẹ?

 ⁴ To alọ devo mẹ, Jehovah nọ jlo dọ mí ni yí nukun nujọnu tọn do pọ́n míde, podọ e nọ gọalọna mí to whenue mí pannukọn ninọmẹ he gán zọ́n bọ mí na mọ míde di nuvọ́nọ lẹ. (Salm. 136:23; Lom. 12:3) Hosọ ehe na dọhodo lehe Jehovah nọ gọalọna mí to ninọmẹ he bọdego lẹ mẹ do ji: (1) Whenue mí to azọ̀njẹ, (2) whenue mí pehẹ nuhahun akuẹ tọn, podọ (3) whenue mẹhowhe zọ́n bọ mí nọ mọdọ nudagbe depope ma tin he mí gán wà to sinsẹ̀nzọn Jehovah tọn mẹ. Ṣigba, jẹnukọn whẹ́, mì gbọ mí ni gbadopọnna nuhewutu mí sọgan kudeji dọ dopodopo mítọn họakuẹ na Jehovah.

5. Etẹwẹ dohia we dọ gbẹtọvi lẹ họakuẹ to nukun Jehovah tọn mẹ?

⁵ Dile etlẹ yindọ kọ́gudu aigba tọn mẹ wẹ mí yin didá sọn, mí họakuẹ hú kọ́gudu alọgogo dopo. (Jen. 2:7) Mì gbọ mí ni gbadopọnna whẹwhinwhẹ́n vude poun he wutu mí do yọnẹn dọ mí họakuẹ na Jehovah. E dá gbẹtọvi lẹ po nugopipe lọ po nado nọ do jẹhẹnu etọn nkọ lẹ hia. (Jen. 1:27) Gbọnmọ dali, e hẹn mí gbọnvo taun na nudida yinukundomọ he pò lẹ, bo deazọ́nna mí nado nọ penukundo aigba po kanlin lẹ po go.—Salm. 8:4-8.

6. Nudevo tẹwẹ dohia mí dọ gbẹtọvi mapenọ lẹ họakuẹ to nukun Jehovah tọn mẹ?

⁶ Etlẹ yin to ylando Adam tọn godo, Jehovah gbẹ́ nọ yí nukun nujọnu tọn do pọ́n gbẹtọvi lẹ. Mí họakuẹ na ẹn sọmọ bọ e ze Visunnu yiwanna etọn Jesu jo taidi ofligọ de na ylando mítọn lẹ wutu. (1 Joh. 4:9, 10) Gbọn ale he ofligọ lọ hẹnwa lẹ yiyizan dali, Jehovah na fọ́n mẹhe ko kú na ylando Adam tọn wutu lẹ sọnku, yèdọ “dodonọ lẹ po mawadodonọ lẹ po.” (Owalọ 24:15) Ohó etọn dohia dọ mí họakuẹ na ẹn mahopọnna ninọmẹ agbasa tọn kavi akuẹzinzan tọn, kavi owhe he mí tindo.—Owalọ 10:34, 35.

7. Whẹwhinwhẹ́n devo tẹlẹ wẹ devizọnwatọ Jiwheyẹwhe tọn lẹ tindo nado kudeji dọ yé họakuẹ na Jehovah?

⁷ Mí tindo whẹwhinwhẹ́n devo lẹ nado kudeji dọ mí họakuẹ na Jehovah. E ko dọ̀n mí wá ede dè bosọ doayi lehe mí yinuwa do go to whenue mí sè wẹndagbe lọ. (Joh. 6:44) Dile mí jẹ dindọnsẹpọ Jehovah ji, ewọ lọsu dọnsẹpọ mí dogọ. (Jak. 4:8) Jehovah sọ nọ yí whenu susu zan bo nọ dovivẹnu taun nado plọnnu mí, bo nọ gbọnmọ dali dohia dọ mí họakuẹ na emi. Ewọ yọ́n gbẹtọ wunmẹ he mí yin todin podọ omẹ nankọ he mí gán wá lẹzun. E sọ nọ domẹplọnlọ mí go, na e yiwanna mí wutu. (Howh. 3:11, 12) Lehe enẹ yin kunnudenu ayidego tọn de dọ mí họakuẹ na Jehovah do sọ!

