1-2. Anni ira nga situasion i meparubang ta aru nga totolay ni Jehova, anna anni i posible nga efekto natun nira?

IKONSIDERA i tallu nga situasion: Tadday nga brother i kinagianan na doktorna nga egga i grabe nga takina nga sisinu nga mamakkafi nisa. Tadday nga brother nga maturu tu 50 ngana i dagunna i nawanan tu trabahu anna marigi-rigatan nga magaleg tu bagu nga trabahu. Tadday nga matalo nga bako i limitadu ngana laman i makuana ta passerbi kani Jehova.

² Nu kunnatun i situasiommu, baka matageno mu nga awan ngana tu sesserbim. Danatun nga situasion ay makalsa tu pagayayya, daralanna i respetom ta baggi, anna marresulta tu problema ta relasiommu ta tanakuan.

3. Kunnasi imammatan ni Satanas anna danuri nainfluwensianna i totolay?

³ Kagitta ni Satanas, ari nga tagibaloran na totolay ta mundo i inango. Kanayun nga imammatan ni Satanas i totolay nga gittana awan tu serbida. Awan tu allona megafu ta kinagina kani Eva nga mapalubbangan yayya nu laddakanna i dob na Dios, maski nu ammuna mabba nga patay i kastigo na ari pattuppal ta Dios. Kontroladu ni Satanas i komersial, pulitikal, anna relihioso ira nga sistema na mundo. Ari ngana gafu kakkadda-kaddag nga aru nga negosiante, pulitiko, anna lider ira na relihion i mangipasingan tu kawan na respeto ta inango anna dignidad na totolay.

4. Anni i gigiammuattam taw nga artikulo?

⁴ Ngem, kayà ni Jehova nga mammuattam nga nabalor ittam, anna uffunanna ittam nu meparubang ittam ta situasion ira nga makatageno ittam tu kawan tu serbi. (Sal. 136:23, NW; Roma 12:3) Ipakanawag naw nga artikulo nu kunnasi ittam  duffunan ni Jehova ta tumunug ira nga situasion: (1) Nu meparubang ittam ta taki, (2) nu mamroblema ittam ta finansial, anna (3) nu matageno tam nga awan ngana tu balor na serbisiu tam kani Jehova megafu ta pallakay anna pabbako. Ollu, innattam labbi nu ngatta makapakkomfiansa ittam nga egga i balor na kada tadday nittam kani Jehova.

5. Anni i mamakurug nikaw nga nabalor kani Jehova i totolay?

⁵ Maski nu napadday ittam ta gavu na davvun, ararayyu nga mas nabalor ittam anne ta tanga-kamo laman na kamfu. (Gen. 2:7) Innattam i karuan laman nga rason nu ngatta ammu tam nga nabalor ittam kani Jehova. Pinaratuna i totolay nga egga i abilidadda nga parigan i kualidadna ira. (Gen. 1:27) Megafu tatun, kingnguana i totolay nga mas atannang anne ta ngamin nga pinaratuna ta davvun, anna nikargona nittam i davvun tuange ta aya-ayam.​—Sal. 8:4-8.

6. Anni paga i tanakuan nga pamakurug tam nga tagibaloran ni Jehova i imperfekto nga totolay?

⁶ Kabalin nga nattagaruli si Adan, nabalor lagapa kani Jehova i totolay. Kuruga tagibaloranna ittam yayya nga niyawana i iddedduna nga Ana, si Jesus, bilang tavvu ta liwi-liwa tam. (1 Juan 4:9, 10) Gukaban na pangiyaplika ta benefisio ira na tavvu, danuri natay megafu ta liwa ni Adan ay paginnolayan noka ni Jehova, ‘parehu i matunung anna ari matunung.’ (King. 24:15, NW ) Ipasingan na Uvovugna nga egga lagapa i serbi tam nisa maski nu mattaki ittam, maski nu anni situasiottam ta finansial, onu maski magedad tam ngana.​—King. 10:34, 35.

