1-2. (a) Ụma nya iwe-ahụrụ ịlanyị à tịị chị angịnyị nya Ohe Oluhye ọgụ? (b) Ẹlịyẹ ọọwa à tị́ ka họ ẹ-ẹga nyaa myị́?

KỤ IRYA u-uhye nya ẹla ị-chụ pwokwita ịta ịlẹ wẹẹ: Ọngọ họ utoji ya ju ọọnahị okolobya ọhẹ nyori nyị la ẹdụrụ ọnyọọngịrị ọlẹ kọ ka chọ́ọ ịnyịrọ pyẹpyẹ nyịlẹhị-ịlẹhị. Ị ku ọọnahị ọlẹng ọkịla ọlẹ kọọ jụ ụkụrwọ họ yẹẹyẹẹ, kọ tị kpoye nya ẹka iwo ịrụ lẹ hi ụkụrwọ nyamwụ. Nanana nyori, ọ maga nyịlẹhị-ịlẹhị nyọka ye ụkụrwọ ọkịla, ọ́ chịkpẹẹ myị́ ka. Ọọnahị ọnyang ọkịla ọlẹ kọ ri ọngọgbahị yẹẹyẹẹ lẹ, á jẹ́ họ ụkụrwọ nya iJihova myị́ jaabwọ kọ kaa jụ́ họ ene-ene kaka.

² Kori ká la akama ụma ịlịịwẹ, à ka me irya nyori ọwa nyị́ ju apyobwuna kaka myị́. Iwe-ahụrụ ịlịịwẹ ka jẹ́-ẹ nung ọkẹkẹnị nyang, họ ká ka lịlọng ka bala o-ju ọmwụ nya akama ẹ-ẹga nyang bala angịkịla myị́.

3. Irya ọlányị Olegu Onyobyi bala angịlẹ kịị bọ́ọ jẹ, à tị́ la u-uhye nya ọhịhị nya angịnyị ehe?

³ Odehe ọlẹ á yẹ ọhịhị nya ọngịnyị ehe lala ang o-ju apyobwuna ka jaabwọ ká Olegu Onyobyi la ịnyịnyị. Olegu Onyobyi kaa họ ẹla ẹ-ẹga nya angịnyị ehe lala o-ri nyị́ ju apyobwuna ọlẹlẹhẹ ka. Ọ byẹjẹ-byẹjẹ byi Iivu nyori nyị ka lịlọmwụ kori kọ ju ihi nya Ohe Oluhye ka, nanana nyọlẹ kọ jẹ́ myị̀myị̀ nyori ocheju nyamwụ ka ri igu ogbugbu. Ẹla nya upe nya odehe ọlẹ, ọhị ọdada bala ịgba ọgbagba nya ịnịịkịla wuu juwa e-ekpeleji nya Olegu Onyobyi. Lẹ, ọ́ la ẹbyẹbyị nyọlẹ ká alọhị, alupe bala alegbeju ị-bịrị ẹla nya Ohe Oluhye kaa chị ihi ju ọhịhị nya angịnyị ehe bala ọ-kpa angịkịla i-irya ka lẹ ka.

4. Ahị tị́ ka ya ẹla u-uhye nya ẹlịyẹ a-ang ọjẹ́jẹ ọlẹ?

⁴ IJihova á tị lịnyị ka. Ọ tịtọ kahị ka jẹ́ nyori ahị ju apyobwuna, ọ tị kaa dahị ụbwọ ụka kahị juwa ẹ-ẹpwụ nya iwe-ahụrụ ịlẹ kị ka chị́ịhị olegu pyẹpyẹ. (Eje. 136:23; Rom. 12:3) Ang ọjẹ́jẹ ọlẹ ka ya ẹla u-uhye nya abwọlẹ ká iJihova kaa bwu dahị ụbwọ  ẹ-ẹpwụ nya iwe-ahụrụ ịlẹ: (1) Ụka kahị jụ́ ẹdụrụ, (2) ụka kahị juwa yẹ ẹbyahị, bala (3) ụka kahị me nyori áhị ka jẹ́-ẹ họ ang ọlam-ọlam ọhẹ ha iJihova kaka ọọlajị nya ọngọgbahị oriri. Ahị ka dọmwụ bwula ọ-jẹ́ ang u-uhye nya ang odudu kahị ka la ahị ọdahile nyori, ọngọngọọngụ nyahị ju apyobwuna ha iJihova.