8. Nawẹ Salmu lẹ 18:27-29 sọgan yinuwado pọndohlan he mí nọ tindo gando nuhahun mítọn lẹ go ji gbọn?

⁸ Mẹdelẹ nọ pọ́n Ahọlu Davidi hlan di nuvọ́nọ, ṣigba ewọ yọnẹn dọ Jehovah yiwanna emi bosọ nọ nọgodona emi. Enẹ yinyọnẹn gọalọna Davidi nado tindo pọndohlan he sọgbe gando ninọmẹ etọn go. (2 Sam. 16:5-7) Whenue mí jẹflumẹ kavi pehẹ whlepọn lẹ, Jehovah sọgan gọalọna mí nado pọ́n nulẹ hlan to aliho dagbe mẹ bosọ gọalọna mí nado duto aliglọnnamẹnu depope ji. (Hia Salmu lẹ 18:27-29.) Eyin mí tindo godonọnamẹ Jehovah tọn, nudepope ma sọgan glọnalina mí nado sẹ̀n ẹn po ayajẹ po. (Lom. 8:31) Mì gbọ mí ni gbadopọnna ninọmẹ tangan atọ̀n delẹ he mẹ mí dona nọ flin te dọ Jehovah yiwanna mí bọ mí sọ họakuẹ to nukun etọn mẹ.

9. Nawẹ azọ̀n sọgan yinuwado nukun he mí nọ yí do pọ́n míde ji gbọn?

⁹ Azọ̀n sọgan yinuwado mí ji sinsinyẹn to numọtolanmẹ-liho bo hẹn mí lẹndọ mí masọ yọ́n-na-yizan na mẹdepope ba. Winyan sọgan  hù mí whenue mẹdevo lẹ doayi madogán mítọn lẹ go kavi whenue mí dona ganjẹ alọgọ mẹdevo lẹ tọn go. Eyin mẹdevo lẹ ma tlẹ yọnẹn dọ mí to azọ̀n de jẹ, winyan sọgan gbẹ́ nọ hù mí, na nugopipe he mí masọ tindo nado nọ wà nudelẹ ba wutu. To ninọmẹ ayimajai tọn mọnkọ lẹ mẹ, Jehovah nọ jlọ mí dote. Gbọnna?

10. Sọgbe hẹ Howhinwhẹn lẹ 12:25, etẹwẹ sọgan gọalọna mí whenue mí to azọ̀njẹ?

¹⁰ To whenue mí to azọ̀njẹ, “ohó dagbe” de sọgan na mí tuli taun. (Hia Howhinwhẹn lẹ 12:25.) Jehovah ko yí hogbe dagbe lẹ do Biblu mẹ, he nọ flinnu mí dọ mí họakuẹ na ewọ mahopọnna agbasamalo mítọn. (Salm. 31:19; 41:3) Eyin mí nọ hia ohó gbọdo enẹlẹ bosọ nọ vọ́ yé hia, Jehovah na gọalọna mí nado nọavùnte sọta numọtolanmẹ agọ̀ he azọ̀n nọ hẹn mí tindo lẹ.

11. Nawẹ mẹmẹsunnu de mọ alọgọ Jehovah tọn yí gbọn?

¹¹ Lẹnnupọndo numimọ jọja sunnu de he nọ yin Jorge tọn ji. E bẹ azọ̀n sinsinyẹn de he to yinylan deji po awuyiya po, ehe zọ́n bọ e nọ mọ ovọ́ mẹ na ede. Jorge dọmọ: “N’ma ko wleawudai nado pehẹ numọtolanmẹ he azọ̀n ṣie hẹn mi tindo, kavi nado doakọnna winyan he nọ hù mi to whenue mẹdevo lẹ to pinpọn mi na azọ̀n he jẹ n’te wutu. Dile ninọmẹ ṣie to yinylan deji, n’nọ lẹnnupọndo lehe ogbẹ̀ ṣie na wá lẹ́ jẹ ji. N’jẹflumẹ petepete, podọ n’vẹ̀ Jehovah nado gọalọna mi.” Nawẹ Jehovah gọalọna ẹn gbọn? E dọmọ: “Na ayiha ṣie ma nọ jai wutu, yè na mi tuli nado nọ hia adà kleunkleun delẹ sọn owe Salmu lẹ tọn mẹ, he dọhodo lehe Jehovah nọ hò devizọnwatọ etọn lẹ tọn pọ́n do ji. N’nọ vọ́ wefọ enẹlẹ hia egbesọegbesọ, podọ n’mọdọ yé nọ miọnhomẹna mi bo nọ vọ́ jide na mi. Dile ojlẹ to yìyì, mẹlẹ jẹ mimọ ji dọ ayajẹ ṣie jideji. Yé tlẹ dọ dọ pọndohlan dagbe ṣie nọ na emi tuli. N’doayi e  go dọ Jehovah ko na gblọndo na odẹ̀ ṣie lẹ! E ko gọalọna mi nado diọ nukun he n’nọ yí do pọ́n dee. N’jẹ ayiha zedo nuhe Ohó etọn dọ gando nukun he ewọ nọ yí do pọ́n mi mahopọnna agbasamalo ṣie go ji.”

