1-2. Ovapiya vaJehova vahapu ova taalela eenghalo dilipi, naasho osha etifa oidjemo ilipi?

DILADILA koihopaenenwa itatu tai shikula: Omumwatate omunyasha oku na oudu wa kwata moiti oo hau mu ningifa a kale ehe na eenghono. Omumwatate ha longo noudiinini womido di dulife 50 a kanifa oilonga, ndele ina mona oilonga imwe fiyo opaife. Omumwameme omunamido omudiinini iha dulu vali okulonga shihapu moilonga yaJehova ngaashi nale.

² Ngeenge owa taalela imwe yomeenghalo odo twa tumbula, otashi dulika u kale u udite uhe na oshilonga. Eenghalo da tya ngaho ohadi tu kanififa ehafo, hatu kala tu udite tuhe na oshilonga nohadi tu ningifa tu kale tu na oupyakadi novanhu vakwetu.

3. Satana nosho yo ovo ve li koshi yenwefemo laye ova tala ko ngahelipi ovanhu?

³ Ounyuni ou otau xumifa komesho etaleko laSatana li na sha nonghalamwenyo yovanhu. Satana oha ningifa ovanhu va kale ve udite vehe na oshilonga. Okwa li a ningifa Eva a nyone kuKalunga nonande Satana okwa li e shii kutya ota ka fya ngeenge ina dulika. Satana oye ta xumifa komesho oipindi, eepolotika nosho yo omalongelokalunga omounyuni ou. Nomolwaasho itashi kumwifa eshi ovanangeshefa, ovanapolotika nosho yo ovawiliki vomalongelokalunga inava lenga ovanhu nokave na ko nasha navo.

4. Oshike hatu ka kundafana moshitukulwa eshi?

⁴ Mepingafano naasho, Jehova okwa hala tu kale tu udite kutya otu na oshilonga momesho aye, nomolwaasho he tu yambidida ngeenge twa taalela eenghalo didjuu odo hadi tu ningifa tu kale tu udite tuhe na oshilonga. (Eps. 136:23; Rom. 12:3) Moshitukulwa eshi ohatu ka kundafana nghee Jehova he tu kwafele ngeenge twa taalela eenghalo tadi shikula: (1) Ngeenge  hatu ehama sha kwata moiti, (2) ngeenge ouxupilo tau kande omapunya, nosho yo (3) ngeenge oukulupe tau tu ningifa tu kale tu udite kutya osho hatu longo moilonga yaJehova itashi kwafa sha. Ashike tete natu ka konakoneni kutya omolwashike tu na elineekelo kutya keshe umwe womufye oku na ondilo momesho aJehova.

5. Oshike tashi ulike kutya ovanhu ove na ondilo momesho aJehova?

⁵ Atusheni otu na ondilo momesho aJehova nonande otwa dja mondwi yedu. (Gen. 2:7) Natu ka taleni komatomheno amwe oo tae tu ningifa tu mone kutya otu na ondilo momesho aye. Okwa shita ovanhu hava dulu okuhopaenena omaukwatya aye. (Gen. 1:27) Onghee hano, okwe tu shita monghedi ye likalekelwa inatu fa oishitwa ikwao, nokwe tu pa oufemba wokupangela edu nosho yo oinamwenyo. — Eps. 8:4-8.

6. Oumbangi vali ulipi tu na oo tau ulike kutya Jehova okwa lenga ovanhu ovalunde?

⁶ Ovanhu natango ove na ondilo momesho aJehova nokonima eshi Adam a nyona. Oku tu hole neenghono, nomolwaasho a yandja Omona waye omuholike, Jesus, a ninge eyambo omolwomatimba etu. (1 Joh. 4:9, 10) Omolwekuliloyambo olo, Jehova ota ka dula okunyumuna “ovayuki novalunde,” ovo va fya omolwomatimba aAdam. (Oil. 24:15) Eendjovo daye oda ulika kutya otu na ondilo momesho aye kashi na nee mbudi kutya katu na oukolele, oyuuyemo ile otu li ovanamido. — Oil. 10:34, 35.

