1-2. Yehowa a masha ni gaw gara masa ni hte hkrum nga ai kun? Shanhte hpe gara hku hkra machyi shangun ai kun?

NDAI ga shadawn 3 hpe myit yu ga: Ramma hpunau langai gaw, grai sawng ai n-gun yawm ana hkamsha nga ai. Asak 50 jan sai hpunau gaw bungli n nga mat ai. Kaga bungli hpe shakut nna tam tim n mu ai. Sadi dung nna asak kaba ai nauna gaw Yehowa a magam hta shi galaw mayu ai daram n lu galaw ai.

² Dai ga shadawn kaw nna masa langai ngai hte nang hkrum nga yang, nang gaw manu n dan ai ngu hkamsha chye ai. Dai zawn masa ni gaw na a ngwi pyaw lam hpe mat mat shangun ai. Tinang hkum tinang hkungga ai lam hpe htenza shangun ai. Kaga ni hte kanawn mazum ai lam hta manghkang byin shangun ai.

3. Satan hte shi a shingkang ka-up hkrum ai ni gaw masha a aprat hpe gara hku mu mada ai kun?

³ Shinggyim masha a prat hte seng ai Satan a ningmu gaw ndai mungkan hta dan dawng nga ai. Satan gaw anhte hpe manu n dan ai ni hku nna kanawn mazum ai. Karai Kasang a ga n madat yang, si na ngu ai hpe Satan atsawm chye ai. Raitim, lawt lu lam lu na ngu Ewa hpe tsawra myit n lawm ai ga ni tsun wa ai. Satan gaw ndai mungkan a hpaga lam, mung masa lam hte nawku htung hte seng ai lam ni hpe hkang taw nga ai. Hpaga galaw ai ni, mung masa galaw ai ni hte nawku htung ningbaw ni hta masha a aprat hpe n hkungga ai Satan a lailen ni dan dawng taw nga ai gaw mauhpa n re.

4. Ndai sumhpa hta hpa lam hkaja na kun?

⁴ Yehowa gaw Satan hte n bung ai sha, anhte hpe kaja ai hku hkamsha shangun mayu nna, manu n dan ai ngu hkamsha ai shaloi shi karum ya ai. (Shk 136:23, NW; Rom 12:3) Lawu na masa ni hta, Yehowa gaw anhte hpe gara hku karum ya ai lam, ndai sumhpa hta hkaja lu na re: (1) Machyi makaw hkrum ai  shaloi (2) ja gumhpraw mayak mahkak hkrum nga ai shaloi (3) asak kaba wa ai shaloi anhte gaw Yehowa a magam gun na matu akyu n rawng ai ngu hkamsha chye ai. Shawng nnan, Yehowa gaw anhte langai hpra hpe manu shadan ai lam hpa majaw kam mai ai hpe hkaja yu ga.

5. Yehowa gaw shinggyim masha ni hpe manu shadan ai lam hpa sakse ni nga ai kun?

⁵ Anhte hpe ga yun hte hpan da ai raitim, anhte gaw ga yun hta grau nna manu dan ai ni re. (Nin 2:7) Yehowa gaw anhte hpe manu shadan ai lam chye shangun ai lam nkau hpe hkaja yu ga. Shi gaw shinggyim masha ni hpe shi a atsam ningja ni nga hkra hpan da ai. (Nin 1:27) Dai majaw, shinggyim masha ni gaw kaga yawng mayawng hta grau ai re. Mungkan ga hte dusat ni hpe up na matu shinggyim masha hpe lit jaw da ai.​—Shk 8:4-8.

6. N hkum tsup ai masha ni hpe Yehowa manu shadan ai lam gara sakse ni naw nga ai kun?

⁶ Adam mara galaw ngut ai hpang hta pyi, Yehowa gaw shinggyim masha ni hpe matut nna manu shadan ai. Shi gaw anhte yubak a matu, tsawra ai Kasha Yesu hpe gawng malai hkungga jaw ai hku nna, anhte hpe grai manu shadan ai lam madun wa ai. (1 Yh 4:9, 10) Adam a mara majaw si ra ai “ding man ai ni hte n ding n man ai ni” hpe dai hkungga a marang e Yehowa bai jahkrung ya na re. (Kas 24:15) Anhte a hkamja lam, hpaga lam hte asak aprat gaw gara hku mi raitim, shi a matu manu dan ai lam Chyum Laika hta tsun da ai.​—Kas 10:34, 35.