7. Anni paga i tanakuan ira nga rason tapenu mangurug i aripan ira na Dios nga tagibaloran ira ni Jehova?

⁷ Egga paga ira rason nu ngatta mangurug ittam nga tagibaloran ittam ni Jehova. Nipamavulunna nga makaranni ittam nisa anna nasinganna i pinangalawa tam ta mapia nga dumug. (Juan 6:44) Durante nga mapeggan ittam tu madukko nga pakikkofun kani Jehova, mas maddukko yayya nittam. (Sant. 4:8) Egga paga i tiempo ni Jehova nga tudduan ittam anna mappursigi yayya tapenu ipasingan nga nabalor ittam nisa. Ammuna i kata-katoletam ta maddaggun anna ammuna nu kunnasi ittam mabbalin tu mas mapia. Disiplinanna paga ittam megafu ta ayatanna ittam. (Prov. 3:11, 12) Kuruga napakaru i ebidensia nga nabala-balor ittam kani Jehova!

8. Kunnasi tam nakuan imammatan i problema ira segun ta Salmo 18:27-29?

⁸ Nibilang na karuan nga awan tu serbi ni Patul David, ngem ammuna nga ayatan anna suportan yayya ni Jehova. Gafu ta ammu yatun ni David, nakoffun yatun nisa nga attamman i situasionna durante nga positibo i pagimammana tatun. (2 Sam. 16:5-7) Nu maraddam ittam onu meparubang ta problema ira, ipamamma nittam ni Jehova i ganna-gannug segun ta pagimammana anna duffunanna ittam nga malampasan i maski anni nga problema. (Bibbigan i Salmo 18:27-29.) Nu suportadu ittam ni Jehova, awan tu maski anni nga mamagimmang nittam ta sigga-pagayayya nga passerbi tam nisa. (Roma 8:31) Ikonsidera tam ngana i tallu nga espesipiko nga situasion nu sitaw mas nga kawagattam nga daddamman nga ayatan anna tagibaloran ittam ni Jehova.

9. Kunnasi afektan na taki i pagimamma tam ta baggi tam?

⁹ Pakkafian na pattaki i emosiottam, adde ta makatageno ittam nga awan ngana tu sesserbi tam ta maski sinni. Baka mappasiran  ittam nu masingan na tanakuan i limitasiottam ira onu nu nakadepende ittam ta uffun na tanakuan. Maski paga nu ari ammu na tanakuan nga mataki ittam, baka mappasiran ittam lagapa megafu ta ariattam ngana nga makua i gannug ira nga makua tam dati. Ta kunnatun ira nga makaparaddam nga situasion, pagaramman ittam ni Jehova. Kunnasi?

10. Segun ta Proverbio 12:25, anni i makoffun nittam nu mataki ittam?

¹⁰ Nu mataki ittam, makapagaram nittam “i mapia nga uvovug.” (Bibbigan i Proverbio 12:25.) Ta Biblia, aru i nipappan ni Jehova nga mangiperaddam nittam nga egga lagapa i serbi tam maski nu mataki ittam. (Sal. 31:19; 41:3) Kada bibbigattam anna kada toliattam nga bibbigan danatun nga nainspiran ira nga uvovug, duffunan ittam ni Jehova nga arubangan i negatibo ira nga emosiottam gafu ta taki tam.