5. Ẹlịyẹ à tị́ mẹjẹ́ng nyori angịnyị ehe ju apyobwuna ha iJihova?

⁵ Nanana nyori Ohe Oluhye họhị la ọpyị, ọ́ yẹhị lala o-ri ahị nyị́ ju apyobwuna ka lẹ ka. Ahị ju apyobwuna họọ yẹẹyẹẹ. (Ọmwụ. 2:7) Kụ ẹhị yẹ ang ịhyẹ ịlẹ kị dudu kahị jẹ́ nyori ahị ju apyobwuna ha iJihova wẹẹ. Ọ họ angịnyị ehe ụ-ụgbẹyị ọlẹ kị ka jẹ́-ẹ gbịla abwụma nyamwụ. (Ọmwụ. 1:27) Ọọwa dudu ká angịnyị ehe há gụ́ ang ịkịla ịlẹ kọ họ odehe ọlẹ wuu. O huuhi ri olegbeju nya odehe bala iyo ịlẹpwụ nyamwụ wuu.—Eje. 8:4-8.

6. Ẹla ọkịla oyina à tị́ mẹjẹ́ẹhị nyori angịnyị ehe ịlẹ kị la kpẹẹkpẹẹ ka ju apyobwuna ha iJihova?

⁶ Nyọlẹ ká Adam dọmwụ họ ọhọbịrị kpá lẹ, iJihova á yẹ angịnyị ehe lala o-ri nyị́ ju apyobwuna họwa kaka lẹ ka. Ahị ju apyobwuna họọ yẹẹyẹẹ gbee kọọ hu iJisọsị, ọnyẹwẹ nyamwụ du warị kaka kiliya chajị nyahị, kahị ka la ọ-gba kpehe bwu ẹpwụ nya ọhọbịrị. (1 Jọn. 4:9, 10) Bwula iya ọkịlaakịla ọwẹ, iJihova ka wule angịlẹ kị gbu ọọlajị nya ọhọbịrị nya Adam eji bwula igu, “tụ alabwẹla ọnyịịla bala alabwẹla onyobyi ịnyịnyị.” (Ụkụr. 24:15) Omyi ẹla nyamwụ mẹjẹ nyori ahị ju apyobwuna họọ yẹẹyẹẹ kori kahị dọmwụ jụ́ ẹdụrụ, yẹ ẹbyahị lee o-ri ọngọgbahị wẹwẹ.—Ụkụr. 10:34, 35.

7. Ẹla ịkịla iyina à tị́ du ká anchẹ nya iJihova myị nyori ị ju apyobwuna họọ?

⁷ Ẹla ịkịla myị́myị́ du kahị myị nyori ahị ju apyobwuna ha iJihova. Ọ tụ́ụhị bịlọmwụ bala ọ-yẹ abwọlẹ kahị họ ẹ-ẹga nya ẹrụ ọnyịịla ọlẹ kị ya juhi. (Jọn. 6:44) Jaabwọ kahị dọmwụ nyọka tụ́ ju iJihova chwẹẹ, ịnyịnyị ọ tụ́ ịlọmwụ juhi chwẹẹ gụ ọwọwa lẹ. (Jem. 4:8) IJihova kaa kpa ụka bala ọngịrị nyamwụ mẹ ang jẹ́ẹhị ịnyịnyị, mẹjẹ nyori ahị ju apyobwuna họọ. Ọ jẹ́ ụma nya ọngịnyị ọlẹ kahị ri lẹẹlẹẹ bala abwọlẹ kahị ka jẹ́-ẹ nwụ họ ị-ịlahị wẹẹ. Ọ myị́myị́ kaa yalibyi lahị chajị ahị họ́ọ. (Etu 3:11, 12) Ang ẹjẹ́ẹ ịkpọnchị ịwẹ mẹjẹ nyori ahị ju apyobwuna ha iJihova ịnyịlẹhị!

8. Ányị ẹla ọlụpwụ nya Eje Ọnyịịla 18:27-29 à tị́ ka gu irya ọlẹ kahị kaa la u-uhye nya akama nyahị myị́?