7. Yehowa gaw shi a mayam ni hpe manu shadan ai lam kam mai ai gara lam ni naw nga ai kun?

⁷ Anhte hpe Yehowa manu shadan ai lam kam shangun ai kaga lam ni naw nga ai. Shi gaw anhte hpe shi hpang de lau la nna, kabu gara shiga hpe anhte gara hku bai htang ai hpe mung sadi hkrup ai. (Yhn 6:44) Anhte gaw Yehowa hpang de sit sa yang, shi mung anhte hpang de sit sa na re. (Yak 4:8) Yehowa gaw anhte hpe sharin achyin ya na matu, aten hte n-gun atsam hpe mung akyu jashawn ai. Dai gaw anhte hpe manu shadan ai lam madun ai re. Anhte langai hpra gaw gara hku byin nga ai, htawm hpang de gara hku byin wa lu ai hpe mung chye ai. Shi anhte hpe tsawra ai majaw sharin shaga ai. (Gsh 3:11, 12) Anhte hpe Yehowa manu shadan ai lam grai dan dawng nga ai.

8. Shakawn 18:27-29 hta tsun da ai ga ni gaw mayak mahkak ni a ntsa anhte a mu mada ai lam hpe gara hku byin shangun ai kun?

⁸ Masha nkau mi gaw Hkawhkam Dawi hpe manu n dan ai ngu sawn la ma ai. Raitim, Yehowa gaw shi hpe tsawra ai, madi shadaw ya ai hpe Dawi chye ai. Dai zawn Dawi chye ai gaw, shi a masa lam ni hte seng ai ningmu hpe akyu shabyin ya ai. (2 Sa 16:5-7) Anhte myit daw myit hten nna manghkang ni hkrum ai shaloi, anhte a ningmu hpe Yehowa galai shai ya lu ai. Gara mayak mahkak hpe raitim tawt lai lu hkra mung karum ya lu ai. (Shakawn 18:27-29 hpe hti u.) Anhte maga hta Yehowa nga yang, kabu gara let shi hpe nawku ai lam kaw nna hpa mung n jahkring kau lu ai. (Rom 8:31) Yehowa anhte hpe tsawra nna manu shadan ai lam chye na matu, laksan masa lam 3 hpe hkaja yu ga.

9. Machyi makaw hkrum ai gaw tinang hkum tinang mu mada ai lam a ntsa gara hku akyu shabyin lu ai kun?

⁹ Machyi makaw ai lam gaw anhte a hkamsha lam a ntsa akyu shabyin lu nna, anhte gaw kade a matu mung akyu n rawng ai ngu hkamsha shangun ai. Anhte a masa gaw shadawn sharam sha re ai hpe masha ni mu ai shaloi (sh) kaga ni a karum shingtau lam hpe hkap la ra ai shaloi anhte kaya chye ai. Anhte machyi nga ai hpe kadai n chye tim pyi, anhte a masa lam gaw shadawn sharam sha nga wa ai majaw, kaya ai  ngu ai hkamsha lam hpe ninghkap ra chye ai. Dai zawn myit daw myit hten ai aten ni hta Yehowa anhte hpe n-gun jaw ai. Gara hku nna kun?

10. Ga Shagawp 12:25 hku nga yang anhte machyi ai shaloi anhte hpe hpa gaw karum ya lu ai kun?

¹⁰ Anhte machyi ai shaloi, “ngwi pyaw ai ga” gaw n-gun lu shangun ai. (Ga Shagawp 12:25 hpe hti u.) Anhte machyi tim, Yehowa manu shadan ai lam shadum ya ai kaja ai ga ni Chyum Laika hta lawm ai. (Shk 31:19; 41:3) Anhte gaw Chyum daw ni hpe hti ngut sai raitim kahtap nna bai hti yang, machyi ai majaw hkamsha ai n kaja ai hkamsha lam ni hpe ninghkap lu na matu Yehowa karum ya na re.