12. Nawẹ a sọgan mọ godonọnamẹ Jehovah tọn gbọn to whenue a to azọ̀njẹ?

¹² Eyin a to azọ̀n de jẹ, kudeji dọ Jehovah yọ́n nuhe pehẹ a te. Biọ to e si nado gọalọna we, na a nido wleawuna pọndohlan dagbe gando ninọmẹ towe go. Enẹgodo, yí Biblu zan nado mọ hogbe dagbe he Jehovah ko wleawu etọn dai na we lẹ. Ze ayiha do wefọ he do obá he mẹ devizọnwatọ Jehovah tọn lẹ họakuẹ na ẹn jẹ hia lẹ ji. Dile a to mọwà, a na mọdọ Jehovah yọ́n na mẹhe to sinsẹ̀n ẹn po nugbonọ-yinyin po lẹpo.—Salm. 84:11.

13. Numọtolanmẹ tẹwẹ tatọ́ whẹndo tọn de sọgan tindo eyin azọ́n gbledo e?

¹³ Tatọ́ whẹndo tọn dopodopo wẹ nọ jlo nado penugo bo mọ dandannu gbẹ̀mẹ tọn lẹ na whẹndo etọn. Ṣigba, mí ni dọ dọ azọ́n gbledo mẹmẹsunnu de dile etlẹ yindọ ewọ ma ṣì nudepope wà. E vánkan nado mọ devo amọ́ e ma pà ẹ. To ninọmẹ enẹlẹ mẹ, e sọgan mọ ede di nuvọ́nọ. Nawẹ ayiha zizedo opagbe Jehovah tọn lẹ ji sọgan gọalọna ẹn gbọn?

14. Whẹwhinwhẹ́n tẹlẹ wutu wẹ Jehovah do nọ de opà etọn lẹ?

¹⁴ Jehovah nọ de opà he e do lẹ janwẹ. (Jọṣ. 21:45; 23:14) E nọ wàmọ, na whẹwhinwhẹ́n susu lẹ wutu. Jẹnukọn whẹ́, e nọ wàmọ nado hẹn yinkọ dagbe etọn dote. Jehovah ko dopà nado penukundo devizọnwatọ nugbonọ etọn lẹ go, podọ e nọ mọdọ dandan wẹ dọ emi ni depà emitọn. (Salm. 31:1-3) Humọ, Jehovah yọnẹn dọ mí na jẹflumẹ sinsinyẹn eyin emi ma penukundo míwu mẹhe yin hagbẹ whẹndo tọn etọn lẹ go. E dopà dọ emi na penukundo mí  go to agbasa-liho, podọ to gbigbọ-liho, bọ nudepope ma gán glọnalina ẹn nado de opà enẹ!—Mat. 6:30-33; 24:45.

15. (a) Avùnnukundiọsọmẹnu tẹwẹ Klistiani owhe kanweko tintan whenu tọn lẹ pehẹ? (b) Jide tẹwẹ Salmu lẹ 37:18, 19 na mí?

¹⁵ Eyin mí flin nuhewutu Jehovah nọ de opà etọn lẹ, mí na dejidego to whenue mí pehẹ nuhahun akuẹ tọn lẹ. Lẹnnupọndo apajlẹ Klistiani owhe kanweko tintan whenu tọn lẹ tọn ji. To whenue homẹkẹn sinsinyẹn de fọ́n sọta agun he tin to Jelusalẹm, “gbọnvona apọsteli lẹ, mẹlẹpo wẹ gbàpe.” (Owalọ 8:1) Yí nukun homẹ tọn do pọ́n nuhe enẹ zẹẹmẹdo. Yé na ko tindo nuhahun akuẹ tọn! Vlavo na Klistiani ehelẹ masọ tindo owhé ba bọ ajọ́ yetọn lẹ sọ jai wutu. Etomọṣo, Jehovah ma jo yé do; podọ yelọsu ma hẹn ayajẹ yetọn bu. (Owalọ 8:4; Heb. 13:5, 6; Jak. 1:2, 3) Jehovah penukundo Klistiani nugbonọ enẹlẹ go, podọ e na penukundo mílọsu go ga.—Hia Salmu lẹ 37:18, 19.

16. Etẹwẹ sọgan hẹn mí lẹndọ sinsẹ̀n-bibasi mítọn ma họakuẹ na Jehovah?

¹⁶ Dile mí to yọnho pò, mí gán jẹ mimọ to míde mẹ ji dọ mí masọ do onú kaka de bo na na Jehovah ba. Numọtolanmẹ mọnkọ lẹ wẹ sọgan ko dotukla Ahọlu Davidi dile agbasa etọn jẹ godo yì ji. (Salm. 71:9) Nawẹ Jehovah sọgan gọalọna mí gbọn?