⁸ Angịhyẹ yẹ Adịrahụ iDevidi lala ọngọ ju apyobwuna ka, ọwa lịlọmwụ jẹ́ nyori iJihova la ọháha ẹ-ẹga nyamwụ bala ọ-kaa dọọ ụbwọ. Ọọwa da iDevidi ụbwọ nyọka bọhụ ụ-ụgbẹyị ọlẹ kọ pwoku, ẹ-ẹpwụ nya iwe-ahụrụ ọlẹ kọ chịpwụrụ bwu. (2 Sam. 16:5-7) Ụka ká ọkịlẹtụ á kpụhị enyi lee ahị juwa ẹ-ẹpwụ nya akama ọhẹ, iJihova ka jẹ́-ẹ dahị ụbwọ nyọka la irya ọkpakpa u-uhye nya iwe-ahụrụ ọọwa bala ọ-dahị ụbwọ kụrụ ịngịngịhyẹ ọlẹ kọ ka chihi ochùchúù. (Wa Eje Ọnyịịla 18:27-29.) Ụka ká iJihova á ji ẹkpẹ nyahị lẹ, ịngịngịhyẹ á ka jẹ́-ẹ huhi abwọ la ọ-gbịgba họọ la ọkẹkẹnị kaka. (Rom. 8:31) Lẹẹlẹẹ, ahị kụ ẹhị yẹ iwe-ahụrụ ịta ịhyẹ kpangga ịlẹ kahị baba nyọka kpịtịya nyori ahị há iJihova bala o-ju apyobwuna họọ yẹẹyẹẹ wẹẹ.

9. Ányị ẹdụrụ à tị́ ka bwu gu abwọlẹ kahị kaa yẹ ịlọhị myị́?

⁹ Ẹdụrụ kaa guhi o-olegu yẹẹyẹẹ bala ọ-họ kahị ka me irya nyori áhị ju apyobwuna ha ọngọngọhẹ kaka. Ahị ka lịlọhị oyoyi ụka kahị yẹ nyori angịkịla jẹ́ iwe-ahụrụ nyahị bala ụka kahị baba nya ụbwọ ọdada nyaa myị́. Kori ká angịkịla á dọmwụ jẹ́ nyori ahị jụ́ ẹdụrụ ka wẹwẹ, áhị ka myị́myị́ juwa lịlọhị oyoyi chajị ahị ka jẹ́-ẹ họ ang ịhyẹ ịlẹ kahị kaa họ ene-ene kaka. Ụka olujwo ọlịịwẹ, iJihova kaa juhi ọhụ. Ányị ọ tịị bwu họ ịnyị?

10. Ẹlịyẹ à tị́ ka jẹ́-ẹ dahị ụbwọ ụka kahị jụ́ ẹdụrụ, ká ụpwụ nya Etu 12:25 ya?

 ¹⁰ Ụka kahị jụ́ ẹdụrụ, omyi ẹla ọnyịịla ka jẹ́-ẹ juhi ọhụ. (Wa Etu 12:25.) IJihova ya ẹla ịnyịịla ịlịnyị lụmẹ-lụmẹ ẹ-ẹpwụ nya ịBayịbụụ, ịlẹ kị ka kpụhị ịtịya nyori ahị ju apyobwuna họọ kori kahị dọmwụ jụ́ ẹdụrụ wẹwẹ. (Eje. 31:19; 41:3) Kori kahị wa Ụpwụ Ịgọgọ bala ọ-dọmwụ mọọ wa ugbabwọ ịmányị tị́, iJihova ka dahị ụbwọ kụrụ uko ọchịchị ịlẹ kahị la ọọlaji nya ẹdụrụ.

11. Ányị ọọnahị ọhẹ à tị́ bwu ye ụbwọ ọdada bwu ẹga nya iJihova?