11. Hpunau langai gaw Yehowa a karum shingtau lam hpe gara hku lu la wa ai kun?

¹¹ Ramma hpunau Hawhe a mahkrum madup hpe myit yu ga. Shi gaw grai sawng ai n-gun yawm ana byin nga ai. Lani hte lani grau sawng wa nna, tinang hkum tinang manu n dan ai ngu hkamsha wa ai. “Ngai machyi ai majaw, masha ni ngai hpe yu ai shaloi, de a majaw ngai kaya ai ngu hkamsha na hpe n chye wa ai” ngu Hawhe tsun ai. “Nye a masa grau sawng wa ai hte maren, nye a prat mung gara hku rai mat na kun? ngu nna myit ai. Ngai grai yawn nna Yehowa kaw karum hpyi ai.” Shi hpe Yehowa gara hku karum ya ai kun? “Ngai myit maju jung na matu yak ai majaw, Yehowa gaw shi a mayam ni hpe lanu lahku ai lam tsun da ai Shakawn Kungdawn Laika kaw nna, kadun ai Chyum daw ni hpe hti na matu, n-gun jaw hkrum ai. Chyum daw nkau mi hpe shani shagu bai hti ai majaw shalan shabran lam lu ai. Aten loi mi na ai hpang, ngai mani sumsai byin wa ai hpe masha ni sadi hkrup ai. Ngai hta kaja ai ningmu nga ai hpe yu nna, shanhte n-gun lu la ai ngu nna pyi tsun ai. Nye a akyu hpyi ga ni hpe Yehowa mahtai jaw ai hpe ngai chye dat ai. Nye a masa lam hte seng ai ningmu hpe galai shai na matu Shi karum ya ai. Ngai machyi tim,  shi ngai hpe gara hku mu mada ai hte seng nna, Chyum Laika hta tsun da ai lam hpe myit maju jung ai.”

12. Machyi makaw hkrum ai shaloi Yehowa a madi shadaw lam hpe gara hku lu mai na kun?

¹² Lama na, nang machyi makaw hkrum nga yang, na a hkamsha lam hpe Yehowa chye ai lam kam mai ai. Shi hpe karum hpyi yang, na a masa hpe jaw ai hku mu mada lu na re. Na a matu Yehowa lajang da ya ai shalan shabran ai ga ni hpe Chyum Laika hta mu lu ai. Yehowa gaw shi a mayam ni hpe manu shadan ai lam madun da ai Chyum daw ni hpe myit maju jung u. Dai hku galaw yang, Yehowa gaw shi hpe sadi dung let nawku ai ni yawng hpe tsawra ai lam mu wa na re.​—Shk 84:11.

13. Bungli n lu mat ai gaw dinghku ningbaw ni hpe gara hku hkamsha shangun ai kun?

¹³ Dinghku ningbaw ni gaw, dinghku hta ra kadawn nga ai lam ni hpe madi shadaw ya mayu ai. Hpunau langai gaw shi n galaw shut tim, bungli shapraw kau hkrum ai ngu saga. Shakut nna bungli tam tim n lu ai. Dai zawn masa ni hte hkrum ai shaloi, manu n dan ai ngu shi hkamsha chye ai. Yehowa a ga sadi ni hpe myit maju jung ai gaw shi hpe gara hku karum ya ai kun?

14. Hpa lam ni a majaw Yehowa gaw ga sadi dung ai kun?

¹⁴ Yehowa gaw ayan ga sadi dung ai. (Ysh 21:44; 23:14) Shi hta dai zawn sadi dung lu ai lam ni nga ai. Hpa majaw nga yang, shi a amying (sh) arawng sadang hta madung ai majaw re. Yehowa gaw sadi dung ai mayam ni hpe lanu lahku na ngu ga sadi jaw da ai. Dai ga sadi hpring tsup na matu shi hta lit nga ai ngu hkamsha ai. (Shk 31:1-3) Dai sha n-ga, shi a nta masha ni hpe shi lanu lahku lam n nga yang, shanhte gaw yawn hkyen na, myit daw myit hten na hpe Yehowa chye ai. Anhte hpe arung arai hte wenyi lam hpe madi shadaw ya  na ngu ga sadi jaw da ai. Dai ga sadi n hpring tsup hkra shi hpe hpa mung pat shingdang n lu ai.​—Mat 6:30-33; 24:45.

15. (a) Tsa ban langai na Hkristan ni hpa mayak mahkak hkrum wa ai kun? (b) Anhte kamhpa lu na matu Shakawn 37:18, 19 hta hpa tsun da ai kun?

¹⁵ Yehowa gaw hpa majaw ga sadi dung ai hpe anhte myit dum yang, ja gumhpraw mayak mahkak hkrum ai shaloi tawt lai lu ai. Tsa ban langai na Hkristan ni a kasi ningli ni hpe myit yu ga. Yerusalem hta nawku hpung hpe zingri zingrat ai shaloi, “kasa ni hta lai nna kam sham ai ni yawng gaw, . . . shara magup hkan e bra ayai mat wa ma ai.” (Kas 8:1, JCLB) Gara hku byin nga na hpe myit yu u. Ja gumhpraw yakhkak nga na re. Hkristan ni gaw shanhte a nta ni, hpaga bungli ni hpe sum kau ra chye ai. Raitim, Yehowa gaw shanhte hpe n kabai da ai. Shanhte mung matut nna kabu gara lu ai. (Kas 8:4; Heb 13:5, 6; Yak 1:2, 3) Yehowa gaw dai sadi dung ai Hkristan ni hpe madi shadaw ya ai zawn, anhte hpe mung madi shadaw na re.​—Shakawn 37:18, 19 hpe hti u.