7. Omatomheno elipi vali taa ulike kutya ovapiya vaJehova ove na ondilo momesho aye?

⁷ Paife otwa mona omatomheno oo taa ulike kutya otu na ondilo momesho aJehova. Okwe tu ehenifa popepi naye, noha didilike nghee hatu linyenge konghundana iwa. (Joh. 6:44) Ngeenge otwa ehene popepi naJehova, naye ota ka ehena popepi nafye. (Jak. 4:8) Natango Jehova oha kongo efimbo nokuninga eenghendabala opo e tu honge, naasho otashi ulike kutya otu na ondilo momesho aye. Oku shii kutya otu li ovanhu va tya ngahelipi, nanghee hatu dulu okuxwepopala. Ohe tu pe outekuduliko molwaashi oku tu hole. (Omayel. 3:11, 12) Oo kau fi tuu oumbangi oo tau ulike kutya otu na ondilo momesho aJehova!

8. Eendjovo odo di li mEpsalme 18:27-29 otadi tu kwafele ngahelipi tu kale tu na etaleko liwa li na sha nomashongo oo hatu shakeneke?

⁸ Vamwe ova li va tala ko ohamba David ihe na oshilonga, ndele oya li i shii kutya Jehova oku i hole nohe i yambidida. Naasho osha li sha kwafela David a kale e na etaleko liwa li na sha nonghalo omo a li. (2 Sam. 16:5-7) Ngeenge tu udite tuhe na oshilonga ile twa taalela omashongo, Jehova ota dulu oku tu kwafela tu kale tu na etaleko liwa notu dule okufinda eshongo keshe. (Lesha Epsalme 18:27-29.) Kape na osho tashi tu imbi tu longele Jehova nehafo, molwaashi ote tu yambidida. (Rom. 8:31) Paife natu ka konakoneni eenghalo nhatu odo tadi tu kwafele tu dimbuluke kutya Jehova oku tu hole nokwe tu lenga.

9. Ouyahame otashi dulika u tu ningife tu kale tu na etaleko la tya ngahelipi li na sha nafye vene?

⁹ Ouyahame ohau tu kumu pamaliudo, naasho ohashi tu ningifa tu kale tu udite tuhe na oshilonga. Otashi dulika tu kale twa fya ohoni ngeenge otwa didilike kutya ovanhu ove shii omangabeko etu ile ngeenge ohatu kongo ekwafo kuvo. Nokuli nonande ovanhu kave shii kutya ohatu ehama, otashi dulika tu kale  twa fya ohoni molwaashi ihatu dulu vali okulonga shihapu. Jehova ohe tu tu omukumo momafimbo madjuu. Ngahelipi mbela?

10. She likolelela kOmayeletumbulo 12:25, oshike tashi dulu oku tu kwafela ngeenge hatu ehama?

¹⁰ Ngeenge hatu vele, “ondjovo yehekeleko” otai dulu oku tu twa omukumo. (Lesha Omayeletumbulo 12:25.) Jehova okwe tu lombwela oinima ihapu mOmbiibeli, oyo tai tu dimbulukifa kutya otu na oshilonga momesho aye kashi na nee mbudi kutya ohatu ehama. (Eps. 31:19; 41:3) Ngeenge otwa lesha nokuleshulula eendjovo daJehova da nwefwa mo, ote ke tu kwafela tu ungaunga nomalimbililo oo tu na omolwouyahame.