¹¹ Kụ ẹhị yẹ oja nya Jorge wẹẹ. Ụka ọlẹ kọ ri okolobya, ọ jụ́ ẹdụrụ ọhẹ ọlẹ kọ pyẹ ị-ịnyịrọ nyamwụ ahyahị. Ẹdụrụ ọọwa du kọ me nyori ọwa nyị́ ju apyobwuna kaka. Jorge yẹkẹẹ: “Ḿ yahị me nyori ẹdụrụ nyam ka họ m ka lịlọm ịịwẹ lee ọ lịlọm oyoyi ọọlajị nyọlẹ ká angịnyị kaa yahị gurum ka. Jaabwọ ká ẹdụrụ nyam juwa tịpyọ gụ ọwọwa, m̀ kaa kụ irya u-uhye nya abwọlẹ ká ọhịhị nyam ka bwu yẹda. Ọkịlẹtụ kpụm enyi nyịlẹhị-ịlẹhị, lẹ m̀ bịlẹ iJihova kọ ka dam ụbwọ.” Ányị iJihova à tị́ bwu dọọ ụbwọ? “Nyọlẹ kọ lujwo ham nyọka ya irya nọ ẹga ookpokpo wẹẹ, m̀ kaa wa ọgba ịmányị-ịmányị bwu ụpwụ nya Eje Ọnyịịla ịlẹ kị mẹjẹ nyori iJihova kaa kpahị ju anchẹ nyamwụ. M̀ kaa maa wa ẹnụ myị́ ẹnụ, ị tị kaa kpụ́m ẹjẹ bala ọ-jụm ọhụ ịnyịnyị. Nyọlẹ kọ nọ pyịnyẹng, angịkịla dọmwụ nyọka yẹ nyori, m̀ kaa chị ụmwẹhụ gụ́ olene-ene. Ị myị́myị́ ya nyori ọkẹkẹnị ọchịchị nyam nyị ju ịwa ọhụ. M̀ wẹ ka jẹ́ nyori iJihova wẹ abwọ ọrịrị nyam ịnyịlẹhị. Ọ dam ụbwọ nyọka yẹda ẹ-ẹga nya abwọlẹ kam kaa bwu yẹ ịlọm. M̀ dọmwụ nyọka ya irya nyam wuu nọ u-uhye nya ẹla ọlẹ ká Omyi Ẹla nyamwụ ya u-uhye nya abwọlẹ kọ yẹm, nanana nyori m̀ jụ́ ẹdụrụ.”

12. Kori ká jụ́ ẹdụrụ ọhẹ, ịyẹ a tị́ ka họ nyọka ye ụbwọ ọdada bwu ẹga nya iJihova?

¹² Kori ká jụ́ ẹdụrụ ọhẹ juwa lẹẹlẹẹ, à ka jẹ́-ẹ  la ahị ọdahile nyori iJihova jẹ́ iwe-ahụrụ ọlẹ ká wẹẹ chịpwụrụ bwu. Raabwọ bịlọọ kọ ka dang ụbwọ la irya ọkpakpa u-uhye nya iwe-ahụrụ nyang, ká mwahị nya omyi ẹla ịnyịịla ịlẹpwụ nya ịBayịbụụ ịlẹ ká iJihova ya juwa chajị nyang. Ya irya nyang wuu nọ u-uhye nya ịgba ịlẹ kị mẹjẹ jaabwọ ká anchẹ nya iJihova ju apyobwuna họọ kaka ba. Jaabwọ ká wẹẹ họ ịnyị, à ka yẹ nyori iJihova kaa họ ọnahị ẹ-ẹga nya angịlẹ kịị gbịgba họọ la ọkịlẹtụ nyaa wuu.—Eje. 84:11.

13. Ányị ọ tị́ ka la olegbeju nya ugbiyegu myị́, kori kị kwoo hi ụkụrwọ?

¹³ Olegbeju nya ugbiyegu ọnyị myị́ ọnyị kaa tịtọ kọ ka jẹ́-ẹ họ ịbaba nya alugbiyegu nyamwụ. Ma, ọ tị chịkpẹẹ kị ka ku ọọnahị ọhẹ hi ụkụrwọ nyamwụ la ọ-họ ẹlẹlẹhẹ ọtịpyọ ka myị́. Ọ ka maga nyịlẹhị-ịlẹhị nyọka ye ụkụrwọ ọkịla, ọ́ tị ka ye ka myị́. Iwe-ahụrụ ọlịịwẹ ka jẹ́-ẹ chị́ ọọnahị olegu pyẹpyẹ. Ányị ọ-ya irya nọ u-uhye nya ọnụ ọmyịmyị nya iJihova à tị́ ka bwu dọọ ụbwọ?

14. Ịyẹ tị́ du ká iJihova kaa họ ọnụ ọmyịmyị nyamwụ jịra?

¹⁴ IJihova kaa họ ọnụ ọmyịmyị nyamwụ jịra. (Joch. 21:45; 23:14) Ang lụmẹ-lụmẹ du kọ kaa họ ịnyị. Ọhọhẹ-họhẹ ri, ọ gu ẹnyị ọnyịịla nyamwụ. IJihova myị ọnụ nyọka kpẹhị rịrị anchẹ nyamwụ ịlẹ kị godayị giri-giri. Ọ tị́ yọọ lala ụkụrwọ nyamwụ nyọka họ ọnụ ọmyịmyị ọwẹ jịra. (Eje. 31:1-3) IJihova myịmyị jẹ́ nyori, ọkịlẹtụ ka kpụhị enyi kori kọ kpahị ju angịlẹ kị ri alugbiyegu nyamwụ ka. Ọ myị ọnụ nyọka yẹ ang ịlẹ kahị baba nyọka kịnyaa juwa hịhị bala ọ-ka kịnyaa juwa gbịgba họọ hahị. Ịngịngịhyẹ á ka jẹ́-ẹ woo kpa la ọ-họ ọnụ ọmyịmyị nyamwụ ọọwa jịra ka!—Mat. 6:30-33; 24:45.