11. Kunnasi nalawa na tadday nga brother i uffun ni Jehova?

¹¹ Ikonsidera i ekspiriensa ni Jorge. Tadday nga kabataan si Jorge nga nakala tu mamakkafi nga taki nga mabi nga maggrabe, yatutta ta panagenona awan tu kuentana. “Ari ngà preparadu nu anni i matageno ku megafu ta taki ku onu ta pasirakku megafu ta inninnannà na totolay,” kunni Jorge. “Durante nga maggrabe i taki ku, nononopakku i panguli na pattolè. Talaga maraddam ngà, anna nakimemallo ngà ta uffun ni Jehova.” Kunnasi yayya zinuffunan ni Jehova? “Megafu ta ariakku kuruga makapaffokus, mabbibbig ngà tu piga nga teksto ta libru nga Salmo Ira nga mangipasingan nga ikavurungan ni Jehova i aripanna ira. Tottoliakku nga bibbigan danatun nga teksto kada aggaw, anna nabanna-bannayan ngà tatun. Tapus, mao-obserba na tanakuan nga mas gumala-galo ngà ngana. Kagiadda paga lagu nga napagaram ira ta positibo nga pagimamma  ku. Natageno ku nga sinabbag ni Jehova i pakimallo ku! Zinuffunannà nga ulian i pagimamma ku ta baggì. Naffokus ngà ngana ta kagian na Uvovugna nu anni i pagimammana niakan maski egga taki ku.”

12. Nu magattattam ka ta taki, anni i kuammu tapenu malawa mu i uffun ni Jehova?

¹² Nu magattattam ka ta taki, makasiguradu ka nga ammu ni Jehova i pappasa-pasammu. Makimemallo nisa tapenu uffunan naka nga mapeggan tu fustu nga pagimamma ta situasiommu. Tapus magaleg tu makapabannay ira nga mensahe ta Biblia nga nipay ni Jehova tari para nikaw. Maffokus ta teksto ira nga mangipasingan nu kunnasi nga tagibaloran ni Jehova i aripanna ira. Durante nga kuammu yatun, masingammu i kinapia ni Jehova ta ngamin nga matalo nga masserbi nisa.​—Sal. 84:11.

13. Anni i matageno na ulu na familia nu nawanan yayya tu trabahu?

¹³ Kayà na kada ulu na familia nga meyawana i pakawagan ira na familiana. Kunnasi nu maski awan tu marake nga kingngua na tadday nga brother, ngem nawanan yayya tu trabahu? Tapus namippiga ngana yayya nagaleg tu trabahu ngem awan lagapa tu maleganna. Nu kunnatun, baka matagenona nga awan tu serbina. Kunnasi makoffun nisa i paffokus ta promesa ira ni Jehova?

14. Anni ira i rason nu ngatta tuppalan ni Jehova i promesana ira?

¹⁴ Kanayun nga tuppalan ni Jehova i promesana ira. (Jos. 21:45; 23:14) Aru i rason tapenu kuanna yatun. Ollu, megafu ta makafekto yatun ta makasta nga ngagan onu reputasionna. Nipromesa ni Jehova nga tangngallanna i matalo ira nga aripanna, anna obligadu yayya nga tuppalan yatun nga  promesa. (Sal. 31:1-3) Kunne na paga, ammu ni Jehova nga marraddam ittam nu arianna tangngallan danuri parte na familiana. Nipromesana nga iyawana i pakawagattam ta material anna ta espiritual, anna awan vuluvuga tu makefugag nisa ta pattuppalna tatun nga promesa!​—Mat. 6:30-33; 24:45.

15. (a) Anni nga problema i neparubang ta ollu-siglo ira nga Cristiano? (b) Segun ta Salmo 37:18, 19, ta anni ittam makasiguradu?

¹⁵ Nu daddammattam nu ngatta tuppalan ni Jehova i promesana ira, makapakkomfiansa ittam ta uffunna maski nu mamroblema ittam ta finansial. Ikonsidera i nesimmu tagga ta ollu-siglo ira nga Cristiano. Tagga ta neparubang ta nepallo nga kadara-darum i kongregasion ta Jerusalem, “ngamin i mangurug fuera laman ta apostol ira ay nawwara-wara.” (King. 8:1) Anni i resulta natun? Problema ta finansial! Posible nga nawawan na Cristiano ira i babaleda anna i pagalegan onu negosioda ira. Ngem, ari ira nga pinagurayan ni Jehova; onu nawawan i pagayayyada. (King. 8:4; Heb. 13:5, 6; Sant. 1:2, 3) Sinuportan ni Jehova danatun nga matalo nga Cristiano, anna suportanna gapa ittam.​—Bibbigan i Salmo 37:18, 19.