11. Jehova okwa kwafela ngahelipi omumwatate umwe?

¹¹ Diladila koshimoniwa shaJorge. Eshi a li munini, okwa li a kwatwa kouyahame oo wa li tau ende nokunaipala, nowa li we mu ningifa a kale e udite ehe na oshilonga. Jorge okwa ti: “Kanda li ndi shii ngeenge ouyahame wange otau ka ningifa nge ndi kale nda fya ohoni. Ouyahame wange owa li tau naipala neenghono, nonda li handi lipula nghee tau ka lundulula onghalamwenyo yange. Onda li nda nyemata unene nonda li nda pula Jehova a kwafele nge.” Jehova okwa li e mu yambidida ngahelipi? Jorge okwa ti: “Molwaashi kanda li handi yandje elitulemo, onda li nda ladipikwa ndi leshe eevelishe dinini mEpsalme odo tadi ulike kutya Jehova oku na ko nasha novapiya vaye. Onda li handi leshulula eevelishe odo efiku keshe, noda hekeleka nge. Lwanima, ovanhu ova ka didilika kutya onda hafa. Ova ti kutya ohashi va pameke ngeenge ve wete nda hafa. Onda mona kutya Jehova okwa nyamukula omailikano ange. Okwa kwafela nge ndi lundulule onghedi omo handi litale ko. Onda hovela okuyandja elitulemo kwaasho Eendjovo daye da popya shi na sha nanghee  ha tale nge ko kashi na nee mbudi kutya ohandi ehama.”

12. Ngeenge to ehama, oshike to dulu okuninga opo Jehova e ku kwafele?

¹² Ngeenge oto ehama, kala u shii kutya Jehova oku wete onghalo omo u li. Mu pula e ku kwafele u kale u na etaleko liwa li na sha nonghalo omo u li. Konga eendjovo tadi hekeleke mOmbiibeli. Yandja elitulemo keevelishe odo tadi ulike kutya Jehova okwa lenga ovapiya vaye. Ngeenge owa ningi ngaho, oto ka mona kutya Jehova okwa lenga ovapiya vaye aveshe ovo have mu longele noudiinini. — Eps. 84:11.

13. Omutwe woukwaneumbo otashi dulika u kale u udite ngahelipi ngeenge owa kanifa oilonga?

¹³ Omitwe domaukwaneumbo oda hala okuwanifa po eemhumbwe domaukwaneumbo ado. Ashike omumwatate ota dulu okukanifa oilonga nonande ina ninga sha sha puka. Otashi dulika a ninge eenghendabala a konge imwe, ashike okwa xulila kekwena la fita. Omolweenghalo odo, otashi dulika a kale e udite ehe na oshilonga. Ongahelipi omaudaneko aJehova tae ke mu kwafela ngeenge okwa yandje elitulemo kuo?

14. Jehova oha wanifa po omaudaneko aye omolwomatomheno elipi?

¹⁴ Jehova oha wanifa po alushe omaudaneko aye. (Jos. 21:45; 23:14) Ohe shi ningi omolwomatomheno onhumba. Lotete, omwa kwatelwa edina laye. Jehova okwa udaneka kutya ota ka fila oshisho ovapiya vaye ovadiinini, naasho oshi li oshinakuwanifwa shaye okuwanifa po eudaneko olo. (Eps. 31:1-3) Shikwao vali, Jehova oku shii kutya ohatu ka uda nai ngeenge okwa kala ina fila oshisho ovo ve li oshitukulwa shoukwaneumbo waye. Okwa udaneka kutya ote ke tu pa ashishe osho twa  pumbwa opo tu kale nomwenyo notu mu longele noudiinini, nokape na osho tashi mu imbi a wanife po eudaneko laye. — Mat. 6:30-33; 24:45.

15. (a) Eshongo lilipi Ovakriste vomefelemudo lotete va li va taalela? (b) Eshilipaleko lilipi tali hangwa mEpsalme 37:18, 19?

¹⁵ Ngeenge otwa kala hatu diladila kunghee Jehova ha wanifa po omaudaneko aye, ohatu dulu okukala nelineekelo kutya ote ke tu kwafela tu lididimikile omashongo opamaxupilo. Diladila koshihopaenenwa shOvakriste vomefelemudo lotete. Eshi eongalo lomuJerusalem la li tali hepekwa, ‘ovahongwa aveshe, kakele kovayapostoli, ova li ve lihana.’ (Oil. 8:1) Osho osha li she va kuma ngahelipi? Ouxupilo owa li tau kande omapunya, notashi dulika Ovakriste va li va kanifa omaumbo neengeshefa davo. Ashike Jehova ka li e va efa, nokava li va kanifa ehafo lavo. (Oil. 8:4; Heb. 13:5, 6; Jak. 1:2, 3) Jehova okwa li a yambidida Ovakriste ovo ovadiinini, nafye ote ke tu yambidida yo. — Lesha Epsalme 37:18, 19.