15. (a) Akama oyina à tị́ chị Angịnyị nya ịKịrayịsị iloyi ọhọhẹ ọgụ? (b) Ahị ọdahile oyina ụpwụ nya Eje Ọnyịịla 37:18, 19 à tị́ ya hahị?

¹⁵ Kori kahị kpịtịya nya ang odudu ọlẹ ká  iJihova kaa họ ọnụ ọmyịmyị nyamwụ jịra aalẹ, ahị ka la ahị ọdahile nyori ọ ka dahị ụbwọ ụka kahị juwa ẹ-ẹpwụ nya ẹbyahị. Kụ ẹhị yẹ oja nya Angịnyị nya ịKịrayịsị iloyi ọhọhẹ wẹẹ. Ụka ọlẹ ká ọtụpyịpyị ọtụka-ọtụka kpeji jahị da ọjịra-jịra ọla iJerusalẹm, ‘angịnyị nya Ohe Oluhye nyi epepe hi awụlẹ wuu, kẹnẹ-kẹnẹ ka hi alẹrụ ọnyịịla.’ (Ụkụr. 8:1) Kụ irya nya iwe-ahụrụ ọlẹ kị ka ji lụka ọwẹ wẹẹ. Ẹbyahị ọtụka-ọtụka! Ọ chịkpẹẹ myị́ nyori angịnyị nya ịKịrayịsị ịwẹ rụ hi ẹpwa bala ụkụrwọ lee ọhị́ nyaa. IJihova á tị tụụbwọ hyaa ka, ọkẹkẹnị nyaa ịwa á tị gwaa byi ka ịnyịnyị. (Ụkụr. 8:4; Hib. 13:5, 6; Jem. 1:2, 3) IJihova da angịnyị nyamwụ ịwẹ ụbwọ nyọlẹ kị godayị giri-giri họọ, ọ tị ka dahị ụbwọ ịnyịnyị.—Wa Eje Ọnyịịla 37:18, 19.

16. Ịyẹ tị́ ka du kahị ka kụ irya myị́ nyori ịgba ọgbagba nyahị á ju apyobwuna ha iJihova ka?

¹⁶ Jaabwọ kahị wẹẹ ri ọngọgbahị gụ ọwọwa, ọ ka lahị lala o-ri ahị nyị́ ka jẹ́-ẹ họ ang lụmẹ ha iJihova kaka. Ọ chịkpẹẹ myị́ nyori Adịrahụ iDevidi la uko ọchịchị ụma ọlịịwẹ jaabwọ kọ juwa ri ọngọgbahị gụ olene-ene. (Eje. 71:9) Ányị iJihova à tị́ ka bwu dahị ụbwọ?

17. Ẹlịyẹ ahị tị́ ka jẹ́ bwu oja nya ọọnahị ọnyang ọlẹ ká ẹnyị nyamwụ ri Jheri?