16. Anhte a nawku daw jau lam gaw Yehowa a matu manu n dan ai ngu gara masa gaw shadu shangun ai kun?

¹⁶ Anhte asak kaba wa ai hte maren, Yehowa hpe loi mi sha jaw lu ai ngu hkamsha wa chye ai. Hkawhkam Dawi mung asak kaba wa ai majaw, dai zawn hkamsha lam ni nga wa na re. (Shk 71:9) Yehowa gaw anhte hpe gara hku karum ya lu ai kun?

17. Nauna Jeri a mahkrum madup kaw nna anhte hpa sharin la lu ai kun?

¹⁷ Nauna Jeri a mahkrum madup hpe myit yu ga. Shi gaw Nawku Htingnu hta galaw ai gram lajang ai hte seng ai zuphpawng lung na matu saw shaga hkrum ai. Raitim, shi n sa mayu ai. Shi ndai hku tsun ai: “Ngai gaw asak kaba ai gaida jan re. Yehowa akyu jashawn na  matu ngai hta atsam mung n nga ai. Ngai gaw asung n shang ai wa re.” Dai zuphpawng garai n hpang shi ai shana hta, myit masin mahkra hte Yehowa kaw akyu hpyi tsun dan ai. Hpang shani Nawku Htingnu kaw du ai shaloi du hkra shi lung ging ai kun? n lung ging ai kun? nga nna naw myit nga ai. Lamang galaw nga ai laman, hpunau langai gaw, Yehowa sharin ya ai hpe sharawng awng let hkap la mayu ai myit gaw ahkyak htum atsam re ai hpe ahkyak shatai tsun ai. Jeri ndai hku tsun ai: “‘Ngai hta dai atsam nga ai’ ngu nna ngai myit dat ai. Nye a akyu hpyi ga hpe Yehowa mahtai jaw ai hpe chye ai majaw hkrap kau ai. Ngai hta shi hpe jaw lu ai manu dan ai lama ma nga nna, ngai hpe sharawng awng let shi sharin ya mayu ai hpe kam wa ai.” Mabyin ni hpe bai myit yu nna shi ndai hku tsun ai: “Myit tsang nna myit daw let dai lamang de ngai sa ai. Raitim, lamang ngut ai hpang hta gaw nden marai rawng wa ai, kamsham myit nga wa nna manu dan ai ngu hkamsha ai.”

18. Asak kaba wa tim anhte a nawku daw jau ai lam hpe Yehowa matut manu shadan ai lam Chyum Laika hta gara hku tsun da ai kun?

¹⁸ Asak kaba wa tim, Yehowa gaw matut nna bungli ni hpe jaw lu ai hpe kam mai ai. (Shk 92:12-15) Anhte a atsam gaw shadawn sharam sha nga nna, loi mi sha lu galaw tim, dai gaw ahkyak n re ai sha, Yehowa gaw shi a magam hta shang lawm ai hpe manu shadan ai lam Yesu sharin ya wa ai. (Luk 21:2-4) Dai majaw, galaw lu ai lam hpe sha myit maju jung u. Ga shadawn, ndai lam ni hpe nang galaw lu ai: Yehowa a lam tsun dan ai, hpunau nauna ni a matu akyu hpyi ya ai, sadi dung lu na matu kaga ni hpe n-gun jaw mai ai. Yehowa gaw nang hpe shi a shingdep shingtau hku nna mu mada ai. Nang galaw lu ai lam ni a majaw n re ai sha, shi hpe sharawng awng let madat mara ai majaw re.​—1 Ko 3:5-9.

19. Roma 8:38, 39 hku nga yang hpa hpe anhte kam mai ai kun?

¹⁹ Anhte a nawku daw jau ai lam hpe manu shadan ai Yehowa Karai Kasang hpe nawku lu ai majaw chyeju dum ga ai. Shi a myit ra ai hpe galaw lu ai atsam nga hkra anhte hpe hpan da ai. Jet ai nawku daw jau lam gaw, anhte a prat hpe myit dik lam lu shangun ai. (Shr 4:11) Mungkan gaw anhte hpe manu n dan ai ngu mu mada tim, Yehowa gaw dai hku n re. (Heb 11:16, 38) Machyi makaw ai, ja gumhpraw yakhkak ai, asak kaba wa ai majaw anhte myit daw wa yang, sumsing lamu Kawa a tsawra myit hte tsan mat hkra hpa mung n lu galaw ai hpe dum u.​—Roma 8:38, 39 hpe hti u.