16. Anni i posible nga mangipanono nittam nga awan tu balor na passerbi tam kani Jehova?

¹⁶ Durante nga magedad ittam, baka matageno tam nga baddi ngana laman i meyawa tam kani Jehova. Awayyana nga kunnatun gapa i pakavurungan ni Patul David turi ta mallakay ngana yayya. (Sal. 71:9) Kunnasi ittam duffunan ni Jehova?

17. Anni i magigiammu tam ta ekspiriensa ni sister Jheri?

¹⁷ Ikonsidera i ekspiriensa ni sister Jheri. Naimbita yayya nga magatende ta miting na maintenance training ta Kingdom Hall, ngem manakina i umay. Kunna: “Bako ngà ngana,  balu, anna awan tu ammù tu maski anni nga meyuffukku ta maintenance. Awan tu serbì.” Ta gabi nige na training, nivuvvuna i futuna kani Jehova ta pakimallo. Ta paddattalna ta Kingdom Hall ta kinommananna, nononopanna paga nu mepangngo nga umay yayya tari. Ta training, nipasigo na tadday nga ispiker nga i pinaka-importante nga skill tam ay i pabbalittam nga sigga-paran nga tudduan ni Jehova. Meraddamman ni Jheri: “Nanono ku, ‘egga nio yatun nga skill!’ Siminangi ngà gafu ta natageno ku nga tattabbagan ni Jehova i pakimallo ku. Nipasiguraduna niakan nga egga i nabalor niakan nga puedè nga meyawa anna sigga-paran yayya nga manuddu niakan!” Nu nonopakku i nappasa, kunni Jheri: “Minay ngà tatun nga training nga mavurung, makafi i nono ku, anna maraddam. Ngem ta pallabbe ku, egga ngana i komfiansà, napasikan ngà, anna matageno ku nga egga ngana i serbì!”

18. Kunnasi ipasingan na Biblia nga tagibaloran ittam lagapa ni Jehova maski nu mammanakam ittam ngana?

¹⁸ Durante nga mammanakam ittam, makasiguradu ittam nga egga lagapa i ipatrabahu ni Jehova nittam. (Sal. 92:12-15) Nituddu ni Jesus nittam nga maski nu limitadu ngana i abilidad tam onu gittana baddi ngana laman i makua tam, tagibaloran lagapa ni Jehova i maski anni nga makua tam ta passerbi nisa. (Luc. 21:2-4) Yari tu maffokus ka ta makuam. Angngariganna, awayyam ipakiyuvovug i meyannung kani Jehova, ipakimallo i wawwaragi, anna pagaramman i tanakuan nga mattalupaddian nga matalo. Ibilang naka ni Jehova nga katrabahuna, ari nga megafu ta metuppal mu, nu ari megafu ta sigga-paran nga pamarulo mu nisa.​—1 Cor. 3:5-9.

19. Anni i ipasiguradu nittam na Roma 8:38, 39?

¹⁹ Dakal i appabalo tam nga si Jehova i dayawattam, i Dios nga talaga mattagibalor ta masserbi ira nisa! Pinaratuna ittam nga kuan i urena, anna i kurug nga paddayaw i talaga nga mamagayayya ta pattoletam. (Nep. 4:11) Maski paga nu imammatan ittam na mundo nga awan tu serbi tam, ari tu kunnatun i pagimamma ni Jehova nittam. (Heb. 11:16, 38) Nu maraddam ittam gafu ta taki, problema ta finansial, onu pabbako onu pallakay, daddammattam nga awan tu maski anni nga mangigungay nittam ta aya tam ta nelangitan nga Yama tam.​—Bibbigan i Roma 8:38, 39.