¹⁷ Kụ ẹhị yẹ oja nya ọọnahị ọnyang ọhẹ ká ẹnyị nyamwụ ri Jheri wẹẹ. Ị wụrọọ wẹ ọtụguru ọhẹ u-Ube nya Ịpyị-Adịrahụ, u-uhye nya abwọlẹ kị ka bwu kpahị ju ẹga ị-kpa gbịgba, ọ́ tị tịtọ nyọka ka ka. O yẹkẹẹ: “M̀ ri ọngọgbahị bala o-ri ahụ-ogu lẹ. Ḿ jẹ́ ịngịhyẹ ọlẹ ḿ ka jẹ́-ẹ họ ẹ-ẹga nya ụkụrwọ ọwẹ ka. Ḿ ju apyobwuna ọhẹ kaka.” Lodu ọlẹ kọ chịpwụrụ ene nya ọtụguru ọwẹ, ọ raabwọ bwu ọkịlẹtụ nyamwụ wuu ha iJihova. Nyọlẹ kọ pwụ Ube nya Ịpyị-Adịrahụ la ahyẹẹnụ ọ-ba ọọwa ba, o juwa  kụ irya kori kọ chịla kọ ka wẹ ọtụguru ọwẹ. Ọngọhẹ lẹpwụ nya angịlẹ kị ya ẹla dodehe ọ-ọtụguru ọwẹ ya nyori, ang ọlẹ kọ baba gụgụ wuu bwu ẹga nyahị nyị ri ọ-ka ya ẹga da ká iJihova ka mẹ ang jẹ́ẹhị. Jheri kpịtịya yẹkẹẹ: “M̀ kụ irya nyori, ‘M̀ ka jẹ́-ẹ họ ịnyị myị́!’ M̀ dọmwụ nyọka nyị egbejida nyọlẹ kam yẹ nyori iJihova à wẹẹ wẹ abwọ ọrịrị nyam lẹ. Ọ ya ahị ọdahile ham nyori, m̀ la ang o-ju apyobwuna ka họ wẹẹ, ọ tị nwụlanọ nyọka mẹ ang jẹ́m ịnyịnyị!” Ụka ọlẹ ká Jheri kụ irya ka ẹkpẹ, o yẹkẹẹ: “M̀ ka ọtụguru ọwẹ la uhi ojuju, uko ọchịchị bala ọkịlẹtụ ọ-kpụ enyi. M̀ tị nyà bwu ụwa la ahị ọdahile, ọhụ ojuju bala ọ-yẹ ịlọm nyori m̀ ju apyobwuna wẹẹ!”

18. Ányị ịBayịbụụ à tị́ mẹjẹ nyori ịgba ọgbagba nyahị ju apyobwuna ha iJihova, jaabwọ kahị wẹẹ ri ọngọgbahị?

¹⁸ Jaabwọ kahị wẹẹ ri ọngọgbahị gụ ọwọwa, ahị ka jẹ́-ẹ la ahị ọdahile nyori iJihova ka kpahị họ ụkụrwọ myị́ wẹẹ. (Eje. 92:12-15) IJisọsị mẹjẹ́ẹhị nyori, jaabwọ myị́ abwọ ká ọngịrị nyahị á la pyịnyẹng kaka ba lee kori ká ang ọlẹ kahị jụ́ họ á byịhị ẹhị wẹwẹ, iJihova yọọ lala ang o-ju apyobwuna yẹẹyẹẹ. (Luk. 21:2-4) Lẹ, ya irya nyang nọ u-uhye nya ang ọlẹ á ka jụ́ họ myị́. Ọ-chụ pwokwita, à ka jẹ́-ẹ ya ẹla u-uhye nya iJihova, raabwọ chajị nya aanang ịkịla bala o-ju angịkịla ọhụ nyọka godayị giri-giri myị́. IJihova á yẹhị lala alụkụrwọ ị-dọọ ụbwọ lee angị họ ụkụrwọ balọọ chajị nya ang ọlẹ kahị wẹẹ jụ́ họ ka, ma ọọlajị nya ihi ojuju bwu ọkịlẹtụ nyahị ịnyị.—1 Kọr. 3:5-9.

19. Ahị ọ-dahile oyina ụpwụ nya Ala iRom 8:38, 39 à tị́ ya hahị?

¹⁹ Ọ kpụhị ịpyọ lụmẹ nyọka gbịgba ha iJihova, Ohe Oluhye ọlẹ ká angị gbịgba họọ ju apyobwuna họọ yẹẹyẹẹ! Ọ họhị nyọka họ irya nyamwụ. Ịgba ọgbagba nyịlẹhị à tị kaa yẹ ọkẹkẹnị hahị ẹ-ẹpwụ nya ọhịhị lẹ. (Ọwụ. 4:11) Ịlẹhị lẹ, alodehe ka yẹhị lala o-ri ahị nyị́ ju apyobwuna ka myị́, ma iJihova á kaa yẹhị ụ-ụgbẹyị ọlịnyị kpongkpong ka. (Hib. 11:16, 38) Ụka ká ọkịlẹtụ á kpụhị enyi ọọlajị nya ẹdụrụ, ẹbyahị lee ọngọgbahị oriri, ahị kpịtịya nyori ịngịngịhyẹ á ka jẹ́-ẹ chịhị ebwo hi ọháha nya Adahị olepwoohe ẹnẹnẹhẹ ka.—Wa Ala iRom 8:38, 39.