16. Oshike tashi dulika shi tu ningife tu kale tu udite kutya Jehova ina lenga onghedi omo hatu mu longele?

¹⁶ Eshi hatu ende hatu kulupa, otashi dulika tu kale tu udite kutya ihatu longele vali Jehova sha wana. Ohamba David nayo otashi dulika ya li hai kala i udite ngaho eshi ya li mefimbo loukulupe. (Eps. 71:9) Ongahelipi Jehova ta dulu oku tu kwafela?

17. Oshike hatu lihongo moshimoniwa shomumwameme Jheri?

¹⁷ Natu taleni koshihopaenenwa shomumwameme Jheri. Okwa li a shivwa opo a ka kale pomutumba waavo tava deulilwa okukaleka Olupale lOuhamba monghalo iwa, ashike ka li a hala okuya. Okwa ti: “Onda kulupa, ame omufiyekadi, nokandi na nande  owino oo Jehova a pumbwa. Ame omunhu wa nafangwa.” Oufiku oo wa tetekela efiku ledeulo, okwa li a ilikana kuJehova nokwe mu mbubulila omutima waye. Eshi a fika pOlupale lOuhamba, okwa li natango te lipula ngeenge okwa pumbwa ngoo okukala pedeulo olo. Pomutumba oo, omupopi umwe okwa li a twa omufindo oshitwa osho kutya owino wetu wa fimana oo okukala twa halelela okuhongwa kuJehova. Jheri okwe lipopila a ti: “Ondi na owino wa tya ngaho. Onda hovela okulila molwaashi onda mona kutya Jehova okwa nyamukula eilikano lange. Okwa li ta shilipaleke nge kutya ondi na ondilo momesho aye, nokwa li a halelela okuhonga nge.” Jheri okwa popya shi na sha nanghee a li e udite ofimbo omutumba inau hovela a ti: “Onda li nda tila, nda teka omukumo nonda li ndi udite ndihe na oshilonga. Ashike eshi nda dja mo, kanda li ndi na oumbada, nda tuwa omukumo nonda li ndi udite ndi na oshilonga.”

18. Ombiibeli oya ulika ngahelipi kutya Jehova ota twikile okukala a lenga onghedi yetu yoku mu longela nonande otwa kulupa?

¹⁸ Eshi hatu ende hatu kulupa, ohatu dulu okukala nelineekelo kutya ope na oilonga imwe oyo Jehova ta dulu oku tu pa tu longe. (Eps. 92:12-15) Jesus okwe tu honga kutya nonande oinima oyo hatu longo otai monika ya fa ihe na oshilonga ile inini kufye, Jehova okwe i lenga. (Luk. 21:2-4) Onghee yandja elitulemo kwaasho to dulu okuninga. Pashihopaenenwa, oto dulu okupopya kombinga yaJehova, okukwatela ovamwaxo momailikano oye, nokutwa vamwe omukumo va kale ovadiinini. Jehova okwe ku tala ko u li omunailonga pamwe naye, hamolwaashi ho dulu okuninga oinima yonhumba, ndele omolwaashi wa halelela okudulika kuye. — 1 Kor. 3:5-9.

19. Eshilipaleko lilipi tali hangwa mOvaroma 8:38, 39?

¹⁹ Inatu pandula tuu eshi hatu longele Jehova Kalunga, oo a lenga onghedi yetu yoku mu longela! Okwe tu shita tu longe ehalo laye, nelongelokalunga lashili olo hali tu etele ehafo. (Eh. 4:11) Nonande ovanhu mounyuni ove tu tala ko tuhe na oshilonga, Jehova hasho e tu tala ko ngaho. (Heb. 11:16, 38) Natu dimbuluke alushe kutya kape na osho tashi dulu oku tu tukula ko kohole yaTate yetu womeulu kashi na nee mbudi kutya ohatu ehama sha kwata moiti, ouxupilo tau kande omapunya, ile otwa kulupa. — Lesha Ovaroma 8:38, 39.