17. Etẹwẹ mí sọgan plọn sọn numimọ mẹmẹyọnnu de he nọ yin Jheri tọn mẹ?

¹⁷ Lẹnnupọndo apajlẹ mẹmẹyọnnu de tọn ji he nọ yin Jheri. Ewọ yin oylọ-basina nado wá tito azọ́nplọnmẹ nukunpedonugo tọn de to Plitẹnhọ Ahọluduta tọn mẹ, amọ́ e ma jlo na yì. E dọmọ: “N’ko pò bosọ yin asuṣiọsi, podọ n’ma tindo nugopipe depope he Jehovah sọgan  yizan. N’ma vó nude.” To ozán he jẹnukọnna tito azọ́nplọnmẹ tọn lọ mẹ, e hodẹ̀ bo dọ nuhe to ahun ji na ẹn lẹpo na Jehovah. To whenue e jẹ Plitẹnhọ mẹ to wunkẹngbe, e gbẹ́ to nuhà eyin otẹn emitọn to finẹ nugbonugbo. To tito lọ whenu, dopo to hodọtọ lọ lẹ mẹ zinnudeji dọ nugopipe daho hugan he mí tindo wẹ ojlo mítọn nado yin pinplọn gbọn Jehovah dali. Jheri flin dọmọ: “N’dọna dee dọ, ‘yẹnlọsu do nugopipe enẹ!’ N’bẹ avi, na n’mọdọ Jehovah na gblọndo na odẹ̀ ṣie. Ewọ to jide na mi dọ n’tindo nuhọakuẹ de he n’gán na, podọ dọ emi jlo na plọnazọ́n mi!” Jheri flin ojlẹ he wayi enẹ bo dọmọ: “N’yì tito lọ tẹnmẹ po numọtolanmẹ flumẹjijẹ tọn po bosọ mọ dee di nuvọ́nọ. Amọ́ n’lẹkọ po jide po bo mọ tuli yí bosọ mọdọ n’yọ́n-na-yizan!”

18. Nawẹ Biblu dohia gbọn dọ Jehovah gbẹ́ nọ yọ́n pinpẹn sinsẹ̀n-bibasi mítọn tọn eyin agbasa mítọn tlẹ to godo yì?

¹⁸ Dile agbasa mítọn to godo yì, mí sọgan kudeji dọ Jehovah gán gbẹ́ yí mí zan. (Salm. 92:12-15) Jesu plọn mí dọ eyin nugopipe mítọn lẹ tlẹ do dogbó kavi vivẹnudido mítọn lẹ nọ taidi nuhe whè to nukun mítọn mẹ, Jehovah uwọ nọ yọ́n pinpẹn nudepope he mí penugo nado wà to sinsẹ̀nzọn etọn mẹ tọn. (Luku 21:2-4) Enẹwutu, nọ ze ayiha do nuhe a sọgan wà lẹ ji. Di apajlẹ, a sọgan nọ dọho gando Jehovah go, nọ hodẹ̀ na mẹmẹsunnu towe lẹ bosọ nọ na tuli mẹdevo lẹ nado hẹn nugbonọ-yinyin yetọn go. Jehovah nọ pọ́n we hlan di azọ́nwatọ hatọ etọn, e ma yin na nuhe a wadotana lẹ wutu gba, ṣigba na a nọ desọn ojlo mẹ nado setonuna ẹn wutu.—1 Kọl. 3:5-9.

19. Jide tẹwẹ Lomunu lẹ 8:38, 39 na mí?

¹⁹ Lehe mí dopẹ́ do sọ dọ mí nọ sẹ̀n Jehovah, yèdọ Jiwheyẹwhe de he nọ yọ́n pinpẹn mẹhe to sinsẹ̀n ẹn lẹ tọn taun! E dá mí na mí nido nọ wà ojlo etọn, podọ sinsẹ̀n-bibasi nugbo lọ wẹ zọ́n bọ ogbẹ̀ mítọn do dó lẹndai nujọnu tọn de. (Osọ. 4:11) Dile etlẹ yindọ aihọn lọ sọgan nọ pọ́n mí di nuvọ́nọ, Jehovah uwọ nọ yí nukun nujọnu tọn do pọ́n mí. (Heb. 11:16, 38) Eyin azọ̀n, nuhahun akuẹ tọn kavi mẹhowhe tlẹ hẹn mí gbọjọ, mì gbọ mí ni nọ flindọ nudepope ma sọgan klan mí sọn owanyi Otọ́ olọn mẹ tọn mítọn tọn go.—Hia Lomunu lẹ 8:38, 39.